#نزال_لمولاتنا_العليلة ع

بويه اعلة بابگ  .. انطر تجيني
###################
طفله واعاين ليش عالرايح وجـاي
بلكت يمرني حسين ويرجع ويـاي
يـوم العفتني هواي ضلمتني دنيـاي
عطشانه بس لحسين مارايده الماي
وادم ينـامون  .. وانـه ابونيني
بويه اعلة بابگ   .. انطر تجيني
######################
كل ضني كون وياك ارحل واسافر
ما ضنتي بفد يوم عنـي تهاجـر
نار الفـراگ هواي كاسرلي خاطر
حالي بغيابك صار حال المگابر
ويه الهوه الهاب  .. ارسل حنيني
بويه اعلة بابگ  ..  انطر تجيني
#########################
شمعنه عفتني هنا من دون اخوتي
تدري بغيابك ريت اتمنـه موتـي
من البچي مبحوح يابويه صوتي
حيلي تهدم بيك چنت انته قوتي
ويـلي  بغيابك  .. ضاعت سنيني
بويه اعلة بابگ  .. انطر تجيني
###########################
كون الزمان ايعود واتروه عطفه
عمري زغير وصار كل عمري نزفه
من ايدي وسفه تروح يابويه وسفه
عگبك يضي العين ما اگدر اغـفه
والله بغيابـك  .. ماتغفه عيني
بويه اعلة بابگ .. انطر تجيني
############################
اتخيل ابكل يوم طاري اهلنه
واتمنه كون البيت يرجع يلمنه
لا مره مليناه ولا هـوه ملـنه
بس الزمن غدار طشر زلمنـه
اصفگ على الراح  .. ايساري ويميني
بويه اعلة بابگ ..  انطر تجيني

#سيد_محسن_الجابري