للامام السجاد ع
.
.


سبي وحرگ اخيام .. وشماته بالشام
شكثر بيك الام
علي علي
*
خلصت عمرك حداد .. وثوبك امـدمر رماد
تبجي ليل انهار من گد نايباتك
لسه تتذكرها زين .. احرقو اخيام الحسين
من احرگوها شاهدت فرت خواتك

من الخوف .. ابنــيه تشــبه المصحف
من الخوف .. من سوط الشمر تزحف
من الخوف .. الهــا ايســلب اتحـــلف

يجــور الأيـام .. وشـماته بالشام
شكثر بيك الالم
علي علي
*
أي يزين العابـدين .. خلصت عمرك حزين
وقصة احزانك ترى قصه جبيره
شلون اوصفها بكلام .. وانته دافنلك امام
شلون دفنه وانته چفنته بحصيره

شلگيته .. وبـيدك جامع اوصاله
شلگيته .. حسين الوالد اشحاله
شلگيته .. وفــوگ الــرمـله دلاله

ابد ماتنلام .. وشماته بالشام
شكثر بيك الام
علي علي
*بالـــدرب ذاك البعــيد .. وانــته مگيود بحديد
سنسلتهم خلت برگبتك اثار
الوادم الچن عدها عيد .. مدري منك وشتريد
امكبل وگامو يشمرونك بالحجار

عجيبه .. من گاموا يشتمونك
عجيبه .. هــمه من يضربونك
عجيبه .. والدم غرگ امتونك

جرحك ميلتام وشماته بالشام
شكثر بيك الالم
علي علي
*
توجعك حيل العيون .. الوادم امن يشاهدون
على الناگه امچتفه عمتك زينب
لو جبت طاري الكفيل .. بساع دمعته تسيل
تصد على رمحه وتون وحيل تنحب

اسيره .. الماشـايفــها بنــيادم
اسيره .. عيون عليها تتزاحم
اسيره .. زينب وسـفه ياعالم

العقيله تنظام .. وشماته بشام
شكثر بيك الالم
علي علي
*
گلبك شگد بي جروح .. الهالسبب لسه تنوح
الشفته ماشافه بشر يازين العباد
شفت نسوة امچتفات .. اليالي عالناكه تبات
شوفوهن ياوسافه الكل البلاد

مصايب .. مــن گالــو سبيناهن
مصايب .. ذنــي ابلايه ولياهن
مصايب .. الكافل ماهو وياهن

ابضعنكم ايتام .. وشماته بالشام
شكثر بيك الالم
علي علي
*
من بعد ذاك العذاب .. گعدوكم عالتراب
بالخرابه انفرشت ادموع اليتامه
تقره بعيون الزغار .. الم وهموم ومرار
السبي فوگ وجوهم تارك علامه

يونون .. چــيه فگــدو اهالـيهم
يونون .. سوط الحادي ياذيهم
يونون .. للطـــف مـــن يـوديهم

اساره مادام .. وشماته بالشام
شكثر بيك الالم
علي علي
*
حيدر تركي الكربلائي

لشهادة السجاد ع
.
.
.

مشــتاگ يـامــوت لـهــل الــغـاظــريه
مشــتاگ لحـسـين والعـمـتي الســبيه
اريد اهناك اشوف اشصار ماصار
بعدهي اجروحهم من كربله اكبار
اهل الغاظريه

___

هــايــموت اشــبـيك مــتأخــر عــليه
انــه زيــن الــعابــديـن وتــدري بــيه
انـه نـفــسـي الــبالحــبل شــدو اديه
الوالـــدي مــشتاگ والعـمـتي ورقـيه

اتمنيت يـمـي الحظـنـت راس ابــوها
اتمنيت تگعد هـسه ابحــظن اخــوها
ما اسئــلها عــن ايـديــها الـــزغار
بعدهي اجروحهم من كربله اكبار
اهل الغاظريه

___

العـمــتي يامـوت ابدلـيلي اشـــكـثر آلام
الـبعد ذبــح احـسين ماعاشت سوه ايام
بلــكــي جرح امتــونــهـا هالمــده ملــتام
وادري كلشـي ايطيب وتضل طبة الشام

الجـــمال من گال زينــب جايبــيها
الجـــمال شــمــتان ويــأشــر عليها
اخــاف الــذكــريات اتـوجر الـنار
بعدهي اجروحهم من كربله اكبار
اهل الغاظريه

___

إي يمـوت امتاني جفني يمته اطـبگه
الوالــدي مـشـتاگ حــيل وارد اشـبگه
ارد اشــم صدره ابكــثر مابيــه حـرگه
وخوفي والله امهشمات اظلوعه الـگه

محـتار يامـوت گـلي امنــين اشــمه
محـتار بحـســين خــايـف لا الــچمه
اخاف ايـگــول اخ ابـهــاي محتار
بعدهي اجروحهم من كربله اكبار
اهل الغاظريه

___

جــايــني يامـــوت شـو مــتأخر اهــــواي
اوياك احچي اشبيك ساكت احچي وياي
راحــو اخــواني عطــاشه ابحـسرة الـماي
عــلى عـــبد الله والاكـــبر هـــذا مبـــچاي

أخـوان عــندي الــواحد چــنه ورده
أخــوان راحــو چــن مــاي وتـبــده
عــن اعـــزاز گـــلبي مــاكو اخـبار
بعدهي اجروحهم مـن كربله اكبار
اهل الغاظريه

___

السم سره بعضاي واسئل مـوتي چا وين
وابچـي بـس مـو عـلى روحي عالبعيدين
حلـمي مـن وجـه ابو فاضل اتـرس العين
كــون يشبـگني واشــبگـه وعنـده چــفين

العبــاس عــمـي عنــوان القـداســه
العــباس لازم ابـوســه عـلى راســه
العــمود ابراسـه يــمكن تارك اثار
بعدهي اجروحهم من كربله اكبار
اهل الغاظريه
___
تمت والحمد لله
حيدر تركي الكربلائي

استشهاد الامام السجاد ع

ياهو بيهن نازف اكثر
جرحي لو جرحك يالاكبر
طعنت خناجر كربله
لو من جروح السنسله
++++++++++
خلصت وجيتك يالاكبر حالت المهضوم حالي
من إخوتي اليبچي فوگي ويحني ظهره ما بقالي
تقره بعيوني سوالف عن سهر ذيچ الاليالي
صح متت راسي اعله جسمي امن الخناجر جسمي خالي

يختلف قتلي بقضيه
اني مذبوح امن اديه
امن الخيمه ابدي المسأله
لو من جروح السنسله
++++++++++
تذكر الخيمه يلاكبر بيها اجيت او ودعتني
بالمرض ثگلانه جدمي ونار اجتني حاوطتني
صارت العوچيه جمره والزمت بيها چوتني
وبين دخان المخيم عمتي تسحبني اجتني

هيه تسحبني بأديها
والسياط اتدگ عليها
من سوطه عمتي مايله
لو من جروح السنسله
++++++++
ما اقارن انته تحكم ياهو بينه الجرحه اكبر
انته روحك مره طلعت وجسمك بساعه توذر
لو الف سيف اعله نحري او لا حبل بچفوفي وانجر
آه يا صوت اليصيحه ابوجهي من اجدامي تعثر

زلمه مو سهله وتشوفه
اخته واحبال بچفوفه
تبچي اعله حاله العايله
لو من جروح السنسله
++++++++++
عن رمح خاصرتك ابلغ لو الم حچي الشماته
اشينزف امن اعروگه گلي التنضرب يمّه خواته
آه ماصاحن عليه حال اخوهـن عاذراته
امضيّگين ابگيده عنقي اتجرحه ابسط التفاته

مادرت عيني عليهن
ساكت واسمع بچيهن
يكتل سبي لمدلـله
لو من جروح السنسله
++++++++++
الشام آه الشام بيها ابگلبي چن محترگه خيمه
بكل نفس تطلع واردها روحي من گد الهظيمه
ديره ديره ايدخلونه وبالحجر صابو يتيمه
واسمع ايصيحوني هذا عايش السلبوا حريمه

يا الم چلمه الحچوها
بيها روحي گطعوها
الكم دموعي الهامله
لو من جروح السنسله
++++++++++
اسنيني والفتره وراكم غربه يا خويه العشتها
الدمعه لحسين ومصابه ليله ابد مافارگتها
من اجت ساعة وفاتي الكربله اعيوني درتها
خويه يالاكبر چفوفك تحمل بنعشي ردتها

هسه اجيت واني يمك
ضمني ياخويه واضمك
كل همي چلمة يا هله
لو من جروح السنسله

ثائر الربيعي

السيدة زينب تخاطب ابا الفضل فزاعية


الله وياك يلمنك يخافون
الله وياك يلبسمك يحلفون

،-------------------------------------------


اريد ابچي اعله اخوي الگطع الانفاس
راح البيه حميه ورفعة الراس
وينك يا كفيلي خويه عباس


الله وياك ،،، يمحلي اليگعدون
الله وياك ،،، يلبسمك يحلفون



،،،،،،،،،،،،،،،،،،،،،،،،،،،،،


يا شدة اليفگد مثلك انسان
بشر ( گاع ونهر ومتون واغصان )
الخسر مثلك يخويه كلشي خسران



الله وياك ،، ها يلتسوه العيون
الله وياك ،، يلبسمك يحلفون

،،،،،،،،،،،،،،،،،،،،،،،،،


هذا البلمعارك يكسر الجيش
يمه أثگالهم تتوزن بريش
يكون البيه حميه ايعيش وايعيش



الله وياك ،،، بس نتوادع شلون
الله وياك ،،، يلبسمك يحلفون

،،،،،،،،،،،،،،،،،،،،،،،،،،،،،،،،،،،،،


عمت عيني اعله سهم العين والجود
يرداد اليعيل وصاحب الزود
يمن تركع أكباله اجيوش وجنود



الله وياك ،،، يلهديت المتون
الله وياك ،، يلبسمك يحلفون


،،،،،،،،،،،،،،،،،،،،،،،،،،،،،،،،،،،،،،،،


خلصت وانتهت والراح معذور
بس گلبي اليريده ايعيش مجبور
يگلبي بدون طولك والله مكسور


الله وياك ،،، والدلال مدفون
الله وياك ،،، يلبسمك يحلفون

،،،،،،،،،،،،،،،،،،،،،،،،،،،،،،،،،

بدون اهل الكلافة شينفع البيت
ارد بلا كفيل وحيل ونيت
شگل للدار راحو وانه رديت



الله وياك ،،، ردلي وي اليردون
الله وياك ،،، يلبسمك يحلفون

✍️✍️✍️✍️✍️✍️✍️✍️

كلمات الخادم
رعد الفريجي

نزال..
استشهاد الامام السجاد ع

لاتلومون..لاتلومون.. لو أضل الدهر ابچي لاتلومون

……………………………
زين اني العباد.. جرحي فلا هاد.. لانوحي
منه دمه اتسيل.. من سحگته الخيل.. مذبوحي
مگطع خليلي.. وزاد ابدليلي.. لجروحي
والوالدي حسين.. لاتخفي الونين.. ياروحي

ماي العيون.. ماي العيون.. صبي المصرع حبيبي ماي العيون
……………………………
لو ابچي من دم.. بس الله يعلم.. أبحالي
دمعي مينشف.. راحولي بالطف.. چم غالي
دلالي ذايب.. وفگد الحبايب.. چتالي
يصعب فگدهم.. بعيني صورهم.. وبالي

ما يروحون.. مايروحون.. والله من بالي الاحبهم مايروحون
……………………………
لا لا تلومون.. لوابچي العيون.. ماينفع
بعيني شفتهم.. گبالي جثثهم.. تتگطع
هذا الي مجروح.. وذاك الي مذبوح.. ومبضع
كلهم ضحايه.. وتجري الدمايه.. چن منبع

ضل يلوجون..ضل يلوجون.. على حر رمل الصحاري.. ضل يلوجون
……………………………
لوگلتوا عاده.. النه الشهاده.. هم اقبل
لكن حراير.. بيت الاطاهر.. هم تنذل
شوبالله ياناس.. هاي أبينوماس.. تتمثل
الماعدها نخوه.. يصعدونه گوه.. عالهزل

بضرب المتون..بضرب المتون.. صعدونه عله الهزيله.. بضرب المتون
……………………………
والله مصيبه.. عمتي الغريبه.. يضربوها
بت الاطايب.. أنذال اجانب.. شتموها
بگيد السلاسل.. أرجاس أراذل.. جروها
من تمشي خطوه.. يجروها گوه.. يطيحوها

من يضحكون..من يضحكون.. تنهضم حيل العقيله.. من يضحكوم
……………………………
والأدها من هاي.. شافتها عيناي.. بالكوفه
ام الخدر ذاك.. دخلوها لهناك.. معروفه
الچانت اميره.. طبت اسيره.. مچتوفه
شفت اخت الحسين.. دمعتها بالعين.. مذروفه

من ينظرون..من ينضرون.. ينهضم خدر العقيله.. من ينظرون


الشاعر عقيل كاظم الحسناوي

.
الامام زين العابدين السجاد ع
نزله..

ويلـي محـد عاني مـن مــات ابوي
من انذبح عمي وعلي الاكبر اخوي
واويـــلاه .. واويـــلاه

اني يـاناس العليل الگـلبي ذاب
بكربله شفت اني بعيوني العذاب
شفت ابوي حسين عاري عالتراب
والدمه وذاري الترُب صاير خضاب
واويـــلاه .. واويـــلاه

مـا بـقــه نـاصـر الـــه وانـي علـيـل
من اجت داست عليه بالحافر الخـيل
واني مثل السعفه صرت ابحزني اميل
يـا هــو احـشـمـنــه واگـلـلـه دخـيـل
واويـــلاه .. واويـــلاه

توجهت بعيوني انه صوب الفرات
صحت وين الي كفل خدر الخوات
عمي ان چانك بـقه بـروحك حياة
گـوم الحگ والــدي يـاعمي مــات
واويـــلاه .. واويـــلاه

ياعلي الاكبر صحت وين الاخو
اني اعرفنـك يخـو سكـنه كـفـو
گـوم يحـزام الظـهر غـيرك مـنـو
يخـلص المذبـوح من خيل العدو
واويـــلاه .. واويـــلاه

وين جاسم وينه چا شبل الحسن
بالحوافـر صدر الحسين انـطحـن
گـوم ياخـويه تـره عـيوني عـمـن
النـار شبـت والحــرم يـتـراكـضـن
واويـــلاه .. واويـــلاه

وين هاشم وين چا ذيچ الانصار
خلـي تـفـزع للمـخـيـم داوي نـار
يـالهـواشـم ويـن تشـرد هالزغـار
بـيـن دخـانـتـها ضـاعت والغـبـار
واويـــلاه .. واويـــلاه

الشاعر عقيل الحسناوي..

استشهاد الامام علي السجاد ع

جـابـر يجـابـر .. خــل ارويـلك الصـار
تركض حـراير .. وشـبت بالخيم النـار
من الخيم .. طلعت حرم .. والنار بعبـيـهن

-------------------------------
هوايه ياجابر عذابي .. مايشيله احد مصابي
يهضم الشفـتـه
حسين من گطعوله نحره .. گبالي خيل اتطحنه صدره
وجسمه ماردتـه

شفته من ينذبح .. بصدره حافر يلح
تطشر على الغبره
الخيل المعصبه .. لسحگـه متدربه
الحافر على الطبره

وبـصـدره هالخـيـل .. لعـبت فوگـه مـيدان
ودم جسمه اليسيل .. الطـف مـنـه غـرگـان
خيل العدو .. ضلوع الابو .. شمسويه بيـهن
-------------------------------
وعگب ما ذبحو ولينه .. ندار جيش العدو لينه
ونار جابوها
تكاثـروا ياعم علينه .. والخيم حرگوها بينه
ارماد خلوها

من احرگوها الخيم .. وين افر بالحرم
وحاير انه بعلـتي
گـطعوا النه الدرب .. الـتنلزم تـنضرب
شگد لوعوا عمتي

ياعمـي الانذال .. الـتشرد يضربوها
يلحگوها بحبال .. وگـوه يچـتفوها
موقف صعب .. شبعن ضرب .. ياعم انظر عليـهن
-------------------------------
خيمتي احترگت عليه .. وگامت اتجر عمتي بيه
واني ما اگدر
علتي ياعمي چبـيره .. وحيرتي مامنها حيره
وبيمن اتصبر

امشي خطوه وطحت .. وبالسياط انلحت
كلهم يطگـوني
چفي هم محترگ .. بيش ادفعه اليطگ
اتلگـه بمـتوني

كـلـهم يطگـون .. بيـه ويـّشتموني
وبيه يشمـتون .. برمح يعـثروني
بجدمي الجمر .. ضل يستـعر .. اذاني چويـهن

-------------------------------
والله ياجابر مصيبه .. عمتي صارت غريبه
حامي ما الها
عالنهر ذبحوا حلمـها .. وحيل اذها وهضمها
موت كافـلـها

الچانت مدللـه .. ضاعت ابكربله
من مات واليها
عمتي بنت الفحل .. وسفه تركب جمل
الذباح يسبيها

عافوها الاخوان .. بطف الغاضريه
مـتانيـها ديــوان .. تدخـلـه سبـيـه
عيون الخدر .. مدمع تدر .. ومايگطع بچيـهن

-------------------------------
الحيره ياعمي بخواتي .. الله لو ماخذ حياتي
ولا اشوفـنـهن
زغار مو مالت هضيمه .. تشب عليهن ليش خيمه
النار چـوتهن

رقيه سحگت جمر .. سكنه حارت تـفـر
ومچـلـبه بخوله
شردن من الضرب .. ضيعـنـه الدرب
الطـف خـطر كله

ومالـيه انـه حيل .. والحگهن خـواتي
نار وسحگ خيل .. واعـثر ابـعـبـاتي
شردن ركض .. چن الارض .. ماتحمل مشيـهن

-------------------------------
الشام ياجابر كـتلني .. حيل اذاني وهضمني
وزاد لـوعـاتي
يزيد وكفنه على بابـه .. وبيتانه بنص خرابـه
وهضم عماتي

يهـضم اللي جــره .. وگـلبك تفـطره
ياعمي حيرتـنه
بالخرابه شفت .. رقيه فوگ الطشت
ماتت عـزيزتـنه

وبغــربـة الشـام .. عفناها واجينه
نضل طول الايام .. مايگطع بچينه
وهذا الدمع .. ماينگطع .. لعماتي وسبيـهن

الشاعر عقيل الحسناوي..

تجليبه لاستشهاد الامام السجاد ع

علي السجاد مات الليله بالحـسره
واجت يمه تحضره فاطمه الزهره

قبل ميموت ابو الباقر اجت يمه
بضلع محني الزچـيه فاطمه امه
والسجـاد چـان اينـازع ابسـمه
بچـبده نـار سمه حيل مستـعره

يصد للزهره عينه والدمع يجري
يكلها جده نار السم غدت تسري
منيتي گربت واني نگضه عمري
وللمـثـلي شيفيده بالشفت عمره

يجده بعيني شفت اهوال ماتنشاف
واذا احجي عليج من هضم ينخاف
شفت حسين من حز راسه السياف
ومثنـي الشمر ساحـگ على صدره

يحـز ابراس ابـوي بعيني شاهدته
وطلعت حافيه تركض يجده اخته
تريـد تخـلص الصارت وذر جـثـته
بلكت ماتـدوسـه الخـيل وتـطشره

لچـن عـنه الشمر ياجـده يدفـعـها
بچعب رمحه النذل كلساه يوگعها
يطگها بسوط جده وحيل يوجعها
حـرمـه عمـتي وماتـگـدر تـنـحـره

وعگب ذبحه يجده وكسرت اعظامه
اجـوا صوب المخـيم حـرگـوا اخيامه
وطـشـت بالبـراي وضاعـت ايتـامه
وتـدور ويـن زينـب ويلـي متحـيره

احترك بينه المخيم جده وين انروح
والكـافل ضعـنه عـله النـهـر مـذبـوح
عليمن جـده نعـتب والعتب مسموح
ونشاهدهم جـثث عالگاع متـطشره


الشاعر عقيل الحسناوي..

استشهاد الامام السجاد ع

الليله ابو الباقر باخـر انفاسه
وگاعد اوليده يقره يـم راسه
يقره مصيبة حرگ الخيم
بالهيمه فرت ذيچ الحرم
يقره يم راسه ..
…………………………
العـلـيـل اللـيلـه  يـودع بـاحـبـابه
وفوگ راسه الباقر دمعته سچابه
گعد يـم الابـو والدمعـه يجـريها .. ويقراله المصيبه
قره قصة السبيه وما جره عليها .. زيـنـب الغـريـبـه

وگامت الدمعه  بالهـظم تهمل
التصعد الناگه صعبه من تنزل
وهـيج بالصدر ذاك الالم
بالهيمه فرت ذيچ الحرم
يقره يم راسه ..
…………………………

يالفض بأنفاسه ودم تصب اعيونه
موسـدينـه گـوه يوجـعـنـه امـتونه
عمر گضاه يون لمن ينام ايريد .. بمتنه هواي الجروح
واثـر للجـامعـه لسـه بقـه بالايـد .. تلچمه وتوجع الروح

وبالسبي شاهد قصته الباقر
بجامعـة ايده  لحمـه متناثر
ومتنه  بالضرب كلش ورم
بالهـيمه فـرت ذيـچ الحرم
يقره يم راسه ..

…………………………

بعينه صد للباقر وبالدموع ايگله
بويه موت حيلي ياسهم عبدالله

علل خلـه بـدليلي اچماله بمصابه .. رضيع ابدمه شفته
وسدته ويه ابوي وهلت انه اترابه ..  وبـأيــدي دفـنـته

بويه من شلته دم ترس صدري
چـانت اوداجـه بالـدمـه تجـري
الله اشعمل بينه هالسهم
بالهيمه فرت ذيچ الحرم
يقره يم راسه ..
…………………………

وگبل طَلعت روحه وگبل خمد انفاسه
يصـيح آه يرقـيـه وضل يـدگ ابراسه

مصيـبتـها الظهـر يالبـاقـر اتكـسره .. الماتـت بالخـرابه
بطشت شافت ابوها وقبلت نحره .. وحظنيته بخضابه

بـونــه تشكيله  العـاشـر ويــومه
وعالطشت ماتت اختي مهظومه
من گد مابچت راسه انهظم
بالهـيـمـه فـرت ذيـچ الحرم
يقره يم راسه ..
…………………………

وگـالـهم چفنـوني لومـتت بالرايه
الباقي بيها لسه من الكفيل ادميه

الرايـه من هـوت فـوگ النـهـر قصه .. نرويـها بدمعنه
لهسه بصدري من طاحت بقة غصه .. الراعي المحنه

لعمي ابوفاضل غصه اكو بصدري
بگـطعـت ازنــوده  انكـسر ظـهري
مات وعالنهر طـاح العلم
بالهيمه فرت ذيچ الحرم
يقره يم راسه ..
…………………………

هـــو اصلـن مـيـت  بظـهـر  ذاك الـعـاشـر
بصدر ابو من شاهد يرض ضلوعه الحافر

ميت من هـذاك اليـوم بالحـومـه .. شـاف ابعـينه الخيول
بحوافرها ظلوع حسين مهشومه .. بصدره گامت اتجول

وشاهـد الحـافـر يمـرد ابگـلبه
وعالترب ذبه  بسحگته ايگلبه
گـلبه عالترب يتجره دم
بالهيمه فرت ذيچ الحرم
يقره يم راسه ..

الشاعر عقيل الحسناوي..

بقيــوده ويجـــرن دمعــــاتـــه

☼ـــــــــــ☼ــــــــــ☼

الله يســاعـــد گلبــه وروحـــه
مــا بطـــل دمعــاتــه ونــوحـه
چم رگبه يشـاهـــد مذبــوحــه
السجــاد يـذبحــن عبـــاراتــه

☼ـــــــــــ☼ــــــــــ☼

شاهـد جسم حســين اتگطــع
وبالطف مـن الخيـل أتـــوزع
من دم حگه يسيــل المدمــع
مــا تبــرد تسعـــــر جمــراته

☼ـــــــــــ☼ــــــــــ☼

شاهــد بالطــف جـسم الأكبـر
چــن طــاها أمــوزع ومطبـر
وعبدالله اتــروه مــن المنحر
وبالنبلـه انذبحــت ضحكـاته

☼ـــــــــــ☼ــــــــــ☼

شــاهد بـــدر القــاسم بالطــف
شلون أسيــوف البيهن يِنـزَف
أبــدم الهامــه يحنّــون الچــف
وبــالعــاشر طفـــو شمعــاتــه

☼ـــــــــــ☼ــــــــــ☼

شاهــد بالدمعـــه المــذروفـه
الكافـل عمــه أبــلايا چفـوفـه
طايح والغيـره مــن اجروفـه
عالكــافــل تـكبـــر شـوغاتـه

☼ـــــــــــ☼ــــــــــ☼

شاهـد حــرگ أخيــام الخــدّر
يوم الهجمت وسفه العســكر
أيتـــام يشـــاهــدهــم بالبـــر
وتضحــك يسمعهــم شمـاته

☼ـــــــــــ☼ــــــــــ☼

شاهـــد عمتـه مـن يگيـدوها
وعـالهَـزّل گــام يــركبــوهــا
گلبــه أتفطــر مـن شتمــوها
والســـوط أيلـــوع عمــاتــه

☼ـــــــــــ☼ــــــــــ☼

بيده الگيــد ويصعــب حــاله
وينظـــر بالــدمعـات أطفــاله
وروس أهله مرفوعه اگباله
تكثــر مــن يصــد آهـــاتـــه

☼ـــــــــــ☼ــــــــــ☼

چم مـره مات مـن الحسـره
من شاهــد مچتوفـه الحـره
خــدّر راحت للشـام أســره
مــات السجــاد بلوعــاتـــه

☼ـــــــــــ☼ــــــــــ☼

الشاعر
موسى البديري

قصيدة ( الوضوء ) كان الإمام يتذكر مصارع أهل بيته في كل وقت وكأنه اذا قام الامام علي بن الحسين للوضوء يتذكر عطش أبيه



تـــرد  عـليــه  نـايبـاتــي    
بالـوضوء لكــل صلاتــي
ينرســم طف كــربلاء        
وتنزل أدمـوع العـزاء
بالــوضوء لكل صــلاتي

*---------------*-------------*

أبكل وضـوء الطـف جمــر يصعد لهيبه
ومـن جديــد تــرد علـيّ  ذيـچ المصيبه
أبدمعـه اذكــر والـــدي وجثتـه السليبه
هــذا مـــاي وشيبتــه ظلــت  خضـيبـه

بالرزيه......
     الماي لــو أشوف بوضوئي بالرزيه
والعزيه.....
      تردلي كل فرض أبصلاتي  والعزيه
بالوضــوء يمرني ذكره      
اشعـــر أبـدلاله جمــره
تلتهب صبح ومساء     
تنزل أدمــوع العزاء

*---------------*-------------*

مـن أشيــل المـــاي انــه أبيــن أديـه
بكــل وضوء أتشـب خيام الهاشميه
وجهي  لو اغسله تهل  دمعـه جـريه
عالبقه خده تــريب  أعلى الـــوطيه

دامي خـده......
        بالوضوء اذكـر أبويه دامي خده
ضامي بعده.....
     من أشوف الماي اذكر ضامي بعده
بالوضوء يمـــر مصـــابه    
اذكر أهمــومه وعـــذابـه
حگي أموت من البكاء   
تنزل أدمــوع العـــزاء

*---------------*-------------*

مــن اغسل اچـفوفي تمـر بيـه الفجيعه
اذكــر العبــاس وچــفــوفــه الــگطيعــه
مــاي يجــري ومــا شرب من الشريعـه
ضامي يـدري حسين بالخيمه ورضيعه

ظل ينطره.....
      يدري گلب حسين حاير ظل ينطره
گلبه جمره.....
       من گصد صوب الشريعه گلبه جمره
عمي اذكره ودمعي يجري      
بس طفوف حسين عمري
اذكـر اچفوف ولـواء     
تنزل أدموع العــزاء

*---------------*-------------*

امسح أبراسي وتموت أبصدري عبـــره
وتهمل أدمــوع النوظر گطــره گطـــره
اذكــر حسين الغــريب الــدامي نحــره
عالرمح راسه وخضيبه  الشيبه حمـره

شيبه دامي.....
 .    من نَزِف دمه حسافه شيبه دامي
بعده ضامي.....
     من أشوف اشفافه ادري بعده ضامي
ظامي ظل ابن  الـــزچيه        
بكل وضوء انصب عـزيه
عالخذو منـه الـرداء
تنــزل أدمـوع العزاء

*---------------*-------------*

امسح اجدامي الدمـع من عيني ساچب
تجـري بفكاري وتـمــر ذيــچ  المصايــب
عمتــي اذكــر حايـــره أبيــن  الأجــانـب
كل وضوئي يصير بس لوعــه ونــوايب

يا مصابي.....
       ابكل فرض تجري المدامع يا مصابي
يا عذابي....  
      عمري بالـدمعات ضايع يا عذابي
بكل فرض عمتي سبيه  
بالوضوء انصب عزيه
وسفه بت خير النساء    
تنزل أدمــوع العـــزاء

*---------------*-------------*

الشاعر 
موسى البديري

ينايم عالثره..الحك يعباس
خذوني اميسره..الحك يعباس
...
الحك خويه ياعباس ياحامي الضعينه
ترضاهه الزلم والخيل تتراكض علينه
نتحمل يطكنه السوط وايورم ادينه
بس الخوف من النار لا توصل عبينه

وين اطفالي اوديهم.. ومن النار افر بيهم
حار الرمل يجويهم
يخويه وجم طفل..فوك الجمر داس
ينايم عالثره..الحك يعباس
....
الامريه الجبيره اشلون ياعباس تنسب
من الركض والطيحات حته الزلمه يتعب
بكل عثره أصيحن اخ ياكفال زينب
حته برمشي طالع شيب مو بس راسي شيب

بالخميس عمر اختك.. جنت امدلل ابختك
خويه اعذرني عاتبتك
شمر وحرمله..صارولي حراس
ينايم عالثره..انهض بعباس
...
خويه ابراسك ايهوسون من جابو اليه
صاحو زينب أمن اليوم صار اسمج سبيه
بهذا الموقف اتمنيت تاخذني المنيه
ولا امشي ابيسر عالنوك وايجرون بيه

علويه ويشتموني..ومن ابجي يطكوني
راسك شفته بعيوني
ولو طكني الشمر..يتلفت الراس
ينايم عالثره..الحك يعباس
....
آه الشام خويه الشام مو ديرة اهلنه
اتلكونه ابعصي وبحجار أول ماوصلنه
مارحمونه ياعباس مابيهم محنه
يابوالغيره طبت السوك منهه اشكد فشلنه

وتاليهه يوالينه..للديوان طبينه
والكل تنظر اعلينه
جم علويه صارت فرجه للناس
ينايم عالثره..الحك يعباس

محمد الجماسي
اللهم عجل لوليك الفرج

قصيدة بحق الامام السجاد عليه السلام


نجري الدمع عالسجاد    جد وابو والاحفاد
من يمر يوم ابن حسين   عـــن الحزن تحچي العين
------------------------------- 
اعله فطرتنة نحب حسين واولادة
وتعلمــنة من اهلنة نخدم السادة
النبي ســيد علينة هوة واحفادة
سادتنــــة وأئمتنة ولنة القادة
علمني ابوي وجدي     للهادي اوفي بعهدي
اعله ابنة نظل حزنـــاين   عـــن الحزن تحچي العين
--------------------------------
رظعنة من صــدر امنة محبتهم
وهلنة علمونة شـــلون خدمتهم
نحزن من تمر بينة مـــصيبتهم
اهل بيت النبي والدنيا خانتهم
زين العباد الليلة    دمع الحزن يجريلة
لمصابة حزنان الدين   عن الحزن تحچي العين
---------------------------------
صبر صَبر وتعدة كل وصف صبرة
شاف اشـــلون ابية منكَطع نحرة
وعمة ابلا جفـوف ومرمي عالغبرة
وشاف عظيـدة الاكبر جثة متوذرة
وبعينة شاف القاسم   أمخلي عرسة ونايم
بالدمع كَظاهه ســــنين  عن الحزن تحچي العين
--------------_---------------------
ما بطل ونينة ولا دمـع عينة
وتعلمنة الحزن من حزنة والينة
نريد انساعد المظلوم بــونينة
نقيم ابكل سنة وننصب تعـازينة
نقيم العزة للمظلوم     وللحشر هالعادة ادوم
يومك علي ماناسيـــن    عـــن الحزن تحجي العين
------------------------------
شاف من الزمان امصايب واهوال
وحمل من المصايب والقهر اشكال
حزن البيه ماتكَدر تحمــلة جبال
الم حزنه شديد ايشيب الاطـــفال
خالد يظل ما ننساه   بكل سنة نجدد ذكراه
شما انقدم احنة مقصرين   عن الحزن تحچي العين
-----------------------------------------  
لبس ثوب الحزن وتحمل الآهات
شكثر كَلبة حمل من دنيته شوغات
ليل انهار عينة تسچب الدمعــات
مجرة دموع صار ابوجهه مرسومات
دموعة تصب ليل انهار     بخدودة حفرت انهار
حزن الكلب عالطيـــبين     عـــن الحزن تحچي العين
-------------------------------------------
اسالكم الدعاء
رائد الاسدي

رباطات للامام السجاد عليه السلام



شاف بعيونة.. شاف بعيونة .. ابية اعله الوطية شاف بعيونة
===============
كون وي عودة.. كون وي عودة.. تمنى يموت بالطف كون وي عودة
=======+++=
ينوح لخوانة.. ينوح لخوانة .. ليل انهار دومة ينوح لخوانة
===========
موش ناسيهم.. موش ناسيهم.. على اهلة ينوح دومة وموش ناسيهم
=======++++
دوم يجريها .. دوم يجريها .. دموعة اعله ال هاشم دوم يجريها
=============
ظالة ابالة .. ظالة ابالة .. مصيبة يوم عاشر ظالة ابالة
=============
اسالكم الدعاء رائد الاسدي

موشح الى الامام السجاد عليه السلام وعظيم صبره



شكبره صبـرك سيدي بطــف كربله
ليا مصيــبه ادمــوع عيــنك هامــله

****

شكبره صبرك سيدي لعظم المصاب
چــم محمد شفتــه نـايــم عالتـراب
گلبـــك يــــا ليـا نايبه بالــوّنــه ذاب
للسبــي لـــو للذبــح يـــا معــضــلـه

****

للـذبــح مالـــوم اه مــن الـــذبـــح
لجـــرح دلالك دوه مـا اظن يصح
مو جـــرح واحد اظن 100 جرح
مثــل عينـــك كـل جروحك سايله

****

مثل عينك مــا نشف منهـا الدمـع
يالورثت البـــاب والهــم والضلـع
ليا مصيــبه اليــوم گلبك ينفجـع
للعليه خيــل النــواصـب جــايلـه

****

جــالت ابصدر السبـط خيـل العده
شلون بعــد السحگ گلبـك شاهده
جثته بخيــول العـــده متفــرهــده
برمح راس حسين خصمك شـايله

**

ليا مصيبــه جفنــك يهــل مدمعـه
للگمــر مـــن شفتــه يـم المشرعـه
بكتره جـــوده والــــزنود مگطـعه
البقت تنتظـــره جميـــع العـــايله

****
آه يــا صبرك صعــب مــا نوصفــه
مــن شلت بيــدك شبيه المصطفه
دمـــع عينك لـــو دمه ظل تــذرفه
يـــا اخـــو مثلك اخيـــه شــــايله

****

ليا مصيبه ادمـوعك يصبّن دمّـه
للرضــع الذابَحـــه سهــم الضِمـه
صـــارت اگبالك مصــيبة فاطمه
طفــل بالباب وطفـل من حرمله

****

يا مصيبة سبي عمتــك عالهـزل
حــرم صعبــه من يشدوها بحبل
نظـــرت الشمّــات اشد من النبل
وتالي لأرض الشام زينب راحله

****
عفيه گلبك مــا نفـــذ منه الصبر
وگفت السوگ الاشد لـو بالقصر
كلــها شمات وتصــد ذاك الخدر
وسفــه عدوان بضحك تستقبله

*
الشاعر
موسى البديري

سيدي السجاد الله يعينه
وهوه جدامه نذبح ضي عينه
----------------ا----------
ياكلب صابر مثل كلبه أمتحن
أنصاب جم أصواب من غدرالزمن
ودمه دمعاته عله جفونه. جرن
يبو الباقر فكدك امذينه
سيدي السجاد الله يعينه
--------------ا-------
شاف ابوه حسين مرمي عالثره
جثه فوك الكاع كلها أموذره
جم شباب عالارض . دمه جره
بالسيوف حسينه مكطعينه
سيدي السجاد الله يعينه
-----------ا---------
أبعينه شاف الكمرفوك المشرعه
نايم ويمه الچفوف مكطعه
وأبواليمه أعليه محني أيودعه
صاح ياعباس أفزع لينه
سيدي السجاد الله يعينه
---------ا--------
ابياوضع شاف الطفل وبياألم
بين أدين حسين مصيوب بسهم
وطلعت أمه شايطه من الخيم
نحره شافت بالسهم رامينه
سيدي السجاد الله. يعينه
------------ا---------
أخذته أمن ايدابواليمه وشالته
ولن سهم نابت يولي ابركبته
حبته أبنحره يويلي وشمته
يااخو رقيه وعضيد سكينه
سيدي السجاد الله يعينه
--------------ا----
وشاف خيل الهجمت ونار التشب
وشاف زينب عمته هم. تنضرب
اطفال عطشانه ولا شربت عذب
حيدر حضر سدي والينه
سيدي السجاد الله يعينه
ـــــــــــــــــــــــــــــــــــــــــــ
خادمكم قيس عوده الكعبي

(لأستشهاد الأمام السجاد.ع.)

عظم الله اجرك يمهدي الليله
اودمع عينك عل عليل اتهيله
-----------@@@-------------
جدك السجاد هالليله يطيح
وبالوداع وياك يالمهدي نصيح
الفاگد اهله اوفاگد حسين الذبيح
وياك واعله الفاجعه ننعيله
----------------@@@-----------
ياعلي الشاف المواجع بالطفوف
شاف نحر حسين وي ذيچ الچفوف
حين دارو جيش اميه بالألوف
راد يفزع لچن راگد حيله
------------------@@@-----------
جدك الدافن هله بذاك الوعد
ايشيل كفه اتطيح كفه من الجسد
عل مصيبه الماكو منهه اعظم واشد
انكسر ضهره اومحد ايتچيله
-----------------@@@--------------
امگيد اباغلال بعد الواقعه
وانصبغ ثوبه ابدمه من الجامعه
للمات اويبچي لجل الفاجعه
لبو الباقر جينه انوافيله
-----------------@@@-----------
بالسبي السجاد يبره لعمِتك
ندري هالچلمه يمهدي هُضمتك
ساعد الله گلبك اعله امصيبٓتك
وبالفرج شخصك نضل ندعيله
-------------@@@--------
الليله حاضر ندري ويانه العزاء
اودمعك ايصب عل عليل ابكربلاء
انوالي السجاد لجلك هالولاء
نضره كون اوكل شخص تربيله


الشاعر ✍️
ابو عبد الله الشمري

#قصيدة_لأمام_السجاد
لسان حال الامام السجاد ع

ابــــــدرب السبي ماتت أدية
و كل همي چان احمي رقية
امن اربع جهات احجار تشگف يَمنَّاي
و اسياط فوگي و سلسلة تخط جَوَّاي
و انه عليل و انه عليل
ــــــــــــــــــــــــــــــــــــــــــــــــ
عليَّه شگد صعب
اعاين تنـــــضرب
خواتي
و ابوي اعله الرمح
يصيح ابكل جــرح
بناتي

فوگ الرماح ادموم ينـزف لينه
و قران يقـره راس ابـونه اعلينه
وجه يديره و مرة يغـمض عينه
كلما يطگ السوط متن اسكينه

من الضرب ما ظلــــت إيدين
و اعلينه شَيَّب رمش الحسين
أسمع ونينه شمــــــــا يمر من فوگاي
و اسياط فوگي و سلسلة تخط جَوَّاي
و انه عليل و انه عليل
ــــــــــــــــــــــــــــــــــــــــ
مشينه بالســــــــبي
نبية ابصف نـــــــبي
سباية
و مشت روس الأهل
تبــــــــث روح الأمل
حماية

عيون الرؤوس اعله الضعن مشبوحه
و بس راس واحد ينظر امـن اجروحه
عينه ابسهم لاجل الخــــدر مليـوحة
و امبينه زينب عمـــتي چانـت روحه

فوگ العقيلة امحدب الراس
و يهتز اذا نــــــادت يعبــاس
و ينذبح كلـــما ينفتح طـــاري الماي
و اسياط فوگي و سلسلة تخط جَوَّاي
و انه عليل و انه عليل
ـــــــــــــــــــــــــــــــــــــــ
ابجرح ما يندمل
عله ظهور الهزل
حدينه
بنات ام الحــسن
صفن آ يالــــزمن
رهينة

من كربله للشـــام بعــــــــد الكوفه
وحدة اعله وحدة بالحــبل مچتوفه
يا هيّه زينب غدت مــــــــا معروفه
نعرفـــــــها من ناگتها لن مخسوفه

و منها علامـــــة بعــد تنشاف
محروگة شيلتها امن الاطراف
عگب الكفـــــلها تغيرت عمتي اهواي
و اسياط فوگي و سلسلة تخط جَوَّاي
ــــــــــــــــــــــــــــــــــــــــ
عله طول الدرْب
ثكالة تنتــــــحْب
مصيبة
دمه ينـــزفن نَزِف
و جمرهن يختلف
لهيبه

يم راس الاكبر ليله تگـضي الليلة
تشكيله ساعة و ساعة دم تبچيله
و عبدلله أمّــــه امچتفة اتـناغيله
و اتهزه رمـــحه لمّـــــــن اتلوليله

و تگله ( گلب امك )يمدلول
ابسن الرمـــح وَيَّاك مشيول
عطشان بعــــدك ليش يا ضي عيناي
و اسياط فوگي و سلسلة تخط جَوَّاي
ــــــــــــــــــــــــــــــــــــــــ
وَلَد چنـــه الشمع
خلص مثل الدمع
شبابه
چوت خده الشمس
يويلي و العــــــــرس
مصابه

رمله ابرمح جاسمها تشـــبر طوله
و تنـــــادي مــن دم المتن حنوله
گلـــوله امـــك حـَـــــــدِبت گلوله
و راحت تموت ابحسرت الهلهوله

رافگني راسـك درب الاحزان
عود انه يُمة محضرة نيشان
و ثوب العرس يوليــــدي لساته اوياي
و اسياط فوگي و سلسلة تخط جَوَّاي
و انه عليل. و انه عليل
ــــــــــــــــــــــــــــــــــــــــ
الحمدلله
#علي_حسين_الكناني

شهادة مولانا زين العابدين صلوات الله وسلامهُ عليه


الجرحه ماينفع دوه .. الذبحو أهله بنينوه

_*___

يادوه شتنفع لعلتي بعد مالك كل نفع
يادوه؟ ينفعه الأخوته منصرع يم منصرع
أوالده يلمه بحصيره وتسأل عيونه بدمع
هذا چف عم هذا خنصر هذا ألمن ياضلع؟

المثلي ذبحوله أهل .. تكثر بروحه العلل
أشما تتداوه من المرض .. الضله والموته سوه

_*___

شينفع الحرگو خيامه وطلعلوه مخدره؟
يادوه يضل ماله چاره العمته تمشي ميسره
مگطع اچفوف الكفلهه عمي سبع الگنطره
يادوه گلي شينفعه المثلي تنطگله مره؟

مگيده عمته بحبل .. وصاعده فوگ الهزل
ودعتهم ع رمح .. ونه دلالي أنچوه

_*___

ماله طب گلب اليشاهد عوده طاح من المهر
ومن كثر ماصدره شال أسهام ماضله صدر
البالحوافر شاف عوده صدره مسحوگ أشكثر
يادوه يطيب كسرته وألمن يضل ينتظر؟

گلبه واگف مايدگ .. الشاف أبو من ينسحگ
شله بعيونه بعد .. المات بعيونه الضوه

_*___

ياگمر يضوي عتمته المثلي فاگدله گمر؟
غرب بصهوة جواده ومارجع من النهر
عمتي بدت دمعها وشوبحت كتره النضر
وعمه عمه هذا ياهو؟ تنشد الضهره نكسر

عمه زين العابدين .. عمه اخذني للحسين
گودني يم مصرعه .. بلكي موتتنه سوه

رسول رياض

خل تفزع يمولاي الدول كلهه
فـاتحتك ثگيله اومـانعـزلـهـه
                         """"""""""""""""""""""""""'''''''''''         
                        """"""""""""'''""1"""""""'''''''''''''''''
يامولاي تحضر ناس مـاتنعد
مهظومين كلهم لابسين اسود
بيبان  الچوادر دوم ماتنسد
من خيرك يبو الاكبر نصب ألهه
                        "''"'''''"""''"""''''''''''''''''''''"'"""""""""
                        """""“"""""""""2""""""""""""""
أول فاتحه أبهلكون ماتخسر
تجيهه الناس بالجو والبحر والبر
غير انته الحسين اشلون نتعذر
أمك بالقيامه أهناك شنگلهه
                          "''''''"''''''"''""''"""'""""""'''''"'''''''''''''.   
                          """'""""""''""""3""""""""""""""
خـدامك يبـوالسجاد ماتتعب
تطبخ بالمواكب والشمس تلهب
خلينه الخلگ يحسين تتعجب
هاي الخدمه نعمه اومحد يملهه
                           "''""""""""''"'''''''''''''''''"''"""""'''''
                          """""""""""'"''''4'''''''''''''''''''''''''"''
نحضر ماتمك يحسين يمشيم
تلگه الشيخ والصركال يتحزم
ندير انگاب والدمعات تهمل دم
عليك ادموعنه لازم نوشلهه.
                           "'"""'"'""'''"''''""''""''''"'"""'""'' 
                           ""'"""'''''"''''''''"5'''''"''''''"''''''''''''
وحگ سترالعقيله الوگفت اعله لتل
  عليك ارجال مو نسوان تتهـدل
بالأحـزان نـاخذ مـركـز الاول
نريد المصطفئ وحيدر تسجلهه
                        """""""'''''''''''""""''""""''''''"""""""""""
✍️فاخر علي الشبيبي