موشح إلى الإمام الحسن عليه السلام


يـــــا كــريــم وحــاجتــي أدريــها
غيــرك انتــه يــا شخـص يگضيها

*-----------*----------*

يــا كــريـم وحگـي لــو بابــك ادگ
يا عشگ طاهــر فــلا مثــله عشـگ
ادري بــاب الله انتــه المـن صــدگ
لهفــت المشتــــاگ تشعـــر بيـهـا

*-----------*----------*

بلهفــت المشتاگ أجيتــك يالحـسن
همــومي كثـره ويم مضيفك نوخن
أدموعي مرخوصات لــو يمك جرن
غاليــه أعليـــك الدمــــوع أجـــريها

*-----------*----------*

غاليــه أعليـك المدامع من تصـب
يــا كــريم ومـا تـرد چـف المحـب
انـه ضامــي وانته شـلالك عــذب
صحــره روحي ومايــك أيــرويها

*-----------*----------*

مايــك أيـروي الأرض بالمكــرمـات
والحيــاة ابلايـه جــودك مـو حيـاة
جفي أمده شكثـر شايــل أمنيــات
مـــا تــردها وحــاجتـي اتگضيــها

*-----------*----------*

حــاجتـي اتگضيـها يبـن الأنـبيـاء
والتــوسـل بيــك مقبــول الدعـاء
ضنـو الشمــات لــو مــاكــو بنـــاء
نعــوفــك احنــه يالحسن تــاليـها

*-----------*----------*

انعوفك احنه هاي ما ترهم محال
لــو تسيخ الأرض وتمــور الجبـال
لا وحگك يالحسن ننســى محـال
الشيعه مــا تنسى الحســن واليها

*-----------*----------*
الشاعر
موسى البديري

قصيدة ( آه يالحسن ) إلى كريم ال محمد


زينب بالحــزن يا خــويه تـــون
اه يالحسن ومصابه
اه يالحسن ومصابه

*

زينــب مـن زغــر مــا فــارگت همها
دهرها اعلى الحزن مـن زغـر علمها
مــو مــره الــوكــت مــرات يتـمــهـا
فگـد جــدها وأبوها المرتضى وامها
والنوب الحسن غــدّار الـــزمن
اه يالحسن ومصابه
اه يالحسن ومصابه

****

خيمتها الحــسن مــن راح والــدهـا
شافــت يــا محـن زينب بعد جدها
أمها انعصرت وضــربه على خدهـا
وابوها مصابه بالمحــراب ضاهدها
بالحسره تصد بالطشت الـﭼبد
اه يالحسن ومصابه
اه يالحسن ومصابه

****

تصد ﭼـبد الحسن وتشاهده يعاني
وتنّـادي بصوت اه يفــراگ خوّانـي
يخــويــه سمّــك بــدلالي اذانـــي
واحد خــويه اودعنـه وره الثـاني
محتار الگلب المن ينتحب
اه يالحسن ومصابه
اه يالحسن ومصابه

****

ودعّهـا الحــسن وبـدمعــه ينظرها
وعلى مصاب اليجيها ظل يصبرها
بگلبهـا هـل الـزمن يوميـه يطبـرها
من عمــر الـزغـر بالنــوح حَاصـرها
ديــوان الكرم هل اليوم انهدم
اه يالحسن ومصابه
اه يالحسن ومصابه

****

شـال المجتبى وزينـب كثـر ونـها
وأسهام النعــش بالعــين صـابنها
يوميــه المحــن زينــب يمـرنــها
بمصايبها المظن والله يــذكـرنها
تنادي ام الابه خويه المجتبى
اه يالحسن ومصابه
اه يالحسن ومصابه

****
الشاعر
موسى البديري

آخر انفاسه الحســن دارت اعيونه وبجن
ناده ياحامي الضعن يابو فاضل
***

بآخر انفاسه ابو القاسم نازعت روحه الاجل
يدري بالســـفره طويله ولازم يــــودع الاهل
خلصت كلبه المواجـع ذبلت حيلـــــــه العلل
بعد مايحصل املاكــه ومات بعـيونه الامل

يحجي بالكوه كدر صاح يحزام الظهر
يابعد روحي الكمر يابو فاضل
***

دار عالعــــــــــباس عينه ودمعه بلل لحـــيته
صاح وين احزام ظهري خل احبــــن كصته
خلي يجيني الضام حيلــه للحســــين وغربته
راعي المــروه عزيزي المحد ابكَـــد غيرته

وين شــــيال اللوه واللي اعز امن الهوه
انت لعيوني ضوه يابو فاضل
***


أكعد بصفــــــي يخـــويه خل اكلــــــــك يالكمر
آنه رايح يابو فاضــــــل ناوي هالليلــــه السفر
وجان ودي اوياك اظلن واحضر بيــــوم النهر
لاجن الدنيا اغدرتنــــي وموتي ياوسفه حضر

انت ذخر امن الابو يا اخو نعم الاخو
احزام للخوه وكفو يابو فاضل
***
باجر اهواي النوايب وانت كد المســــأله
باجر اتحملون كلكــم يالحنيــــــن الكربله
وبيدك الرايه ترفرف من تقـــــــود القافله
اتأمن الحره ابوجدك وانت يــــــم العايله

دير بالك عالحرم خويه ياراعي العلم
وانته دكلها الخيم يابو فاضل
***
خلي عينك عالعزيــــــزه اختك اربــات الخدر
امدللــه ومحشومه تدري خويه دكلهــا الصدر
برايتك ظـــــــــلل عليها ودوم صير الها ستر
شانها عالي العقيلــــــــه والله منطيـــــــها قدر

عينك اعليـــه حمى التشبه امنه فاطمه
والخدرها املازمه يابو فاضل
***


ابو علي الركابي

للامام الحسن ع
.
.
.

اتـذكـرت مصابه .. وانــه بــالخــرابه
مـانســيته
ابــو محــمد اخــوي

_____

قصــتي كلــمن سمــعها يبچــي مــن عنـوانها
والخـرابه امـن اسمـعتني اتفــطرت حيـطانها
أبــد مــو سهـــله بــواچــي الــفاگده خــوانها
العدها مثل اخواني موته خل تحظر اجفانها

واليـسر تـركـته .. الحسن من ذكرته
ودم بچيته
ابــو محــمد اخــوي

_____

المــات لا مــامات حــزنه والحزن مايعــتگ
الظيعت مثلي اخــوها حــگهـا بالهــم تـغرگ
رغـم ذنـي احبال اديـه ورغـم متـني الازرگ
الحـسن مـن ايـمـر مصابــه يـهالوادم اشـهگ

شهـگـة الشماته .. الشاهدت خواته
من نخيته
ابو محمد اخوي

______

للحــسن ونــيـت واهــل الشام سمـعو بــيه
وگــفـو ابــاب الخــرابه ايــبـاوعــون اعـليه
بســچ امــن النــوح گــالو كــافي يالمـسبيه
اليبچي يوم اثنين خـوب البـچـي مويوميه

للحرس شكوني .. وبالعجـل اجـوني
ويمي ريته
ابو محمد اخوي

___

امن البواچي على اخوتي تشتعل جمـراتي
ذاكـره جـرحي الچـبــير الـرافگ احچاياتي
للحـسن سويـت مـاتـم رغــم كــل مأساتي
وبــثـــوابه عاليــتـامــه وزعـــت دمــعـاتي

للحـسن ثـوابي .. دمعتي ومصابي
وماوفيته
ابو محمد اخوي

______

مثل ما لحسـين ابچـي وحــزنه كـاسر ظهري
الحسن نفـس الشي احسه همه تارس صدري
وحـق چبده الي اتگـطع ابقـه اون كـل عمـري
ومـا ابطل النــوح ابــدن حــتى وانــه بگـبري

والخــرابــه تشـهد .. امن البچي حيلي انهد
الخد سگيته
ابو محمد اخوي

___

غفت عيني لحظه وحده وبالحلم چن شفته
ماعــرفني حـقـه هـــوه لــكن انـــي اعــرفته
گـتله هـيچ ايصير بـيها كلمــن ايـعوف اخته
لاتــروح اويـــاي ابـقـــه وبـالــدمع حـــلـفته

گتله والاميره .. اصبحت اسيره
ومالگيته
ابو محمد اخوي

___
تمت والحمد لله
حيدر تركي الكربلائي

شهادة الامام الحسن ع
.
.
.

كسرتك كلش چبيره .. چني فاگدلي عشيره
ومن دفنتك يالحسن
چـن بقــت ابلا وطن
يخويه
-----
يخمتـنـه الچبيــره البيهـا ملتـمـين
خويه اخلاف عينك مثل المتيهين
يالمبعـد دهــر هـم فكرت بحـسين
زحمه ظهر اخيك ينــكسر مــرتين
 
الدنــيـته كلها شمــاته .. الماله اخو ماتت حياته
ومن كسر ظهري الزمن
چــن بقــيت ابـلا وطن
يخويه

-------

الگاع ابلا اخـو جواي احـس رخوه
يتچوه ومن رحت ماضل الي تچوه
مايبـــچي الـــذي مامــچوي بالخوه
وشيـــصبره الـذي دافـــن اخـو توه
 
جروح هجرك خويه بيه .. چنــهن الف وتسع ميه
ولمن اعيــونك غفن
چن بقيت ابلا وطن
يخويه

--------

اخيك مولحت من البچي اخدوده
چبدتي موچـبدتك خـويه ممروده
تراها حسين عگبك دنيتــه سوده
اعمه وداعتـــك والوادم اتگـــوده
 
حالي لاموذاكه حالي .. هدلت امتوني الليالي
اعليه من هنه انچفن
چن بقيـت ابلا وطن
يخويه

-------

يشيخ الـطايفه التبچيلك الـسبعه
كل لحظه اعله گبرك انچفي دمعه
يبو الفزعات اخوك بحاجة الفزعه
مكسـور الظــهر مايــحمـل الوگعه
 
الماله اخو ياخويه باچر .. تطحن اظلوعه الحوافر
بكربله حســيت اذن
چن بقيت ابلا وطن
يخويه

__

يسئلوني عــليك ومـن يسـئلوني
وحقك چـن الف ذبحه يذبحوني
صعبه ابلا اخو الوادم يشوفوني
بالطف باجر اهـــناك اشيراووني
 
حسين بالطف لو تمدد .. تنسلب نسوة محمد
اتصيح اختك بالضعن
چــن بقيت ابلا وطن
يخويه
-------
حيدر تركي الكربلائي

استشهاد الامام الحسن ع

بعيوني خلها اعيونك بساع
تبچيلي وابچيلك بالاوداع
مايختلف سم او سهم
نفس الجرح نفس الالم
خويه يحسين
+++++++++
يالمايجي يوم والم يحسين يشبه يومك
من تبچي بوداعي جمر يابو علي مالومك
اخر وداع اخر نفس اشتمه من هدومك
اترسهن اعيوني نظر خل تبقه بيها ارسومك

فوگ الرمل تتغير ارسوم
لا يبقى لون ومامش هدوم
وجه العطش بيك انرسم
نفس الجرح نفس الالم
خويه يحسين
++++++++++
من زغري وبگلبي بقى موقف ورايد ذكره
عاليمنه واليسره النبي گعّدنه يوم ابحجره
تتذكر ابيوم الي رحت تشتكي الامي الزهره
من نحري قبلني النبي وحب الحسن من ثغره

هسه اعرفت والمقصد اهناك
وسط الطشت شوف الچبد ذاك
النحرك سهم والچبدي سم
نفس الجرح نفس الالم
خويه يحسين
+++++++++
والمثلي لبگلبه حچي مجره الدمع شيفيده
هنيالي اموت ويمي اخو يغمض اعيوني بايده
الله يعين اليلتفت مايلگه يمه اعضيده
ينسدن اعيونه برمل المثلك بگطع اوريده

والصوت اجالك بين الاسهام
حرگوه الحگ خويه لخيام
نار الضمه ونار الخيم
نفس الجرح نفس الالم
خويه يحسين
++++++++++
عباس سالفتي خدر غالي واتقرب يمي
موهذا يومك لو شفت نعشي واسهامه بجسمي
لا ثاري لا سم چبدتي ام الخدر كل همي
زينب اخت بس اعتبر عالضعن فاطم امي

ادري انته گدها تكفل اثنين
والهذا تكسر ظهر الاحسين
خدر الهواشم بالعلم
نفس الجرح نفس الالم
خويه يحسين
+++++++++
واحد امرنه وبالحزن كلمن وماخذ دوره
تبچيلك الناس اشكثر اعليك ابگلبها احروره
اعيوني اعله دربه اليعتني هلبت وگبري ايزور
مشغوله عني ابمحنتك والهالسبب معذوره

اتمنى گبري ابكربله كون
والحاجه من هم يطلبون
بشباچي لو زاير لزم
نفس الجرح نفس الالم
خويه يحسين

ثائر الربيعي

لطمية للحسن ع
الشاعر قاسم الساعدي المندلاوي
****
واسيهه      ابغاليهه     
تجري الدمعات ادموم      الزهرة الحال المسموم
***
بدموع الوفه منك            واسي يا محب فاطم
بالسم النقي فگدت              أبنهه العابد العالم
حظرت يمه محنية          فجعهه ابفعلته الظالم
وچن اعيوني تنظرهه    حضنت شمعته القاسم
وتنادي      أولادي        
للمحشر تبقه اتلوم       الزهرة الحال المسموم
**
أشعر بيهه أم حسين         من شافت ابو محمد
شافت بي مصاب الطف    وجمر اللوعة ما يبرد
وشافت يوم ابو الأكبر          ابتربة كربله امّدد
وشافت چم شبل عالكاع   وعليل ابجامعة امگيّد
وحرگ اخيام    بيهه ايتام   
منهه الحسرات اتدوم    الزهرة الحال المسموم
****
تعنت ليه واهو ابهالحال           تتعثر من الآلام
تتوچّه على جرحه           وجرحه بيهه ما يلتام
ساعد الله أم اتشوف                غاليهه يعد ايام
الموته وبوسط شمات    غمضت منه عينه ونام
الهالمنظر    تتمرمر      
ارويحتهه يمّه اتحوم       الزهرة الحال المسموم
***
ابكل اللي جرة تعلم         من الهادي هالأخبار
گال المجتبى ايصالح         وصلحه عزّه للثوار
بي يحفظ كتاب الله            ومنهاجه من الكفار
وهذا الموقف ايثبته    ابدمه حسين ابو الأحرار
يبقه اعلان    للأديان  
صرختهه اعله المعصوم    الزهرة الحال المسموم
***
أذا ما تگدر اتزوره      خل روحك تجي الگبره
وخلهه عالضريح اتحوم    أبچي واندب الزهره
هذا گطّعوا چبده               وذاكَ منگطع نحره
وبعد اشكيلچ اللي صار       ويّه موكب اليسره
باصعب حال    هالأطفال    
تشكي الربهه القيوم    الزهرة الحال المسموم

لطمية للمجتبى  ع
الشاعر قاسم الساعدي المندلاوي
**
يختي يا زينب         يمي لا تبچين
يختي يا زينب     يوم ايمر بحسين
وحده ابهالميدان          واهله اعله التربان
**
من طبع الأخت لمّن         أخيهه اتعاينه مطروح
تتمنآ يضل يمهه            وتفديهه الحياته الروح
لن كل حُرمة واليهه              تتكدّر لونّه ايروح
تبقه ابغيبته ابطاريه           وجو للنايحة مفتوح
تفديه بالأنفاس   لن غالي اعليهه     
تفديه بالأنفاس       لو رَد واليهه
ايفكر بالنسوان           واهله اعله التربان
**
ابيومه يا بنت فاطم              من عندچ صبر مطلوب
تشوفينه يدير العين                باولاده وهله مصيوب
اينادي اخيامي اتركوهه                آنه ليكم المطلوب
وكافل خدرچ العباس              يم المشرعة مخضوب
وينظر عبد الله     ويصد الجسام  
  وينظر عبد الله    يشبه بد التام
ايقبّل بالرضعان        واهله اعله التربان
**
چنّي يالعقيلة بيچ                     تمشين الأبو الأكبر
اتنادينه يبعد الروح                 اخيامك خويه تتوجّر
گوم وضمّد اجروحك                ابحيرة يالولي الخدّر
الغيرة اتحرّكه اعليهن              يريد الگوَمة ما يگدر
سهم المثلث     يهدّم منه الحيل    
سهم المثلث    ابچبده ايأثّر حيل
متحمل أحزان       واهله اعله التربان
*
هاي الساعة يا زينب              شدي احزامچ الوكتچ
كل هاي الضعينة اتكون           يا بنت الوصي ابّختچ
آنه ابكربله ويّاچ                    لا ما اعوفچ الوحدچ
لاچن إنتي كافلهم                    توفين الهم ابوعدچ
هالموعد هذا    بارض الطف موعود  
 هالموعد هذا      بي هالعترة اجنود
للخالق قربان       واهله اعله التربان
*
عندي يمچ اوصيّة                    يا زينب إذا جسام
سار ابجدمه للحومة                وهوه ابأجمل الأيام
كوني نايبة عني                   ودعي اموادع الأيتام
ودعيه ما يرد ليكم          يومه ابگلبي يرمي اسهام
رملة المثكولة      مذهولة الأفكار   
رملة المثكولة    من هول الأخطار
ايحيطونه العدوان          واهله اعله التربان
****
هذا العندي وشعندݘ          أشكيلي يبت حيدر
گالتله أمر واحد                  بي دلّالي امحيّر
لو طاحوا هلي كلهم        واحنه ابلا ولي بالبر
منهو اللي يرد حقده    عدونه اعلينه من يظهر
من ايگص ايده     لو عالخدّر عال
من ايگص ايده     لو طگ الأطفال
حامي اعله القرآن        واهله اعله التربان    

مسموم مسموم امامي يالحسن
...
عادت الذكره وحظرنه ايامه
احسين هاي الليله طاح احزامه
وابوفاضل ضل يدك عالهامه
يلله صبو الدمعه يالطامه
مسموم مسموم امامي يالحسن
...
من رسول الله الحسن ريحانه
وسفه بالسم غدرته الخوانه
الحسن مات وقفلو ديوانه
خلي كل شيعي يصيح اويانه
مسموم مسموم امامي يالحسن
...
فاطمه اتصيح الدمع يحلالي
آه واويلي عله ابني الغالي
يلله ياناعي المصاب اقرالي
بالبقيع الليله غاب اهلالي
مسموم مسموم امامي يالحسن
...
الليله ابومحمد فجعنه امصابه
وزينب اتعنت تشم بترابه
اتصيح وادموع الحزن سجابه
آ يخوي الكسر ضهري اغيابه
مسموم مسموم امامي يالحسن
...
للحسن هالليله نرفع رايه
واحنه شيعتهم نضل وفايه
يمته نتعنه اله مشايه
نوصل الكبره ونسوي اقرايه
مسموم مسموم امامي يالحسن

محمد الجماسي
اللهم عجل لوليك الفرج

ويلي على المجتبى
واويلي عالمسموم..واويلي عالمسموم
...
جبده انمرد والسم صعد لعيونه
واخوانه كل ساعه الجهه ايديرونه
بآخر نفس يتشاهد ايسمعونه
ملعونه جعده السمته ملعونه
ياشيعه سابع صفر
يوم الحزن هاليوم..واويلي عالمسوم
...
ريحانة الهادي وعزيزه الزهره
ياكل الطير بخيره لو مد سفره
بالتمن ايحط الذهب للفقره
هذا الامعزب وابوادلال السمره
اصبح مضيف الكرم
من شوفتك محروم ..واويلي عالمسموم
....
الخوان لويتفاركون بساعه
يبقه الكسر طول العمر اوجاعه
احسين اعله أخيه الليله طاح اشراعه
كسرة ضهر والله الحنين اوداعه
واعله الحسن مودمع
زينب بجيهه ادموم..واويلي عالمسموم
....
ابحظنه الحسين امخلي راس الغالي
وايكله ونتك خويه شلة حالي
ابوجهك اباوع وانه سارح بالي
خيمه ورمح يالحسن يتراولي
وياي اريدك سند
لو هاجمتني الكوم..واويلي عالمسموم
...
الطف اجاني وصدري ضل يوجعني
وباجر الخيل ابكربله اتكطعني
تاخذني صوب الخيمه واترجعني
بالطف أضل اومحد ايشيعني

وعالشاطي يبقه الكمر
راسه بعمد مهشوم..واويلي عالمسموم
....
باجر اذكرك واذكر انه ايامك
من توكع ادموعي بعرس جسامك
كون انه ميت يالحسن كدامك
ولا طرن التابوت خويه اسهامك
وصلن اسهام العده
للجسد يامضلوم..واويلي عالمسموم
....
واحنه ابمصابك هم نسوي اقرايه
شيعتك ياابومحمد اووفايه
يمته نشاهد كبتك امضوايه
و لارض البقيع انروحلك مشايه

هالحلم شيحققه
يالمرقدك مهدوم..واويلي عالمسموم
....
محمد الجماسي
اللهم عجل لوليك الفرج

(يحادي النوگ)


يـحـادي الـنـوگ زيـنـب عـيـنـك اعـلـيـهـه ٢

                                      *---------------*---------------*

راح  الــدلـلاهــه وراحـــت الــــرايــــه
تدري امـخَـدّره وما سامـعـه احـچـايـه
صـعـدت عالهزل وجـروحـهـه اهـوايـه
مـــا سـوّت لـهـلـهـه مــأتـــم  اقــرايــه

خـاف الــنـاگــه مـــن تــعـثـر تــأذيـهـه

                                      *---------------*---------------*

اگـول امـچـتّـفـه مــا لايـگـه وصـعـبـه
وبـعـيـد الــدرب مــا تــرحـم الــغــربـه
يــاهــوّه الـعـلـيـهـه يـنــكـســر گــلـبــه
حـگـهـه لـلـغـوالــي الــمـدمــع اتـصـبـه

عـگـب عباس انـتـه الـصـرت حـاديـهـه

                                      *---------------*---------------*

افــتــر الـوكـت وتـحــمّـلـت ضـيــمـه
عـمرهـه امدلله وما ماشـيه ابـهـيـمـه
دمــعـتـهـه جــريـه اتـشـابـه الـغـيـمـه
خـلـهـه لـلـكـفـلـهـه الـمـأتـم اتـقـيـمــه

هــــاي ام الـــدلال الـــراح والــيــهـــه

                                      *---------------*---------------*

چـانـت بالـخـدر والـهـيـبـه مـصـيـونه
هــاي الـرخـصلـهـه الـكـافـل اعـيـونـه
حــتــى اخـيـالـهـه الــوادم يـهـابـونــه
ابـوهـه المرتضى الـكـلـكـم تـعـرفـونـه

مـصيـبـة كـربـلـه اشخلت بـعـد بـيـهـه

                                      *---------------*---------------*

اجــروح ابـگـلـبـهـه  ونــار حــرّاگــه
عـذّبـهـه الـكـفـيـل ويـصعـب افراگه
ريّـض بـالـمـشـي لا تـعــثــر الـنـاگــه
اگـبــال الـعـقـيلــه الـروس تـتـلاگــه

ابهذا الحـال تـنـظـر روس اهـالـيـهـه

                                      *---------------*---------------*

لأرض الـشـام لو وصلت الـمـضلـومـه
مهضومه تـراهـي الـحـره مـهـضـومـه
بـمـتـون العقـيـلـه اسـيـاط مـرسـومـه
جـفـنـهـه بـالـمـدامـع حـرّمـت نــومــه

شماتـه وكلهه غـربـه الـنـاس تـدريـهـه

                                      *---------------*---------------*

✍خادم السيده زينب (ع)
الشاعر رعد الجريخي

نزلة // للإمام الحسن المجتبى عليه السلام

يا امامي الثاني
ما نسيتك آني
٠٠٠٠٠٠٠٠٠٠٠٠٠٠٠٠
سيدي يبن الزجية ويا ابن حامي الحمه
حبك عله الأمه كلها فرض من رب السمه
افتخر اني بولائك فايز البيك احتمه
حبك بگلبي مكانه يسري بي مسره الدمه
اسمك عله الساني
ما نسيتك آني
٠٠٠٠٠٠٠٠٠٠٠٠٠٠٠٠
يالحسن مولاي حبك ينجي من موج الخطر
شلون ما اهوى واحبك. وانت اغله امن النظر
الله خصك بالإمامة. فرض واجب عالبشر
اكتمال الدين بيكم واليحبكم ما خسر
منهجي وعنواني
ما نسيتك آني
٠٠٠٠٠٠٠٠٠٠٠٠٠٠٠٠
طالعت سيرة حياتك. يا امامي يالحسن
كلها نور وكلها رحمه وانت للخايف وطن
تهدي للحق والهداية ودرع يحمينه الفتن
للكرم فاتح مضيفك. سيدي بطول الزمن
عايش بوجداني
ما نسيتك آني
٠٠٠٠٠٠٠٠٠٠٠٠٠٠٠٠
شكد جرعت جروح كلفه. گلبك شيحمل ألم
مرّه طعنه من عدوك مرّه من خِلّك سهم
والأشد طعنة خليلك من تخاذل ونهزَم
لو جبل صبرك يغالي. جا تضعضع ونهدم
ذكرك باحزاني
ما نسيتك آني
٠٠٠٠٠٠٠٠٠٠٠٠٠٠٠٠
فوك كل هاي المصايب. آل اميه ظلمتك
ابن ابو سفيان ظالم. انتهك كل حرمتك
غَرر بجَعدَه اللعينه. نفذتله وسمّتك
چبدك بسمها تكطع صايم ومارحمتك
مقتلك بچّاني
ما نسيتك آني

سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

للأمام الحسن المجتبى عليه السلام
مقدمه

يا نور عيني يالحسن جرحك يأذيني
..................

علمتني آنه اخوك حسين وانت حزام ظهري
رافگتني يالحسن ويّاك عايش طول عمري
لو عفتني ينكسر ظهري واموت بهاي تدري
سلّمتني. للدهر من بعدك ومخنوك صدري

ما يرحم بحالي الزمن. ياشمعة سنيني
يا نور عيني يالحسن جرحك يأذيني
............

ريته بيه سَمّك ولا ينجرح چبدك يغالي
حن عليه. يالحسن بعدك تظل ظلمه الليالي
چم اذيه. تحمّلت طول العمر يبن الغوالي
ال اميه. سمّموك بلا ذنب يالحسن تالي

شبسرعه ايامك گضن. تمشي وتخلّيني
يا نور عيني يالحسن جرحك يأذيني
..............

بالسلامه. اندعيلك يالحسن والله المشافي
عاليتامه. انت خيمه ومنهو بعدك يوافي
ابتسامه بوجهك وحزنك علينه هواي خافي
للقيامه. يا اخو المثلك حنين وگلبه صافي

وعيوني لعيونك بچن ياهو اليواسيني
يا نور عيني يالحسن جرحك يأذيني
...............


اشتكيلي يالحسن حاچيني خويه حسين اني
يا خليلي من ألم سمّـك اشوفنّـك تعـاني
هدم حيلي. چبدك المسموم عذبني وچواني
آ يويلي. لو عفتني منين اجيبن حسن ثاني

يالشوفتك جنّة عدن فكدك يبچّيني
يا نور عيني يالحسن جرحك يأذيني
...............

يا ولينـــه الله يلعن جعده مسمومه وتسمّك
دم بچينه. چبدك تگطع وذر والسم يألمك
رد علينه. ليش ماتحچي وتغيّر لون جسمك
اتحيّرينه. يالحسن نبچي ونون الليله يمك

عيونك يبومحمد غفن. افتحهن بعيني
يا نور عيني يالحسن جرحك يأذيني
...............

يومك اصعب من مصابي حسين لا تبچي عليه
ابچي ونحب. لليصير عليك يوم الغاضريه
ما تسلّب جسمي لكن جسمك يضل عالوطيه
آ يزينب. تنوخذ للشام من بعدك سبيه

ايامك التفجـع اجـن بسما تواريني
يا نور عيني يالحسن جرحك يأذيني

سيد زيد الفحام
___

الامام الحسن المجتبى عليه السلام

للامام الحسن. دمعتي اجريها
٠٠٠٠٠٠٠٠٠٠٠٠٠٠
للإمام المجتبه وروح الزجية
دمعت عيوني جرت هاي المسية
عاش مظلوم وگضه بسمّ المنية
شگد تحمّل من بني مية الأذية

بالدمع والشَجَن. فاطمه انواسيها
للامام الحسن. دمعتي اجريها
٠٠٠٠٠٠٠٠٠٠
للحسن عند الله چم جاه وكرامه
وارث الهادي النبي علمه وكلامه
الناس ما عرفت عُظُم فضله ومقامه
شكد التحمّل من حچي الناس الملامه

ما ضعف لا وهَن اول وتاليها
للامام الحسن. دمعتي اجريها
٠٠٠٠٠٠٠٠٠٠٠٠٠٠
حفظ دين الله وكدر يحمي الرساله
وكشف وجه الظالم وأهل الضلاله
مشه بمنهج جده وتأسّه بخصاله
ختاره حجه عله البشر رب الجلاله

تصده لهل الفَتَن. ترجف مخليها
للامام الحسن. دمعتي اجريها
٠٠٠٠٠٠٠٠٠٠٠٠٠٠
للحسن دور الجبير بحفظ الاسلام
خَلّه كل شيعي وموالي ما يطخ هام
ويلي من سل ذوالفقاره وللحرب گام
رجفت العدوان كلها وحاكم الشام

القائد المؤتمن. وشيعته يحميها
للامام الحسن. دمعتي اجريها
٠٠٠٠٠٠٠٠٠٠٠٠٠٠
ابن ابو سفيان خايف ينهي حكمه
بيد جَعدَه الظالمه قرر يسمّه
قدمت سم اللعينه بلايه رحمه
گطع احشائه يويلي وسره بدمه

بياذنب يا زمن. چبدته تأذيها
للامام الحسن. دمعتي اجريها

سيد زيد الفحام

للامام الحسن ع
.
.
.
ماناسيني .. اعرف بيكم كلش زين
ماناسيني .. مادام تـذكرون حسين
شكرا بسم الحسن
الكل خادم مؤتمن
ماناسيني

***

الرايــد يرضيني وحـــيران .. ليــروح يدگ بالبـــيبان
خل يبذل لجل العطشان
الآلـم
اليطمح يبچي اعله المسموم..خل اينوح اعله المضلوم
راعي الـــدلال المثــلوم
بسهم

نوحو حسين وعياله   السحگت صدره خياله
من دمـعاتــكم تــنزل   الحســـن يرتــاح دلاله
اليحس ابداخله قصر   اتجـــاهي لا لـيـــتعذر
الرايدني عليــه ارضه    خل يبـچي لبو الاكبر
 
ماناسيني .. مـوبس هالعام وكل عام
مانسيني .. ممنــون الــــكم يالخـدام
امن الواجب ينحچن
الكـــل خـادم مؤتمن
ماناسيني

***

ماقصرتو ومتقصرون .. ياليوميه انتو اتلطمون
عاشـورا لا ماتنســـون
ابــد
يالبـالحل وبالتـــرحال .. مدمعكــم مثل الشلال
شكرا يلي انطيتو الآل
عهد

اليبچي المنهشم صدره    ايفـــرح ســـائر العتــره
اليگلكم هـــذا لاميجوز     تجــازيه فاطمه الزهره
حسين مسلبه هدومه     حسين ضلوعه مهشومه
اليبچيله الســنه كـلها      محـــد يـــگــدر يلـــومه
 
ماناسيني .. الســـم الصوبني اتذكرون
ماناسيني .. كل ما عالضامي اتنوحون
هذي الكلمات اذن
الكل خادم مؤتمن
ماناسيني

***

اسمع بعض المنتـقدين .. شـــو للحسن انتم ناسين
عـــوفوهم يالمشغولين
نعم
الينقدكم ماواصــل هاي .. ماغص يوم بشرب الماي
يالمحروگين انتو هواي
بخيم

يلي اتفـانيــتو بالخدمه    وحزنتو لجل ابو اليمه
بچيتو الجسمه المطشر     البــالبـــر محد ايلــمه
الــى كــل خادم اتـــألم      الحـــسن وياه يتكلم
اگــــله دمعـــتك هــذي     تداوي چبدي المسمم
 
ماناسيني .. ذكر حسين شما تحيوه
ماناسيني .. معـــناها ذكري اتعيدوه
بالـــسر وبالعـــلن
الكل خادم مؤتمن
ماناسيني

***

يالقدمتو اروع مضمون .. يهل الدمعات اتعيشون
بالخدمه اتمنه تمكثون
دهـر
تبچون النـه زغار كبار .. حسيتو اعلينه شما صار
عدكم بالحــافر والنار
خبر

واحــدكم احـــس گلـــبه     بـــيه خيـمات ملتهبه
اشيصـــبره على هاللوعه     الفگد عباس والجربه
واليحـــس ابــمعانــــاتي    اكـــيد ايعيش مأساتي
ماقـــصـــرتــو ادريــــكم     تــونون اعــله ونـاتي
 
ماناسيني .. بالحــاظر انتو وبالفات
ماناسيني .. كل ما تتجاره الدمعات
وعويــناتي جرن
الكل خادم مؤتمن
ماناسيني

***

يلي اربيتو اعله الاهات .. وتأقلمتو اعله اللچمات
يالعشتو ابين الجمرات
لهب
الـــسويتو محـــد سواه .. لامايمـــكن اني انــساه
محفوظ الكم إي والله
التعب

تــعبكم باچـــر نــقــدره     الكــل واحـد اله اجره
شگاكم بالقيامه اهــناك     صـدگو باچــرانـــذكره
البچه لحسـين ومصابه     ودمـــوعه تجـري لهابه
اذا محــد يـــدگ بابـــه     نجيله احنه وندگ بابه
 
ماناسيني .. يالـخدام بكل عاشور
ماناسيني .. من اتذكرون المنحور
ونوگف وكت المحن
الكــل خـــادم مؤتمن
ماناسيني
****
حيدر تركي الكربلائي
 
 
 
 
 
 

يــا چبد انفطــر سابـع من صفـر
چبد النبوه والامامه

☼ ــــــــــ ☼ــــــــــ ☼

يوم ســابع مــن صفـر يـوم الفجيعه
أنصاب چبد الطاهره الزهره الوديعه
بيوم عاشور الحسن تنعـى الشَريَعـه
فگد ركـن الديـن وأســواره المنيعـه
تنعــه الأنبيــاء بدمــوع العـزاء
چبـد النبـوه والامــامه

☼ ــــــــــ ☼ــــــــــ ☼

بغضاً بطاها النبــي والله وعتــرته
گصــدو لبحر الكــرم سمّـو چبدتـه
آه يــا دمعات ابو اليمـه وحسـرتـه
ردت ابطشت الحسن لوعة محنته
بآهات وأنين من ينعه الحسين
چبـد النبـوه والامــامه

☼ ــــــــــ ☼ــــــــــ ☼

يوم سابع مــن صفــر يـوم المصيبه
حسين بالحسره يتوادع وي حبيبـه
خويه نــاده الحسن وبــونه عجيبـه
شيبتك يحسين على الغبره خضيبه
وأبين الفلول تنداس بخيول
چبـد النبـوه والامــامه

☼ ــــــــــ ☼ــــــــــ ☼

يــا مصيبة زينــب بهــاي المســيه
عــاد چبد الحسن بالحــره الـرزيـه
شافت ابچبده مصاب أمها الزچيه
ولوعــة الطبره وألـم ذيــچ المنيـه
بدموع وعذاب تنعى يا مصاب
چبـد النبـوه والامــامه

☼ ــــــــــ ☼ــــــــــ ☼

آه يــا سـابــع صفــر آه مــن سهامـه
صوبت وسفه بحقد نعش الامــامــه
اهناك عباس انتفض جــرد حسـامـه
اليــوم أخليـه للدهــر يبقى عــلامــه
صعبه ينفطــر من سم الغــدر
چبـد النبـوه والامــامه

☼ ــــــــــ ☼ــــــــــ ☼

بعد ضد الحسن حقـد أهـل السقيفه
وضد علي الكرار والزهـره الشــريفه
مــا يشيد مــرقــده بأمــر الخليــفـه
والبقيــع ابكبــره مــا كفــه مضيــفه
حقد أهل الفتن صاب أبكل زمن
چبـد النبـوه والامــامه

☼ ــــــــــ ☼ــــــــــ ☼

الشاعر
موسى البديري

من ردو بالروس..زينب والسجاد
ضلت جوه الكاع..تهتز الاجساد
ومن صوب الشط ياناس..دخن كبر العباس
ضلت جوه الكاع..تهتز الاجساد
....
من بعد لوعات السبي.. وذاكه التعب والعثرات
ردن الروس اوي الضعن..لاجسادهن مشتاكات
راس الحسين أمن الدمه..شيباته صارن حمرات


راس امن الرمح بلكوه شلعوه
احسين اول بشر مرتين ذبحوه
ابكثر ماضاربينه الوادم احجار
الهسه ايصيح آخ الراس سمعوه

جابوه بصندوك.. وامغطه ابمنديل
من شاله السجاد..ضل الكون ايميل
انحبست كل الأنفاس..ودخن كبر العباس
وصلت جوه الكاع..تهتز الاجساد
...
براس الحسين اتفاجئو.. يتلفت ابحنيه
يحسب بناته وجن عرف..بيهن نقص علويه
زينب اجته وشمته..من ركبته المدميه

كالتله اعرفك خويه يحسين
تسال عله رقيه وين ماوين
خذاهه الموت غاد ابديرة الشام
عله راسك يخويه وغمضت العين

ازغيرونه وبالسوط.. ضربوهه العدوان
ورجليهه الترفات..سوده امن الدخان
جرحو اترف احساس..ودخن كبر العباس
....
بعد الحسين ولوعته..نزلو راس الاكبر
تعبان رد أمن السفر.. وامذوب اخدوده الحر
والرمح اخ أمن الرمح.. من النحر كوه انجر

جابوه للحفيره وصاحت أمه
كبل مايندفن خلوني اشمه
حنين وراسه طول الدرب وياي
والسوط اليطك متني يلجمه

راس ابني المكطوع.. كون بحظني ايبات
ونسهر آنه اوياه..وامسحله الطبرات
و من حزني الماينقاس..دخن كبر العباس
....
نزلو راس ابن الحسن.. والتمو ايودعونه
هذا الحلو الوجهه ترف.. الشمس باكت لونه
ودمه اليصب من هامته..امخرب جمال اعيونه

ورمله اتصيح ياجسام يبني
بعدك دهري للحسرات ذبني
مسبيه رحت مابين ضلام
يطكني واحد وواحد يسبني

فوك امتوني اهواي..شلتك ياجسام
شو صارن زركات..من سوط أهل الشام
ومن كتلك حدي انداس..دخن كبر العباس
...
واهنا يناس اتخيلو.. ياراس هذا القادم
راس اللي ماكفاه رمح..بعده طفل ياوادم
من شافته أمه ضنته..تعبان ابنهه ونايم

اكعد يالولد رجعلي الاحلام
تعال ابحظني يبني العب ونام
فك عينك ييمه وبعد لتخاف
رجعنه بالسلامه وخلصت الشام

للشط امشي انروح.. اترس حظنك ماي
نايم لو مذبوح.. ياشمعة دنياي
ومن دفنو ورد الياس...دخن كبر العباس
....
واصل الحد المشرعه..الليله صريخ النسوان
من شافن ابعينه السهم.. من عدهه يطلع دخان
ومن العمود الطابره..راس ابوفاضل زغران

نص من هامته اتطشر عله الكاع
والتمن خواته وصار الاوداع
يحارس مملكة خدر العزيزات
كاللنه يعباس الخدر ضاع

حفرو كبره وفاض..دمه اعله التربان
وامكطع شافوه..جسمه ابلاذرعان
وزينب لطمت عالراس..ودخن كبر العباس


محمد الجماسي

#اللهم_عجل_لوليك_الفرج

شهادة الحسن ع
.
.

جبل يالماتطـخ الراس اول مـــره ياعـــباس
تبچي
شو محني الـظهر جاي
مبيــن فــاگــد اهــواي
يابو فاضل
---------

عــباس ترسانة حـرب .. عباس ماكــــو بكبرك
طاريك ايرجــف الزلم .. يامحـنه هاي اتكسرك
شخيرك تگوم وتنچفي .. وعطـر المقابر عطرك
الرايحلك امبـين ظــهر .. مــن هاي لازم ظهرك

حــيلك ماخذه الــتابوت اتنازع چـن تريد اتموت
حقك
ياهو ايلومك ابهاي
امبين فاگد اهواي
يابو فاضل

-----------------

الاخ الچبير امن الله شو .. تلگاه نبـع حنيه
وانتـــه چــبيرك دافـــنه .. وتتـعثر ابطاريه
يالمنــحرم من الضوه .. من تعمه ثق عاديه
ندري الصبر لجل الحسن .. يــرادله امكانيه

حاسر عالترب گاعد تلــطم لطــمة الفـاگد
هايم
يالمتبدي چن ماي
امبين فاگد اهواي
يابو فاضل

-----------------

بــين الــبقـــيع ومــــنزلـــك .. ينحسبن اچم خطوه
ابهاي المسافه اشگد طحت .. چيه بيك ماضل قوه
الماينكـــسر لجـــل الاخـــو .. ماينحـــسب عالخــوه
دمــعـك اذا مـــو للـــحسـن .. چا گـــول المن يسوه

اتواسي دمعة احسينك غـــرگـــانات خديــنك
مدمع
اليبچي وصاح رجواي
مــبين فاگـــــد اهواي
يابو فاضل

__

اتجـــالع اشعــندك ياگمـر .. وي كــل نفـــس تتالم
هوه انته لو خوك الحسن .. گــللنه ياهـــو اتـسمم
تلطم على اعيونك گمت .. وجفنك امن الدگ ورم
وتگول من عگب الحسن .. بــيمن بـعـــد اتشــــيم

حقــك تلطـــم وحافي كشختك بالترب غافي
وسفه
معلعل بيك الف داي
مــبين فاگــد اهواي
يابو فاضل

-----------

عباس ياطــود الــمجــد .. يالماكو ادين اتلوحك
معقوله راجع بس جسد .. چـا وين دافن روحك
بدلالك اشسوه الحسن .. وبانت عليك اجروحك
شتسوي بالطف لوشفت .. فوگ الـثره مذبوحك

يمكن تنــذبح مــرتين من اتشوف صدر احسين
امهشم
امأكد تفگد الراي
امبين فاگد اهواي
يابو فاضل
------------
حيدر تركي الكربلائي

لمولانا الحسن المجتبىٰ (عليه السلام)

من الزغر ومسرفن أردانه الحسن
والگماكم والدلال أتخدرن
والهلا تخلف هلا وتشبع مضيف
والمواگد شابه وماينطفن

مسرفن الخطاره .. ماله ند بصياره
ياكريم الساده .. المامجوع ناره

ياكريم الكرماء
@@@@@@@@@@@@@@@@@@
زلمه باشط وأبشط من الباشطه
هاشم بزوده ومضيفه مزامطه
عفيه زلمه سفرته ماتنطوي
طايره عليهه الطيور وحاطه

ماتجوع الوادم .. والحسن عد هاشم
المثل بعزوبيته .. وبالمعارك صارم

ياكريم الكرماء
@@@@@@@@@@@@@@@@@@
علي ومخلف علي بكل موزمه
مايچل بگرابه بالطگ صارمه
بالجمل حيدر نده يبني الحسن
وغار أبو القاسم وصارت ملحمه

الجمل والفوگاهه .. المجتبىٰ ذلاهه
حارات أچفوفه .. والزلم چواهه

ياكريم الكرماء
@@@@@@@@@@@@@@@@@@
بالمناقب حير أصحاب العقل
بالكرم والمرچله چان الأصل
بالحسن من ننتخي يخضر مضيف
أبلايه بيبان ومواگد تشتعل

الهلا الننگل بيهه .. المجتبىٰ راعيهه
الهلا من ديوانه .. هوه المربيهه

ياكريم الكرماء

رسول رياض

مولاتي زينب تخاطب مولاي الإمام الحسن المجتبى عليهم السلام


مره بطشت مره برمح.      عشت العمر جرح بجرح
مره الحسن مره حسين     مره بسبي اني انذبح
==========
گلبي انفطر من الألم كد مايصيبه
كبالك يخويه اوكف أهل دمع المصيبه
من هسه اگللك تره زينب غريبه
وگلبي يبو محمد فلا يگطع نحيبه

يبدي الجرح اول صَفر.   هسه جبد باجر نحر
شينشف ادموع العين     مره بسبي اني انذبح
==========
جبدك اشوفنه واصد حالك تغير
ذبلان ياوجه الشمس جن وجهك اصفر
شحال الذي جبده برمح خويه تطشر
شحال الگلب شاف الاخو بالدم تعثر

سَم وعطش وي ارماح    يم الاخو جم ذباح
حيدر اجيبنه امنين.     مره بسبي اني انذبح
==========
خويه الطشت هذا شكثر يحمل اذيه
بيه الجبد هسه اصد واجروحه بيه
لكن يبومحمد بعد طشت المنيه
بذاك الطشت راس الاخو وموتت رقيه

ذاك الطشت بيه الراس.    وطفله وبلايا أنفاس
وبحالي شمسوي البين    مره بسبي اني انذبح
==========
فكدك سباني وهيست گلبي لجمني
بذاك السبي هم تدري جم سوط اليطگني
حاظر تمنيتك يبو محمد تفكني
مجتوفه اختك عالهزل والسابي سبني

أصعب جرح طبت السوك   تميل وهزيله هالنوگ
مو مره ميته ومرتين   مره بسبي اني انذبح
==========
عمري انگضه بالهم تره وبحسره وآلام
من حرگت اگليبي عليك لحرك الاخيام
من كربله جان الجرح والاكلف الشام
يمته الجفن هايالحسن يرتاح وينام

صار العمر ماينراد.    بگلبي الألم هاج وزاد
نار السبي تشب نارين       مره بسبي اني انذبح
==========
الشاعر علي النائلي