#قصائد_منبريه
#ام_البنين_عليها_السلام

خيمة ايتام               تمثلت أم البنين

خيمة أيتام                تمثلت أم البنين

.........

بعد ما بضعة نبينه استشهدت

والمآسي اعله اليتامه خيمت

ماكو للحسنين غير ام البخت

هيه هاي ام البنين اللي اجت

أم تصير الطاهره

هاي أعظم مفخره

والدهر ضام               لليتامه الطيببن

خيمة أيتام                تمثلت أم البنين

.......................

فاطمه اتغير اسمهه لهالامر

خاف منهم  بأسم أمه ينقهر

تعرف اتعلم الصبور اعله الصبر

وتخدم  الايتام كل هذا العمر

وطائعه الحيدر علي

والهه كل هم ينجلي

وكل الايام                  ثابته ولا ماتلين

خيمة أيتام                تمثلت أم البنين

.....................

من مشاعرهه الحنونه الواضحه

جن وضوح ال قل هوَ وي الضحى

لو قره الانسان الهه الفاتحه

تنكضي حاجاته والرب سامحهه

حته لو ذنبه جبير

ينمحي من يستجير

الهه الاسلام             حفظتهه بهذا الحنين

خيمة أيتام                      تمثلت أم البنين

........................

منزلتهه عد علي بأرفع مقام

ابحيدره التاريخ عَدهه من العظام

لو بحار ابحقهه ما يكفي الكلام

حد علمنه القاصر  اعليهه السلام

وهيه اكبر من حرف

بالسطر ينزل وصف

وكل الاحلام           نبقه الهه ذاكرين

خيمة أيتام                تمثلت أم البنين

......................


فاركت عمر المصايب والهضم

ماتت وعبره ابصدرهه من الظلم

للمثلهه ازغير في حقهه النظم

والقلم لكبر فضائلهه ابعقم

لكل تعزيه وكل نعي

منهه نحتاج الوعي

وتنعه الاقلام             ام بدور الثائرين

خيمة أيتام                تمثلت أم البنين

الشاعر
ياسر العارضي

❇️ قصائد #محرم الحرام قصيدة لـ #ام_البنين عليها السلام



ربيت اربع اولاد للزهرة هدية
انذرتهم لبو السجاد بدروب المنية
-----------
گمر وتلث كواكب من حياتي
شفت من علي بيهم ذكرياتي
تمنّيت ودعيت الله بصلاتي
وبيهم ربي حقق أمنياتي
الأماني چانت هواي وهبهه الرب اليه
وحصّل گلبي ما راد بدروب المنية
------------
أول أمنية بآمالي تكبر
يوهبني الإله وگلبي ينسر
ردت أربع شباب نجوم تزهر
أشوفن بيهم الكرار حيدر
نِطاني الخالق انجوم يباهون الثرية
صفوا لحسين أجناد بدروب المنية
-------------
دعيت الله اوتشب بضلوعي جمرة
أواسي ابمهجتي مهجة الزهرة
وإذا ينگطع من حسين نحرة
كون اولادي صرعه على الغبره
كون اوياهم هناك واسلمهم بدية
للمظلوم إسناد بدروب المنية
-------------
تمنيت ودعيت وصار همي
گبل دم الحسين يفيض دمي
اوبنيني الأربعه حققوا حلمي
بل طف ابدماهم رفعوا اسمي
سِجدت بل ميادين هل نفوس الأبية
صاروا ولدي عُبّاد بدروب المنية
-------------
وهبني الباري كل هاي الأماني
بس أمنية وحده ما نِطاني
ردت ميّة بدر يضوي ابزماني
مثل عباس بل حب والتفاني
گبل حسين للموت أقدمهم ضحية
ابجرح كل لحظه ينعاد بدروب المنية
------------
تمنيت اشكثر والباري عالم
وظل سهران جرحي وجفني حالم
واجاني الخبر ذبحوا گمر هاشم
صبرت وگلت كون حسين سالم
حتى حسين ذبحوه ومشت زينب سبية
واللي راح ما عاد بدروب المنية
-------------
#عقيل_الكاظمي / #بغداد

#ام_البنين عليها السلام


ماتت.. أم گلب الحنين
ماتت.. ناعية الحسين
بدمعاتك التهل.. شيعها يالفضل
ناعية الحسين

_ ١ _
التبچيك اعله ابو اليمه بنواعيها
اعله متنك شيلها وللگبر وديها
استعجل بالدفن لمّن تواريها
لأن مشتاگ ابو اليمه يلاگيها

عانت.. آلام الفراق
عانت.. جرح الاشتياق
الفرگه متنحمل .. شيعها يالفضل
ناعية الحسين

_ ٢ _
منّ اتشاهدت بالعين دمعتها
لاخر لحضه متفاركها لوعتها
واخر كلمه كبل الموت كالتها
صاحت ياحسين وطفت شمعتها

صاحت.. كلمة ام البنين
صاحت.. مذبوح الحسين
مدمعها ما يِقل .. شيعها يالفضل
ناعية الحسين

_ ٣ _
لا تلجمها نزلها بعطف واحساس
هواي الحره لطمت يالفضل عالراس
وعلامه على الكبر حتى تعرفه الناس
غطي ام البنين براية العباس

خلي.. عالمرقد دليل
خلي.. راية من الكفيل
براية أبا الفضل .. شيعها يالفضل
ناعية الحسين

_ ٤ _
بعد يالفضل بيدك من توسدها
أم الاربعة جان امنية عدها
من تراب الحسين يصير مرقدها
بيدك يالفضل خليه تحت خدها

وياها.. تربة كربلاء
وياها.. متخضبه دماء
مولاها منقتل .. شيعها يالفضل
ناعية الحسين

_ ٥ _
لترش اللحدها ماي من زمزم
رش اعليه من ارماد المخيم
التلقين الأخير اقرالها مأتم
وگلها حسين تحت الحافر تهشم

گلها.. مسبيه العيال
گلها.. بچف زينب حبال
من تذكر الحبل .. شيعها يالفضل
ناعية الحسين

مصطفى الشافعي