" طق طق الباب بدق بتخش علينا الممرضة البتقول كل الفحوصات نضيفة الا من ضعف الدم والارهاق والارق السبب ليها اغماء وان الدكتور ح يمر على سهاد اتكتب ليها خروج ماف داعي لقعادها"

#من_جانب_تاني

__سلافة ارح نحن دقينا كم مرة واتصلتي عليها معناها مافي
**اجي دا كلام شنو ؟! انا قلبي ما مطمن يا مصطفى حا تكون مشت وين يعني؟! انا نبهت عليها تجي تنوم معاي معقول نايمة؟!
مستحيل ما تصحى بصوت الدق وصوت التلفون
__الوقت بعد نص الليل احتمال لما مشينا منها جوها اهلها ساقوها
**اهلها؟! اهل شنو هو نحن طول لحظة العزاء ماف زول جاها وقف معاها ما عارفة لكن اقلاها ترسل لي مسج توريني غايتو الله يجيب العواقب سليمة خلينا نمشي
"مصطفى بعاين لجهة الباب من تاني وبطلع ورا اختو"

#المستشفى
بره المستشفى قريب للعربية وصال ساندة سهاد وقصي شايل كيس في يدو متقدم عليهم والهادي بتكلم بالتلفون لقدام شوية...
قصي : حمدالله على السلامة "بمد الكيس ل وصال " دا فيه عصير "برجع بفتح باب العربية وصال بتدخلها وبتطلع قزازة عصير تديها ليها وبتقفل الباب بتعاين لقصي"
"بتكلم معاها ويتقدمو لي قدام من العربية"
قصي : انا استفسرت من شقق العماد السكنية دي وحجزت ليها عندهم ح ننزلها هناك لما ربنا يسهل
وصال : دا كلام شنو يا قصي معقول نختها في شقة براها ونمشي عادي كدا والبت ما قادرة تسند نفسها وطالعة من مستشفى هسي افرض حصلت ليها حاجة ساي لالا ما ينفع ما للدرجة دي نكون قليلين اصل ولا قلبي بطاوعني اسويها وارجع اخت راسي دي وانوم .
قصي : كويس شوري علي اعمل شنو وانا اسويه لاني راسي ضارب جد وما لقيت حل اتصرف بيه غير كدا
وصال : نوديها عند خالتو هسي تصبح معاها الواطه ولي بكرا نتصرف على الاقل بنكون مطمنين
قصي : حل معقول لكن ما بكذب عليك خايف من رد فعل امي
وصال : لالا ما تخاف خالتو بتريد سهاد وكانت قاعدة معاها بس سوء فهم حصل ليها خلاها تقول كلامها داك
قصي : ريحتيني بفكرتك دي الله يريحك دنيا واخرة يا قلبي " بقرب منها ببوسها في راسها وهي بتضحك" سهاد بتعاين ليهم من ورا قزاز العربية المظلل ما نزلت عينها..
"الهادي جاي عليهم بضيق واضح على وشو"
الهادي : ارحكم امي ومروة الاتنين صاحيات والحال ما بسر
قصي : لي في شنو؟!
الهادي : ربك يعين ، حا نودي سهاد البيت اول وبوصلكم تاني
قصي : لا سهاد بحالتها دي حا انزلها مع امي وللصباح بنشوف بعد داك
الهادي بعاين ليه بعدم اقتناع سمح اركبو اركبو

#جانب_تاني

__هسي انا غلطه في شنو يا خالتي "بتقش في دموعه" الصاح والواجب شنو؟! يقعد جمب مرتو الاجهضت وتعبانة دي ولا يجري لواحدة ما بتربطنا بيها اي علاقة لا وكمان موديها المستشفى ومنتظرها لما خرجوها ولا فكر يرفع تلفونو يطمن على الهبلة المرمية جوه دي
**لالا يا مروة ما تقولي كدا كدي استهدي بالله اول اقعدي اقعدي هسي بجو وبنفهم منهم الموضوع كلو
__قال وصال معاهم زاتهم اتخيلي يا خالتي ولا كلفت نفسها ساي ترفع التلفون تقول لي سلامتك يا مروة وجرت لي سهاد الغريبة
**معليش يا بتي بتكون ما عارفة سمح النصبر لما يجو ونشوف حد الموضوع دا وين؟! لازم يتحسم الليلة دي ولا البت دي حا تجرجرنا لموضوع كل يوم وتقلقل منامنا دا .. بعد قلته تبقى لي بت تونسني واونسها لكن الله دا بجعل الاسباب يكشف بيها حقيقة الناس
__خالتي انا من لحظتها قلت ليك وما سمعتي لي ، معقول ماف زول من اهلها ساي جا يسوقها ولا يشقر عليها ؟! الموضوع دا براه يشكك في حاجة ؟! والبت القلتي في لحظة الوفا جات تفلت في الكلام واخوات احمد تاني اها ديل كلهم غلطانين عليها وهي المظلومة منهم؟! مستحيل انسان يجي عليك ساي يا خالتي
انا شايفة تتكلمي مع الهادي وقصي ينفضو يدهم منها عملو الواجب وزيادة ما قصرو والله ولا حاجة .
والهادي بالذات بقى موضوع سهاد دا شاغلو اكتر من اللازم وانا ما عاجبني اهتمامو دا
فوزية "بتعاين ليها" : لي في شنو؟!
مروة : "دا كلو لاني قلت ليه بتسكت وتقطع الكلام " سيرة ونستو كلها بقت سهاد وانها حا تتعايش براها كيف التقول اختو ولا من باقي اهلنا وكان قلت ليه ما لينا دعوة بيها بطلعني طوالي انا كعبة لا مرة لا اتنين نقاشنا في الموضوع دا عشان تعرفي بس البت دي دخلت حياتنا وحا تشوفي يا خالتي .

"فوزية سهمت لبعيد و بقو خاتات يديهم ومنتظرات جية ناس قصي تحت في البيت "

"ساعة زمن عدت وصوت كركبة الباب بتاع الشارع بفتح "

قصي : دقايق اشوف امي ي وصال خليكم هنا عشان ما تتخلع فجأة تشوفنا قدامها والهادي بنزل بطلع بالسلم فوق
"كرب كرب قصي بخش
" بلقي امو ومروة في الصالة قاعدات"
قصي : السلام عليكم
فوزية : حمدالله على السلامة "بتعاين جهة الباب" وينا مرتك؟ ما قالت معاكم؟!

#مندرين23

بيت_ناس_الطاهر

"في الصالة البقعدو فيها طوالي"

امال بتتكلم بالتلفون وزينب قاعدة جمبها مركزة مع كلامها ورزان وسلمى بتكلمو جمبهم ماسكات التلفون

**مبروك ليه والله عجبني وسر بالي ربنا يتمم ليهم على الخير اها والبت ناس منو؟! 
زوجة اخوها: دكتورة ماشاءالله اجي نحن كمان بنقع ساي ولا ولدي عمر بقع ساي يا امال. 
بت حسب ونسب جاه وجمال اهلها ناس الباشا ديلك امها لاقيتيها مرة في مناسبة ناس هديل عرس بتها رتاج 
امال :  اي عرفتها اها وخطوبة بس 
زوجة اخوها : خطوبة لكن ما بتطول ياهو نجهز حالنا ويشترو شنطتهم والعقد والعرس طوالي بكون وبعدها حيسافرو لشهر العسل طوالي بره السودان "بتضحك" ، دايرة اقول ليك عليك الله كلمي زينب 
معاك وكلمي وصال ونسابتها والبنات سلمى ورزان عقبالهم كدي.. 
امال : الله يسعدهم ماشاءالله سمح ان شاءالله بكلمهم 
الله يسلمك الله يبارك فيك "بتقفل منها"
زينب : البركة الخطبت لي عمر دا ساي كان تتفشى شوية مرة اخوك دي ، "بتحاكي فيها" عقبالهم عليك النبي هسي رزان وسلمى بنات متين كان تردي ليها المرا المهبوشة دي 
"امال بتضحك"
ما برد عليها عشان عارفة عقلها صغير ها ههههه يجازيك يا زينب ، النصيحة عمر مهذب وراجل الا امو الحمدلله . 

زينب بتعاين لي تلفونها ، بتك دي وينا يختي ما جات لي هسي وحالتي من صباح الرحمن قايمة ومنتظراها لا حس لا خبر هسي
امال : بري كدي اضربي ليها 
زينب : اضرب ليها شنو انا ماشة المحل الاهملناه دا قومي يابت رزان ارحكي خليها بعد تجي تصلني هناك 
رزان : انا قاعدة يا ماما عاوزة وصال زاتي
زينب : "واقفة على حيلها " انتي يا امال جيرانكم ناس وداد ديلك وين الحي بيهم بقيت ما شايفاها نهائي
امال : بري قلبي يقول لي افقدها زاتي بقيت ما شايفاها زمن مختفيين لا حس لا خبر منهم 
زينب : "بتقعد تاني" سمح ورحكي ليها مهما كان والله كانت بتواصلنا ، حق الجار يا امال يختي ما صاح مننا 
امال : بتضحك سمح ما قلتي هسي لاحقة محلك الاهملتيه
زينب : المحل ملحوق ها ما طاير قومي على حيلك ورح ليهم
امال : قلتي كدي سمح النلم شعري دا واخد لي حمام والنمش عليها نفقدها. 
✎﹏﹏﹏﹏﹏﹏﹏﹏﹏﹏﹏﹏﹏﹏

"الهادي واقف مع قصي بره الشارع بتكلمو"
"مهموم باين عليه"

الهادي : اسكت بس امس انا ما نمته من مروة والله قربته اطلع اخلي ليها البيت "بضيق واضح" حرفيا بقينا كل يوم في حالة نقة ومشاكل اسوي شنو انا يا قصي عشان هي ترتاح والله غلبتني وغلبني البسويه معاها ، قلت اسايرها ما نفع ، امشيها على قدر فهمها ما نفع اوووف ياخ 
قصي : ياالهادي انت براحة عليها ليها حق وهي في ظرف زي دا طبيعي تكون عصبية ومتضايقة هي محتاجة ليك الايام دي طول بالك عليها الحصل ليها دا ما هين ولا شوية ، وبعدين زاتا قعدت البيت وعدم الموضوع بدخل ليها وساوس كتيرة شوف ليها شغل او حاجة تنشغل بيها انت زاتك مرات غريب 
الهادي : بس دا ما كان موضوعنا يا قصي ، مروة ختت في بالا حاجة وصدقتها براها ، لا انت عارف رايي في موضوع الشغل دا وانا لما عرستها هي كانت زولة بيت ف بلاي دا ما سبب.. 
قصي :  ما فهمت عليك
الهادي : يعني هي ما مشكلتها قعاد البيت كل النقة دي قالت انا مهتم ب سهاد اكتر من اللازم قلت ليك امس ما نمته معاها تلف وتدور في الموضوع دا  وكلام زاتو غريب 
قصي : الله يعين ، طيب وامك لسه في موقفها ما عاوزة تقعد سهاد معاها
الهادي : صبحت عليها الصباح قالت لي قول لاخوك ومرتو يمرو علي الليلة وخشمها تاني ما فتحتو لي وانا حاسي امي ومروة عاملات حلف والله العظيم من القاهم الاتنين قاعدات سوا ويتوسوسن ويسكتو لما يشوفوني قلبي ما بطمن
قصي : "بضحك" الله يستر 
"صوت بتنادي  تعال يا قصي"
بتناول منها الحاجات
 الهادي منتظركم يلا هوي مع سلامة بينا اتصال يا وصال "بعاين ليها بديها غمزة بتضحك معاها وبأشر ليها بيدو شكل تلفون على اضانو"
✎﹏﹏﹏﹏﹏﹏﹏﹏﹏﹏﹏﹏﹏﹏
#جانب_ تاني
#مكالمة_صوتيه
__قلتي شنو ؟! 
*امم والله يا سراج كدا حتختني قدام الامر الوقع وانا لسه 
"بقاطعها"
__ما ختيتك قدام الامر الواقع بالعكس انا عاوز نتقدم خطوة جادة مش انتي رديتي علي انك دايراني كمان تاني شنو يا حنين؟! في حاجة انا ما عارفها ممكن تعطل علينا او شي؟! 
**اممم مافي شي مهم بس في حاجة غريبة بتحصل بتجيني رسايل من رقم غريب كل محتواها فرق العمر بيني وبينك والناس صراحة دا المقلق بي والرقم دا شكلو مفعل بيه واتس ووقت ارجع فيه طوالي بلقاه مقفول بس حرفيا موترني لدرجة مفكرة اغير رقمي وارتاح من الرسايل البتجيني منو
__طيب رسلي لي الرقم هسي في الواتس انا بشوف الموضوع دا وانتي ما تتصلي فيه ولا ترجعي فيه برسالة او شي