حنين ( مشت لي فوزية ) : انا حمشي بعد دا ، عايزة مني حاجة قبل امشي ؟
فوزية : تمشي وين براك يا بتي ؟
حنين : ابوي برا
فوزية : يعني ابوك يخلي الرجال و يجي يوصلك !؟!! انتظري شويه انحنا الهادي بسوقنا لي اهل مروة امرقي معانا مرة وحدة ، بنوصلك و نمش احنا !!
حنين : حاضر ! يا خالتو .. ( سكتت مسافة و بعدين قالت ) يا حليل وصال .. يارب تسعدهم و تهنيهم يارب
" كل الجمبها بصوت واحد " : اللهم امين يارب يهدي سرهم -
امال : يارررب يارب و يهنيك و يوفقك يا حنونه يارب نقيف ليك و نفرح ليك و نهجج ليك الماعملناهو لي وصال وقصي نسوي ليك !
فوزية " بي تحسس ، صلحت توبا و صلحت قعدتا و مسحت وشها و عاينت لي مروة "

مروة ( طلعت تلفونا و قامت من جمبهم ) !

#في_جانب_قريب_منهم

" جوطة "

وداد : لا حول ولا قوة إلا بالله … يا ولدي الله يهديك .. اقول شنووو
غلبني البسوي والله غلبني !
عثمان " اول مرة يرفع صوتو في البراء " :
انت ناوي ترجل متين ؟ هاه ؟؟؟ ولا اخاف تقوم تمرق حزامك دا و تحمطني بيو انا زاتي ! لانو اصلاً دا الفضل ليك تاني تمسكنا انا و امك ديل تمسح لينا وشوشنا دي في الارض ! ياخ انحنا بقينا قدر السمسمة قدام الناس و الجيران كل يوم والتاني كواريك و جوطة ! بس فهمني انت ما داير تفهم ليه البتعمل فيو دي ما رجوله ، انك تستقوى على حريم دي ما رجوله ؟؟؟ عشرتي مع امك دي بالسنين جطنا و اتشاكلنا و وصلنا للطلاق عديل م حصل مرة مديت يدي دي عليها !

وداد : عثمان دا م بفهم الكلام ، شوف بت الناس يا عثمان
اسي انا اوديها لي اهلها بي منظرها دا كيفن بس وريني ؟ البت وشها زي المرتبه م مفهوم ليه اي حاجة !؟ ليه يا البراء حرام عليك البت صغيرة ! فوق لي دا كمان بي طلاقها ! ليه يا ولدي حتى العرس ما هداك !
البراء : اسمعوني سمح ! انا امور الحريم دي ما بتخارج معاي ! البت اكان م نافعه ترجع اهلها وين المشكلة ؟ زي م جبتيها رجعيها انا ما دايراها !
وداد : كل دا فوق شنو ؟ عشان مشت الدكان ؟؟؟
البراء : البطلعها شنو من غير علمي يمة ! اكان من هسي رخيت ليها الحبل تخش و تمرق زي الغنماية بتكسر لي رقبتي قدام خلق الله !

عثمان : عشت 51 سنة من عمري دا و الشيب ملا راسي ملي
ما حصل لاقيت لي واحد متخلف و جاهل و م بفهم و ما عنده مخ زيك ، انت عارف انا معرس الحريم ديل كلهم لشنو ؟
عشان كنت سافي التراب لمن ربنا يبل ريقي بي خلفة الولد ! يوم الله جابك كفر ذنوبي دي كلها بيك ( عاين لي بيان ) .. سوقي البت دي معاك جوا و ساعديها تلبس بوديها المستوصف !
البراء : ( نفخ و هفهف و شو و طلع الشارع ) !
وداد : الله يسامحنا في حقها ، يارب تسامحنا في حقها
عثمان :حسبي الله و نعم الوكيل - انا برا في العربية راجيها وحدة منكم تلبس عبايتا تجي معاي !
تقى( بعد ابوها فات و بيان مشت مع مرة البراء ، قربت جمب امها و قالت ليها ) : يمة بتودوها عند اهلها ؟
وداد : لا
تقى : مش قال طلقها تاني تقعد كيف معانا ؟
وداد ( بي ضيق ) :جيبي الكرسي داك و تعالي معاي يا تقى !
تقى : لشنو ؟
وداد : سوي البقولو ليك ! حصليني غرفة اخوك !
تقى : يمة لا انتي دايرة يكسر رجولي ! عليك الله لا دايرة اخش غرفتو ولا دايرة اجي جمبو ، خليني بعيد !
وداد : حتسمعي البقولو ليك و لا عندك راي تاني ؟. قومي قلت ليك يا تقى !
تقى " بي خوف " : حاضر حاضر " بتنقنق " !

#جانب_زينب
( جوا غرفة وصال ، قاعدة بي طرف السرير و ممحنه )

" الباب فتح "
امال : في شنو يا زينب !
زينب : تعالي تعالي خشي و اقفلي الباب !
امال : بسم الله الرحمن الرحيم ! في شنو ؟؟ حاصل شنو
زينب : ما حاصل حاجة تعالي
امال : قلقتي بي خليت الحريم قاعدات و جيتك ! في شنو يا زينب ؟
زينب : في حاجة شاغله بالي و ما متطمنه !
امال " قعدت جمبها " : في شنو للمرة التالته دمي نشف !
زينب : طيب .. اا صراحة جيت مارة جمب مروة مرة الهادي ! سمعتها بتتكلم و بتقول للهادي حسب الفهمتو ! كيف يعني نجي البيت و نبيت عادي في نص العرسان ! اخوك دا جن ؟ و انا اتعنيت اسمع الجملة دي للاخر اتمحركته جمبها لانه فجأة قلبي اكلني ، و صراحة بقيت خايفه على وصال يعني عشان في نوع كدا من الناس بتفهم التنازلات دي غلط لا سمح الله استرخاص و تقليل من النفس و البتنازل مرة و يضحي مرة بتجر مرة ورا مرة و خايفاها تعيش في الدوامة دي طوالي يا امال ( سكتت ) ….. امال … هي ! امال !!!!

امال " بي خلعه " : هاه !!
زينب : هاه شنو سمعتي كلامي دا و لا راح ساي ؟
امال : دايرة الجد يا زينب يا اختي ؟
زينب : احكي !
امال : انا زاتي الحصل دا م عاجبني بس انتي عارفه وصال ، و دي ما انانيه مني والله و لا قلة اصل مني بس اي أم بتتمنى الاحسن لي اولادها ، و غير سعادتهم ما دايرين ، يعني اي نعم انحنا وضعنا ميسور و الحمدلله و مافي زول حيحوجها لي حاجة ، لكن كمان نعاين لي حالة قصي دي م معروفه يعني مستقبلياً فاهمه علي ؟

وصال : طيب اسمع كلامي ! رايك شنو لو تأجل موضوع الكهرباء دا اذا كدا كدا حنسافر ، خليها بعد نرجع ! و اصلاً كمان مطولة من ناس امي مع تكثيف الجلسات حقت الفترة الاخيرة دي قصرنا منهم ! نمشي نبيت عندهم و نودعهم و بهناك لي ناس امك نودعهم كمان و نخم قشنا و نمشي هه
قصي : قلتي كدا ؟
وصال : ايوااا قلت كدا مش انت بتحب تنوم في سريري الهناك ؟
ارح نبيت عندهم الليله !
قصي : ما عارف يا وصال والله لكن شايف نتخارج من موضوع الكهرباء دي باقي اليوم دا بدل تاني بعد نرجع يبقى ورانا هم لسه .. و انتي امشي و انا بحصلك سوقي عربيتي و انا بجي مع اح** قاطعتو !

وصال : اوع تقول لي احمد يا قصي عليك الله م تجيب لي سيرة مواتر دي تاني طول م احنا في الدنيا دي ، انا كرهتها الله واحد !
انت م اتعقدت من ركوب المواتر دي معقول ! المهم لو ينفع تأجل موضوع الكهرباء دا ياريت تأجلو ولو مصمم م تركب لي مواتر بالله عليك !
قصي ( جراها عليه ) : يا عمري البتخاف علي !
وصال : قول لي والله م حتركب موتر تاني بالله عليك
قصي : والله ما حا اركب موتر وعد ان شاءالله ، بس يعني لو مثلا انا انقطعت في صحراء و مافي قدامي غير موتر اسوي شنو !
وصال ( زحت منو و بقت تضرب فيهو خفيف ) : ياخ بطل يا قصي و بعدين انت البقطعك في صحراء شنو ! و كان حصل شوف ليك ناقة اركبا ..
قصي : هههه بحبك ياخ بحب غضبك بحب رضاكي بحبك كلك !
وصال : و انا بموت فيييك ! المهم خليني اقوم اجهز انا
قصي : اللبسي ليك عباية !
وصال : يا سلام ليه ان شاءالله
قصي : انتي بتقشري لمنو ؟ لو لي اقشري لي هنا ف البيت
و م تقولي لي نفسي !
وصال : انا سايقه عربيتك يعني من خشم باب لي خشم باب
قصي : ابيت
وصال : عوير
قصي : زي عوارتك .. ( مسك تلفونو ، و عمل اتصال )
وصال : جد كدا حتجيني بي شنو ؟
قصي : بتصرف عادي المهم عندي انتي و خلي بالك من الطريق
( الووو … ايوا يا احمد كيفك يا قلب اخوك …….الخ )
" بعد قفل "

وصال : قاليك شنو ؟
قصي : قال ساعه و بجي ان شاءالله
وصال : في كيك في التلاجة و في مكرونة و معاها بانيه شوفو حابين تعملو شنو كلو جاهز ! بس حبيبي عندي سؤال ( في الدولاب و بتتكلم )
قصي : قولي لي !
وصال :مرت احمد دي مالها ما بتجينا لا باركت لينا عرس لا هنتنا بي عيد و لا جات زيارة ساي مع احمد طول الشهور الفاتت دي ، يعني غريبه مافي غير احمد هو البجي ..
قصي : اسي لو جات م بتريديها يا وصال
وصال : لالا والله زولة الله و م شفت منها الا كل خير ، بس اتلاقينا في وقت غلط و عقلي ما بعرف كان وين ! المهم زولة لذيذة كدا !
قصي : م بعرف دي حاجات انتو بتعرفوها براكم ، م علينا
وصال : قصي صحي انت احمد م عندو اولاد نهائي صح ؟
قصي : ربنا يرزقهم ان شاءالله يارب و يرزقنا احنا كمان ..
وصال : شايفاك غيرت رايك مش قلنا نأجل موضوع الخلفة دا شويه ليك كم يوم ماسك سيرتو ههههه
قصي : ما نأجلو داير خلاص غيرت راي ..
وصال : ابيت هههه ما على كيفك .. ناولني المشط داك !
قصي : خليني اسرح ليكي !
وصال : لالا حتمسكني ساعة ما حتفكني خليني اسي سرح لي بعدين ، جيبو حيبو..
قصي ( بي زعل مصطنع ) : هاكي

#جانب_سهاد
#الغرفه

( دخلت الغرفه و فضلت واقفه جمب الباب ، شافت احمد بيلبس قميصو و بصلح الاكمام ، وقفت تعاين ليهو مسافه بي سكات )

احمد (عاين ليها و ابتسم ) : مالك ؟
سهاد : ملامحك رايقه حاسه نفسي عايزة اعاين ليك كدا
احمد : نفس الشي !
سهاد : خلي بالك من نفسك
احمد : من غير م تعرفي انا ماشي وين ؟
سهاد : م عارفه بس خلي بالك من نفسك
احمد : حاضر - انا حا امشي لي قصي تمام ؟
سهاد ( لسه بتعاين ) ! : تمام ، طيب انت كويس ؟
احمد : كويس الحمدلله ، رايك شنو تجي معاي ؟
سهاد : حابة انتظرك هنا !
احمد : و انا حابي تمشي معاي م حابي افارقك ! خايف اتأخر عليكي
سهاد : عشان كدا م حابة امشي عشان تجي سرعه !
احمد : ما عارف
سهاد : م عارف شنو ؟
احمد ( ضماها شديد ) : انا حا امشي ، خلي بالك على نفسك
و ما تفتحي الباب لي اي زول م بتعرفيه ( تلفونو بضرب )

سهاد ( عاينت للتلفون ) : حاضر .. تلفونك !!
احمد : ااي دي نوال اختي - حا ارد ليها قدام ، عشان مستعجل

سهاد : احمد دقيقه
احمد : قولي لي ! ( رحع ضماها تاني )
سهاد : لا اله الا الله
احمد : سيدنا محمد رسول الله … سلام
سهاد : حافظك الله
احمد : في أمان الله …

#جانب_زينب و امال :

" قاعدين في الصالون ، و فاتحين زي الوان و بيحضرو "
سلمى ( جاية بالفيشار )
رزة ( ساكتة و بتتفرج معاهم و بتهبش في لعبة في تلفون سلمى شويه و تسرح معاهم شويه )
سلمى ( قعدت جمبها ) : جيبي تلفوني