#الحب_الخجول - طارق اللبيب

#الحب_الحقيقي1
بقلم : تهاني محي الدين

ابطال قصتنا نجمة و يوسف

نجمة فتاة مرحة و برئية و عاقلة و بتعرف الاصول و امتحنت للجامعة و جابت مجموع كويس اهلها تدخل جامعة السودان ادارة
اما
يوسف شاب مسؤول و هو مسؤول عن اسرتو بعد وفاة ابوه و اكل اعمامو لي حقو و قدر يزوج اخواتو بعد قرءاهم كلهم و فضلت واحدة بس بتقرا في الثانوي و هو بسبب المسؤليات خلا القراية فترة عشان يساعد اهلو و بقى شغال في السوق و بعد زوج اخر واحدة من اخواتو و فضلت رشا بس قرر انو يمتحن الشهادة و هو كمان يواصل تعليمو و امتحن للشهادة و جاب مجموع كويس اهلو انو يدخل جامعة السودان ادارة

نجمة في البيت بتتكلم مع امها

نجمة : يا امي انا ماشة اسجل للجامعة ، يلا امشي معاي عشان نلحق التسجيل ، انا متحمسة جدا والله

ام نجمة : كويس يا نجمة و من بكرة الصباح بدري نشيل القروش من ابوك و نمشي نسجل ليك

نجمة : طيب يا امي و انا حاجهز هدومي من هسي ، عايزة البس عبايات بس للجامعة لانو مريحة و ساترة

ام نجمة : عبايات شنو يا بت ، انتي فراشة و لا شنو ، البسي زي البنات ما بلبسو ، اسكريات عادي و فساتين

نجمة : انا بحب العبايات اكتر يا امي لانو هي مريحة اكتر و كمان محترمة ،، ارجووك خليني البس البعجبني يا امي

ام نجمة : انتي حرة البسي العايزاهو 😏

نجمة : شكرا يا احلى ام ، يلا نمشي السوق نشتري الحاجات حقت الجامعة

ام نجمة : خلي الواطة تبرد بعداك نمشي

نجمة : طيب يا امي

في الجانب الاخر

يوسف منشغل في السوق و التسجييل فتح و ما عارف يعمل شنو و قال لي للزول الشغال معاه و هو شغال في محل اسبيرات

يوسف : عم حسن انت عارف اني نجحت و قبلوني في الجامعة ، بستاذن منك انك تخليني امشي اسجل بكرة للجامعة و بحاول ارجع بدري

عم حسن : ما مشكلة يا ولدي ، طيب خلاص بعد نقفل بعدين المساء بشيل منك المفاتيح عشان افتح بدري و انت من البيت امشي طوالي جامعتك ما تجي المحل

يوسف : 🙂 شكرا عم حسن ، انا حامشي و احاول ارجع بدري ان شاء الله
عم حسن : طيب يا ولدي و بالتوفيق

يوسف شغال في المحل طول اليوم و في نهاية اليوم قفل المحل و ادى المفاتيح لي عم حسن و مشى السوق شال حاجات لناس بيتهم من خضار و حليب و جاء داخل البيت

يوسف : السلام عليكم
ام يوسف : و عليكم السلام يا ولدي
يوسف : كيف قيلتو
ام يوسف : كويسين الحمد لله ، مسافة ما تغير هدومك بكون الاكل جهز
يوسف : طيب

يوسف قام استحم و غير ملابسو و جاء قعد مع امو و اختو رشا و بقو ياكلو
يوسف : انا بكرة ماشي اسجل للجامعة
ام يوسف : تمام يا ولدي ، ربنا يوفقك ان شاء الله ، امشي ، انا ربي وقلبي راضين علييك يا ولدي
يوسف : الله يخليك لي يا امي ، عليك الله ادعي لي عشان اقدر اواصل و اوفق بين الشغل و الجامعة
ام يوسف : ربنا حيسهلا عليك ان شاء الله يا ولدي لانو نيتك سمحة و ما بتحقد على زول
يوسف : اميين

في الجانب الاخر نجمة مشت السوق مع امها و اشترت لبس الجامعة و شالو القروش من ابوها عشان يستعدو بكرة للتسجيل للجامعة و مشت نامت

جاء اليوم التالي و من الصباح يوسف اتحرك على الجامعة و كمان نجمة مع امها اتحركو على الجامعة للتسجيييل

و في الجامعة

يتبع