الزم سبحتج من يجي الليل
وكل خرزة اذبهة وياهة اذب حيل
وعلة البال يمر صوت راحت الزهرة
#################################
ياينبض دلالي اليدك..ياسلوتي وذاك العشك
الليل من يمر علي..يلكاني ماناسي الحرك
يمرني الليل بهمومة... وذكرتج تاكل ابحيلي
واحير شيكضي مصباحي... وانه الحيلي انكضة ابليلي
ايمرني الصبح جن وحشة اغروب
وانه الدمع طيحلي الهدوب
وانه اعليج صبح ليل عايش ابحسرة
وعلة البال يمر صوت راحت الزهرة
#################################
ياموضع اسرار الحجي..المن اسولف عازتج
وبس روحي تسمعني البقت ..ياروحي راحت زهرتج
من يشتد علي الهم...اسولفلج جنت وابرد
ومحد هسة باقيلي...ومتت من جلمة المحد
وياج اسولف جنت الوجاع
وهسة احفر واحجية للكاع
تمنيت تسمعين شحجي للحفرة
وعلة البال يمر صوت راحت الزهرة
#################################
للبيت بعدج من اطب..الزينب اصد واتذكرج
والكاهة قطعة من الدمع..صايغهة هم اموادعج
اكعد عود اصبرهة ...والكة الدمع ماخذني
والكة اجفوفهة الترفة...تمش الدمعة من جفني
عود انة اواسيهة اعلة الجروح
اكعد وياهة وتطلع الروح
اشتضل روح علة الضاك يتمة من زغرة
وعلة البال يمر صوت راحت الزهرة
#################################
للدنية ماضل كل خلك.. ولا واهس الشم الهوة
من جفي شيع زهرتة..وطوي الصحف خلكي انطوة
انه الشيع حياتة وياج ...وعجيبة الموت مامرني
وعلي الضم سرة بالتربان...ريت وياج دافني
ياريت روحي اندفنت وياج
يافاطمة موتني فركاج
العمر راح وانة الضال عايش بذكرة
وعلة البال يمر صوت راحت الزهرة
#################################
شمسوية ويطكلج ضلع.. يالوينج وين العصر
وايموت من طبعة الورد.. غصن الورد من ينكسر
والعمداً دفعهة الباب.. درة لاذت ورا وردة
وسمع يافضة اسنديني..وفرح من عملتة وحقدة
كلمت وان ماعافت البال
اذتني اكثر من الحبال
الج ثار يزهراء لازم انثائرة
وعلة البال يمر صوت راحت الزهرة
#################################
ذوالفقار الزيدي

غَسلها •• كَـفنها
وقاااال •• كَلميني فاطمة انااااا علي

••••••••••••••

يـ أم روحي •• علي انه
علي الـ سالفته شيباته
حچه وياها •• بكسر خاطر
علي وبعيونه دمعاته

الـ سالفته دمعه وشيبات
ايامه يگــضن حسرات
التمشي روحه بنـص ليل
لاهُو عـدل لاهو الـمات

كلمها •• ودعهااااا
وقااااال •• كلميني فاطمة اناااا علي

•••••••••••


يّلم روحه •• ويحاچيها
يفرحت خاطري اشلونچ
همس يمها •• يعافيتي
ليش امغمضه اعيونچ ؟؟


يطيحني لو هـــب الريح
ها فاطمه گومي يصيح
الـ مامنحني اكبال الموت
كل ماوكف صار يطيح

قبلها •• يبكي لها

وقال كلميني فاطمة انا علي

•••••••••••••••••

بدمع عينه •• يغسلها
وحَلّها اعمامته الخضره
حجه بهيده • بچـه بهيده
چبير وحسرته ابكبره

مثل الشمع حيدر ذاب
ويطيح اليعوف احباب
البي لاذت الدنيا سنين
يتعثر اگبال الباب

فارقها •• نادى لها
وقال كلميني فاطمة انا علي



•••••••••••••

لزم ضهره • گعد يمها
ودمع يحسبهن اجروحه
گرب ليها •وبچه ابحرگه
غريب الوجعته ابروحه

ام ولدي وامي تكونين
رجعيلي كون تگدرين
صاير يتيم ا بلياج
حاجيني كون تسمعين

أنَ لها •• مااااات بها
وقال كلميني فاطمة انا علي

•••••••••••••••••••••

خلص كلشي •• ومشت عنه
بواچي يشييع الجنازه
المشي محني •• الوجه اصفر
عزيز وعايف اعزازه


الـ ع الوادم يوزع حيل
وي الهوه صار يميل
دمعاته طاحن نجمات
موحش بعد صار الليل


اسرى بها •• في سرها

وقال كلميني فاطمة انا علي

••••••••••••••••••


وعلى امتونه • يشيعها
وحززززين العايف اعزازه
علي محني •• مشه وياها
ويرجف شال الجنازه

وجهه اصفر ويمشي بليل
عله المگبره ايشيع هيل
بضهر ايده ويهيل تراب
والدمع من عينه يسيل


سار بها ••• في دفنها

وقال • كلميني فاطمة انا علي



#خالد عبد السادة البديري

يمه يمه .. وين احطن راسي واغفه بياحضن
يمه يمه .. ونتي صرتي جنازه شالاج المتن

يمه هاي شلون ليله .. وسفرّتج صارت طويله
يمه يمه
...................

ماحسبت احسابي يمه انحرم منج صدك
يالتنگطيلي محنه وگلبي وي گلبج يدك

يمه كل الماحسبته ابالي صار
الموت مايعرف ابد ام الزغار
الخد التبوسينه من الدمعه حار

غربه غربه .. من بعد عينج ييمه دنيتي
عيني عيني .. بعد ما امسحها ابد من دمعتي

رحتي يايمه من اديه .. وروحتج مامنهه جيه
يمه يمه
....................

نومت ابنادم عزيزه ونتي عينج لصبح
ماتغمض اله انامن يمه يالوجهج سمح

وهسه غمضتي كبل لا اني انام
ومثل بيتج روحي عم بيها الضلام
اني متعوده عليج اسمع كلام

نامي نامي .. يمه زينب يالحبيبه مدلله
وهسه زينب .. ضلت بلياج دمعه وهامله

من عكب ذيج السوالف .. گلبي اصبح يمه خايف
يمه يمه
........................

اليفكد امه يعيش غربه وكل كيانه ينهدم
وآنه هذا الصار بيه وكوه اشيلن بالهدم

بدار ابوي هواي الج بي ذكريات
شما اصدلهن اموت بلا ممات
يمه بوجودج صدك حلوه الحيات

جنه نكعد .. ومن كلامج يمه ابد ماينشبع
من المحنه .. اعلينه روحج ذايبه مثل الشمع

راحت اللمه ويه عمرج .. يمه بس نلتم نذكرج
يمه يمه
....................

جان كل مصباح منج يترس اعيوني ضوه
وهسه مصباح اليجيني يخنك بصدري الهوه

يمه حته النفس يجرحني بوراج
يلي رحتي ومحد اليعرف دواج
شلون حيدر بالمكابر ودعاج

يالحبيبه .. انتي هذا مجانك بوسط الگلب
صعبه صعبه .. مني ترحين ويغطيج الترب

بليله وحشه ايشيعونج . وانحرم شوفت عيونج
يمه يمه
.......................

ضل ابوي بحزنه حاير بينج وبيني تره
بصايته يمسح دمعتي لو يزور المكبره

هذا يايمه الوكت لمن يدور
حيدره بنص ليل يكصد للقبور
ومن يرد بثيابه اشم ريحة بخور

بيه حسره .. شلون انشده اليله يمن موعدك
ارد اكله .. بويه ليش تروح وترد وحدك

امي ماخلص سفرهه .. اليا وكت تبقه بكبرهه
يمه يمه


#محمد هادي العقابي

قصيدة لاستشهاد الزهراء ع




فاطمه مملكتي وحدي
عمري بس وياهه يبدي

ياروحي تموت الشمعه سكته
ياكلبي بقينه اني وانته

......

بفاطمه عشرتي. شمعه من العشك
عشنه حب بكلب. بنبضه وحده يدك
انه خيط بشمع. فاطمه محترك

الله القرر بأول عمرهه
وهو اختاره الي وكاطع مهرهه
درع نيشانهه وسمعه شكبرهه

من سعف بيتي البنيته
بس قصر بيهه لكيته

عشنه بعازه وتأشرلي سكته
ياكلبي بقينه اني وانته

....

يا ارض فرتج. برحة ام الحسن
غربل الله البشر. كلهه طاحت لأن
بس انه لفاطمه. وصرنه صورة وطن

ام چف الاشوفه بكلبي مرواح
ويطشّر همومي وكلهه تنزاح
شوكي الهه مطر ويشوفه فلاح

تعبت وياي بعمرهه
يجازيهه الله بصبرهه

من اسمعهه شكثر ربي شكرته
ياروحي بقينه اني وانته

.......

شينّسي وينذكر. والمواقف حِزم
صح مره وعاطفه. تعادل شكد زلم
بالحرب چم جرح. داوته ويلتئم

انصحك يالردت بالدنيا تختار
ام لبيتك وماحاجه تحتار
اذا تحب فاطمه طببهه للدار

فاطمه التحبهه تالي
تخلي بيتك راسه عالي

تكلك لو اجه الدهر بغربته
ياكلبي بقينه اني وانته

.......

من تشح وادمك. يعوضك الله بسند
تنتچي مطمئن. كبالك تشوفه سد
واحد يعوّضك. عن الف بالشدد

كل واحد عظيم تشوفه بالناس
مره بظهره عظيمه وترفع الراس
بظهره ام البنين وليدي عباس.

المدرسه لفاطمتي اني
صاحبة كلبي وزماني

بعالمهه شفت حب وعرفته
ياكلبي بقينه اني وانته

........

ام حسن قانعه. بخبزتي والملح
العافيه ترد الي. من وجهه السمح
كلبي اكطعه ولا. فاطمه تنجرح


بكثر خوفي عله الزهره والحجاب
من جذع النخل سويت انه الباب
ردته للستر تالي اصبح مصاب

هذا بسمارك دفعهه
لو سهم طب بضلعهه

چن اخر نفس هذا عرفته
ياكلبي بقينه اني وانته

......

شيعتهه وطن. رتبه فوك المتن
حسين اجه ويالنعش. راسه فاكد حضن
وزينب المستحه. مامشت للدفن

من جوه التراب وتحچي وياي
دمعك مي ورد ماحاجه للماي
دموعك غاليه لاتنحب هواي

هيه ميته وانه حاير
ومارضت تكسرلي خاطر

ظليت احچي ياعمري الدفنته
ياكلبي بقينه انه وانته

.......

نسألكم الدعاء
#حسين صادق العقابي

مرحومه عبرتك
مئجوره دمعتك
علي علي علي ياعلي
#####
ضهرك محني هل يوم مابيك انت عالكوم
دمعك يهمل ادموم ياحامي الحميه
دمعك حكه سجاب فاركت اغلى الحباب
ضلعك انت من صاب مو ضلع الزجيه

وطفوهه شمعتك
مئجوره دمعتك
علي علي علي ياعلي
######
دمعك احمر اسيح وتتمايل وي الريح
وسمع ياعلي اصيح فاركت الحبيبه
بان براسك الشيب جرحك ماظن ايطيب
الغالي رايد ايغيب ياحيدر مصيبه

اتهد حيلك حسرتك
مئجوره دمعتك
علي علي علي ياعلي
######
المن صار الفراك كلبك يا الألم ضاك
للزهره انت مشتاك بيو روح حنينه
ترجف ياعلي اديك افراك الزهره ماذيك
كلشي ضل يبجيك ويامك حزينه

وتتعثر ابمشيتك
مئجوره دمعتك
علي علي علي ياعلي
######
ادموعك تجري انهار وضلمه بعينك الدار
بكلبك تلهب النار فأكد انت غالي
بغياب ام الحسين تكضي اليلك اونين
دم ينزل من العين عالخد ضل يلالي

ولعبره خنكتك
مئجوره دمعتك
علي علي علي ياعلي
######
كواك لله ابو تراب ماحاسب بالحساب
الزهره يضمها التراب وبيتك يبقى خالي
حكك تبجي وتنوح غير مفارك الروح
كلبك غط بالجروح ونك صوته عالي

احا ياونتك
مئجوره دمعتك
علي علي علي ياعلي
######
لزهره بعمر الورود مو مالت هلل الحود
همك ياعلي يزود لو ضمها كبرهه
مالومك من ابجيت للزهره انت حنيت
كلما تدخل البيت تشتمه عطرهه

فركتها كتلتك
مئجوره دمعتك
علي علي علي ياعلي


#######
حسين عبد الزهرة الدراجي

نزله
خادم انه امن الزغر
خادم كظيت العمر
خادم للزهره افتخر ..... يزهراء
**************
انه مجنون الزجيه وما اعوف جنوني
الطم بحركه اعله صدري وخلهم ايلوموني
انه تعرفني النواصب شيعي من عيوني
وثوب الاسود ما ابدله وعلي لو ذبحوني
حزني دوم اعله الضلع
حزني وماكف الدمع
حزني صايرلي شمع .....يزهراء
*********
انه لحضه ما نسيتج وانتي ما تنسيني
اقسم عليج بدمعتي بدفترج سجليني
انتي عيني ولو تركتج ما اشوف بعيني
الج لو مديت ا يدي فدوه لترجعيني
ريتي تبجي امن انهظم
ريتي عنج ما اظم
ريتي تتنفس لطم ...... يزهراء
*********
فاطمه كلش عزيزه ولازم ابجي عليها
والله لو افدي حياتي الزهره ما وفيها
اجفوفي اذا ما تلطم الها المن مخليها
اله من زنودي اكصها وما اباوع بيها
اسكت خليني احترك
اسكت سودني العشك
اسكت ضل كلبي يدك .... يزهراء
*********

المهدي حاضر والمجالس يعتنيها عنايه
وبالبحار المهدي احلف سوه لمه اقرايه
باجر الموعود بيده ايشيل راح الرايه
وللبقيع افواج تبدي تطلع المشايه
مهدي يا نضره امل
مهدي نادينه العجل
مهدي اجمل مستهل ... يزهراء
**********
اليوم خل تسمعني كلها زمرة السفياني
انه شيعي وغير حيدر ما ابايع ثاني
انه مولاي ابو فاضل عالوفه رباني
والله ما اتبره منه لو تكص الساني
شيعي واسمي ايلوك الي
شيعي وماعوفن علي
شيعي انه وكل هلي ....... يزهراء
************
فاطمه روحي وضميري وابد ما انساها
الفاتحه الروح الزجيه واجب انه اقراها
حاجتي تكضيها ادري كبل لا انخاها
اشما اون وابجي عليها مقصر انه اوياها
هيه هيه ام الحسن
هيه تشفعلي غدن
هيه للضايع وطن ........يزهراء
**********
تمت
تحسين الخفاجي

تشتم نفس دخان ،، خانگها بصلافة
كسروا ظلع قران ،، ومحنية الترافة
سورة اوگعت منها وتشم عطاب
اضن سورة محمد ميته بالباب
،،،،،،،،،،،،،،،،،،،،،،
جذوع الباب محترگة ،، وعليها اندفعت بحرگة
والبسمار حار وطگ ظلع محروگ
تبچي والگلب شايط ،، ودمها تارس الحايط
طاح المحسن وما ضاگ طعم اطلوگ

من كثر دفع الباب تهشم صدرها
ومحدبه مثل اهلال صاير ضهرها

ظلت تون وتنوح ،، والحاقد صفعها
خدها ازرگ ومجروح ،، وتلوذ بوجعها
حورية علي وضربوها الاجناب
اضن سورة محمد ميتة بالباب
،،،،،،،،،،،،،،،،،،،،،،،،،
السواط التوى بيديها ،، وهجموا كلهم عليها
وبصفاحيها يطعنها النذل بالسيف
فاطم حيل تتلوى ،، وتجر بالنفس گوه
ومن تگوم بالحيط تگض يا حيف

من بعد طعن السيف وكسرت ضلعها
محتارة تلزم بيش وكلشي وجعها

صاحت فضه لحگي ،، ركضي وسنديني
خل اشوف ابني ،، طيحولي جنيني
راحت يمه تبچي بدمع الامصاب
اضن سورة محمد ميته بالباب
،،،،،،،،،،،،،،،
يم اوليدها گعدت ،، ون الفاگدة ونت
شافت مو طفل بالعتبة ميت نور
بهضمها تنظر الزهره ،، جرح منطبع بصدره
اثاري الضلع عظمة بصدرة ظل مكسور

گامت تلؤلي اهواي وتشرگ بشهگة
وتبوسة ظلت حيل تشمة وتشبگة

ضناها تغسله بدموع ،، متروسه محنة
وتگل الفضه وتلوع ،، خل حيدر يدفنة
انذبح طفلي يفضه من الاصحاب
اضن سورة محمد ميته بالباب
،،،،،،،،،،،،،،،،،،،،،،،،
خذتها فضه سندتها ،، وبحجرتها گعدتها
وتشوف الدم يخر من فاطمة للگاع
تشد يا جرح محتارة ،، من الباب ونارة
وشيطيب الجروح البيها صار اوداع

گعدت قرة قران الزهره بحزنها
واشتاگت اهيه اهواي تروح الابنها

مثل الشمس تنباگ ،، المغرب من يضمها
شهگة شهگة افراگ ،، وماتت من هضمها
علي هالليله يدفن اغله الاحباب
اضن سورة محمد ميته بالباب
،،،،،،،،،،،،،،،،،،
الحسن وحسين حضنوها ،، ميته وتون سمعوها
وگعدوا بالمغيسل ودعوها بنوح
علي غسلها بونينة ،، وشاف جروحها بعينة
خايف من چفنها يلچملها جروح

مثل الخيال يشوف صاير جسمها
والچفن من شداه نزت بالمها

شيع علي بالليل ،، عافيتة ام بيتة
قالع خيبر يميل ،، ويخط بمشيتة
دافن حيلة حيدر جوه التراب
اضن سورة محمد ميته بالباب

محمد جهاد المياحي

آه يعمري الي خلص لوعه ومناحه
ليلي اظلم ما طلع بعدچ صباحه
بالمصايب گلبي ذايب
****
زينب ودهري فجعنــي مـن البدايه
وادري بحــزاني تظـل حــد النهايه
بـاب دارچ فاتحــت كـــــل الرزايـا
چنــي ادري بدفعتـــه نمشي سبايا
صــار اظلم من بعد ليلـچ نهاري أوحشت أيامي بدت من هاي داري
مــن النوايب گلبي ذايب

****
عمري خمس اسنين نعشچ فارگيته
أودعيـــت الـــروح لمــن ودعيتـــه
سنيني كلهن دمــــع لفراگــچ بچيته
وما نسيت المحسن أبداٍ مـــا نسيته
هـــذا أول ليل يفجعنــي وداعــه ومركب إحزاني بدت قصة ضياعه
عالحبايب گلبي ذايب

****
يمه ونّــه بگلبي شيوصف حـزنها
ونّــت الشالـــو أبليل اظلــم ظعنهـا
ريت تعمه عيــوني لو يرمد جفنها
بعد عينچ روحي راح يطول ونهـا
يمه بعدچ يا ونين يسلي روحي ولو أنوح العمر ما ينفعني نوحي
دمعي ساچب گلبي ذايب
****
ضلعــچ المكســور حين الــي نظرته
يرســم حسين وخيــول أتدوس جثته
يمه نــار الباب مــــا تبـــرد جمرتـه
تبقه هاي النار وي گلبــي وحسرته
نــار بابــــچ والخيم تسعر سويه وچنه ليل اهـدعش ليلچ هالمسيه
عالاطايب گلبي ذايب

****
حســرت اوداعــــچ ييمه عذبتنــي
والمصايب بعـــد عينـــچ رافگتنـي
عالمناحـــه الدنيا بعـــدچ عـودتني
بنبلة افراگــــچ رمتني وما خطتني
يمـــه چنت اتمنه ويـــاچ المنيه ولا اظلن وحـــدي يوم الغاضريه
بدري غايب گلبي ذايب
****
الشاعر
موسى البديري

گالو وأن يبن الحسن دار الله بيها أم الحسن
هجموا وحرگو يا باب باب الزچيه الزهره
*
يوميه ندعي الباري يظهر أمرك
يبن الحسن ثارات تدري اتنطرك
يالصابر وملْ الصبر من صبرك
نار الصبر تسعر جمر يوميه أمك تنعصر
غدر السقيفه لهل اليوم يالغالـــي يلهب جمره
*
صاحو وان عالزهره گالو بالدار
ما چنها بت الهادي طـه المختار
ثار أبـدر يردون ردت هــل الثار
سيف الفحل يوم الحمل لاخلّه لات ولا هبل
ومــن الزچيه الأوغاد ردو الثــــار ابكسره

*
جمعو حطب عالباب بـاب الرحمن
وسورة الكوثر لاذت وي القــران
شانئ محمد بيهــا وجّو نيــــران
ومن السور ظلع انكسر أواضح على الكوثر أثر
سطره أعلى خد الآيات ما تنمحي هـــل السطره

*

يالمهدي ظلع الطاهره يريد الثار
ما يشفه الا بطلعتك هـل البسمار
بــاب الزچيه مــا طفت منه النار
أتشب مهجتك أخيمْ عمّتك نار ابدليلك حرگتك
وأدريها اكبر كل نار عمتك مشت متيسره

*


نـور الله ليش أبليل حفــرو گبــره
وليش اختفى لليــوم گبــر الزهره
يا يوم يا ابن الحسن انته أتظهره
وتبني الصحن يبن الحسن ونگصدها وأنوح أبشجن
وأنادي يم الحسنين بس رايتـــچ منتصره

*
الشاعر
موسى البديري

قصيده ميمر للزهراء عليها السلام
&&&&&&&
ياطاهره شنهو الجره شسويتي
وانتي الذي ابيت النبي تربيتي
يم الحسن..شفتي المحن... يم حسين
بعد النبي اتاذيتي
&&&&&&
يم الحسن يافاطمه المظلومه
بعد النبي شفتي الظلم واعلومه
عشتي العمر يم الخدر مالومه
بين الدمع بين الغدر مهظومه
شفتي القهر...ضلع انكسر
وردوا عليج الأشرار
ياطاهره شسويتي
&&&&&&
كلوله تدري الدار بيهه الزهره
كلهم وان يافاطمه ياعتره
نار وحطب كون وعليهه انسعره
حيدر يبايع مانعوف الفكره
ياهو اليظل... شنهو الحصل
يوم الرزيه اللي صار
بت النبي اتجازيتي
&&&&&&
شنهو البده منج ياحره وعادوج
يافاطمه انتي الاصيله واذوج
عمدا اجوا للباب همه تعنوج
باجر خصمهم رب العلا الضربوج
شينفع بعد... يامعتمد...
يوم الحشر بيه النار
ياطاهره وحنيتي
&&&&&&
كل الاسف حيدر وصيه تلزمه
وسيفه بيمينه وياهو يوصل يمه
فارس مضر ماهزته كل كلمه
من شافج بهالحال زايد همه
كلبه التهب... بنار الغضب
حيدر علي حامي الجار
من شافج اتاذيتي
&&&&&
انشلت يمينه اللي دفع باب الدار
وشل الضلع ويه الطفل والبسمار
عصره بحقد بيهه يطلبوج بثار
ومحسن سكط يافاطمه وشب النار
صحتي بالم... ضلعي انهشم
يم الحسن حيلج راح
وبمحنتج ونيتي
&&&&&&
يافاجعه بيوم الاجل يالبضعه
حيدر يعاين يامصاب يجرعه
كسر الضلع لوذاك اثرالصفعه
هام ونوه يلبس عليهم درعه
لكن وسف... رد اوكف
يوم الراد
الهادي يصيح وصيتي
&&&&&&
صبرك جبير وماكو واحد شاله
شفت القهر ياسيدي بهالحاله
دمعك عليهه ياحيدره يتلاله
بيدك تنزلهه الكبرهه جماله
من غربت..روحك مشت
ليهه تريد
كلتلهه شو مليتي
&&&&&&&
خادم خدام الحسين عليه السلام
الحاج ابو إياد البيجاوي

#تراث

عگب عزنه علينه الدهر ينصاب
فجعنه وخله دمع العين ينصاب
أنه بت من ومني الضلع ينصاب
أو حمايه إمگيد إبحبل الوصيه

ثجيل الهم عله دهري يفضه
تراكم والصبر عني يفضه
سگط محسن دلحگيلي يفضه
يتمني الدهر وإنگطع بيّه

نشر حزنك عله راسي علامه
يبويه إو دم تهل عيني علامه
إبوجهي ظلت السطره علامه
أجيك إو شوف شنهو الصار بيه

عله عيني يمر النوم بسمار
شهد ما شفت من دنياي بسمار
عليله والضلع مصيوب بسمار
أنازع وأجرع إبچاس المنيه

للمرحوم الشاعر
كاظم المنظور الكربلائي

#اللهم_عجل_لوليك_الفرج

الفاطميه
.
.
.

ويـن .. ماخـذ اعيـوني الـسهـر
ويـن .. اســئـل وكــلــي قـــهـر
ويـن .. ام گلب الابيض يادهـر
وين فاطمه

________

فارگتــني .. وتيـهت روحـي تــره مــن فارگـتني
عذبــتــني .. فاطــمـه مــن يـوم راحـت عذبـتني

علي المعروف بالحومه يهزها بطاري بتـاره
وهـسه بمـحـنة الزهـره گامت تهـتز اكـتاره

وين .. گمت احس ظهري انكسر
وين .. اســئــل وكــلــــي قــــــهر
وين .. ام گــلب الابــيض يـادهر
وين فاطمه

________

من الجروح .. گلبي مابي صوب صاحي من الجروح
فجئة وتروح .. ماحسـبت الزهـره عنـي فجئه وتروح

عليها موحلو التابوت عمرها اثمنطعش سجده
چانت ورده بچـفوفي شـجاها وذبلـت الــورده

وين .. عطر هالـورده اسـتقر
وين .. اســئـل وكــلــي قـــهر
وين .. ام گلب الابيض يادهر
وين فاطمه

________

الفاگد الروح .. يادهر گلــي اشـيسوي الفاگد الروح
چني مذبوح .. عگب شمعة بيتي اشعر چني مذبوح

الدمع وي خدي متمالح وچن بينـاتهم عشره
وعرفت ابهاي عشرتهم لمــن راحـت الـزهره

وين .. التــركت ابخــدي أثـر
وين .. اســئـل وكــلــي قـــهر
وين .. ام گلب الابيض يادهر
وين فاطمه

________

شيعــتها .. وللــگــبر بيـــديــه روحـــي شيعــتها
وســدتها .. وانــه لـســـه مامــصـــدگ وســـدتها

نسيت وصحت يالزهره وهيه بسمي ماصاحت
زينب سمعت اسم امها راسـاً عالارض طــاحت

وين .. لمن اسـم امـها انذكر
وين .. اســئـل وكــلــي قـــهر
وين .. ام گلب الابيض يادهر
وين فاطمه

________

الخالي بيته .. امن الحنان الله اليعينه الخالي بيته
ومــالگــيته .. ضوه وجـــه الزهــره ادور مالگــيته

أتوچــه عــلى صبــري انحيت وبيه ماضل حيل
البيت اخلافها اضلم شمس الله اخــذها اللـيل

وين .. لاشمــس بـــي لاگـــمر
وين .. اســئـل وكــلــي قـــهر
وين .. ام گلب الابيض يادهر
وين فاطمه

________

من هجرها .. ابصدري احس بسمار نابت من هجرها
وشــكبرها .. نــار حــدر اضــلوعي وجــت وشكبرها

عيــني امــگابله العـــتبه وكل ساعه اقره بالمقتل
ومن اخلص يگلي حسين بــويــه عــيده مــن اول

وين .. ايگلي خد امي انسطر
وين .. اســئـل وكــلـــي قـــهر
وين .. ام گلب الابيض يادهر
وين فاطمه
________
تمت والحمد لله
حيدر تركي الكربلائي

الفاطميه
.
.
.

للـزهره حـزنان الـورد آ يا حسافه
يالوسدت فوگ الرمل خد الترافه
يامن دفنت الصبح
حـقـك اذا تنـجـرح
ياعلي ياعلي

___

ارد اسـئلـك ياعـلـي ابدمـعـه جـريه
اشكبره صبرك چان ياحامي الحميه
انـته من شـيعــت عطـر الله ونبــيه
شلـون متـنك شال تـابـوت المنــيه

شايل على متونك نعش لو شايل الكون
اهل السمه واهل الارض حگهم ينوحون
الدمعه اعله فاطم رمح
حـــقــك اذا تـــنـجـــرح
ياعلي ياعلي

___

باللـــحــد ياعـلـــي لــَمن وســـدتها
اشيوجعچ يم الحسن هم ناشدتها
من فتحت الچـفن يمكـن شاهدتها
بعـده ازرگ ياعـلي لو طـاب خدها

مـحد يـلومـك انـته لـو بالعـمـه حـسيت
وبيدك يحيدر بالگبر شمس الله حطيت
هالحچي من ينفتح
حـقـك اذا تنــجـرح
ياعلي ياعلي

___

لاتـون يـم راسها تـدري ابـوضعها
خـاف تـسمع ياعـلي وينزل دمعها
فاطمه تـدري البچـي يلچم ظلعها
وانته اكثر واحد اليدري ابـوجعها

الدافن حبيبه بالگبر خل يبچي بسكوت
ومحد يلومه ياعلي المن البچي ايموت
يالمدمعك بـي ملح
حـقـك اذا تنـجـرح
ياعلي ياعلي

___

محني يابو حسين ليش اشكبره المصاب
الله وحــده ايســاعـدك ياقـــالــع الـــباب
علــى راسـك حقــك امـن اتطـش التراب
رمـش عـينك ياعـلي امـن الفـاجعه شاب

ياقالع الباب اشعـجب تتـعـثر اشبيك
اجروح الوديعه ياعلي بس لا تأذيك
يالمنهدم لك صرح
حـقـك اذا تنـجرح
ياعلي ياعلي

___

باللـحد مـن نزلت بـيـدك حـياتك
انترس گبر الطاهره من نايبــاتك
يمهـا لـَمن سولـفت عـن ذكـرياتك
انته من ذاك الوكت حانت وفاتك

ميــت ولكــن هالــنفـس تتــنفــسه دين
لجل الحسن متداينه وزينب والحسين
والنفس لمـن يشح
حـقـك اذا تنـجـرح
ياعلي ياعلي

___

الفـجر صار وبالگـبر انـته رمـيه
امتانـي عزرائيـل يلفيك ابمـنيه
اتصـيح ياسلمان اذتـني الـرزيه
اتراب گبر ام الحسن هيله عليه

بلكت امـوت وانـدفـن وي نـور عيني
بلكت اذا اموتن يخف نوحي أونيني
يالبلحـزن منــذبح
حـقـك اذا تنـجرح
ياعلي ياعلي
___
حيدر تركي الكربلائي

صحت ودمعي سجاب اشسوه بضلعج الباب
الحضنج يمه حنيت وحشه بدونج البيت
***
مات خلك الدنيه يمه بكسر ضلعج
وحته ما لحكت احضننج واودعج
هواي جنت ارتاح يايمه من اسمعج
تنطفي أحلام الورد من يطفه شمعج

يكتل يمه الفراك وراح الصوتج اشتاك
انحب وحدي ظليت وحشه بدونج البيت
********
يالحنينه اهواي مشتاكه الحنانج
رحتي يمه وياهو اليعوض مكانج
شمحله جلمة زينب اسمعها بلسانج
يمه ما يرحمني من بعدج زمانج

راح اتعذب اهواي وماترحمني دنياي
كبلج ميته ياريت وحشه بدونج البيت
*****
كمت للباب أمشي يوميه وكلمه
والمكان الطحتي بيه اكعد وشمه
بدمعتي عله الكاع حضنج يمه أرسمه
وعله ايدج اغفه كلت اشويه يمه

شسوه بحالي الغياب نمت بحضن التراب
من الفركه سليت وحشه بدونج البيت
*******
أمي حيل تغيرت حته بمشيها
تمشي محنيه غدت ويلي عليها
الله لا ينطيه الباب اشسوه بيها
من تون تلزم ضلعها أمي بديها

ذبلت فاطمه بساع تكوم وتلزم الكاع
بزينب عمله سويت وحشه بدونج البيت
****
أمي طيبه وأمي أميره وأمي جنه
أمي ذيج الماتت وياها المحنه
أمي خيمه ومنها ياناس انحرمنه
وهسه صرنه بلايه خيمه ومحد النه

ماتت أمي ياناس ومات وياها الحساس
بحسرة ودمعه ناديت وحشه بدونج البيت
*******
أمي شمعه ونطفت بأول عمرها
أمي ورده ولليتامه انطت عطرها
أمي خلف الباب والظالم عصرها
ونبت البسمار ياناس بصدرها

سطرو أمي عالعين وصاحت يمه يحسين
من الدنيه مليت وحشه بدونج البيت
*******
تمت
ميثم العمري

شتكفي لجروح الضلع..اثلث روايات*
للزهره مخلوق الدمع..گبل السماوات*
چانت ضوه گبل الزمن*
واعيونه اعليهه بچن*
للزهره مخلوق الدمع..گبل السماوات
.....................
دوّرنه للدمعه سبب يا اجمل اسباب الدمع*
فكينه بيبان الوجع والگينه نيشان الضلع*
بالحايط الاخ ابتدت واتلمست بس الاثر*
شمينه كل خطوه عطر سايل ابگد ذاك الدفع*

يا مال الله شمالهه وياچ الناس*
یستهضمون ايصير اخو للعباس*
واگبال زينب طاح بالباب انداس*

يالبابچ ايوگف نبي..يستأذن ايفوت*
اشلون يوصله اجنبي..بيه ريحة الموت*
ادموعنه اهنا فرفحن*
واعيونه اعليهه بچن*
للزهره مخلوق الدمع..گبل السماوات
......................
واتلونت كل الارض بأحمر وطاحت كل شمس*
صوفر النرجس من وگع طولچ وتبچين ابهمس*
وانفل شكو ليلو وعقد من طيحتچ فز العرش*
من عين زينب دمّعت عباس بالذر بيهه حس*

بسمارهم خلّف ورث مال اسهام*
والسان نار الباب سولف بخيام*
رسمو طريق السبي وانخط الشام*

واتطشرت زينب نده..من دفعو الباب*
اول جرح بيهه بده..من صار المصاب*
اول مواجعها بدن*
واعيونه اعليهه بچن*
للزهره مخلوق الدمع..گبل السماوات
........................
يا سيدة كل الحزن بيچ ابتده درس الذبح*
معروفه لوعات الجرح من يندفن بين الملح*
جرحچ عبر كل الزمن واعرفنه شيسوي الضلع*
وحبينه من ذاك الوكت آلامنه وهذا الجرح*

واليفهم آهاتچ يصیر احلا انسان*
بيچ استدلينه العشگ للعطشان*
وعرفنه لطفچ صار كهف الحيران*

اليبچي لمصابچ دمه..معناها مرزوق*
الما يحترگ يا فاطمه..لا ماهو مخلوق*
خلينه نبچيلچ زمن*
واعيونه اعليهه بچن*
للزهره مخلوق الدمع..گبل السماوات
............................
ما ندري حيرتنه تضل بگلوبنه الحد يا زمن*
ايامچ التوجع بدن وادموعنه هنانه بقن*
يحتاج شباچ الدمع مولاتي خاطر يستقر*
ما ينطفي هذا الجمر الا بضريحچ يستچن*

والمهدي يسمع كون هاي الاخبار*
كون اليحب ابروحه تاكلهه النار*
يم گبرچ ايسافر ويحچيله الصار*

والمختنگ يهوى البچي..يا أم الحسين*
الدمع احلا امن الحچي..بسوالف العين*
يم الجروح الما هدن*
واعيونه اعليهه بچن*
للزهره مخلوق الدمع..گبل السماوات
............................
هوه الحزن من ينشتل بالروح ما يطلع ابد*
جرحچ شتال الله وكبر بينه ونحس طعمه شهد*
خير الدمع والله اشكثر بس ليش گبرچ يختفي*
للماي يسعى الريجه غصّ يا ماينه ومنّه انفگد*

چا وين يمشي الدمعه حارگله اعيون*
ترتاح عالشباچ ندري اليبچون*
يمّ الحسن بدموعنه التجري اشلون*

يا چادر ايكفي الحزن..للعنده مفگود*
حگه العمر كله يون..وابصفنته اينود*
اثارچ اعلينه اختفن*
واعيونه اعليهه بچن*
للزهره مخلوق الدمع..گبل السماوات



علاء المياحي
الفاتحه لروح والدي

الزهراء ع

آنه وانتي همنه واحد يالاميره
حرگة الدار وسطرتي مو لخيره
العتبه تلّه اتصورتها
ولوعة امتونچ عشتها
+++++++++++
زينب الفتره العشتها ابابي بثناء الجريمه
عايشت بعض المآسي الغربة حسين وحريمه
النار والفزعه اعله حرمه امدلـله وتنطگ عظيمه
وانتي خليها اعله بالچ هم تمر بيج الهظيمه

اهناكه بالخمسين عمرچ يالحبيبه
والاميره ام الخدر تصبح غريبه
ال آه من قبلچ صحتها
لوعة متونج عشتها
----------------
آنه والمحسن وحدنه يمه واجهنه امرنه
چنها خيل اترض علينه عصرت الباب العصرنه
صحت الا من يحمي ضلعي حته عابس ما حضرنه
لا نهر يمي ويجينه ابرايه عباس انتظرنه

وانتي خمس سنين واعليه ركضتي
من وصلتي يُمه بالعتبه وعثرتي
كسره لبعينچ شفتها
لوعة متونج عشتها
+++++++++++++
هم عشت لحسيني حاله مو سهم بسمار اجاني
بس فرق من طر چبدي چان مايابس لساني
اوگع وبالحايط انهض وانزفت والدم خذاني
ثگلت اجدامي بتعبها وسوطه يازينب ولاني

مثلي هم اتموت طفله امن البواچي
هم يتيمه وسطره سلبتها التراچي
من رقيه اتذكرتها
لوعة متونج عشتها
+++++++++++
وشوغة المحسن يزينب ذاك عبد الله يعيده
ماكمل شفاف جسمه المحسن وجرحوا وريده
من گطع نفسه جنيني گام يشبگ ضلعي بيده
من وگع حاولت اگمطه شفته كلشي مايفيده

اشويه دمه ماترس چفي الغرفته
خوفي سگف البيت يوگع لو شمرته
شيلتي بدمه اصبغتها
لوعة متونج عشتها
+++++++++++++
والحزن هم بي وراثه آنه يازينب ورثتچ
الحرگه واللوعه وسطرتي وعالمتن مثلي ضربتچ
آنه عالعتبه وگعتي وانتي عالتله وگعتج
دار الاحزان آنه وني وبالخرابه انتي گعدتج

يمه بس انتي الحبل زاد بعذابج
بالهزل والشـام يتميـيز مصابچ
والمجالس ما شفتها
لوعة متونج عشتها
+++++++++++
ثائر الربيعي

غميج الجرح بي رايه يواسيك..
علي كل عمري ابد ماظامه اعليك..
هل مره ااسوالف خاف تاذيك. ..
يسولفلي الجرح ماكلك شبيك…

بس تعذرني هل مره… تعرف فاطمه الزهره..
بام اولادك انت ادره… .ماظميت بس كسره..
وماظميت بس سطره..
وماظميت بس عصره…

شكبرها ادريبك جروحك… صارن عله كد روحك..

اظم عليك وانت اتظم… اعرفك جارع انت السم..

اظم عليك خد مسطور… ازرك والعيون امورمه وحمره…
وتظم عني جرح مفضوح…. حسرتك سولفتلي وطلعت سره..
حملت جروح يابو جروح… بس اغمج جروحك جرح هل مره…
راسك بالركب وتنوح… وجرحك من يخيطه وابد مايبره..
روحك علي راح تروح… ونشف دم الوريد ومابقت كطره…

اليظم عن صاحبه مو صاحب وخوان…
السراب يكله ماي وصاحبه عطشان..
النكر زاد وملح ماينحسب انسان..
الصاحب لو غدر ماجان بالحسبان..
للعنده وفه الاحسان يجزي احسان…
مو يتحزم وعالباب شب نيران..
ولا بت النبي يعصرها عالحيطان…

خفت عل ستر يابو حسين… رعم ما سطره فوك العين…
ادور ياعلي بس وين… اجيب الدحه الباب منين
الزين وجتفاه اشين… اركاب الكفر تطلب دين..

الباب وثارها ضلوعي… نار والطفت اشموعي..
صاحت فاطمه لوعي.. ومن دم سالت ادموعي..


شكثر كسر الضلع يحزن… حزني اكثر عله المحسن…
والدلال يبقه يون… المهد خااي وعله ابني يحن…

من الضلع والاولاد… ابهم وهم عليه زاد…
كل سا من يمر ينعاد… طاري الباب ماينراد ..

زينب خلي تتحظر ..زينب حافيه وتنجوي بنار خيام ..
وعرجه النوك تركبها… .ولو ميته العقيله وماتطب للشام..
ادري بكربله وحسين… جرح جوه الضلع لاهود ولا نام…

اعرف ناره من جوتني هاي النار..
سير يمه ضلعي وهل عليه خطار
ضلعي وضلعه يتكسرن يحامي الجار
خيول ادوسه عينه اعله الخيم تندار
ينام اعله الرمل والرمل يجوي وحار


نسالكم الدعاء
احمد الطيب الحلي
14/11/2020
27ربيع الاول
السبت

مهديكم عالابواب خل يظهر عجلوله
فرض الحُب والاشواگ بالـمدمع صلّوله
اتحنون واتلطمون عالزهراء وامصيبتهه
كـل عـام ياخدّام مأجــورين ياشيعتهه
واسوهه واسوهه
ــــــــــــــــــــــــــــــــــــــ
يالـمن فاضل الطينه انخلقتو
ومن حر العشگ بيــكم حراره

طيّبتو الضلع كلما تلطمون
والباب ابّچيكم تطفه ناره

الزهره ابلا گبـــر وانتم تحنّون
شوگ اهواي بيكم عالزياره

وحباً واحتراماً لاُم الحسين
دمعكم بالارض خضّر منـاره

بالمجلس من تقرون يتشكر من عدكم
امكم هالرايه اتكون والمنبر والدكم
والخير كل الخير بام حسين وبخدمتهه
كل عام ياخدّام مأجورين ياشيعتهه
واسوهه واسوهه
ــــــــــــــــــــــــــــــــــــــ
كل مابابكم تندگ تذكرون
العصره ويوسف الزهره وظهوره

وخافن تنلچم فوگ الحياطين
بالبسمار ماعلگتو صوره

كل خادم خدم لجل الدنانير
ينذل يا لله إيحصل إجوره

بس اليخدم الزهراء سلطان
الزهره ابيتهم هيّ التزوره

هنياله اليجري العين والدمعه التشفعله
يدخل جنة الفردوس والزهره اتوقعله
ترعاه وماتنساه وفوگه اتفيض من رحمتهه
كل عام ياخدّام ماجورين ياشيعتهه
واسوهه واسوهه
ــــــــــــــــــــــــــــــــــــــ
راحت فاطمه وظل موحش البيت
وحيدر ظل جليس الدار حقه

شتسوي الشمس والناس عميان
مايستاهلون الرحمه تبقه

ماتت والحسن لو ياخذه الشوگ
بالمصحف يگلّب ورقه ورقـه

ماتت والحسين ايصيح يارب
الباچـي عالضلع مجلس ارزقه

امن المهدي البيت احزان فاطمته المظلومه
ضجو ونادو ابيا ثـار عين امنه الملطومه
و تنهار ليل انهار يم الباب زينب بتهه
كل عام ياخــدّام مأجورين ياشيعتهه
واسوهه واسوهه
ــــــــــــــــــــــــــــــــــــــ
الگاع ابلا خضار ونيّة الغيم
تمطر من يجي المهدي بسلامه

الزهره امراية الله البيهه ماشاف
اعمه ينحشر يوم القيامه

الماباچي ابعـــزاء لا تعتب اعليه
گلبه من حجر واعيونه جامه

اللايم گـــــــله باچر موعدي اوياك
كل انسان يُحشر وي امامه

الـمايعرف منو مولاه كالجاهل يتحاسب
الساطر عين الزهراء لابد أن يتعاقب
الموعود من ايعود يسطع نور من گبتهه
كل عام ياخدّام مأجورين ياشيعتهه
واسوهه واسوهه
ــــــــــــــــــــــــــــــــــــــ
بت اثمنطعش وابعمر الاورود
زهره و دافعت عن الولايه

الماسامع بچيهه أبيت الاحزان
صُمٌ بـُكمٌ امنزليله آيـه

ماتت بس بقه أعله العين نيشان
خدّهه ايواسي بمتون السبايه

لذلك الله سوّه اتلث روايات
لان متكفـي للزهـره روايه

والاذاهه البسمار حالتهه ياحاله
يمكن تنزل من نار دمعتهه السياله
الاكوان بالاحزان تصرخ آه من شهگتهه
كل عام ياخدّام مأجورين ياشيعتهه
واسوهه واسوهه
ــــــــــــــــــــــــــــــــــــــ
الله ايصيح باچر غضو الابصار
خل اتجوز فاطم بت ابوهه

بيديهه طشت واتگول يارب
لِـمـَه هاي الچفوف ايگطعوهه

واگماط الطفل عبدالله ياناس
سوط ايصير وايعذب الولوهه

وزينب تشتكي إويزعل العباس
وايبدي جنهم عالسبـوهه

والمحسن صاير شيخ ديوانه ابگد اسمه
وايعزّب للخطـار وبلسانه احروف امه
والنار والبسمار ميدخلون في جنتهه
كل عام ياخدام مأجورين ياشيعتهه
واسوهه واسوهه


محمد الجماسي

ودعني مثل الدمعه وتودعلهه عين
يا ابا الحسن والمُلتقى عِند الحُسين
موعدنه يم نار الخيم
نتلاكه من يوصل سهم
عِند الحُسين
●●●●●●●●●●●●●●●

تدري هاي الليله آخر ليله إليه
وهايه آخر كعده نكعدهه سويه
ياعلي موعدنه بارض الغاضريه
لمن ايسمون زينب يا سبيه

خل ننسه موضوع الضلع والفاجعه
وسولفلي باليحني الظهر عالمشرعه
بالنايم وشابك علم
نتلاكه من يوصل سهم
عِند الحُسين
●●●●●●●●●●●●●●●●●

كوم ودع فاطمه إوداع النهايه
ياعلي وخل نتفق من البدايه
آنه فوك حسين اضلل بالعبايه
وانت صَبّر زينب ولم السبايه

بسماري هيّن ياعلي يم النبل
والنبله ياحيدر فلا ترحم طفل
مثل الورد وتشربه دم
نتلاكه من يوصل سهم
عِند الحُسين
●●●●●●●●●●●●●●●●●

يا علي وهذا الطلب منك اريده
بيدك اترجعلي روحي يالصميده
لبني اروحن حافيه واكطع البيده
كبل سيف النايبه وكطعة وريده

ويه السهم ذاك اليصوب جبدته
نتلاكه يم صدرره ونقبل جبهته
كبل الحجر كبل الألم
نتلاكه من يوصل سهم
عِند الحُسين
●●●●●●●●●●●●●●●●●

إبعلمي باجر يا علي اتفر الضعينه
حسين طايح عالوجه ومكطعينه
بصوت انادي هلله هلله حسين وينه
ما نخلي عاري واندفنه بإدينه

آنه ضلع واحد يأذيني تره
وي عمت عيني ضلوعه كلهه امكسره
وبي ضلع واحد ما سلم
نتلاكه من يوصل سهم
عِند الحُسين
●●●●●●●●●●●●●●●●●

ياعلي ولو جيته كبلي انتظرني
كله امك جايه وخله إيعَذرني
تدري بالمكسور ظلعه ايصير محني
وآنه محنيه وظلوعي يوجعني

يالوالي كون اتعطلت عن الذبيح
معناهه امشي واعثر وكل ساعه اطيح

وكل ساعه اصَبّر بالجدَم
نتلاكه من يوصل سهم
عِند الحُسين
●●●●●●●●●●●●●●●●●

ش/علي الإبراهيمي

يم باب الدار .. صحب الكرار
كعدوا يبجون .. وكلهم عمار
شتاكينه هواي العلي
شتاكينه هواي العلي ●●●●●●●●●●●●●●●

طالت غيبة الوالي
وإجوا يم عتبته يبجون
علي بالمسجد اصحابه
فراده كاموا ايصلون

كلشي خلافه اتغير
فجأه وضيعوا حيدر

مرت ايام .. وما واحد نام
وحيدرهم غاب.. والساعه بعام
شتاكينه هواي العلي
شتاكينه هواي العلي ●●●●●●●●●●●●●●

دكوا بابه بس صاحوا
واويلي اعله ذيج الباب
يحيدر حيل مشتاكين
ما حنيت للأحباب

إشبكوا حيدر على طوله
فداك الدنيا كلوله

تفداك انحور ..تبجي ومكسور
الدنيا بلياك .. ظلمه بلا نور
شتاكينه هواي العلي
شتاكينه هواي العلي ●●●●●●●●●●●●●●

صفك جفينه داحي الباب
وكلهم بيه لتلومون
تره الهالساعه يصحابي
ما ادري ادفنتهه شلون

لَهَسه ابداري احاجيهه
يفاطمتي اناديهه

جانت سلواي .. وبسمة دنياي
زادتني هموم .. صيحتكم هاي
شتاكينه هواي العلي
شتاكينه هواي العلي ●●●●●●●●●●●●●●

بعد جلمة صباح الخير
امنين أسمعهه يا عمار
سهله الباب بدلته
بس شلون ابدل الدار

أصد عالرحه بجروحي
واحسهه تطحن بروحي

الفاكدله احباب.. عينه اعله الباب
تاذيني هواي.. جلمات اعتاب
شتاكينه هواي العلي
شتاكينه هواي العلي ●●●●●●●●●●●●●●

الكبر وسعته يا عمار
خافن ينلجم خدهه
إدفنت روحي بهذاك اليوم
وصرت بهداي اوسدهه

لجن البينهه وبيني
اكبر من كبر طيني

تمنيت الموت.. وكون ابتابوت
ومن انداريت..لن اسمع صوت
شتاكينه هواي العلي
شتاكينه هواي العلي ●●●●●●●●●●●●●●

ش علي الابراهيمي