#شور

صلى الله عليكِ فاطمة


شابت كل  لحْيِّتي
من ماتت ضحكتي
ياغربة دمعتي
وراج

يالتسوين العشگ
اتلاوه ويالخلگ
هذا انه المختنگ
بلاج

نعشج  ضل يخازر حيلي
نعشج   حلم صار بليلي
نعشج   لفظة اليا ويلي

عايش والاهات تاخذني واترد بيه
يا حيرت الضال يا مهجتي المسبيه
اشلون ادخل البيت وأم الحسن ماهيه

صلى الله عليكِ فاطمة
.
.
.
.
يا نسمات الهوى
يمج ضلمه  الضوه
بَعدج عودي انچوه
يروح

يمشي بگلبي الجرح
مشيِّت راس برمح
من ليلي للصبح
جروح


فگدج  رمح وبدلالي
فگدج  اخذ كل آمالي
فگدج  موت يدنْااالي


يالوجهي بچفاچ ما رِضَه يذب انگابه
دلالي منحور وسهم الفراگ الصابه
ابنادم ايموت لو دفن بيده احبابه
.
.
.
.
حسره بنص الگلب
تِچْوي دمعي اليصب
للبيت اشما اطب
اطيح

اتخوصر للفرض
براسي ادور الأرض
عالي صوت النبض
صريح

عازه  بيه الج يالزهره
عازه عيني صارت حمره
عازه  وحگ ذيج العِشره

اتوازه عالموت لو يمر مغرب بيه
حتى الحَمامات گامت تنوح اعليه
اكشخ چنت بيج يالچنتي الي خاچيه
.
.
.
.
بگلبي بگدج خسف
هو الدافن كلف
بعينه يطگ النزف
دهور

وما يحلالي الهوي
لا عيشه لا ضوه
لجرحي ماكو دوه
يفور

وجهي   بي زراگ وسطره
وجهي   لافه بالخضره
وجهي   منخطف يازهره

وشحاله ابو حسين يالزهره ريت اتشوفي
چفوفي عالخدود وبدموعي أغَسل اچفوفي
نار  وبسامير  ضلت  تمر  بطيوووفي

.
.
.
.
يالرحتي من وكت
بهالروحه حدبت
ملچلوم وما طبت
وانوح

لگبرج امشي وارد
فرفح روحي البعد
ذبل  كل  الورد
جروح


امشي     وعثرتي بخيالي
امشي     وانتي دوم أبالي
امشي    أوين أشد ارحالي

من بابي مخنوگ ومخنوگ من الديره
الدنيا والگاع گدامي كلها اصغيره
مو بس مصابج كل خطوه اطيح بحيره


#الشاعر #عبدالله #الشويلي

يقولون انها   كلما  تنفست تألمت

ضلع مصيوب
وعلي ينشاف چنه غروب
اوادم تمشي بالمگلوب
ترا بس حيدر بهل كون
ابد  ماكو بشر متعوب

مسافة دفنت ام حسين وعلي رد راكع بممشاه
هضيمه الرافع السبعه عكازه يسوي الاه
گلبه عالگبر خلاه
بكل جرة نفس احااه

صحوة موت كل أيامه مگضيه
بيته من اللطم صاير حسينيه
جلد ميت يكزبر لو حجه گلبه
يموت الحر لَوَن تنطگله علويه

يقولون انها كلما تنفست تألمت
.
.
.
.
الگاع أسهل 
تابوت الزجيه اثگل
وعلينا بروحه ضل يسحل
والكسره الجبيره هنا
محني ذاك المعدل

مثل ناگوط حِب البيت هيج الثامه ضل ينگط
وگوه ايطير جبرائيل لمن يم علي يهبط
بكثر ما بالدمع يلگط
بدمع يمه الحمام يحط

الهوى مجتوف للريه لمن يدخل
شمس اغروب عافيته، بقت تنزل
علامات الهجر برسومه مجفيه
ليل انهار صحوه ونوم عينه تهل

يقولون انها كلما تنفست تألمت

.
.
.
.

گلب مطحون
حيدر ضل يبَدي عيون
بشر ضل يمشي مدري شلون
بحجيّه البير كله انطم
ليش الوادم ايضحكون؟

گلبه امفطر ومتعوب چن عكازة السجاد
البيت التنكتل بي ام بعد هالبيت ما ينراد
مع كل الاسف ينگاد
بجف وآدم حجيها ارماد


قدم لله اعز محسن واعز اضلوع
مواجع شايل الكرار كم ونوع
بكثر ما باچي رمشه وي الدمع منحور
من شكله تَعَرف البشر لو موجوع


يقولون انها كلما تنفست تألمت
.
.
.
.
يريد ايموت
ضل بعازت التابوت
يونس واله الدنيا الحوت
إدفعه اذراع يا هل الناس
عليه النسمه من اتفوت

اسمر ثوبه چن وجه من كثر البچي اعليها
ماي وينچفي اعله الگاع من ينجاب طاريها
التباريه ويباريها
اضلوع مكسره بيها

اليجر بيده الشمس ما يرفع ابهامه
المطيّح الزلم ما يوگع الثامه
عرگه وي الخلگ ما تنتهي وتفض
يموت التندفعله حرمه گدامه

يقولون انها كلما تنفست تألمت
.
.
.
.
الگلبه احجار
هم يچي على الكرار
مو هين ترا البسمار
هوايه ما رضوا عالصار
بس جيب اليطفي النار

فرق بين الوصيته اجتاف وفرق بين البقى يشاهد
ضلعها حَرَك اهل النار بعد شيحرك البارد
جم بليس ضل گاعد
يشاهد دفعة القائد


داسو اعتبت الله واحترگ كلشي
والدايسها وسفه بطوله ضل يمشي
وزينب ما تنام بلا حضن امها
تكول من البواچي طيحت رمشي


يقولون انها كلما تنفست تألمت


#الشاعر #عبدالله #الشويلي

نار وي نار التقت
اوحده للاخرى روت
محكمه والكل حچت
من الحرگ حد ما طفت


اعترافات وحكم ....يرد حگه المنظلم ....محكمه والدم شهد
النار متهمه بقتل .....فاطمه وذاك الطفل....والمهد والبلمهد

نِسه احترگت ....خيم وجت .......وحراير خافت وركضت
ومره شتكدر .....وجهه احمر...... ....النار بفاطمه شسوت


النار من تلسع تشل
بالوجع چنها الهزل

بالاجدام توسطت
من الحرگ حد ما طفت
.
.
.
.
حجت نار ام الضلع .....وكالت بحسره اندفِع ....شما يدفعون الجذع
لِحِت وجه ام الحسن ......أطراف أصابعها انچون.......ما يطفيني الدمع

طلع دمها .......كبر همها .......والشاعلني يشتمها
ولمن تبعد.... اليه اترد .....وإني بحسره اجي يمها

كام يعصرها الجذع
واسمعت طگ الضلع

والله والله تعذبت
من الحرگ حد ما طفت

.
.
.
.
من حجت نار الخيم .....انترست الدنيا الم ......المحكمها كلها بچت
گالت اجدام الحرم .......ا سحگت اعليه بألم ......ومره بنصي توسطت

واكو واحد .....بقى كاعد .....احترگت خيمته وساجد
اشتعل هدمه .....العليل اسمه .....وجفه المنجوي شاهد

لحت اطفال اشكثر
ارقيه ركضت عالجمر

البقت كلها اتوهدنت
من الحرگ حد ما طفت
.
.
.
.
نار من الشام اجت ......مع النارين التقت .....وحچت بالصار وجره
من السطح كالت طحت ....على النسوان وشفت .....اتطفي بيه شجم مره

وابو ارقيه ......يصد ليه ......لَمَن اچويلي علويه
وبذب رأسه ... على ناسه .... دمع وعيونه مدميه


انشمرت وي الحجر
ولامسِت وجه الكمر

وروس الاضعينه انحنت
من الحرگ حد ما طفت
.
.
.
.
التحقت بهل المحكمه .....نار ما بيها دمه .....ما جوت ذاك النبي
بصحبت ابراهيم اجت...تزهي وبحبه انجوت...رغم ما وجهه اجنبي

حضن صارت ....لمن دارت.....الوادم عالنبي وجارت
شكثر حلوه ......هلا ونخوه ......عطر وبروده من فارت


ريت هيه بكربله
وما تچَوي العائله

تفتخر من سولفت
من الحرگ حد ما طفت


#الشاعر #عبدالله #الشويلي

(ام البنين ع)

الليله بالطيف  يا حيف  شفت خيل وزلم
دارت على حسين  ميتين  اهله بهل الحلم

                  وبس النساوين
                  مد للحسين

بالحلم سافرت ورحت يم الحسين وبيته
مهموم شفته عالمهر لازم بحرگه الحيته
للخيم من طب و طلع تنگط دمع خاجيته
عطشان واتراب الحرب لا ما يچلب ابريته

ما فكرت غاد  بولاد  فدوه الاربعه
لحسين وام عون مِن كون اطيح امگطعه


             من فدوه لبنين
              محد للحسين
            
.
.
.
.
بحرگه يقاتل بالزلم يطلب بثار إخوانه
كل ما يشد المعركه ما يثبت ابميدانه
يترك الساحه ومن بُعِد يتباوع النسوانه
وصلت الحاله أمنِ التعب مابي يحرك السانه

يفرك بالايدين   ميتين  اهله وصحبته
شما  صد للخيام واحتام   تِبيِّض لحيته

                  كسره اهله ميتين
.                  محد للحسين
.
.
.
التمت اعليه الخلگ شفته ينازع وحده
يا ناس بثناء الحرب وطاحت احجاره بخده
بس رفع وجه للسمه صاب المثلث جبده
وليه انوله بطف كربله  ومحد يجي ويسنده

فوگ المهر نام  وازلام  ترميه بحجر
ضل يضعف الصوت ويموت بحسين النظر

              كال الگمر وين
              محد للحسين
.
.
.
.
خضب بحرگه لحيته يا ناس من دم گلبه
طايح يدور اعله الخيم وكل اليفوت ايضربه
ومن خَرَب اجبينه الحجر اتمدد وتيهه دربه
ماكو مجال ايشم هوى ملتمه كلها بگربه

ايدور الهوى ادوار  چن نار  بعروگ الگلب
مابي يشيل ايد  ويريد  يندل الدرب

                وسفه على الزين
               محد للحسين


.
.
.
.
فجأه واجت حرمه أتعدي صعدت على التل گوه
صاحت يخوي الحگ الي وصار الاخو يتلوه
كام وعلى اسهامه وكع مو سهل صوت الخوه
الما يرمي برماحه عدل بجسم الحسين اتقوه


يجَر النَفس حيل   والخيل  اجت تركض اله
يحاول ولا گام  بسهام  يرميه حرمله
 
             ضل شابح العين
               محد للحسين
.
.
.
.
باوعِت زينب حايره عين اله وعين البيته
ودرت الوجه لحسين انه وجوه الخيول الگيته
من راحن اتقدم شمر گضه وعلي من الحيته
اتربع بصدره وحَضرِتي درت الوجه خليته

فجأه وشفت راس  ياناس مرفوع برمح
ما ركزت بيه  ادريه  حسين المنذبح

        ضل ينزف الدين
         محد للحسين
#الشاعر #عبدالله #الشويلي

شهادة السيدة زينب ع


الزهره اجتها الليله خطار  وقميصه وياها
يمها تقره المقتل بنار  وقميصه وياها

اجت محنيت ضهر
چنها جايه من النهر

تعبانه اجتها ام الحسن.... وجابت قميص وياه چفن.... چن ماي عالكاع انچفن.... بملگاهن الحار

اتلاگن وطاحن سوه..... طحيت الطاح بنينوه.... ذاك اليدور عالهوه..... من كل الاكتار

جابت قميص احمر
بالحافر امطبر
بي دم ابو الأكبر
وِمتَرَب اهواي

ام وِابنها طاح مجتول  شتسوي الليله
عدل ميت جوه الخيول  شتسوي الليله

وزينب التبچي بقهر
جنها جايه من النهر
.
.
.
.
فرشت قميصه اعله الأرض..... ورسمت الخيل البي ترض.... الداسنه بالطول وعرض.... وعافنه عالگاع

إمزگ ويگطر دمه..... وكلساعه تشهگ فاطمه.....وحسين ابنها من الضمه...... بعينه الضوه ضاع

صاحت ايا زينب
صدر الولي امترب
والخيل تتملعب
فوگ ابن الاحضان

الزهره مُله التلطم ام عون   شصير وياهن
والنبي وحيدر  يسألون شصير وياهن

واللي لطمت عالنظر
جنها جايه من النهر
.
.
.
.
ام وي بتها تگابلت..... شلون تبچي لو بچت.... وعدها خيم وتفرهدت..... وحرگوهن بنار
لطمن لطم هز السمه..... عالضلع تلطم فاطمه.... ثكلى اعله ابنها محزمه..... المتغطي بحجار

معنى العطش بيهن
والماي ياذيهن
آآ يا بواجيهن
طش بالسماوات

توه طاري المقتل انجاب  غُمى اعله الحره
حين سمعت بالولي انصاب  غُمى اعله الحره

فزَت وصاحت عِثر
جنها جايه من النهر
.
.
.
.
بالمقتل الدامي بدت..... وزينب الحره فرفحت.... صاحت الزهره اطشرت....... شيبات الحسين
(كام وعلى وجه وگع) ...... بذاك السهم جبده طلع.... برأس الرمح حيل اندفع..... اوخَر دمه عالعين


الخيل اجت يمه
وصعدن على جسمه
ابني انسلب هدمه
وضل عاري عالكاع

يطلع اتراب اويا لأنفاس   حريمه اعله ابني
صاح وينك خويا عباس  حريمه اعله ابني

النار اجت كلشي بخطر
جنها جايه من النهر
.
.
.
.
الخيمته يزحف زحف..... وحّده ضد سبعين الف.... نايم عالحجار الترف.....ويدور الماي
رادوا يحرگون الخيم..... حسين كام وكله دم.... كال اتركوا هاي الحرم.....وانشغلوا وياي

اربع فرق غارت
عالوَحَده دارت
الما خِطرت وصارت
صارت بالحسين


ذبحوا ابني والرمح حار  بحرارة گلبه
اوفَرَت النسوان والنار  بحرارة گلبه

الخيل غارت لا مفر
جنها جايه من النهر


#عبدالله #الشويلي

#شهادة_السيدة_زينب

يا عابده يازاهده... يازينب الكبرى
تاج الصبر لايگ الج...ياهيبة الزهره

حاشا تذلين
وانتِ اخت الحسين



يا مناره... يفياي للمسه العطش..... يا واهس الليل اهدعش.... اخيالج الشافه ارتعش


يا اخت عباس الشهم تسرين بنفاسه
بيوم العطشتوا بكربله حط گلبه بالطاسه
من شافج بهيئة حزن نار انگلب راسه
وصعدت الفزعه بكافلج واتناثر احساسه

زلزلج السبعين الف ماهمته القاده
وگلج يخيتي ادللي ياعمة الساده

وشنهو تردين
وانتِ اخت الحسين


____
يالعفيفه..... يا آيه بالطف حامده... يا صامده ياقائده..... حتى الصبر بيج اقتده

يمرجفه أشباه الزلم يابت علي حيدر
بأمر الله يمج باليسر جبريل ضل يفتر
كالولي عطشانه وكلت ما يعطش العنبر
بالنسبة الج شنهو النهر..؟ يالعندج الكوثر


يالشايِّله هيبة علي  وثلثينج  الكافل
من گلتي كفالي منو  صاح اني ابو فاضل

وگلج تمونين
وانتِ اخت الحسين


___
ياعظيمه.....صح ماكو هودج بالسبي.....بس نفسه خدر الزينبي......وجبريل فيَّ اعله العبي

اوياج رد فوك الرمح راس الكمر حارس
والماله واهس بالسبي صرتي اله واهس
كل طفل شافج صامده هناك انگلب عابس
و اخيالج عليهم ترا هم انگلب فارس

يالصيتج احتل الأرض يا كعبة الايتام
مثلج فلا جابت مره ياسورة الانعام

وابهيبه تمشين
وانتِ اخت الحسين



____
عباييتج نور....والليل من عدها نبثق..... اتبث على اعدائج قلق...... محفوظه (من شر ماخلق)

سبحانه جلَّ الخالقج منطيج قدسيه
يا حرمة الله بهل الأرض انتي الاهيه
يهواي صرتي ابكربله والعسكر شويه
القصة مو قصةعدد  شاء الله مسبيه

شاء الله تمشين بسبي  ماشاءت الناس
لو نفترض بيد البشر  مايرضه عباس

مايرضه ترحين
وانتِ اخت الحسين


__
انذلوا هواي..... رغم العدو كلش حذر...... انجزتي معركة الستر..... وأسرتي كل البالقصر

أسرتي كل البقصر للخزي والذِله
تعرفين علتهم شنو اوياطينه يامِله
ويتفنن العارف ترا من يعرف العِله
لغز الحياة انتي وعلي محد عرف حَله

اختل القصر والبالقصر  من سمعوا اباسمج
يالمانزل راسج ابد  كلها انحنت يمج

بس انتِ تبقين
وانتِ اخت الحسين

____
يا حنينه..... ماننسى ذيج الفاجعة........لا والبقى بطف مصرعة...ناخذ الثأر اباربعة

متحزمة خدامج ترا بحرگة بواجيها
لعدوانج الما خلصوا ماننسه ماضيها
من يطلع المهدي وعلي نذب السمه عليها
وانگلب عليهم ها لارض سافلها عاليها


من يطلع المهدي الأرض نسميها (يازينب)
بكل بقعة ننشر كربله نخلي الدمع يلهب

ونلطم بالونين
وانتِ اخت الحسين





#الشاعر #عبدالله #الشويلي

#ليلة_العباس_ع_دمعة

يا ابو فاضل وين أديك
يا ابو فاضل ضمني ليك

گلي خويا ورد إليه  يا گمرنا
عوف اديك وهاك اديه  يا گمرنا


انچوه گلبي واجيتك .. ودم شفت تارس لحيتك.. خويا طحت اگبال اخيتك ..انووح
انت زودي وكافل اختي ...حافي أجيتك ياكسرتي ...  شمتو وطاحت دمعتي ...انوح
انسكر ضهري ويه گلبي ...امنين ارد ضيعته دربي ...خويا منتظرتني حربي .....اشوف
خويا عينك لا تضمها .... انه أخيك عشت المها .....اعله خدك جاري دمها ...اشوف

يا ابو فاضل هايه عين
يا ابو فاضل هاية أدين

يلا خل نرجع سويه ياگمرنا
عوف اديك وهاك اديه ياگمرنا
.
.
.
.
جفوف اديك السالمتني .....من أجيتك عثرتني ....اعله وجهي طيحتني ....يخوي
علي ثاني انت اليه .....لا تروح الغاضريه ....تسلب ابنيتي رقيه ....يخوي
واگف بزودك يزودي ....بطيحتك يبسته عودي.....انت ماييَّ وانت جودي ....وهَواي
من دموعي ارد اشربك ....انت ابن امي أحسبك......أكثر من ابني احبك ....وهَواي

يا ابو فاضل يا ضماي
يا ابو فاضل انت ماي
سهم صدرك كون بيه  يا گمرنا
عوف اديك وهاك اديه ياگمرنا
.
.
.
.
جنت من اعطش اشوفك....تركض وماي بجفوفك .....انت گتلي ما اعوفك .....اخوي
الماله اخو تكتله الصحاري .....حامل الواي وقراري .....بطيحتك بان انكساري ....اخوي
بالعمد راسك تهشم .....على عينك يابس الدم ....خويا اريد بصدرك اشتم .....واموت
كسرتي كلش جبيره ...اني فاگدلي عشيره ....روحي گبل اختي اسيره ...واموت

يا ابو فاضل من اطيح
يا ابو فاضل  حيل أصيح

تلتم الوادم عليه  ياگمرنا
عوف اديك وهاك اديه يا گمرنا
.
.
.
.
افترت الدنيا وعفتني .......والحمل مال اعله متني....موتتني موتتني ....وراك
سبعه واتلاثين عمرك.....وانت ما منطيني ضهرك ....خويا نومني اعله صدرك ...وراك
صاحت الوادم عليه ....مات أخيه مات أخيه .....حضرولي الاعوجيه ...وجيوش
انه هذا الكام يعثر ... الراح أخيه وراح الأكبر ....الوحده يحارب معسكر ....وجيوش

يا ابو فاضل وين اروح
يا ابو فاضل  بس جروح
يچوي رمل الغاضريه  يا گمرنا
عوف اديك وهاك اديه ياگمرنا
.
.
.
.
انه بعدك خويا ضايع ....وحدي عن اهلي ادافع .....ابقى انازع بالمصارع ....سليب
واحد ايجر مني خنصر .....واحد ابنحري يطبر ....واحد الخيماتي ينظر ....سليب
اواحد ايجير العمامه ......وبلهاتي يحط سهامه ..... اواحد ايصيح خيامه ....ضياع
يا ابو فاضل كلشي يوگع ....وزينب المحروسه تطلع ....تركض وبالخيل تدفع ....ضياع

يا ابو فاضل الزغار
يا ابو فاضل كلها نار

وتصرخ الزهره الزجيه يا گمرنا
عوف اديك وهاك اديه ياگمرنا

#عبدالله #الشويلي

تعبت هواي هاليوم واجيتك امشي كوه
عطشت عليك يحسين وجابتني الاخوه




جيتك اتعثر خويا مچويه واني علويه واختك يحسين
احترگت اخيامك وانطفت بيه صاحو عليه عباسج وين
تطلب اميه وامك الزهره شكبر هالعبره يا ماي العين


جيتك بحرگ عباتي
عالرمل عفت خواتي
طشرهتن امنياتي
غارات الخيل

ليش اطشرت ليش ما عدهم امروه
عطشت عليك يحسين وجابتني الاخوه

.
.
.
.
شباقي من عندك فدوه حاجيني لا تبچيني تعبني اجفاك
سلبو اهدومك وانسلب گلبي احجي يا تعبي شنهو الاذاك
اصبع منَ ايدك منگطع توه والله حلوه امشي بلياك

رحلت السبي طويله
آنه ما بديه حيله
الهزيله تعرج الهزيله
ومو مالت سوگ

السوگ يريد رجال وإني وياي نسوه
عطشت عليك يحسين وجابتني الاخوه

.
.
.
.
تعثرت ببني وطحت موجوعه جفوف مگطوعه شفت اعله الكاع
كَبراني التل صعدته تكتل النفس ما ينزل للريه بساع
ردت احب صدرك وشفته ماهوه هايه مو خوه مابيها اوداع

مفرفحه يخويا أجيتك
بيضه عالرمح لحيتك
انه اخيتك أنه اخيتك
والخوه تريد

أنه هد حيلي عباس بعد ماعندي قوه
عطشت عليك يحسين وجابتني الاخوه

.
.
.
.
تعبو راسك وتعبو گلبي محد بگربي كلكم ميتين
كلها متعوبه وحيلي مو كافي الشمر متعافي شايل سوطين
صحت يا يمه وامي اجت ليه تمشي محنيه تصيّح يحسين

بحسره اسمك انه اندبه
جابت امي ماي إشربه
لا تردها صعبه صعبه

مثل ما طحت عالكاع فوگك امي تهوه
عطشت عليك يحسين وجابتني الاخوه



#الشاعر #عبدالله #الشويلي

فز بدمنا الواهس.....مثل جنون العابس ....نطلع زوار
حضرناها الرايه ...عالموعد مشايه ....موعد احرار





بشر گد المطر ...طلع طلعت شرف
مثل سگف السمه ...ولا حده طرف

بسم أُم حسين نمشي كل سنه نشد الوثاق
باوع المشايه تگله تارسه كل العراق
نصير يم جف ابو فاضل كتله من الاشتياق


العباس معلمنا ....بالغيره محزمنا ....وأجواء الشوگ
ساعه نهب مشايه ....ساعه نسوي اقرايه ....بسم المعشوگ
.
.
.
.
طلعنا من العدم ....وگصدنا كربله
وسمعنا من الخدم ...هلا بيكم هلا

الدنيا عفناها ورانا وصار غايتنا الامام
بهاي رحلتنا العظيمه  نطيب جروح السهام
بعالم التقديس اسمها رحلة الحب والغرام

لا ما نتعب ونمل ....عَبره وعِبره نحصل ...من درب حسين
العشاگ يسمونه .....ميتين يشوفنه ....احنا العدلين
.
.
.
.
مضامين الصدق ....بدربنا تنوجد
الفرد بينا عبد ....وملك هذا العبد

ناس عدنا الغاضريه اول واخر وفاء
احنا وادم من نسولف لازم نحط كربلاء
الماقروا شارت التربه ما يعرفون الشفاء

نسجد يم عتبتها ....ونقدس تربتها ...تربت سلطان
يامن رايد تسأل ....بيها الميت يعدل ...عدنا ايمان
.
.
.
.
الدرب مابي تعب ....درب سوه زلم
لذا تلگه المشو ....شهم ساند شهم

نمشي ايام وليالي وأبد منحس بالدرب
بابي انت وامي نگولها من كل گلب
كلشي منه واله يرجع حسين علمنا نحب

تتلگانه الزهره ....من انطب الحضره ....بجف العباس
گوه الله خدامي .....يالتشفون آلامي ....يا اشرف ناس
.
.
.
.
حوائجنا نگضت ....قبل لا تنحجي
اليحب من كل گلب....اعله دنيا ينتچي

حاشا يرجع جفنه خالي وعدنا الحسين الأمير
منو مثله مِلك عالم وتالي ينشال بحصير
حسين عدنا رقم واحد والبقه كله اخير

من خيره سوانه .....وبحبه غذانه ....وكبرنا هواي
ياهو اليعطش گلبه ؟....واعله حساب الحبه ....ما يشرب ماي



#الشاعر #عبدالله #الشويلي

#رقية_عليها_السلام

عمه عمه   اتمنيت اني الراهب
عمه عمه  واشبگ ابوي الغايب

آه  بيه حسره
آه  وينه نحره


جنت الحبيبه  وهسه الغريبه
الداسته الخيل من وين اجيبه
ميت والاسهام  كلسا تصيبه
شعظم المصيبه

المات بموت عباسه
ذبحوا كل هَلَه وناسه
وحطو عالرمح راسه

ثوبه ثوبه  متشگگ أمن الحافر
ثوبه ثوبه  انسلب يوم العاشر

صار  كلشي عثره
آه   وينه نحره
.
.
.
.

عطشان أبويه يا عمه صعبه
جا يمتى اشوفه ماي ارد اشَربه
مشتاقه اخلي راسي اعله گلبه
گلبي واحبه

لساه ما خلص ذبحه
الوادم تضحك لجرحه
الشاله يهوس برمحه

ذابل  ذابل  وجهه المتعب الزهره
ذابل  ذابل    وعيونه كلش  حمره

بي  الله ادره
آه وينه نحره
.
.
.
.

عمه المسيحي  مات اعله رسمه
كون بمكانه  واسهر واشمه
وبدموع العيون اغسل له دمه
لا ما الجمه

ما اگله اني عطشانه
ارسمه يمشي ويانه
موش اشفافه ذبلانه

ارسم ارسم   رأسه مع كل جسمه
ارسم ارسم  من شعره عمه لجدمه

ماي واعله صدره
آه  وينه نحره


.
.
.
.
بالملگه أصبن دمعي اعله دمعه
ترفعيلي رأسه  مو انه ارفعه
مچويه اديه خافن اوگعه
ياذيني وضعه

مثل بچيه اعله اخوه عباس
هيج ارد ابچي فوك الراس
حريمه ذبحوا الاحساس

ميته ميته  حسبيني لو شفته اني
ميته ميته  من القهر واحزاني

نوح  گلبي جمره
آه  وينه نحره

.
.
.
.

عالوالد أسأل  جند ال اميه
يگلولي عفناه  للاعوجيه
يا عمه مطحون  چبد الزجيه
بالغاضريه

خنصر أيده ما هوه
يجر هذا الهوى كوه
بلا اولاد لا خوه

وحده  وحده  والشمس تصهر جسمه
وحده  وحده  جامد بعينه دمه

صار ساحه ضهره
آه   وينه نحره
.
.
.
.
يا عمه بالشام يكثر تعبنا
الرايح الراد الواگف يسبنا
ومن نظرت الناس يوگف گلبنا
محد يحبنا

احجار من السطح يوگع
علينا ولا فرد يفزع
ودمنا من الوجه يطلع



يوگع  يوگع   الماي حار اعلينا
يوگع يوگع  ومثل الخيم يجوينا


اوجوه   كلها حمره
آه  وينه نحره

#عبدالله #الشويلي