#من_مولاتي_ام_البنين_الى_حبيبها_الحسين_ع
#بروحها_ذاهبه_الى_مولاها


عطشانه عليك وجيت متعوبه
لمفارك محب يتعنه محبوبه
من يوم الرحت بالضعن راح الحيل
وبداء العشك يوليدي مصيوبه

جرني هيامي حُسين
امشي لأمامي حُسين
ولهانه روحي عليك
گالولي ضامي حُسين

سيدي يا سيدي بيك انه من ابتدي
لأخر خيام العطش ما تنتهي سرمدي

قصة غرام وحنين يا مولى ام البنين
روح النبي وعلي يا حُسيناً يا حُسين
____

يا يمه العطش غيرلك ارسومك
ذبلان وانشدك شنهي اعلومك
خربانه كشختك منطرح متعوب
ضايع خنصرك ومسلبه اهدومك

من جيت اشوفك حُسين
ما بيه اعوفك حُسين
وشفت إلي صاير حرام
خيل لتطوفك حُسين

متربه انضر لحيتك ونايم بلا عمامتك
من عگب ذاك الجمال خيل الكفر سحگتك

مسبل عيونك رمح غير حلاتك ذبح
لونك صبح منخطف وجه الله وينه السمح
____

يالمعودني تضحك من تلاگيني
وينه مبسمك يحسين حاچيني
مولاي وچنت من اعتنيك تگوم
شگد عدك هلا ويمه تسميني

امك اجتك حُسين
گوم اعله بختك حُسين
حرمه وچبيره اعتنيت
يوليدي صحتك حُسين

بحر الشمس يالشهم من الهوه تنلچم
وين الضعن والدلال وين الگمر والزلم

يچوي الرمل بالظهر وانت الظهر منكسر
طر البگلبك شفت ما ظن بعد ينجبر
____

سولفلي الگمر شمرها ذرعانه
لو روح اعتنيله وانه زعلانه
وحرم كل حلال الدر عليه يحسين
وإذا راضي اضلن يمك هنانه

موش اعله ابني حُسين
يل تمتلكني حُسين
متعنيه اشوفك ونوح
انت التهمني حُسين

وصيته يوم الطفوف ترتجف منه الصفوف
وي إخوته ينذبح ضامي ويذب الجفوف

علمته أبني الأبي سيدي يندهك وابي
بس كتله لمن تموت اصرخ حُسيناً اخي
____

ادري بجرحك السلبوهن وراحن
لبسترك أميرات الخلك ناحن
ادري لجمتك زينب تنادي اعليك
ومن عالنوك يحسين الحرم صاحن

ادري برقيه حُسين
راحت سبيه حُسين
لجانت عزيزه بحماك
نجتفت خطيه حُسين

والحرم راحن سبي بسد العليل وعبي
والشمر يحدي الضعن وي الخدر الاجنبي

مو زينبك تنضرب لو تحدي بيهه الغرب
يا وسفه ذاك الزمن هسه الزمن منگلب
_

حسين سعد البهادلي