*#رشت_مطر{{09}}*💜
*#بقلم_نون_علي*🌸

بعد ما حكيت ليهو الحصل كلو. رفعت راسي لقيتو بعاين لي بنظرات ما قدرتاا افسرها.. قال لي بعد مسافه. احسن حاجه حصل معانا كده .. لانو لو ما شوفتك مع الزين. كان لحدي هسي ح اكون كاتم ريدي ليك ،، سكتا وبقيت اصلح في توبي.. ضحك قال لي مصلح توبك بس انا الما مصلح.. عاينت ليهو ب استغراب.. قال لي انتي ما ملاحظه اني لسه ما عارف مشاعرك لي شنو.. عايزاني ولا لا .. دنقرتا وقعدت اتخجل واتعاور .. وهو زاد علي قال لي ادللي فيني ساي 💙🌸 وووبعلي انت عايز تقتلني . قال لي انا منتظر .. سكت مسافه قولته ليهو لو انا ما عايزه كدا كدا .. ما كان قعدتا معاك هسي... قال لي كدا كدا دي افهمها شنو ..سكتا وبقيت اصلح في توب غايتو كرهتو التوب .. قال لي التوب ده عزبتيهو ...اتكلمي معاي .. اقول شنو ... قال لي انا بريدك انتي بتريديني ؟ الكلام ده كبير عليّ دنقرت راسي وابتسمت.. قال لي طيب على بركة الله .. المطرة زادت ... قال لي قومي قومي اوصلك قبل ما يجيك الالتهاب يحيرنا.. قومت قولته ليهو يحيرنا كيف؟ قال لي يحريني انا .. ما فهمت كيف يعني يحيرك ! قال لي نمشي واقول ليك.. قولته لبهو اريتو لو جبت تلفوني .. ليه؟ .. عشان اصور المكان ده بالجد حلو💙 ..حلو لانو بيشبهك + ما تخافي انا ح اجيبك ب نفسي هنا ... امممم ااااها ما وريتني احيرك في شنو.. قال لي طيب نتكلم ونمشي عشان ما تحيريني بالجد ... واتحركنا . ماشي معاي خطوه ب خطوه زي البقول لي خطاوينا ح تبدا سوا و نتنتهي مع بعض 🌸💙 قال لي شوفي ي ستي لو انتي مرضتي لا قدر الله فيني ولا فيك.. قطعتو ب لهفه قولته ليهو لاالالا ان شاء الله ما تمرض. عاين لي مسافه وحرك شعرو . قال لي هو انا قولت ليك بحبك❤ المطرة تاني زادت قال لي طيب ده ما وقت خجلك امشي سريع ... قولته ليهو بالجد دايره اعرف احيرك في شنو.. ( بعيد عنكم انا زول معاطه😹🌸) قال لي طيب لو انتي مرضتي انا ح اكون مقلق عليك وصعب اجي اقول لي إخوان امنيه معليش حبيبتي عيانه ممكن اشوفها .. عاين لي قال لي صعبه صح .. عمر ده ح يقتلني والله ح يقتلني ب كلامو ده ياخ براحه علي 😭 .. المطر شدت شديد
*وانت البقيت رشت مطره صبت على دعاش قلبي رهيف💙🌸*
_____________________

كانت اخت بسمه منتظره ابوها
يجي عشان ترجع معاهو فهو لمن جاء استغرب انها واقفه براها يا بتي وين اخواتك ..ليه امك رسلتك براك.. لا يا يابه. جيت مع بسمه بس.... بس شنو ؟ وين هسي ..سكتت ما عرفت تقول ليهو شنو ما بتقدر تكضب علي ابوها.. قال ليها بسالك وين بسمه.. قالت ليهو بطريقه سريعه رجعت .. قال ليها وخلتك براك..؟ يا يابه. ق .. قا...قالت.. تعبانه.. قال ليها اركباكي معاي نشوفها هناك مع اني ما مصدقك لكن نشوف.. المسافه كلها اخت بسمه تدعي انها تكون رجعت .. اول ما وصلو قالت ليهو يا يابه انمشي ل ناس خالتو زهراء .. ليه شنو تمشي مع المطرة دي .. يا يابه عشان المطر دي زاتها احسن امشي اساعدهم . ... خلاص امشي ما تتاخري. .. طيب ان شاء الله... ومشت ليهم.. دايره تتطلع من المشكله دي بي اي طريقه و ابوها عم عثمان دخل البيت جوا اول حاجه سال منها بسمه. قالو ليهو مع اختها هسي قولنا يرجعوا معاك! قال ليهم لااا بسمه ما رجعت معاي.. ال اخرها شنو انا بمشي افتش عليها.. واحده من اخوات بسمه يابه ترجع تاني تحت .. اها اعمل شنو واختكم لسه ما جات.. ام بسمه قالت ليهو انا امشي افتش ليها عن صحبتها هناء في القريه اذا ما لقيتها تنزل تحت قال ليه سمح سريع....

خالتو زهراء جات دخلت لي امنيه بعد ما فتحت الباب ل اخت بسمه قالت ليها انتي وين نون. ؟ بري يايمه ما معاكي بره ؟ لاااا الليله ي بت الناس مشت وين! .. لا يايمه ما تخافي بتكون في الحمام.. حمام شنو يا امنيه في المطر دي والزين كمان مافي !! مشووا وين.. اطلع افتشهم... لا يايمه ما تقلقي ب نفسك ... قومي يا. ساره( اخت بسمه )شوفيها في الحمام.. ساره سكتت لحظه قالت ليها بدور اقول ليكم شيء.. خالتو زهراء قولي ي بتي.. انا قبيل في الزريبه. شوفت نون و الزين.. و.. خالتو زهراء قاطعتها سجمي سجمي !! مع بعض.. امنيه قالت ليها يا يمه اهدي نون وبعرفها بتكون مشت عشان تعرف مالو.. قلقت عليهو من كلامنا... اشي ي بتي قلقت عليهو كيفن الكلام ده ! قالت ليهو. يايمه بصراحه انا حاسه في حاجه بين الزين ونون .. حاجه زي شنو.. اظن الزين بدور يععقد علي نون وشكلو عايز يشوف رأيها 💙🌸 ياريتو يعرسها ويسكنها معاي هنا ده مناي ي بتي ...لكن من متين العروس بشوفوا رايها ... ي امي الناس ديل ما زينا.. كدي خليهو لمن يجي نفهم حاجه ... يارب جيب العواقب سليمه 💙🌸

_______________

عمر حكي لي عن نفسو... احترامي ليهو زاد شديد قال لي احكي لي عن نفسك قولته ليهو انا ما عندي اي حاجه احكيها.. قال لي ما مشكله ببقى انا كل حكاويك ❤ ومسك اصبعي الصغير ب اصبعو السبابه... الدنيا دي ما ح تشيلني والله ما ح تشيلني 😭😹🌸 حركتو دي كسرتني داير يمسكني و ما داير ... لمن قربنا نصل. نشوف ليك بسمه و الزين برضو عاملين زينا بس الاختلاف هو ماسكها من طرف توبها ماشين سوا... عاينوا لينا بي استغراب ونحنا برضو لاحظنا ليهم ... صمت..كده مافي غير صوت المطرة بس💙🌸
*"رشت مطرة جمعت قلوبنا ولهفتها💕🌸 "*

#يتبع

*#رشت_مطر{{10}}*💜
*#بقلم_نون_علي*🌸

اتلاقينا زي الاول مرة نشوف فيها بعض اااي نعم انا وعمر كان عندنا خلفيه عن علاقتهم بس ما نقدر نوريهم انو نحنا برضو عايزين بعض.. دايره افك يدي منو مسكها اكتر زي البقول لي عليك بينا بس..💜 هو لسه بعاين ليهم... صعب اعرف عمر ده بفكر في شنو.. شايفه بسمه تتشاكل مع الزين عشان يفك التوب الزين قال ليهو عرسنا ح يكون مع بعض شكلو.. قال ليهو هو في احسن من كده💙🌸! انا وبسمه زي الهُبُل ما فاهمين اي حاجه عمر قال ليهو. طيب نمشي الناس دي بتمرض.. واصل الزين وبمرضونا معاهم❤ عمر ضحك وغمز لي.. ارحمني ي عمر 😭😹 مشينا نحنا دخلنا ب الزقاق لقينا الباب قافل قولت ليهو دي مشكله قال لي دي احلى مشكله هو داير يدنقر راسو. .. عمر عمر ياااخ.. قال لي. وبضحك داير اشغالك ياااه ! دقيقه اتصل لي الزين بكون دخل. عان المطرة دي بهدلتنا كيف ..! اتصل ب الزين .. وين انت .. طيب تعال افتح لينا الباب حق الزقاق.. اعمل فيها جنتل.. لا عملت جنتل ولا حاجه ح اسوقها طوالي لي شيخ الطاهر يعقد لي عليها.❤. ما تضحك وتعال افتح الباب ده ...طيب منتظرنك... قفل منو ..قال لي الزين ده خلاص اتهبل 😹 قولته ليهو خليهو ما خلاص ارتبط . قال لي وهو بشد علي اصبعي ويعاين لي في عيوني وانا روحي ارتبطت بيك ❤ عشان اغير الموضوع قولته ليهو اهلي بكرة ح يجوا ..قال لي كويس اختصروا علي ... كيف كيف؟ ... بكره اخليهم يرتاحوا وبعد بكره اقعد عليك عديل .. اااا عمر انت ليه مستعجل ! قال لي انا والله لو علي اعقد عليك هسي دي ❤ سكت ساي 😹 هو بقي يعاين لي ..والله خجلت من نظراتو ..😹💙💙🌸 قولته ليهو عايزه اقول ليك حاجه.. قال لي قولي طوالي انتي ما تأمريني انتي تدللي ي مبروكتي❤ طشيت والله طشيت 😭😹 قال لي قولي.. امممم عمر انا .. انا .. قال لي اها قولي .. انا بر.. ما تميتها الباب فتح الزين.. عمر قال ليهو يااااااااخ ده اصلو ما وقتك كان تتاخر شويه... ضحك قال ليهو اكتر من كده ؟؟ الحاله انا جيت ب زقاق البيت عشان ما يشوفوني جيت.. قال ليهو طيب ارجع ورا الباب كده ..عايز اقول ليها حاجه.. قال ليهو قول انا ماسكك.. قال ليهو الزين.. الزين ضحك ووقف ورا الباب.. جاب راسو ناحيتي و قال لي قولي .. قولته ليهو عمر تصبح على خير 💙 طوالي دخلت وانا بضحك قولته ل الزين اقفل اقفل .. قفل بي خلعه.. عمر اصلا متلصق في حتتو😹 سكلو اتغظ مني ،،😂 الزرين بعد ما قفل الباب قال لي مجانين.. 😹😹 بس الله يخليكم ل بعض.. والله يخليك انت كمان ل بسمه.. الله من بسمتي هو في زيها.. أمممم مافي .. قال لي انتي عارفه انا لو ما واثق في عمر ما بخليك معاهو اي نعم ما في علاقه بيناتنا بس بعتبرك زي اختي 💙🌸 .. حتي انا والله ي الزين.. عشان كده ك وصيه من اخ كبير ما تتتخلي عن عمر... وانا ك وصيه من اخت صغيره ما تخذل بسمه في يوم .. قال لي ان شاء الله... بس سمعنا صوت خالتو زهراء ي اولاد مالكم واقفين في المطر ؟؟؟ الزين حاول ينقص الموضوع قال ليها هو في اجمل من المطره.. تلاته نقاط ....نقطتين المطرة وقفت.. قال ليهو اهو وقفت.. وانت ي ولد مالك فرحان كده ؟ يا امي بصراحه انا ما قادر اصبر ل الصباح .. انا داير اعرس... قالت ليهو ابشر ي ولدي تعرس بكره دي لو عايز .. قال ليها اي ياريت ي امي.. قالت ليهو بس دي منو سعيدة الحظ دي.. قالت كلامها ده وعاينت ليهو.. قال ليها والله ي امي انا من زمان ما كنت مركز شديد وهسي لقيت نفسي ما بقدر استغنى عنها.. هو بقول في كلامو انا بتبسم احساس فرحانه ليهو بس امو ترجمة كلامو و حركاتي غلط .. وفكتها زغروده. الزين اتخلع ورجع ل ورا ،،،جرت لي امنيه يا امنيه يابتي افرحي افرحي.. حصل شنو ي امي الزين بدور يعرس نون صحبتك..💙🌸
______________________

اتصدمت لمن شوفت عمر و صحبة امنيه مع بعض وكمان عمر ماسكها من يدها.. الجمعهم لي بعض شنو. ومتين.. ما ضروري اعرف اكتر من انو دي حاجه في صالحي انو عمر بدورها هي.. يعني انا لي الزين.. والزين لي الحمد الله 😢💜 ..والزاد علي انو قال ليهو عرسنا مع بعض قربت انطط .. وكيف ما انطط وانا ح اعرس الزين..فاتو بي جاي قال لي الزين نمشي .. وصلني لحدي بداية شارعنا زحا مني بعيد. لو شافنا زول ح يقول كانوا مع بعض لانو لو شافونا مع بعض تاني ي الجنه اجمعينا وقال لي ندخل سووا وفعلا دخل هو وانا دايره ادخل لقيت ابوي وشو ما كان بيبشر ب الخير .. قال لي ادخلي ادخلي طلع شاف الشارع ما لقى زول .. قفل الباب ..قال لي ادخلي من المطر دي وغير هدومك تعالي لي.. ياربي ابوي ده هادي كده ليه ..؟؟ ده الهدوء البيسبق العاصفه؟.غيرت هدومي وجيتو.. قال لي اقعدي اقعدي .. قعدتا من سكات. قال لي كنتي وين؟... كنت ك.. مع صحبتي.. قال لي صحبتك منو.. صحبتي بثينه ..قال لي من متين وانتي بتكذبي؟ .. يايابه انا..

انفعل فيني قال لي ما تقولي لي انا. امك فتشت القريه كلها انتي مافي.. دنقرتا راسي اقول ليهو شنو كنت مع الزين عشان رقبتي القاها مفصوله عن سجمي.. قال لي ليه ساكته. ؟ على العليك مشيتي وخليتي اختك براها ومشيتي البحر وبراك وجيتي هسي ؟ ده كلو ده كلو بتعملي في شنو في البحر ... (اي بت بتنزل تحت براها وزي وقت متأخر. ما الصباح .. فهي بالنسبه ل ناس القريه في محل شك ) .. يا يابه لالالا افهمني.. قال لي افهمك ؟ وفي فهم تاني ..قولي اسمعك.. اتكلمي... مادايره تتكلمي صح؟ طيب شوفي. المطرة تقيف انا ح امشي لي الشيخ اخوي يعقد ليك لي عمر.اظن بعد كده مافي داعي لي تأخير !!!! اتصدمت ودموعي جروا ..يايابه اسمعني مافي حاجه اسمعني .جهزي نفسك اسبوع ب الكتير العرس ده ح يتم .. عمر تاني يصرف مع حركاتك دي ... وطلع خلاني في حاله لا يعلمها الا الله ..والمطر وقفت. يعني ح يمشي ليهو💔
*نفس المطرة الجمعتنا في بدايتها فرقتنا في االنهايه اريت السنين كلها امطار نهائى ما تنتهي 💔🌸*

*" قد يكون القدر يريد ان يجمع بين القلوب ولكن النصيب يقول لا يوجد نصيب "💙🌸*

#يتبع

*#رشت_مطر{{11}}*💜
*#بقلم_نون_علي*🌸

في كسر من الثانيه الكلام ده حصل .. الزين قال لي بتوتر شديد امشي فهمي امنيه انا بفهم امي.. دخلته لي امنيه في الغرفه لقيتها قامت من السرير وفرحانه قالت لي تعالي تعالي.. ضمتني وقالت لي الف الف مبروووك اخير ح تبقي مننا وفينا .. انا من زمان دايرك ل الزين. بس الحمد الله جات منكم 💖 ماعارفه اقول ليها شنو ،، ما بقدر ااكسر فرحتها اقول ليها انا والزين ما عايزين بعض.. يعني سبحان الله نفس الزين الكان مكسرني في البدايه هسي انا ما عايزاهو لانو عمر اتملكني ب كلو ❤🌸 اعمل شنو. في نص ده كلو تفكيري مع عمر اذا عرف.مجرد الفكره خلتني ابكي .. جاتني خالتو زهراء واضح انو الزين ما قدر يفهمها زاتها كانت فرحانه صعبه والله نقول ليهم ونحنا شايفين الفرحه دي كلها في عيونهم ..شويه شويه عم الطاهر عرف. واخوان امنيه و اعمامها.. شويه شويه القريه عرفت لانو كل واحد من بنات القريه الكانوا معانا جروا يكلمو اهلهم..تغير جذري في دقايق اي حاجه اتغيرت 💔 انا ما عايزه ما عايزه غير عمر. بس ما قادره اقول ليهم كده ولا الزين ح يقدر يقول لي ابوه كده لانو عارف خاطبنها ل عمر و ح يجوط الحكايه اكتر من كده وندخل في احتمال كبير ما يرضو ليهو بي بسمه. ..ما عشان بسمه كعبه و ما من ريدتهم الشديدة لي بس في طريقه اذا عاند هسي 💔 يعني خلاص كده بالبساطه دي انا كنت منتظره ارجع السرير عشان افكر في عمر😹💔 (وريتكم في جفاف حاصل 😹) ....
*" انا لسه عند وعدي ليك ❤🌸"*
_________________

قاعده ببكي و انا بتخيل يعقدوا لي علي عمر يعني بعد ما اعترفنا لي بعض انا و الزين وشفينا جروح السنين الفاتت دي كلها .. جاتنا الصدمه القويه. عارفه ابوي ما بقتنع ب سهوله حتى لو اقتنع الكلام ده محتاجه جووووطه كتتيره و قومه وقعده ..قدر ما امي حاولت ترضيني ما قدرت ،،في عز بكاي اختي جاتني جاريه بسمه بسمه. ما قدرته ارفع راسي اشوفها قالت لي بكره بيدورو يعقدوا ل الزين علي صحبة امنيه .. انا اعمل شنو. اقتل نفسي اقتلها 💔💔 ما دايره اعرف الكلام ده حصل كيف! كل مركز تفكيري انو الزين مع غيري وانا مع غيرو طيب هسي لو انا بقيت معاهو و دياك مع بعض كان ح اكون اسعد واحده بس حاليا انا اتعس واحده انهرت في محلي غلبني الاعملو حيله ..،،،. معقوله الزين يكون كذب علي غشاني لا مستحيل. ما قادره ما قادره اناا
💔" وياليتني متُ قبل هذا وكنتُ نسياً منسيا"...
__________

بهناك انا عامله نفسي نايمه ما دايره ابكي قدامهم لحدي الساعه 3 وانا ما قادره انوم يعني بكره اهلي لمن يجو ح يكلموهم طوالي... و اهلي م ح يرفضوا ما ناس امنيه البيترفضو،،، عمر ح يكون موقفو شنو ح يعمل شنو! ،،،، نومتا كيف ما عارفه.. صحتني خالتو قالت لي قومي يابتي كويسه.. صحصحت كده قولته ليها ايوة. يا بتي عيونك ليه مورمه.. عشان صاحيه ي دووب ي خالتو.. ااا انا قولته اشوفك ما صحيتي لحدي هسي ليه. و اتصلت لي ناس امك هسي قالوا قربوا... بالجد. ليه الساعه كم.. قالت لي 11 ي بتي.. لا حولااا يا خالتو. اقوم طيب. اي قومي..مشيت صبحت علي امنيه بقت تشاغل فيني والله انتي ما عارفه حاجه...
*" ما اصلو حال الدنيا تسرق منيه في لحظة عشم💔🌸"*
ابو بسمه كان داير يمشي لي ناس عمر ب ليلو الا نعمات وقفتو( ام بسمه ) لا خليهو الصباح .. قال ليها سمح .. الصباح ما صبح كويس طلع لاقى (ابو امنيه ) جايب حاجات تموينية قال ليهو شنو ي اخوي. الليله ضابح سلم عليهو 💙🌸 قال ليهو ااااي ولدي امبارح قال. بدور بت عبدالله صحبة امنيه .. الله الله ربنا يتم علي خير .. اللهم امين كنت ح ادخل الحاجات دي واجي اكلمك انت و اخوي الطاهر(ابو عمر) قال ليهو لا بنجيك تب انا زاتي ماشي ليهو هسي دخل الحاجات.. ودخل علينا انا بفوتك هسي طيب.. طيب طيب امشي قدامي ي اخوي .. فوتك ب العافيه.. الله يعافيك .. ابو بسمه دخل ل الطاهر سلم عليهو و سألو من عمر نادهو وجايي سلم علي عمو و قعد ما كان مطمئن لي جية عمو من بدري كده وفعلا... الطاهر قبل علي ابو بسمه قال ليهو ابشر.. قال ليهو ي اخوي ولدك ولدي و بتي بتك و انا بدور اعقد ليهم الليله وبقولوا خير البركه عجلوها.. عمر اتصدم وقف. ابو بسمه مالك ي ولدي ما جاهز.. صحي ي الطاهر الليله بدور يتقدم حاج الشيخ ل ولدو الزين ل صحبة امنيه ....
بلسان عمر
وقفت لمن قال ابو بسمه عم عثمان كلامو انو يعقدوا لينا .كيف يعني اعقد عليها ؟ وانا اصلا. ما دايرها واصلا قال الزين ح يعقدوا ليهو على صحبة امنيه. اخر يوم في عمري كان العرس ده تم.. الاتغير شنو لحدي امبارح بليل كان كويس الزين عمل كده ليه قصدو شنو .. جريت ليهو و خليت ابوي و عمي ينادوا فيني. .. عمي الشيخ لاقاني في الشارع... كانت في بالي حاجه واحده الزين ليه عمل كده..

دخلت الصالون لقيتو مافي سألت اخوانو عنو قالوا ما عارفين.. اكيد ح يكون نزل تحت جريت جري كم مرة قربت انزلق في الطين بسبب مطرة امبارح بس برضو ما ح اقيف.. لمن وصلت بديت افتش فيهو سألت المزارعين. ما عارفين قالوا.... لحدي ما لاقاني واحد قال شافو على ضفة النيل بالجهه الغرييه . طوالي مشيت ليهو لاقيتو قاعد وبعاين لي البحر مسكتو من جلابتو.،،،عمر؟. قولته ليهو عايز تفسير كامل عن البحصل ده كيف دايرين يعقدوا ليك عليها .. زحا يدي منو انت زاتك كيف دايرين يعقدوا ليك عليها؟؟؟ قولته ليه عشان كده مشيت قولته ليهم دايرها ؟؟؟ قال لي مستحيل اعقد عليها وانا عارف البيناتكم كل القصه... و حكاها لي كلها.. قولته ليهو غلطان انت هسي تمشي تنهي المهزله دي . اذا نحنا الرجال ما نهيناها ال ح ينهيها منو؟،،،طيب وانت زاتك تنهيها،،، لا انا بنهيها. بس اتحرك سريع الله يرضى عليك.. ومشينا .. لمن وصلنا لاقينا اهل نون جووا دخلنا ليهم و نحنا ب نشيل في نفسنا،،، ابوها كان نايم و اعمامي كلهم قاعدين قولته لي عمي عبدالله و عثمان و ابوي يجو معانا.. عمي عبدالله قال نمشي وين ونخلي الراجل ..الزين قال ليهو معاهو اخواني انتو تعالوا ي ابوي سريع عليك الله سقناهم بيتنا ،، ابوي قال لي ي ولدي بشرنا ؟ قولتهم اول حاجه بعتزر انو خلعناكم كده بس قبلت علي عم عثمان.. انا يا عمي بتك في راسي قبل عيوني وبسمه دي زي اختي بس الزين واصل.. بس انا بريدها. يا عمي . كلنا سكتنا منتظرينو بعد مسافه قال لي بترفض بتي ي عمر اتهجمنا من كلامو قولته ليهو العفو ي عمي بتك ما هي البت البتترفض بي انا بعتربها زي اختي والزين شاري بتك ي عمي💙🌸 عمي الشيخ قال ليهو انتي لو ولدي ما قدر المقام..قطعو عمي عثمان قال ليهو لالا بسم الله الزين مكانتو زي عمر وانا ح القى احسن منو وين.. قولته ليهم ب سرعه قبل ما يغيروا رايهم نقول مبروك.. قالو لي مبروك كل واحد بدا يبارك لي التاني.. ودي مشكله الزين اتحلت انا البحلني شنو! ما ينفع اقول ليهم انا زاتي اعقدو لي علي صحبة امنيه ح يفهموني غلط انو انا ما داير بسمه عشان بت البندر لازم اصبر. لازم .. بعاين ل الزين الدنيا دي ما قادره تشيلو يوزع في البسمات ساي افرح افرح ما انت انجزتاا وانا لسه والله يقصر مشواري 💙🌸
*" يااخ انا مهمه اتوه واتوه بلقى نفسي فيك ❤ انا مني ليك وانتي مني لي ❤" ( ونحنا انتو وانتو انحنا😹🌸)*

#يتبع

*#رشت_مطر{{12}}*💜
*#بقلم_نون_علي*🌸

قاعده جمب امي ما مصدقه اني اخيرا بعد شهر شوفتها اتونستاا معاها مسافه و خالتو زهراء قاعده جمبنا تتونس معانا... الزين قطعنا وناداها... قالت ليهو تعال سلم على خالتك ي ولدي. سلم علي امي وعاين لي بنظرات زول مبسوط؟ في قلبي قولته الزين ده مجنون ولا شنو ده وضع يكون فيهو مبسوط.؟ خالتو طلعت معاهو بره اتكلم معاها مسافه و جات راجعه ووشها مقلوب لكن بينت لينا انها كويسه. استأذنت تمشي ل امنيه في الغرفه مشت ليها .. قالت ليها .....يا امنيه يا بتي اخوك الليله دخلنا في ضفورنا ،،، ليه يا يمه الحصل شنو؛؛ طلع ما داير نون وانا استعجلت عليهو،، كيف كيف ؟؟ ليه ما دايرها،،، قال بدور بت عمو عثمان بسمه و ح يعقد عليها الليله مع اذآنات العصر،،، بسم الله يايمه متين هو والحصل شنو وليه مستعجل كده ! ومش بسمه خاطبنها لي عمر ؟؟ ،،، والله ي بتي ما عارفه الحصل شنو جاني هسي قال كلامو ده و ابوه و عمك عثمان راضيين ب العرس و اكيد عمر بكون مقتنع ! ان شاء الله يايمه.. طيب ي بتي النطلع على ناس سوسن ديل بره ..اناديهم هنا .... طيب.. جات خالتو زهراء عشان نقعد انا و امي جمب امنيه دخلنا ليها.. خالتو زهراء قالت لي امي تعالي ي سوسن اوريك الحمام .. ..قعدتاا انا وامنيه. كل ما اعاين لي امينه تكسر عينها ..خجلانه مني بس من شنو ما عارفه انا اصلا ما قادره اركز معاها الفيني مكفيني .. شويه شويه الناس بدو يجوا ويكتروا انا وامي مافهمين اي حاجه انا قولته لي نفسي معقوله ح يعقدوا لي هسي على الزين لا اا ما عايزه غلبني كلو كلو مشيت ل امنيه قعدتا جمبها ب طرف السرير وانا متوتره المشكله هي متوتره معاي مالاا!! بعد دقايق قولته ليها امنيه انتي في . قطعتني وهيي بتحضني الناس الفي الغرفه استغربوا وانا زاتي،،،،، مالك ي بت ؟ لقيتها تبكي ي بت امنيه ؟ قالت لي انا اسفه ،،،،علي شنو ،،، مسكت يديني اعفي لينا عشمناك في الزين و طلع 😭😭 ،،،،، قلبي اكلني قولته ليها طلع شنو؟؟؟ ،،،، طلع داير بسمه و بدور يعقدوا ليهو صلاة العصر،، من فرحتي الزايده وانفعالي بقيت انطط 😹💙 نسوان الغرفه قالو اشي البت جنت 😲.. روقتاا شويه من انفعالي عاينت ل امنيه بتعاين لي بنظرات للدرجه دي ما عايزه الزين .. قعدته طوالي افهمك افهمك.. بس تعالي جاااي نسوان القريه ماا يسمعونا... الحكايه و ما فيها... حكيت ليها الحصل كلو اتهجمت قالت لي كيفنهو الكلام ده! ،،،، براحه براحه ما تكوركي ،،، وده كل الحصل وانا ما عارفه،، والله ما لقيت فرصه،،،وانا عامله نفسي زعلانه ليك اتاريك ما هينه 😹،،صحبتك ي ماما 😘 بقت تضحك معاي ..امي و خالتو جووو خالتو زهراء بتعاين ليها نظام قولتي ليها. امنيه هزت ليها راسها.. قعدنا شويه وبدينا نغير هدومنا ونجهز ل العقد ..طبعا انا معنوياتي في السماء فوق 😹💙🌸 مسافه ما انتهينا قالو عقدوا...

" وانا لمن ربطت نفسي معاك ربطت ب علاقه قويه لا بتهزها المسافه لا بييبعد بيناتها الزمن "💜🌸

بسمه الله يرضى عليك ي بتي قومي الناس بدورو يعقدوا ليك هسي.. يا يمه انا ما عايزه،، يهون الله يا بتي كيف ما عايزه قومي قومي،، يا يمه ما دايره اقوم،، هسي البكى ده لزومو شنو، ما رديت ليها قالت لي سمح نادت اخواتي قالت ليهم جهزوها وفعلا رغم اعتراضي بس هم بدوا يجهزوا فيني كل واحده ماسكاني من طرف ولسه ببكي وهم يضحكوا فيني ،،انا ناااقصه كمان قوولته ليهم بي زهج بتضحكوا لي ،، قالوا لي ح تشوفي براك وا اتكلمت معاهم تاني... ما عندي طاقه عشان اتكلم اصلا بعد ساعه جهزتاا و هم طلعوا سمعت صوت ضرب رصاص معناها عقدوا.. و انا البكى زاد ..اسوأ حاجه يعقدوا ليك على زول ما عايزهو ...اي نعم عمر مكمل الرجوله كلها بس انا الزين متملكني ❤🌸 سامعه الزغاريد بره ،، اخواتي جوني جاريين كل واحده دايره تبارك لي المشكله انهم فرحانات كأنهم ما اخواتي هم فاهمين انو انا عايزه الزين طيب فرحانين ليها شنو ؟؟💔 جاتني امي تبكي وانا اصلا دايره لي سبب ابكي ،، عملناهو بيت عزه واحده من اخواتي فكتها مني وقالت ليها اشي يايمه الباب قصاد الباب بقيت اعاين ليها في بالي عمر ما ح يسافر ،، العريس جاء العريس جاء النسوان بدوا يزغردو تاني ،، يايمه انا ما عايزه اشوفو ، انتي جنيتي،، ياااااااخ 😭 وقبلت علي الحيطه وشي انشقى من البكى .
"بزرف ليك الدمعه واهاتي و كل دروب الحب. مسدوده......💔"
اخواتي ضحكوا فيني و طلعوا و امي طلعت،،، بعد شويه سمعت زول دخل و قفل الباب ده عمر انا ما ح اقدر اقدم ليهو اي شي و هو عارف كده.... ليه الزين و عمر رضوا ب المهزله دي بفكر كده سمعت الصوت الودر صبري نفس الصوت الحنين قال لي.

ما تباركي لي يا مريودتي❤ كذبت سمعي ؛الزين ح يجي من وين في الوقت ده ،، سامعه خطواتو جايه علي وقال لي الناس بتبارك لي وانا بلاهي عشان ابارك ليك❤ انا من زمان راجي اليوم ده راجي امك تقول لي ادخل مرتك منتظراك ❤ و رجاال القريه يقول لي امشي بارك ل مرتك❤ واقفل الباب علينا قدامهم كلهم و مافي زول يسألنا ابشري يا مريودتي تاني ربنا يحلك مني ❤ بقول في كلامو ده وبنزل علي قلبي زي العسل ما قادره اصدق انا مرتو انا مرت الزين ما قادره 😭❤ هو لمن شافني ساكته لفتني عليهو قال لي شنو لكن
😉❤ انا لسه ما مستوعبه معقوله ! هو شكلو فهمني ضحك وضماني عليهو ❤ قال لي انا زاتي ما قادر اصدق خليك انتي ❤ رجعت ابكي تاني قال لي ليه ليه الدموع دي؟!! مسحهم وخدت يدينو في وشي واتنهد تنهيده براحه كده قال لي نحنا مشينا الخطوه الاولى و باقي مشوارنا بقصر❤ ابتسمت ليهو بس دقيقه دقيقه يعني هو كان عارف و عيشني على اعصابي فكيت يدينو مني و بديت اضربو،،، انا شغاله ليهو خوفتني وبقيت علي اعصابي و البكى ده شقاني شق و عيشتني اسوأ فتره في حياتي هنا مسك يديني و رجع تاني ضماني عليهو قال لي ماهو انتي ما بتحسي ب السمح الا تجيك المرة❤ رخيت يديني ومسكت فيهو وانا ببكي قال لي انتي سموك بكا و هو بمسح علي شعري ❤ وروني كيف ما ابكي وانا في حضنو كده و ريحتو الماليه المكان وكمان ده زيني ريد عمري كلو فيهو ❤ قال لي العرس بعد اسبوع بس وريتك.. ما تقول لي مستعجل ليه. انا هسي بسوقك بيتنا ولا علي بي زول❤

*" قدر هواك بيجيني ليك ..جمع قلوبنا و ولفةة"❤🌸*

ب جاي الناس داخله ومارقه تبارك وانا زي ام العروس فرحانه وشديد كمان اكبر هم بالنسبه لي انزحاا😹💙 شايفه عمر شغال مع الرجال وبدخل ويمرق بس ولا كأنو بعرفني متين اتغير ! قولت يمكن عشان مشغول .. بس الحكايه دي استمرت ل نهاية اليوم برضو ما ركزته،،،،خالتو زهراء جات قالت ليه ووبعلي علينا الزين قال العرس في اسبوع بس النسوان بدو يهدوا فيها انو هم ح يكون معاها وكذا ،،، انا وامنيه اتحمسنا شديد ل العرس ،، نفسي اشوف اعراسهم كيف،، سمعت النسوان ماشين ل بسمه امنيه قالت لي امشي معاهم،،، قولته ل امي ارح معانا امنيه قالت لي خالتو سوسن خليها تعبانه من جات ما ارتاحت ،، تمام امشي واجي ..مشيت معاهم شوفت عمر في الشارع.. اتخيلوا انا الهبله وقفت في نص الشارع دايره أأشر ليهو حضرت سيادتي دايره اسلم 🙂💙 كان واحد يجي يديني كف في وشي الحامض ده 😹😭💔💔 بس هو فهمني وحمر لي عيونو قبل ما اعمل اكشن قدام الناس ديل.. دخلت طوالي مع النسوان بيت ناس بسمه كان طلعوها.. ماشاء الله رغم ما عاملين ليها مكياج. بس جمالها طبيعي 💙 باركت ليها قالت لي براحه عقبال ليك انتي وعمر 💙 ويارب تعيشي نفس فرحتي دي 💙،،،،، اليوم عدا علي كده تاني يوم الناس بدت تشتغل ل العرس ،، امي لسه ما قالت لي حاجه بخصوص الرجعه ،، موضوع اني بشتغل مع الناس ده مُكيفها غايتو😹💙 لا وكمان العده بقت علي ثابته 😇😹💙وبدفق مويتها .. والله بالنسه لي انجاز ،، يوم كانت كتيره ل الساعه 1 بغسل فيها كانو معاي البنات ورجعوا و النسوان القاعدين نايمين هناك نهايه الحوش 😹. قربت انتهي جاء عمر شكلو محتاج حاجه لي الرجال اول ما شافني... داير رجع بس انا ب عفويه ناديتو عمر؟؟ وقف مسافه داير اقوم كدا لقيتو وصلني بس ولا قال لي اي حاجه انا مديت يدي عشان اسلم. اتخيلوا ما عاين ليها اصلا ....عمر؟؟؟ قولته ما مشكله نزلت يدي من سُكات .،،، عمر انت ليه اليومين ديل متغير ،، رد بعد مسافه قال لي انا حاسي نفسي استعجلتاا ودخلت في علاقه يمكن انا ما قدرها !
حتي الابتسامه الكانت علي وشي راحت وقلبي اتكسر ألف مرة 💔

*"كان خاوفي منك جاي من لهفة خطاك علي المواعيد الوهم"*

#يتبع

*#رشت_مطر{{13}}*💜
*#بقلم_نون_علي*🌸

بعد كلامو دخلت في حرب نفسيه عديل قصدو شنو! قلبي قال لي اكيد بهظر بس هيأتو و طريقه كلامو ما كانو ببينو لي انو بيهظر ،،، طيب انا واقفه ليه! منتظره شنو يقول لي معليش ما تزعلي !!،، بعد ما قال انو استعجل ،، لحدي اول امبارح دي كان عايزني الليله الجد شنو! ،،هل مشاعري دي عندو لعبه! لاا و ما وقف علي كده قال لي "ما قدرها" يعني شنو ما قدرها! ما ح يقدر يستحملني،،،، بعترف اني مجنونه ب زياده و مرات كتيره ما بعرف اتصرف بس ده ما معناها اني هبله و ما بعرف حاجه ،،، لااااا يا عمر. انت شكلك لسه ما بتعرفني،، يمكن كلامك ده جاي من زعل بس صدقني هدم حاجات كتتتتيره كان ممكن نعيشها،، انت انسان متناقض وخليتني اتناقض معاك،، كلامي ده كلو قولتو عن طريق نظراتي،، حتى خشمي ما ساعدني اني اقول ليهو .. عاينت ليهو مسافه قولته ليهو الله يقدرك على غير ،، و مشيت .. خايفه يقول كلام اكتر من كده ويبقي صعب اني تاني اتعامل معاهو ،،، رغم كلامو ده انا عايزاهو وفي نفس الوقت ما قادره اتجاوز كلامو الكان مختصر لي كلام كتير ،، لا قادره اقرب لا قادره ابعد،،، ناداني بعد تردد نون ابتسمت بي زعل دي اول مرة يقول اسمي بس اريتو ما قالو ،، فات طوووالي دخلت الغرفه! بكيت ،، المشاكل دي ملاحقاني شديد اطلع من مشكله اقع في اكبر منها .. حياتي بقت نكد في نكد 💔 لازم ارجع الخرطوم ....
*"لمتين مواعيدك سراب ما الريد شقا وحرقا وجفا"*

غبي غبي اها زعلتها مرتاح كده مسكت شعري شديد انا ما كان قصدي بى كلامي انا ما عايزها لا انا عايزه وروحي متمسكه بيها،،💙🌸 ،، بس انا رابط نفسي بي الماضي ب علاقتي القديمه،، من لحظة الزين عقدوا ليهو قال لي. وهو مبسوط ...عقبال عندك .. واصل بصوت براحه ما تفرض في صحبة امنيه لانو بيشبها الفرح.. بعد كلامو ده جاتني جمله في راسي هل انا بستحقها ؟ هل هي بتشبهني! خوفت ليها من نفسي عليها وخاصه انو انا زول بارد و مستفز ،، ح تستحملني. وانا انسان. طالع من علاقه فاشله استهلكت كل احاسيسو ! وهي بتستحق الحاجه السمحه ،، يمكن خاني التعبير في كلامي ليها ،،، عيونها كانت بتحكي بي كلام كتير مكتووم جواها،،و اكد لي لمن قالت الله يقدرك على غير ،، انا غيرك يابت الناس ما عايز .. الله يقدرني عليك انتي؛؛ واقدر اقدم ليك الحاجه البتشبهك💙🌸 ما انتظرتني افهمها كلامي.. اتررد شويه اني اناديها بس فاتت .. وتميت الناقصه و زعلتها. ،، ليهو حق الزين يوم العقد يوصني عليها ، زي كان عارفني ح ازعلها ...ولت انا ضحكت ورديت ليهو بثقه في زول يزعل نفسو💙🌸 اهو زعلتها ،،،رجعت البيت وانا بفكر فيها بس في عقلي قولته ما مشكله لحدي عرس الزين اكون قدرت اتجاوز الماضي او حاولت اتجاوز واعرف طبيعة مشاعرها اتجااهي شنو.....

*" بننسى انو. كل ما ننتاخر علي حاجه مهم بتنقص فرصتنا في الحصول عليها"*

يا بتي نسافر طوالي كده ؟ قولي بسم الله ؛؛ ياامي انا عندي مواضيع هناك في الخرطوم لازم امشي اعملها خالتو زهراء قالت سجمي سجمي تمشي كيفنهو ؟؟؟؟؟؟ ما تحضري عرس الولد .. معليش ي خالتو ادينا خاطرك .. سوسن ي اختي اتكلمي مع بتك.. امي سكتت مستغربه فيني دي ما انا الكنت بحنسها تخليني اجي البلد،، امنيه بتعاين لي بي استغرااب احساس لحدي امبارح انتي كنتي كويسه؟ خالتو زهراء لمن لقتهم ساكتين قالت لي يابتي انتي في زول زعلك كلميني ،، لا ي خالتو كلهم هنا كويسين معاااي ،، قالت لي طيب والله يابتي ما تمشو الا تحضروا عرس ولدي،،امي قالت ليها لكن نحنا ما مجهزين نفسنا ي زهراء ،،، لا بنجهزكم نحنا تب ،، قدر ما حاولنا نقنعها ابت كلو كلو ،، حلفت عديل ، ، بالجد شينه نمشي كده ما نحضر العرس بس كمان انا ما بقدر اقعد اسبوع كامل ،، وانا متأكدة كل ما اطلع بره ح الاقي عمر و ح اضعف قدامو ...💔

*"حطمت في قلبو الامل كل الاماني الخضرت"*

الناس تقول لي يا الزين اسبوع بسيط شديد لي العرس ...هسي يومين و انا بتململ اتم اسبوع كامل ،، لااالا ما بقدر ،،، اشوف لي طريقه اطلعها من بيتهم ، بس منو يطلعها لي ،، ايوة ايوة نون ممكن تساعدني ؛ اتذكرت انو هي ليها يومين قافله نفسها في الغرفه جووه ما بلاقيها اصلا ؛؛يااااخ يبقى علي تطليع بسمتي ولا نون ،، مافي طريقه غير اخت بسمه ساره مع انو ما واثق فيها شديد بس اجازف ،، قطعني صوت اخوي بضحك... قال لي ارتاح ارتاح الايام دي من الرزاعه بس بعد العرس طوالي تنزل معاي 😹💙 ما عندك اي مشكله ،، دخلوا فينا رجال جاين يشاركوا لي انسحبت منهم براحه ومشيت بيت النسوان بهناك انادي اخت بسمه ،، بس الحمد الله ربنا بحبني لاقتني نون جايه من الحمام ،، وقفتها.. كانت بارده وزعلانه كده حتى وشها بقى شاحب ؟ استغربت بس ما علقت ،، وريتها انو تساعدني وكده بتكلم و اوريهاا تعمل شنو بس هي.

مااا معاي،، نون انتي معاي ؟؟،، اي معاك،، واصلت كلامي بس الزي الكانت مودره مودره ،، اخر حاجعه قولتها ليها بعد ما تطليعها بسمه عارفه المكان ، هزت لي راسها و دايره تفوت ،، نون امشي ليهم هسي انا بنتظركم هناك،، ولا قبلت علي ..هزت راسها ...ودخلت ،، ما ركزت كتير قولت عمر براضيها 💕🌸 .. من دربي نزلت تحت عارف نفسي شفقان 😹💙 هو بسمه دي عليك الله ما بي يشفقوا ليها.💕

*" وبقيتي لي سكة وعيون.. لا قدرتا اطولك شان اجيك لا قدرتا من غيرك اكوون "❤*

يومين مرو وانا حابسه نفسي مع امنيه في الغرفه حتى العدة الكنت بغسلها خليتها لي بنات اهلهم. ،، وامنيه تسأل فيني مالك،، عمر عمل ليك حاجه ،، برد ليها مرات بقول ليها لاااا. ،، يمكن الحاجه المريحه انو الجو من يوم المطر بقى مغيم و كل ما تصب بليل انا بكبي الموضوع مئذم شديد،، يوم جايه من الحمام حقهم المركون نهاية الحوش😹💔 صادفني الزين ،، سلم علي سلام حلو. بس ما قدرته ابادر زي سلامو ،، بتلكم معاي وانا منتظره متين يخلص خايفه عمر يجي فينا.،، بس الزين زي البيقول لي خليهو يشوفك.... دايرني اطلع بسمه من بيتهم. وانا من الغرفه ما دايره اطلع،، بي الشوق الشوفتو في عيونو جبرني اوافق ،، بعد ما فات ،، مسافة استحميت و كلمت امي و خالتو زهراء لقيت الوقت جاء ؛؛ وصلت لي بيت ناس بسمه ،، ماشاء الله ناسهم كتار لي درجه قالو لي العروس في بيت خالتها فاطمه امشي ليها بس الحمد الله الموضوع ح يكون اهون سوقته معاي واحده من اخواتها اسمها نينا🌸 ظريفه كده 💙🌸 ،، الشارع كلو بتتلفت. زي الغنمايه لمن مرينا بي بيت عمر خوفته يفتح الباب قولته ليها اجري اجري 😹 استغربت و جرت معاي ،، اتلفت ب وراي لي بابهم ،، ما فتح ،، وقبلتا.. كان اشوفوا ليك قدامي ،، وقفت طوالي البت وقفت معاي 😹 ،، هو بقى يعاين بي ورانا نظام في شنو؟ الساكيكم منو؟ لمحت نظرات انتي كنتي وين💔 فقدنك،،، عدلت التوب قولته لي البت ارح ،، جينا مارين بي جمبو،، ( الزين في اللحظة دي داعيتو لي جدو التلاتين) ماسكه نفسي ب القوة،، بس هو وقف نينا ،، انا اعجبكم.. قلت لي نينا وصفي لي امشي ! هو استغرب قال لي دقايق ما بنختفها منك ،، ما رديت ومشيت ،، ما عارفه انا ماشه على وين بس ما دايره اقيف!! ،، قال لي نينا امشي ما تخليها براها و انا بكون بي وراكم ،، اول ما قال ليها كده زدتاا من سرعتي يعني عامل فيها مهتم!!😼 ،، نينا نادتني جات لحقاني ،، ياحليلها ما فاهمه اي حاجه 🌸 ،، وصلنا بيت خالتهم قبل ما ادخل شوفتو وقف !! عاينت ليهو بنظرات البيك اتعرفت ،،، دخلت سلمت على بسمه ،، تعاملنا مع بعض اختلف كتير بعد عرفنا بعض ،، بعد تعب حتى اقنعتها ،، خايفه اهلها يعرفوها ، قولته ليها سريع سريع ،، قالت لي تكوني معاي ،، اي بكون معاك 😘💜 لابسه نقابها و طلعنا ننسحب زي الحراميه لحدي ما وصلنا باب الشارع صحباتهاا يشاغلوا فيها 😹 ،، عاينت يمين شمال عمر مافي ،، الحمد الله ،، طوالي البحر جاك زولين ،، الزين من شاف بسمه ولا قال لي ي الاخت شكرا ،، ما عمل غير جا علينا ومسك يدها وقال ليها و هو بعاين ليها في عيونا من تحت النقاب يرضيك مرتي اشوفها بعد تعب

*"وأنا كيف ما أخافك ما حبيت خلافك حُبك منيتي وفرضي وسنتي وناري وجنتي"❤*


#يتبع

*#رشت_مطر{{14}}*💜
*#بقلم_نون_علي*🌸

قاعده في امان الله مع صحباتي عند ناس خالتو فاطمه ....بالنسه لانو بيتنا مليان ما ينفغ اتحبس هناك فاتحبسته عند خالتو،، اتفاجأت بي جيت نون معاها اختي نينا ،، والفاجأني اكتر دايره توديني لي الزين تحت ،، قولته ليها ما بقدر امشي ،، بعد تحانيس و دخلوا صحاباتي وافقته عشان اقتنع ، ما بكذب انا روحي كانت مشحتفه عشان اشوفو بس خايفه زول يشوفنا😹😹 + دايره اتجرجر معاهم شويه ،، غايو بعد تعب حتى اقنعوني بس علي شرط نون تكون معاي ما تخليني معاهو براي ،، لبست العبايه و النقاب و طلعت معاها وانا دايره اموت من الخوف ،، كمان صحباتي ما قصروا معاي شغلوها لي ،، في الشارع ،،نون كانت ساكته. زي المهومه مهومه بتعاين في الارض،، يمكن انا ما بعرفها كده بس حسب وصف اخواتي انها زوله وناسه بس وين ده كلو ،، قولته ما اضغط عليها ،، من سكاتها ده كلو قالت لي حاجه واحده انو الزين قال انا عارفه المكان الح لاقيهو فيها اكيد المكان الاعترف لي فيهو💖🌸،، من بعيد شوفنا الزين ، قلبي اتقبض. ده شوق ولا خوف ولا خجل ما عارفه والله بس مرتبكه كده ،،مسكت في نون قوي اوعك تخليني براي ،، قالت لي طيب ،، بس اول ما الزين جا علينا وقال لي. يرضيك مرتي اتعب كده عشان اشوفها💖 انا ودرته مع كلامو،، عيونو كانت بتحكي كلام كتير وشوق شايلو اكتر مني❤🌸 عشان كده قال لي نون خليك بي جاي انتظرينا ولا قالت ليهو حاجه من سكات فااتته؛؛ صراحة استغربت فيها. سألته الزين كان بعاين في الطريق المشت بيهو هي مالاا ،؟ قال لي زاتي ما عارف ،، فكلمت عمر انو هي ح تجي معاك يشوفها الحاصل عليها شنو،،، ان شاء الله عمر يقدر يراضيها لانها شويه و ح تبكي ،، انتي عارفه انو حتى عمر ما عاجبني شكلو زاتو متغير،، ليه الحصل عليهم شنو،؟؟ عايز يرد لي قال ااااا وجراني من يدي عليهو وواصل انا قولته ليك اني بالحيل مشتاااااق ليك ❤ والشوق زاتو فااايض❤ سكتاا عاد السكات عدوي 😹، خته يدينو في خصري وبدا يلولح فيني❤🌸 و يتلولح معاي الزين ده مجنون😹🌸، قرب راسو مني واخد ليهو نفس قال لي شامي ريحه سمحه سمحه.❤🌸 زحيت منو طوالي قولته ليهو الزين ؟؟؛؛ شداني تاني ناحيتو بي قوة قال لي بي صوت رايح ليه زحيتي مني ،، واصل ب زهج شنو النقاب لابسهو ده معكر طريقي كمان الريحه دي شغاله... وغمز ،، خجلت ودخلت في صفوري قولته ليهو الزين النبي فكني النبي،، قال لي ب تملك يابت حلالي انا راجلك ❤ ،، وقفت والخجل تاني رجع 😹،، هو شاف حالتي دي بقى يضحك ورفع راسو ،، ياساتر ياساتر من ضحكتو يااخ انا نظره منك بترميني تقوم تضحك عايزني اموت !! لمن لاحظ لي نظراتي وقف ضحك وقال لي احم احسن ما تعايني لي كده !،،( زي ما قالوا في الفيلم انتي كده بتجريني لي الرزيله وانا صراحة عايز😹)،، اتمالكت نظراتي علي ،، دايره اتفك منو ، هو الغبي لصقني عليهو زياده قال لي الليله تمشي مني وين؟؟،، قولته ليهو الزين فكني ، سكت لحظه ...و ماعارفه نظراتو لي شنو انا مدنقره راسي ،، بس شويه فكاني ومسكني من يدي قال لي انا ح احترم خجلك ده هسي بس بعد العرس والله الا كان تخليهو عند امك ؛؛ قال كلامو ده ب غيظ طوالي ضحكت فيهو،، قال لي ما تضحكي ؛؛ ضحكت ليهو زياده،،قال لي ايوااا ،، فجأة جرا النقاب مني وقال لي واصلي ضحك خليني اشوف عيونك السمحه دي سمح و اشوف ملامحك الطفوليه المتملكاني دي❤❤🌸 غصبا عني ابتسمت ،، من شاف ابتسامتي مسكني من يدي وقال لي تعالي،، قعدنا علي البحر وهو ليه ماسكني،، قال لي أنتي عايني لي البحر وانا خليني اشبع من عيونك واصبر نفسي بيك لحدي ما يتم العرس،💕
*"اصلو غير عينيك مافي للافراح معاني"💙*

بعد بعد ما الزين قال لي انتظرهم بعيد عنهم شويه ، ما قدرت اقول ليهو تمام او اي حاجه مشيت وانا ساكته ،، ديل نفسهم الاعترفوا لي بعض معانا نفسهم ،، بس سبحان الله هم وين ونحنا وين،، الزين وفا ليها ب وعدو ؛، بس انا وين وعدك لي يا عمر ،، دموعي نزلوا مسحتهم بي طرف التوب ؛، ما دايره ابكي زياده ويجوا يشوفوا عيوني مورمه من البكى ؛، ما ح اقدر افسر ليهم انا مالي،،احسن اتمشى لو وقفت كده ح ابكي زياده،، كيف ما كيف لقيت كرعيني ودتني علي المكان الوراني ليهو عمر ،،💔 نفس المكان ده كنت فيهو مبسوطه ونفسو حاليا انا زعلانه،، رايطه نفسي بي زول معين خانتني دموعي تاني و بكيت،، بس سمعت صوت بقول لو كنت قايلك كلامي ح يأثر فيك كده اريتني اموته ولا قولته ليك كده 💔🌸

*"روحي لسه بتلهي عليك ... ولسه مستنياك "*

يومين وانا ماشايفها كأنها اختفت ؟ما بكذب اشتقت ليها شديد بس كان لازم اعرف هل انا عايزها بالجد ولا عايزها عشان انسى بيها رغد ..ابين مشاعري اتجااها ،، يومين مروا وانا. ما فضل لي الا امشي ليها جوون واقول ليها انا عايزك هسي دي هسي بس بي وين ،،، و كأنو ربنا ده داير يجمعنا..

لمن الزين كلمني انو ح يقابل مرتو علي قولو ،، وجايه معاها صحبة امنيه ،، هنا انا ركزته واصلا قال لي بي شك انت صحبة امنيه دي مزعلها ؟؟ ،، سكت ما بقدر اكضب عليهو ولا بقدر اقول ليهو الحقيقه،، قال لي طيب ما مشكله المهم عندي تراضيها انا هسي بنزل تحت.. تعال وراي وفات. علي كده ، وانا راجع البيت عشان اغير هدومي صادفتني كانت جاريه من شنو ما عارف بس بقيت مركز معاها عايز ابل شوقي ليها بس ،، كنت ح اضحك لمن شافتني قدامها ملامحها اتحولت من شافتني 😹💙 ،، جات فايته بي عندي عادي و انا المتلهف عليها ،، وقفت اخت بسمه ،، بإني متاكد ب حلاتها دي ولا ح ترد لي اصلا،، الغبيه بدل تقيف دايره تمشي ،، اخليها تمسي براها لاالاالا مستحيل كلمت اخت نينا تمشي معاها وانا وراهم انتظرت لحدي ما دخلوا،، و اتحركت سريع علي بيتنا غيرت هدومي و لبست جلابيه و نزلت تحت البحر،، كنت متاكد ح امشي البحيره ،، وفعلا لقيتها هناك ،، كانت بتبكي بي طريقه قربت امشي احضنها و اقول ليها اقتليني ارميني في البحر بس عليك الله ما تبكي كده 💔🌸 ما عارف ليه حسيت برجولتي نقصت ،، يااااخ ربنا ده لمن خلقنا ما خلقنا عشان نزعلهم خلقنا عشان ندللهم 🌸💙

*" الشمس في اعليها أنثى و كل الطييبات بناتُ"💙🌸*

#يتبع

*#رشت_مطر{{15}}*💜
*#بقلم_نون_علي*🌸

سمعت صوت عمر بي وراي ،، مااتخلعت ،، ما عايزاهو يشوفني و انا ببكي و ما عايزه يشوفني و انا ضعيفه كده ،، اتحركت قدام طوالي ،، و قبل ما اتحرك خطوتين و مسكني من يدي و قبلني عليهو ،، قدر ما قاومت ما قدرت افك يدي ،، و دموعي جروا زياده فأطريت بي يدي التانيه امسحهم ، هو كان بعاين لي بنظرات حنين،، وانا راسي من الارض ما رفعتو،، بعد مسافه قال لي بصوت حنين ليه بتمسح دموعك مني ،، ليه بتدسي ضعفك قدامي،؟ ،، عمر ده مجنون هو ما عارف انو ضعفي ده منو هو ،، واصل قال لي ضعفك و بكاك ده مفروض ما تدسيهو مني لااني انا الح اغير ضعفك ل قوة،💙🌸،، هنا ياادوب بكيت سمح ،، ما عرفت عمر ده كان طبيعي ،، ما متذكر هو قال لي شنو؛ او ما عارف الانا فيهو ده بي سببو ،، لمن بكاي كتر شكلو غلبو يشوفني ب المنظر ده فك يدي وبقى ماشي وجايي عروقو كانت باينه غضبو من نفسو حتى وشو البقى احمر من الزعل الكاتمو ،، وقف قصادي وقال لي الله يرضى عليك ولو عندي خاطر عندك ما تبكي ، انا ما قدر دموعك دي يا بت الناس ارحميني 💔🌸،، مع كلامو ده رفعت راسي يعني هو مُصر انو ما بقدر لا علي دموعي لا علي انا شخصيا،، داير يمسك يدي تاني جريت يدي سريع و انا انفعلت انا الفيني كملت والله ،، ما بقدر اصبر اكتر من كده قولت ليهو بي زعل شديد... كل مرة ما قادر ما قادر انا .. لي الدرجه دي ما بتقدر تستحملني لدرجه دي انا صعبه،، بعترف اني ما من البلد ولا اتربيت زي تربية بنات البلد ، بس ده ما معناها اني ح اكون متهوره و ما عقلي زيهم ،،اتكلمت كلام كتير طلعت الجواي كلو وال إتراكم خلال اليومين الفاتو ،، هو ما اتكلم ولا قاطعني بس مربع يدينو عليهو و بعاين لي بنظرات تطلعي الفي قلبك كلو انا بسمعك !! غطيت وشي بي طرف التوب وبحاول اوقف من البكى، *(وتتبكم حروف القول💔🌸)*
، قرب مني خطوه بس مخلي مساحه كافيه بيناتنا،، قال لي بصوت مبحوح ده كلو في قلبك ،، منعول ابو اليوم القولت ليك كده ، دايره اشيل نفسي وامشي وقفني وهو ماسك التوب اقيفي،، زي ما انا سمعتك اسمعيني،، جا ب قدامي قال لي انا ما قصدي استعجلت في علاقتي ،، وولا قصدي ب اني ما قادر اقدرك معناها انك ناقصه عن غيرك،، لا انتي كلك كده عجباني ،، منو القال ليك انا داير من بنات البلد ، لو عايزه من زمان قدامي بس انا اخترتك انتي عشان شوفته نفسي فيك💜🌸 ،، وكلامي داك كان ناتج من خوف ،، خوفت يكون ريدي ليك يكون عذر عشان انساك بي واحده ما بتستاهل سبيبه من شعرك،، و خوفي اني ما اقدر اقدم ليك نفس الشعور بي نفس الدرجه و المفروض اكتر من حقك💙🌸،، غلبني اسكت قولت ليهو بالعكس تخليني جمبك عشان نطلع من الازمه دي سوا،، عاين لي مسافه عشان كده انا حبيتك،،دايره ابتسم وفي نفس الوقت احافظ علي موقفي ،،،قال لي ياستي انتي الغلطانه ،، كان تقيفي تسمعيني،، قولت ليهو بي زعل تقريبا انا وقفت ربع ساعه،؟؟ ،،برضو يا ننوننتي🌸 ،، لا انا لو وقفت اكتر من كده ح الين ليهو، وانسى اليومين العيشني ليهم لاااالا يا نون احسن تمشي من قدامو،،اااي اشوف بسمه عشان نرجع ،فكيت التوب منو ومشيت،، شكلو فهمني لانو ضحك بي وراي؛ جاني جاري وقف تاني قدامي قال لي دقيقه دقيقه اكتبي رقمك ما معقوله روحي دي دايره تطلع وراكي!!،،حلفت كان اكتبو، قال لي ادللي فيني زي ما عايزه ما دايره تديني ليهو اصلو ما مشكله يا سكره❤🌸،،قبل ما اروح مع كلامو ده اتحركت سريع سريع هو ماشي معاي خطوه ب خطوه وفجأة القاهو وقف قدامي ،،يقول لي اهون عليك تزعلي مني،، تاني امشي خطوة يقيف قدامي تاني، يعني ما ح ترضي علي ،، وهكذا،، لمن قربنا نصل قال لي طيب انا لابس الجلابيه عشانك ،، يادوب ركزت انو لابس شنو ،، لا حولااا سمح سمح،، يعني هو اصلا بالفطره كده سمح مع الجلابيه هيبه هيبه 😭💙 ولا لونو الاسمر الفاتح 🌸 ولا حواجبينو العراض لااااا شعرو مرتب اكتر من حياتي 😭🌸،،عاين لي شديد قال لي شايفك سرحتي يا سكره❤،، اتحركت طوالي ،، بقى ماشي معاي وهو بضحك لحدي ما وصلنا ل الزين و بسمه كانوا قاعدين على النيل مقابلين علي بععض بلعبوا هوتنا يا هوتنا 🌸💜،، منظره بي الشكل ده يهز جبل خليهو ما يهزني انا😹🌸،، قولت من غير وعي مني حلوين،، عمر جاء وقف جنبي وقال لي يعني نحنا ما حلوين؟؟؟ ؛؛ سكت هو عارف براهو العملو ؛؛ واصل وقال لي نحنا حلوين بس ما عندنا صلاحيات،، عاينت ليهو بي استغراب قرب مني رجعت طوالي لي ورا ؛؛ قال لي ب ابتسامه قصدي كده ،،، عمر والله ماجادي و كمان ما وقف علي كده قال لي بي روح انتقام انا ح امشي اخرب ليهم القعده دي الزين شكلو قعد بي وشو،، وقفت قولته ليهو عمر حرام عليك تقطع قعدتهم دي،، قال لي بصوت زعل انتي قلبك ده بحن علي الغريب و علي ما داير يحن،؟؟ سكتاا سااي قال لي لا انا ح امشي ليهم مشى خطوتين لقاني ما معاهو ،، جاني تاني راجع من سكات مسك طرف التوب و ساقني معاهو قال