#مولاتي_ام_البنين

قرآن عايف بيتي
أنسان رافع صيتي
عبد الله وعون وجعفر ماهموني
بس كون احسين اليرجع نور عيوني

_

بسم الله الرحمن بسم الله المنان
بسم الله السُبحان أبدأ وناتي
هاجر من بيتي النور هاجر مني بعاشور
عايف بيتي مهجور عايف شيباتي
مثل الزهرة العنوان ابني دار الاحزان
وابچي لفگد القرآن تنزل دماعاتي

ياريت انه اشتمه
بالبيت شبگه بجسمه
كلما اذكر وجناته يُصفر لوني
بس كون احسين اليرجع نور عيوني

____


اسال كل النجمات ياهو المات وما مات
ياربي شهالأهات معذوره احزاناني
معذوره بالعباس معذوره بين الناس
انطيت أربع حراس تريبت إيماني
ما أسال عنهم وين بس يرجع كون حسين
سالم يا نور العين يرجع قرآني

والله ما اتحمل
بال آه ورگه و اذبل
اذبل ما اذبل خلي يصير جنوني
بس كون احسين اليرجع نور عيوني
_

يرجع سالم مهيوب يرجع لابس هالثوب
خيطته بدمع أيوب يدري ما يدري
تطلع من روحي الروح وأشعر راسي مذبوح
من يبدي بيه النوح استصغر كُبري
ما يدري بيه اشصار بضلعي نابت بسمار
بابي حارگته النار وأيدي اعله ضهري

خل نگول ميت تالي
معقول ناسي احوالي
لاما أظن وانه الاعرف إثم أضنوني
بس كون احسين اليرجع نور عيوني
_

يا ملائكة اليل يا حبيبي جبريل
ماظل بعيوني حيل خبرني بحسين
اترس من دمعي الجود وگله گلبي موجود
بس گله يمته يعود بوسه بالعنين
اتنفس هالآيات احسيني اليله مات
جبريل شهالطعنات خبرني السهمين

مذبوح أشعر راسه
مجروح ابعباسه
عباسي ولا جعفرها او ارفض عوني
بس كون احسين اليرجع نور عيوني
_

ضيعت انه الإنسان ضيعت انه القرآن
وانطيت أربع شُبان الزينب حمايه
واحدهم كله إحساس واحدهم رفعت راس
والكافل العباس شايل الرايه
لو عدلين اوطيبين هم افديهم لحسين
اوتوگع منهم جفين قبل السبايه

اشتاگ أسمع يمه
وفراگ ابني اشتمه
ما انسه اولادي و گلهم لا ينسوني
بس كون احسين اليرجع نور عيوني

الشاعر محمد الظالمي
__