اس دا نحس وما زول شغل وبغطس حجر الدكان دا
_ اصبر اصبر والله قبل ايام اكان كويس ما عارف تاني مالو
_ هسي ليهو كم يوم ما معروف وين ؟
_ امكن داخل في مشكلة ، لمن يجي نقعدو في الواطة ونعرف مالو
_ بكضب ما بورينا الحقيقة

عباس نام وربيع صحى بالليل ومرق وجاء الصباح وجاب معاهو سندوتشات ولقى عباس لسة نايم ابى يصحيهو وهو زاتو رقد نام
بعد المغرب عباس صحى براهو وقال لربيع قوم قوم
_ قوم انت وامش استحمى
_ الساعة كم هسي ؟
_ سبعة وشوية
_ لاااا يعني من حداشر لحدي سبعة تمانية ساعات طق والله نومة سمحة ياخ دي
_ تمانية واربعة وعشرين يعني اتنين وتلاتين طق
_ شنو دا
_ الليلة شنو آ عباس ؟
_ الليلة التلاتاء
_ لا الليلة الاربحاء وانت نايم ليك اتنين وتلاتين ساعة
_ انت مجنون ؟
_ والله صاح ولو ما مصدق امرق اسأل اي زول برة
_ الحبة الاديتني ليها دي حقت شنو ؟
_ حبوب نوم والله وجبتهن من الاجزخانة
_ ما حبوب نوم
ربيع ولع النور ومشى علي قميصو وطلع الحبوب وجدعن لعباس وقال ليهو دا باقيهن واقرا الورقة الجوة

الهادي اتأكد انو عباس صادق في حكايتو وما دام وصل الكرتونة اكيد خاف منهم وقرر ما يسكت وعرف البيت الودوهو ليهو كويس ومشى ليهو ووقف بعيد وقعد يراقب
انتظر ساعتين ما جاء زول قال مافي فايدة كدا بضيع زمني ساي انا مفروض امشي اكلم فاروق ود حاج الصديق بس وهو بتصرف

عباس قام استحمى وقال لربيع مرقاكا ومشوا السوق

فاروق ود حاج الصديق ضابط في الجيش قرا الكلية الحربية زمن نميري وهو من حلة ناس الهادي وزول ضكران خلاس وصعب وجنو وجن الاعوج ما بدورو كلو كلو والهادي فات ليهو في بيتو ووراهو القصة چت من وإلى فاروق قال ليهو تمام بس انا في الجيش ودا ما اختصاصي لكن بتصرف وعندي الزول البنضف البلد دي من العواليق ديل وانا زاتي بقيف على الموضوع دا بس دايرك تجيب لي الجنى دا بأي طريقة .
فاروق اتصل علي ضابط صاحبو في المباحث قال ليهو تجيني ضروري الليلة المساء في البيت يا اجيك انا .
الهادي ما فات وقعد مع فاروق لمن الضابط صاحبو الفي المباحث جاهو وحكى ليهو السمعو من عباس كلو وبالتفصيل
الضابط طوالي اتصل علي ضابط صاحبو وقال ليهو داير فايل واحد اسمو فرح ولقبو الكعب تبع بحري ومعاهو زميلو اسمو فيصل ولقبو وك وك بكرة الصباح يصلوني في المكتب ومن غير زول يحس بشي

يتبع..

#عباس 56

مجاهد يوسف

ملف فرح الكعب وفيصل الاتنين الضابط موسى لمن دخل مكتبو الصباح لقاهن قدامو واستدعى ليهو ضباط اتنين اي واحد اداهو ملف وقال ليهم دايركم الاتنين ترصدو تحركات العساكر ديل وتتعاونوا مع بعض وليكم صلاحيات كاملة بدخول اي مكان وتفتيش اي شرطي حتى لو كانت رتبتو اعلى منكم وانا بطبع ليكم التصاريح ، تتعاونوا مع بعض والعساكر ديل وصلني انهم فاسدين وشغالين مخدرات بستغلوا مركزهم وبستغلوا الناس ، في واحد سواق تكسي بجي اليوم عاوزكم تقعدوا معاهو وتسمعوا العندو كلو وتعملوا اللازم والمهمة دي سرية لابعد الحدود والعساكر واي عساكر تستعينوا بيهم اتأكدوا قبل كل شي انهم قدر المسؤولية وما يتصرفوا الا بأمر منكم وترفعوا لي تقريركم اول بأول وانا بتابع معاكم بطريقتي الخاصة وما عاوز اي تهاون في الموضوع دا لانو الامر خطير جدا
قالوا ليهو تمام سعادتك وشالوا الملفات وفاتوا
عمر ود الضو جاء الحلة وفات زي العاوز يزور حاج علي وهو داير يعرف لو عباس جاء بقفاهو وللا ما جاء واخد قعدتو معاهم وعرف انو عباس ما جاء نهائي لانهم سألوهو منو وادى نعيمة قروش قال ليها ديل من عباس
بعد فات مشى كلم العبيد ود عمو بكل شي ، العبيد قال ليهو اصلا هو مرمد وود مرمد وود الفار حفار وما مرق من الحلة دي الا للعواليق ، عمر قال ليهو عباس دا يا مغشوش يا الناس ديل مستغلنو ونحن مفروض نتصرف يانا اخوانو ما نستناهو لمن ينقبض وينسجن
_ نتصرف نعمل شنو يعني ؟ نمش ندق العساكر وندخل روحنا في مصيبة وللا كيف
_ ما أي شي دق ياخ
_ نان دايرنا نعمل شنو وريني ؟
_ نمش نبلغ يا نمسك عباس ونديهو راسو حتى لو اقعد معاهو انا في الخرطوم كم يوم ، يانا نجيبو يشتغل في مدني
_ واكان ما رضى وقال ليك مالك ومالي والعساكر الحيوانات ديل ورطوك في تهمة بالباطل ؟
_ نغصبو ونجيبو مدني ولا علي كيفو
_ وزملاهم العساكر الفي مدني بخلوهو ؟
_ ما عارف ياخ لكن لازم نتصرف
_ مالك ومال العواليق ياخ اصلا هو ود الست شبهيتو واتلاقيتو
_ انت صحي ود الست وين ؟
_ العارفو منو ؟ من يوم جاء هنا داير قروش يسافر بيها تاني ما ظهر
_ بكون فات وين ؟
_ بكون شغال سرقة ، اصلا هو ما نافع
_ والله فعلا ما نافع

الهادي واقف بتكسيهو جمب السوق الشعبي جاهو واحد قال العقيد فاروق قال ليك الليلة جيب الولد وتعال لي في البيت
قال ليهو بلغو انو الولد في مدني لسة ما جاء ولو جاء بجيبو وبجيك
والهادي فات تاني لعبد القيوم في الدكان كايس عباس واول ما دخل حسن دخل وراهو ووقف في الباب والهادي قعد يسأل في عبد القيوم من الاسعار
عبد القيوم قال ليهو عباس لسة ما جاء وريني الحكاية شنو
_ حكايتك ، وعلاقتك شنو بعباس ؟
_ مجرد زبون انا وعباس دا منو ؟
_ الجيت سألتني منو امس
_ لا عندي بيهو علاقة ولا بعرفو ؟
_ حسن اقفل الباب علينا وتعال ، وانت يا زول الليلة اكان ما وريتنا حكايتك شنو والله من هنا ما تمرق
حسن طوالي قفل وفي سيخة غليدة جمب الباب اتناولها وقبل علي الهادي
الهادي قال ليهو افتح الباب انا بتكلم ساي وما خايف منكم بس فعلا انا كايس لعباس
عبد القيوم قال ليهو خلاس اتكلم والباب مقفول وبعد تورينا بنفتحوا
_ يا جماعة الموضوع ما بستاهل والله الكلام دا وعباس دا ود خالتي وانا لي زمن طويل من الحلة جيت اعرف اخبار الاهل شنو
عبد القيوم قعد يضحك وقال ليهو امو اسمها منو لو ود خالتك
الهادي زاتو قعد يضحك وقال ليهو يعني انت بتعرف اسم امو ؟
_ وراجلها رحمة الله بعرفو ومشيت معاهو الحلة كم مرة وامو ما عندها لاخو ولا اخت
_ ما ود خالتي لزم هو
_ يا سيد والله انا ما فارقة معاي عادي بخش فيك السجن لكن اقسم بالله بتمرق من هنا بعاهة
_ يا ولد انا قدر ابوك
_ قول اكبر من ابوي المشكلة شنو ؟
_ داير شنو ؟
_ داير اعرف حكايتك شنو وللا بعد نكسرك هنا انا وحسن بنقول انت حرامي وقبضناك سرقت والسوق دا كلو بتفك معانا
_ طيب انا بوريكم وماني خايف منكم انا اسمي الهادي سواق تكسي وعباس دا وصلتو مدني قبل كم أول امس وهو الوصف لي الدكان دا وجيت اقابلو دا كلو الموضوع والتكسي حقي وقفتو برة بجاي ما بعيد ودا مفتاحو هاك يا حسن امش اتأكد ونمرتو كدا ..
_ طيب بتكضب مالك قبل شوية وتقول ود خالتو ومن الصباح ما تقول كدا .
_ حصل خير
حسن ختا السيخة وراء الباب وفتحو وعبد القيوم قال ليهو عباس لسة ما جاء من مدني واحتمال يكون فات اهلو
الهادي قال ليهم خلاس انا بمشي وبجيهو تاني ، ومرق فات وساب شغلو وبقى حارس بصات مدني

عباس طلع من ربيع وقال ليهو انا ماشي الحلة وباخد لي لفة وبغشى ود الضو في الدكان اقعد معاهو لحدي مواعيد بص الحلة ، ومشى منو ، وصل السوق وركب طوالي الشعبي ما فات لعمر وركب مشى الخرطوم ولا مشى لابجاكومة لانو قرر من الدكان تاني ما يمرق وشغل بس واول ما وصل الخرطوم ومع نزلتو من البص لقى الهادي قدامو قال ليهو ود حلال تعال دايرك
_ الهادي ؟
_ آي الهادي ورح معاي دايرك في مشوار ضروري
_ دقيقة دقيقة مشوار شنو ؟
_

ك
_ وقفتوهو ؟
_ وقفناهو مجبورين لاننا انا وفيصل مراقبين وملفاتنا اترفعت فوق
_ فوق وين ؟
_ عند ضباط فوق ومصادرنا نبهونا عشان كدا بعدنا منو
_ والنجومي ؟
_ لي كم شهر ما لاقيتو ، آخر يوم معاك ونحن جبناك وصارحناك لاننا قررنا نوقف ونروق المنقة وكنا خايفين منك توريهم حاجة عننا عشان كدا الشباب هددوك بأهلك

فرح فات وعباس حمد الله انهم وقفوا وبعد منهم
ومرت الايام والشغل ما عاجب عباس والفايدة مي المرجوة وبدا يتضايق ويزهج وقال لعبد القيوم والله الطبلية والكرتونة اخير لينا من الشغلة الفارغة دي
عبد القيوم بالو طويل وهو المصبرو قال ليهو ياخ لو فكينا الدكان دا بنندم اصبر اصبر ونحن ربحانين وصاح ما كتير لكن مافي خسارة ومطلعين ايجارنا ومصاريفنا وبعد كدا في فايدة صاح بسيطة لكن الحال ماشي .
ود الست بعد ستف المحل عمل ليهو مخزن وبرضو ملاهو والدكان بقى زي بقالات المدن وبقى يوفر منو واتملا قروش وساق الزين معاهو وفاتوا الحلة وبعد شهور جاها سايق عربية الزين والزين زاتو معاهو وجابو عشان يتعرف علي اهلو وجابو عشان ناس الحلة ما يقولو اكيد سرق الحرامي .
وفي الطريق للحلة حكى كل شي للزين السكر والسرقة والكان فيهو كلو قبال ما يلاقيهو والزين ضحك لمن دموعو جرت وقال ليهو والله من يوم لاقيتك ما شفت منك غير كل خير ولا شفتك فوت ليك صلاة ومن تاب تاب الله عليه وانا ما عندي شغلة بماضيك ونحن اولاد الليلة واتخاوينا رجال
وقعد معاهو في حلتهم اسبوع كامل عرف فيهو كل الناس ووراهم كل شي عن ود الست من يوم لاقاهو في مدني وقال ليهم العربية دي حقتو هو والناس كلهم بقوا يحترموا ود الست ونسوا كل الفات
اول حاجة عملها كسر بيوتهم القديمة وما خلى الا الديوان وقعد فيهو اهلو على بال ما البنيان ينتهي وامو مبسوطة منو ومع البيت قرر يبنى ليهو دكان كبير لاخوانو وقال ليهم بملاهو ليكم بضاعة لعينو
وردم البيت كلو طوب واسمتني لمن القروش الجاء بيها كملت چت واتسلف من الزين قروش كتيرة مشى جابها ليهو كن حلتهم وجاء .
العبيد كلما يلاقي ود الست البقى زول وغني كمان يضحك ويقول سبحان مغير الاحوال

يتبع...

التكسي حقي قريب دنكانكم ورح وبكلم بعد نركب فيهو
_ نركب نمش وين ؟
_ نتكلم في التكسي ما بنفع هنا
_ سمح خليني اسلم علي التاج دقيقة وبجيك
_ بتجيهو بتجيهو ياخ وخليهو السلام هسي ما وكتو
_ والله حيرتني ياخ في شنو ؟
_ بتعرف هسي

عباس غشى عثمان سلم عليهو وفات مع الهادي ركبو في التكسي والهادي حكى ليهو كل شي وحتى الجماعة الساقوهو وسألوهو منو وراهو بيهم وقال ليهو انت كنت مراقب يومداك وعارفنك ركبت معاي لانهم اخدو نمرة التكسي
_ يعني لو قعدت في حلتكم مع بلة اخوك اكان بجيهوك
_ اصلا جيهوني والجماعة ديل خطرين وهسي دايرك تمشي معاي للضابط فاروق في بيتو قال دايرك
_ ورح طوالي خربانة خربانة
قبل الهادي يتحرك جوهم اتنين وقالوا لعباس انزل
عباس قال ليهم انتو منو
قالوا المباحث واحد ساق عباس ماسكو من يدو والتاني وقف مع الهادي وقال ليهو يعني ما سمعت الكلام ، والظاهر انت قنعان من روحك ومن عربيتك دي
_ كلام شنو ؟
_ ما قلنا ليك خليك اعمى واطرش
_ آي لكن ...
_ تاني بديك فرصة اخير تبعد
وفات منو
عباس ركبوهو في عربية وفاتوا بيهو بيت النجومي عباس عرفو لانو جاهو مع ربيع يوم اشترى الدكان وفعد يبلع في ريقو
دخل ولقى فرح قاعد مع النجومي ومعاهم فيصل وعباس وقف في الباب يعاين ليهم وخايف
فرح ضحك وقال ليهو خش خش ما تخاف
النجومي قال ليهو اهلا اهلا بالمناسبة اضني لسة صانات اقعد اقعد عشان احكي ليك قصة طبعا انا بتعرفني وفرح بتعرفو والتالت دا انت ما بتعرفو فدا فيصل وك وك
_ جايبني هنا لشنو هسي ؟
فرح قال ما استغربت لمن لقيتني هنا ؟
_ ما استغربت والله
_ ليه ؟ اكيد التاج كلمك
_ قبال التاج يوريني انا عارفك بتاع مخدرات ، من يوم الوصية الجبتها ليك اول مرة من ابجاكومة عرفتك
_ عرفتني والوصية كانت شنو ؟
_ فتحتها انا قبال انت تجي ولقيتها حبوب مخدرات وشلت منها كم حبة وقفلتها ودخلت ليك فيها الورقة جوة وهو اداني الورقة في يدي وانا دخلتها عشان انت تفتحها سريع من غير تحس اني فتحتها
_ الحبوب وديتها وين ؟
_ في واحد بضربها بعرفو انا في السوق الشعبي ايام شغال بالكرتونة اديتها ليهو ووراني اساميهن كمان
_ والله اكان كدا ماك هين
_ بس ما كنت عارفك بتعرف النجومي دا ولمن التاج وراني ما حبيت اسعلك ، يللا انا عملت ليكم الدايرنو مني كلو ما قصرت معاكم وهسي دايركم تخلوني اشوف شغلي وخشمي عندي ما بعرفكم ولا شفتكم ولا رأيتكم
_ النجومي قال ليهو نحن جبناك هنا عشان نشتغل على المكشوف واكنا دايرين نشغلك توزع لينا هنا وقبلك في الدكان زي ما انا كنت شغال فيهو وبوريك المطلوب منك كلو
_ الدكان ما حقي براي معاي عبد القيوم وانا ما بقدر اشتغل فيهو مخدرات
_ خلاس توصل لينا لابجاكومة وتجيب منو مرتين بس كل شهر يعني كل اسبوعين مشوار
_ والله انا عندي اهلي محتاجين لي اعفوني ما بقدر
_ البتبلبل بعوم يا عباس وبنديك حقك وفكر في الموضوع كويس
فرح قال ليهو لسة انا عاديك زي اخوي وما بنجبرك ولا بنغصبك علي شي وامش دكانك اشتغل وفكر في الموضوع ان بقيت عليهو بتعرف بيتي وكل شي بحقو وصدقني بتبقى اغنى زول في حلتكم
عباس ابى لكن فرح قال ليهو امش وفكر كويس وزي ما قلت ليك حقك تستلمو طوالي
عباس عشان يمشي قال ليهم خلاس بفكر اول
النجومي قال ليهو ما بنسألك لكن انت مراقب لو كشفتنا عبدو المرمد ابوك بتلقاهو قدامنا في السجن لانو بندخل ليهو مخدرات في بيت مرتو بت المهل
_ دي عرفتوها كيف
_ كل اهلك عارفنهم وجدك حاج علي وجدك ابراهيم وحبوباتك وامك نعيمة واسامي اخوانك الابوهم رحمة الله الكان عيان واسامي اولادو الكبار من مرتو الاولى كل شي ولو هم محتاجين ليك امسك لسانك ولو دايرين اي واحد فيهم بنجيبو وبنبهدلو والهادي بتاع التكسي دا اختاهو وخليهو يختاك لو دايرو ما يموت ونحن ما جابرنك علي الشغل معانا وممكن نجبرك ونهددك لكن عشان اخوة فرح البينك وبينو ما بنجبرك وكمان عشان دايرنك تشتغل معانا بارادتك وبنديك حقك
عباس مرق وبين مطمن وخايف ارتاح منهم وما ارتاح لأنو عرف وانهم انهم ناس خطيرين جدا وعارفين اهلو چت عليهم
ووصلوهو لحدي الشعبي ورجعوا منو
ود الضو جاء وعباس طمنو تب ووراهو كل شي بس ما جاب ليهو سيرة المخدرات نهائي المهم طمنو ومشاهو وداك اقتنع
عباس بعد كم يوم قابل الهادي في مطعم ووراهو القالوهو والهادي بعد منو لانو عرف كلام عباس صاح وعادي ممكن يقتلوهو وكلم الضابط فاروق قال ليهو خليهو ما تقرب منو ما دام الشغلة فيها ضرر
ولفت الايام عباس بقى داب شغلو وبس ومشى الحلة وجاء وتم شهرين ونص لا ناس فرح جوهو ولا هو مشى ليهم بس الشغل كان اي كلام وما فيهو الفايدة الكان عباس فاكرها وبقوا هو وعبد القيوم شغالين ومحافظين علي راس المال بس العايد ما المتوقع واتذكر كلام حسن الزمان وحتى كلام الجنى بتاع الكرتونة الفي العربي اتذكرو كلو ولقى كلامهم الاتنين صاح
فرح جاء يوم لعباس في الدكان اتونس معاهو وشرب ليهو شاي وعباس سألو من الشغل
فرح قال ليهو شوفتنا ليهو معا

#عباس 57

مجاهد يوسف
ود الست مشى لحاج ابراهيم قال ليهو بدورك تخطب لي امونة بت الكراب حاج ابراهيم سكت مسافة وغلبو البقولو عارف الكراب مكجن ود الست وكارهو وودالست لمن شاف ترددو وسكتتو وفتيشو للكلام قال ليهو
_ ياكا ابوي آ حاج ابراهيم ومافي زول وقف معاي غيرك انت وحاج الضو يوم بقيت مارق والاتنين حنيتو علي وساعدتوني واديتوني قروش وما خفتوا من اني ممكن امش اسكربهن ، وانا والله من يوم مشيت ما فوت لي صلاة ولا يدي دي مسكتلها قزازة عرقي ولا بجي يوم اشرب فوقو تاني بعد الله فكاني منو ووفقني
_ عديلة علا بس انت براك عارف الكراب وامكن ما يرضى
_ ان ما رضى القسمة ما ادت والشغلة دي لا بيدك ولا بيدي ولا بيدو وياما ناس اكانو مع بعض الشحمة والنار اتناسبوا وفي العرسلو بت وهو كاتل ابوها ، وانا الكراب ما سويتلو شي داك طيش شباب وراح وان رضى وان ما رضى انا راضي
_ انت بتدوربها شنو بتو هو بالذات ؟ ما يكون عشان مرقت وجبتلك قريشات دار تقول القروش بجبرن الما بنجبر . ديل وسخ دنيا ساكت آ جنى ما بقن الرمة زول
_ داك الرمة لكن انا ماني رمة آ حاج وانا وريتك وحلفتلك من يوم مشيت لا شربت لا فكيت درب الله ، والزين الكنت معاهو وقعدت في بطن بيتو هداك قاعد ممكن تسعلو اكان ماك مصدقني
_ لا لا ماني ساعلو انت امش هسع وانا بلاقي عمك حاج الضو وبسوق ليهو معاي كم واحد من اعمامكم وبنمش للكراب والبنوت راقدات ان هو أبى

ود الست فات البيت وكلم امو قالت ليهو عرس نفيسة بت جاد الكريم جيرانا ديل اكان داير تعرس امونة ما بدك ليها ونفيسة دي امها بلقيسة اختي بت خالتي وبلقيسة بتريدك ما تابا وبتها زاتها حليوة وفالحة
قال ليها يمة انا زمانك كنت عولاق مرمد لكن هسي انا غني وعندي دكان ملان بضاعة لعينو وحاج الكراب زاتو انا ما ساعل فوقو بس داير بتو بس
امونة بت الكراب سماحتها مافي وابوها بريدها ومدلعها والبتدورو كلو بجيبو ليها ومن دخلت المدرسة ما فكت الاولى وبتدور تبقى دكتورة وراسها من الكتب ما قاعدة ترفعو ومن البيت ما قاعدة تمرق بس القراية وقالوا بتقرا كتب السنة الجاية قبال المدرسة تفتح ومرات مرات بتصلح الاستاذ اكان غلط في شي والمواد كلهن بتقفلن
ود الست بعد القرش ما مشى في يدو وشاف نظرة الناس ليهو اتغيرت قال يعرس امونة بس ، الزين بعد قعد معاهو اسبوع وعرف اهلو وشاف حالهم لسة مبسوط من ود الست ونظرت ليهو ما اتغيرت الا لمن حاجة الست جات كلمتو قالت ليهو صاحبك قال دا بدورلو بنية ما بدوها ليهو وانا ما رضيانة بمشيتو ليهم انضم معاهو
الزين نضم معاهو وقال ليهو اسمع كلام امك آ خوي وما تعجبك القروش وتتشوبر
الكلام دا زعل ود الست وقال ليهو انا غير امونة ماني داير وما تتدخل في شيتن ما بخصك وزي ما الكراب عندو قروش انا برضو القروش عندي
_ الشغلة مي قروش
_ الشغلة قروش والقروش البتغير الناس والكراب ما احسن مني في شي
_ علي كيفك آ زول وانا فايت اهلي بعد كدي ومعليش اكان اتدخلت بس انا عديتك اخوي وان ما امك ورتني وقالت لي انضم معاك ما كنت نضمت معاك
_ ما بتفوت الا بعد تحضر خطوبتي وبعدينك ناس حاج ابراهيم ماشين للكراب اصبر اصبر
_ وان ما رضى
_ برضى بعد شاف الناس قاعدين ابنوا لي وشاف العربية
_ انت غيرها ماك داير ؟
_ غيرها ماني داير ؟
_ من ريدتن فوق البت وللا عشان شيتن تاني؟
_ عشان شيتن تاني والله وانا ما مرقت من الحلة دي الا زعلتن منو هو وجيتها هدا البدفرني ما برميني
وعشان اوريهو انا شنو بعرس بتو وبدورك آ الزين تمش تجيب لي خمسين ألف وتجي
_ يومداك جبتلك خمسين
_ نان مالو تاني جيب لي خمسين اندفعن ليهم قولة خير
_ ما بقدر والله
_ ما شاحدك انا زول من حقي
_ والله لو بتدورن لبنيان عشان اهلك وللا شيتن نافع هسي بمش اجيبن واجي لكن عشان تبوبر بيهن اسمح لي وورح نجرد الدكان اكان داير
_ يازول انا ما شاحدك
_ ماك شاحدني صاح ما قلنا شي لكن الدكان ما هيلك براك
_الدكان اكان رمة ساي وفاضي وانا العملتو دكان وجردي اللولاني قاعد لقيت فوقو عشرة تالاف
_ وهسي فوقو كم ؟
_ هسي اكان بطل فوقو قريب المية وخمسين الف
_ ما بتمن مية وخمسين لكن قول مية وخمسين ما مشكلة اها جيت هنا بكم النزلتبن الطوب والاسمنتي والحديد
_ جيت ومعاي ستين الف وشلت منك خمسين
_ ديل مية وعشرة وبدورلك فوقن خمسين يعني اكتر من الفي الدكان . الكلام دا بجي ؟
_ مالو ما بجي
_ الدكان انا ما عندي فوقو حق ؟
_ النكر حقك منو هسي ؟ انا لمن ارجع ببيع وبديك
_ انا من يوم انت دخلت الدكان حصل جيتك وقلت ليك اديني قرش؟
_ لا
_ للبيت شلت حاجة بلاش وما دفعتلك حقها ؟
_ لا
_ معناتها الدكان هيلك براك كدي وانا الستين الانت جيت بيها هنا لو جينا نتحاسب يا انا اشيل زيها ستين زيها يا تلاتين ونتقسمها النص النص
ود الست سكت ساي وقال ليهو يعني داير تمرقني سلاق بيض ساي انت . وما داير تقيف معاي موش؟
_ المارق سلاق بيض منو فينا هسي وانا وريتك لو داير تتبوبر بيهن ما عندي
_ يا زول خير علي

كيفك وكتر خيرك
_ اسمع كلام امك دي وعرف نفيسة بت اهلك القالتها ليك دي ولو سقتها معاك حلتنا البيت ما تشيل همو انا عندي مربوع باني فوقو اوضة بظبطو ليك وقريب من الدكان وانا لسة باقي عليك ماني محاسبك بالفات
_ انا بعد ارجع ما داير لي معاك شراكة يا تبيع لي الدكان يا تأجرو لي
_ نحن من الاول اتفقنا بالنص وان اشتغلت ما بنكر وظبطت الدكان لكن الحق حق وانا كلامي دا جيب اي زول من حلتكم دي واي زول من حلتنا ووريهو ان كلامي اعوج لومني
_ لا لا كلامك عديل وصاح بس زي ما قلت ليك يا بيع يا ايجار لكن شراكة ماني داير لي معاك شراكة تاني واحسن اتعب في حقي وان ماك داير تبيع ولا داير تأجر نجرد البضاعة الفوقو وأي واحد يشيل حقو وورح هسي نجرد انت ما بتنفع معاي بعد دا
_ ورح نجرد عشان اي واحد يعرف الليهو من العليهو وانا لا ببيع ولا بأجر ولسة باقي عليك
وركبوا العربية وفاتوا

عباس لسة يطنطن من الشغل وبطنو طامة من الدكان وبقى يتزهج وقال لعبد القيوم انا فايت الحلة اعدي لي فيها كم يوم وأجي
وصل مدني ومشى لعمر ود الضو في الدكان يقعد معاهو لمن وكت البص يجي ، اتغدى معاهم واكان اليوم داك الشغل سمح وود الضو والعبيد باعوا كويس ولمن جاء وكت البص ما قفلوا وعباس قال لعمر البص بفوتنا عمر ضحك وقال ليهو انت من زمن نحن بنمش بالبص ؟ انا اشتريت لي بكسي ياخ
_ والله ماشاء الله مبروك . متين ؟
_ طول ياخ قبل اكتر من شهر
_ والله احسن ليك مبروك مبروك عشان كدا ما قفلت بدري
_ حلتنا اتملت بكاسي ما انا بس
_ منو تاني
_ عبد الله ود الكراب وصاحبك ود الست
_ ود الست ؟
_ آي ود الست بكسي سمح خلاس اشتراو من واحد مغترب جايبو معاهو من السعودية
_ ود الست ؟
_ ود الست ساهل ؟ بعد نصل الحلة وتشوف البيت الشغالين يبنوا فوقو
_ جاب القروش من وين ؟
_ عمل ليهو دكان في حلة جهة المناقل والليلة ناس ابوي فايتين يخطبوا ليهو امونة بت الكراب
_ انت جادي يا ود الضو وللا بتكضب ؟
_ اكضب كيف ياخ ؟ هدا العبيد قدامك اسعلو
العبيد قال ليهو والله كلامو كلو صاح ود الست بقى جلابي
عباس سكت ساي وسرح وبطنو طمت زيادة وكره المشية للحلة وقال معقول ود الست الفاشل بعمل بنيان ودكان وبوكسي وداير يخطب احلى بت في الحلة ؟ وانا البهيمة قاعد لي في محل ما جايب همو وفرحان بيهو ؟

حاج الكراب رفض يدي بتو لود الست وزعل من حاج ابراهيم وحاج الضو وقال ليهم والله لو جيتو لي وقلتو دايرنها للعبيد اخوهو اكان بوافق لانو راجل ضكر وشايف مشاهدو وعايش اهلو لكن العفين دا انا قبضتو كم مرة وهسي قروشو الجا بيها دي ما بعيد يكون سرقها ولو ما سرقها ما بديهو بتي انا مكجنو من زمان وما بنفع معاي

يتبع...

#عباس 58

مجاهد يوسف

بعد صلاة المغرب في مدني ود الضو قفل البوتيك وشغل البكسي والعبيد بعد ركبوا قال لعمر غشينا سلا آ عمر عباس قال آي والله وكويس عشان انا ما امشي لأخواني ويدي فاضيات العبيد قال ليهو والله انا قلتها عشان كدا ونحن امس شلنا منها بس حرم ما بتنزل داير كم كيلو ؟
_ لا لا ياخ بنزل
_ تنزل كيف وحرامي دا انا اوديهو وين
_ ما كان تحلف ياخ
_ الحالة واحدة اجيب ليك كم ؟
_ جيب البتجيبو
_ قول ساي اجيب ليك كم ؟
عمر قال ليهو جيب اربعة كيلو اتنين لي واتنين ليهو
العبيد فات وعمر قال لعباس الشغل كيف ؟
_ والله ما سمح
_ قول الحمد لله ياخ
_ الحمد لله بس ما سمح ياخ كعب عديل والله ما فيهو أي فايدة
_ اصبر عليهو الفايدة بتجي
_ اصبر شنو ياخ والله انا بطني طمت منو وهسي لينا شهرين شغالين تعب ساي
_ فيهو خسارة ؟
_ ما فيو خسارة وما فيو فايدة وزي الشغالين في الفاضي داب مصاريفنا ومصاريف الدكان بس لكن وفر مافي
_ ما دام مافي خسارة ما كعب والربح بجي ما تخلوا زبون يمرق حتى لو بأقل فايدة
_ اصلو ما قاعدين نفوت زبون ودي سياسة عبد القيوم وكم مرة باع بسعر الشراء بقول انكسب زبون احسن من يفوت ساي
_ ناس الشرق ديل شاطرين بعرفو الشغل كويس
_ صاح لكن الالكترونيات دي شغلة فاضية ساي انا ما قايلها كدي . اها وانت الشغل كيف معاك ؟
_ والله الحمد لله ما بطال والعربية دي اشتريتها منو
_ ما بطال ؟ ياخ دا سمح عديل
_ الحمد لله ، اها الجماعة ديلك ما يكونوا جوك تاني
_ لا لا لا بدري فارقتهم
العبيد جاء وعمر وعباس طوالي غيرو الموضوع وقعدوا يتونسوا ونسة عامة وكم مرة جابوا سيرة ود الست ولمن قربوا للحلة عباس سكت مسااافة وسرح وعاين لود الضو بطرف عينو وقال شوف بالله الدنيا ود الضو المعفن دا بقى زول واكان المعولق عندو فد كشك صغير حق نعلات ويومي بجي البيت مدلدل يديهو ساكت من الفلس هسي عمل ليهو بوتيك وبكسي وبقى بجيب لاولادو باسطة يوميا من سلا وانا لمن اكان عندي القرش هو كان رمة ساي كل اسبوع حتين يجيب معاهو ملاح ولو ما انا اكان لهسي رمة والخير الفيهو دا كلو سببو انا وشكرا ساي ما بقولها لي ، لا وكمان بتباخل علي كمان هسي الاتنين كيلو ديل انا علا اقسمن لي ناس امي وابوي ، ولو مشيت براي داير اجيبن اربعة كيلو لكن عشان ح يدفع العبيد قال ليهو جيب اتنين كيلو لي واتنين ليهو وهو امس شال باسطة المعولق هسي اكان ما ساي دي خلقة زول ياكل باسطة ، والله حقو الواحد يحلف منها ويخليها ليهو اللشبع بيها اكان بشبع الجيعان
وصلوا الحلة وعمر قال ليهو سارح وين آ عباس ؟
_ لا لا ما سارح ولا حاجة
_ ما سارح شنو انت ولا معانا
_ اتذكرت لي موضوع كدا ما عليك منو وما ذات اهمية
_ موضوع شنو
_ واحد كدا قريب التاج جاهو امس المهم ما موضوع ياخ
_ خلاس نحن زاتو وصلنا ودا بابكم فكر فيهو براحتك انزل وشيل معاك باسطتك دي وشيل الاتنين كيلو ديل برضو معاك
_ لا لا ديل حقات اولادك اشيلن كيف ؟
_ اولادي امس جبتها ليهم ولسة فيها باقي وانا قلت للعبيد اتنين واتنين عشان تودي ديل لناس ابوك برضو
_ لا لا ما بشيلن ياخ
_ يعني داير تقسم ليهم الكيلوين ديل وللا كيف يا زول يمين ما طلبتها لروحي
_ محمد اخو عباس جاء مارق وعمر قال ليهو تعال آ حمودي هاك وناولو الباسطة عباس نزل وقال ليهو سمح خلاس بطل العربية دي وخشوا
عمر قال ليهو تعبانين ياخ لكن بنجيك باكر اكان انت قاعد وفاتوا منو
عباس دخل وسلم علي اهلو وقعد يتونس معاهم
ود الست جرد الدكان كلو والمخزن چت ما خلى اي شي والزين ماسك الدفتر يسجل وأي صنف زادو والاقل من عشرة كلو بتمو عشرة ماسك في مضاعفات العشرة بس قال لود الست عشان بتسهل علينا الحساب والصنف البلقاهو واحد وي... بزيدو تسعة من عندو عشان ما يظلم ود الست وبعد انتهوا منو كلو قال لود الست الاصناف دي انا كلها زدتها والصنف القريب من مية كلو عملتو مية والكم وتلاتين كلو كتبتو خمسين ود الست قال راضي تب وجابوا الآلة الحاسبة وقعدوا للحسابت والتضريب ، وجمعك وضربك وجمعك وضربك وبالليل تب انتهوا منو چت
طلع فوقو مية وشوية
وفي ديون عند الناس ما واصلة العشرين الزين قال ليهو قول عشرين
والدكان مية وشوية قول مية وعشرة
يعني مية وتلاتين . تمام ؟
ود الست سكت وبطنو طامة
لكن الزين ما خلاهو قال ليهو ودا الدفتر الفيهو البضاعة الانت لقيتها في المحل قبال تشتغل وحسبتها براك كانت كم وعشرين قول عشرين بس لمن ننقصها من المية وتلاتين بفضل لينا مية وعشرة الف تمام ؟
برضو ود السكت ما نضم وبطنو طمت زيادة
الزين قال ليهو المية وعشرة دي المفروض نحن نقسمها النص النص يعني كل واحد فينا نصيبو خمسة وخمسين الف وانت شلت ليك سبعين الف كاش ما تنسى ولو اضفناها للمحل عشان انا اشيل نصها بطلع المحل فيهو وبالديون العند الناس مية وتمانين ألف ، يعني كل واحد نصيبو تسعين ألف تمام معاك ؟
ود الست قال ما تمام معاي ولا شي ما صاح تنقص العشرين اللقيتها في المحل اول
_ اوكي ما بنقصها وك

دا الدكان ببقى فيهو ميتين ألف طق طرق بالديون البرة ، تاني في شي ؟
_ مافي شي
_ يبقى كدا يا اخوي حقك مية ألف طق وانت شلت منها سبعين يبقى كل الباقي ليك عندي من الدكان تلاتين الف
ود الست دنقر ما قادر يقول اي شي لانو الزين ما قصر البضاعة كلها زادها من عندو والقالوا ليهو كلو سواهو وهو متأكد الدكان اقل من كدا بكتير وغلبو البقولو
الزين قال ليهو مالك ساكت
_ اقول شنو ؟
_ نراجع تاني ؟
_ لا لا ما يحتاج
_ طيب باقي ليك تلاتين ألف وشلت مني خمسين يبقى انا داير منك عشرين ألف كدا آ ود الست
_ بس كدا انت ظلمتني
_ ظلمتك كيفن ؟
_ الدكان دا انا التعبت فوقو ليل نهار فاتحو وكلو مليتو انا ولو ما انا ما كان ببقى كدا مفروض انت ما تشيل النص
_لكن الدكان دا حقي انا وانا البنيتو وسويتو وراس المال حقي اللكان فيهو برضو قسمتو ليك النص وبعد كدا انا عافي ليك العشرين حقتي العندك قصرت معاك ؟
_ يعني هسي انا امرق ساي منو
_ انت مفروض تدفع لي عشرين الف قبل تمرق لكن انا عفيتها ليك واقول ليك شي ؟ بعد كدا قوم ورح معاي
_ ورح وين ؟
_ هني قريب قوم قوم
الزين ساقو ووراهو بيتو وقال ليهو دا بيتي القلتو ليك وانا لسة عند كلمتي وتعرس بت خالتك وللا بت الكراب علي كيفك انا ما من حقي اتدخل في الموضوع دا المهم عرس البتعرسها وجيبها وتعال اسكن فوقو واشتغل في دكانك اصلو ماني مارقك منو
_ انا موافق لكن ايجار
_ ايجار انا ما بأجر ودا حقي وانا حر فيهو وهسي انا في الحساب ظلمت ليك روحي ولو اتحاسبنا صاح الدكان دا مية ما بصلها غير السبعين الشلتها انت منو
_ انا ما داير شراكة
_ وانا ما بأجر ولسة باقي عليك
_ الدكان دا انا من غيري ما بنفع يا تأجروا لي يا بمش أأجر دكان الجد وبدمر ليك دكانك دا
_ علي كيفك شوف مصلحتك وين
_ والله بتندم اكان انا مشيت أجرت داك وانت عارف كدي احسن ليك تأجرو لي
_ داير اندم انا ولو دا كلامك امش ساي لدكان الجد ولو احتجت لأي شي تعال لي
_ يازول انا لو مشيت الدكان دا بقع والله
_ اعمل الفي راسك
ود الست فات طوالي لود الجد ونبز ليهو الزين نبز شديد وقال ليهو أجر لي دكانك دا انا ببقيك اغنى زول في الحلة دي
ود الجد قال ليهو مالو معاك الزين ؟
_ دا زول كلب ما فيهو خير واكل حقي
_ والله الزين مو كلب واحسن زول في الحلة دي
_ المهم انا داير دكانك دا
_ انا الدكان ما هيلي براي انشاور
_ خلاس انا بمشي حلتنا وبجيك بعد كم يوم وانت شاور براحتك ولاقي غيرو ما تقول ما لاقي
_ سمح
ود الست فات للزين عشان يشيل هدومو من الدكان والزين قال ليهو دقيقة انجيب ليك شنطة وانا بوديك لحدي حلتكم
جاب ليهو شنطة سمحة اكان الزين جابها معاهو من السعودية وعندو تلاتة مقاطع حقات جلاليب جابن معاهو وقال ليهو ود الجد قال ليك شنو ؟
_ قال داير يشاور
_ يازول خير وانا داير اوصلك عشان اعرف حصل شنو في خطوبتك وكمان عشان ناس حلتكم فاهمين انو العربية دي بتاعتك ما حلوة تمش بالمواصلات
ود الست كلمة ما قالها وركبوا فاتوا

عباس اتكيف لمن جدو ابراهيم قال ليهو الكراب رفض يدي بتو لود الست
ود الست داير يطرشق من الزعل لمن وصل الحلة وعرف وساق بكسي الزين اخد ليهو بيهو كم لفة وفات بيهو لحاج ابراهيم ولقى عباس معاهو وسلم علي عباس سلام بارد ويشيل ويكشكش في المفتاح وعمل فيها ما مهتم لمن حاج ابراهيم وراهو الحصل قال ليهو ما مشكلة هم الخسرانين ومرق
عباس قال لابوهو عان العفين
ابوهو وجدو قعدوا يضحكوا
ودالست وصل البيت وقال للزين قوم ورح انا راجع معاك
الزين ودع حاجة الست عشان مافي حاجة بتجيبو ليهم تاني واداها عشرة الف وفاتوا
والزين اتأكد تب انو ود الست دا زول طيرة ساي واكبر جاهل

يتبع..

ان في داعي أقول داير بت الكراب ولا كان في داعي أخرب علاقتي مع الزين وانبزو وهو اداني فوق حقي وزيادة وعرف انو هو الشال اصبعو وطبز بيو عينو وقال رجعت صفر وهسي أقبل وين ارجع الحلة وللا أنجع تاني اكوس لي شغل ؟ هسي لو ما كسرت البيوت ودخلت القروش العندي كلها في البنيان اكنت بشترى لي بيهن عربية واشتغل بيها لكن آآآخ
وركب من المناقل فات مدني وأجر ليهو عربية لحدي الحلة خجلان من مشيتو الحلة بالبص وبعد فهم الناس انو البكسي حقو ما حلوة يركب في البص ولمن بقى قريب الحلة قال لبتاع العربية الأجرها عليك الله غشيني الكمبو داك وشال ليهو قزازة عرقي معاهو وفات البيت

عباس فات وقبل يمشي الخرطوم فات لربيع في البيت صحاهو من النوم وقال ليهو بتتذكر لمن قلت لي في تجار مخدرات دايرين ناس يدخلوها ليهم الخرطوم ؟
_ آي في وراقدين
_ المشوار بكم ؟
_ علي حسب الكمية البتقدر تخش بيها وقيمتها ، لكن بتسأل مالك ؟
_ داير اشتغل الشغلة دي ياخ وانا عندي خبرة في المواضيع دي
ربيع جرا الملاية واتغطى بيها وقبل علي الحيط ولا كلمة ما قالها ليهو لكن عباس جراها منو وقال ليهو مالك
_ يا نوم يا امش يا عباس ما فاضي ليك انا
_ عندك شنو ما فاضي لي ؟ قوم قوم خلينا نشتغل الشغلة دي سوا انعمل لينا منها قريشات وبالنص انا داير اشتري لي بكسي
_ شوف اوعك تمش في الدرب دا انا هدا والله عاطل وباطل وصايع وضايع وأي شي كعب لكن شيتن بودرني ما بمش عليهو
_ ما بودرك ولا شي وانا البدخلها ما انت ومن اوضتك دي بعد توديني للتجار ديل ما تمرق نصيبك بجيك في فجتك
_ ولا انا كعب بشرب بنقو وبسكر وبلف وبدور وعلي اصحابي بس وكلهم عارفني لكن ما بروج
_ تروج يعني شنو
_ ترويج المخدرات يعني بيعها وتوزيعها دي سموم وبتقتل وبتضيع الناس البتعاطوها وخاصة الحبوب مالي ومال الذنوب ودا ضياع الآخرة اما لو انقبضت فأقل حاجة لو ما اعدموك وسامحوك بتاكل ليك عشرة سنة سجن واحتمال اقل واحتمال اكتر على حسب القضية والحكم ودا ضياع الدنيا خليني في سجمان كدا لمن ربنا يهديني احسن لي عايش حر طليق على حسب الجيب داير انوم داير اقوم واحوم انا حر وما داير لي بكسي ولا داير اغنى
_ انت اصلا رمة ساكت ما عندك أي طموح
_ اخير لي كدا بس ما بنسجن وبعرف عساكر كتار اصحابي بشيل منهم البنقو وما خايف انقبض وانا زاتي من الليلة وعشان كلامك دا اقسم بالله العظيم وكتابه الكريم تاني لمن اموت ما ألف لي سجارة
_ لا خلاس
_ والله بشكرك واقول ليك شي ؟ وتاني لمن اموت ما افوت لي صلاة الا عذر عذر
_ يعني ما داير توريني التجار
_ ولا تجيني هنا تاني اكان اشتغلت الشغلة الفاضية دي
_ اصلا انت زول جربوع ساي وعديم تربية وما منك رجاء
_ كتر خيرك وشكرا ليك لاني ما ح انسى انك بقيت لي سبب في اني ابطل البنقو وأصلي
_ انا الاتنين ما دايرك تعملن والله بقيت ليك سبب كيف ؟
_ برضو بشكرك وتاني كتر خيرك
_ انا ماشي لابجاكومة
_ علي كيفك لكن الضهر قرب لو قعدت ومشينا نصليهو سوا في الجامع انا شايف احسن
_ صلي براك
عباس فات وربيع دخل الحمام اغتسل وجاء اتوضأ وصلى ركعتين التوبة وانتظر لمن الأذان أذن واتريح وفات الجامع
عباس فات لابجاكومة ما لقاهو وانتظرو في البيت لمن جاء وقال ليهو جهز لي كرتونة بنقو انوديها ليك الخرطوم بس حقي برة
ابجاكومة قال ليهو بنقو شنو انت جنيت ؟
_ ياخ انا عارف كل شي ياخ
_ انت يا عباس سكران وللا شنو ؟
_ عليك الله يا ابجاكومة ياخ بطل بلاهة وجهز لي البنقو
ابجاكومة قال ليهو معاك مقدم في المباحث وطلع ليهو الكارني حقو قال ليهو شايف دا شنو ؟
_ شايف وعارف وانتو اكبر تجار مخدرات ما علي انا الحركات دي جيب البنقو بس وللا ببلغ فيكم انا عارف جميع اسراركم
ابجاكومة تاح كفتو وقال ليهو اطلع برة وامش اعمل الدايرو
عباس طلع وفات السوق الشعبي وفات الخرطوم وصل هناك ومشى يفتش للهادي ولقاهو وقال ليهو ورح مشوار بحري داير اكشف ليك العصابة
_ عصابة شنو ؟
_ عصابة المخدرات ناس فرح والنجومي ووك وك والجماعة ديلك كلهم
_ يازول انا ماعندي شغلة بالحاجات دي مالي ومال الناس انا بتاع تكسي وعندي شفع داير اربيهم لا بوليس ولا عسكري ، ومشوار بحري بألف
_ يعني شنو ؟
_ يعني المشوار بألف وانا عندي زبون بعد المغرب ماشي مشوار يا اركب يا شوف تكسي تاني
عباس نبزو وفات منو ومشى لعبد القيوم قال ليهو دايرين نفك الشراكة انا الشغلة دي ما نافعة معاي

يتبع...

#عباس 59

مجاهد يوسف

من طلعوا من الحلة والزين مشغل مسجل العربية ونهائي ما أتكلم مع ود الست لحدي ما وصلوا وود الست جاء بشنطتو الفات بيها ولمن جوا بعند دكان الجد مسك الشنطة وقال للزين بس قبلك اقيف نزلني هني
_ اصل البيت وخت شنطتك هناك
_ لا لا بيتك تاني انا ما بخشو
_ لكن الزول دا قال ليك عندي شورة
_ شورة شنو ها انا عارفو قالها ساي وهو لاقي انا اشتغل معاهو ؟ والله اتلقي بعد مرقت منو قعد يعرض
_ ليه ؟
_ لانو عارف انا شنو ما زيك انت
_ انا قصرت معاك في شي ؟
_ قصرت والله ودكانك المعفن دا لو ما انا ببقى كدا ؟
_ اتحاسبنا واديتك اكتر من حقك وعصرت علي روحي في الحساب
_ والله اكلتني وانا ما عافي ليك
_ بس انا عافي ليك واحسن تمشي معاي ما عشان تشتغل لكن احتمال ود الجد ما يرضى ونحن بينا عيش وملح واخوان بغض النظر عن الشغل وما الشغل
_ ما بمش معاك والله ولا شي وانت زول جيعان ساي وانا الوريتك القرش
_ كتر خيرك خلاص انزل لكن بيتي مفتوح ليك في أي وكت
_ اصلا نازل وبيتك ما جاييهو تاني واخوة معاك هدا طرفي منها وبراك بتشوف دكانك دا بتدمر كيف والله انا قاعد في البلد دي ما اخلي ليك ولا زبون ومصيرك تقفلو
الزين لولح راسو وودالست نزل وهو فات علي بيتو
دق الباب لود الجد ما لقاهو وقعد مستنيهو جمب الدكان
ود الجد الوكت داك بعد قفل الدكان فات للزين في بيتو ولمن ما لقاهو جاء راجع واتلاقوا في الدرب وهم في الحساب قرايب قال ليهو ود حلال آ الزين والله وجيتي دي من بيتكم دايرك في كلام
_ انا مشيت حلة ناس ود الست وهدي جيتي منها وهو زاتو جاء معاي ونزلتو جمب الدكان حقك
_ انا جاييك عشانو ، بصح هو مالو معاك ؟
_ قال لي يا تبيع لي الدكان يا تأجروا لي وما داير شراكة معاي قال
_ والله الزول دا نبزك لي نبز وقال انت اكلت حقو
_ حرم اكان تركب وترجع معاي البيت واوريك اكلتو كيفن
الزين جاب الدفاتر وورى ود الجد الحساب كلو حتى القروش العفاهن ليهو والعشرة ألف الاداها لامو
ود الجد قال ليهو غلطان والله يا الزين أخوي والله ما بحاسبو كدي دا شال اكتر من حقو بكتير وشال حقو دبل
_ وكل شي مسجلو في الجرد بالزيادة وفي اصناف كتيرة عددها كم وسبعين تميتها مية عشان ما اظلمو
_ لا لا زولك دا ما بنفع معاي والله وانا هسي بمش اخليهو يختاني غادك
_ انا ما وريتك عشان تطردو
_ لا لا عارف الليلتك انا تب ما تحدسني بيك وانا لمن قلت ليو انشاور قلتها ساي والله وانت عارف الدكان هيلي براي ما معاي شريك يتشاور
_ خابر خابر وانا هسي سمعني كلام فاضي كتير قبال ينزل وقال وقال وانا حرم اكان اقفلو دكاني دا تاني ما بمسكو ليهو
_ وانا زاتي حرم ماني دايرو ولا بمسكو دكاني

عباس جية ود الست لجدو بالبكسي وكشكيشتو للمفتاح أثرن فوقو وشاف روحو زول خملة ما استفاد اي شي مع انو ليهو في الخرطوم سنة وشوية شغال وفي دكان حقو كمان والعفين دا من دكان في حلة عمل وعمل
وقرر يفوت الخرطوم يفك الدكان ويشوف ليهو شغلة غيرو فوقها فايدة

ود الجد جاء البيت وعندو راكوبة قدام الدكان لقى ود الست مستنيهو فوقها سلم عليهو وفتح الدكان ودخل
ود الست دخل وراهو ودخل الشنطة وقعد يتحاوم جوة الدكان ويهبش في البضاعة واكانت كتيرة ما شوية قال ليهو الدكان فاضي آ ود الجد ياخ لكن والله املاهو ليك ملي اصبر ساي وفضي لي اوضة من هسي انعملها مخزن وبرضو بملاهو
ود الجد ساكت ساي اصلو ما نضم معاو الا بعد ود الست سألو قال ليهو طلع لي كراس جديد انجرد
_ تجرد شنو ؟
_ اجرد البضاعة لانها حقتك انت وبعدين لمن نجي نتحاسب نخصمها وعارف عادي الحالة واحدة لكن انا برا جرد ولا بستلم
_ هو الداير يسلمك ليو؟
_ كيفن الكلام دا ، امس اتفقنا علي شنو ؟
_ ما تافقتك علي شي يا اخوي
_ انا ما قلت ليك داير الدكان ؟
_ قلتي لي لكن انا قلت ليك شنو ؟
_ قلت عندك شورة
_ وشاورت الداير اشاورو ورفض وانا زاتي رافض وانت زول كضاب ما بتنفع معاي
_ كضبت عليك في شنو ؟
_ انا شريكي الزين والدكان دا انا وهو النص بالنص هو الفتحو لي وانا هدي جيتي منو مشيت شاورتو وقلت ليهو ليه تاكل حق ود الست اليتيم دا وراني دفاترو والحساب حقكم الامس كلو دحين انا ما دايرك وياريت تشيل شنطتك دي وتختاني كدي كدي
_ والله تندم علي الكلام دا
_ البندمني شنو وبيني وبينك شنو ؟
_ سمح بتشوف ومو دكانكم المعفن دا والله لو اديتمي ليهو بلاش ما دايرو وبمش الليلة دي استلم دكان العوض
_ هداك العوض عليك يسهل وعلينا يمهل بس شيل شنطتك دي معاك
ود الست شال الشنطة ومرق زعلان فات للعوض وداك قال ليهو معليش الدكان شغالين فوقو انا وولدي ومترزقين منو لا دايرين غنى ولا خايفين من فقر وما بمسكك ليهو ونقعد انا وولدي عطالة
ود الست فات المناقل لانو ما عندو في الحلة تاني قعاد وندم ندم شديد لانو مرق منهم وهو الخسران وهو الغلطان علي روحو وبراو الخرب شغلو لأنو الزين ما قصر معاهو في شي حتى سبب المشكلة كان تسرع منو هو والزين ما كان دايرو يتشوبر ويتبوبر وقال اصلو ما ك

ان في داعي أقول داير بت الكراب ولا كان في داعي أخرب علاقتي مع الزين وانبزو وهو اداني فوق حقي وزيادة وعرف انو هو الشال اصبعو وطبز بيو عينو وقال رجعت صفر وهسي أقبل وين ارجع الحلة وللا أنجع تاني اكوس لي شغل ؟ هسي لو ما كسرت البيوت ودخلت القروش العندي كلها في البنيان اكنت بشترى لي بيهن عربية واشتغل بيها لكن آآآخ
وركب من المناقل فات مدني وأجر ليهو عربية لحدي الحلة خجلان من مشيتو الحلة بالبص وبعد فهم الناس انو البكسي حقو ما حلوة يركب في البص ولمن بقى قريب الحلة قال لبتاع العربية الأجرها عليك الله غشيني الكمبو داك وشال ليهو قزازة عرقي معاهو وفات البيت

عباس فات وقبل يمشي الخرطوم فات لربيع في البيت صحاهو من النوم وقال ليهو بتتذكر لمن قلت لي في تجار مخدرات دايرين ناس يدخلوها ليهم الخرطوم ؟
_ آي في وراقدين
_ المشوار بكم ؟
_ علي حسب الكمية البتقدر تخش بيها وقيمتها ، لكن بتسأل مالك ؟
_ داير اشتغل الشغلة دي ياخ وانا عندي خبرة في المواضيع دي
ربيع جرا الملاية واتغطى بيها وقبل علي الحيط ولا كلمة ما قالها ليهو لكن عباس جراها منو وقال ليهو مالك
_ يا نوم يا امش يا عباس ما فاضي ليك انا
_ عندك شنو ما فاضي لي ؟ قوم قوم خلينا نشتغل الشغلة دي سوا انعمل لينا منها قريشات وبالنص انا داير اشتري لي بكسي
_ شوف اوعك تمش في الدرب دا انا هدا والله عاطل وباطل وصايع وضايع وأي شي كعب لكن شيتن بودرني ما بمش عليهو
_ ما بودرك ولا شي وانا البدخلها ما انت ومن اوضتك دي بعد توديني للتجار ديل ما تمرق نصيبك بجيك في فجتك
_ ولا انا كعب بشرب بنقو وبسكر وبلف وبدور وعلي اصحابي بس وكلهم عارفني لكن ما بروج
_ تروج يعني شنو
_ ترويج المخدرات يعني بيعها وتوزيعها دي سموم وبتقتل وبتضيع الناس البتعاطوها وخاصة الحبوب مالي ومال الذنوب ودا ضياع الآخرة اما لو انقبضت فأقل حاجة لو ما اعدموك وسامحوك بتاكل ليك عشرة سنة سجن واحتمال اقل واحتمال اكتر على حسب القضية والحكم ودا ضياع الدنيا خليني في سجمان كدا لمن ربنا يهديني احسن لي عايش حر طليق على حسب الجيب داير انوم داير اقوم واحوم انا حر وما داير لي بكسي ولا داير اغنى
_ انت اصلا رمة ساكت ما عندك أي طموح
_ اخير لي كدا بس ما بنسجن وبعرف عساكر كتار اصحابي بشيل منهم البنقو وما خايف انقبض وانا زاتي من الليلة وعشان كلامك دا اقسم بالله العظيم وكتابه الكريم تاني لمن اموت ما ألف لي سجارة
_ لا خلاس
_ والله بشكرك واقول ليك شي ؟ وتاني لمن اموت ما افوت لي صلاة الا عذر عذر
_ يعني ما داير توريني التجار
_ ولا تجيني هنا تاني اكان اشتغلت الشغلة الفاضية دي
_ اصلا انت زول جربوع ساي وعديم تربية وما منك رجاء
_ كتر خيرك وشكرا ليك لاني ما ح انسى انك بقيت لي سبب في اني ابطل البنقو وأصلي
_ انا الاتنين ما دايرك تعملن والله بقيت ليك سبب كيف ؟
_ برضو بشكرك وتاني كتر خيرك
_ انا ماشي لابجاكومة
_ علي كيفك لكن الضهر قرب لو قعدت ومشينا نصليهو سوا في الجامع انا شايف احسن
_ صلي براك
عباس فات وربيع دخل الحمام اغتسل وجاء اتوضأ وصلى ركعتين التوبة وانتظر لمن الأذان أذن واتريح وفات الجامع
عباس فات لابجاكومة ما لقاهو وانتظرو في البيت لمن جاء وقال ليهو جهز لي كرتونة بنقو انوديها ليك الخرطوم بس حقي برة
ابجاكومة قال ليهو بنقو شنو انت جنيت ؟
_ ياخ انا عارف كل شي ياخ
_ انت يا عباس سكران وللا شنو ؟
_ عليك الله يا ابجاكومة ياخ بطل بلاهة وجهز لي البنقو
ابجاكومة قال ليهو معاك مقدم في المباحث وطلع ليهو الكارني حقو قال ليهو شايف دا شنو ؟
_ شايف وعارف وانتو اكبر تجار مخدرات ما علي انا الحركات دي جيب البنقو بس وللا ببلغ فيكم انا عارف جميع اسراركم
ابجاكومة تاح كفتو وقال ليهو اطلع برة وامش اعمل الدايرو
عباس طلع وفات السوق الشعبي وفات الخرطوم وصل هناك ومشى يفتش للهادي ولقاهو وقال ليهو ورح مشوار بحري داير اكشف ليك العصابة
_ عصابة شنو ؟
_ عصابة المخدرات ناس فرح والنجومي ووك وك والجماعة ديلك كلهم
_ يازول انا ماعندي شغلة بالحاجات دي مالي ومال الناس انا بتاع تكسي وعندي شفع داير اربيهم لا بوليس ولا عسكري ، ومشوار بحري بألف
_ يعني شنو ؟
_ يعني المشوار بألف وانا عندي زبون بعد المغرب ماشي مشوار يا اركب يا شوف تكسي تاني
عباس نبزو وفات منو ومشى لعبد القيوم قال ليهو دايرين نفك الشراكة انا الشغلة دي ما نافعة معاي

يتبع...

#عباس 60
الحلقة الاخيرة
مجاهد يوسف

_ الدكان دا شغال يا عباس ياخ ما تمرق منو
_ ما شغال ولا شي ودا ضياع زمن ساكت
_ لو مرقت منو انا متأكد بتندم عليهو
_ البندمني شنو ؟ نحن بنضيع في زمنا ساي قلت ليك يا عبد القيوم ياخي
_ والله انا ما داير مرقتك منو وهسي نحن هديل شغالين لا في زول طالبنا قرش ولا ناقصنا شي
_ انت يا عبد القيوم زول ما عندك أي موضوع وما طموح هسي وريني نحن استفدنا منو شنو ؟ ياخ ود الست ودا اكبر زول رمة في حلتنا ومن دكان صغير في حلة صغيرة بنى ليهو بيوت واشترى عربية
_ الشغلة دي توفيق من الله ما شطارة وأي زول بياكل رزقو ولو صبرت كلو ببقى وبتعمل احسن منو بس اصبر
_ من الدكان دا وبحالتو دي ؟
_ آي منو وبحالتو دي زاتها
_ خلاس ياخي اديني حقي واستلمو براك انا قنعت منو وربنا يغنيك
_ عباس ما تمرق منو
_ والله ولا يوم ما بقعد فيهو تاني لو ما دايرو خلينا نشوف زول يشتريهو
_ لا دايرو وهسي بمشي اكلم الصديق اخوي وأجيك
_ آي أمش وانا من هسي ببدا أجرد
عبد القيوم فات للتاج ووراهو كلام عباس كلو والتاج قال ليهو ما تشتغل بيهو ولمن يجي البيت بعدين انا بنضم معاهو وبقنعو
_ ورح ليهو هسي انضم معاهو لانو بدا يجرد وقال داير حقو الليلة
_ ما يجرد ولا شي ولو مصر انا بديهو حقو ، دفع ليك كم هو ؟
_ دفع لي سبعين وانا ما جيتك عشان غالبني اديهو حقو وهسي بمشي للصديق اخوي بجيب ليهو قروشو بس هو لو شالن بضيعن ساي وانا الزول دا ما داير ليهو الجهجهة تاني
_ هو براو القال مارق وما داير شراكة صاح ؟
_ ايوة ، لكن..
_ ما لكن ولا شي انا البديهو حقو وبشاركك في مكانو وتشتغل براك وعشان ما أظلمك بعد تطلع حق الايجار طلع لروحك مرتب شهري عشان انا ما بشتغل معاك ولا بجي يوم اقول ليك جاي قروش الا تديني براك ولو اديتني ألف بس ما بقول ليك شوية . رايك شنو ؟
_ انا ما موافق بس عباس ح يشتغل شنو ؟
_ مالنا ومالو نحن ودا شغل ما فيهو أي مجاملة وهو براهو القال ليك ما داير
_ خلاس ورح عليهو
عباس لمن بدا يجرد جاهو حسن وحنسو لمن قال بس عشان يصبر وما يطلع من الدكان لكن عباس ما رضى وقال ليهو انا ما داير شراكة ياخ وداير حقي بس ورجاءا يا حسن ما تتدخل في الموضوع دا خليك في شغلك بس وانا عارف الدكان سمح وشغال لكن عبد القيوم دا انا متأكد ماكلني
_ ماكلك كيف ؟
_ انت قايلني طيرة انا عارفو كويس هو بس المستفيد
_ فعلا صاح انت ما طيرة لكن والله الطيرة اخيرمنك وانت زول كعب وكضاب وعبد القيوم دا احسن زول اوعك تغلط فيهو
_ انت بتتحشر مالك امش علي فترينتك ما تخش هنا تاني
حسن مرق منو زعلان وكرهانو ولمن جوا التاج وعبد القيوم حسن قال ليهو ادي الزول دا حقو آ عبد القيوم وهسي خليهو يفوت منك ولو ما عندك قروش انا بديك ليهن والله لو ابيع الفترينة أجيبن ليك
عبد القيوم قال ليهو في شنو ؟
حسن ابى يوريهو بكلام عباس وقال ليهو ياخ عندك قروش وللا ما عندك ؟
القروش في والمشكلة محلولة وانا مشبت جبت التاج دا عشان نحلها
حسن قال ليهو ما في غير حل واحد تدوا الزول دا حقو بس ويمرق
عباس كان سامع كل شي ولا هماهو وشغال في جردو
التاج دخل ليهو وقال ليهو وقف الجرد يا عباس وانت مارق من المحل لشنو ؟
_ ما نافع معاي وعندي شغلة احسن منو
_ شغلتك شنو ؟
_ شغلتي خليها المهم احسن من الدكان دا
_ طيب طبعا انا عندي بضاعة هنا ما اديتوني حقها
_ آي بعد نجرد بنخصمها وبنقسم الباقي والبضاعة عبد القيوم بديك حقها
_ شوف انا مفروض اطالبكم بالتلت في الشهور الفاتت لكن ما مشكلة وهسي انا داير اشتري نصيبك وبديك خمسين قلت شنو
عباس سكت ساي وغلبو البقولو شافن شوية بس ما قدر يقولها ليهو لانو هو الاداهو القروش الدخل بيها
التاج قال ليهو اها رايك ؟ عشان انا ماشي علي شغلي
_ ما مشكلة موافق
_ خلاس ورح المكتب انديك ليهن
عباس مرق معاهو والتاج قال لعبد القيوم يللا شوف شغلك وعلي اتفاقنا زي ما قلت ليك قبيل
وفات المكتب ادى عباس الخمسين وعباس مشى بحري لفرح الكعب
وصل البيت وفتح الباب ورفع الحجر شال المفتاح ودخل مستني فرح بعد نص ساعة النجومي فتح باب الحوش وجاء داخل ولقى عباس ما سلم عليهو وسألو من فرح عباس قال ليهو جيت هسي قدامك
النجومي رجع لكن عباس وقفو وقال ليهو داير اشتغل معاك
_ تشتغل معاي شنو ؟
_ مخدرات
_ اجر ألعب بعيد
_ انا بتكلم جادي والله
_ قلت ليك أجري ألعب بعيد انت ما بتفهم ؟ حيوان
_ سمح بيع لي ووريني ناس يشتروها مني انا معاي خمسين الف
_ ايوة كدا ممكن ، جيب الخمسين وانا بكرة وللا بعد بكرة بجيب ليك بضاعة وبوصف ليك واحد تمشي توديها ليهو بسلمك سبعين الف . حلو ؟
_ حلو شديد والله تكون خدمتني خدمة اصلو ما انساها ليك
_ بس شوف اقسم بالله فرح وللا التاج وللا اي زول تكلمو الا اضيعك
_ لا لا لا ولا في زول بعرف البيني وبينك
_ خلاس موعدنا بكرة بعد المغرب
_ وين لكن
_ بجيبها ليك هنا
_ لا ما هنا عشان فرح ما يعرف وجيبها لي جمب دكانك القديم في السوق ال

شعبي
_ اتفقنا ولو قبضوك وجبت سيرتي فالموت بس والله وراس مالك طلقة في نص راسك وجوة السجن عندي الزول البكتلك
_ ولا بعرفك اكان قبضوني
_ خلاس بكرة بعد المغرب لو ما بكرة بعد بكرة
النجومي فات وشال معاهو القروش وعباس ولا قعد فات طوالي السوق الشعبي
ود الست اتدمر اسبوع كامل في البيت عرقي ونوم بس والناس كلهم عرفوهو ولمن زهج فات مدني لربيع
امو وقفت بنيان الدكان وشالت الطوب بنت بيهو الحوش والقروش الاداهن ليها الزين تمت بيهن البيت اوضتين وصالة واتبنن عضم ساي لا ابواب ولا شبابيك وقفلت الشبابيك بطوب ورحلت من الديوان فوقن
حاج ابراهيم شاف الحاصل وجمع الرجال في ديوان حاج علي وقال ليهم الجنى ود الست دا رجع تاني لعولاقو ربنا يهدينا ويهديهو والحاجة السمحة العملها بنى لامو واخوانو وامو دي اختنا ونحن كلنا مقصرين في حقها دحين نقفل ليها بيوتها ونجيرن ليها
حاج الكراب قال الابواب والشبابيك علي براي وحرم ما فيكم زول يدفع معاي فوقن وانتو تاني علي كيفكم
حاج الضو قال وانا علي البياض والجير بعد يجي عمر ولدي بكلمو يسويهن والباقين لموا الساهلة قالوا نديهن ليها في يدها
عمر جاء وابوهو وراهو مشى بيض البيوت وضربن جير وجاب ليهم سراير جداد وساق العبيد ود الست قال ليهو تشتغل معاي عشان العبيد ود عمي داير يفتح ليهو بوتيك جديد والعبيد اشتغل معاهو
ود الست المعولق مشى لقى ربيع لا بنقو ولا شراب الاتنين تاب منهن قال ليهو الدرب دا مشيناهو قبالك وتبنا وصلينا وكل شي وتاني رجعنا للصياعة دحين ارجع ساي من هسي
وربيع ولا كترو معاهو طردو طوالي وود الست مشى وكايس لناس تمساح الحرامية
عمر فات الخرطوم وقابل التاج اصلا بقى صاحبو من يوم بيت معاهو والتاج وراهو الحاصل كلو من عباس وقال ليهو خليو ما تنضم معاهو وانا اشتريت نصيبو لكن ماني دايرو والبجيني من الدكان بودعو ليك في حسابك تديهو لاهل عباس وما توريهو وانا بعرف كيف أأدبو
ود الضو كان عارف قصة التاج وخالو وراها ليهو عباس قام سألو منها والتاج ضحك وقال ليهو دي كضبة ساي ما عارف الفكاها منو وانا البسألني منها كلو بقول ليهو صاح لكن الحقيقة انا ابوي وأهلي كلهم في اوربا وانا زاتي كنت هناك والبلد ديك ما نفعت معاي وابوي جابني هنا واشترى لي تلاتة بصات وقال لي اشتغل وانا اشتغلت وبقيت كل ما اعمل قروش أشتري في البيوت والشراب اتعلمتو في اوربا وجيت تميتو هنا والحمد لله تبت منو وربنا هداني
عمر قال ليهو الحمد لله وفات لعباس لقاهو قاعد مع عبد القيوم ومن شاف ود الضو قرص لعبد القيوم وعمل فيها شغال لسة وعمر قال ليهو اشتريت لي دكان للعبيد ود عمي وهسي ماشي ام درمان ابضع وفات منو
عباس المغسة كتلتو وبقى يومي بقعد لحدي الساعة عشرة منتظر النجومي ونهائي ما جاهو ولمن تم اسبوع قال للتاج ماشي بحري قال ليهو لفرح الكعب ما تمش لانو في السجن هو والنجومي وفيصل والجماعة المعاهم
عباس بكى وحكى ليهو بالقروش والتاج قال ليهو تستاهل لانك حيوان وغبي اها أجغم
عباس فات من التاج وبقى لافي ساي لا لما في قرش ولا في دكان ومرة يبكي ومرة يعضعض في اصابع الندم
وهو لافي لاقاهو الهادي واصلا جاء كايس ليهو وقال ليهو اصحابك ناس عصابة المخدرات كلهم جوة السجن ومعاهم كم ضابط وانا هسي جيتك عشان ما تفكر تمش ليهم ولا تسأل منهم وانا من يوم جيتك وركبت معاي انا ما خليتهم وكلمت الضابط فاروق قريبي وعمل اللازم وولو بتتذكر يوم جيتك وجوا الجماعة ناس العصابة وساقوك معاهم ، انا اليوم داك هددوني بالقتل وانا كنت جاي عشان اقول اختاهم لانهم كلهم مراقبين وانت مفروض يكلبشوك معاهم ويرموك في السجن لكن انا قصيت للضباط قصتك معاهم كلها ووريتهم انهم مستغلنك ووصاهم عليك الضابط فاروق قريبي برضو عشان كدا ما قبضوك معاهم
عباس شكرو ووراهو قصة القروش الشالها منو النجومي
الهادي قال ليهو اتعوض فوقن الله وانساهن بس . وفات منو
وعباس بقى محتار وغالبو البسويهو وفات للتاج قال ليهو شغلني معاك
التاج قال ليهو انت ما زول شغل يا عباس ارجع اهلك وامسك حواشات ابواتك احسن ليك
عباس بكى وقال ليهو والله انا زول شغل وتاني لا بشفق ولا داير غنى وبقتنع بقسمتي بس عليك الله شغلني معاك
التاج قال ليهو طيب بس انتظرني دقايق وانا بمشي وبجيك وبشغلك شغلة سمحة بس ما تتكبر
_والله لو قلت لي غسل البصات حقاتك اغسلن ولو قلت لي اشتغل غفير وللا مراسلة بشتغل
التاج مرق وجاهو بعد ربع ساعة شايل ليهو كرتونة وملاها بضاعة من طبلية عثمان ووقف لعباس جمب الباب وقال ليهو قوم تعال شيل الكرتونة دي ولف بيها وألحق البصات ديلك قبال يتحركن

انتهت

📖 اذا انتهيت من قراءه الروايه اضغط علي #لايك 👇 واذا حصلنا علي #مائه لايك سوف نقوم بتنزيل روايه #جديده

عشقته.وانا خادمته💜
من تاليف:- ميعاد عبيد
الحلقة 1

( سلااامات🌚 كيفكم لعلكم طيبين😍 جيتكم بروايه جديده و الليهي اسمها عشقته وانا خادمته بتمنى تعجبكم وفي كل بارت تدوني ارأكم 😍)

ريااااان.ياااا بت...اوووي يااا امي جايه دقايق قالت لي تعالي جيبي لي شنطتي دي النمشي السوق قلت ليها دقايق يا امي جايه قالت لي انتي بتعملي في شنو قلت ليها جاااايه قامت من محلها وجاتني لقتني منبطحه على بطني و مرفعه كرعي و بحضر لي في فيلم.و عايشه الدور و انا نسيتها خااالص😂 قلعت شحاطتها براحه.و يا ضهر بقيت دلووكه🐸 غايتو.كرهت ابو.الهنود زاته😂👊🏻 قالت لي انا بنادي فيك.لي ساعه.و انتي تحضري لي في الهنود قلت ليها يمه يمه والله نسيتك قالت لي مالك بتنسي عندك شفع و لا شايله ليك هم عمرك.يا داب 14 سنه انا في عمرك دا.ماسه البيت و كل الهم فوقي وانتي ولا هم.و لا غم غايتو لو عرسوك برجعوك لي بخبيزك (طبعا حفظتها النغمه دي انا🌚 واكيد اي بت حافظاها😂) قلت ليها باكله و بجيك راجعه ما حصل شي🌚 ادتني طااااخ في ضهري لمن حسيت قلبي دا جاء في نخري😂 مشيت جبت ليها الشنطه قلت ليها يمه الليله الجمعه ماشه السوق لشنو.قالت لي قبل الصلاه بفتحوا امشي عشان ما اتاخر قلت ليها يمه خليني امشي انا قالت لي بنهره كده برررري انا ما عندي راس عشان ابوك يجي ينق لي فيه ولا بتحمل نقته قلت ليها خلاص خلاص ما تتاخري قالت لي يلا قلت ليها في امان لله و طلعت ( ابووووي طبعا بقول لي مااا عندي فتاه تتحاوم في السوق🐸) انا طبعا قعدت اتم الفيلم الفيلم لسلمان خان ما بخلي لو.عملوا لي السبعه.و زمتها🐸💜 المهم شي جفاف عاطفي و شي بكى لمن انتهى😂 قمت اجهز.الفطور طبعا.قراصه بويكه حمراء🌚(العشق كله ياااخ😍)المهم عوست الكسرة و ختيتها في الساخن بارد و لايقت الويكه و رجعت لتفزيوني لقيت فيلم لشاهد كابور الاسمه شاندر داك عاد تاني بزح منه🐸 اتلصق في السرير لمن امي جات قالت لي ابوك ما جاء قلت ليها لااالع ما جاء قالت لي خلاص قطعي الصلطه دي لمن يجي مشيت جبت القشاره و السكين و جيت اقطع لكن كلها اكلتها🐸امي جات لقتني باكل في العجورة قالت لي يازفت الطين انتي ما جبتها عشان تاكليها براك تاكلي السم الهاري قلت ليها خلاص سمح قطعتها و ختيتها بعد ربع ساعه كده ابوي جاء ختيت الفطور فطرنا ابوي استلم التلفزيون.جاب الحدث كره كبيييير ليهم🐸 مشيت غسلت العده.و جيت لقيته ناام جبت الفيلم و قعدت احضر امي نادتني مشيت ليها قالت لي هسي دا تمشي الدكان.جيبي لي رز و تعالي قلت ليها شنو.قالت لي عايزة اعمل محشي طوالي جري مشيت جبته.و جيت وامي خشت المطبخ طبعا واشري علي العمري كلهم.عندهم تلفونات و كده لكن عشان.وضعنا و كده ما فكرت اشيل تلفون و حياتي كلها كانت عباره عن المدرسه البيت البيت المدرسه برنامجي في البيت عادي بنضف و اقعد احضر التلفزيون.و قيرايتي زايد تفاهات الحب ما كان.ليها محل في قلبي ابدا🌚لانه عارفه نهايتها بكى و تخلف بس دي حياتي كده امي خشت المطبخ انا مشيت اصلي بعد صليت رقدت اخدت لي نوومه العصر صحتني امي لقيتها ختت الغداء اتغديت و صليت وقعدت اقرا قرريت كده لحدي الساعه 5 ونص كده جاتني صحبتي صافيه اسم على مسمى طبعا اقرب وحده لي من نحن في الروضه💜 اتونست معاي و قرينا سوا المهم.كده.ايامي و بمشي المدرسه و بجي في يوم وانا في المدرسه عندنا استاذ كده مززززه خلاص البنات جاريات وراهو طبعا تامن و.سابع و السادس الباقي الدقدق ما بعاين ليهم😂المهم هو زاته عينه.زايقه و.قليل ادب🐸و عنده.حصتين دبل ورا بعد في الاسبوع كله عندنا نحن بنات تامن بس المهم هو في الحصه بشرح و.يكتب في السبورة انا و صافيه قاعدين.نتراسل بالورقه لانها بعيده مني😂المهم.هي كان كتبت لي انه الاستاذ دا عاجبها و مكسرة فيه وكده قمت انا كتبت ليها يعجبك شنو واحد عينه زايقه و قليل ادب و جنه يعاين للبنات و لفيتها في حجرها و هو جاء ماشي بالمرر بين الكنب و انا ما شايفه و جدعت الورقه جاته في جلحاتو🐸 الساعه القال ليك اخخ انا قلت وااااي😨 رفع الورقه و قراها عاين.لي قال لي ريان محمد وصافيه خالد اطلعو بررررا😡😡
طوالي طلعنا الخمسه فوق الاتنين😄 بعد الحصه انتهت جانا طالع و ساقنا المكتب. وقعد و نحن واقفين قدامه و بعاين ليها سااااي عاين لي صافيه قال ليها امشي انتي مسكتها من يدها قلت ليه ما بتمشي حمر لي قال ليها قلت ليك.امشي يا صافيه قلت ليه ما ح تمشي قلت ليك قال لي قله ادبك.وصلت هنا؟؟؟ قلت ليه.ما قلت ادب بس ما بقعد.معاك براي و في مكتب مقفل كمان انا ما قنعانه من روحي☺ قال لي اهاااا كويس بوريك ما قنعانه من.روحك.كيف .......

تاااابعوني ليصلكم.الجديد المستجد🌚🐸

عشقته.وانا خادمته💜
من تاليف:-ميعاد عبيد
الحلقة 2

قال لي بوريك.قنعانه من روحك.كيف هسي كلامك.دا كلام بت محترمه و متربيه.قلت ليه انا قلت شنو.قال لي الكلام.القلتي في.حقي.دا قلت ليه وانا قلت حاجه غلط؟؟ وريني حرف واحد من القلته غلط؟؟ سكت و.بقى يعاين لي. مشي جاب صوط و جاء قال لي افتحي يدك. قلت ليه ما بفتحهم.قال لي تفتحيهم.ولا اخلي المدير يجيب ابوك.و.امك. سكت مساافه كده.و.فتحت ليه يدي دقاني دق ود.اللزينه.دا لمن يدي عمله نباق ادعي فيه الليل و النهار بعد.اتقديت و.طلعت منه صافيه قالت لي بطني طمت منه قلت ليها ههههه هسي ما كان مكسرك.قالت لي بري اب جلحات دا يعجبني شنو.رجعنا الفصل البنات.طبعا زي الضبان اتلمه.فيني و.شايفات.اني ماده يدي و اصابعي.منفخات زي السجق و يسالني عمل ليكي.شنو.قلت ليهم عزمني اسكريم🐸متخلفات خلاص بعد كده رجعنا البيت من دخلت سلمت على امي و.دخلت صليت و رقدت نوومت العصر صحيت صليت لقيتهم.اتغدوا دخلت المطبخ باقي المحشي سخنته.و اكلته وقعدت اقرا مرت الايام.و امتحنت و الحمد لله نجحت و جبت266 و ابوووي و امي الفرحه ما شايلاهم لكن فرحتنا ما تمت ابوي كان تاني يوم بعد النتيجه الفجر كده مشيت اصحيه عشان يمشي يصلي لكن ما بقوم لي صحيته و كوركت و هزيته و انا بهز.فيه وقع من السرير بس صرخت ابووووووووي امي جاتني جاريه و لقته واقعه في الارض و.انا.واقعه على كرعي و ببكي جاء.عمو.خالد ابو.صافيه ودينا المستشفى و.الدكتور.قال لينا جاته زبحه و الله استلم امانته و البركه فيكم انا و امي الاتنين وقعنا لمن صحينا الاتنين مركبين لينا درب.قلت ليها يمه ابوي وينه ابوي كويس مس.امي وينه يابه يمه وينه و انا ببكي بحرقه شويه كده وبقيت اصرخ جات وحده من الممرضات تطعني حقنا لزيتها و فكيت الدرب و مشيت لامي وهي في حاله صدمه كده قلت ليها يمه ابوي كويس تعالي خسي تلقي واقف برا و خايف برا و هي.حلفت كان ترد لي بس تعاين بالواطه في النهايه قالت ان العين لتدمع و القلب ليحزن و اننا لفراقك.يا محمد لمحزانون. استغفر الله العظيم.و اتوب اليه و انا صرخت لاااااااااااااااااا و طلعت خليتها لاقتني صافيه مسكتني حاولت اتفكى منها بس عمي خالد جاء و مسكني معاها و بقوا يصبروا فيني لحدي ما استوعبت انه ابوي مشى و خلانا برانا مرة اسبوع على وفاة الغالي💜 والناس في البيت.خفوا و.قلوا مرت الايام و.امي طلعت من الحد لكن حالتنا بقت صعبه فقدنا مصدر رزقنا و اعماي زي الكانه نحن ما بنقربهم بعد الاسبوع الاول بعد.وفاة الغالي.تاني ما شفناهم.واصلا ما فارقين معانا و امي اصلا وحيده امها و ابوها الاتوفوا.بعد.زواجها من ابوي بسنه كده يعني انا و امي بس و عمي خالد ما مقصر لكن متقيلن عليه و هو.دوب ولادوا المهم امي فتشت شغل و ما لقت و قررنا نسافر الخرطوم احتمال الله يفرجها علينا امي فكرت تتزوج.تاني لانه.بعد.وفاة ابوي اتقدموا ليها.2 و رفضتهم كانت خايفه من تعاملهم لي بعد العرس و بعد ما تدبس فيه و انا اصلا ما كنت ح اتعامل معاهم.كويس.فقررنا نسافر بكرة باذن.الله و كلمنا عمو.خالد و ودعناهم و صباح اليوم التاني الساعه 8 كنا في الباص ماشين على الخرطوم💜قعدت الباص.حااااارة والله.سوت لي وجع ضهر ياخ😂 في النهايه نمت لكن امي عينها ما غمضت بتفكر ايه الح يحصل لينا صحتني امي قالت لي قومي.وصلنا خلاص.نزلنا و امي كانت عارفه الخرطوم.كده لانها جات مع امها و ابوها الله يرحهم.كتييير المهم مشينا لوحده.صحبتها من زمان كده المرة ظررريفه ماشاء الله لكن راجلها حدث و لا حرج شغال زي كشافه المنارة يلا انا ما ركزت معاه كتير سلمت على صحبت امي اسمها تهاني و عملت رايحه من راجلها مع انه.قاعد على نار عشان.امد.ليه يدي🐸 المهم.ادتنا اكل و اكلنا و امي حكت ليها الحاصل كله وكده تهاني اتفهمت و الموقف لكن راجلها كان مبسوط و اظنكم.عرفته ليه لكن يحلم حلم🐸👊🏻 دخلتنا غرفه كده قالت لينا دي غرفه.بتي لكن هي مسافرة عند ناس خالتها في السعوديه وكده اقعدوا فيها دخلت انا استحميت و صليت و جات امي برضو. صلت و.رقدنا اخدنا ليناااا نومه لمن صحيت لقيت......

تاااابعوني و ارآكم لو.سمحتو🐸💜

عشقته وانا خادمته💜
من تاليف:- ميعاد عبيد
الحلقة 3

لمن صحيت لقيت راجل تهاني في وشي قاعد جمب كرعي طوالي رفعت كراعي و اديته رفسه كده لمن ادردق في الواطه و قعت في نص السرير وبقيت اعاين ليه هو عاين لي و طلع كنت عايزة اصرخ لكن قلت اعمل مشاكل في البيت و انا يا داب اول يوم لي معاهم فقمت رفسته🐸 المهم نسيت الموضوع لفحت توبي و نزلت لقيتهم.بشربوا في شاي المغرب مشيت صليت وجيت قعدت و عبد العظيم دا نهاي عينه ما نزلنا مني والحمد لله ما انا براي الملاحظه الكلام دا بعد اخدنا ونستنا مشيت جمب التلفزيون حقهم امي جاتني قال لي اسمعي يا بت شفتي انتي تنزلي بس تصلي و تاكلي و تطلعي تقفلي باب الغرفه عليك فاهمه؟؟ قلت ليها سمح و فعلا انا تلاته يوم بالحاله دي و عبد االعظيم ما بشوفني الا ساعه الاكل بس اليوم الرابع امي جات مبسووطه من برا قالت لي لقطي الهديمات ديل انا لقيت شغل قلت ليها وين قعدت تحكي لي قالت لي انا كنت في الصيدليه دار اجيب لي بندول وسمعت مرة بتشكي من خدمه البيت و انه الخدامه اشتغلت معاها شهر و تاني ما جات و انا بعد سمعت الكلام دا سلمت عليهم و قلت ليها انا بشتغل معاك قالت لي انا شغلي ما هدوم بس تغسليهم انا عايزة وحده تستلم البيت كله من مسح لغسيل عدة و هدوم و تهتم بالزرع العندنا قلت ليها بشتغلوا قالت لي خلاص شهرك 2 مليون و شالت رقمي و قالت لي تجيني بكرة قلت ليها ااامي كيف يعني تشتغلي خدامه قالت لي يا بت هوي رزق حلال مالك تاني و بعدين المدارس فتحت. ولازم تبدي.....قبل تتم.كلامها قاطعتها قلت ليها عايني لي هنا يا يمه انا مدرسه هسي ما دايرة و لا تحاولي معاي لمن حالنا شويه تتيسر و.تتسهل بدرس و بعدين.انا ح اخدم.معاك.او.اقول ليك.انا الح اخدم.ما انتي. كلمتك من هسي قالت لي لكن.قلت ليها يمه ياخ عليك الله افهمييييني انا غير كده ما بقبل قالت لي خلاص.كدي لمي.الهدوم.ديل لانه.قالت لي تجي تقعدي في بيت ملاصقهم.و.هو.ملك.ليهم.و مافيه زول.قلت ليها سمح.و.فعلا لميت الهدوم و.صباح اليوم.التاني مشينا على العنوان.الادته امي.طبعا بيت من شده ما حلو.وخطير انا لمن.جاني.صداع بس كنت بشوف زي.ديل في التلفزيون و ما اتخيلت يوم.ح اقيف قدامه خلي.اجي.ادخله😂 فتحت باب السور جاتنا مرة كده.من.الدهب اللابسه لمن قالبها تمشي😂 جات سلمت علينا شكلها ظريفه بس متفشخرة كده المهم.ما ختيت بالي معاها جات شربتنا عصير و حومتنا في البيت كده لمن.دوخت والله😂 و تاني ودتنا البيت الصغنوني.لمن قالت صغنون.و.انا اتخيلتها اوضه ولت حاجه لقيته اكبر من.بيتنا انا قلت المرة دي مالها😕
خشينا البيت حلوووو بس مغبر داير نضافه قالت لينا الليله ح تقعدوا اجازه و باكر.تبدوا.شغل قلت ليها كويس ان شاء الله بعد طلعت انا طلعت لامي كرسي قلت ليها يمه الغبار ما بنفع معاك.يلا.قومي.اقعدي برا لمن.اخلص و فعلا قعدت برا انا طلعت عبايتي وربطه راسي بالطرحه نضفتها و.فرشته و مسحته.سيراميك.طبعا😂 خلصت طلعت فتشت لي فيحيمات قدر ما فتشت ما لقيت دخلت.لقيت المبخر بتاع الكهرباء دا ولعت لي بخور قلت لامي تعالي ارقدي يلا.جات خشت قالت لي بيت و لا كنا نحلم.بيه قلت ليها هههههه الحمد لله.يمه قالت لي ونعمه بالله جات رقدت.و طوالي نامت يا حليلها💜 جات ست البيت دقت الباب اسمها اسمهان هي فتحت ليها بقت تعاين.للبيت و.مخلوعه.قالت لي متين ماشاااااء الله😍 قلت.ليها ههههههه ما بندور نقعد.في الغبار قلت انضف اصلا ما فايتانا قالت لي فااهمه.يا بتي جيت. دار اقول ليكم تجوا تخشوا المطبخ عادي زي ناس البيت.و تاكلوا كويس؟؟ قالت ليها حاضر و مشكورين. قالت لي ولوووو 😍 و مشت انا فتحت.التلفزيون امي صحت قالت لي جوعت ياخ.قلت ليها اسمهان جات و قالت نخش المطبخ عادي وكده قالت لي جزاها الله خير انا لبست توبي و.طلعت دخلت المطبخ.فتحت التلاجه لقيت شي سجق.و شي.بيتزا قلت الشي دا لا بتاكلوا لي امي ولا حاجه فتحت الحوض.التحت لقيت لي اسود فتشت.الصلصه.و الدكوه.و.بعد.شويه لقطت الحاجات كلها و عملت لي صلطه كتييييرة.شلت في الصحن و.ختيت.الباقي هناك شلت العيش و مشيت ليها قالت لي هسي لو.خلونا نسوي اكلنا هنا مالو قلت ليها يمه.نحن.هسي ما تمينا 10 ساعات من جينا خلينا ناكل هسي لمن نظبط.امورنا....
بهناك.جاء داخل المطبخ و لقى الصلطه عمل ليه سندوتش.و مشى لامه قال ليها ما كنت عارفك طباخه كده قالت ليه في شنو.جاء اداها من السندوتش قالت ليه بري ما عملتها انا والله قال ليها منو يعني قالت ليه احتمال من الخدمتين الجداد ديل قال ليها امممم خير و طلع انا و امي اكلنا و امي رقدت و انا بقيت بحضر في التلفزيون و تمينا يومنا كده اليوم التاني صحيييييت بدري....