للسبي اتهيئن ... وبعباتي أحتمن
أنه كفيلجّن صرت
من بعد عباس
.....1.....
يله يل الفواطم ... ودعن الهواشم ...
رحلت سبينه ابتدت
ريضن ابمشيجن ... وقللن بجيجن
رحلت سبينه ابتدت
لا تـــبينن للعـــدو اي انكــــسار
امشن ابهيبت الزهره وذو الفقار
راسجن عالي يضل طول المسار
مـــاي انتن بالستر تطفــن النار

احنه ال النبي ... ثوره عل ناصبي
امعلمين اعله البله
خل تسمع الناس
....2....
للسبي استعدن ... وعني لا تبعدن
سيرن مسير الضعن
حسين أمناجن ... يمي ودعاجن
سيرن مسير الضعن

هالامانه واجـــب انه اوفيها
لو تكلف مني روحي انطيها
حسين غالي وأكدالي اعليها
كالي ايتامي يخويه احميها

وبرقيه اشكر ... وصه اخويه البدر
عندي اغله امن النبض
خويه والانفاس


.....3.....
يله يا بناتي .... لوذن ابعباتي
الجن اصيرن درع
كلشي لا يهمجن ... انه ابوجن وامجن
الجن اصيرن درع

شــدن الــرايه رباب ولـيله
ويله اليكّرب عليجن ويــله
الا اضيعه بكربله بنص ليله
انه بنت الحامه عن ادخيله

بيه من كافلي ... غيرة ما تنجلي
انه العقيله ام الخدر
متهمني الارجاس


.....4.....
لو مشينه اسمعن ... روسجن ارفعن
خل نسبي احنه الشمر
الكيدو اديجن .... فرحو ابسبيجن
خل نسبي احنه الشمر

لا تهابنه الشمــر واحــقاده
احنه صح نسوان لكن قاده
ويانه جفــين الكــمر رداده
والنعم من عنده عم الساده

خل نشوّف الشمر ... شنهو يعني الخدر
بالستر نسبي العدى
وبرفعة الراس


.....5.....
كلشي لا يهمجن ... الذبحو زلمجن
باجر اذلهم وعد
بمجلس الاعادي .... بصبري وبسوادي
باجر اذلهم وعد

باجر المجلس اهــده ابخطبتي
وافضح الضالم يزيد ابكلمتي
فكد كيدك واسعى سعيك صرختي
بثار اخوي حسين تبدي ثورتي

كل حق ارده الهله ... تشهد علي بكربله
بالشام اعيد الطف وعد
بجفوف عباس
.......
تمت
.......
موسى الخادم

نَدعوكَ يامُجيب ٠٠ ونَرفــــــــعُ اليدين
نســــألكَ الثَبات ٠٠ في خِدمَةِ الحُسين
ــــــــــــــــــــــــــــــــــــــــــــــــــــــــــــ
قــــــدم صدق ارزقنا يارب البريه
والثبات اعله الخــدامه الحسينيه
خلي كل ادموعنه اعلى الغاضريه
نريد ترزقنا رضا الزهــــره الزچيه

بالحزنِ والخُشوع ٠٠ ندعوكَ واليقين
نســــألك الثبات ٠٠ في خدمة الحسين
ــــــــــــــــــــــــــــــــــــــــــــــــــــــــــــ
ربي بيض اوجوهنه بهاي الخدامه
رايدين نفـــــــــــــوز بيها بالقيامه
خلي لطمــــات الصدر الهن علامه
باچر اللطمات للخـــــــادم وسامه

ومَدَمعُ العيون ٠٠ يَسيلُ كُلَ حين
نســــألك الثبات ٠٠ في خدمة الحسين
ــــــــــــــــــــــــــــــــــــــــــــــــــــــــــــ
ربي ثبت اقــــــدامنا وثبت گلبنه 
ابحب اهــل بيت النبي نور دربنه
نريد نرضي ام الحسين بهذا حبنه
ونفتخر خدام ابو اليمه انحسبنه

ونَرفعُ الرؤوس ٠٠ ونرفعُ الجبين
نســــألك الثبات ٠٠ في خدمة الحسين
ــــــــــــــــــــــــــــــــــــــــــــــــــــــــــــ
سيدي ارزقنا الثبات النــه وهلنه
كـون هالخدمه رصيد تكون النه
وتحت خيمة فاطمه يلتم شملنه
ونرجو غفــــرانك وتتقبل عملنه

نُريدُ ان نَكون ٠٠ في حِصنكَ الحَصين
نســــألك الثبات ٠٠ في خدمة الحسين
ــــــــــــــــــــــــــــــــــــــــــــــــــــــــــــ
نسألك ياربي بالخــــدمه التواضع
كــــون واحدنه يصير بطبعه قانع 
صارت الساحه مخيفه وهذا واقع
ريت كـل خادم فقط لحسين تابع

الفَوزُ في الحصاد ٠٠ حصيلةُ السنين
نســــألك الثبات ٠٠ في خدمة الحسين
ــــــــــــــــــــــــــــــــــــــــــــــــــــــــــــ

حيدر بشار الدراجي

قصائد السبي ( الرباب تخاطب عبدالله الرضيع ع)
………………………………… .

يتراوه من كثره العطش .. يوليدي
گدامي اضن جفنك رمش .. يوليدي

…………………… ..

اگعد يل ماتعبت امك .. بلكي اضمها وهي اتضمك
مشتاگه وتضم مشتاگ

اشفافك چن تتحرك ليه ..تغفه اتريد ابين اديه
يل عمرك مو مال افراگ

زغير وبالمحنه تشبه الوالد
المثلك بالمهد مو عالرمح صاعد
ما ادري  اليذبحك منك شرايد

وسف الرمح صار النعش .. يوليدي
گدامي اضن جفنك رمش .. يوليدي

……… .....................

يوليدي يوميلك چفي .. من ابعيد اعليك يهفي
اعليك الحر ماخله ارسوم

اگبال اعيوني رمحك جابه .. وگللولي چاوين اثيابه
اشگد ضميتي لطوله اهدوم

ثوبك يالولد من زمن ضميته
مفصلته اعلطولك الك سويته
ما ادري يرد وياي تاليته

مهضومه من يوم اهدعش .. يوليدي
گدامي اضن جفنك رمش .. يوليدي

…………………… .

دمعاتي برمحك امسحها .. اسگي اعيونك ليه فتحها
وارجع يبني انوب ونام

يل جفنك من الله مكحل .. انته الاجمل من كل اجمل
بحسنك محتاره اهل الشام

يعبدالله احيرن من اوصفنك
بنات الشام شافن يالولد حسنك
وانت اعلرمح گامن يحسدنك

شايل حسِن مال اثنعش  .. يوليدي
گدامي اضن جفنك رمش .. يوليدي

………… …… ..

دلالي معروفه اوجاعه .. اتخيل صوتك كل ساعة
صوت امغطيتّه التربان

ياهيه التشبهه احوالي .. عني امتار وابني اگبالي
ميت عطشان وجوعان

اسمع صوت يشبه بچيتك يبني
واركض ليه بس محد يوصلني
احسه بكل مكان اعليه يندهني

من الصوت دلالي انخمش .. يوليدي
جدامي اضن جفنك رمش .. يوليدي

……………………… ..

عماتك هل دارن حولك .. نادن رمحك خرب طولك
وشعرك ناعم بيه ارمال

وتشكيلك دمعات اعيوني .. صحت اگماطك بيه چتفوني
من صاحو ماعدنه احبال

حار الريح  شفته و يلعب بشعرك
صحت عبدالله عمري من فده لعمرك
الرمل شيريد منك مارحم زغرك

من يوم رمحك ماغبش .. يوليدي
جدامي اضن جفنك رمش .. يوليدي
………………………… ..
ايوب يوسف الطوگي

قصيدة للسبي بعد مقتل الحسين عليه السلام


ياهو بيكم عدة غـيرة احنة ماعدنا عشيرة
ياهو منكم عدة رحمة ويكَعد ايحاسب ضميرة
-------------------------------------------------------------
ليش ما خفتوا غضب الله وقــــــــــدرتة
من ذبحتوا حسين واولادة وصحبتة
وعالهزل مسبية تالي تروح اخــــــــــتة
ما تخافون ﷲ من طكَيتوا بتــــــــــــــــة
حرم لا حول ولا قوة اوادم الماعدها نخوة
والدهر طشر اهلها الوجه المن تديرة
-------------------------------------------------------------
بنار رجلينا تجوت كمنا حافــــــــي
ياهو ابكلبة رحم ويكول كافــــــي
محد الايتام كلها لاتخــــــــافـــــــــي
اعلى التراب تنام يانوم العوافي
بزر عز وشان عالي شلون لو ماعدها والي
اليتيم شلون حالة اوين ما يدري مصيرة
-------------------------------------------------------------
انة زينب يا خلك ﷲ اصطفانــــــــــــي
وربي بيدة من زغر سني رعانــــــــــــي
ستري ستر ﷲ يعالم زينب انــــــــــــــي
شلون مسبية وغصب دهري خذاني
حبل وسياط وعساكر والحرم مكسورة خاطر
لا ولي عدها وتندبة اندور من ديرة لديرة
---------------------------------------------------
صرنة فرجة والخلكَ تنظر علــــــينا
مدري نشكَف سوط لو نستر بدينا
من عمت عين الزمان اشسوة بينا
احنا عــــــــلويات يـــــا امة نبيــنا
بالعلاوي احبال تنشد ياخلكَ جدنا محمد
ﷲ ما يرضة ورسولة عالهزل تمشي اسيرة
--------------------------------------------------------
موش وصاكم رسول بوصيــــــــــتة
وصة بالقران ثم بال بيــــــــــــــتة
ليش هذا ابنة ذبحتوه ورعيــــــتة
ماشفت واحد الة اهتزت حميتة
ليش وي عترة نبيـكم النبي غاظب عليكم
من ذبحتوا ابنة وحبيبة هاي عد الله چبيـرة
---------------------------------------------------
ليش تتباچة الحرم وانتم تظحــــكون
ما كسرنا كَلوبـــكم يالمــــــا ترحمــــــون
شوفوا حالتــــــــنا اذا من الله تخــافون
اطفال مفجوعة وحــــــرم بيها تهينون
دمعة الايتام حمرة والولتها الناس كَشرة
والحرم ازرك متنها من الچـبيرة للزغيرة


أسالكم الدعاء رائد الاسدي

احسب عذاب اجروحي
ميته   اشكثر  ياروحي

كل  نظره ياخذني البين
فوك الرمح راس حسين
*******
شتريد منطيتك  گمر.......يادهري  ارحم بيه
والعايشه اسهام  وحرگ.....تگضي العمر مسبيه
والغربه  صارتلي  وطن......مذبوحه چم علويه
وزعته عمري  ابكربله........لسه الچوي ابرجليه

ابيضت حزنهه اعيوني
چم ديره اطب بضعوني

بضعوني اسدر بس وين
فوك الرمح راس حسين
*******
ما حسبت جرح العمر..... ثكل المصيبه اعليه
خمسين عمري بالهضم.......خلاني اون ليليه
دگات گلبي اتزاحمت.....هون يگلبي اشويه
يصعب يخوتي هاالحچي.....لو گالو  المسبيه

هضموني  خويه  اهوايه
كل ساع سمعت احچايه

حال النسه اتشوفه العين
فوك  الرمح راس حسين
*******
ياوسفه يحدينه الشمر ...والرؤؤس هاي اگبالي
للكوفه  مشوني الغرب...حسباتي حسره ابالي
والدمعه بعيوني جمر......نشدوني وين  الوالي
وانه الفگدت ابدنيتي....چم غالي عندي وغالي

طحت  ابعذاب اسنيني
وبروحي عشت اونيني

موضوعي ابدي انه امنين
فوك  الرمح  راس حسين
*******
عذبني   ياخويه الزمن...وايامي خلصت بالمحن
والشيب من طف كربله...خمسين عمري تعذبن
بالهودج اشگد حشمت..والحادي گدامي صفن
ومشامر اگبالي الحچي..وانه التفت بس الضعن

بالحسره عشت ايامي
ماتت  جميع  احلامي

انسه الجرح  عاد  اثنين
فوك الرمح راس حسين
*******
مرت  مواقف  بالسبي....والحاقد ابعينه صلف
معقوله امشي  اميسره...ديوانهم   كلش كلف
وحسين يدري  ابحالتي..ياخويه مابيهم عّرف
وبهل مصيبه شاهدت.....چن انهدم ركن النجف

زينب صرت مهضومه
بجروحي هم ملچومه

درب الغري انعيشه اونين
فوك  الرمح راس حسين
*******
تاليهه يا دهري اشبعد....وسط الخرابه اضعوني
ماتت رقيه من الهضم.....والليل  ياخذ   لوني
ياروحي ذابت مهجتي.....بانت حزنهه اجفوني
والحادي مايرحم صلف .....زينب بعد  فجعوني

محنيه  شفت اظلوعي
صار  الدمع  موضوعي

جرح  الگلب باقي اسنين
فوك الرمح  راس حسين
*******
تمت بعون الله تعالى الشاعر_يوسف_الفتلاوي

قصيدة بحق السيدة زينب عليها السلام في طريق السبي


ميل عني ياهوة ارجوك ميل
لا تطيح معصبي ما بية حيل
عالهزل تدري سبية ابحبل مچتوفات ادية
---------------------------------------------------
ياهــوة بربك احلفك انـتة هم عندك رحم
صرت وياهم علينا چي شفت ماكو زلم
ردنة مــنك تفزعنة سـاعة العسكر هجم
ليش ماهبيت حيل اتزيحهم عن الخيم
وكون من اتهب تشيل وياك صوتي
وللمعارة اتروح وتوصلة لخوتي
ما يصير الصار بية ابحبل مچتوفات ادية
---------------------------------------------------------
شنهي عــذرك بالقيامة وبالحشر عنــــد الحساب
لو نشد جــدي علينا وكثر اعلــــيك الــــعتاب
من مشن بالطف سـبايا تهب وتطـــيح الحجاب
شتعتذر يـاهوة لجـدي وشنهي عندك من جواب
كون بيدك ياهوة شايلك اتراب
وياهوة انريدك تنثرة بعين الاجناب
ماتشاهدني ال مية بحبل مچتوفات ادية
---------------------------------------------------
تنـظر الــوادم عليـــنا وانتة ويـــــاهم صفيت
احـنة من بـيت النبوة چان من عدنا استحيت
ما كسر كَلـبك عتـابي حايرة لوحـــــدي بقيت
اتهب عليهم ريح صرصر من شفتني حســبيت
لملم الغيم ابعجل غطي سمانة
بعين شامت ياهوة لحد يرانة
بالظلام استر علية ابحبل مچتوفات ادية
===========================
ياهوة بجدرانك احفر صورة من طف كربلة
ودوم وياك ابنســيمك صوت حزنـــــي شايلة
ذكر الكون ابمـصابي والجرة اعــــله العايلة
بلكي عنك يغـــفر الله والثــواب اتحــــــصلة
صور لامة محمد حال الايتام
انتة شاهدت المصاب وحركَ الخيام
وشاهدت بالغاظرية ابحبل مچتوفات ادية
-----------------------------------------------------
ياهوة مر اعلى اخوتي وشيل كـــل كَطرة دمة
وعندك احفـظهن امانة واصـــــعد لرب السمة
ويـاك راويه لمــــحمد وفاطمة وحامي الحمة
وصيح دم حسين هذا ولمـــي بــــيدك سلمة
اتجيب قطرات وترد من دم الحسين
واصبغ اطلوع ومغيب وياك صوبين
وانقل لامي الزچية ابحبل مچتوفات ادية
---------------------------------------------------
عندي مطلب بعد اسمعة ما بــــعد عــــــدك عذر
حاظر ويـــــاي ابمصابي والجرة اعله ام الخدر
ياهوة ابـذاكرتك اكـــتب واحچي عن ام الصبر
صوتي وامصابي اريــدة توصـــلة للبـــيدة الامر
كَلة يامهدي ترة زينب سبوها
وصار حداي الظعن چتال اخوها
وكَلة ترضة الهاشمية ابحبل مچتوفات ادية
_

أسالكم الدعاء رائد الاسدي

تعبني السبي يخواني تعبني
عذبني الدرب مايگضي عذبني
شكد صيحت حيهم ماكو واحد كام
ما معقوله محد منكم يحبني

جفوف اديه تصب دمه _ كل ساع اختكم طايحه
فوك التعب فوك الركض _ مانايمه من البارحه
هيه الهضيمه ام الشرف _ تمشي ويه ناس بلا شرف
حرموني مو بس البجي _ حرموني اسوي الفاتحه

مهضومه _ حكي من اعتب على العافوني
مهضومه _ مولحت من البواجي عيوني
مهضومه _ غربه ما عدهم شرف يسبوني

خويه حسين شافوني _ خويه حسين شافوني
_
عطشانه اعله اخوتي هواي عطشانه
شيخلصه الدرب والذابح ويانه
يهضمني وادير العين ماكو اخوان
كل ساعه عليه مسرفن اردانه

هيه الاخت لو عدهه اخو _ يا زلمه اليحاجيهه
غير الاخو محد يجي _ ويكول أخيتي شبيهه
التتمرض بديرة غرب _ اي دوه ما يصلح بعد
بس لو كعد يمهه الاخو _ بسوالفه ايداويهه

كومولي _ يل عميتو عيوني من فركاكم
كومولي _ يا اعزازي كون ميته وياكم
كومولي _ طاك كلبي اعليكم وملكاكم

خويه حسين شافوني _ خويه حسين شافوني
____
هنه اهواي صارن بالسبي وكثرن
ياهي المنهن احجي وياهي ينضمن
راح احجيلكم بس وحده تهضم حيل
خواتك يبو الغيره بسوكهم طبن

يحسين مرونه بدرب _ الله واكبر مو درب
عيون متروس وزلم _ والباوعو كلهم غرب
الاعمه ظل يضحك جذب _ والاطرش يسولف ضحك
هيه المصيبه الباوعو _ اتصفحو من كل كلب

ما صايره _ ستر _ الله اليكره الله يشوفه
ما صايره _ الشام غربه والمصيبه الكوفه
ما صايره _ الكوفه تعرفني وأطب مجتوفه

خويه حسين شافوني _ خويه حسين شافوني
___
المثلي بهل عمر يخواني ما تكدر
شني ٦٠ عام وتركض بنص بر
المفروض البعمري المغربيه تنام
مو كل ساع اطيح الناكه من تعثر

الهزله مو مالت زلم _ شلون تصعدهه مره
النوك من كد ماطحت _ يبجن علي لزمن سره
ظل يبجي حتى المو عرف _ جا بأختك شسوه الوكت
شمسويه حتى اكضي العمر ليل ونهار امرمره

ياموتي _ ردتك اتسير علي كل ليله
ياموتي _ ليش ضيمي وياي شد كل حيله
ياموتي _ فدوه عجل راح اشد الشيله

خويه حسين شافوني _ خويه حسين شافوني
__
الخادم موسى البطلي

انته برمح وانه بحبل مشينه
بطاري الخدر يابوالفظل حجينه
وعينك تصد عليه
شماصيحو سبيه
٠٠٠٠ ٠٠ ٠٠٠٠
صار المشي بكيف الشمر
لابيدك ولابيدي
عباس كل جلمه نحجت
سيف ويحز وريدي
خويه الدرب ماينمشي
والموت أصبح عيدي

جندوب اصبر جندب
والرمح ماخله كلوب
شمامال  ملنه احنه وياه
ومثل الشمع گمنه انذوب

عيون البشر كلها تصد علينه
من الخجل مات الحبل بأدينه
بهزله الخدر تاليه
وعينك تصد عليه
٠٠٠٠٠٠٠٠٠٠٠٠٠٠٠
هيه السوالف تنذبح
لوماكو اذن تسمعها
عباس تطلع دمعتي
وحجايه ماطلعها
ذبحينه صاحو كافلج
بالله كريم ادفعها

مذبوح يشكي المذبوح
ياربي خذ مني الروح
بهذا الدرب شفت الويل
حته البجي مامسموح

هاي الهضيمه الماتمر عله الناس
شماننضرب انصيح الحگ عباس
تشكي الك رقيه
وعينك تصد عليه
٠٠٠٠٠٠٠٠٠٠٠٠٠٠٠
اجروح بالطف تنحمل
وضيم الدرب شيحمله
شما نوخو نوك الهزل
لجسام تركض رمله
فياي سوت عالرمح 
خافن الشمس تذبله

ام الولد ماتلام
شگد بانيه عليه احلام
طول الدب تحجي وياه
جسام يمه جسام

حار الرمح والشمس ماترحم بيه
زينب يعمته الرس خل انغطيه
تغيره الشمس ضهريه
عينك تصد عليه
٠٠٠٠٠٠٠٠٠٠٠٠٠٠٠
كون الصبر بيع وشره
اشريه الكل النسوان
علينه يتجاسر صبح
من غمضت ياهو الجان
ماشفنه بالوادم بشر
كلهم بهيئة شيطان

سوك ويلي من السوك
شيب گلب هاي النوگ
من المستحه مدنكه الراس
سولفت بخدري حلوگ

عيوني تصدلك ونته خويه بلاعين
عباس جاذاك الخدر أصبح وين

الواك طايح فيه
عينك تصد عليه
٠٠٠٠٠٠٠٠٠٠٠٠٠٠٠
خادم اهل البيت ع
فلاح طالب الماجدي

ويلي يزينب ياغريبه
ويلي يزينب ياغريبه
....................................
هاي مارايد سمعهه والابد ماتنعقل
شلون بت فاطمه الزهره تصعد بنوك الهزل
ندري ماي العذب طبعه مايود ماي الضحل
اشلون ترهم بني اميه رافكت بت الرسل
لا ماتذل الهاشميه
لبوة علي حامي الحميه
صح هيه راحت رحله للشام
بس مثلت دور الزجيه
ويلي يزينب ياغريبه
ويلي يزينب ياغريبه
......................................
ولو تعبانه ابسفرهه مشت ثوره ومو سبي
وكثرما شافت مصايب لومشت تحبي حبي
اشما تصد چتال اخوهه لاذت ابكتر العبي
وشرف هاي الدنيا لايذ بالعفاف الزينبي
امن يبعد الروح يحسين
يم الخصم مادمعت عين
لجلك اصيرن كافل ايتام
وبركبتي خدر النساوين

ويلي يزينب ياغريبه ويلي يزينب ياغريبه
........................................
ام عون مابيهه تسولف حيل تعبهه السفر
النوم مايعرف جفنهه ورافگت عين السهر
اشما تدير الوجه زينب تلگه حايطهه القهر
وگبل لاتمشي گلبهه ويه الحسين انطبر
ياوسفه طاح حسين عاري
وجسمه تطشر  بالبراري
يبن امي عاالتربان مذبوح
حگي اون ليلي ونهاري
ويلي يزينب ياغريبه
ويلي يزينب ياغريبه
.......................................
صح اخوهه ايموت ضامي والاهل فوك التراب
بس يضل هم العقيله اعيالهه وكضت الحجاب
هيه مو آخر عجيبه زينب اول بالعجاب
اشما يغثهه ابن الدعيه اتحاجي الحسين بعتاب
يحسين وينك الحگ ام عون
من الهظم ما ضلت اعيون
من همي اموتن خاف يحسين
واطفالك اخلافي يموتون
ويلي يزينب ياغريبه
ويلي يزينب ياغريبه
..........................................
ياهلي الفرگه ثجيله وخافن يطول السؤال
ليش تتعنه المصايب على الزين
اتشله حال
بس يظل شامخ اسمنه وماوصل تل للجبال
آنه اضل ام عون آنه اشما كلت بيدي الحبال
صح الحسين يموت مظلوم
وابلا رحم من ركضت الگوم
بس ياهو باجر قدوة اجيال
ياهو اليموت ابذكره ويدوم
ويلي يزينب ياغريبه
ويلي يزينب ياغريبه

خادم اهل البيت علي الزرگاني

مضلوم زين العباد
٠٠٠٠ ٠٠ ٠٠٠٠
شايف ضيم مامشيوف
والطف گصر اسنينه
يمه نذبحو الوليان
وتجري بالدمع عينه
واصعب موقف الشافاه
خيل اتدوس ابو سكينه

مضلوم زين العباد
٠٠٠٠ ٠٠ ٠٠٠٠
يشوف الخيل فوك حسين
تدبج كسرت صدره
مايگدر يشيل السيف
وگاضي أيامه بالحسره
وين ايروح والنسوان
صفت بالهيمه متطشره

مضلوم زين العباد
٠٠٠٠ ٠٠ ٠٠٠٠
اخيامه تفرهدت والنار
تلهب وانته اتصور
خيل وبس حرم واطفال
والله يشيب المنضر
وين بهل يتامه يروح
وترعب شوفت العسكر

مضلوم زين العباد
٠٠٠٠ ٠٠ ٠٠٠٠
من چلچل عليه الليل
واه ياضيم هذا الليل
صارت عالرماح الروس
ودموع العقيله تسيل
أيتام مروعه من النار
ويرعبهم صهيل الخيل

مضلوم زين العباد
٠٠٠٠ ٠٠ ٠٠٠٠
ياطرت الفجر والناس
كلها مجمعه صوبين
صاحو وين اخت عباس
المالمحتها يوم العين
عل هزله وطريج بعيد
وي ذباحج تروحين

مظلوم زين العباد
٠٠٠٠ ٠٠ ٠٠٠٠
حده الحادي ومشه بالنوك
وعلي السجاد بهمومه
ثكل الجامعه والگيد
بالدم صبغن هدومه
ماكو ولا بشر بالكون
مر بمحنته ويومه

مظلوم زين العباد
٠٠٠٠ ٠٠ ٠٠٠٠.

خادم اهل البيت ع
فلاح طالب الماجدي

قصيدة سابع الامام الحسين ع
.
.
.

سبع ايام اتاني .. ياسبع المثاني
اليوم بغيبتـك يحـسين
ينعد خويه سبع اسنين
--------------

بسم الله ادموعي والحمد موت .. بــرض الغاظريه
من ظهر الهــزيله الچـنها تابـوت .. ارسل لك تحـيه
يماخذ مني كلشي اصرخ بصوت .. مشتاگه السبيه

يالماخذ حياتي .. هاجت ذكرياتي
الحزن العاش وسط العين
ينعد خويه سبع اسنين

------------

شان الفرگه تــذبح گالت الــناس .. وصدگني شفتها
ابزمن ضليت مابيه ذرة احساس ..اختك من عفتها
التــنادي حسين وينه وين عباس .. شمات اعرفتها

اتمنيتك تجيني .. وتشاهد ونيني
دمعي السال هاليومين
ينعد خويه سبع سنين

----------

مــن بديت عينــي بدو اسـياط .. ياخـــويه عالمـــتون
امن الدلال احس تتگطع انياط .. كل ما اجري العيون
جرح فرگاك بيـه ما اله اخياط .. وادري اعليك ميهون

تمشي اختك غريبه .. الله اشــــمصيبه
تدري بجرح المضيعين
ينعد خويه سبع سنين

----------

تدري يالاخو لــمن يجــي الليل .. بعيـني مايضل ماي
ابچيــلك لحد مايــوگع الحـــيل .. الرايحلي تره اهواي
حنانك عالثره من طشره الخيل .. طشر يالاخو اعضاي

يالخالي مكانك .. محتاجه الحنانك
حچيّ الگال اخيچ وين
ينعد خويه سبع اسنين

--------

حدر اضلوعي احس مشعول چانون .. ابـگد ماگلــبي يلـهب
تدري اشسوه خويه حادي الظعون .. وسط السوگ من طب
صاح وخــله كــــل الــناس يدنــون .. گلهـــم هــــاي زينــــب

جبناها الاميره .. ابلا اخوه اسيره
الوكت ابلا هلي الطيبين
ينعد خويه سبع سنين

----------

يالفوگ الرمح تدري السبي اجروح .. وبعينك تشاهد
من حچي الــشماته مابقــت روح .. بزينب الله شاهد
يالمذبوح خــدري وياك مــذبوح .. عگبك ياهو اناشد

ابالي والله ماچان .. امشي ابلايه وليان
غمج جرحي الك يازين
ينعد خويه سبع اسنين
----------
حيدر تركي الكربلائي

قصيدة ( قائده ) الى بطلة كربلاء وقائدة الركب السماوي


قائده ونعم القياده   نادت بهمه وأراده
      كـدْ بكيّدك           وأسعه سعيك
             تبقه لحسين السياده

*---------------*---------------*

كلمـــه گالتهه العقيلـــــــه     
لهل الوكت يدوي صداهه
واجب نحللـــهه خاطـــــر     
نوصل أحنـه لمحتواههــه
أبنظرة أصحاب السياسـه      
ننظـــــر لواســـع مــداهـه
مـن حچتـهه لهسه تــدوي      
شمس مـا تحجب ضواهه

كلمه سر الباري بيهه     
آيه يترتــل حچيهـه
بت محمد   ....   ألهه يشهد     
يا قصـــــــــر هدّت عماده
تبقــه لــحسين السيــــاده

*---------------*---------------*

قـادة الثـــوره بوعيهــــه       
بت علـــــي وبت الزچيه
يا مــره الصــارت مثلهـه       
واصلت أعظـــم قضيـــه
أبــد ما ذلــــــــت عزيـزه       
عــــزه مـن خير البريــــه
لــو يمــر عالقـاده أسمهـه        
واجـــــب أتأدي التحيـــه

منهه ضباط ومـــراتب        
تاخذ أدروس المحارب
من صبرهه.  ....   ومن نصرهه  
تفهــــــم أدروس الاراده
تبقــه لحسين السيـــاده

*---------------*---------------*

فجــرت ثــــوره عظيمــه     
أعلن الجـــور أنتكاســـــه
هايـــه زيــنب يالتناشـــد     
راضعــــه بثدي القداســه
قـــادة الثــــوره أبسالــــه     
ومن علي ثوب الفراســـه
ذلــــت أيــزيــد وأميــــــه     
أوضحت بعــد السياســـه

هـــزت أعروش آل أميه   
هايه بت حـامي الحميه
للفراســـــه   ....    وللسياسه      
زينب أطروحه وشهـــاده
تبقـــه لــحسين السيــاده

*---------------*---------------*

صــــوت دوّهَ من العقيلـــه       
حـاصـر الشـــام وحكمهـــه
صوت نهضه أعلى الضلاله       
وللنصــر رفعَـــت علمـهــــه
كد بكيدك وأسعــه سعيــك       
أنخرست وسكتــت زلمهــه
هـــزت أعـــــروش الضلاله        
ثــــــوره زينــب للفهـمــهـه

كمّلـت دور الامامــه      
بعزه وبهمّه وشهامه
آيـــه بالطـــف....بأرقـه مصحـف      
وضّحتْ معنى العبـــــاده
تبقـــه لـحسين السيـــاده

*---------------*---------------*

كل محرم يدوي صوتـــچ         
يفجر أعلى الباغي ثـــوره
چـن محمد طـــــه يُبعــث        
والله للــــــــدين وينشـره
نهَضتّــچ نهضّـــت محمد        
وثورتچ من منهـج أمــره
عالظلم لمــــــــن خطبتي        
حسين أعلـن ثوره نحــره

خطبتچ أول شـراره       
أعلــن الدم أنتصـاره
عالميــــه    ....   للبريــــــــه         
أسست مبدء  جهـــــــاده
تبقــه لحــسين السيـــاده

*---------------*---------------*

الشاعر
موسى البديري

حاول الإعلام الأموي طمس الحقيقه لكن صوت الحق والاراده الصلبه للسيده زينب ع قلب موازين الإعلام واربكت بني اميه

  (( قصيدة البث المباشر ))

استمع صوت العقيله عالمباشــر      
من قناة الحره عبر أهل الضماير
انتقل عبـــر الزمـــن                
صـوت واضح للعلن
عالـمبـــاشـــر
*

انتقـل ويه العقيله وبـث مباشـر حــوّلــه
ألف واربعميه واضــح هـل التـــردد للمله
واحـــد وستين هجــره بعــد عاشر كربله
أستمــع صوت العقيله والبيـــان أتــأملـه

أعلنـــت أول بيان بكــل أراده
انتصار الــدم خبـر من القياده
قائـــده بـــرغم المحن
صــوت واضــح للعلن
عالـمبـــاشـــر
*

بعــد طــف حسين ذاك وانتصارات الدمــاء
صـوت زينب صـار ثــوره امتداد لكــربــلاء
والحسب زينب ذليله بس مدامع بس عزاء
خلـه يسمع صـوت زينب حتى يتعلم آبـــاء

ما تذل بـت حيـدره تبقى الاميره
ودرب الحسين بفخر خطّتْ مسيره
رغم أصحاب الوثن                      
صوت واضح للعلن
عالمباشر
*

دخلت الشـام العقيله وبث الإعــلام الخبـر
ﮔالــو الدخلو خــوارج حاولــو خلط الصور
خورس أعلام الضلاله صوت بركان انفجر
صــوت زينب عالمباشـــر حيرت كل البشر

نقلت الصوره برغم أهل الضلاله
وصوت زينب حاولو منع انتقاله
رغم كيــد أهــل الفتـن
 صــوت واضــح للعلن
عالـمبـــاشـــر

*

شلون صنع الله شفتي بيچ يـا بت حيدره
تگله كــل الصـــار بينه بعين بــارينه تــره
كـد بكيدك يــا يزيد واسعـــه انتـه بمقدره
بس ذكرنـــه اليبقه رغما والله حد الاخــره

تعله بالطف راية العز والكرامه         
رايه غــذاها أبفخر دم الامامه
 بينا يهتف كل وطن                      
صوت واضــح للعلن
عالـمبـــاشـــر

*

وﮔفت أبديوان أميـه شامخــه مثـل الجبل
والشماته تحيط بيها وكـل سفارات الــدول
آنــه مــن بيت النبوه أبيتي وحي الله نــزل
وأنت ابن مرجانه تعرف لكن منين الخجـل

فضحت أيزيد وزمرته بكل بساله
ونقلــت أخبار العقيله كــل وكالـه
لهل الخبر كلهن رون                   
صــوت واضح للعلن
عالـمبـــاشـــر
*
الشاعر
موسى البديري

ودخن راسه من طب للطف
*
هجم عباس ويرف بيده اللوه
وكامو يطيحون كل ميه سوه
حمل حمله وضاع عالجيش الهوه
وسيفه بالميدان يقره القل هوه

خله الجيش يفر براسه
واكبر قائد بيهم داسه

طبهم مغتاض ها ها
سوه استعراض ها ها


خيال الموت ايسمونه
ضل يذبح بيهم بعيونه

من شد الحيل. ها ها
فحطها الخيل

وما يتلاكه يدرون الحر
*
قائد وكلها تهابه القاده
يستر الله من يزيد اعتاده
مثل جدهم حارين الساده
الجيش تيه من نزل مشراده

خضره وما طاحت جفيته
والخزره اهواي محليته

سبحان الله. ها ها
شوف اشمحلاه. ها ها

فرسان الحومه امبجيها
فوك الشط ضل يسطر بيها

والطف مهوال. ها ها
هوس من صال. ها ها

وكام بسيفه يذبح ويذب
**
حاصرها المشرعه امن اربع جهات
وقتحم عباس كل ماي الفرات
طشر الجيش وسحگ فوگ المشات
صال ابو الغيره وصعدها المصهلات

والحومه اترابه مخليها
جاب الخيمه ويغرف بيها

هذا الوفاي. ها ها
شگ حلگ الماي. ها ها

عباس وغيم بالحومه
كض العسكر من زردوم

شاله وذباه. ها ها
والشط جاباه. ها ها

ويا بعد ايدي كفاهم كف
**
نفض هدمه وشالته الغيره اعله اخوه
عاف كلشي وابد ما عاف ابن ابوه
بساحه الميدان متحزم لكوه
ومن هجم راعي العلم ما واجهوه

وطبوها اليوم العراكه
وحاكاها العباس احياكه

ومن ذب رباط ها ها
عسكرهم شاط. ها ها

كاللهم ما عوف عضيدي
لو ما ندمكم كص ايدي

انه العباس. ها ها
مرفوع الراس ها ها

وهاي اطلابه ما راح اتفض
**
غيم العباس والعسكر شرد
وصاح بالفرسان يا حيدر مدد
اشويه صارو وابو فاصل كله هد
وللحرب كل جاره ما ترهم بعد

طبهم والجربه اعله امتونه
وفنهم عباس ايلاكونه

بيهم من صاح ها ها
اخر صف طاح. ها ها

متونس والشط ذل مايه
وترفرف بجفوفه الرايه

طب راعي الزود ها ها
ما خله جنود. ها ها

وجدم رايه والكال اشرد
****
هوسات
وبيها حروره طبرات ابنك

ومن طب ليها شگ حلگ الطف

وجانو بالرايه يكمطونه

وحطه براسه عباس الشط
**
تمت
تحسين الخفاجي

شكوى زينب لأخيها الحسين عليه السلام

من يوم الطحت يا روح الزچيه
لا عز لا خدر. من بعدك سبيه
زينب من عفتها
دولبهه وكتها. من بعدك سبيه
..................

يا جمال الورد
بشوفتك انسعد
شايل اوصاف النبي وحامي الحميه
آنه وانت سوه
عشنه نور وهوى
من زغر يحسين بحضان الزچيه

چنت كل يوم تسأل عني يالغالي
السوالف ذيچ كلها انطبعت ابالي

من ذاك الوكت. ما فارگتك وياي
عشنه امن الزغر مثل الورده والماي
ليش الدلّلتها
دولبهه وكتها. من بعدك سبيه
..................

حاربانه الزمن
عفنه ذاك الوطن
العشنه بي ايام حلوه امن الطفوله
من بلد فاطمه
لكربله الخاتمه
خيّم علينه العدو بجيشه وخيوله

رحت عني يخويه بگلبك الضامي
ساعه وعالرمح لن راسك الدامي

من ردلي المهر خالي ودمه يجري
واويلاه صحت راح اليحمي خدري
اختك ما شفتها
دولبهه وكتها من بعدك سبيه
.................

زينب ابعازتك
والسيوف اخذتك
گطعت جسمك عله تراب الوطيه
حيلي خويه انهدم
من اجوا عالخيم
شبّوا النيران بيها آل اميه

حرت بين اطفي نار خيامي وطفالك
لو احمي الحرم من سوط چتّالك.

يحسين ابتدت بعدك نايباتي.
اركض عالخيم. اطفيها بعباتي
المحشومه جبتها
دولبهه وكتها من بعدك سبيه
.....................

چم يتيم انسحگ
والشرد وحترگ
وآنه اركض بين خيل ونار وحدي
لا اخو لا ولي
بس علي ومبتلي
بالمرض مطروح ماظل غيره عندي

كفيلي عله النهر مگطوعه چفينه
ولتنه الخيل ماظل والي يحمينه

سلبونه ومشو ظلت بس لجروح
چتفونه بحبل. باجر للسبي انروح
هاي الفارگتها
دولبهه وكتها من بعدك سبيه
..................

ياحبيب النبي
رحنه عنك سبي
بنوگ هزله وعالرمح راسك معانه
لا خدر لا حچي
بس مناحه وبچي
واليطيح امن الهزل يبقه بمكانه

يخويه حسين طاحت طفله عافوها
راسك من وگف يحسين جابوها

عذبنه السبي. ما شفنه استراحه
كل طفله وطفل. ينزف من جراحه
بشوفك عوّدتها
دولبهه وكتها من بعدك سبيه
.................

ماكو من محنتي
اتعذبت يخوتي
آنه زينب ليش عفتوني غريبه
حرمه بين الزلم
انسبي وانشتم
ادخل لديوان امية ياعجيبه

آنه المانظر كل واحد خيالي
وداني الزمن لليشمت بحالي

نظرات العدو تجرح مثل الاسهام
يخواني شكثر. زينب شافت آلام
تدري الحجّبتها
دولبهه وكتها من بعدك سبيه

#سيد_زيد_الفحام

_

طلعت ناگتي. بغياب اخوتي
بدروب السبي. حيره حيرتي
...........

هزله وتعثر الناگه. طلعت وانه مشتاگه. لخواني العفتهم
امشي بلا خدر صعبه. ايام السبي دربه. وين الناشدتهم

وين اخوتي الچنت ويّاهم اميره
ليش هسه عله الهزل زينب اسيره
وين ابوفاضل ابو الفزعه الچبيره
يرضه اخته بلا ولي حيرتها حيره

المحشومه قبِل. مچتوفه بحبل
انه امّ الصبر. نزلت دمعتي
..............

ابن امي انگطع نحره. بحافر كسّرو صدره. عفته عله الوطيه
راسه عله الرمح عالي. يمشي ويايه يبرالي. عينه تصد عليه

ويلي لو طفله بچت وتريد ابوها
بالسياط بلايه رحمه يسكّتوها
آه لو مالت الناگه وعثّـروها
ما يتانون اليتيمه الطيّحوها

بدموع وانين. تصرخ ياحُسين
راسه عله الرمح. يسمع طفلتي
..................

طفله هوايه متعوبه. ظلت تبچي مرعوبه. ما هدئت رقيه
سلها حسين وفراگه. تريده تصيح مشتاگه. ليش ابعد عليه

طفله لكن شيّبت من گد حزنها
تلوذ بية الشمر من يضرب متنها
حنّت النوگ وبچت كلها عله ونها
تريد ابوها حسين راح وغاب عنها

كاتلهه اليتم. كلسا تنلچم
عالناگه وتون. ذابت مهجتي
..............

معقوله الشمر حادي. ببنات النبي الهادي. فرحان بسبيهن
بنات الزهره يسبوهن. عالهزّل يشوفوهن مچتوفات اديهن

وين ابوالغيره التكفّلنه بحنانه
ليش صار الشمر حدّاي ابمچانه
الف مرّه متنه من گد مستحانه
اليسوه والمايسوه عالهزّل رئانه

عباس الگمر. طايح عالنهر
ما يرجع بعد. يحمل رايتي
................

هذا الما اجه ابّالي. امشي عله الهزل تالي ما بين آل امية
بين اليشمت بحالي. وبين اليشتم الغالي. مهضومه وسبيه

اسمع الشامت يگلهم دخّلوهن
بهالوضع بالسوگ عالناس اعرضوهن
كل خوات حسين خل نقهر اخوهن
لا ترحمون الفواطم عذّبوهن

ياحامي الخدِر. عذّبنه الشمر
اطفال وحرم. ذابت مهجتي
..................

آنه اختك يبوالغيره. حرمه ومحنتي چبيره وينك ياگمر وين
تقبل ياضوه عيوني. من بعدك يجبروني. ادخل للدواوين

بيازمن يابالفضل اوکف سبيه
خويه وابن زياد يتشمّت عليه
تنظر الشمّات وتستّر بديه
يابوفاضل وانه بت حامي الحميه

اتمنّه الاجل. كاتلني الخجل
ياراعي العلم. تسمع صرختي

سيد زيد الفحام
___

قصیدة:شجاعة زینب
ـــــــــــــــــــــــــــــــــــــــــــــــ
أقسم ابدم الشهید..راح أذلّک یایزید
آنه زینـب بت علي..و أنتو جدامي عبید

کافي بس یبن الحرام
آنـه بـت أشـرف امـام

راح أذلـّک یا یزید
ـــــــــــــــــــــــــــــــــــــــــــــ
یلي تسأل امنین..جیت اطلبک ابدین
آنه اخت الحسین..وصوت أبویه صوتي

آنه أخت الاحرار..الما تحاچي أزغار
عندي بالگلب ثار..ثاري ثار أخوتي

أشـما تکـد کیـدک الک
کلـشي چفـک مـا ملـک
الیحچي وي زینب هلک
لا تــظــن أتــوسّــلــک

ما رأیت ألا الجمیل..کلشي قدمته قلیل
ما أذل یمک بلي..ای نعم عندي کفیل

الیـوم اریـد الأنـتقـام
آنـه بـت أشـرف امـام

راح أذلـّک یا یزید
ـــــــــــــــــــــــــــــــــــــــــــــ
أسعي سعیک و شوف..منهو لازم أیعوف
عندي شارة اچفوف..تسطر الي مثلک

لاتظنها تنداس..هیبه اخت العباس
اهلي رفعت الراس..و انته منهو اهلک

صح أجیت أمیسره
آنه لبوة حیدره
زلمه ماشوفک تره
مره و تحچي وي مره

ظني ماناسي القتال..منهو حیدر بالنزال
آنـه بنـت الأولي..وانته ابن اخبث رجال

حـگک أتضـیع الـکلام
آنـه بـت أشـرف امـام

راح أذلـّک یا یزید
ـــــــــــــــــــــــــــــــــــــــــــــ
عرشک وحمایاک..و جاهک وثرایاک
أنته و الي ویّاک.. کلها جوّه جدمي

هذه قصرک ایطیح..و کل مقامک ایزیح
کافي زینب اتصیح..یهلي فزعوا یمي

آنه اسولف وانته هوي
الساني ذوالـفقار أبوي
کـون من احچي تموي
لنّـه یمّــي راس أخوي

کافي لو عباس اگول..الراس بالمجلس یصول
ایگلي یختي اتدللي..لو نخیته بس یجول

أنته مو صاحب مقام
آنـه بـت أشـرف امـام

راح أذلـّک یا یزید
ـــــــــــــــــــــــــــــــــــــــــــــ
هذه حکمک أیام.. والکراسي أوهام
راح اسوي بالشام..ملحمه اعله راسک

راح اعیدن أدوار..من ابوي الکرار
النار أتخلـّف النار..تحرگ ارتیاسک

راح اصـیحن یاعلي
وانته کون اتطخ الي
بیّـه غیــرة کـافــلي
صـعدت و لا تبــتلي

راح اجیب امن الطفوف..رایه وازنود وسیوف
بس أحشّم کافلي..شوف شسّوي الچفوف

الگـمر ما یعرف سلام
آنـه بـت أشـرف امـام

راح أذلـّک یا یزید
ـــــــــــــــــــــــــــــــــــــــــــــ
ما أسالم موت.. ولا رهبني کل صوت
آنه عزمي مثبوت..و انتو شي خرافه

بالشهاده نمتاز..عالبشر بالأعجاز
صح فگدت الأعزاز..ما گلت حسافه

هذه قـربان السماء
ایلاگي الله بالدماء
راح ابـشرک بالفناء
ودایم اعلینه البقاء

والله ماتمحي البیان..الخصنه بي رب الجنان
احنه نور الله الجلي..کل مکان و کل زمان

مـوت یالعـمرک ظلام
آنـه بـت أشـرف امـام

راح أذلـّک یا یزید
ـــــــــــــــــــــــــــــــــــــــــــــ


کلمات خادم الحسین ع
عبدالامیرالناصري...المحمره

مولاتي زينب عليها السلام

يالعشت ايدك بديه
من عكب عينك سبيه
.........

چنت مثل الخيال ويايه ياعباس
ابد ما فارگتني حتى بالانفاس
تعال وشوف حالي يا ابوالنوماس
سبيه مچتفه وتنظر علية الناس

يا وسافه الهاشميه
من عكب عينك سبيه
.........

أنه الماچان واحد ينظر خيالي
هسه بكيف كلمن يوگف اگبالي
بين اللي يسبني ويشمت بحالي
وبالسوط الشمر عباس يبرالي

يا شبل حامي الحميه
من عكب عينك سبيه
.........

يعباس اختك شسوه الزمن بيها
ركبت عالهزل والجّاني حاديها
اطب ديوان ابن مرجانه تاليها.
اعبر يا مصيبه وياهي احچيها

يالطحت بالغاضريه
من عكب عينك سبيه
.........

على الناکه الهزيله من عكب خدري
اطب للشام خويه شلون ما ادري
يريت الموت اخذ روحي واخذ عمري
ولاطب مجلس يزيد بهظم دهري
امشي وتمنّه المنيه
من عكب عينك سبيه
.........

عفتني بحيرتي وماتدري بيه اشصار
عله بختك يابوفاضل يابو راس الحار
تقبل وانه بنت المرتضى الكرار
اهل الشام لاگونه بشتم وحجار

تقبل بهاي الأذيه
من عكب عينك سبيه

سيد زيد الفحام
___

قصیدة:زینب هاي
ـــــــــــــــــــــــــــــــــــــــــــــــــ
زیــنب صوت مـایـنمل
بیــها الــموت یتــمــثّل
أخت احسـین یالتـسـأل وأخت العباس
ــــــــــــــــــــــــــــــــــــــــــــــ
زینــب هــاي.. یالتسأل
صحره أبماي.. تتـبــدّل للیگصدها

أخت حسین..والکافل
بحر الجــود ..متکامل تلگاه عدها

روح اسأل سواد اللیل..عنها و عن نجابتها
زینب تکــتب الــتاریخ..من تنـکت عبایتها

زینـــــب ثـار مـــولاها
والأیـــــثــــار معـــناها
أخت احسـین یالتـسـأل وأخت العباس
ــــــــــــــــــــــــــــــــــــــــــــــ
صار الکون.. یتمـثّل
بیــها و راد..یتــعدّل من ممشاها

راس حسین..لمـجرّح
یوم أنــشال...بالمذبح ضل یقراها

آیـه و من ظـهر قـرآن...طلعت بالوصف کلها
وابراس الرمح سمعوه...راس حســین رتـلها

ایرتّـــل چــان أسم أخته
والـــقـــــــرآن ســالفـــته
أخت احسـین یالتـســأل وأخت العباس
ــــــــــــــــــــــــــــــــــــــــــــــ
مثل الـسیل...تتقـدّم
شبه السـیف...تتـکلّم لاگ اعلیها

صح بعزاز...مفجوعه
بس الدین...مشروعه یکمل بیها

ما ذلّــت أخـت عـــبــاس...خلّـت بالـزلم علّه
صاحت من مشت لضعون..لا هیـــهات للـذلّه

ضعن احسین بي زینب
صـوبه العــین ما تچهب
أخت احسـین یالتـسـأل وأخت العباس
ــــــــــــــــــــــــــــــــــــــــــــــ
یا هو الــگال...مسبیّه
عدها أخوان...نشـمیّه هاي الحیره

کافي انگول...کافــلها
شـد أحــزام...محملها بسم الغیره

غیـره ابگـصة العــباس...من لاح الزعل بیها
خلّت مجلس أبن أزیاد.. تحت أقدام رجلیها

مثـل الـحــید والــــدها
کلـــها اتبـــید من عدها
أخت احسـین یالتـسـأل وأخت العباس
ــــــــــــــــــــــــــــــــــــــــــــــ
للأجـــیـال...ثورتها
تصنع جیل..وگفتها ضد الظالم

زینب هاي...والعالَم
بیها أیحیر...کل آدَم لبوة هاشم

ما تخضع ربات الجود..ترکت موقف أشکبره
زینب بت علي الکـرار...وأمها فاطمه الزهـره

ضـل عالبـــال مـوقــفها
والأجـیــــــال تعــرفـها
أخت احسـین یالتـسـأل وأخت العباس
ــــــــــــــــــــــــــــــــــــــــــــــ
کلمات خادم الحسین ع
عبدالامیرالناصري...المحمره