قصیدة أجمل خلقة
ـــــــــــــــــــــــــــــــــــــــــــــــــــــــــــــــــــــــ
یا أجـمل ما أخلق رب الـکون
کلشي ابچـلمة یا یمه مرهون

أمي و صارت تستاهل لعیون(2)
ـــــــــــــــــــــــــــــــــــــــــــــــــــــــــــــــــــــ
صبح الله أبوجها ینکشف نوره
من الجنّه أمي أبّیـتنه صـوره
من تفتح جفنها وتغفه عین اللیل
سوالفها اویه الله تنحسب سوره

أمي ابشیبتها أتغازل للوان
من تلبس شیلتها ابصبح البان

گلب أمي و شیبتها نفس اللون
أمي و صارت تستاهل لعیون
ـــــــــــــــــــــــــــــــــــــــــــــــــــــــــــــــــــــ
أمي اویه الحنان انولدت ابساعه
خلگ اللیل هیّه الغیرت اطباعه
یعشگها الهوه لمن تجر لأنفاس
خالـقها ألإلاه ابکامل أبـداعه

یا یمّه و هالچلمه البیها احساس
حضن اعیوني الوجهچ بس ینقاس

لا مو لیلیٰ وحتیٰ أصبح مجنون
أمي و صارت تستاهل لعیون
ـــــــــــــــــــــــــــــــــــــــــــــــــــــــــــــــــــــ
أمي اویه الترافه أبچفها عدها اسرار
من تخبز یشم خبزتها سابع جار
من گد المحنّه البیها تخبز خیر
تطبخ للیجي و الراح لیل انهار

أمي و یا أمي و یا أم الخیر
خیرچ متعدّی و واصل للغیر

غیر الدمعه ما تملک لجفون
أمي و صارت تستاهل لعیون
ـــــــــــــــــــــــــــــــــــــــــــــــــــــــــــــــــــــ
بحجاب أمي لون الدنیا لون اغروب
من ترفع چفوف السمه ابچفها أیتوب
چـفـي أمي مزار و لو ردت أدناه
کون أتوضه و إلمس منها چف النوب

کل عمري و کل أیامي و دنیاي
أمي الماي الیعطش لیها الماي

أشما گولن أوفیچ آنه المدیون
أمي و صارت تستاهل لعیون
ـــــــــــــــــــــــــــــــــــــــــــــــــــــــــــــــــــــ
کلمات خادم الحسین ع
عبدالامیرالناصري

هاذي أمي
———————————————
هاذي أمي..یلّي تسألني أعله أمي أبهالحیات
هاذي أمي..خیط من شیلتها یسویٰ الکائنات
هاذي أمي..من صفات الله شفت بیها صفات
هاذي أمي..لازم أتوضّالها مثل الصلات

أمي أبعین الله وزّع چفها خیر
هیّه تدعي او الله هم یدعیلها
لو تحت رجلینها الجنه تصیر
چا عله الراس الله شمخلّیلها

هاذي أمي
———————————————
هاذي أمي..من حنان العدها لولت للحمام
هاذي أمي..یغفه لیل الله أبحضنها و ما تنام
هاذي أمي..من تشیل أچفوفها أبوجه الظلام
هاذي أمي..الله یسمعها و یرد لیها السلام

أمي هیّه العرّفتني الدنیـا وین
الیصاحب الله یمشـي أویاها
عدها سبحةطین من ترب الحسین
الســبحه لمــّن تنــدعي أبیـــمـناها

هاذي أمي
———————————————
هاذي أمي..أشگد اگولن أمي أمي وأستریح
هاذي أمي..ربي لا یحرمني من أمي أصیح
هاذي أمي..عدها دمعه أتهز جبل لمّن تطیح
هاذي أمي..تملک امن الدنیا بس گلب السمیح

أمي یا خبزة فقیر أبدیره جوع
تنـطي خـبزتــها الیـدگ أبـبابها
أمي أغلیٰ اهواي حتیٰ أمن الدموع
ریــحة الجــنــه عــطر بثــیابها

هاذي أمي
———————————————
هاذي أمي..من توزّع رحمة الله أعله الغروب
هاذي أمي..لو دعت تتیسّر اعلیه الدروب
هاذي أمي..بوسة أیدیها أحس عندي وجوب
هاذي أمي..تطمئن باچر أبذکراها القلوب

یلّي عندک والده أبقید الحیات
گلها عــید الأم علــیچ أمبارک
و یلّي فاگدها و عشت بالذکریات
خـلّي صــورتها تعیــش أبدارک

هاذي أمي
———————————————
کلمات خادم الحسین ع
عبدالامیرالناصري--المحمره

قصییدة هذه عید الأم
************
هذه عید الأم...خل نزف البشره
هذه عید الأم...ینتمي للزهره
یازهرا ..یازهرا... مبروک عید الأم
ــــــــــــــــــــــــــــــــــــــــــــ
شع جبین أهلالها...والگمر تفصالها
فاطمه الله أصطفاها أبنورها
راضیه المرضیه...حوریه الأنسیه
یا ملاک و بیها داخت حورها

هذه عید الأم...سجّل أعظم ذکره
هذه عید الأم...ینـتـمـي للـزهـره
یازهرا ..یازهرا... مبروک عید الأم
ــــــــــــــــــــــــــــــــــــــــــــ
هذه عید الغالیه..الدوم عاشت عالیه
لمّت الدنیا ابحنان احضانها
هاي ام العافیه...ام سوالف دافیه
چلمة الحلوه زکات السانها

هذه عید الأم...هیل فایح عطره
هذه عید الأم... ینتمي للزهـــره
یازهرا ..یازهرا... مبروک عید الأم
ــــــــــــــــــــــــــــــــــــــــــــ
یاگمر نص لیلي..الشوفتچ تضویلي
الـگـمر بیـدچ یصـیر أمرایه
انتي امي و انتي...معنا للحب چنتي
یالعـباتچ عنـدي أمصـلایه

هذه عید الأم...خیط ضاوي أبفجره
هذه عید الأم... ینتمي للزهـــره
یازهرا ..یازهرا... مبروک عید الأم
ــــــــــــــــــــــــــــــــــــــــــــ
أمي نذرت روحها...للزچیه أبنوحها
وصارت ابعشگ المجالس هایمه
أمي ابخدمتها...عالیه هامتها
افتـخر للزهـره صـارت خادمه

هذه عید الأم...أکبر أمـن النظره
هذه عید الأم... ینتمي للزهـــره
یازهرا ..یازهرا... مبروک عید الأم
ــــــــــــــــــــــــــــــــــــــــــــ
کلمات خادم الحسین ع
عبدالامیر الناصري1440

ــــــــــــــــــــــــــــــــــــــــــــــــــ

هالليلة مولد فاطمه
هالليلة مولد فاطمه
@@@
الوحي صوته صدح .. والنبي گلبه انشرح
بالولاده هالمسه
جنة الله العاليه .. منها زهره آتيه
هذي سيدت النسه
الضيه قرصه طلع .. والحزن عنه ارتفع
والالم منه انتسه
كوثر الهادي اجت .. والملايك عيدت
وعالفرح متنافسه
...
فرحانه املاك السمه
هالليلة مولد فاطمه
@@@
مكه بالزهره زهت .. وعالموده اتنافست
زهرة الهادي هلا
كلثم اتهز المهد .. ومريم تناغي بعد
هذي بت سيد الملا
چان كاروك الگمر .. عطره من ماي الزهر
طيّب انفاس الفلا
النبي لله سجد .. وشكر الباري وحمد
لآية الله النازله
...
زهره وجليله وعالمه
هالليلة مولد فاطمه
@@@
ملبّس الجنه انتثر .. وهلهلت كل السور
ياهلا بأم الحجج
جات والهادي ابسعد .. مدد يالزهره مدد
انتي ياباب الفرج
الشيعه هالليل بسرور .. تبارك المحفل حضور
والسعاده بالمهج
فاطمه شمحله الاسم .. ابذكرها نبتسم
منهجي ونعمه النهج
...
تكفينه شر الحاطمه
هالليلة مولد فاطمه
@@@
ام ابوها المصطفى .. حروفها بيها الشفه
وبلسم ايداوي العليل
شفى لو ضاگ الصدر .. والله فدواها العمر
شالت الهم الثجيل
باچر ابيوم الحشر .. منقذه الزهره الطهر
إلها مركز مو قليل
واحنه جيناها ابطلب .. من گلب جمره ألتهب
لحگي يالزهره الدليل
...
هيه الرحيمه الراحمه
هالليلة مولد فاطمه
@@@
من أذى هاي المحن .. نسأل ابأم الحسن
الله يالرب الودود
هالكريمه بالعفو .. والنعم بيها وكفو
جودها ايغطي الوجود
امنيه باقي بعد .. عليها كل شيعي شهد
وللصبر ماضل حدود
فاطمه باب الامل .. وليها نادينه ابعجل
يمته للمهدي يعود
...
نفدي حضوره بالدمه
هالليلة مولد فاطمه
@@@
علي احمد الحمود
٢-٢-٢٠٢١
مولد الزهراء ع

ولادة السيدة فاطمة الزهراء (عليها السلام)

أقــمـــار وشـمــــس...لـلـه سـاجـديــن
والجـــــــان وإنـــس...لـلـه سـاجـديــن
وقَــــرَّو بـالســـيــــاده
مـن ﮔـبــــل الــولاده

مبـتـشــر..كـلشـي جـه..لبـيت النـبي الهادي...وابابه سـاجد
عـالأرض..سـجـدِّتـه..ويا فـاطـمــه يـنـادي...والباري شاهد
لــولــه فـضـلـــﭻ لـيـنـه...كـلـنــه مــــا ظـلــيــنـه
وأحـنــه والـيـحـويــنـه...هـسـه ﭽـﺎن افــنـيـنـه

لــولــــه مــولــِـــدﭺ...ﭽـــﺎ زال الـوجـــود
واجـــب نـحــمــدﭺ...ﭽـــﺎ زال الـوجـــود
ومـا ظـلــت عـبـــاده
مـن ﮔـبــــل الــولاده
ـــــــــــــــــــــــــــــــــــــ1ــــــــــــــــــــــــــــــــــــــــــ

ﭽـف سمـه..وﭽـف أرض..واتصافحـن زارن...أرض المدينه
حـيــــرّن..كـل عـقـــل..مـن ﮔـعــدن وصارن...بمـنـزل نبينه
وسهـله هـاي الفكـره...أصـلاً اهـيَّه الـزهـره
هـالــوجـود اتـأمــره...اتـكـبــره أو اتزغـره

كـلـشـي بـالـخَـلِــــق...خــادم لـلـبــتــــول
والـبــيـــهـــــا يـثِـق...خــادم لـلـبــتــــول
مـا يــرجـــع مُــراده
مـن ﮔـبــــل الــولاده
ـــــــــــــــــــــــــــــــــــ2ـــــــــــــــــــــــــــــــــــ

هـالفــرح..والهــنــه..بالمـرتـضـى اتجـسـد...يدري بنـصـيـبـه
ويا فـرح..ينوصف..لـلـمـِنـتـِظـر يُـولَــد...روحه وحبـيـبـه
لَـم جـمـال احـسـاســــه...وعَـطَــرّه بـأنـفـاســه
وطـرزه بــنـوماســــه...وطـشـه فرحـه لناســه

ولَــم بـيــده الـنـجـــم...سـواهـن شـمـوع
وبـلـهـفــــه وعــــزم...سـواهـن شـمـوع
ونـص مِـنهـن ﮔِـلاده
مـن ﮔـبــــل الــولاده
ــــــــــــــــــــــــــــــــــ3ــــــــــــــــــــــــــــــــــــ

من ضِـوَت..كــل ضــوه..لَـم روحه واتكتر...ما يضوي ضيه
والشـمـس..مـو شـمـــس..من الزغر أزغر...يــــم الـــزجــيه
والـجــنـــــان اتـبـخـرت...ومن عـطـرها اتـعـطــرت
وبـضــواهــا اتـنــوْرَت...ولـليـحـبـهــا اتـحـضــرت

ونــذرت هــالـنـــذر...مَـن عــادى البــتــول
بـيـهــا مــا يـــمــــر...مَـن عــادى البــتــول
وخـل يـيـأس فـــؤاده
مـن ﮔـبــــل الــولاده
ــــــــــــــــــــــــــــــــــ4ـــــــــــــــــــــــــــــــــــ

المصـطـفـى..بهـالـوكــت..ناده ورفع ﭽـفـه...لرب الجلاله
مُــنـيــتــي..اتـحـقـقــت..وأكثر طِلَب الرأفه..للــزهره واله
ربـي هــذه دعــــوتـي...وبـيـن اديــه بضـعـتـي
وابخِـــدودي دمـعـتـي...ربــي ارحــم شـيـعـتـي

الـــوالـــه فــاطــمـــه...مــثـــــواه الجـنــــان
ولـحــامــــي الحمـــه...مــثـــــواه الجـنــــان
جــازيــه بـالـسـعــاده
مـن ﮔـبــــل الــولاده
ـــــــــــــــــــــــــــــــــــــ5ـــــــــــــــــــــــــــــــــــــــ



أحمد البصراوي العبادي

فرحت اليوم خديجة طاها
الله اجمل هديّه انطاها

جبريل اينادي
طاها ياهادي

اِنَّا اعطيناك الكوثر
فَ ، صلّي الربّك و انحر
شانئك هوّ الابتر

« ميلاد فاطم هالليله 2 »

*

جنة الله ابعشگ فوّاحه
الله هادي النبي تفّاحه

اجمل هديه
زهره الزچیه

ربّك فاطم سمّاها
و بشوق اهداها الطاها
بيها الخالق يتباها

« سبحان. ربّ السوّاها 2 »

*

ضوّه الأكوان ضواها الزهراء
اطهر انسیّه و اطهر حوراء

تضوي دُجى الليل
خادمها جبريل

مريم تتوضّه ابْضَيْها
و تتمسّك حتى ابفَيْها
دوم اتقبّل رِجْلَيْها


« زهراء اعظم قدّيسه 2 »

*

من خدیجه تصدّ البتها
اتطوف لولکها چن کعبتها

هاي ام أبيها
هيبة نبيها

اطهر و اشرف انسيّه
سَيْدةْ مريم و آسیّه
اعظم مرآه بس هيّه

« حيدر. هوَّ اليسواها 2 »

*

خادم خدمة الحسين عليه السلام
ناصرالبوعبید

(( مولد الزهراء عليها السلام ))

تفاحة الكون  ام ابيها فاطمه
أنوار العيون   ام ابيها فاطمه
زهراء قدسيه    مرأة سماويه
        ام ابيها فاطمه
_
١
فاطمه مشكات من رب البريه
فاطمه شجّرة الدر الاحمديه 
ماي من نبع الجنان الكوثريه
واعلى من نور الشمس نور الزجيه

نور السماوات   ام ابيها فاطمه
قرآن وآيات      ام ابيها فاطمه
حوريه حوريه    مرأة سماويه    
        ام ابيها فاطمه
_
٢
ماكو مثل اوصافها والباري يشهد
صارت ام المصطفى الهادي محمد
من غصنها العطف والايمان ورّد
صلوات السانها كل لحظه ردد

خِيرة الأعمال     ام ابيها فاطمه
ربحان من كَال   ام ابيها فاطمه
رحمه وعطف هيه    مرأة سماويه    
        ام ابيها فاطمه
_
٣
الباري أعلى من السمه رافع عُلاها
للنبي ماخلى ذريه سواها
من أجلها انخلق حيدر ويه طه
هيه أولى والنسه كلهن وراها

   ام الموالين         ام ابيها فاطمه
هاي ام الحسين      ام ابيها فاطمه
آيات كونيه    مرأة سماويه    
        ام ابيها فاطمه
_
٤
إذا عيسى الناس من مهده كَلَمها
فاطمه قبل الولاده اتحاجي امها
عالمه والاسم الاعظم من علمها
غير حيدر والنبي محد فهمها

منبع الاسرار   ام ابيها فاطمه
ما ترد محتار   ام ابيها فاطمه
لكل حاجه مكَضيه    مرأة سماويه    
        ام ابيها فاطمه
_

الشاعر #مصطفى_الشافعي

(( مقطوعة لولادة الزهراء عليها السلام ))

بعالم الواقع لچن گلبي غفه
حط راسه يم الامنيات وحِلم

جن شفت باب وبيها نور العرش
وكل مَلك من السمه عليها ازدم

وجبريل شفته استأذن إله دخل
وجم ملك يم العتبه صاروا خدم

ومن اسألت عالدار گالوا الي
ما خاب كلمن بهل بيته التزم

وهالليله هاي انولدت إلهم مره
الميت اترجعه لون بيها إنقسم

تعنيت عالباب ارد ادگه بفرح
والأمل كله على عيوني انرسم

ومدري شحصل كل ما إله تقربت
گمت احس نغزه وگلبي حيل انلچم

وتحيرت من عندي تاه الفكر
هالباب باب الفرح باب الألم

دمعه عله عيني وتبتسم شفتي
والكون مرّه بچه ومرّه ابتسم

واني عله باب الدار جاني الفرج
وعن السبب حسيت گلبي عِلم

اسألت الأملاك عليها هل هذه
دار الزجيه؟ وجاوبوني نعم


#مصطفى_الشافعي

على عناد الناصبي      
باركوا الطه النبي
بمولد الزهراء بنته فاطمه
* * * * *
بمولد الزهره فخر كل آنسه
للنبي زفوا التهاني هالمســه
أتباركوله بفاطمه خير النسه
أللي من رب السماء أمقدسه
خل نعيــد نحتفل      
نبارك لسيد الرسل
وبالتهاني أتعنته أملاك السمه
بمولد الزهراء بنته فاطمــــه
* * * * *
غصبن أعلى الناصبه والكافـره
أحتفلوا في ميلاد بت خير الوره
وألعنوا كلمن يعادي الطاهــره
وهالمحافل للنواصب قاهره
وحق من سن السنن      
مانعوف أم الحسن
كلوبنه بحب الزجيه هايمه
بمولد الزهراء بنته فاطمه
* * * * *
سطع نور أم الحسن يزهي ويشع
خلوا هاليوم الهلاهل ترتفـــــــــع
أبهالولاده الطاهره شعلوا الشمــع
وبالسمه صوت الحفل خل ينسمع
أحتفلوا ياشيعة علي      
وهنوا هاليوم الولي
أبن عم المرتضى حامي الحمه
بمولد الزهراء بنته فاطمـــــــه
* * * * *
هالمسه شموع الفرح خل تشتعل
بمولد أم حسين خلنه نحتفــــل
عيدينه شايب وشاب وطفــل
المايعيد موموالي ينجعـل
وغصبن أعلى المارضه    
اليوم عيد الرافضـــــه
أويه النبي وجوه الروافض باسمه
بمولد الزهراء بنته فاطمـــــــــــه
* * * * *
محلها أسمها بالثغر مثل الشهد
ومنها أفضل هالخلق لا ماشهد
الله عظم فاطمــــــه من المهد
وألها رب الكون بالعصمه شهد
طاهـره بت طاهـره      
جوهره بت جوهره
طه رب الكون دره سلّمــه
بمولد الزهراء بنته فاطمه
* * * * *
الحزن هاليوم أنسه وظل وأنطرح
وأنكتب غفران للصدره أنشــــرح
صفي كلبك يالمحب في هالفرح
خله ينسه كل جرح بيه أنجــرح
أفرح أو أخذ الاجـر        
بعيد ميلاد الطهّــــر
أتوجه اليوم النبيك كلمـه
بمولد الزهراء بنته فاطمه
* * * * *
                               سلام المشعل 

لمولد الزهراء ع 

فرحت ابهليوم املاك السمه 
ابمولد الزهره الزچيه فاطمه 
@@@@@@
يا شرف يعلو اعله صلب المصطفه 
وهـوّه رب الكــــون أصلـــه شرّفــه 
تعجز الافكــــــار عنّــــه اتوصّفــه

فاطمه وهذا الاسم ما اعظمه 
@@@@@@

أشرقت ع الدنيــــه أنــوار القدس 
بالسمه الحور انصبت ليها عرس 
جنــة الفردوس أهدت هــــالغرس 

للنبي المختار أعظم مكرمه  
@@@@@@

منهو مثل الزهرا نور الحـــــاطها 
امهادها الجنه وسماها اگماطها 
والنجوم البـــالسمــــه أقراطهـــا

واليعاديها مصيره الحاطمه 
@@@@@@@

شنهي شمس الكون وانور الگمر
هذا نور الزهرا بالدنيــــــــه ظهر 
في حجر طـــه النبي منّ استقر 

كل جرح للهادي فاطم بلسمه
@@@@@@

كوثر القران هـــــالليله زهت 
وابحروف اسم الزچيه رتلت 
عمَّ للكرار جات اوبـــــاركت 

ياعلي مبروك ياحمي الحمه
@@@@@@

انهني هالليله خديجه الطاهره 
ابمولد الدره الثمينه الفــــاخره
شيعه والمولد نجيـــه اونحضره 

محفل الزهرا الزچيه نخدمه

------------------------
ثامر بوجباره الاحسائي

#لمولد الصديقة الكبرى فاطمة الزهراء عليها السلام - جديد

( *فاطمة المهدي* )

------------------

ممنوع الليله الدمع
خل نجبر كسر الضلع
بالمولد من نجتمع
فرحتنه نهدي
( فاطمْة المهدي )

@@@

فرحتنه ابهالمكرمه
انگول ( اليوسف فاطمه )
بسمتنه ابگد السمه
كل بهجه نِبدي
( فاطمْة المهدي )
@@@@@

للدنيه الكوثر شرف
بضفافه المهدي وگف
وابچفه القدسي غرف
ياشيعه قِصدي
( فاطمْة المهدي )

@@@
زفتها جنة عدن
للهادي أُم ووطن
تجلي عن گلبه الشجن
والروحه اتفدّي
( فاطمْة المهدي )
@@@

*قدسيه هالجوهره*
*حوريّه ابصورة مره*
*هنيالك يا حيدره*
*لك الله مهدي*
( فاطمْة المهدي )
@@@@

كل شيعي الليله ابتهج
بالمحفل علّك مهج
يارب عجّل بالفرج
بالطلبه انجدّي
( فاطمْة المهدي )
@@@@

يارب ابمرّة ملك
يرفع دعوتنه الك
بالچفها اتدير الفلك
فرحه الها يودّي
( فاطمْة المهدي )

------------------
ثامر بوجبارة الأحسائي
١٧-٠٦-١٤٤٢هـ
٣١-٠١-٢٠٢١م

كربله وذيج الخرايب. شيبت راسي اشكثر
راحه ما شفت بحياتي. وضاعت اسنين العمر
ورم امن الضيم كلبي. وبين اعليه الكبر
امن الدمع نكعت عباتي. وزورك امتوني الشمر
اه يزينب اه يزينب اه
***********
راحت وياك المحنه. وانه بفراكك متت
اختك وحكي امن اعتاب. وتدري بطباع الاخت
اشعاجبك من الحوافر. حته جواهن نمت
امن الشمس يحسين اشوفك. خويه حيل اتغيرت
اه يزينب اه يزينب اه
*************
ينكسر كلبي امن اكولن. خويه والخويه دوه
والله دنيه الفركتنه. وخويه ما متنه سوه
انه وانته بريه وحده. جنه نشتم الهوه
بفركتك ضهري كسرته. وخدي بدموعي انجوه
اه يزينب اه يزينب اه
***********
انه اعرفنك تحبني. ومن اون كلبك يون
كمت كل غروب خويه. اشبك اهدومك وحن
ذكره ذكره كلبتهن. وخضر بروحي الحزن
انجان مو يمكم يخوتي. بالنجف خل اندفن
اه يزينب اه يزينب اه
********
ضاكت بعيني الوسيعه. وصدري كلش مختنك
انه والعباس اخيي. جنه ابد ما نفترك
ردته يكعد حته اشوفه. بعينه المتون الزرك
بسطر العين ارد اكله. وجف اديه المحترك
*************
ايغمض عيوني اريده. ويمشي وي اجنازتي
امنيتي ابو فاضل يجيني. وهوه يحضر دفنتي
اخر اللحضات هايه. وراح افارك دنيتي
امنيتي اعوف الشام كله. وندفن بين اخوتي
اه يزينب اه يزينب اه
*********
تمت
تحسين الخفاجي

احنه زينب كلنه للتشيع اجينه
ابدال اخوتج شيعيناج وبجينه
*********
كلمن ايموت بعلي انزوره نجيبه
واحنه زورناج حيدر يالغريبه
ماكو مثل امصيبتج والله مصيبه
دوم بالمجلس نذكرج يالحنينه
*********
انتي زينب حيره لو مو زينب انتي
اسال بسوك العبيد اشكد وكفتي
باليسر جم مره بالصوط انضربتي
حته راس حسين كامت تجري عينه
********
انشيل فوك الروس نعشج وانتي تدرين
ومشتهين اشكد نزورج صحن الحسين
ونمشي للعباس بيج ونهمل العين
انكله جبنالك نعش هاي الحزينه
*******



ندري بيج بلا اهل وبلايه خوان
ودنيتج مو دنيه صارت دنيت احزان
والتموت اشمحله اخوها يمها لو جان
وانتي اخوج اعله الترب ومكطعينه
************
جينه هاي الليله بمصابج نواسيج
واه يا مظلومه ضلينه نناديج
المهدي بيده شيعج واشكد بجه عليج
ولحضه والله المهدي ما بطل ونينه
*******
تمت
تحسين الخفاجي

تمنيت الجنازه اتشيلها اخواني
نواعي تصير واحد يشبك الثاني
******************
كبر بيه العمر والشيب كاتني
وريد حسين هليله يغسلني
يجفني الحنين وبيده يدفني
اشكثر كلوله زينب ضلت اتاني
******************
بعد لحضات خويه وجفني اغمضنه
وخال اولادي شو ما جاي اشوفنه
ردت عباس يرجع حته اودعنه
مكسورة ضهر من راح خلاني
*****************
العدها أخوه صحت تتباها بخوتها
وتعيش امدلله وتكثر معزتها
بس زينب جرت يحسين دمعتها
وحيل افراكم يا خويه سلاني
**************
ردت عباس روحي الليله ينعاها
ويشيل الجنازه ويمشي وياها
اعليه الفاتحه اشكد ردته يقراها
ويكتب آه يزينب فوك جدراني
***************




يحسين الدموع امولحه عيوني
تمنيت اشكثر يمكم يدفنوني
اشعجب يحسين هيجي ما حضرتوني
انه بديرت غرب ومفاركه اوطاني
********************
مشتاكه وحياتك حيل مشتاكه
وبعد ما بيه حيل اصعد عله الناكه
تره مو كل اخو يتعوض افراكه
ويبن امي الوكت بسهام صاباني
***************
يهل تنشد عليه هاي يا هيه
حيل اتغيرت عكبك العلويه
اشكثر تجرح صحت جلمت المسبيه
اشكثر جمر الخيم بجفوفي جواني
*******************
تمت
تحسين الخفاجي

نعقد العـزاء و ابحـضـور المنتظـر
مجلس الحسين يسند الماله ظهر
__________________
حضور المهدي بالمجلس .. يسرنه
ويصير بكل عسر والله .. يسرنه
نحس هو اليمشينه و .. يسرنه
ونعيش وياها نسمه اعله البريه
__________________
نعزي ابمجلس الكتلوا .. طفلها
وابد ما اضن كلب خادم .. طفه الها
نسوي مو فقط مأتم .. طف الها
ونعذب كلمن ايوالي اميه
___________________
وحق اللي صفه طايح .. حملها
البقت تبجي وتره محد .. حملها
نبقه اجنود للحجه و .. حمه الها
ونرد ثار الضلع والغاضريه
___________________
دمعتك بالعزه المهدي .. يجرها
لـتخلـي هـوى ذاتـك .. يجرها
كون اتموت بالحسره ال .. يجرها
وتون وياها كل صبح ومسيه
__________________
نعاين عالخدم نلكه .. وجاها
منو نار الكلب بيهم .. وجاها
طبت فاطمه تنعه .. وجاها
علي ينثر عطرها الفاطميه
_________________
سطرنه الزمن بهمومه .. ويانه
وعاف العالم ابأسـره .. ويانه
المهدي حاضر المأتم .. ويانه
يوزع الماي بثواب الزجيه



#سيد_محسن_الجابري

بحق سيد محمد سبع الدجيل


يا سبع الدجيل يالمالك مثيل

طاهر ... من نسل الاطهار
بابك ... ما ردله خطـــــــار

*------------------*-------------------*

اتجسدت بيك الصفات الهاشميه
بحضرتك تنطي الحوائج للبريـه
الله خصاك بخصائص حيدريــه
ودوحتك دوحت محمد والزجيه

لمصابك ننوح ملجومه الجروح

جودك ... جود الحسن صار

*------------------*-------------------*

صاحب الحاجه الگصدلك ما ترده
ياللي معروف بعطائه لليگصـــــده
الشدائد والحوائج سهله عــنــــده
سيدي بابك علينه لا تســــــــــده

يتعاله النداء بدموع العزاء

گبرك ... نگصدله زوار

*------------------*-------------------*

جنة الخالق ضريحك لليـزوره
الزاير يشوفه بكيانه وبشعوره
يرجع بحاجه التعنه وبسـروره
والدجيل الشرفيته يزهي نوره

يانور العيون متعلگه الظنون

جاهك ... ميخلي محتار

*------------------*-------------------*

سيد محمد نعرفك بالمُلِمّـــــــــــــه
بالمكارم والمفاخر تبقه قمـــــــــه
جودك اوصاف وقصايد ما تفهمه
يعرفك بس الإجالك والتكرمـــــــه

هليله المصاب واحزان وعذاب

كلهه ... تبچي بدمع حار

*------------------*-------------------*

بغيبتك تجري المدامع للمصيبه
ذكرتنه حسين جدك والغريبـــه
جثتك اتولوا دفنهه مو سليبــــه
لا ثلاثه بالبراري ولا خضيبـــه

مو عاري وسليب مو مثل الغريب

موتك ... ما بين الانصار

*------------------*-------------------*

غسلوگ وكفنوك وهيبه دفنــــــــه
جسمك ادوسه الحوافر ما سمعنه
اكثر امصاب الجرحنه والفجعنـــه
الطايح وهذا اليسلبه واليطعنـــــه

دمعات الختام تبعثلك سلام

وصفك ... حيرهه الافكار

*------------------*-------------------*

✍ بقلم خادم الحسين ع
الشاعر رعد الچريخي

قصيدة بحق سبع الدجيل سيد محمد عليه السلام

احبابك نصيــح سجلنــه زوار
شيعة واجيناك يانسل الاطهار
..............

سيـد محمـــد يبن عاشــر العتـره
يالمقــامـك نعجز نوصفه ونقدره
احنه احبابك اجينه ونجري عبره
نزورك تعنينـه ومصـابك نـذكـــره
نوصلك انزور مانخشه الاخطار
احبــابـك نصيــح سجلنــه زوار
...............

انت ابن الهادي ياروحــه وكيانه
لوله حكمـت ربك تصيـر ابمكانه
خصك الباري بشرف عزه وامانه
يالچنـت تمـلك علــم الله وبيـانه
آية المعبـود مخـزن للسرار
احبابك نصيح سجلنه زوار
..............

سيد محمــد قسم بالهـادي نقسم
احنه خدامك نظل للموت نخـدم
مانخـاف لمرقــدك كل عـام نقدم
بالصحن ننصب الك يالغالي مأتم
مصابك نذكره ونسيل الاعبار
احبــابـك نصيح سجلنه زوار
..................

انت ياسبع الدجيل الحامـي جـارك
تحمي كل خايف يجيك يزور دارك
والله مايتـأخّـــر وحـاضـــر قــرارك
لليجيـــك ينـدبـك بسـاحــة مـزارك
تنجي اليناديك ماعندك اعذار
احبــابـك نصيـح سجلنه زوار
.................

سيد محمـــد وحگ ضلـع الزچيه
غالــي عــدنه ومانعـــوفك للمنيه
وانت تدري بشيعتك اهل الحميه
التزموا بأمر النبي بحفظ الوصيه
للمهدي ويّاك مشبوحة الانظار
احبــابـك نصيـح سجلنه زوار

خادم سبع الدجيل سيد محمد عليه السلام
سيد زيد الفحام
----------------------------------------------

قصيده لوفاة سبع الدجيل سيد محمد بن الأمام الهادي ع

سيد محمد طيبه آثاره........وتشع عالوادم انواره

ـــــــــــــــــ ❁ ❁ ❁ ❁ ❁ ❁ ــــــــــــــــــ

سيد محمد قاضي الحاجه
نهج العباس ومنهاجه
ايگر عين الناس المحتاجه
وابجوده ايضيف خطاره

ـــــــــــــــــ ❁ ❁ ❁ ❁ ❁ ❁ ــــــــــــــــــ

سيد عابد زاهد مخلص
والزين من الشين ايشخص
وادخيله ايأمن من كل لص
عنده من العباس الشاره

ـــــــــــــــــ ❁ ❁ ❁ ❁ ❁ ❁ ــــــــــــــــــ

ضل بيك التاريخ ايمجد
دومك تمضي وما متردد
وبيك الطاغي افكاره اتولحد
وحسباته اتعيش ابأفكاره

ـــــــــــــــــ ❁ ❁ ❁ ❁ ❁ ❁ ــــــــــــــــــ

تبرد ناره الصاح ادخيلك
واتزيح اهمومه اليشكيلك
دكتور الكل متعنيلك
يشفي الگاصد وي زواره

ـــــــــــــــــ ❁ ❁ ❁ ❁ ❁ ❁ ــــــــــــــــــ

كل شده ابشباجك تسهل
والكل معگوده ابصحنك حل
والبيك اتمسك ما ينذل
انت ابن الناس السطاره

ـــــــــــــــــ ❁ ❁ ❁ ❁ ❁ ❁ ــــــــــــــــــ

جم نار بدلالك تسعر
عالجسمه اتگطع واتوذر
والايتام التاهت بالبر
تنطر من كافلها الغاره

ـــــــــــــــــ ❁ ❁ ❁ ❁ ❁ ❁ ــــــــــــــــــ

عايش يوم الطف بحساسك
من لجماته امشيب راسك
تشتم دخان ابأنفاسك
والحسره ابگلبك جباره

ـــــــــــــــــ ❁ ❁ ❁ ❁ ❁ ❁ ــــــــــــــــــ

الخادم المقصر فراس موحان الساعدي

قصيده في رثاء سيد محمّد سبع الدجيل عليه السلام

سبع الدجيل اتحبك الناس
باب الحوائج مثل عباس
نبع الكرامات
تنسانه هيهات
باب الحوائج مثل عباس
.................

يالربيت ابيت اشرف كل بيوتات العرب
من نسل طه مُحمَّد اطهر واشرف نسب
من علي الهادي وعلومه وارث علوم وادب
سيد محمّد اعـــذره يعجز ال عنّك كتَب

بيده الامام الهادي ربّاك
غيره وعلم وخلاق غذّاك
ياطيّب الذات
تنسانه هيهات
باب الحوائج مثل عباس
.................

راسخ الايمان بالله صاحب الگلب السليم
سيد محمّد طريقك عالصراط المستقيم
عالم وزاهد مجاهد مؤمن وداعي وحكيم
للحسن تدري الامامه قانع بهاي وعليم

منك تهاب وترجف اعداك
هيبة مُحَمَّد چانت وياك
نور السموات
تنسانه هيهات
باب الحوائج مثل عباس
.................

تشبه العباس كلّك. هاشمي وبيك الفخر
بالشجاعه وبالوسامه وطلعتك نفس الصور
مثل ما لحسين بالطف لحظه ماعافه الگمر
للحسن ماعفته لحظه سيفه وحزام الظهر

مدح الامام العسكري بيك
يرفع مقامك من يساويك
تقره الروايات
تنسانه هيهات
باب الحوائج مثل عباس
.................

وي علي الهادي واخوك. الحسن بالغربه عشت
الهادي ودّاك ابمَهَمّه. نفذت امره ورحت
عيون عدوانك تتبعك. بين اديها من طحت
غدرتك مولاي لاشك سيدي بسمّهم متت

لاشك بني العباس سمّوك
بديرة بلد مولاي قتلوك
والضحّه مامات
تنسانه هيهات
باب الحوائج مثل عباس
.................

هذا قبرك صار جنة بكل زمن بي نحتمي
تحمي زوارك تحبهم. انت يا نسل النبي
صاحب الشاره بعطائك تروي كل واحد ضَمي
باب للحاجات بابك سيدي يابن علي

احبابك احنا بصحنك انطوف
تشفي العلل بعيونّه انشوف
تعله الصلوات
تنسانه هيهات
باب الحوائج مثل عباس
.................

سيد محمّد نعرفك. ما ترد ضيفك مُحال
من يجي ابابك تشوفه اهلا تگلّه تعال
من تشوف بعينه دمعه عالبقه بحرّ الرمال
حاجته تنطيها بيده. گبل لا يبدي السؤال

تفزعله من يذكرلك حسين
دين وتردله بساعته الدين
بحر الفيوضات
تنسانه هيهات
باب الحوائج مثل عباس

#سيد_زيد_الفحام
_________________________________

غريبه وحتى موتي بدون خوان
زينب يا كفيلي تريد دفان
من توصل وفاتي
چفني بعباتي
زينب يا كفيلي تريد دفان


،،،،،،،،،،،،،،،،،،،،،،،،،،،،،،،،،،،،،،،،،،،،،،،،

عيني علقبله وادور بلكي يحضر كافلي
حسين لو عباس اريده حتى لو ريحة علي
اهلي وين الموت اخذهم ارد اموت بمحملي
حتى اتذكر عشرته الما كسر خاطر الي

اه يا وحشة دموعي بلا چفوف
الله لا ينطيها عباس السيوف
وينك والله حيره
بساعاتي الاخيره
ارجع رايتك واثنين ذرعان
زينب يا كفيلي تريد دفان


،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

والله وسفه وما اشوفك وانت عباس القريب
شگد تمنيت من اخوتي اسمع اصوات النحيب
من اغمض عيوني يمهم يلزم صفاحة الحبيب
يگلي خويه انكسر ظهري وراح اطبن بالمشيب

زينب انتظريني لسه بگلبي نار
من رحت للمشرعة وعفت الزغار
سؤال العاش بيه
طمنيني برقيه
بعدها متانيه ومخطوفه الالوان
زينب يا كفيلي تريد دفان


،،،،،،،،،،،،،،،،،،،،،،،،،،،،،،،،،،،،،،،،،،،،،،،


ارد اغمض عيني يمك وانته تعرف كلشي اريد
ارد اشم چفوف اخوتي وارد اشمك بالوريد
گلبي كون يموت يمك ينحسب مثلك شهيد
شگد تمنيت بوفاتي كافلي يرد من جديد

حاضرين اخواني ساعات الوداع
هيچ اغمض عيوني ما احس بالضياع
وتطلع روحي يمهم
يبچون اعلى اختهم
اروح وگلبي يطفى الجان نيران
زينب يا كفيلي تريد دفان


،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

رخصه انا انطيته موتي وگتله شد حيلك تعال
مثل امي بليل اريدن دفنتي بنص الرمال
شالو اخواني الجنازه وخفت بچتف الرجال
مدلله وانا اعلى گبري وگلبي ينبض لا يزال

هيجي يحلى الموت ويهود الانين
لو نزلت لگبري بچفوف الحسين
بيده يوسد اخته
ما تنشف دمعته
عيونه اعلى الگبر خلاهه نيشان
زينب يا كفيلي تريد دفان


،،،،،،،،،،،،،،،،،،،،،،،،،،،،،،،،،،،،،،،،،،،،،،،

لو نزلت بگبري اريده يخلي گلبه اعلى التراب
حسين ويگله اعلى هونك يا گبر شالت مصاب
زينب اختي اثار بيها من الطفوف ام العذاب
راسي مگطوع وشفتهه الهمها بالطف الحجاب

السوط حتى اعلى الوجه طابع جروح
راحت اختي وهو ما يقبل يروح
نامت يا گبرهه
ما تمت عمرهه
خلص عمرچ يزينب والدمع حان
زينب يا كفيلي تريد دفان

كلمات الخادم :: رعد الفريجي