زينب ابمجلس يزيد
عادت الطف من جديد

ــــــــــــــــــــــــــــــــــــــ

ابمعقل الطاغوت وبدولة آميه
صالت ابخطبتها بت حامي الحميه
من حچت چن حيدر الكرار هيه
چن نبي ومرسل أبد ما چن سبيه

ذلت الطاغي العنيد
عادت الطف من جديد

ــــــــــــــــــــــــــــــــــــــ

أسعه سعيك يا يزيد وبالنهايه
عرشك ايذل والنصر بس للسبايه
وبرغم انفك ترفلي اهنانه رايه
وباچر الكوثر حرام اعليك مايه

والنعم اخت العضيد
عادت الطف من جديد

ــــــــــــــــــــــــــــــــــــــ

يلـ دعي ومن الشعر هلبيت ازيدك
نبقه أحرار وفلا نصبح عبيدك
باچر احبال ايدي تندار اعله ايدك
باچر ابسيف العذاب انحز وريدك

الشام خلتها تميد
عادت الطف من جديد

ــــــــــــــــــــــــــــــــــــــ

وسفه مثلي لمثلك ايوجه كلامه
بس اخبرك هلفرح باجر ندامه
ولا تظن هذا العرش دايم مقامه
باچر انته اوياه حطب نار القيامه

وبرغم گيد الحديد
عادت الطف من جديد

ــــــــــــــــــــــــــــــــــــــ

يا يزيد وتبقه الي ابهاي الوطيه
جنه واطبها ابسلام الرافضيه
بيها مدفونه العقيله الهاشميه
صوغه من راعي العلم منطيها اليه

بالقصر بس رفعت ايد
عادت الطف من جديد

ــــــــــــــــــــــــــــــــــــــ

يا يزيد وبالخرابه البيها بتنه
مرقد ايضاهي الشمس لرقيه بتنه
بيها نگضي الحاجه للشيعه الأجتنه
يا يزيد وماكو اثر للحاربتنه

اي وحك راس الشهيد
عادت الطف من جديد

ــــــــــــــــــــــــــــــــــــــ

سيد علي عبدالزهره الناجي

گالو عليه المرض مأخذ صحته
گلبــــو الشام الليله هــو وعمته
:::::
گالو اعليه المرض خلص حياته
الدنيا يگلبها اذا ينكـــــت عباته
هواي ما ينعدن ابدن معجزاته
وحده منهن كافل اصبح يم خواته
الدين كله انشال ندري ابخته
:::::
صارت الخطبه مثل نص القصيده
عركة الطف عادت بصوره جديده
الشام واهل الشام سواهم عبيده
چنه العباس كلمــــا يرفـــــِع ايده
الشام من طباها صارت سكته
::::::
ما مگيد بالسلاسل چــــــذبه هايه
شلون اسير ويمشي اشوفن بالبدايه
اليــوم كــــل الشام اخليه بالنهايه
هاي للعباس شوفــــــو بيدي رايه
شيخ العشيره وتنفرض سالفته
::::::
مـــــــن دخل ديوانهم شيخ وفراضه
چنه بيرغ عالــــــي وبنص العــراضه
جيت مو جيت سبي جيت انتفاضه
احنه وي الباطل شلــــــون انتراضه
اليوم امحي الشام كل طايفته
:::::
عندي ثار وياكـــــم وجيت انه ارده
خل يجي يگابلني كلمن سيفه عنده
اليوم كل واحد احط صطره اعله خده
چنه العباس هــــــد محـــــد يرده
الماي ليحط راسه يم السده
::::::
علي جبار الكعبي
الفاتحه لوالدي

قصيدة للسيدة زينب ع.

هيبة ابوهه من مشت بالسبي. بت علي
چنهه ابو فاضل وبلسان النبي. بت علي
عباس صاح اعله الرمح. زينب
منج ثلث تنعام يازينب.

بت علي. بت علي
......

بچفهه عكازة الزهره من مشت
محزمه براية العباس الگمر
ولامعبره الدنيا گله ولاتهم
تمشي وي الضعن چن ماي بنهر

تمشي مرفوعه الراس. حيلهه من العباس. مهيوبه عمة الساده
عالرمح من يدعي حسين. زينب تجاوب آمين. گبال الشمر بعناده

يا اية الله تمشي ويه الضعن. ياضوه
لأيتام اخوهه صارتلهم وطن. والهوه

من الجنه صاحت فاطمه. زينب
منچ ثلث تنعام يازينب.

بت علي. بت علي.

.......

خيوط شيلتهه من خيوط الشمس
عيون كلمن صد عليهه تنعمي
داست اعله الجيش ودروب اليسر
مثل عباس ويدوس العلكمي

زينب مخوفه الليل. زينب توزع حيل. لايتامهه التعبانه
بالكوفه من طبت سوك. سفيره صعدت عالنوگ. بت فاطمه السلطانه

لا گالهه الله السوط لاح المتن. لا صعب
ملكين فوك چتافهه وما اظن. تنضرب

خدام فوگ چتافهه زينب
منچ ثلث تنعام يا زينب

بت علي. بت علي.

......
چان اخوهه حسين كاشخله برمح
دموعهه شذرات ظلت هامله
الدمعه من زينب اذا طاحت تصير
در حسيني طشت بكل كربله

بحبل ويه الايتام. سبحه راحو للشام. جن سبحة امهه الزهره
خطواتهه هيل وماي. زينب للايتام فياي. اميره مو متيسره

خضرت خطوات السبي شكد خدم. والزلم
ام عون تأمر واحنه چلمة نعم. والنعِم

بعين الله كل الصار يازينب
منچ ثلث تنعام يازينب

بت علي. بت علي.

.......

ابو فاضل عالرمح چان الحرس
جاء نصر الله يقره اعله الرمح
لو وصلتي الشام يابت حيدره
اكتمل يا ام عون وياچ الفتح

عباس ابو راس الحار. من تزعل اعليهه اندار. ويصيح ياهو وياهه
والزعّل العلويات . من نظرة الكافل مات
طول الدرب باراهه

چفج العالي وعله عناد الحبل. ياكفو
تصيرين انتي فياي فوك الهزل. لو دفو

ولا اسمع اني تنسبي زينب
منچ ثلث تنعام يازينب

بت علي. بت علي

.....

اعتذار من الخدم للسيده
وحدج بالشام والموقف صعب
الدنيا هاي ادوار تبدي وتنتهي
احنه دم ولازم يرد للگلب

مو بالكبر چفنج نام. انتي بكلوب الخدم
نرفعلچ احنه الرايه
كفيتي والله يا ام عون .يعادوچ بس ميكدرون. للحك بقيتي حچايه

الباقي حسبة شام بس تنتهي. غربتچ
بالجنه عشره هناك من تبتدي. لخوتج

ويه الذين امنو. زينب
منج ثلث تنعام يازينب.

بت علي. بت علي.

.........

نسألكم الدعاء
حسين صادق العقابي

معانات .الامام السجاد في درب السبي .
...................................


وسط عيوني . شايل طف كربله.
اقسه جروحي. من سبّي العايله.

بالطف .جرحي موسهل .
يمشن .عماتي بحبل.

اقسه جروحي من سبي العايله

...............................................

على مر الزمن شايل مصيبة كربله بعيني.
بنومي ويقضتي يحضر الف موقف يأذيني.
كلما ارتوي من الماي نار بكَلبي تجويني

عبرتي ..وحسرتي يرافكَهن حزن
يروحي . بجروحي .اثر سوط المتن

كل ايامي . عايش درب السبي.
فيض اهمومي .من تل الزينبي .

يجرح . موضوع الهزل .
يمشن... عماتي بحبل.

..............................................

يضل طول العمر عايش جرح ماينسه شكبره.
من واريت ابوي حسين لكَيت اضلوعه مطشّره.
شفت بعيوني أثر حافر طالع من جهة ظهره.

بخشوعي . ودموعي . مسحت اكبر جرح.
جمعته . وحظنته وصحت يل منذبح..

شفت اوصاله . بيهه اثار الضمه
صوت آهاتي.. صار بسابع سمه


قصة . راسه المنفصل .
يمشن... عماتي بحبل.

..........................................

على اجروحي اذا اسولف غزيره وتنحسب كوه.
الجارحني السبي والسوط ذاك بعمتي اشسوه.
ي مشانه الزمن وي ناس والله احجايه ماتسوه..

بعداوه .وقساوه .. يضربون الحرم.
اعاين . رهاين . .ونه بروحي الألم.


والهاظمني. . من تعثر عمتي.
تنزل جمره. .فوك الخد دمعتي.

يارب. ...ياحق . ياعدل
يمشن... عماتي بهّزل..


........................................

بهوان الدنيه والازمان تصعد عمتي الهزله.
بلا هودج عكب عباس أخوها التحتمي بضله.
بدمعها تسولف اويه الراس .يمكن يفزع تكَله.

نظرها ..بنظرها ..تحشم بالكفل.
جرحني .ذبحني..دمعها الي نزل

شفت ادموعه . باست كَاع الرمح.
واهتز غيره. .لعيون أخته السمح.

تقبل . ياعمي النفل.
يمشن... عماتي بهّزل


.........................................

دخلنه السوك والانظار .تلاحك بينه تجرحنه.
عيون الزين والموزين . بذاك الحال شافتنه.
نذل مايرحم الحادي .بعالي الصوت يشتمنه.
كلما ننجمع عالراس يجي بسوطه يباعدنه.

ولونه . وخذونه . يلاحكَنه النظر
مشينه .وعلينه . مطر صار الحجر.

بين الوادم . .يصعب حال المشن
وحده ابوحده. كَامن يتلاوذن.

واسمع .يزجرهن .نذل.
يمشن . عماتي بحبل .

..........................................

✍ ابو منتظر الحجامي.

#فزاعيات

بعد شيكفي روحـي ياهظم يانوح
كـون أبچي عليها الـحـد طلاع الـروح
الغريبه أخـت الغريب أبكربله مذبوح
العاري أعله الترايب بالشمس مطروح

(چا شنهي ظلتي.. وزينب أطب ديوان)

ألأميره وعفة الله شلون تصعد نوگ
هزيله ووسفه چفها بالحبل مشبوگ
أفــّـه كـتال اهلها بالنـياگ أيسوگ
وكل ديره يطب لازم يمر بالسوگ

(علوية الله ... شلون تدخل للسوگ)

وين أهل الحميه خل يجون أبساع
وخـل خيولهم تطوي الفله والگاع
بـالـغـربـه حـرمـهـم رادت  الـفـزاع
حگ أهل الشيم مايوم راح وضاع

(ماهية عاده... وتنسبي ألكم نسوان)

أجت كل القبايل عالظعن من فات
خـذو نـسوانهم مـابقن مـسبيات
البقن نسوان هاشم فرجه للشمات
خــدر الله البقن بـالظعن علويات

(بس العلاوي.... مـا نغر ليهن حيد)

هظيمه ياأل هاشم عالهظم تبطون
غريبه أبينهم ياوسفه تبقه أم عون
گبل مو چنتو گبل الحيهم تفزعون
چا شنهي السده وفوگ الرمح تبقون

(صعدت الغيره.. وروسهم دخنت غيظ)

الظعن للشام طب وصحت أخ الشام
صحت الله ولحد صدگ مدري أحلام
بي مسبيه زينب هــاي  والله أيـام
من عگب الخيم صعبه بخرابه تنام

(الله ولحد...... كـون أمـوت ولا هـاي)

✍️حسين حمدان الدلفي

[[القصيده گعديه ]]
>>>>>>>>>>>>>>>>>>>>>>>>>

يالتسأل  علينه  الرافضيه
عن أبً وجد هاي القضيه
هناك الما يضيعون
خدام الزجيه
*******
بهااليالي اتشوف موقف هذا اليحب الزچيه
تدري   اليواليهه   باچر    فايز   ابيوم   المنيه
الما يحب الزهره خاسر   عايش انواع
الرزيه

بگلبه تلگه اشگد دغش
احقوق ياكلهه  ونهش
حقد بس گلبه  انفرش

يعتبر من  جيش  اميه

يالتبغض علي تاليها  محنه
أيس    لا تفكر  بيها   جنه

بس همه اليفوزون
خدام الزجيه
*******
كلمن  يبين  أصالة   طيبه  والمنبع  يفاخر
ولا يصير ابوجه ثاني ثوبه باصناف المظاهر
ينعرف صوت الحقيقه عايش ،ابحيله ويناظر

بس حسد  گلبه  امتله
شوف  وضعك   عدّله
الغيبه  عندك   مشكله

لازم اتصحي  الضماير

حاذر بالزلل وحفظ لسانك
باچر هوه حصنك هوه امانك

كلهم ما يقصرون
خدام الزجيه
*******
ناس تعميهه المطامع.....وبالسان الغيبه حاضر
اشما تكله اتوب احذر... كالك خلهه اعله باجر
بالغرور اشكد يسولف.....ناصح  وكلش  مثابر

يبنادم  احذر حالتك
لا   لا   تغرك  دنيتك
تهوى وتطيح بزلتك

عوف مرحلة المفاخر

عيش  ابدنيتك عوف النميمه
محلاتك تره  الفطره السليمه

للجنه يطبون
خدام الزچيه
*******
باچر التوقيع  واضح  بي  ختم  من  الزچيه
يعيش بالدنيا بكرامه والعشك حامي الحميه
هذا  دستور  العقيده  لو  ردت نهج  القضيه

شوف كل سيره وعجب
ابحبهم   اتنول    الرتب
حب  علي  جوهر ذهب

حب علي هوه الهويه

باچر   بالحشر  تعرف  عقابك
لا تدور  ولاتلف حضر جوابك

بالمحشر  يضيئون
خدام الزجيه
*******
كلشي   بالدنيا  يغرك بيت  وموال  وصحاب
عوف عنوان  التفاخر  ونسه  مسألة  العتاب
گول بس حسين عندي هذا يامحلى الجواب

اتريد  تنجه  ابهل الامر
حسين بس هوه الذخر
هناك    يشفع   بالحشر

مبدأ الحق والثواب

يامحلى الخدامه ويعلى شانك
باچر    بالحشر   حاجز  مكانك

بالخدمه يوافون
خدام الزجيه
*******
تمت بعون الله تعالى الشاعر_يوسف_الفتلاوي

ميمر أنتظار الفرج.
........................


جبت العمر. . دمعه وصبر.
أحسب علامات. . أنتظر.

يا. حجة الله المحجوب. ياجبر كسر البضعه
.......................................

يا ..يوسف الزهره انتظارك لا وين..
يل عن صبرنه صبرك انت بسبعين.
بيك النوى أين استقرت .للحين.

في نينوى . . أم ذي طوى.
في اي ارضٍ ... يا ترى.

يم ضلع صابه البسمار .لو يم صريع الدمعه .
......................................

يا..فجر يمته. اتحل غياهب ليلك.
يمته الفرج صبح. ومسه ادعيلك
كثر البجي يا سيدي هدّ حيلك.

تجري الدمع. .. دم عالضلع.
والكربلائك. . تنفجع.

تستعرض الطف والباب. ذاك الهظم شيجرعه.
.......................................

وينك .. يمن سر ( الاله ) بسرك
يا. أمنية كل شائق الينتظرك
يبن الاطايب يمته عيني اتنظرك

واسمع خبر. . بين البشر

رد. من غيابه ... المنتظر

من تصد عيني بعيناك. ثق ما تلمني الوسعه
.......................................

ياحجة الله بعيني راسم رسمك.
حتى ابمنامي اشفافي تلهج اسمك.
يوميه الف مره الدليل ايحشمك.

يمته الفرج.. يبن الحجج.
يا بلسم الكل.. المهج.

ناطر لقائك. مولاي وتوسلك كل جمعه.
......................................

كل جمعه اجددلك مشاعر نوحي
واقرالك الندبه. بلفيف اجروحي.
يالشوفتك صارت اعز من روحي.

يوم الهنه. . ويوم المنه.
لو نلتقي... بهاي السنه

لجلك اجيبنهه الروح واعلگهه مثل الشمعه.
...............................

خوفي العمر يخلص واموت متاني.
وبدرب شوگ الملگه ما تلگاني.
ذاك الوكت يالغالي لا. تنساني.

يل شوگي الك. . مابدلك.
حدر الترب. . وتأملك.

يالمهدي احلفُك بحسين. منك اريد الفزعه.
..................................

✍️ أبو منتظر الحجامي. 2025

الامام السجاد. وطف الاحزان
.........................................


كلما شفت عمّتي وخواتي.
تــاخذني للطف ذكرياتي.

واستعرض بعيني الصور.
نار.. وخيم رايه ونحــر.

ذكرياتي ... ذكرياتي.
.......................................

والله ياعالم مصيبه .جرح متغطي بجرح.
موت وايتام وحراير.ليل بعيون الصبح.
ثاكلات وگـاع حمره .انصبغت بدم الذبح.
ذكريات بجف يتيمه. امدلله تعاتب رمح.

.ترس النظر دم الضحايه
يمشن خواتي ابلا حمايه

لا من شمس لا من گمر.
نـار . وخيم. رايه ونحــــر

ذكرياتي. . ذكرياتي
.......................................

لو شفت عمتي وخواتي .انحني ودمعي يصب.
تآخذ الاحزان روحي .وينلجم جرح الكَلب.
ذكرياتي اتعيش بيه .والله انساهن صعب.
عالغيور.هواي كلفه اخته يمه وتنضرب.

يضربهه سلاب التراجي
وتحشم أخوهه بالبواجي

يعثر جدم بين الحفر.
نار..وخيم .رايه ونحر.

ذكرياتي. . ذكرياتي
.........................................

عاشت بروحي الهضيمه .والمدامع دم جرّن
وانه معلول وخواتي .عل جمر يتراكضن.
حيل مابيه واشاكف رغم اسمعهن بجن
ياخلك ذيج المواقف .والله لا ما ينسّن.

اسمع شمر يجرح كلامه.
ويلـــــوع بسوطه اليتامه.

واشكم طفل شارد عثر.
نار..وخيم .رايه ونحـر.

ذكرياتي. . ذكرياتي.
.........................................

مانسيت الصار بيهن .يشهد الله بهالعمر.
بوجه كل علويه اقره. هضم ياناس شكثر.
مانسيت اختي رقيه .ولا كَلبهه المنكسر.
ولا سكينه ولا دمعهه الفايض بكلمة عذر.

انه الدفنت اهلي بأديه.
عشت واعيش الغاضريه.

من كربله شابع قهر.
نار..وخيم .رايه ونحر.

ذكرياتي. . ذكرياتي.
........................................

بين ركضات العقيله. وصعدت التل والخيم.
ذبلت الروح بصبرهه وعاشت اسنين الالم.
دمعت ام عون العزيزه .ياجرح بيهه أنرسم
يا ضلع مكسور جابت. عالشريعه وعالعلم.


كلما نزل دمع العقيله
يتعاتب الخل وي خليله

عافت كَمر يم النهر.
نار..وخيم .رايه ونحر.

ذكرياتي. . ذكرياتي.
.........................................

✍ أبو منتظر الحجامي.

كلشي انتهى.. والطف خلص منايه
بس بالحزن .. قد حانت البدايه
صح مات الحسين
لكن حيا الدين

———
كلشي ويه الموت تبـــدي بي نـهايـات
وتنـــتـهي قـصــــة الوادم والحكايات
حسين ماخلصت حياته ساعة المات
استشهد او انطانا زود ابكل الاوقات

كلشي اختلف.. من واقعة محِرم
شفنه انتصر.. عالسيف منحر ودم
صح مات الحسين
لكن حيا الدين
~
الفتح گلبه بكربله ورحب للسهام
مات لكن دمه احيا روح الاسلام
رغم ماحرگوله بالطف كل الإخيام
للحسين ارتفعت بكل گاع الاعلام

بدمه كتب.. اصدق وهم رساله
الدين انحفظ .. والينه من خلاله
صح مات الحسين
لكن حيا الدين
~
عدنه شاهد عالنصر باقي الى الآن
حسين حاضر والعدو في كلمة الكان
ولذلك دين جده ابكل الاوطان
مثل راسه اعله الرمح ضل عالي الآذان

دم منحره.. سال وكتبله آيه
من كربله .. حيه على الولايه
صح مات الحسين
لكن حيا الدين
~
هواي وادم ماتت ومحد ذكرها
مثل موت الورده من يذهب عطرها
شفنه بس ثوره بقه لليوم اثرها
شگد عظيمه وباقي ليهسه فكرها

ثورة شرف .. أبن النبي صنعها
وابكل وكت .. مايختلف وضعها

صح مات الحسين
لكن حيا الدين
~
يبقى يوم حسين خالد خلده الله
واحنه نهتف واحسيناً واحسيناه
اقرب النه امن الاهل مولانا شفناه
عايش اويانه وأبد مايوم ننساه

بوسط الگلب : ثابت يضل مكانه
طول العمر : عايش يضل اويانه
صح مات الحسين
لكن حيا الدين
~
حيدر بشار الدراجي

الحسن عامر مضيفه

عله بابه شريفه

الكصدها ماتعيفه

///////////

يل عشتي السلب والذبح والدم

ومشيتي ميسره ومكبعه ابهم

حسرتج للنهر من المخيم

تصيحين العطش الحكلي ياعم

نايم عل شريعه
وجفوفه الكطيعه
وبالخيمه الفجيعه

/////////////////

زينب من تون ونها اعله الحسين

وانت ياشريفه هم تونين

عله المنكسر ضلعه شافته العين

انذبح ونصيح عمه نشرد منين

المخيم توج ناره
ومن عكبه يساره
تريد اتضل جواره


/////////////

يل عندج جرح ومطيبه الجروح

بخدج دمعه وتسكتين الينوح

اليجي يمج شريفه وهايمه الروح

سهم الهم خطاها وبعد ميلوح

نسميج الطبيبه
مثل امنه الحبيبه
من عدنه قريبه

///////////////
جرحج ياشريفه رمح كبره

تعلمتي الصبر رافكتي حره

رعت بالعايله والكلب جمره

من زينب اخذتي منها عبره

رغم هاي المصيبه
من ظلت غريبه
بس صارت عحيبه

///////////

يسيره ياشريفه
رحتي للشام..

وتحملتي شكثر لوعات والام

وجروحج تفز ملجومه متنام

كرامه انطاج ربج عندج وسام..

من بابج يدكها
يدري الحاجه عدها
ابدن ماتردها

////////////////

بالعشرين عاشور المنيه

انذبحتي ياشريفه من سبيه

جروح هواي من الغاضريه

سهام حسين احسهن كلها بيه

وتكولين ابذبحته
ذباحه لمحته
ابداله اذبحني صحته

//////////////

نسالكم الدعاء
خادم الحسين
احمد الطيب الحلي

بطلب من احد الاخوه… .طريقه بحرانيه



زينب ابدا (ابدن )بالخيم ماغافيه
وحيف زينب تفر تركض حافيه
////////////
كون زينب يمها عباس الكمر

لٌچِن العباس نايم عالنهر
////////////

وين ابو فاضل يجي لخيامها

تضل زينب حايره بايتامها
//////////

زينب ادوس اعله جمر الخيمه

مخدرة حيدر تبات ابهيمه
//////////

اتصيح وينك ياكمرنه لاتغيب

هذا اخوك حسين عالغبره سليب
/////////////

كون حاظر يا ابن حيدر علي

حركوا اخيامي واضل ابلا ولي

///////////

اركض ابين الخيم والمشرعه

شفت ولياني يحيف امكطعه

//////////


حرت مابين الخيم والحومه

وشفت سلاب ويسلب اهدومه

//////////

وضل اخوي حسين عاري عالثره

مسلب وجثِته وسفه اموذره

///////////

خد اخوي حسين نايم عالتراب

ومايمر امصاب يشبه هالمصاب

////////////
شوف زينبكم تِوج اخيامها

ولوعتها وغربتها ايّامها

//////////////

وشفت سهم امثله طر الچبد

اتوجه اخوي وراد للخيمه يرد
//////////

كون آنه ابداله صوبني السهم
ايرد ابو اليمه سالم للخيم

///////////////

اضل وحدي اشبول هاشم وينها

كون زينب عميه صارت عينها

////////////

كون عميه وماشفت دمكم جره

امدده الشبان نومه اعله الثره

//////////

صرت ميته ابكربله ابلايه دفن

وصرت مو ام عون اسمي ام الحزن

//////////////

وبعد اصعبهن وجمراتي تِشب

الشام اخ الشام والسوكه اطب

/////////////

ناس تعزف ناس تشمر بالحجار

وانه اصيحن ياعلي حامي الجار

////////////

نسألكم الدعاء
احمد الطيب الحلي

يالفايض حنانچ عالمدينه… وجفوفچ حنينه

وخيرچ ياشريفه ايهل علينه

/////////////

يابت الحسن والوالد العنوان… .
والعالم يشوفه

إبمضيفه مايخلي إوشَلَّع البيبان… ..
حته اطب ضيوفه

وبسمچ ياشريفه عامر الديوان… .
وبيه ريحة چفوفه

فواحه وزچيه… .من ابن الزچيه

*موجود الحسن ويهلي بينه… وچفوفچ حنينه*

*خيرچ ياشريفه ايهل علينه*

/////////////////

يالبابچ ابد مايرد كل كاصد… ..
ماخيبله احد


كل معنه الكرم وياچ متوارد… .
لكن انتي الاجود


اليجي جمره الگلب يمچ يرد بارد… ..
والجمرات تبرد

سموچ الطبيبه… .وللكل الحبيبه

*تفزعيله النخاچ ايريد عونه… وچفوفچ حنينه*

*خيرچ ياشريفه يهل علينه*

//////////////////

رافكتي العقيله ورحتي مسبيه… ..
وبگلبچ حسرتچ

وي زينب شريفه ابجمره مچويه… ..
ماتطفه جمرتچ

صحتي احبال توجع حزت ايديه…..
من كلبچ عَبرتچ

ودم تجري عيونچ… ماتنشف جفونچ

*متنه بالسبي ولا ما حيينه… وچفوفچ حنينه*

*خيرچ ياشريفه ايهل علينه*

///////////////

يالچفچ ابچفها وزينب امحدبه… .
ويالوعه المثلها

وبدرب السبي ماماشيه وصعبه… .
ومخليه الكفلها


راحت والعيون اعله النهر تربه… .
لاچن ما وصلها

ضل اعله الشريعه… وجفوفه كطيعه

*الكافل مايرد واحنه انولينه… .وچفوفچ حنينه*

*خيرچ ياشريفه ايهل علينه…*

////////////////

يادرب السبي المافاركه البالچ…..
محتاره وي زينب

ويفسر الصخر بت الحسن حالچ….
يوم الضعن غرب

ابد مافاركچ كل عمرچ اكبالچ… ..
حسين ابدم تخضب

عطشان وتكطع… .عالغبره تِوَزع

*وصل يم الخيم لوعه اونينه… .وچفوفچ حنينه*

*خيرچ ياشريفه ايهل علينه*

/////////////////

نسالكم الدعاء
احمد الطيب الحلي

١٩ محرم ١٤٤٧
15 / 7/2025
الثلاثاء

يحسين اه يحسين اه يا خويه

جيتك يبعد الما مغمضات
فوگ الرمل چن رايد تبات
أگعد يخويه العندي صعبات
كلفات كلهن والله كلفات

يحسين اه يحسين اه يا خويه

منين ابدي لمن طحت علگاع
بلخيمه واسمع كسر الاضلاع
لمن تصيح وماكو فزاع
تفرهدت مني حسين شبساع

يحسين اه يحسين اه يا خويه

راس برمح يا خويه شفناك
واطفال تصرخ ها رجع ذاك
مذبوح يحسين وندبناك
بحماك كلهه تصيح بحماك

يحسين اه يحسين اه يا خويه

صارت بواچي وخنگت انفاس
واطفال تبچي اتصيح عباس
نار بخيمنه وهجمت الناس
الما ينضرب بالخيل ينداس

يحسين اه يحسين اه يا خويه

ياخذنه ضرب السوط للماي
ها هذا چف الراح ما جاي
ما باقي من الكافل شواي
ويه الركض گمت الطم اچلاي

يحسين اه يحسين اه يا خويه

ياهو اليرد الحافر الهاد
صار السحگ بالطايح عناد
حشمنه بيكم ها يلولاد
ردو الخيمكم صارن رماد

يحسين اه يحسين اه يا خويه

ثاري الطفوف اتخلص الاعيون
تاخذ الحيل اتهد المتون
جابو حبلهم وين يردون ؟؟
وبچفوفنه گامو يشدون

يحسين اه يحسين اه يا خويه



كلمات الخادم/ رعد الفريجي
ثوابها الى روح والدتي

🔴🔴 يمحمد و يا عون 🔴🔴

بالطف ردتكم عون .. يمحمَّد او يا عون
لو ظل وحيد احسين .. لسيِّدكم اتفزعون
ــــــــــــــــــــــــــــــــــــــــــــــ
يا عون امّك او أريدك .. لخالك تفدي دم وريدك
المثلك ما ينراد أحزمه .. و اشِدله عزمه
و إنته ابن إخت عبَّاس
و إنته ابن إخت عبَّاس

يگلها لا تحزميني يا يُمه لنصُر خالي
و آنه العيِد عندي الموت لا بالموت ما بالي
من اثبِت عالِـكحيله فِنَّه اليثبت اگبالي

عالمنيَّه يغلي دم وريدي لا تُوْصيني
و اعله خالي طبعي كِلّه طالع مو ثلثيني

او حگْ اللّي إلچْ دَگْ بيده الصدر .. او حگ چفوفه
سيل الهاشمي لو فاض او طفح .. من يرُوفه ؟
احسين ابغربته لحد آخر نَفَسْ .. ما أعوفه

گالت كفو اْو نعْمين .. حچْيَك يگر العین
أكبر شرف يا عون .. دمّك فِده لحسين

ــــــــــــــــــــــــــــــــــــــــــــــــــــــــــــــــــــــــــــــــ
او حين الكمِّلَت بَچِيها .. اوْيه امحمَّد بِدَت حَچِيها
گالته الشهاده گصدي .. ياثاني وِلدي
يا مَعْصبي البالرَّاسْ
يا مَعْصبي البالرَّاسْ

محمَّد گلها يا يُمَّه گرّي العين و ارتاحي
ابسوگ الحرب زارع موت او روس أحصِد اِبأرباحي
حُوْم اْو أفني كل جيمه اعْليها أمن اصفِگ اجناحي

خالـي ما إله ناصر عليمن ينظَم حيلي
يُمَّه رايح آنه للشهاده بس ادْعيلـي

وي ذاك السَّلف جسَّام اْو علي.. ابدربي ماضي
او لو جسمي انوذَر ما بين القَنا .. و المواضي
مِيَّةْ موته لو ياخذني الأجل .. ابموتي راضي

زينب رِضَت و اهناك .. گالت : وفيت ارباك
يبني حَلال اعْليك .. دَرْ صدري الغذّاك
ــــــــــــــــــــــــــــــــــــــــــــــــــــــــــــــــــــــــــــــــ


هاذي چلمتي الأخيره .. كلمن معتني لمصيره
يوْلادي انعرف دربكم .. و أنا عگبكم
تسبيني گوم ارجاس
تسبيني گوم ارجاس

أمُر اعْله الجثث باچر سبيَّه او يفجع المشَهد
وانتو اعْله الثره ابلا روس امدَّد كتره اِمدّد
مدري ياهو منكم عون او ياهو منكم امحمَّد

او چنّه اخويه نايم ابكتركم وأنتو ابكتره
او دم نحركم اختلط مَسيله وي دم نحره

ريت ابهالفِده دم نحري جره .. ويَّه دمكم
او همكم يالولِد يفجعني نَعم .. و آنه اُمكم
او لو شفْت الأخو جسمه ابلا چفن .. أنسه همكم

اعْليكم عِمَت لعيون .. يالبالثره اتنامون
بس لمصاب احسين .. كل المُصاب ايهون
ـــــــــــ
ميرزا عادل أشكناني

((ليش تركض))


أديـنه أمچـتفه ومانگدر انكض
على هونك يحادي ليش تركض
عليمن كاض رايه
هوه أحنه سبايه ... ليش تركض
""""""""""""""""""""""""""""""""""""""""""""""""'''""""

مــن فـجر الله گمنه
وصـــلـــينه بحـــزنه
وعـــالــهزله صـعدنه
وضل يحچي دمعنه

وظل حتى أسمي يبچي من كثر مآ
صاحو ياسبيه
أَرَكـــب هاي تــــوگع هـــــــاي ويلاه
وشلون برقيه
هـــــزلّ وبــــــــلا هـــــوادج آه يا آه
حبل صار بأديه

ســــارو بـيـنـه بـــالويــلات والطگ
صرنه أحنه الخوارج همه أهل حگ
مشينه أبلا درايه
هوه أحـنه سبايه ... ليش تركض
""""""""""""""""""""""""""""""""""""""""""""""""'''""""

العــثره أتــعيــش بيـنه
الــحبــل شــابـگ أدينه
الدمع بالهمسه يحسين
بــس گـــولوا أشجنينه

زاد الـطــگ علــينه والشتـم زاد
وأتغطه بسكوتي
مــو يـمي النشامه وذيچ الاولاد
تمنيت آنه موتي
وكل ساعه يسبني ودمعي ينعاد
ومخلصه سلوتي

أخوتي أمذبحه ونحور حمره
وأنه مسبيه نص الروح جمره
هاي شلونه هايه
هوه أحنه سبايه ... ليش تركض
""""""""""""""""""""""""""""""""""""""""""""""""'''""""

غــربه وليــل هندس
وأنه بدموعي أهمس
بــس يسـمعني جلاد
يضل بطـفالي يرفس

أتــوسد حـبل وأغفه آنه بهداي
وأفز فزتّ حـمامه
خــاف اتروح طـفله أسهر هواي
عيني أعله اليتامه
بعيني أتبع اليحرس رايح وجاي
مــابــيـهـم شهامه

هاي أتصـيح عمه وتدمع العين
ذيچ اتصيح عمه وين الحسين
وراسي انشدهّ رايه
هــوه أحــنه سبايه ... ليش تركض
""""""""""""""""""""""""""""""""""""""""""""""""'''""""

بــعــيد الــشــام عني
دربــــه الــــزاد ونــي
هضيمه السوط وياي
النبي مو جـدي چني

زيـنـب آنــه هـيچ إيـصير چاليش
أنه بـت الـــرساله
سبيه أمشي بحبل وبوليةّ الجيش
الزمن هذا شجاله
الخاطر أسمي هـاي الوادم اتعيش
كدري ايموت حاله

وبــاب الـــقصر تانينه ساعات
واهل الشام كلهم ناس شمات
ألف وسفه النهايه
هوه أحــنه سبايه ... ليش تركض

عبد زينب
محمد الابراهيمي

((صفوف القافله))


وَنّضما قلبي في صفوف القافله
فَصـرتُ خـــداماً مُطـــيع العائله
لا ينتـــهيّ الحبِ بِتلّــكَ المسئله
والعيــــــنُ تجريّ للنساءَ الثـاكله

يجــــرني الطيش
وأفـــزع للعــــزيه
وتصير من الجرح
روحي اعــله اديه
وندم يترسني گلبي أعله السبيه
ندم من جدمي حد عيني
ندم لـــــــوشالةّ سنــــيني
وألطم عالصدر صبح ومسيه

حبيب (الله) حسينآ ...
""""""""""""""""""""""""""""""""""""""""""""""""'''""""

تبكيّ الوحوشُ والطيورَ الطائره
والصمِ يبــــكي للعيـــون الغائره
شلواً صـــــريعاً والنساء الحائره
والخيلَ لاتــدري بِعميٌ ســــائره

يحـــــافر ليش
وبحيلك تلچمه
تطشـــــر بــــي
چا ياهو اليلمه
بعد لا وين ماكو شويه رحمه
يحافر ضيعت كلشي
كافي تسحگ وتمشي
يحافر ويـــن چا زينب تشمه

حبيب (الله) حسينآ ...
""""""""""""""""""""""""""""""""""""""""""""""""'''""""

مـــن تِلكَ هيه والكفوف الشابكه
تَعّدو وتَعّدو فـــي طريقِ المعركه
والليلُ يغشـــــى في سباةِ الآفكه
أذ هيــــه زينب للحـــسينً سالكه

تـــــزيل احجار
وأسهام المرامي
وتگـــــله حسين
فدواتك خـيامي
وضامي تصيح ريت الكون ضامي
يبن امي الجرح يدي
شفتك ونفطر چبدي
اجيتك يالحمه من دون حامي

حبيب (الله) حسينآ ...

""""""""""""""""""""""""""""""""""""""""""""""""'''""""

أنتَ الحُســينٌ يـاتُرى أمّ غــــيرهُ
أنتَ ابنُ امـــي والدما في نحرهُ
تجري الخيولُ ويلتي في صدرهُ
ياليتَ عمـــري قد خلا من عمرهُ

يعشگ الـــــروح
بالگوه وعرفــتك
يغــــــات العـــين
وبنحــرك دمعتك
شلون تصير أگلك گوم لختك
حالك يجرح أفادي
باچر والشمر حادي
فلت وأنتهت بيـــــنه عشرتك

حبيب (الله) حسينآ ...

عبد زينب
محمد الابراهيمي

‏وين اخوتي انا زينب لليسر ودوني
‏واليتامه بدمع يلهب عنكم ينشدوني
‏ابغربتي واحزاني وفاگده خواني
‏لليسر ودوني

‏
‏شوفو اختكم والحرم مچتوفه الايدين
‏ويمشن ومـا يعـرفن ويـن الدرب ويـن
‏عـالـرمـاح اشـلون اصـد وتـصبر العين
‏وبالشمس والـحـر تغير وجـه الحسين
‏الرمح عالي بعد روحي شلون اذا فييلك
‏وانا اگله الچم جروحي لاتلچمه ادخيلك
‏وانه وروحي نعاني وفاگده خواني
‏لليسر ودوني

‏
‏رحـت واليـبرون الـيـه مـوش خـوان
‏واليمشون الضـعـن يبن امـي عـدوان
‏انشوف والينه عليل وحـيله خـلصان
‏وخـايـفـه نـسـوان تـتـستر ابـنـسوان
‏وانا گوه اجدامي تمشي لاتشاهد حالي
‏من بعدكم ضاع كلشي والهضم چـتـالي
‏ماطفت نيراني وفاگده خواني
‏لليسر ودوني

‏
‏شكثر چـنت اتمنه كون اعيوني متشوف
‏شلي بعيوني وعلي روس اخوتي اتطوف
‏وناس شـالت روسـكم مـاعـدهـا مـعروف
‏احـجـار تـرمـي المـا تلـگتـكم بـالاسيوف
‏هذا راسه الما وصلتوا من عدل يم داره
‏جبل شامخ يمه اسكتوا مـاتهزه احـجاره
‏هيبته عنواني وفاگده خواني
‏لليسر ودوني

‏
‏المن اشكي الناس غربه وحالي ياحال
‏هـايه اول مـره امـشي ابـلايـه كـفـال
‏معاشره الونه واديه مـعـاشره احـبال
‏مـال حملي وياهـو اگلله الحـمل مال
‏درت عيني للشريعه والـدمـع هـليته
‏خاف چفينه الگطيعه تأخره من انخيته
‏اندب وماجاني وفاگده خواني
‏لليسر ودوني

‏
‏يعـني ائايس لا اخـواني ولا عـشـيره
‏وحـايـره الـيـوم الوجـه لاويــن اديـره
‏هـس مـسـبـيـه الگـبـل چـانت امـيـره
‏اعـيـون صـلـفـه وناس مـامـرتـها غيره
‏ناس تنظر لي واشـوفـن تبتسم شماتي
‏حيره خويه شراح اگولن سولفن دمعاتي
‏چم كلام اذاني وفاگده خواني
‏لليسر ودوني

‏
‏اه يروحي صـار بـيـه المـاجرى وصـار
‏حيلي يخلص عيني من اتصد عـالزغار
‏تاركـه اچفوق ال امـيـه ابـخدهـم اثار
‏تـلاگـت اسيـاط وحـجـر عالچوته النار
‏من حقدهم من ضلهم خاطر النوگ انكسر
‏الشام كله وكل جمعهم ويانه متلگي ابحجر
‏حزت ابوجداني وفاگده خواني
‏لليسر ودوني

‏
‏
‏هـاني ناصـر السعيدي
‏

(( #خامس_البكائين ))    الامام السجاد ع
……………………………………………………………

يا خـامسَ البكّائين     .. يا سيدي
تَجري فراتٌ في العين .. ياسيدي
شابً بِكَ الشيبٌ إعتلى
مِما جَرى في كربَلا

……………………………………………………………


كل يومك اتخلصه ابچي . جفنك و دوم امنگع
حتى ابمنامك يا علي . امغمض وعينك تدمع
ماتلحگ وتمسح دمع . ظل يجري مثل المنبع
ايبلل الشيب ابلحيتك . ومنها اعل ثوبك يوگع

معَ الطعامِ الدَمعات .. تمزِجُها
و الحسرةُ بالآهات   .. تمزِجُها
الاكلُ بالدمعِ إصطلى
مِما جَرى في كربَلا

……………………………………………………………


المهدي بالطف ما حضر . ويبچي ابدمه اعالصاير
جا دمعك الينزل شنو . يل شفت ضيم العاشر
محفور خدك اعتقد . بركان دمعك فاير
ما فارگ آذانك ابد . اصوات سحگ الحافر

في القلبِ تَبكي النبضات .. عَلى النَحر
والخيلُ داست مَرات      .. على النَحر
جسمٌ تطايرَ في الفَلا
مِما جَرى في كَربلا

……………………………………………………………


لو عمر نوح اصبح الك . دمعك يظل بي دايم
ولو تنحب ابليل وصبح  . ما ضن يلومك لايم
شيلوم وامتار البعد  . عالترب عودك نايم
امغطياته الارماح  ونبل . ما ظل شبر بي سالم

قد صارَ رأسٌ منحور  .. فوقَ الثرى
اصبعُ أبيكَ المبتور   .. فوقَ الثرى
قلبُكَ آهاتُ أمتلى
مِما جَرى في كَربلا

……………………………………………………………


عدنه الي يدفن والده . الخال و العم يمه
الجيران وي كل السلف . دائره اعليه ملتمه
وانت ابحصيره الوحدك . امطشر ابوك اتلمّه
گلبك تعلگ بالنحر . خاف التراب ايلچمه

مِن نحرهِ صاح الصوت .. طفلي معي
وفي الحياةِ وَ المَوت   .. طفلي معي
طفلٌ إلى القبرِ تلا
مِما جَرى في كَربلا

……………………………………………………………


انگول أنت ابن طه وعلي . والموت الكم عاده
جبتوها لو سم لو چتل . مو موت فوگ اوساده
لاچن يسلطان الحزن . عينك فلا معتاده
جدامك ابسوط الشمر . يضرب بنات الساده

هذا الذي يا سَجاد  .. تَبكي لهُ
بالحبلِ جرحٌ يزداد  .. تَبكي لهُ
قلبٌ وَ روحُ أشتعلا
مِما جَرى في كَربلا

……………………………………………………………


لذيچ الخرابه ارويحتك . ظلت عمر  مچويه
اعل اتراب گعدت عمتك . مسبيه مو علويه
ماتنسه اختك من غدت . فوگ الطبق محنيه
هم مثل ابوك واعتقد . كلش تحب ارقيه

محتارةٌ فيكَ الروح .. لَو يَسأَلك
عنها ابوكَ المذبوح  .. لَو يَسأَلك
صوتٌ من القبرِ عَلا
مِما جَرى في كربلا

……………………………………………………………
✍️ ( سيد خضر الزاملي )

شهاده الامام السجاد ع .
تقول الروايه . ما قُدمَ له طعام او شراب الا مزجه بدموع عيناه

……………………………………………………..

كل  شربة منك ياماي
وياهـا دمـعـة  عيـناي
دمـعاتي مـن دم تنزل  و مـنحوره
تعرضلي من طف المصايب صوره

……………………………………………………… .

صـارت عشرتي اويالدمع • مـاي و ينام ابجرفه
وانصبت مهد الهل الدمع • فوگ اعالخدي ويغفه
واليجري حرگه اعل الحرم •صعبه الادين اتنشفه
انگول الزلم برض الحـرب • كـلمن يروح الحتفه

هم سامع وفوگ النوگ
عماتي طـروهن سـوگ
فـروا حـرمنـه  البخـدر مـستـوره
تعرضلي من طف المصايب صوره

…………………………………………………………

كل وكت من يومي اليمر • تختلف بيه الدمعه
كـل صـبح اذكـر حـيرته  • ناصـر يريد و فـزعه
دمع الظهر يرسـم رمح • بي راس ابويه ايرفعه
تسحگني دمعات العصر • چن حافر ابنص ضلعه

واكثر دمع ماخذ حيل
مـن يجبل اعليه الليل
ليله اهدعـش كـل الحرم مذعوره
تعرضلي من طف المصايب صوره

…………………………………………………………

دمعاتي بالزاد اصبحن • صرخت طفل من جوعه
بالدرب مـن يـنظر اكـل • يبچي و تسـيل ادموعه
تـصّـدّق  الـناس ابـخـبز  •  لال النـبي المرفـوعه
رفضو رغم جـوع اشكثر • اعلينا العَطه ممنوعه

ناحل جسـمهم واضعاف
كل عظم وبجلده انشاف
اطـفال جـوعانه ابحـبل مـجروره
تعرضلي من طف المصايب صوره

………………………………………………………..

طعم العذب مالح صفه • دمعاتي طعمه اتغيره
بالطاسـه اشـوفن والـدي • انظر اشفاه منفطره
چـنّه و يگلـي ياعلـي • عـبد الله گـطـعوا نحره
اشرب وضم نص للطفل • وبحلگه ماي اتگطره

يابويه عبدالله احذاي
بعيونه ظل راسم ماي
مـن العـطـش ليهسه بيه احـروره
تعرضلي من طف المصايب صوره

…………………………………………………………..

صار الدمع معرض صور • عنوانه سبي العيله
ذبحتني صـورة عمتي • مچتوفه فوگ اهزيله
تشمر نفسها اعل لارض • لو طفل طاح اتشيله
تتلگه الاسـياط ابمـتن • تحـمي الرباب و ليله

و ابالـي ابـدن مـتروح
صورة رقيه امن اتنوح
ترچيه ماكـو و عل وجه مسطوره
تعرضلي من طف المصايب صوره

…………………………………………………… .

صفناتي مكسورة ظهر • والدمع كظ احزامه
اذكر علـي الاكـبر وذر • لمّينه جـسمه المامه
وابالي مذبوح العرس •جابوه يخط بجدامه
بعيوني نهـر من الدمع • للـما رواها اخـيامه

للماشرب گبل حسين
اخته وفداها ابچفين
للـهامـته  ابذاك العـمـد  مـفطـوره
تعرضلي من طف المصايب صوره

…………………………………………………………
✍️ ( سيد خضر الزاملي )

الامام علي بن الحسين زين العابدين عليه السلام

ما يكفيني النوح.
بگد مابية جروح
نار السم اهون من نار جروحي ونار الشام
٠٠٠٠٠٠٠٠٠٠٠
علي السجاد آنه المانشف دمعي
عله الشفته انذبح بعيوني وبسمعي
عله الراحت سبي ابچي واون ونعي
وظل الطم لحدما ينكسر ظلعي
ما بين الشمّات
كلهن مچتوفات
عمّاتي عله الهِزّل ويلي ومابين الظلاّم
٠٠٠٠٠٠٠٠٠٠٠
ما انلّام لو اكضي العمر انحب
محد شاف مثلي عله الهزل زينب
والاعظم مصيبه وافجع وأعجب
سبية ابمجلس يزيد النذل تنسب
شلون اهدأ ورتاح
سابيها الذبّاح
عمتي الماشافوها انشافت بس ما طخت هام
٠٠٠٠٠٠٠٠٠٠٠٠٠٠
مجتوف بسلاسل عالهزل اطلع
هذا مقدر ومكتوب ما اجزع
لچن هيهات للذل والظلم اركع
إنه السجاد للعز والعلم منبع
صح آنه تأذّيت
لكن ما ذلّيت
آنه المعصوم بلا حبي منقوص الاسلام
٠٠٠٠٠٠٠٠٠٠٠٠٠
السلاسل والجروح اهون علية هواي
من حچي الشماته البلمسيرة وياي
يأشرون عله زينب والجمر بحشاي
هاي المانظر واحد عليها هاي
شافوها عله النوگ
ومـرّوا بيها السوگ
تمنيت الموت ولا انظر بت حيدر تنضام
٠٠٠٠٠٠٠٠٠٠٠٠٠٠٠٠٠٠٠٠٠
كضيت سنين عمري بدمعة عيوني
حزين وآل اميه بكلشي ظلموني
انوح وما كفاهم حقد سمّوني
تفطّر گلبي بالسم حيل أذّوني
بعمري لآخر يوم
مهضوم ومظلوم
ما انسه شصار بعمّاتي وما انسه الآلام

سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠