مطمئن والله ضميري عالصّراط المستقيم
وإبختم حيدر أميري. أطب جنات النعيم

ماتمسني الحاطمه والولي حامي الحمه


الله مفتاح الجنان بأيده حاط
حيدر الاسمه إنزرع بين النياط
المايحبه والله مايعبر صراط
الاّ يدخل الجمل سمّ الخياط

الخلك كلهه عطاشه. يوم تبقه بلا مجير
مايحضره هناك حاشه. كلمن أيحبه الامير

مطمئن يوم الضمه. والولي حامي الحمه
00

أسم أمير المومنين الكلّه شوگ
الغير حيدر هالاسم لا مايلوگ
قاعده من الله هاذي اوحُبه طوگ
همزه أسمه وكلهه جوّه وهوّ فوگ

شنهو معناها عليِنِه من رفع أيده الرسول
المايريده مايريده. الباري والزهره البتول
روحي بسمه هايمه. الولي حامي الحمه
00

الولايه الله عرضلي وآنه روح
ياعلي لبيك صحت وآنه أروح
فدوه لمداسك يبلسم للجروح
ياعلي يل بسمك الجنّه تفوح

إبدماي حروفه تمشي. وبالقيامه ماكو خوف
العنده حيدر عنده كلشي. والله لسمه ماأعوف
أبحبه روحي سالمه الولي حامي الحمه
00


حيدر أبحصنه اليطب لا مايتيه
واليحبّه بكلبه ولسانه وجيه
يصبح ويدخل جنان الباري بيه
وحتّه جبريل العرش هم يندعيه


التّبوس آثار مشيه كل ملائكة السماء
مايضيع الي يحبّه. اي وحگ نور الكساء
هو باب المكرمه الولي حامي الحمه
00

ياعلي هل كلمه الترطب اللسان
واْحس روحي بياعلي تغرگ حنان
وينتعش بيهه الكلب أسمه ال أمان
واشهدُ أنّ علي ملح الاذآن

العاشت برمشه اليتامه بسمه ذكر الانبياء
هوّ عامود الامامه. اي وحگ رب السماء

بي أماني وفاطمه. والولي حامي الحمه

00

الماعليهم خوف لاهم يحزنون
الگعدوا أبخيمة علي وبي يندبون
والزجيّه عالارائك يحشرون
بماي كوثر والله باجر يرتوون

شماكثر بالدنيا نسكه. كل بشر باجر يحير
ماختم لو والله صكه. حيدر وماله مجير
بيده يوم الخاتمه الولي حامي الحمه
#خادم الحسين سيد سجاد العميدي
2020 /4/ 18

يالرتبتك نجم. خادم علي وگلبك سمه
ياقنبر العلــــم علّمني خدمة فاطمـــــه

وإنته المعلِِّم
ومنيتي إخدِم

يامرجع الخدمه ونعِم بعد العفو أتكلّم
شنهو اليثبتلي قدم بالخدمه أريد أتعلّم
يامن خدِم بحر الكرم من حيدر إنته أمعلّم
ودگيت بابك سيدي خادم أصيرن أحلم

يالناگع بوفــــه وخالي أْمن الاغيوم الكلب
علْمِني سيدي الخيمة الخدمه أطــــــب

وبحيدر أقسِم
أمنيتي اخدِم
. 00

آنه أدري ياتاج الخدم. أتًطلعه من الضلمه
كلمت تقبله أم الخدم وإْدخله نور الخدمه
أشكبره خادم فاطمه. اوتتمنّه تلفض إسمه
حته الملا ئك بالحشر. وتحلم إبثوبه إتشمه

يبدي العمر الي بالخدمه لمّن أنقبل
والخادم بعلي. وچف الزجيّه ينكفل

باللطمه أحلم
ومنيتي أخدم
.. 00

الزّهره خدمتهه وطن والرايد أيطب ليهه
أوّل أساس بهالدرب تخلُص يخادم بيهه
والنيّه بالخدمه عمد مثل النده خلّيهه
وترفعه فاطم مرتبه اليخدمهه ومصفيهه

شما هالكلب نقه. شانه عله الحد السمه
الخادم وقســـم عابس تحسبه فاطمه

والزهره تعلَم
أمنيتي أخدم
.. 00

يصبح اليخدم فاطمه كوثر تواضع لازم
بعيونه مو من الجبل. إيباوع إعله الوادم
ال يلبس إثياب الفخر وبراسه تاج الخادم
بعماله لو يرضه العلي. شانه جبل يم فاطم

لو ساقك العلي. للخدمه وإسمك إنكتب
خادم صرت علم وعله الزجيه تنحسب

بالخدمه إحِرِم
ومنيتي أخدم
00
الله اليوصي وفاطمه بالك يخادم بالك
لاتلفض ال آنه أبد بيهه رماد أعمالك
ولو صارت افعالك جبل لا تنعجب بفعالك
يالخادم وخلي العمل. يحجي الك منوالك

كلمن يحب صدگ لمّ الخدم رتبه حضه
واليرضي فاطمه. رب السماء أعليه رضه

كل عمري أضلم
ومنيتي أخدم
00

تحسبني خادم فاطمه وإبضل عزاهه إتضمني
إدعيلي ياخادم علي. ونجمه بسماهه اتخلني
وحرگة كلب عالمنذبح. ودمعه ولطم ترزقني موخادم انه اصبح ملك من فاطمه إتوفقني

وچوي الجفن دمع. ياقنبر إعله المنسلب
وعله المتن يضل بالحسره للدّوم الكلب

والزهره تكرِم
ومنيتي أخدم

#خادم الحسين سيد سجاد العميدي
٢٠٢٠ /٤ / ٢٢

لسان حال مولاتي زينب(ص) في ليلة رحيل مولاي أمير المؤمنين(ص)
—————————————————
جمّع ولد فاطم سوا
من اقترب موته علي
والماهو منه برا گال
وعيني درتهه لكافلي

گلاله لااااا ياابالفضل—-ابقا انت شيال الحمل
لهل العايله سگاي اريد—يسگيهه لمن ينسئل

كلالي يازينب—منهو التريدين
كتله ابو فاضل—يخليني بالعين

حيدر—اشر على العباس گله الزم ايديهه
حيدر—گلاله مااريد الهوا لو مر يمس بيهه
حيدر—گلاله حطها بعينك وشتريد لبيهه
—————————————————
حجاية زلم انطا لبوي
كض شاربه ليه وقسم
لو راح حيدر للگبر
عندي اخو عندي علم

بعيونه باوع للگمر—-صح منهضم بس ابتشر
سبل ادي وَجه وجه—امسلم امره للقدر

اعيونه تتهامل—بدمومه سابح
شفته يعاينلي—لعيوني شابح

گتله—يابويه امن لو رحت صرت انه مكفوله
گتله—كفالي صار ابوالفضل وبذمته مشكوله
گتله—هذا العلم بعدك علي العباس مسوؤله
—————————————————
عافتني امي امن الزغر
وهسه ابوي الهه نوا
ضليت لا اااام لا ااابو
مكسوره گوا اشتم هوا

يم رجله وانه اتوسله—ينهضلي كمت اتأمله
روحه انغمت من الالم—يفز بذَكرتي لكربله

تتغير الوانه—من طاري الضعون
شمالك اگلله—يا بعد العيون

ساكت—تنزل دمعته بگلبه ضم كل السوالف
ساكت—ماراد يهضمني بكلامه اعليه خايف
ساكت—كلشي سكت بس الجرح البراسه نازف
—————————————————-
شيريد من عندي الزمن
عذبني كل هذا العذاب
مابيه حيل اعله الحزن
ليهسه ياكل بيه باب

بمصاب امي اتمرمرت—وامصابه شيبني وطحت
شظل بيه باجر كربله—من هسه انه حدبت

هذا الجبل حيدر—بفراشه طايح
ياهو اليصبرني—والخيمه رايح

ظلمه—البيت لو ما حس ابوي وامي اسمعه
ظلمه—حيدر يروح لكبرا يطفي منّه شمعه
ظلمه—بيت الحزن سمونه كد ماذبينه دمعه
—————————————————-
#خادم الحسين محمد منير المياحي

الى كل من يحاول ان يمنع العزاء وهو عزاء مولاتي الغريبه زينب(صلوات الله عليها) ومع اقتراب شهر الدموع

——————————————————-

العاشك.تلجمه جروحه
يكطع.معقوله نوحه
عاشت.حسرته بروحه—مايترك العزاء

اليمنع.ماعنده غيره
ماكو.نظره جبيره
وانه.عندي اميره__مكيوده من كربلاء

يذبل العاشك—لو ما بجه لحبيبه
حالي وعيوني—تفسر حجي المصيبه
بس إتركوني—ابجي عله الغريبه—زينب

اشكي لابو فاضل— منع العزه اعليهه
راحت بلاا كافل—محد بجه ليهه

ادخلوها بسلامٍ آمنين-هاي المجالس رزق الحسين
——————————————————-

حاير.بشهر الرزيه
شحجي.واقبل عليه
ماكو.دمعه نديه—ولا ينتشر سواد

الغربه.تترس كياني
تايه.ياهو الگاني
شمالك.يكله لساني—مااهوى بس حداد

ثوبي حضرته—احضر الى العزيه
اليرضه مايرضه—مو كيفه كيف اديه
الطم وانحب—حزني عله السبيه—زينب

هضمت طفل هضمي—دمع الحزن غالي
ابجي احترك دمي—عقلي رضا بحالي

ادخلوها بسلامٍ آمنين-هاي المجالس رزق الحسين
——————————————————-

الكم.وليَه ديني
عمري.كله وسنيني
يبطل.عاذه ونيني—حبل الحزن طويل

محد.حارگته ضلمه
ياهو.عاشكله هضمه
منكم.چاويته حرمه—ونوب اخت كفيل

حقه اليمنعه—مايعرف الشي مايثمنه
لازم نحارب—عالمجلس بهاذه زمّنه
الله خالقنه—نبجي على ام المحنّه—زينب

نبجي عله الهزله—واعله الغربه والناگه
جرح السبي حله—بس وكت الملاگه

ادخلوها بسلامٍ آمنين-هاي المجالس رزق الحسين
——————————————————-

الجمره.والبيهه يفهم
هذا.بالحُب اعلم
اني.للخيمه اسلمْ—واشهد عله الدموع

اليعرف.معنه عزاها
الدمعه.بخده چفاها
الدنيه.يمهه شفاها—خل تلتم الجموع

كيفه اليواسي—كيفه الي مايحضر بعد
اليدخل المجلس—يقرا عله الدنيه الرغد
بصرخه يازينب—منج يمولاتي مدد—زينب

الدمعه عله الخيمه—هيه احد اعراضي
وني عله الهيمه—هوا اكبر امراضي

ادخلوها بسلامٍ آمنين-هاي المجالس رزق الحسين
——-————————————————-
#خادم الحسين محمد منير المياحي

الكاع بخوف كامت تشاور الماي
تنشف كصْتك العباس لو جاي
من يوصلنه زلزال
ابوفاضل لوصال
يابالفاضل.......... يابالفاضل

1
على وجوه الورد صبح نده العباس
مو بس الترافه وحجيه كله احساس
كل نكلت جدم خضر مكانه الياس
يهنياله اليصبح بوجهه من الناس


جوري بعطره كام يهب على الكوم
اليوصل يمه كام يطيح ويكوم

حرز لازم ينشال
ابو فاضل لوصال

2
ال زينب صاير العباس عكازه
تتوجه علي لو يوم تتوازه
ينطي الروح لو بس طلبو اعزازه
الزينات اعلى وجهه اندرزن ادرازه

يالمخيط الكلايف بيدك اخياط
ومرَّضع وفه بايام الكماط

يتضعضع تره الحال
ابوفاضل لوصال

3

باوع للحسين بنضره مال اوداع
وفر كلبه اعلى اخيه وصار كلبه شراع
مشه وبجدمه من يمشي يطك نعناع
واهتز بيهه كلشي بثكله هاي الكاع

ذكر كدامه ضل عطشان الحسين
وبتوت الكلب كطعهن البين

كلوله الحمل مال
ابوفاضل لوصال

4
خزر نهر الفرات ونشفه بخزره
ويكل الزينب افدي اليمنه واليسره
غضب من شاف اخيته بعينهه العبره
ركض والجيش جابه بيمنته مأسره


شتترجه الكفيل وطاب ليهم
نار ومن سقر مشتعله بيهم

ايضل دمعهم همال
ابو فاضل لوصال

5
زلمه بوجهه حيدر بالكفه الكرار
علي يعني بوكفته منين ماتندار
بس اعمامه لبسه وبيده ذوالفقار
من كل الجهات تشوف حامي الجار

أمير الماي كامو صاحو اعلي
تطير اكلوبهه الناس التحاجي

ها عينه أعلى العيال
ابو فاضل لوصال

6
من يوصل علينه الكافل بطوله
ينشفها الكصص وتصير مذلوله
مدخن من يطبهه صاله بصوله
موش ازلام صاح وشرِّدو ذوله

طبهه ويستر الله اليوم منهه
تموج الكاع جن جيوش اجنهه

الهه يتراوه اشكال
ابو فاضل لوصال

#خادم اهل البيت ع الشاعر محمد العمري

وي الهوه اشتم...... حزن وكدر كون
كلبي تعلم ...... ومسكته العيون
وع البلكت وع الياريت
ماتطفه شمعه من البيت
واعبر محرم
1
ركض كلبي وسبكني وراح مستعجل على احزانه
اليروح بعيد عن البيت يوصي اعليه جيرانه
اوصيمن على الباقين شماته الديره مليانه
الكلوب الحنينه دوم حركه وضيم شبعانه
وي روحك بليل حلوه السوالف
وتشهدلي الايام من الرجعه حالف
للباري كمت وصليت
ماتطفه شمعه من البيت
واعبر محرم

2
مشدوه الفكر والحال بين امشي ارد اردود
خاف اوصل واشوف هناك عيالي بالحبل ومشدود
وزينب خايف من انطيح على الغبره تخرط خدود
عسى لاصاير ولادار ولايلفن ليالي السود
فر فرة الطير كلبي ويالضعون
وبدري عباس صايرلي العيون
بالروحه اضن توازيت
ماتطفه شمعه من البيت
واعبر محرم

3
ربعي وكلهم الوليان صارو بالمسير حزام
بوكت الموزمات ارماح كلهه تصير بالكدام
ضعون وشيخهه العباس شتضن هم مثلهه ازلام
كل مايلفي ليلنه الليل كمر هاشم يضوي كام

اعكال العلى الراس ربعي واخوتي
وكبل اليطيحون تمنيته موتي
وفراك ماكو تمنيت
ماتطفه شمعه من البيت
واعبر محرم
4
رايح واشتريت الكاع وادري من اندفن بيهه
النواويس الحزن والضيم ماي ومنجفي اعليهه
زينب كل صباح هناك ترد روحي من الاكيهه
يريت الموت يلفيني ولاشوفن بواجيهه
شيبات الفراك حتى بدليلي
اكضيهه حسبات مانمته ليلي
من اذكر عليله بلبيت
ماتطفه شمعه من البيت
واعبر محرم
5
بالله احنه زلم ونكول كلشي يصير سهله النه
بس حاجوني عالنسوان شلون الدرب يمشنه
غربه وليل والعاكول يبزهن من يدوسنه
ودرب الطف سموم وحار ماضنهن يحملنه
مدللهن هواي رايح دلالي
ويتعب الحال فكد الغوالي
ليامي ذيج اشتاكيت
ماتطفه شمعه من البيت
واعبر محرم
6
المراجب من مشت لليوم زينب تمشي بالكوه
تمشي وي الضعن بهداي سلوه وهيبت السلوه
اكلهه خاف رك الحيل تكلي يروحلك فدوه
شما اتعب تكول ارتاح راحه التعب لليسوه
من حكه اليريد يتباهه باخته
منبع كلافات صار بحظرته
موفدوه سبعه انداريت
ماتطفه شمعه من البيت
واعبر محرم
#خادم أهل البيت الشاعر محمد العمري

         أم الگمـــر صَلَّـت رَكِـعـــتين
         نِيـابــةً عن ظـعـن الِحْـسين

[فِدوه اربعَتكم تَرحُون بالطف لَخوكم تُوفُون]
             ( أوصـيـــــكم )
_________________

وِصِيتي
گبل يوم السَفَـر .. لَخُـوتَك يل گمــر .. وِصيتي
ردت منكم وَعَـد  .. توقـعـولي عهـد .. وِصيتي

إحســين اخوكم واجب اتضَحُّولَه
وبديـرة الغــــــــربه دِرِع صِـيروله
دنگــوا خَجـل لا توگفـون ابطـوله
بس سـمـعاً وطوع أمرَك اتگولوله

من يحچي صِيحَوا صار مولاي
الشّـــور شورك وانته ابو الـراي

[سِمعُوْا گبل لاتمشون بالطف لَخوكم تُوفون]
                      (أوصيكم)
_________________

                       يعباس
تعال اگرب إلـي .. يبن غِـيرة علي .. يعباس
أمانــه برگـبتك .. أُخـوك وعيلتك .. يعباس

لا تِـنســه يل غِــــيرة أبـوك براســـك
إِسـمع وِصيتي وخلها وي احـسـاسك
لو ضاگ بحسين الهَوَه ٱنطي انفاسك
انته الفخـــــــر لَـمَك وأبوك وناســـك

عنك أريد اتسولف الناس
ماكو مِثِـل خُـوّة العـباس

[ تِربايتي ومَتقصرون  بالطف لَخوكم تُوفون]
                    (أوصيكم)
_________________

                     أريدك
تِطـرِّز كـربلـه ... أُخـوَّه ومرجـلـه ... أريدك
إذا يعطش ثَـغَـر ... تِصيرلهم نهر ... أريدك

شِد حـيـلك وشِد الظعــن وتأَهَّـب
وٱثْـنِي رُكبتَـك لَمّن اختــك تِركب
لَحسـين عين اوعين ضُمها لزينب
لَيـغُـرَّك المـــاي اوگـبـلـهم تِشــرَب

لا تعطش اختك وانته موجود
ماعِـــذرك إلاّ بگــطع اِلِــ ازنود

[موقف چبير تسجلون بالطف لَخوكم تُوفون]
                      (أوصيكم)
_________________

                      يروحي
يعثمان استمِع ... إخذ ثار الضلع .. يروحي
جبل لا تنــهـدِم ... أســد لاتنـهزِم .. يروحي

يوليدي يابعد اِلـِ اعـيـون اليِضوَن
عينك لَـخــوك الدنـيــا مـا تـتـأمَّن
إِنـزِف اشما عـنــدك وِفــه وِتـفَـنَّن
خل كربلـه بـدم منحــــرك تِتـلـوَّن

للخوّه اريدك ثاني عِنوان
إنته او أبو فاضل يعُثمان

[ بالشمر لا تِنـخَـدعون   بالطف لَخوكم تُوفون]
                      (أوصيكم)
_________________

                      يجعفر
أريدك بالحرب .. تِـذلهم من تطب .. يجعفر
عله اعداكم سِوَه .. تسِـدُّون الهَوَه .. يجعفر

واعِدنِي بالطف تِـفدي أخـوك بعمرك
گبل ابنــه الأكبـر بالحرب مِد نَحــرك
طُبـلـهم وعبــد الله يِســـــنِـد ظهـرك
مْنِ الْخوف خَلِّي الگاع ترجِف حَدرك

ٱمن اربع جهات اتحِيطوا بحسين
خلفـه او أمامــه ايســـــار وِيمين

[ كلكم اگباله اتطيحون  بالطف لَخوكم تُوفون]
                     (أوصيكم)
_________________

                      رســـاله
يعبد الله الدِمَه .. إبعـثه لفاطـمه .. رســـاله
عليها امْوَقَـعَـه ... مناحِـر  أربعـه .. رســـاله

عبد الله يبني اتحزَم اويه اخوانك
جاهد بسيفك من تطب وإلســانك
رد ثار حـيــدر واخذه من عدوانك
لَـتخـلي چـف الشَــر يمِـس قـرآنك

أرد افتــخر بيكم يل أولاد
گدام أخوكــم أبو السـجاد

[للغالي كل غالي ايهون  بالطف لَخوكم تُوفون]
                     (أوصيكم)
________________

خادم الحسين ع
مرتجى الحسَّاني



#خادم الزهراء مرتجى الحسّاني

القصيدة على لحن تراثي (دنياك عندك فاكره)

يـانـار .. لا تِستـعجِلِي بحقدِچ عَـلينه

هاي ابيوت الٱسلام بس ابـهـيئة اخـيـام
لاتستعجلِي بحقدج علينه
______________________
1-

بالله يانار ارد اســألج وادري ماعنـدج إجـابه
بالحَرِگ مَن هوَّه أولَى إحنه لو ذيج العِـصـابه
البلْسِمَه ايعزي محمد وانتي مشتعله اعله بابه

اشگد صلفه وجهج ماعَرَگ
وبيت الله بالطف احـتـرگ
وحسين بالخــيل انسـحَگ
ياعظم جرحه اومُصـابه

ينـدار .. من بعده الزمن ياوسفه بِينه

شَـبَّت نـار الأحقــاد وصارت خيمِتي ارمـاد
لاتستعجلي بحقدج علينه
______________________
2-

يل حرگتي دار فاطـم وْمن محمد ماخِجلتي
هسه اجيتي بكل صلافه بالخيم حقدج شَعَلتي
گَـلُب ماعندج واكســره وْلا تشعرين بكسرتي

اتحزَمتي ضِدِّي اويه العـدو
من شفتي ماظل عندي أخو
لُـو بالخـــــيـم عبــــاس أكو
مايِطوُل إلسـانج إنتي

أقــدار .. دارتنـه عگب حامي الظعينه

لو عبـاس موجــود ماتـدنِين اِلِـحدود
لاتستعجلي بحقدج علينه
______________________
3-

الله من نـوره خلقـنه اوخالق املاكه الخَفِيه
وانتي ويه ابليس عندچ نَسَب سابق وآل اميه
لهل سبب جيتي وْحرَگتي اخيامي برض الغاضريه

نــور الله إحـنـه بهالأرض
وطاعتنه مفروضه فَرُض
معركه اويه الذِّل ماتِفُض
من أجل حفظ القضيه

ثــوّار .. إحنه اللي عَلَى العليا اعتلينه

نور او من أصِل نور وْضد كل ظالم انثـور
لاتستعجلي بحقدج علينه
______________________
4-

ماخُـمَد بالطف لهـيبـچ عجـب لمَّن لِمَحـتيني
وْلاحرگتي چف عَدوِّي وانه إجيتي وْحرگتيني
ضيعيتي أطفالي بالطف وِبمصابي فجعـتيني

يانـار وانتي ابـلا خجـل
خلِّـيـتي عيــلتـنه بوجل
مِن هَجمِتِچ شِفْت الأجل
وِللـكفـيل اتـدير عيني

والصــار .. مايِخْفَه اعله جدنه اوْ لاوِلينه

بس لـحكمـــة اللهْ صبراً حبـسـوا الآهْ
لاتستعجلي بحقدج علينه
______________________
5-

احنه اهل بيت الرساله والبغضنه ايعيش بالذِّل
المات بالطف لجل إخوتي رحمة الله اعليهْ تنزِل
واليـبـيع الذِّمَـه بالطف كل شـــفاعه مايِحصِّل

القَـدَّر تعـبنـه او حالته
واليـوفي إلـنه بكلمِـته
باجـر نِـزفَّــه لجَـــنِّـته
بكل مَهابه وعـزَّه يدخِل

أســـرار .. مامون الركب هاي السفينه

حسين الضَحَّه للدِين وانصــــاره قَـليلِـين
لاتستعجلي بحقدج علينه
______________________
6-

حايره الليله بمصـــابي وين أضمَّن هاليتامه
وانتي ماخلّيتي خـيمه بيها نِلـتَّـم بســلامه
كلشي بالطف گمت اسمعه ايصيح يارب الظُّـلامه

مِن ناس ذبَّـاحــــة طفِـل
وِتگـيِّـــــــد الدِين بحَــبِل
يتجـاســـر اعليَّــه النـذِل

والله دنيا اخلاف إخُوتي شفت ناس بلاشهامه
______________________

*زهيري

زينب بنص القَصُــر ماظل أخـــو حَيْ لَـها
وْرغم السـبي والتعب مثل الجــبل حـيلَها
اشما تلتفت تِنصـدم شـــامت تَجِـد حيلها

وراس السبط بالطشت تدري بگلبها شفت
وِيْـگـلها إبن الخَـنـا روحي بقــتـلكم شِفَت
گالتله وبكل فخـر بالطف جمـــــيـلاً شِفِت
حسين انكتبله القَتِل واخته الصبر حيـلَها
____________________

خادم الحسين ع
مرتجى الحسَّاني



#خادم الزهراء مرتجى الحسَّاني

#قصائد_محرم_الحرام
#الليلة_الاولى

لسان حال مولاي صاحب الزمان(عج)

..................................................

عيشني ياكلبي الالم
گلي شحرك ذيج الخيم
وشجرح العين بسهم
اه

شحال عمتي ام الخدر
المراكض بذاك الظهر
الايتام مفجوعه بجمر

ياروحي وياحالي ياهو أعظم بمصابه
عماتي لو انه لو عمي اعله ترابه
بس عمتي المصيبة عاشتهه بمسابگ
وانه بنص الهيمه عايشهه بمشاهگ
...................................................

ياروحي مكسور الغصن
وعماتي شافن جم حزن
وجم متن مدمي جم جفن
اه

هيه الخيم تعمي جفن
مابطلت هم بس اون
مامحترك مني ردن

صحرا ودمع الغربة سولفلي بلصاير
جم عمه من خيمه تتراكض بلعاشر
أتصور حالتهم ويصب عين المدمع
يعين الله عماتي وحالتهه بلمصرع
................................................
ذبلت وردات النبي
يامدمع يطفي العبي
اه الركض واه السبي
اه

لوعات ماتكضي بسهر
عمتي بلا عمي الكمر
عطشانه ظلت يم نهر

يم نهر وعطشانه بس بالي الوداني
يوميه اتروى من ماي البجاني
اه الماي وضيمه يتعله اعله الغالي
كل مامر وشفته يمر الحسين ببالي
............................................... .
باجر يموتني العطش
النفسه علمخيم غبش
اليوليهم بليل اهدعش
اه

نفس المصايب والجرا
عماتي ظلت حايرا
من الغرب متمرمرا

الضيم ولوعاته نفس اللوعه الصارت
متحير بمجاني وجنهه خيول الغارت
كلهه تسولف باجر خنهد اعلي بلحافر
خ نولعه بمأساته وخ نحيرا مثل العاشر
...................................................

الرضا يبجي بيا دمع
بدموع يتكسر ضلع
ذايب بروحا جم شمع
اه

المهيج بكلبي كربله
عماتي ركضت جم فله
اخ الهضم ياسنسله

جم لوعه للضامن تتحسر للضامي
وتسولف لوعت عمتي امن تنادي يخيامي
اه شصاير بيهم وجم حافر بالحومه
دايس عمي بصدرا عمتي الجته مهضومه
.....................................................
#خادم الحسين محمد منير المياحي

#قصائد_محرم_الحرام_١٤٤٢هـ
#الليله_الاولى
لمولاي صاحب الزمان(عجل الله فرجه)


شيرسم ياجرح بالك—لو هل الشهر
حرك،لو سحكت احسينك—لو طفل العثر
اتطشر ضعن الحسين—لعمتك صدت العين
هاي اهيه الرزيه
——————————————————

تفز اجروحك لحرمه ركضت من مخيم
عالحرمه الركض يصعب ولكن حته تسلم
معروفه اليشوف النار لازم منهه يشرد
خو ما يبقى يتأمل و هيه بطرفه تلزم

لازم يركض و تفزعله خوان
تطفيله الحرك وتصبره عالجان
جا بس كربله فوك الحرك خيل
واتسابك جدم وين اللي تعبان

المحد عدهه حماي—شتمهه الراح والجاي

——————————————————

يالتبجي دمه عيونك من تسمع حوافر
تحز بروحك الهسه جدك ماله ناصر
وحيد استوحدته آلآف محد كام ردهم
ودو للصدر الخيول وبقا بروحه يكابر

شيسوي الوحيد بهدت الناس
وين يدور وجهه الماله عباس
سيوف انحدت ولاگاها الحسين
من يم الظفر حدر كطعت الراس

حكك تلطم ازنود—ظلع الغالي ممرود

——————————————————

بگلبك يا طفل يذبح هم تسمع رقيه
من حشمت يبابا حسين تعال الحك اديه
جرح تتكاثر اوجاعه شتحمل يا هضيمه
والتكتل تصيح اعلي زلم دارت عليه

ورده ازغيره حرگت بيهه الخيام
الذابحها المهه اشتكدر اتنام؟؟؟
من الله واكبر كربله ليش
حرمتهه امن ابوها وراحت لشام

دمع العين حراك—عمر خلصته بفراك

——————————————————

ذايب گلبك بحزنه واجروحك ولا تنعد
للشام انخذت عمتك فوك الناكه تصعد
من حرك الخيم لحسين ولشام المصايب
عندك روس عالرماح ياحسره اللي تبرد

ما تنشف دمعتك طفت العين
عالضعن التطشر مدري لا وين
رايح والهضيمه يمشي و يطيح
فوك الهازله تمشي اخت الحسين

گلب متعلم النوح—بس للهزله مجروح

——————————————————
#خادم الحسين محمد منير المياحي

#قصائد_محرم_الحرام
#ليلة_مولاتي_العليله_ص_

لسان حال مولاتي العليلة(ص)
——————————————————-

بويه ذابحني انتظاري-شكد بجيت
اخلافك انه اهجرت داري-مالي بيت

مگابله العتبه واناطر—وجهي يكسر بويه خاطر
گوا اصبّر كلبي اگله—حسين يرد لداري باجر

كونك تردلي بالسلامه
مكسورة كسرت جنح الحمامه
بثگل الجبال اهمومي صارت
ليلي يمرني وم اگدر انامه

عليله—ماني من الزغار
عليله—ذابحني الانتظار

——————————————————-

ميته من گد المناحه-مالي روح
بفرگتك ماشفت راحه-بس انوح

انحب وماعندي حيله—ياهو يسئلني اشتكيله
گتله راحو ما خذوني—جي درو بيه عليله

اتمنه اشوفك لاذني يعمن
ليلي ونهاري ظلن يصبن
عيوني كتلهن بعدك حبيبي
لو مااشوفك ماظن يگدن

عليله—دمعي بعيوني نار
عليله—ذابحني الانتظار

——————————————————-

شوگي عذبني و گلتله—تردلي اكيد
حسين ابوي وانه بنته—حضنه اريد

شافي علتي يا طبيبي—روحي خلصت من نحيبي
اكتفي بنظرة عيونك—لو تردلي ياا حبيبي

يخلص كلامي من اشوفك
تكفيني بس لزمت جفوفك
بيه تلاعب و تگلي بويه
وانه بضحكتي افتر واطوفك

عليله—شوگي الك حار
عليله—ذابحني الانتظار

——————————————————-

الدمعه غيرتلي الملامح—راسي شاب
همي فوك گليبي طافح—گلبي ذاب

ليش بويه ماخذتني—وحدي مهضومه عفتني
مجان مااخذلي عندك—زغير كلش بويه متني

يالما خذتني وماخذ خواتي
عود انه بويه محضره عباتي
عبالي للطف وياك اروحن
ارجعلي گرّب صوبي مماتي

عليله—تدري اشعليه صار
عليله—ذابحني الانتظار

——————————————————-
#خادم الحسين محمد منير المياحي

#قصائد_محرم_الحرام
#ليلة_العاشر

خطاب مولاتي زينب (صلوات الله عليها)
🔺🔺🔺🔺🔺🔺🔺🔺🔺🔺🔺🔺🔺🔺

ياويلي انه غريبة
بطف النهيبة
مرية سليبه *ومحن

لاكافل ولا ومحامل
جتني الهزايل
واعليه عايل*زمن

اركض لخوي واكله
جابولي هزلة
ليش انته تعله*برمح

وانه الاميرة ودلالي
يااغلى غالي
وانته اعله بالي*بذبح

ظلت دمعتي اصبها
وابجي والوع ب الم
شيبرده الجمر البديه
شوغت ظليمه بخيم
والنار اجتني لدلالي
والغالي نام بسهم

جا ليش اروكض واطيحن
اعله اخواني بلطف اصيحن
يبن امي وانته اعله غبرا
ودموعي بخدودي يسيحن
🔺🔺🔺🔺🔺🔺🔺🔺🔺🔺🔺🔺🔺🔺

موتتني ذيج الي طاحت
يابوية صاحت
بلغربة ناحت*دمع

تكلك يبوية الحوافر
جتك يعاثر
يطفا اويه غاير*شمع

وشاغن حريمك مواجع
صبت مدامع
هاي التصارع*خيول

مادري ياطفل اكضن
بدمعاتي اهدن
بنياتي ردن*اكول

بنياتي ركضت هضيمه
وبنص دربها تطيح
ياخوية كوم لخواتي
مفجوعه بلطف تصيح
شو هسه مارد جوابك
معناها ظامي وذبيح

جا جمرة الخيمه ولتني
عثرتني والخيل اجتني
بنص خيمه ياريت اموتن
ريت المنية خذتني
🔺🔺🔺🔺🔺🔺🔺🔺🔺🔺🔺🔺🔺🔺

بخيامي جنت الاميرة
ماجتني حيرة
هسه العشيرة*واخو

رايح وخلص دلالي
تصرخ عيالي
حضر حبالي*العدو

لاحتني شمس الصحاري
وشفت الظهاري
ليلي ونهاري*ضياع

مالحكت خوية اجيلك
ضيمي اشتكيلك
واصرخ دخيلك..وداع

صار الوداع اعله غفله
وحامت علينه المنية
عطشانه كل اليتامه
كلي شسوي شبديه
ماصارت بمثلي حيرة
ولاتلفي بمثلي رزية

خوية دموعي وخيامك
فدوة تروح لسهامك
ياضامي الحك علينه
تلوع وتنادي يتامك
🔺🔺🔺🔺🔺🔺🔺🔺🔺🔺🔺🔺🔺🔺

يادنيه علت عليه
المابيه حميه
شفت الرزيه*ونحت

عود الجبيرة ولوني
لديرة خذوني
بهزلة حدوني*وطحت

تاليهه خدري الحبايب
نام بترايب
وضاك الخرايب*يخوي

تمنيته يحضر ولينه
يلحك علينه
من نولينه*ابوي

محد فزع تاليه رحنه
ونمنه بخرابه وتراب
متورمه اديه ومتوني
شوغة حنين وعذاب
اختك يروحي وحبيبي
تاليهه عشت بمصاب

مصابك حبيبي فجعني
تالي لخرايب اخذني
ماعندي راي وذهيلة
وروح امي معميه جفني
🔺🔺🔺🔺🔺🔺🔺🔺🔺🔺🔺🔺🔺



#خادم زينب محمد منير المياحي

#قصائد_محرم_الحرام
#ليلة_العاشر

لسان حال مولاتي زينب(صلوات الله عليها)
...................................................
صدلي وانه عالتله
طولي صدو لضله
يالمطروح فوك الكاع
وادم حضرت الهزله

دني اضلوعك امن الخيل
لا تسحك عليهن ناس
صدرك نعمة مخلوقه
الحوافر ماتعرف احساس

عريان/تراها الخيل كربت صوبك بساع
عريان/طايح ياعزيز الزهره عالكاع
عريان/تروح الخيل و ترد بيك كلساع
...................................................
ارحم روحي ياروحي
شفتك زادت جروحي
وين اثيابك ولونك
ياروحي بهضم نوحي

الحافر مارحم متنك
وجمرهم مارحم متني
يبعد اختك ولتني الناس
صطروني وعمه جفني

الخيام/احتركت وانه اركض وانشد اعليك
الخيام/الك فدوة يخويه شصاير شبيك
الخيام/ما عندي وذر جا بيش اغطيك
.....................................................
مهضومه ودمع عيني
بوداعك ذبلت سنيني
يالمفاركتني يوم
عجب الغربه تجفيني

تخيلني امشي عالناكه
وتظل مطروح بمجانك
جا ماكلتي امشي اوياج
ترا ماهو الترب شانك

تربان/صدك مو گدرك ولا گدرك تنام
تربان/شكد عجت عليك ارماد الخيام
تربان/ماعثرت الخيل و عثرت ازلام
.....................................................
شام اتفرج اعليه
و نادو بيه مسبيه
كلهه تباوع لوجهي
شخلت كربله بيه

من يم الذبح جايه
جايه لغربه تهضمني
ترضاها اعله علويتك
وادم تالي تشتمني

الشام/ماخلالي قيمه و ماشفت نوم
الشام/ومن كد الخرايب كلبي ملجوم
الشام/ضيع روحي وانه امضيعه انجوم
..................................................
#خادم الحسين محمد منير المياحي

#قصائد_محرم_الحرام
#ليلة_العاشر


گلب من التعب متروس شوغات
احير بروحي لو حير بيتيمات
تكوم امن الترب يحسين هيهات

جمر الخيم جاويني
يخويه افتر يلاگيني—صوط وحافر اگبالي
يروحي عذبت روحي
تعال وعاين جروحي—يفتر بالفله اخيالي

النار والحافر مردن گلب اخيته
———————————————-
عله اطفالك يخويه الوادم تصيح
خدرك بالبراري لاحته الريح
طولي بطيحتك بس اوكف يطيح

اخاف عليك تتعور
تريد تكوم ماتكدر—ماخلو كتر سالم
الماعدهه اخو تنسب
بلحظة تبدلت زينب—ظلهه شافته الوادم

الزلم يبن امي جالت فوك راسي
———————————————-
خوتنه تطشرت بين الاجناب
عفت حضن اختك ونايم بالتراب
عكب عطرك عبينه تفوح عطاب

عبينه حاضنه الجمره
وانت حاضن الغبره—عيونك غمضاها الدم
تشتم ضعنك الغربه
يخويه شتنحمل صعبه—بلا خوان وامخيم

حسين خوتنه بين الغربه ضاعت
———————————————-
ما متعوده اظل ابدون خوان
گلبي امن الدوارة حسين تعبان
عله ملگاك خويه الگلب عطشان

ادورك ياابو اسنيني
رمل حد راسي وبعيني—اثكنه وماترك رمشي
تدري شصاير بأختك
من عالرمل شافتك—ماكدرت بعد تحجي

فرگتك تذبح جااا شيسدهه خويه
———————————————-
#خادم الحسين محمد منير المياحي

#قصائد_محرم_الحرام
#ليلة_العاشر
خطاب مولاتي زينب (صلوات الله عليها)
____________________________________

ماعندي كافل ل ايتامي
والغربة صارت بخيامي
من الخيمة اطلع مرعوبة
اركض تجويني جدامي

اخواني كلهم ع التراب
بعيني شفت انه العذاب
____________________________________

عله ضعني التطشر دمعتي هلت
شسولف والغرب شو كلشي ماخلت
اختكم بلفزع وهم حيلتي گلت
حته اجدامي من كد الحرك شلت

بين الغرب مفجوعة اليوم
محتارة وحدي والف الگوم
ناشدته كفالي اعله الصار
ماتنهض ترد ياجيدوم

كتله خيولي الشراب
بعيني شفت انه العذاب
____________________________________

طلعوني بنهار وكوا هيج عناد
يشمتون الخلگ جي مالهم رداد
اصبن دمعتي والمدمع المن فاد
لا انتم تجون ولا تطيب اضماد

دمعاتي صبت مهضومة
شافوني غربة ومالومة
ياوسفة ماشافوني ببيت
شافوني وحدي بلحومة

مدري شحجي راسي شاب
بعيني شفت انه العذاب
________________________________

شسولف كربله كسرت الي ظهري
شيبتني يويلي وخلصت عمري
دارت بلظهر وحركتلي بخدري
شبت نارها واخذت الي صبري

خلصته عمري بنص انهار
واصرخ واصيحن اايلنار
جا مارحمتي بجم زغير
جا مارحمتي بذيج الدار

شرد اضم امن المصاب
بعيني شفت انه العذاب
________________________________

اعاين ع الجثث ومشمرة الوليان
ومحتارة بعيالي ويلهب الصيوان
هنانه الضيم اااا ياعازة الخوان
ياهو الينهض وكلكم عله التربان

لمن لفتكم ذيج الخيل
داستكم من كل قوة وحيل
ولجفيلي مكطوعات زنود
سد السهم عين الهيل

الحومه عجت بلسراب
بعيني شفت انه العذاب
________________________________

وگف كلبي سمعته يصيح طلعوها
شدو احبالهه  وبعرجة مشوها
ماريدن تنام و تغفا فجعوها
اشد واقسى الحجي زينب تسمعوها

شسمعوني شحجي ياجلمات
وحدج غريبة لو شتمات
تمنيته موتي بذاك اليوم
معمية عيني امن الصطرات

صبغته وجهي امن التراب
بعيني شفت انه العذاب
________________________________
#خادم الحسين محمد منير المياحي

((وجه الدلال))

لسان حال مولاتي زينب(صلوات الله عليها)
...........................................................
شنيم اخوي بترايب خلاني وحدي والد رقيه
بعيوني أدير لخيامي خيل الاجتني مجوية اديه
رجلي ترافة جبيرة رجليه ترجف يأشر عليه

اجت خيل وعيالي بنار تتشاهك
دخان اعتله وي ناري واتسابك
مامرة اطلعت هلمرة اطلع ليش
جدمي بنص زلم والخيل يتباوك

ويلي المخيم رجلي جواها
طاح ابو فاضل وطفا ضواها
الحومه دخنت صوت اعتلاها
بنياتي تصرخ اعله الدللاها

ضعني غريب مابي اخو
ضعني غريب مابي اخو
...........................................................
وجه الدلال بطلعته شافته وأدم تحلم تشوفه
اخت الهواشم ولوني يطك برقية كدامي اشوفه
نهر الفرات لكفيلي غلاها روحا وكططع جفوفه

ذبلان الشفاف وماردت كل ماي
ياماي الاشربه وأنه طاح الواي
بطيحت كافلي ماظل حجي واحجي
كعدي هنانه واكعد مايصح الراي

عين الشماته تصد لضعوني
عيني اعله خوتي بس مايجوني
اكعد واكومن صاحو غريبة
من الخيام لكوفة حدوني

ضعني غريب مابي اخو
ضعني غريب مابي اخو
.............................................................
جابو هزايل اعاين لجدامي ياهو يصعدهه حسره
لاظل اخوي الاجينه بسده طلعنه لضعونه يبره
كالولي يلا دصعدي غصبا عليه كلساعة صطره

سمعونه حجي واسمعنه قيل وقال
تحضرن للسبي مامش بعد كفال
أجر روحي واصدلك عالنهر مطروح
واكلك عاين بجفي اشبجت الحبال

انهض يخوية ورجع خيامي
مااريدن ابقى بلايه محامي
باجر اطبن والكوفة تشمت
تهضمني جلمة ها يخت الضامي

ضعني غريب مابي اخو
ضعني غريب مابي اخو
...........................................................
تبجي رقية بدربنه عمة تكلي الوالد اريده
اصببر عليهه بدمعتي ياعمة جيته ماهي بعيده
تسكت رقية تفزلي مرعوبة تصرخ ويلي حميده

كلهه إبناتي تصرخ والدي وين
حميدة تريد ابوها وهاي الحسين
شصيرن انه بلا كلبي شيصير
اصد اعله الرمح وامغوركا العين

اختك واحشمك انه العقيلة
كوم لبناتك ارد اغفا ليلة
من ركبونه لهساعه عيني
مالحظة غمضت فوك الهزيلة

ضعني غريب مابي اخو
ضعني غريب مابي اخو
..............................................................
دهري كتبلي اعيشه تاليته عمري مفارك حبيبه
ستر ودلال الهواشم من فيهم انه لنص المصيبه
اسمي الأميرة وتغير عكب الكفالة صار الغريبة

حايط جارنه ماصد الي حجايه
ماعرف النهار و ماعرف رايه
كلفة اعليه ديوان وتترسه حلوك
واحد گل للآخر هايه ما هايه

واحد يكلي بلايه عشيرة
ثاني يكلي هاااا يالاسيرة
ادنك واكولن فزعو يخوتي
وبكلبي اندب ي اخواني حيرة

ضعني غريب مابي اخو
ضعني غريب مابي اخو
..............................................................
#خادم الحسين محمد منير المياحي

اختك غريبه ضلت بألمهه
وحسرتهه تاكل لب الگلب
كوم اعتنيهه گرّب اجلهه
و وكفت تتاني عين بدرب

مكسورة واجلهه امگرب وكلساعه فزت
يحرك بابهه هواي الهوا ومدنكه ردت
ها جاا شنهي نيتك للدفن تحضرها لو لا
هوايه كربله بكلب العقيله جروح خلت


خلت هضيمه كربله
اثار الحبل و سنسله
الله و اكبر يالخيم
لاجم كلبها حرمله

ملجومه مهضومه وغريبه زينب
***********************
ميته تراها بيوم اللي شافت
وحدك بقيت ابين الجمع
لطمت وجهه ويه الخيول
وركضت عليك تريد الضلع

ماتنسه من اجتك و الزلم جايتك بخيل
حدبت يمك تكلك يخويه مابقى حيل
ارحم فاگده تريد المحنه لوجهك تشوف
الفاگد تاكل بكلبه تراها ظلمت الليل

شافت عشيره عالرمح
فگدت حنانك منذبح
طلعت ولسه تنذكر
تقبل خدركم ينلمح!؟؟؟

ملجومه مهضومه وغريبه زينب
***********************
جسمك دِلمه ولملم ضلوعك
ليهه تعال محدبه الظهر
لحك عليهه من المناحه
خلّص عمرها لوعه و قهر

اخر مرة شافت وجهك بطشت وقصر جان
ماعندك جفن بس العزيزه لفهه بأجفان
حط حبل السبي ومن تقرا اقرا قل هو الشام
ناعيهه يردد بت غريبه ومالهه اخوان

ماعدهه احد للدفن
جاياهو اليوسد المتن
غربه يشيلون النعش
محد يغمضلهه جفن

ملجومه مهضومه وغريبه زينب
***********************
بت العشاير محد يصدهه
ويشتم عليهه طول العمر
بس العقيله صدتهه وادم
وشتمت عليهه وداست جمر

لحد هسه الجمر يجويهه واثارا عــالروح
لحد هسه المتن من السياط تلجمه الجروح
مختنكه بحزنهه ومااظن زينب ترا تطيب
تشهك شهكت الميت تراها لـمـن تـنـوح

ماتت الف موته وحيت
من الهضيمه حدبت
شابت عزيزت حيدره
بطيفك بجت وتوسلت

ملجومه مهضومه وغريبه زينب
***********************
#خادم الحسين محمد منير المياحي

لمولاي الغريب أبا الرضا (صلوات الله عليه)

_______________________________

غـريـبـه جـنازته جـا لـيـش خـلـوهـا
_______________________________

من سجن لسجن عايش بطامورة
دمه يطيح ويلي ورجله مكسورة
الكاظم من ونينه تـنـرسم صورة

صورة طفلة الخيل بين سـحـگـوهـا
_______________________________

يذكر عمته من تتراكض بـهـيمـة
السجن عنده يهون بحرگة الخيمة
يا ركضت العاشر منهه كل ضيمة

ينحب عـلـى المن الـمـاي حـرمـوهـا
_______________________________

ينوح حسين ابد مـاراح مـن باله
ظل مطروح ليش ومـحـد الشاله
باجر عـالـجـسـر هـم محد بحاله

مامش ناس يـم جـثـتـه يـبـچـوهـا
_______________________________

وحيد ابن الاطايب مـالـه عكازة
بس المـالـه أهل للناس اله عازة
فشله تحشم الوادم علـى جنازة

لَـتـخـلوهـا مثل حسين شـيـعـوهـا
_______________________________

گضّى الوكت كله الروح مهضومه
بـالتابوت هـم تـتـنـازف دمـومـه
من ذيج السلاسل ويلي ملجومه

فـتحوها الجنازة ومـنّـه شـيـلـوهـا
_______________________________
#خادم الحسين محمد منير المياحي

#خادم_الحسین_الشاعر_عبدالامیر_الناصری
#قصيده_للسیده_خوله_بنت_للحسین
#موشح

موشح للسیدة خولة بنت الحسین ع
ـــــــــــــــــــــــــــــــــــــــــــ
ـــــــــــــــــــــــــــــــــــــــــــ
بیـن المــشاگف عله اظـهور العبي
طفله ماتت للحســین امـن السبي
ـــــــــــــــــــــــــــــــــــــــــــ
ـــــــــــــــــــــــــــــــــــــــــــ
طـفــله وافـتــها الـمنـیــه بالدرب
ای نعـم هالـطفله خوله التـنضرب
طاحت امن الناگه ویلي اعله الترب
استشــهدت بالـغربه بین الأجنبي
ـــــــــــــــــــــــــــــــــــــــــــ
ـــــــــــــــــــــــــــــــــــــــــــ
طفـله ثلث اسنــین یمکن أم أقل
بـالیــسر وافــاها حتــمان الأجـل
من کثر ضــرب العـدو مات الأمل
اعیونها امن الطگ بعد ماتصطبي
ـــــــــــــــــــــــــــــــــــــــــــ
ـــــــــــــــــــــــــــــــــــــــــــ
طفله چانت عند ابوها امدللـه
وشافت احداث المنایه ابکربله
أبّعلبــک لمّــن خــذوها الـقافله
اهناک ملک المـوت گلها اتقرّبي
ـــــــــــــــــــــــــــــــــــــــــــ
ـــــــــــــــــــــــــــــــــــــــــــ
خوله من طگها ابچعب رمحه الرجس
شهــگت ابشــهگتها مـا رد النفـس
چـن الرقـیه اتگله طگـنی آنه بس
واختی خلهااتشدظهرها ابمعصبي
ـــــــــــــــــــــــــــــــــــــــــــ
ـــــــــــــــــــــــــــــــــــــــــــ
الله یدری اشسوت اقیود الحبل
چتّفت بالضیم چم طفله و طفل
خوله ماتت من حدت بیها الهزل
ماتــت و عــمتها راحــت تنسبي
ـــــــــــــــــــــــــــــــــــــــــــ
ـــــــــــــــــــــــــــــــــــــــــــ
کلمات خادم الحسین ع
عبدالامیرالناصري

#خادم_الحسین_الشاعر_عبدالامیر_الناصری
#قصيده_استشهاد_امام_السجاد



قصیدة :شبل الحسین ع
ـــــــــــــــــــــــــــــــــــــــــــــــــ
خاویت جرحک والسبي..یا شبل الحسین
تمشي اویه خدر الزینبي..یا شبل الحسین

کافل صـرت عالخیّم
من بـعد راعـي العلم
یا شبل الحسین
ــــــــــــــــــــــــــــــــــــــــــــــ
یلي جرحک رافگ اجروح الضمایه
یاعـلـي الســجاد بـدروب المــنایه
یاأسـیر الدمـعه بـمصـاب الضحایه
حزنک امـن الـطف بدایه ابلا نهایه

تمشي وجرح گیدک یصب..یا شبل الحسین
لا مـا شـلت سـیف الـحرب..یا شبل الحسین

صرت انته راعي الألم
من بــعد راعــي العلم
یا شبل الحسین
ـــــــــــــــــــــــــــــــــــــــــــ
یبدي ویّــاک ابحـزن دور الأمـامـه
صـرت أمام و راسـک ابلایه عمامه
کـل مـواریـثک غدت بس الیتــامه
وگبل الاخیام أسعرت گلبک خیامه

چم خیمه طفّیت ابدمع..یا شبل الحسین
مابیک حیـل اعله الفزع..یا شبل الحسین

چم لا صحت چم نـعم
مـن بــعد راعـي العـلم
یا شبل الحسین
ـــــــــــــــــــــــــــــــــــــــــــ
ذبحوا اعیونک عطش من طاح الحسین
بـینـک و بـیـنه المـسـافه نـظـرة العـیـن
اشـلون تگـدر تـفزع و تـوصل للــحنین
وانته صعبه اتـشاگف و مشدود الأیدین

مـتــگید  ابحــبل الیــســر..یا شبل الحسین
چم مره صحت اعله الشمر..یا شبل الحسین

بس النـحر ما سـلم
من بعد راعي العلم
یا شبل الحسین
ـــــــــــــــــــــــــــــــــــــــــــ
عندک ابکل نظره مقتل یوم الطفوف
انتـه  اکثــر  واحد  الأذّنه الصــفــوف
أمنین متمر تنـظر الدم غاطي السیوف
أهنا نحر و أهنا صبع و أهناک الچفوف

چم مره رحت اعله نهر..یا شبل الحسین
من طاح عبــاس الگـمر..یا شبل الحسین

أشگد عاتبیت السهم
من بعد راعـي الـعلم
یا شبل الحسین
ـــــــــــــــــــــــــــــــــــــــــــ
انــته ذاک الـوزّع اعـله الـطف حیاته
و صار ینـطگ حاله حال الطگ خواته
مسـتحي وگلـبک خلص من مستحاته
احــسین بیــدک أمّن اعـیـاله و بــناته

کل خوفک انته من تون..یا شبل الحسین
عمـتک لتنــطگ عالمـتن..یا شبل الحسین

عمتک متنـها أنلچم
من بعد راعي العلم
یا شبل الحسین
ـــــــــــــــــــــــــــــــــــــــــــ
یلّـي واریت  الضـحـایه ابرمـلـة البـر
لایه شک ظهرک فصل من طاح الأکبر
جرح الي ایفارگ اخو کل لحظه یکبر
مــاتــوا اخــوانــک  طبــگ  الله اکبر

دفنـیت بـیدک چـم أخو..یا شبل الحسین
چم عم دفنت أویه الأبو..یا شبل الحسین

کل هذه بیک انختم
من بعد راعي العـلم
یا شبل الحسین
ـــــــــــــــــــــــــــــــــــــــــــ
کلمات خادم الحسین ع
عبدالامیرالناصري...المحمره