حسين خلصت خِدْمِتِي إلزوّارك
كــون ما قصّــرنه وي خطّـارك
بيّه حيل وبس گضت حيلي إنهدم
طاحـت اويـه الچادر إگلـوب الخَدَم
ــــــــــــــــــــــــــ
جاي أطيْح الچادر ودمعــي يطـيح
وجهي أسود . خلني لا أرجع قبيح
خلني وي تعبك بعد خل استريح
الـ هلا بيهم چا بعد إلمن أصـيح ؟

هاي بالذات الـ (هلا) من أگلبونه
الـ چـادر الجنـّه نريد إتعـودنـه
كون طاح وياه أحـس توگع قِيَـم
طاحت اويه الچادر إگلوب الخَدَم
ــــــــــــــــــــــــــ
تراب زوّارك اذا عن عينـي غاب
وين يحْصل بعد من هذا التراب
كون خالي الموكب ومسدود باب
يعني معناهــا نزل بيّه العَذاب

بـ سَنَه إتعود وبالسَنَه إنتانيها
هـاي نعمــه وكون ما نچفـيها
صَفَر خير والله حط بي هالنِعَم
طاحت اويه الچادر إگلوب الخَدَم
ــــــــــــــــــــــــــ
إنتظــار (الخِدْمَه) رادلهــا صَبَور
(إنتظار المهدي) ما چنهن شُـهُور
يا صخام اوجوهنا ابگعدت الدور
واليبيْض وجوهنا اصخام الجدور

بعــد ما تلسـعني نـار إجـدورك
إنشالن إبطول الطريـق إقصورك
مو چوادر جاي أحس طاحت قِمَمْ
طاحت اويه الچادر إگلوب الخَدَم
ــــــــــــــــــــــــــ
داعــي ما إلهـا بعـد وأرفَعْلِـي راس
كـون ما أمســح بعــد ذاك المَدَاس
گرب عشرين بصفر وبگلبي جاس
هسـه أملاك ونِرِد من تگضـي ناس

هالخِدَامــه الخيـر كلّه وياها
وحــتّى جبرائيـل يتمــنّاها
وحتّى ميكائيل عالسُفره إنعِـزَم
طاحت اويه الچادر إگلوب الخَدَم
ــــــــــــــــــــــــــ
منيــن ما نِلْتِـفت نُغـرُف حَسَـنات
موش زاير عدنه چنّ المهــدي بات
إجدامي سود وعندي وين .. مورّدات
وين نلگـاها بعــد نخــدم حُفَـات ؟

على الخِــدمَه إركــاض بِشِْر الحافي
الـ (هلا) و (خادم) تبقى فوگ شفافي
وگلبي يبقى إلـ زايرك حافي الجِدَم
طاحت اويه الچــادر إگلوب الخَـدَم
ــــــــــــــــــــــــــ

مهدي التقي

#العوده_ياحسين