استشهاد السيدة رقية بنت الامام الحسين (ع)

تلاگت وي ابوها .. وسكن ونها والمها
تريد بحضنه تغفه .. لگت بس راسه يمها
شهگت اخر انفاس
لمن شبگت الراس
رقية يا رقية
_____
طال فراگ ابوها وهي مشتاگة
متعوده اعله حضنه مو على فراگة
گلب هالطفله يچوي النار باشواگة
توازه الموت اجاها بوكت الملاگة
صاحت بلله يا موت .. شويه ارحم جروحي
اقبل نحر الحسين .. وراها اقبضها روحي
منه گطعت الياس
لمن شبگت الراس
رقية يا رقية
___
تحسب لحظه لحظه بروح ملهوفه
فزت من حلمها ورادت تـشوفه
شو بس راسه اجه جا وينها جفوفه
هوت فوگ النحر ما قبلت تعوفه
تريد اتقبل اشفاه .. مشتاگه لحنانه
لكن دمهن يسيل .. مِنّ الخيزرانه
ونت ونه يا ناس
لمن شبگت الراس
رقية يا رقية
___
صاحت هذا راسك يالمدللني ؟!
مـعـقولـه يبـو الأكـبر تيتمـني
شتضن بعدك اعيش ويبتشر سني
عشت عمري اعلمودك يا سبب وني
جسمي ازرگ من السوط .. اشكيلك يبابه
حضنك مني من راح .. نمت اعله الترابه
بحزنها الحزن ينقاس
لمن شبگت الراس
رقية يا رقية
____
بده يخف الونين تصورو نامت
شصاير يالعليل ام الخدر صاحت
گلها الطفله ياعمه تره ماتت
وبهاي المصيبه زينب احتارت
شجاوب لو نشدني .. بنتي ما شفتها
اگله العذر يحسين .. بالشام ادفنتها
حال يجرح الاحساس
لمن شبگت الراس
رقية يا رقية
_
انطوت صفحة يتيمة تريد والدها
عدها احلام بس الوكت فرهدها
گبل الراس جان الاجل گاصدها
بهاي الدنيا غير حسين ما عدها
وزينب رادت تموت .. من صدت عليها
ثغرها بنحر الحسين .. وحاضنته بديها
وتنخت بعباس
لمن شبگت الراس
رقية يا رقية
__
الشاعر عبد العظيم الابراهيمي

الباب من اجذوع وتطك الضلع

ونصلب زيد الشهيد بهل جذع

*ابباب الزچيه اصبح حطب…وهل مره بيه زيد انصلب ..*

ونصلب زيد الشهيد بهل جذع…

//////////////////

ضلت تون ام الحسن مو بس ضلع ياذيها

إوصَف الضلوع اتكسرن وردت الباب اعليها

هل مره ونتها علت ودمعة الم تجريها

تنظر الزيد اتذكرت باب ولهب وج بيها

من الجذوع النايحه و متمرمره

نار منهن والصلب بيهن جره

*بس جمر ماينطن رطب ..وهل مره بيه زيد انصلب*

ونصلب زيد الشهيد بهل جذع

////////////////

فوك الجذع يبقه سنه وجثته اتضل مصلوبه

زيد الشهيد ابن النبي وبكصته مكتوبه

مثل الحسين ابكربله وعمامته مسلوبه

جده الحجر شك جبهته زيد بسهم مصيوبه

والحجر صاير سهم بيه انرمه

ومثل جده جبهته انترست دمه

*ابسهم الغدر حيف انظرب… وهل مره بيه زيد انصلب..*

ونصلب زيد الشهيد بهل جذع

////////////

راية حسين ابيمنته وياعلي اتحزم بيها

بالكوفه اعلن ثورته بالدم إيوَقع اعليها ..

حط الدمه للخاتمه ونار الظلم يطفيها

ظالم ابن عبد الملك واهل النبي ايعاديها

زيد قرر والشهاده الخاتمه

وعهد ويه حسين وقع بالدمه
*
*_ثارك يبو اليمه انكتب… وهل مره بيه زيد انصلب*_*

ونصلب زيد الشهيد بهل جذع

////////////////////

لا هذا مو حيدر علي الطايح غدر بالكوفه

ولا مسلم الضل وحده والبايعوه اتعوفه

بس هذا مشهد للغدر واهل الغدر معروفه

البايعوا نكثوا بالعهد والكل نكر معروفه

هذا زيد ابن علي ابن الحسين

الكوفه غربه إوَّحده ابنص ظالمين
*
*ماچنهم احرار وعرب… وهل مره بيه زيد انصلب**

ونصلب زيد الشهيد بهل حذع
////////////////

من بعد ما زيد انكتل وجثته اتوسدت كبره

قرر ابن عبد الملك كبر الشهيد يحفره

طلع الجثه الطاهره وبالصلب يصدر امره

بعد الصلب صار الحرك ابنهر الفرات اتذره

وانكتل وانصلب جثته تحترك

وزيد خالد بقه بدروب العشك

*إعله حسين وناته إونِحب… .وهل مره بيه زيد انصلب*

/////////////////////

نسالكم الدعاء
احمد الطيب الحلي
السبت 27 شوال 1446

يمحمد   تعبنه   هواي  مسبيات  ردينه
لا عباسنه ولا حسين  ماتو  كل  اهالينه

*

هاي منين ؟     زينب   هاي !
اي  خويه     انوليت هواي
شنهي الصار ؟   مات حسين
عباس       انذبح       علماي

عبد الله  بسهم    ذبحوه
يشرب   ماي   ما   خلوه
ست  شهور  ما    رحموه
لأمه  بلا    نفس     ردوه

يمحمد    ،،  حوافر خيل
يمحمد    ،، تدوس الهيل
يمحمد   ،،  سهم   عباس
يمحمد  ،،  يشيب الراس

چفينه وعلم ممدود  طفو بالسهم عينه
لا عباسنه ولا حسين ماتو  كل  اهالينه

**

كلشي ويانه       بالطف  مات
حنة      جاسم        الدمعات
رمله  اتشوفه    دمه      يفور
صاحت      ها         يعلويات

هذا   وليدي   أموت    وياه
تربان     الحرب          غطاه
مذبوح      النحر        ويلاه
ميت         صعبه     تترجاه


يمحمد ،،  ذبيح   الشاب
يمحمد  ،،  غطاه   تراب
يمحمد  ،،  عطش وسيوف
يمحمد  ،،   بعد   شنشوف

عريس ودماه اتسيل  راح وما رجع لينه
لا عباسنه ولا حسين  ماتو  كل  اهالينه

*

صاحو     بالخيم    فرهود
وآنه  أركض  وارد    اردود
تعثر  طفله   طفله  اتطيح
وين   الفزعه   يابو   الزود


ضاع  اچم     طفل   وانداس
شنهي   النومه     يا    عباس
نار        التحرگ       الانفاس
من شفت  الولي   بلا    راس


يمحمد  ،،  سكينه  تنوح
يمحمد  ،،  گمر   مذبوح
يمحمد  ،،  شتم   وحبال
يمحمد  ،،  عدونه شگال

هاي الخارجيه شلون هاي الچلمه تاذينه
لا عباسنه ولا حسين  ماتو   كل  اهالينه

*

من    هم   كربله     وللشام
نمشي    وروسهم      گدام 
راس حسين    ظل   ناطور
لحظه اعله الرمح     ما نام


من     بعيد     شفته     أندار
راس  حسين   شنهي   الصار
ها     خويه    الولي    محتار
اي   خويه   أنضربنه    حجار

يمحمد  ،،   صعب ممشاي
يمحمد  ،،  كرهنه     الماي
يمحمد   ،،  وصلنه  الشام
يمحمد   ،،  حرم    وايتام

طبتنه القصر  متصير  لو عباس حادينه
لا عباسنه ولا حسين  ماتو   كل  اهالينه

****

مرو   زينب   اعله    السوگ
هزل    يبن    ابوي    النوگ
زينب  بت  علي    بيا  حال
والهدم      العَلّيّ    محروگ

ندعي   الشمس   كون   تغيب 
وجروح      المتون      اتطيب
عيون    الناس خويه  اتصيب
فشل يا خويه  زحمه   وعيب

يمحمد  ،،  حرم    تنشاف
يمحمد  ،،   يتامه  اتخاف
يمحمد ،،  تون      وتموت
يمحمد  ،،   بچي بلا صوت

صاير كل بچينه بليل  بس دمعات رجعينه
لا عباسنه ولا حسين  ماتو   كل  اهالينه


✍️   رعد الفريجي

صوت الحب و العشگ راح انسمعه
تمشي الگاع والسماوات السبعه
مشايه الکربله و نجری الدمعه
__
خبر عاجـل هالخبـر   جره سیل امن البشـر
حدث مثله ابهالدهر   و لا شافـت العین
الأرض تمشي امحزمه  الخلگ طلعت هایمه
الگمر و انجوم السمه   مشت كلها لحسین

كلها اتریـد اتـزوره و ایحـیّـر امـرها
حتى الموته ابلهفه تطلع من گبرها
هالگاع اشما تکبر ما یکفـي کبـرها
هله بیکم یزوار

کلهه اترید تطلع اویه المشایـه
شـدّوهـن بالمشي رایـه ابرایـه
والمشاي لو طلع یا هو ایرجعه
_
المحب يمشي الموطنه   العشگ و الحب معدنه
شهـر یمشـي لو سنــه   التعب عنده رحمه
تـره عـجـبــه هـالأمـر   بشـر ما یحمـل صبــر
أبـد میـهـمّـه العمــر    المشي بس یهمّه

ایام المـشـایـه مـن یـوصـل وکـتـهـن
رجليك اهنه ایگومن یمشن من وحدهـن
لحسین ایجـرنّـك چـا فـنّـه الیردهن
هله بیکم یزوار

سبحانـه الي خـلـق هـاي الـزوار
خلاهــا هایمـه تمشي اعلـه النـار
ابحب حسین تنتهي مثل الشمعه
____
عشگ یسري بالدمـه  عشگ مهجة فاطمه
عشگ مسك الخاتمه  ابد ما نعوفه
مشي نگصـد کربله   مشي نطویهـا الفلـه
مشي وَي امّ العلـه   نزوره و نطوفه

لو گطعوا رجلیني ما تصعـب علیه
رجلین الما یمشـن اگطعهن بدیه
هذا الحب یستاهل کل هم و اذیه
هله بیکم یزوار

الراید هالـ معتقـد الله ایریده
اید الله ابهـالدرب تلـزم ایـده
صوت الحب للأبد راح اتسمعه
__
تحس یخلص الفراق   لَمَن تدخل العراق 
یخدمونك باشتیاق   تحس شایف اهلك
ابد عدهم مو مهم  شنو اصلك و الاسم
المهم انته تنکـرم   و خدم کلهه لجلك

هذا الحب من سابق بیهم بعده باقي
و الـزایـر یتسـمّــه نامـوس العـراقي
ابهاي اخلاقه الخادم یصبح هوه راقي
هله بیکم یزوار

هذا الحب و العشگ دخنه ابمعناه
بس عنـد التخـدم الــزوار شفنــاه
هذا الحـب و الکـرم ماکـو ابوسعه
____
ابوالیمه ابعتبتــه   اذا مـدهـا سـفرتـه     
یغطیهـا ابرحمـتـه   تجي كلها عنده
ابکرامه و عزة نفس  يعزب الجن و الإنس
الگمر یگعد و الشمس   عله سفره وحده

درب الله درب حسین اسمع یالمحب زین
هالکـون کلّــه ابکفّـه و کفّـه گاعد حسین
اشما ننطي اشما نمشي ما نوفي اله الدین
هله بیکم یزوار

بالعشره نبصـم ابهالحــب باقــيـن
ابلا هالحب و العشگ ما یحله الدین
دین الله ابهالعشـگ ثبـت وضعـــه
—————-
تمت والحمد لله
للشاعر حسين الساعي

اليوم ابو محمد فرغ ديوانه
تنحب الدلّه و يون فنجانه
    وا أماماه •• وا أماماه

……………………………………………………………


اليوم لا هاون يدگ امن الصبح
والمضيف احساسه كلش منجرح
ارماد صار و جان للوادم صرح
شيخه مات ومثله ما واحد يصح

مثله ما جابت ابد دنيانه
تنحب الدلّه و يون فنجانه
     وا أماماه •• وا أماماه

……………………………………………………………


اليوم جعده وسمته بسم الغدر
مردت امعائه ويحس بيهن جمر
اعليه بيبان اغلگت من كل كتر
ظل ابو محمد وحيد ومنكسر

اشفافه مثل حسين هم ذبلانه
تنحب الدلّه و يون فنجانه
   وا أماماه •• وا أماماه


……………………………………………………………


زينب ايحبها و يخاف اعليها
يدري چبده البطشت ياذيها
حسين ضمه و بالك اتراويها
ما دره ابزينب شمر يحديها

اميسره وطبت لبن مرجانه
تنحب الدلّه و يون فنجانه
    وا أماماه •• وا أماماه

……………………………………………………………



اتجمّلت واتبغّلت ذيج المره
الحيه سم بيها ولزومن تظهره
يندفن يم جده منعت آمره
بغضن ابت الرسول الطاهره

انتي شوچ و فاطمه الريحانه
تنحب الدلّه و يون فنجانه
      وا أماماه •• وا أماماه

……………………………………………………………


مثل صدر حسين يا نعش الحسن
اسهام من مروان وصلن للچفن
وابوسط جسمه الشريف اتعلگن
اهنانه عباس ولزم سيفه وعلن

حسين هدّاه وخمد نيرانه
تنحب الدله و يون فنجانه
    وا أماماه •• وا اماماه

……………………………………………………………


اه ياظلم الحسن كلش صعب
شوف گبره احجاره وشوية ترب
هو ما همه الظلم من الغرب
الحسن من الشيعه مجروح الگلب

دوم لفّضال السبط نسيانه
تنحب الدلّه و يون فنجانه

……………………………………………………………

✍️ سيد خضر الزاملي

ياسـاعه نبنيله مقـــام
للحسن وانأدي السلام
ـــــــــــــــــــــــــــــــــــ

هيئــات ولَطامة .. نتـــعنه إلـه
ونسوي يم گبره .. ثانـــــي كربله
ويترَأس قـائدنه .. حسين القافله
والكافل متحـزم .. وينــــادي هله

وشكثر ماخذنه الهيام
للحسن وانأدي السلام
ـــــــــــــــــــــــــــــــــــ

تمنينه لــــو گبه .. مطليه بذهب 
من تلمع تتوهج .. بنـــــوار العجب
يستـاهل مولانه .. وهل موعد قرب 
بالزهره يا ربنا .. حقق هل طلب

وبگبته ايلوذ الحمــام
للحسن ونأدي السلام
ـــــــــــــــــــــــــــــــــــ

اشتاكينه وحنينه .. نشهد حضرته
وانصلي ونتوسل .. جــــــوه گبته
ارزقنه يـــــــاربي .. دوم ازيـــارته
هنيـاله من زاره .. وعاش برحمته

وبحضرته يطيب الكلام
للحسن وانأدي السلام
ـــــــــــــــــــــــــــــــــــ

وكل هيئه وكل موكب .. هم تبني خيم 
وتتحـــــــــــزم بالهمه .. والغيره الخدم
واترحب واتــــــــوزع .. بنواع النعم
تصيح اهلا بالزاير .. وتشيل العلم

وننظر مضايف للامام
للحسن ونأدي السلام 
ـــــــــــــــــــــــــــــــــــ

ومشايه زواره .. تگصد كل سنه 
والوالد وي ابنه .. للحضره اعتنه
وشايبنه ما بطل .. لو ظهره انحنه
وكل خطوه تسّجل .. عنده بحسنه

ما ينفع اويانه الـملام
للحسن ونأدي السلام
ـــــــــــــــــــــــــــــــــــ
حيدر بشار الدراجي

استشهاد الامام الحسن المجتبى ع

دمعتي مو للچبد لطفوفك
راح اموت وراسي بين چفوفك
راسك .. ويلي عله اليجرالك
راسك .. خويه بحضن چتالك
****
هسه راسي ابين ادينك والدمع فوگي يسيح
يمي انته وابو فاضل وانه بس چبدي جريح
گلي باچر خويه بالطف وين راسك يستريح
من عله ظهر المطهم بحضن چتالك تطيح

راسي من حضنك يغالي شيله
خوفي تذكر موقفك هل عيله
باچر .. تنظر عليك اعيالك
راسك .. خويه بحضن چتالك
****
إمسح المدمع يغالي بالك اتشوفه الحرم
بالطشت چبدي لفظته هذا ما حسبه الم
مو مثل گلبك يخويه لمن ايطره السهم
ينثلم نصين والدم يوصل الباب الخيم

گبل راسك گلبك يذبحونه
الزينب الدم يالاخو يوصلونه
اسف .. ادري اشيصير بحالك
راسك .. خويه بحضن چتالك
****
باچر بتشييعي خويه اشظام انه أدري الدهر
ترشگ اسهام اعله نعشي بس يجر سيفه الگمر
بحالك انته شلون گلي من يطيح اعله النهر
تعتنيله بحيل خويه بس ترد ابلا ظهر

مالي روحك ابو الغيره ونظرتك
من يطيح اتحس يخويه بغربتك
جيشك .. لمن يطيح اگبالك
راسك .. خويه بحضن چتالك
****
الميت إكرامه بدفنته وانا جاهز للدفن
انته لا محد يغسلك لا اخو يبقى وإبن
صدرك البي رحمة الله بالحوافر ينطحن
اثلاثه فوگ الغبره تبقى ولا عِرف يمك يون

خويه يومك ما اقارن يومه
الك دم الباري تجري غيومه
دامي .. وكل الفلك ينعالك
راسك .. خويه بحضن چتالك
****
بس حزن خويه اعله صدري راح انزله للگبر
شيبتي مو حمره بيضه وبيها لا محد يجر
انته بالطف يبو اليمه يصعد اعليك الشمر
رحمه ما عنده اوريدك اثنعش مره ينطبر

عالرمح راسك من ايعلگونه
ديره ديره يالاخو ايفرونه
عالي .. وأم الخدر تبرالك
راسك .. خويه بحضن چتالك
****
انه ما عندي سبيه هاي كلها عيلِتي
هذا الاكبر هذا جاسم والهواشم واخوتي
نفترض بالغربه انه انته تترس غربتي
صحبتي ماهم صحبتك لچن حضرو دفنتي

موته كل الصحبه واتحاچيهم
وحدي عفتوني وتأشر اعليهم
وحدك .. كلها تموت ارجالك
راسك .. خويه بحضن چتالك
****

الشاعر اياد الديراوي

السلام عليك يا أبا محمد الحسن المجتبى
ــــــــــــــــــــــــــــــــــ
هـل يادمع ــــ راح الحسن
مـات الأخو ــــ مات الوطن
راح يا زينب ــــ بالسم اتعذب
هــل يادمـــع
ـــــــــــــــــــــــــــــــــــــــــــ
مــــو وكت المفارك يانــبـــظ گلبـي
ما طـابـــن اجروحي ياضوه دربـــــي
جرح أمي بدليــلي يالحسن ماطاب
صحت ويــــــن المنيه للعمر گربــي
آخ الدهر ــــ ما خله أخو
ضدي صبح ــــ ماضل أبو
بالگـلب تلهب ــــ بالسم اتعذب
هــل يادمـــع
ـــــــــــــــــــــــــــــــــــــــــــ
المثلي ابــــــين أهلها ياخلك تگــعد
واتشم ريـــــحة الوالد عنها ما يبـــعد
اوبحـــضان الزجيه من تريد اتــنــــام
وذني ما عشتـــــهن والفرح يشــــرد
هذا العــمر ــــ مابي فرح
من الزغــر ـــ كلبي انجرح
من الهجر انحب ــــ بالسم اتعذب
هــل يادمـــع
ـــــــــــــــــــــــــــــــــــــــــــ
مـــو كســـرة جنح ويطيب وتعـــدي
كســـر بالـــروح صاير والألم عـــندي
تره المــــــيت اخوها للاحزان اتعيش
اوفــــارگت أمي انه اوالدي اوجــــدي
انــي العشت ــــ بس للــدمع
من والــدي ــــ اوكسر الظلع
والرمش شيب ــــ ــــ بالسم اتعذب
هــل يادمـــع
ــــــــــــــــــــــــــــــــــــــــــ
شفـــــت أكبال عيني غمضت اعيونــــه
صــــحت كلفه الحسن عني يــبعدونـــه
خــــيمه الأخو طبعه يجـــمع الاخــــوان
وارث حـــــيــــدره ما نگـــــــدر بدونــــه
مثل الشمس ــــ راعي البخت
صـــار بگـــبــر ــــ عينه غـفــت
يا حبيـب الرب ــــ بالســم اتـعـذب
هــل يادمـــع
ـــــــــــــــــــــــــــــــــــــــــــ
يا وســـفه النـعـــش بسهامهم يرمـــــه
أو ام الجـــمل ترفـــــض يندفن جسمه
يم جــده الرسول اوصاحت اعله الناس
ما ريــــــد الحسن لا ينـــــدفـــن يـــمــه
اسهام العده ــــ فوگ النعش
اوناب الحقد ــــ بيــنه نهـــش
والوضع يصعب ــــ بالسم اتـعــذب
هــل يادمـــع
ـــــــــــــــــــــــــــــــــــــــــــ
أريــــدك دوم خـــويه واگـــــف گبــــالي
ما ريـــــد بلحد مــــتــــــوسد الغـــــالي
ياريــــحة ابــــونــــه اوهـــيـــــبت الكرار
ما يحــــمل دلــــيــلي امــوادع الـــوالي
ليــنه تــضل ــــ عـــون اوسند
بسم الكفــر ــــ جســمك برد
موته من گرب ــــ بالسم اتعذب
هــل يادمـــع
ـــــــــــــــــــــــــــــــــــــــــــ
الشاعر : خالد جودي العارضي

خويه الحسن گلبي انكسر ياعزوتي ودلالي
چبد ابطشت دمه انتثر شالوذره يغالي
ياخويه .. هالجرح شي جبره
ياخويه .. ياضلوع الزهره
@@@
سبط النبي وأول بدر من بدرين
وروح الهدى الهادي النبي بالجنبين
يأول ضلع طگ وانكسر لأم حسين
لمن الك چبد انفطر بالنصين
بنوحي انشدك يالاخو رايح وين
يعيون اختك هسه عمية هالعين
…
اول ضلع من فاطمه ابسم الغدر تكسر
سبط النبي طشت ودمه چبده الزكي تفطر
ياخويه .. حمره تجري العبره
ياخويه .. ياضلوع الزهره
@@@
آهك ياخويه ابمهجتي جمره ونار
ويضرب صداها بكل زوايه هالدار
خذ مني روحي يا حفيد المختار
بس تسلم انته يا ابن حامي الجار
سم اللي جعده دسته ابدمك فار
ياريت بيّه الصار مو بيك الصار
…
السم اشعمل بيك وجعل وجهك تغير لونه
ياريت إلي موتك نزل ولا نعشك ايشيلونه
ياخويه .. بالفجيعه الحوره
ياخويه .. ياضلوع الزهره
@@@
ياوجه الله البل مدينه موجود
وشلون وجه يندفن بين ألحود
چنت انه احلم سالم ألنه اتعود
والسم لاچن حطم إلنه المريود
لاوين رايح يالامام المعهود
للسائل ايده برحمة الباري اتجود
…
زينب عفت بيد الحزن متوذره وحزينه
تنعى وتون حتى تضج من البچي المدينه
ياخويه .. گلب طاح ابحسره
ياخويه .. ياضلوع الزهره
@@@
مو كافي سمك والچبد والآلام
زادت على امصابك مصايب ليام
ممنوع حشدة عالجنازه الظلام
لا دين عدهم لا ذمم لا اسلام
بعدوك عن جدك جرح ما يلتام
ابجيش اللي ظل يرمي على النعش اسهام
…
حسين ألتزم بجنازتك ما خالف الوصيه
ولولاها چا ابوالفضل وراهم المنيه
ياخويه .. ماتهون العشره
ياخويه .. ياضلوع الزهره
@@@
طشت الحسن اول طشت عيني تشوف
وتاليها تفجعني ابطشتها لطفوف
طشت المدينه عالچبد بي موصوف
وبالكوفه والشام الالم بي مكشوف
منحر ذبيح موذر ابحد اسيوف
وذيچ الاعادي شامته بيه اطوف
…
ابمجلس يزيد وطغمته لمن نطب سبايه
الراس الطشت جابه ويطگ ثغر الولي بعصايه
ياخويه .. بعصى كسر ثغره
ياخويه .. ياضلوع الزهره
@@@
علي أحمد الحمود
٢٩-٧-٢٠٢٥
شهادة المجتبى ع

دار الحسن… ماحط بوب

خله المضيف ابلا بوب ..حته اليجي ميدكها

///////////

وي الفقره ابو محمد يجسم زاده

ويفكدهم ويمهم يحب مكعاده

ايفل جيسه ويفرك چريم الساده

ابضحكه ولطف… هوه ايعرف

ومعزب ويقره اكلوب… .من كبل ماينشدها

//////////////

هي الشجاعه اشما بذل مايهتم

ابن الاجواد المن هله يتعلم

والده اتصدق من يِصلي ابخاتم

لمن ركع ..سائل سمع

مدله ايده حيدر وانطاه… وچف الحسن قلدها

//////////////

المعتاز ابد يم الحسن ميكله

يدري اليچهبه عنده مالات الله

ينطيه جبل لو طلب واحد تله

چف الكرم… لا ماحرم

اي واحد وكلشي يريد،… يصرله الصرر ويشدها

///////////////

ماياكل اله ايكوم يفكد جاره

وديوانه عامر تارِسَه خطاره

ضل موكده ماتطفه ابدا ناره

مو بالدسم… .وجها ابتسم

والحسن يتلكه الضيف… .وكل الهله يرددها

///////////////

ويالزاد ياميت هله ابماعونه

وماصدت المحتاج يوم عيونه

المديون ينطيه اكثر امن اديونه

لا مايعد… .عنده اشيجد

ينطي الحسن دون احساب … .شكد ينطي ابد ميعدها

//////////////////

دار الحسن منه تعلمنه الجود

كلشي انوجد بس باب لا ما موجود

ابوجه اليجهبه الباب ميضل مسدود

يطب مايدك… يدري صدك

والحسن كاضي الحاجات ..وكل طلبه ابد ميردها

//////////////////

لو چانت الحاجه اشكثر مصعبها

عل كاع طالب حاجته يكتبها

يقره الحسن يكظيها اله ويشطبها

والي انكتب ..كله انشطب

يترس جفوفه وينطيه… چفوفه كبل ميمدها

///////////////

نسالكم الدعاء

احمد الطيب الحلي

السلام على الامام الحسن ..
قال..
لا يوم كيومك يا ابا عبد الله..

..
.
كله َ الحسن لحسين وينشده ..

جرحك يخويه ياهو اليشده ..

يومك صعب ميمر مثل يومك ..

زينب تشوف مسلبه هدومك ..

يحسين اخوي ..يحسين اخوي


//////////////

الحسن بآخر نفس وينازع بروحه ..

اتخيل خِيَم زينب عالي ضل نوحه

ولزم خنصر حسين إون عله اجروحه ..

ورد شم ركبته لن يدري مذبوحه…

شم النحر وتمايز ضلوعه ..

كبل إلسَحِك غِسلتهن دموعه ..

إيْكِلَّه لِخيول اتخرب رسومك

زينب تشوف امسلبه هدومك

يحسين اخوي ..يحسين اخوي
//////////////

مظلوم الحسن سم الكِطع جبده ..

بت الأشعث  اتْسِمه ابغدر جعده ..

ذب جبده قطع وحده وره وحده ..

بحظن حسين أمن من يحط خده ..

بس الحسين بيا حظن يغفه ..

بحظن التراب وجمره مايطفه ..

عطشان لاچن عالترب نومك..

زينب تشوف مسلبه هدومك..

يحسين اخوي ..يحسين اخوي..

//////////

الحسن اخر كلامه وكال اسمعوني..

بين اهلي واخوتي تغمض عيوني ..

مايمي مره وغربه ويسلبوني ..

وتركض حافيه وتصيحلي امتوني..

ومتكلي خويه الخيمه محروكه…

ولا چف كُطيع وجربه مشكَوكَه ..

ياهم يخويه اليشبه همومك ..

زينب تشوف امسلبه هدومك ..

يحسين اخوي ..يحسين  اخوي

////////////

ميمر مثل يومك ابد يامظلوم ..

صح چبد الحسن متكطع ومسموم ..

بس لابس عمامه وخاتمي وهدوم ..

حسين امسلب إتهوس براسه الكوم ..

هاي العمامه توصل الخيمه ..

تباوعها زينب تنحر الهيمه ..

شالتها منها اتنكط ادمومك..

زينب تشوق امسلبه هدومك..

يحسين اخوي ..يحسين اخوي..

////////

جر كوه النفس والنفس ماحاصل..

حچه چلمه الحسن سولف لبو فاضل..

انت حزام ظهر حسين والكافل ..

وانت نفس ريته الصاعد ونازل ..

لو رحت عنه ينكسر ظهره ..

لخيمته يرجع حاير ابأمره ..

زينب تِكله شبيهن متونك ..

زينب تشوف امسلبه هدومك ..

يحسين اخوي ..يحسين اخوي..

////////////

نسالكم الدعاء

الاقل طالب الشفاعه

استشهاد الامام الحسن ع

خـويه يالحسـن تـدري .. بغـيابك ينكسر ظـهري
       مـا يسـوه بـدونـك يالاخـو عمـري

-------------------------
اخوك اني الحُسين الگاعد اگبالك
هـد حـيلي يخـويه ومايسر حالك
مــلك المـوت گـاعـد يمـنه يبرالك
بنـظـراتك اشـوف اتـودع اعـيالك

صحت رمله تحاچيها .. وتعـاينـلي وتوصيها
       وللقاسم  تعـايـن والـدمـع  يجـري
       مـا يسـوه بـدونـك يالاخـو عمـري

-------------------------
بـنـظـراتـك وداع  وفـرگـه للـخــوه
تـظـن عمري يخويه بغيـبتك يسوه
يخـويـه منـين اجـتك هـايـه الـبلوه
تـلـوج من الـوجـع يـبن امـي تـتلوه

شلها وياك چا جـعده .. وبالسـم مردت الچـبده
       بـين احـشاك سمك نار چـن تسري
       مـا يسـوه بـدونـك يالاخـو عمـري

-------------------------
شـمسـوي بچـبدتـك يالاخــو سمـك
تلـوج اگبالي يجـري بالطـشت دمـك
گمت تچوي يخويه بأيدي اذا الزمك
يلـهـب نــار مـن السـم غـده جـسمك

نـار احشاك احسنـها ..وروحـك ماگـطع ونـها
       عسن نارك يخويه اندارت الكـتري
       مـا يسـوه بـدونـك يالاخـو عمـري

-------------------------
حـالك يالحـسن خـلانـي ابـحـيـره
هضمتي الفرگتك يبن امي اچبيره
ردتك وضعي بالطف توگف اتديره
وتوگـفلي ويـه اخيك راعي الغـيره

باچر بالطـف الوحـدي .. لا خـوانـي لاولــدي
       وبـين اعداي اوگـف حاير ابـأمري
       مـا يسـوه بـدونـك يالاخـو عمـري

-------------------------
باچـر خـويه بالطـف مايسر حالي
گـبالـي يـنـذبـح غـالي بأثـر غـالي
وعلى زينـب اخـتـنه ينشغـل بالي
عگـب مانـذبـح يصبـح شـمر والي

الشمر حادي بضعن زينب .. عگب عباس المعـتب
       زينـب تـنسبي مـن ينگـطع نحـري
       مـا يسـوه بـدونـك يالاخـو عمـري

-------------------------
عگب ذبحـي يخويه انسحگ بالخيل
على التربان دمي من الجروح ايسيل
وبالـ عـاشر يصب اعله العقـيله الويل
تـدور اطـفال ضاعـوا منـها نـص الـيل


زينـب بت علي بحـيره .. تنادي صاحب الغـيره
       ياعباس الحـگـني انـسلـب خـدري
       مـا يسـوه بـدونـك يالاخـو عمـري


الشاعر عقيل الحسناوي..

استشهاد الحسن المجتبى ع
الامام الحسن ع يخاطب الحسين ع فيقول..

خويه ضمني بروحك .
ولا تعـلـي بنــوحـــك
خـويه لا تسمع ونينك زينب اختي
ما اريد اتشوفني من الفض چبدتي
خويه ضمني بروحك
…………………………

حسين خويه نصي صوتك لا تعـلي بونتـك
لخاطري اهده يخويه حسين وامسح دمعتك
هاي زينب خويه اجتنه واظن تبچي سمعتك
منحنــي ظهرك عليـه تلـوج زينــب شـافتـك

خويه عدل اضلوعك ..
وكافي تجري ادموعك
ولا تزيد اعليه ياخويه محنتي
ما اريد اتشوفني من الفض چبدتي
خويه ضمني بروحك
…………………………

خويه اني وياك احچي كافي تبچي اعليه رد
حسين وخر الطشت عني ضمه ياخويه الچبد
زينب اختي هاي گربت خافن الچبدي تصد
تموت اخيتي لو تشوفه وگلب زينب ينمرد

خويه لتراويها ..
چبدي اخاف اعليها
تموت زينب لو درت ضيمي وبلوتي
ما اريد اتشوفني من الفض چبدتي
خويه ضمني بروحك
…………………………

لا تخليها يخويه بحالتي تشوف اشجره
گلب ماعدها اخيتي هيچ حالي تنظره
حيلها خلي تضمه يوم تبقه محيره
بكربله لمن تشوفك طايح انته على الثره

انت اصعب حالك ..
تلوج فوك ارمالك
غربتك ياخويه ماتشبه غربتي
ما اريد اتشوفني من الفض چبدتي
خويه ضمني بروحك
…………………………

مصابك انته اصعب عليها هناك خويه بكربله
هناك زينب من تشوفك تصير جثه مفصله
وتنسبي الچانت اميره بجال اخوها مدللـه
يگوم يتمرجل عليها هناك شمر وحرمله

بت علي المهيوبه ..
وي شمر مسلوبه
لبت علي ماتنطفي بگلبي حرگتي
ما اريد اتشوفني من الفض چبدتي
خويه ضمني بروحك
…………………………

خويه خل اتضم صبرها من تشب نار الخيم
حيلها تضمه لركضاه من تـفر وي الحـرم
چبيره ياخويه بعمرها وتركض وحافي الجدم
وعالجمر يسحگ جدمها وتعثر اختي من الألم

هناك اخيتك حالها ..
تركض ويطفالها
للغريبه ماتجف والله دمعتي
ما اريد اتشوفني من الفض چبدتي
خويه ضمني بروحك
…………………………

بغربه زينب راح تبقه وحيده والمدمع يهل
تصيح خويه حسين الحگ ورم امتوني النذل
خويه من سحگوا ضلوعك جابوا لأختك حبل
خويه راح امشي سبيه مچتفه فوگ الهزل

بالضرب ركبوني ..
ورموها امتوني
راح ماراويك يبن امي سطرتي
ما اريد اتشوفني من الفض چبدتي
خويه ضمني بروحك


الشاعر عقيل الحسناوي..

(استشهاد الحسن المجتبى ع)

حمل نعـشه ويهـل دمعه
ابـو اليـمه وحـنى ضلـعه
يحس ويـه الحسن بـيده دفـن عمره
نهدم حيله وعلى فراگـه نكسر ظهره

…………………………
الحسن لمن الى الباري عرجت روحه
بچــه الفـگـده ابـو اليمـه وعلـه نوحه
رحـل عنه وفـتحهـن بالأسى جروحه
واحــلام الاخــوه الـلـيلـه مـذبـوحــه

على امتونه حمل نعشه
بـَلا خوته العمر وحـشه
اذا مــات الاخــو مـا ينـجـبـر كـسـره
نهدم حيله وعلى فراگـه نكسر ظهره
ابـو اليـمه وحنى ظـهره
…………………………

يشيعه وچن جبل شايل عله امتونه
راح الچـان شـايـل طـيـبـتـه ولـونـه
راح الـلـي تـذكـره بفـاطمـه عـيـونـه
الحـسن هـيـبـة علي چـانـو ينادونـه


يشيعه وگوه ضل يمشي ..
الخسر مثله خسر كـلشي
يعينه الله وعلى مصابه يعـظم اجره
نهدم حيله وعلى فراگـه نكسر ظهره

…………………………

الحُـسين بهـل مصيبه مخـتلف حـاله
بدليـلـه چـن رمـح لا مـو حـزن شـاله
الفرگـه ويـه الاخـو بهـل حـاله چـتاله
اليفـارگـلـه اخــو مـوتـه تــره اشـواله

الاخو يكـتل تره افراگـه ..
اذا غـفـلـه الـدهـر بـاگـه
يخلف بالگـلب مـو جمره الـف جمره
نهدم حيله وعلى فراگـه نكسر ظهره

…………………………

ابو اليمه عله ابومحمد وگـع حيله
وابـو فاضل ركـض يـمـه يتچـيـله
ولمـح زينب اخـيته بعـبره توميله
ودمعها عله الاخو عالوجنه اتسيله

وجرن وي زينب ادموعه ..
وابو فاضل حنى ضلوعه
وعله اخوانه الگمر ضاگ الهوه بصدره
نهـدم حـيله وعلى فراگـه نكسر ظهره

…………………………

نكـسر گـلبـه ابـو اليمه لبـچـي زينب
لمصيبتـها العلـه خوتها الرمش شيب
عله هاي الحاله ابوفاضل ظهر حدب
الحسن من النـعش لنه بحـزن ينحب

طلب منـهـم ينـزلـونه ..
وعلى زينب يطمنونه
عله زينب مـيت وگـام وبچـه بعـبره
نهدم حيله وعلى فراگـه نكسر ظهره

…………………………
لمصايـبـها العـقـيله يهـون كـل امصاب
باچـر بالسـبـي يمـشـوهـا ويـه اجنـاب
وتصد لخوتها بالطف نومه فوگ اتراب
وخيمـتـها يحرگـوها السـتر واحـجـاب

تهـد كـل حيل مصيبـتها ..
مره يحرگـوها خـيمـتها
اخوها علـه الثـره نايـم يصب نحـره
نهدم حيله وعلى فراگـه نكسر ظهره


الشاعر عقيل الحسناوي..

لسان حال الحسين (ع) عند احتضار الامام الحسن المجتبى (ع)

من اشيلك للكبر ... ادري ظهري ينكسر
ميت اتمنيت خويه ... ولا اشوفك تحتضر
___
تدري اليودع اخيه بجفنه ما يغفه الدمع
خلها اثار المدامع فوك خدي تنطبع
انت روحي و صعبه خويه بدفن روحي اقتنع
يعني وي موتك اموتن يالخذت دور الشمع
اندفن تحت التراب ..... ولا اعيشن هالمصاب
يالحسن لو فاركتني ... للمنيه ابقه انتظر
_
يالحسن مسأله ابالي والفكر بيهه يحير
الجبل كلي شلون خويه بالگبر دفنه يصير
والأخو أجناح الأخيه وبعزم جنح يطير
وانا يبن امي بوداعك طير و جناحي كسير
ياجرح بعدك اروف ... وانت عيني البيهه اشوف
شرد اسولف عن محنتي ... وانا ضيعت الذخر
__
اشكبر صبري بعيني اشوفك اسبلت للموت اديك
انهدم حيلي وي زينب من اجت شبكت عليك
ريت خويه بهذا حالك امك الزهره تجيك
جا نعت يمك بحسره وينه اليواسيني بيك
عني شمسك من تغيب... خويه راح ابقى غريب
كسرة الفاكد اخيه... تبين بوكت العصر
___
ريت يم جسام حاضر يالحسن يوم الطفوف
وتنضر بعينك وليدك من الدمه يحني الجفوف
على الدنيا العفى يبني جا صحت بين الالوف
مثلي من يوقع وليد موذر بحد السيوف
بعد وجهك يالحسن... راح اشوف شكد محن
جم جرح وجم مصيبة... باجر اعلية تمر
____
من شفت دمعات زينب اعليك احس زاد الالم
شلون لو تنضرها عينك اعليهه محتركه الخيم
وانا راسي برمح عالي وبالكلب نابت سهم
وعالنهر يوگع گمرنا ويمه ملفوف العلم
لو شفت بت فاطمه... جا نزل دمعك دمه
وهي تصرخ واحسيناه ... من يحز نحري الشمر
_
الشاعر عبد العظيم الابراهيمي

استشهاد المام الحسن ع

عذابي ومماتي اعله جرحچ يهون
وغربتچ يزينب ابهذيچ الضعون
مثل هيچي ليله
اعله ظهر الهزيله
بهذيچ الضعون
++++++++
تودعين الحسن وانتي دمعتچ هسه مستوره
چبير اخوانچ واعرف دمعتچ يختي معذوره
عزيزه انتي ونظرتي اعليچ اشوف بدمعتچ صوره
ماتبجيها يم حسين دمعتج هايه مجبوره

بحرگهن خيامچ يشغلچ يتيم
يلوذ بعباتچ وصياح الحريم
حسرتچ طويله
اعله ظهر الهزيله
بهذيچ الضعون
+++++++++
مو آخر طشت هذا يختي اتشاهده اعيونچ
ولا آخر چبد مفتوت تخطف شوفته لونچ
هسه اگبالي من تبچين واخوانچ يسكتونچ
تجيلچ فتره من تبچين سوط ايدگ عله امتونچ

اموت ابدياري وعيالي ابأمان
يزيتب غربتچ تحير الزمان
العظيمه العقيله
اعله ظهر الهزيله
بهذيچ الضعون
++++++++
قبل موتي اريد العين عليچ دموعي تهملها
يزينب دخلتچ للشام شده وياهو ليحلها
تذكريني وعليچ اتصيح هاي اخت الحسن كلها
ادموعچ لو اجه طرواي لثيابچ تبلـلها

زمن مايرجعه اليدفنه التراب
يريت انه يمچ بهذاك المصاب
عذابچ اشيله
اعله ظهر الهزيله
بهذيچ الضعون
++++++++
يصادفكم سنة وانتي بخرابه الذكرى تحييها
اعله رمله تنظر اعيونچ بدموعچ تعزيها
اشلون الحرمه تلطم عاد ومچتفات ايديها
الراس احسينچ وجسّام نظراتچ تديريها

تذكروني كلكم وتزيد الجروح
يعين الله حالچ تخلصيها نوح
ولا تبقى حيله
اعله ظهر الهزيله
بهذيچ الضعون
++++++++
يغسلوني الاهل باچر اخواني اليشيعوني
راسي اعله الجسد موجود وبطولي يدفنوني
اعليه ماتم اينصبون وادمهم ينوحوني
تجيني انتي بظلام الليل اويه اخوانچ تزوروني

لچن يالعقيله اضل تالي وين
بعيده دفنتي اعله اخوي الحسين
طويله الرحيله
اعله ظهر الهزيله
بهذيچ الضعون

ثائر الربيعي

لحن خويه حسين كبرك وين
استشهاد الامام الحسن المجتبى (ع)

وحگ جدك .. مثل چبدك
تگطع گلبي يبن أمي
_____
زينب للحسن گصدت تفسر الصخر ونتها
حين اعله الطشت صدت جرت لبن امها دمعتها
صاحت يا جبير البيت يعز اختك يهيبتها
يالتجلي هموم الناس بفگدك زيدت همي
_____
مضيفك عامر بكل يوم باجر يفرغ امضيفك
اوشنجاوب يبو محمد عنك لو نشد ضيفك
دلالك بالكرم تشهد ويشهد بالحرب سيفك
من اصد خالي اعله ديوانك يخويه ينهدم عزمي
______
عفيه وضل گلب عندي واشوفن چبدك اگبالي
وسم الي امردها احشاك مرد يبن امي دلالي
تلوج من الالم واختك تلوج وياك يالغالي
صوبني سهم فگدك وصوابه وصل عظمي
___
تصد ليه وتهل عينك اصبر روحي لو اصبرك
يا كسر الاخو البروح بحر لو دمعي ميجبرك
يغطيني الترب ياريت ولا اوكف على گبرك
يحگلي عيوني يبن امي على فراگك لون تعمي
____
اسمعك من توصي حسين اولوصيتك غده ينحب
تگله هنا يبو السجاد خل عينك على زينب
ما تدري يبو محمد اختك راح تتسلب
ويذحون اخوتي اكبالي وعلي يحترگن خيمي
_____
الشاعر عبد العظيم الابراهيمي

إلى كريم ال محمد الحسن المجتبى عليه السلام



يمته نـــزوره وعالگبــر ننظـر منــايـر
يمتـه المواكــب تهتف أتفضل يزايــر
وكلها اتعناه تجمعنه ذكراه
يمته المواكــب تهتف أتفضل يــزايـر

*----------*----------*

يمته نگصــد للحسن احنـه بمواكــب
للزيــاره أهنــاك غصبن عالنــواصـب
نعلـي رايـــة يا علـي والكـل تـــراقب
بحضرته التيجـان تخضع والمــراتب

كلها تزوره وبالصحن تهمــل دمعـها
عاشوره أبسابع صفـر كلهـــا فجعها
بالهم ندبناه تجمعنه ذكراه
يمته المــواكب تهتف اتفضل يـزاير

*----------*----------*

كون سابـــع صفــر نبــديها المـــآسـي
يبدل إعــلام الصحن مـوكــب رئأسي
وتعلن ليومـــه حـداد أهـــل الكـراسي
وللزچــيه بالحسـن نگصــد نـــواسـي

يمته أنّتعَنه وبالگبــر ننصــب عــزيه
يمته نواسي الطاهره الزهره الزچيه
نتعنه ننعاه تجمعنه ذكراه
يمته المـواكب تهتف أتفضل يــزايـر

*----------*----------*

من ضريـــح الحسن نحييها الشعـائــر
نلطم أصـــدور ونهـــل دمـــع النواظـر
بليلة القاسم شبـــاب الشيعــه حاضـر
والنويـني اليقــــره عالبــــث المبـــاشر

جسام ياضنوتي رايح رايح من أعيوني
ما رحمني الدهر وأنـــت نـــور البصـــر
رايح رايح من أعيوني

أبصوت المواجع نستمع احنه لمصابه
ونعلگ شمع ونهل دمع جمــرة شــبابه
وأّنادي ويلاه تجمعنه ذكراه
يمته المــواكب تهتـف أتفضل يــــزاير

*----------*----------*

أهناك مـن صحن الحسن نور الهدايه
نـــرفـــع آذان التشـــهـد بالـــولايــه
وتمســـع إذانـــي بفخــر كــل البرايا
علــي مـــن الله أبكتابــه أعظــم أيـه

عالمبــاشــر يُنقــل أذان المنـــــاره
وتنّقـــلْ للعالــم أهنــــاك الــزيـاره
تشاهدها عيناه تجمعنه ذكراه
يمته المواكب تهتف أتفضل يزايـر

*----------*----------*

كــــون مشـايـــه انتعنـــه أبـــربعينه
مـــن ضريـــح حسين نگصـد المدينه
والمـــواكب كلها منتشـــره وحــزينه
تنادي اهلـن بيـك يـــا زايــــر ولينــه

أتفضــل يزايـــر للحــسن هاليلـه يمنـــه
يسجلنه في سجله الحسن ليكم خِدمنهَ
بعزه خدمناه تجمعنه ذكـراه
يمته المــواكـــب تهتــف أتفضل يــزاير

*----------*----------*

الشاعر
موسى البديري

هوسات ميمر الى الامام الحسن عليه السلام

يمته الحسن يعلى بــذهب بنيانـه
ومــنْ المنــايــر يـــرتفــع آذانــــه
وتگصد مشي كل شيعته حـزنانه
( وتهتف يا عزنه أوالينه )

*----------*----------*

مـــنْ البقيــع لـــكــربلــه نتعنــه
مشــايه نگصد مــا نظــل نتمنـه
من جنه نطلع ندخل احنه جنــه
( ومشايه انطب يا ابو محمد )

*----------*----------*

غصباً على الضدك نشيد حضره
ممتده مــن گبــرك لحـد الـزهـره
شوفت منارتهـا الدليــل أتســره
( والمهدي يعليها الحضره )

*----------*----------*

بــاب الكـريم الما يــرد خطـاره
باچــر تگصده بكل فخــر زواره
باچــر نلــوذ ونحتمـي بأسـواره
( وبابه مگضيه الحاجه )

*----------*----------*

ننصب مواكب خدمـة المشايــه
مــن كربلــه حــد گبتـك وفــايـه
ومو رايه نرفــع رايـه تتبـع رايه
( وتموج الگاع أبزوارك )

*
الشاعر
موسى البديري

نزال عگيلي استشهاد الامام الحسن المجتبى (ع)

ويلي اعله المسموم وچبدة
___
ون يا گلبي وهل يادمعي
وبطور المفجوعات انعي
يا روحي وي الخدر جزعي
اعله العترة اليوم اكبر شدة
_
هـذا الـوارث هيـبة طـــه
ومن عودة الحكمة ومعناها
بصيته الجود يظل يتباها
واليگصد سائل ميرده
_
لحالة زينب گلبي اتفجع
شافت چبده شلون اتگطع
احمر ينزل كام المدمع
تنعى بلوعة وحسرة لفگده
__
صاحت يبن امي ويا زودي
يلبيك اشتم ريحة عودي
دمعي اعليك يچوّي خدودي
جرحي خلافك منهو يضمده
____
صاح المسوم آ يا همي
يهون مصابي گبال ابن امي
بالطف ريت افديه بدمي
من يظل حسين لوحده
___
وحسين اعليه يبچي بعبره
فاضت روح ابن امه بحجره
يعين الله اليوم امه الزهره
تشوف شسوت بالسم جعده
____
الشاعر عبد العظيم احمد الابراهيمي