سيلا ٤
جا داخل علينا المحاضر وبدا يرحب بينا كطلاب جدد ، وعرفنا بي نفسه وبي مادته وعن اجزاء مادته الحيدرسها لينا ، انا في المحاضرة كنت منشغلة بي فاطمة بعاين ليها وبتفحص فيها كاني دكتورة ، خلصت المحاضرة بسلام و بعد طلع المحاضر قلت لي فاطمة بعد ازنك عايزة اطلع قالت لي سمح وقامت لي وهي مبتسمة ، حقيقة كنت مستغربة كيف في ناس لطيفين معاك بدون سبب و ناس متعمدين يجرحوك بالألفاظ ، مريت من خلالها وطلعت اشم هواء الخرطوم وهواء جامعة الخرطوم ..
اتمشيت في الجامعة بعد ما حفظت موقع قاعتي كويس ، وانا بتمشى لقيت شلة من الاولاد قاعدين بدندنو بس دة مزاجي هنا ، وقفت اعاين ليهم من بعيد و فنانهم مدسوس في النص بس صوته البطلع كل شوية ،
كان بقول
( كل ما اكتب رسايلا ، ليك دموع الشوق يسيلا )
انا بسمع اغاني سودانية بس صراحة ما بفهم كل الاغاني خصوصا اللغتها معقدة شديد ، حاولتا اقرب لانه صوت الراجل عجبني بس الاولاد الكتار مغطينه ، ولمن خلاص قربتا هجمتني وحدة وهي بتقول لي سيلا دي وقعت منك ! اتلفتا لقيتها فاطمة ياها زاتها بتقول لي وقعتي جزلانك كنتي معلقاهو في الشنطة بي برة و وقع منك لمن قمتي قلت ليها هجمتيني لكن شكرا ليك ماشفته فعلا و شلته منها ادخله جوة ، سمعت الاولاد بكوركو محمد لا عليك الله وحدة تاني حلفناك وحدة تاني ، اتلفتا اشوف الفنان دة وشفتو ، من اول مرة شفتو فيها وجاني الشعور البجي لكل الناس كأنك بتعرف الزول دة ! قلت بصوتي مُحمد ، قالت لي فاطمة اسمه محمد عادي ما الا تضمي الميم عادي بنناديه محمد ؟
قلت ليها انتي بتعرفيه؟
قالت لي اجي كيف ما بعرفو و هو قريبي من بعيد !
قلت ليها قريبك؟
قالت لي يعني ببقى لي ، قلت ليها كيف اقصد يعني صلتكم شنو ؟
قالت لي في الحسبة هو ولد خالتي لكن الحسبة دي بعيييدة ،
مسكتا راسي بيديني وقلت ليها لفيتي لي راسي بكلامك دة ، قامت ضحكت وقالت لي تعالي نقعد هناك وانا افهمك براحه ، مسافة قعدت معاها في البنش لقيت الاولاد مشو كلهم حتى محمد معاهم ،
وبدت تشرح لي علاقتهم الطويلة و فلان ببقى لي علان و داك ببقى لي داك لمن راسي شطب و في الاخر يعني محمد ولد خالتك! قالت لي ايوة ، قلت ليها وهو فنان مشهور؟
ضحكت فيني شديد وقالت لي يابت الولد دة بدندن بس ما بغني في حفلات ولا بموسيقى ، قلت ليها اصلا مامحتاج موسيقى لانه صوته حلو بصراحه الموسيقى هي المحتاجاهو ، قالت لي والله لو ماقبطية وقلتي الكلام دة كان هسي قالو عليك بت خفيفة ولفيفه والله مكرهين السودانيات شديد كان عبرو ساااي ، قلت ليها بس انا سودانية ، وقفت على حيلها وباين عليها الصدمة قالت لي نعم ؟ انتي قبطية؟
قلت ليها وسودانية برضو ،
قالت لي كيف يعني مافاهمة حاجة قلت ليها اقعدي وافهمك و حكيت ليها نسبي و اصلي ، بعدها مشينا نجيب فطور وطول الطريق وفاطمة مصدومة وبتعاين لي وبتحسب في راسها ..
لحدي ما لاقينا كارولين قلت ليها سلمي على فاطمة برلومة زينا او بالأصح مابرلومه لانها بتعرف الجامعه كوووويس ، قلت لي فاطمة كارولين صحبتي من الأساس قالت لي سودانية برضو؟ قلت ليها بهظار لا عراقية وضحكت قالت لي انا جادة والله مادايرة اتهجم تاني ، قلت ليها عراقية جد جد قالت ليها اهلا كارولين اتشرفنا والله ..
قلت لي كارولين ماشفتي فاتتك حفلة عجيبة قالت لي وين ياسيلا بعدين كيف تخوني صحبتك و تمشي من دوني ! قلت ليها اهدي دقيقة الحفلة كانت تحت الشجرة ديك التحتها بنشات كتيرة ، قالت لي بتهظري انتي؟ قلت ليها واتخيلي الفنان منو ؟
قالت لي حسين الصادق؟ قلت ليها يابت انتي غبية ، ولد في الجامعه .. قامت فاطمة قالت اسكتي وطي صوتك مايسمعك زول
قلت ليها في شنو ؟
قالت لي محمد دة رااجل ما اسمه ولد ! قلت ليها الفرق شنو قاالت لي يابت دة جعلي جعلللي ماعندنا ولد عندنا رجااال ، قلت ليها يعني انتي جعلية ! قالت لي لا انا شكرية و هو ببقى لي من جهة الام ..
قلت ليها طيب انا عندي صحبة جعلية و ليها مابقولو ليهو ولد ؟ ماهو زينا في الجامعه .. قالت لي ياعبيطة اسمه راجل وضحكت و قالت تاني ( الحمد لله محمد ماسمعك) قلت ليها كان حيسوي شنو !
قالت لي ممكن تاني ما يسلم عليك ، قلت ليها هو صعب ؟
كارولين قالت لي سيلا دة منو البتحققي عنه دة ؟
قلت ليها شاب اسمر ، فاكمة قاطعتني وقالت لي ٣٠ سنة
الشاب دة عمرو ٣٠ سنة ، و متخرج ليهو ٥ سنين من الجامعة و درس هندسة معمار ..
قلت ليها هنا ؟ قالت لي طبعا و امال انا بعرف الجامعه من وين! و هو بغني هنا ليه!
قلت ليها طيب هو بجي هنا ليه ؟
قالت لي عندهم رابطة بتاعت طلاب واتحاد وكلام كدة ماتشغلي نفسك بيهو المهم بجي كم مرة كدة يعمل اجتماعات مع ناسهم وكدة ..

قات ليها سياسة؟
قالت لي هو منو في الجامعه دي ما سياسي؟ ياخي ست الشاي كان سالتيها حتوريك الدولار كان كم وبقى كم ،
حديث فاطمة عجبني لاني حسيت اني عرفتا شوية عن طبيعة الحياة هنا في الجامعة ..
قلت ليها طيب ممكن يغني لينا تاني !
قالت لي يابت هو مافنان و انتي كان بتعرفي اهله الشيوخ ماكان بتقولي يغني دي ، قلنا ليها انا وكارولين شيوخ !
ضربتا يدها بجبهتها وقالت لينا اخ أنا نسيتكم انتو مسيحيات ..
عاينا ليها تاني .. قالت لينا هي والله ماقصدي شيء ، ارح ارح انا جعانة حاوريكم يعني شنو شيوخ ..
وهي بتطنطن بتحت بتقول الله يصبرني على القبطيات السائلات .. قلت ليها فاااطمة انا سامعاك على فكرة ...

#نتابع_بشوق
#سيلا٤

#سيلا٥
رجعتا من الجامعة وأنا باقي اليوم كله بفكر في محمد ماعارفة الشداني ليهو شنو ، حاسة إني عايزة أعرفه من قريب و كيف اهله يكونو شيوخ و هو عادي ممكن يدندن ! يعني الغناء ما حرام عندهم ؟ ولا الإلتزام ما بيشمل العائلة ! ما حصل شفتا نور يوم بتغني قدام الناس لكن ممكن تدندن براها في البيت ، لكن على حسب كلام فاطمة انه محمد اهله ملتزمين اسرته الصغيرة الفيها تلاته اخوات بنات و ولدين تانيين ملتزمين يعني كل البنات محجبات و حافظات القرآن و ابوهم زول ملتزم ، مابقدر احدد هل التزامهم في حدود دينهم ولا هم تابعين لحركة دينية او ارهابية !
محمد لفت انتباهي اكتر بعد ما حكت لي فاطمة عن اهله و انهم ناس صلايين و ملتزمين ، طيب محمد كيف بيجمع بين السياسة والالتزام و الغناء؟ هل في خليط من زول كدة !
هل ابوي كان مواظب على صلاته ! و كان بحب الشعر !
ما لاقيت ابوي في حياتي ، بس البعرفه انه القسيسين و الراهابات ملتزمين يعني ملتزمين ..
او يمكن الالتزام في الاسلام عندو مراحل ؟
كيف الدين الاسلامي بجزء الناس لدرجات و كيف في ناس متبعين وناس متشددين !
هل الحرام و الحلال درجات ؟
قلت في نفسي وأنا مالي لكم دينكم ولي دين ، زي ماقالت نور ..
جات مارة بتضحك قالت لي سيلا في شنو مهمومة كدة !
بعدين سامعاك بترددي في الآية قلت ليها اهااا وقعدتا اضحك وقلت ليها معليش ما قصدي والله اقولها بالطريقة دي لكن اتذكرتك ، قالت لي الذكرك الآية شنو؟
قلت ليها محمد ، عاينت لي ورفعت حاجبها بتستفسر محمد منو؟
قلت ليها محمد دة شاب لاقيته هناك في الجامعة ، لكن مستغربة في قصته ..
صوته جميل شديد وكان بغني في اغنية حلوة تقريبا كانت كدة باللحن دة
( كل ما اكتب رسايلا.. )
قالت لي حسين الصادق ، اوووو ، واااو شكله زول غناي فعلا ..
قلت ليها ليه؟ قالت لي انا بحب حسين الصادق شديييد وبسمع ليهو ، قلت ليها لكن انتي مابتغني قدام الناس !
قالت لي اي لأنه صوتي ما حلو ، قلت ليها ولو كان حلو حتغني؟
قالت لي لا طبعا لأنه حرام صوت المرأة عورة ، قلت ليها طيب يعني حلال عن الأولاد ؟
ضحكت وقالت لي سيلا الغناء زاتو في حد نفسه الناس مختلفين فيهو حلال او حرام ، ناس بيحللو الموسيقى و ناس بيحللو الكلمات وناس بيعكسوا ..
اي زول عندو قناعاته في الغناء و اي زول بشوفه بالطريقة الهو عايز يشوفها ..
قلت ليها طيب لو اهلك شيوخ عادي تغني؟
قالت لي هو اهله شيوخ ؟
قلت ليها ايوة ، قالت لي ما اظن هو كان بغني او شغال فنان لانه دي حاجة ما منطقيه بالنسبة لي ..
لكن اذا اهله شيوخ بكون قاعد بدندن ساي ..
قلت ليها يعني هسي الغناء حلال ولا حرام ؟
قالت لي سيلا مابقدر اجزم ليك انا ماشيخه ، وريتك الافتاءات و الحاجة البعرفها في بيتنا انه الغناء حرام و قروشه حرام ..
قلت ليها عشان كدة انتي بتغني براك؟ و ما بترسلي لي غنية بتقولي ذنوب؟
قالت لي ايوة دي قناعاتي ، قالت لي يعني هسي لو سمعتا الاغنية بتاعت حسين دي حتاخدي ذنوبها انتي؟
ضحكت وقامت قالت لي يا زولة اعملي الدايراهو ساي ..
وقامت مني ماشه لغرفتها تنوم قالت لي بقت أسئلتك كتيرة وكلامك كتير ..
قلت ليها يعني حرام ولا حلال ؟ مشت وهي بتصفق بيدينها وبتقول لي القعدة معاك زاتها حرام ..
ضحكت شديد لأنها زهجت مني ، بعدها فتحت اليوتيوب طوالي كتبت حسين الصادق رسايلا ، جاتي الغنية طوالي وبديت اسمع فيها لغاية مانعستا كنت بقلب في اغانيه ولحدي ما مشيت نمتا وصحيت للجامعه تاني يوم ..
..
حضرنا المحاضرات وقبل المحاضرة الاخيرة كان عندنا قاب فقررت انا وفاطمة نمشي ناكل ذرة ، مشينا للراجل يعمل لينا ذرة بفلفل اسود حااارة و معاها صوص كدة رهيب وقعدنا في البنش بناكل و بنتونس ، قلت ليها انا سمعتا الاغاني بتاعت حسين الصادق عجبتني شديييد ، قالت لي صوته رهيب اساسا انتي مابتعرفي الاغاني السودانية؟ قلت ليها لا طبعا بعرفها وبحبها و بحب مصطفى سيد احمد هو فناني المفضل ماحصل غنا اغنية وطلعت بايخة او ما بتستحق ، قالت لي والله طلعتي خطيييرة عديييل يا سيلا .. كان كدة انتي سميعة جد جد ، قلت ليها ابوي بكتب شعر على فكرة و في قصايده تحت كان بوقع المفتون بي أبو السيد ، من ابوي عرفتا مصطفى سيد احمد و عرفتا اغانيه .. قالت لي انتي عايشة هسي مع منو ؟ قلت ليها مع صحباتي في شقة وحارجع ايرلندا في الاجازة ..
ونحنا بنتكلم شفتا محمد وهو بيتكلم مع واحد وماشي ، وبشرح ليهو بانفعال قمتا لفت فاطمة قلت ليها قريبك ، عاينت ليهو ونادتو محمد واشرت بي يدها ، انتهى من صحبو وكان جاي علينا ، مشيتو وجديته ورجولته بتخلي اي بت تعجب بيهو ..
قرب علينا وسلم على فاطمة بطريقة لطيفة و ناداها الزهراء ، رفعت حاجبي مستغربة !

هي برضو سلمت عليهو بشوق وقالت ليهو مشتاقين يا اخونا وين انت ولا بتسأل ولا بتجي كليتي بهناك ولا اي شي ، قال ليها والله جري بس تقولي شنو يابت العم ، بيسلموا وكاني ما موجودة لحدي مافاطمة بعد شوية قالت هي محمد لخمتني والله عايزة اعرفك دي صحبتي اسمها سيلا ، مد يدو وقال لي حبابك سيلا ، قلت ليهو مرحبا ..
حسيت انه محمد لطيف من اللحظة ديك ، رغم انه مسلم بس ما قال لي السلام عليكم و عرف كيف يسلم علي بطريقة محترمة جدا ..
قلت ليهو سيلا إبراهيم ، سلم بس حسيت بيهو مستغرب!
قامت فاطمة بسرعة قالت ليهو اتفضل اقعد جلس انا والله اشتقت ليك عديل ، قعدت هي في نصنا وفصلتنا و هو لسه كان مندهش ! تاوق لي وسألني أبوك اسمه ابراهيم ولا انا سمعتا غلط !
ابتسمتا وقلت ليهو أنا سودانية و أبوي مسلم ، فاطمة قالت ليهو الله يرحمه وهي بتعاين ليهو نظام اسكت وانا بفهمك بعدين ، لكن اصر يسألني بوضوح وانتي كيف مسيحية؟ قلت ليهو امي ايرلندية فلسطينة !
صلح ضهرو لي ورا وقال لي فاطمة قومي جيبي لي موية والله عمر دة طلع زيتي بكلامه الكتير دة ، قامت تجيب ليهو الموية ..
كان ساكت شوية و بعدها قال لي نورتي السودان يا سيلا قلت ليهو شكرا ، بس عرفت كيف اني اول مرة اشوف السودان ؟ قال لي وهو بضحك وااضح ياخ نحنا اولاد البلد دي و بنعرف الناس من وشوشها .. عاين لي تاني وقال لي الغريبة انه عيونك سودانية ، قلت ليهو بضحك نعم ! كيف يعني!
قال لي ملامحك كلها ما سودانية لكن خرطة عيونك ياها حقتنا ..
( الجملة دي دخلت لي جوة قلبي ياها حقتنا ) حسسني اني بنتمي للبلد ومُرحب بي فيها ، كلمة بسيطة قالها لكن تأثيرها كان كبير علي ..
احساسي ابدا ماخاب يوم حسيت انه محمد هو السودان بذااته ..
ضحكنا شوية وتاني قال لي طيب عايشة وين هسي و معاك منو في الجامعه بتعرفيهو غير فاطمة ..قلت ليهو كارولين صحبتي معاي ونحنا اربعه في الشقة كلنا قرينا المدرسة في ايرلندا ، قال لي وحبيتي البلد ؟ قلت ليهو والله لسة ماشفتها ومابعرف فيها كتير بس بصراحة انا عملتا الجامعه حجة عشان اجي واشوفها ، قال لي امك كانت مانعاك؟
قلت ليهو بصراحة بدون زعل؟
قال لي وهو ببتسم قولي ياخ حأزعل لشنو ، قلت ليهو امي بتكرره السودان و قالت انه اسوء بلد و بتكره اهل ابوي بالذات ، قال لي انتي من وين ؟ قلت ليهو من ديار الشايقية .. قال لي طبعا حافظاها حفظ صح لكن مافاهمه زاتو الشايقية ديل شنو ، قلت ليهو بصراحة؟
قال لي اها؟ خجلتا ونزلتا راسي قلت ليهو كلامك صاح ، بقى بضحك ويضحك وختى يدو في رجله وهو بضحك ، جات فاطمة بالموية قالت ليهو ضحكوني معاكم شوية ، قال ليها اشرب اول ، وشرب وقام على حيلو قال ليها الاقيك بكرة هسي عندي جلسة مع الشباب يا فطيم .. بالمناسبة صحبتك دي سودانية بالاسم بس لكن دايرة دراسة عديييل ، قلت ليهو قصدك شنو ؟ قالت لي قاصد انك مابتفهمي اي شي في السودان ، قال ليها ماتترجمي ليها هي بتفهم كويس انتي شغالة ليهو مترجمة مالك ؟ بعدين طرحتك دي ماشايفاها ! طوالي فاطمة عدلت طرحتها .. و غطت رقبتها ، حسيت بيهو اتغير و ملامحه اتقلبت وهو بحذر فيها لمن هي قالت ليهو معليش والله ماشفتها ..
مد يدو وقال لي فرصة جميلة يا سيلا ، وقفت على حيلي وانا بسلم عليهو قلت ليهو المرة الجاية لمن تغني لحسين ناديني انا وفاطمة نحضر المرة الفاتت سمعت صوتك وانت بصراحة صوتك فنان ، قال لي بتحبي حسين ؟ قلت ليهو بحب مصطفانا ، قال لي لا انا كدة اتاكدتا انك سودانية ، خجلتا وانا بعاين للشجرة عشان الخم روحي قال لي ماتخجلي المرة الجاية بجي اسوقك احضرك عديل القعدة من بعيد عشان نحنا بنكون شباب بس و على فكرة انا موجود لو عندك اي سؤال واستفسار عن البلد وحابة تعرفيها تعالي طوالي حبابك الف نحنا في الخدمة يا سيلا ..
و مشى محمد للأسف ، قعدتا رغم اني اتمنيت انه يقعد مع حديثه الممتع دة ، فاطمة قالت لي طيب انتي لو سمعتي صوته في الترتيل كان قلتي شنو ، قلت ليها انتو عندكم تراتيل زينا؟
قالت لي اخ نسيت ، وضربت جبهتها تاني وطنطنت بتحت البت دي حتجلطني قبل يومي .. قلت ليها فاطمة انا سامعااااك ...

#متابعة_بروفايلي_اسمه_سندس_مالك
للناس البسألوا في الإنبوكس
اسمه ( سندس مالك )

#سيلا٦
طلعت من شنطتها مصحف صغير و قالت لي دة المصحف و الزول البقراهو بي صوت حلو وبطريقة صاح اسمه بيرتل الآيات او بجودها ، يعني ما عارفة افهمك كيف ، قاطعتها وقلت ليها يعني زي تلحين الاغاني؟ قالت لي لا استغفر الله دة قرآن كريم ماتقولي كدة ، انتي ماحتفهمي اساسا عشان كدة ماتسأليني ، معليش لكن مابقدر اشرح اكتر ، قلت ليها فاطمة مامشكلة ماتستائي وأنا اسفة اذا ضايقتك بالسؤال انا بعرف القرآن وبعرف المصلاية برضو و إزدال الصلاة حقكم .. دي كلها حاجات نور وفي شقتنا قاعدة بس ماحصل سمعت نور بترتل ! ماعارفة اذا في مواعيد للتراتيل برضو او ماعندكم وقت محدد ؟ غايتو انا ماحصل سمعت الشرحتي لي انتي هسي دة ، قالت لي قومي طيب دة ما موضوعنا ارح المحاضرة حتفوتنا ، ونحنا ماشيين سألتها محمد بيحبك ؟ قعدت تضحك لمن مسكت ركبتها قالت لي ( نعلك قاصدة الحب الواحد دة ) قلت ليها نعلك؟
قالت لي يعني قصدك حبيبي؟ قلت ليها ايوة قالت لي يابت دة اخوووي عديييل ورابطنا دم ، مافي حب ولا كدة ماشايفاهو بعاملني زي اخته الصغيرة ، قلت ليها عشان كدة بدلعك بالزهراء؟
قالت لا دة ما دلع ، اي بت اسمها فاكمة ممكن تجملي اسمها بالزهراء كانك اكرمتيها ، ليه زهراء باذات .. قالت لي عشان السيدة فاطمة اسمها فاطمة الزهراء ، قلت ليها ماعرفتها دي منو ؟
قالت لي دي بنت النبي محمد ، قلت ليها ايوااا فهمتا .. سألتها طيب ليه قال لي صلحي طرحتك بغيرة كدة ، قالت لي لأني عرضه ومن اهله و بالمناسبة الراجل المحترم ممكن يقول لي اي بت بتهمه تحتشم و تتلمى من باب الغيرة ما الغيرة الفي مخك دة ، قلت ليها فهمتك خلاص .. قالت لي بعدين محمد اساسا خاطب بت جيرانهم هناك في شندي لكن لسه ماحددو العرس ، لمن قالت لي خاطب حسيت بي شعور مامفهوم لكن ممكن اوصفه انه شعور حسد و يأس ! قلت ليها خاطب كمان وهو صغير كدة قالت لي يازولة في ناس اصغر منو ومعرسين وعندهم عيال انتي بس عشان ماشفتي شندي وناسنا قلت ليها ممكن اشوفها ماعندي مشكلة ، قالت لي اجي ؟ كيف يعني تشوفيها اهلك بخلوك؟ قلت ليها اهلي منو؟ قالت لي اهل امك ، قلت ليها يابت انا ايرلندية يعني مافي زول بقدر يسألني جاية وماشة وين ! قالت لي ايوااا ، قلت ليها الا اذا ناس شندي هم الما حيخلوني ادخلها ، قالت لي يابت انتي قايلة شندي دي نهاية الشارع ؟ دي سفر و حتة تانية هي جميلة شديد بس ما ممكن تقعدي في الشارع طبعا .. قلت ليها كلامك صح ، كنا خلاص وصلنا الباب ودخلنا القاعة ..
...
مرو اسبوعين وكنا خلاص شبه اتعودنا على الجامعه بفضل فاطمة البتعرف اي ركن فيها ، لكن ما قدرت اشوف محمد تاني ولا جا ساقني زي ماوعدني، يمكن يكون مشغول او مافاضي لي او ما مهتم اساسا يعرفني زي ما انا مهتمة اعرفه بشدة كدة ، قفلنا شهر في الجامعه ومالاقيت محمد تاني ، يوم الأحد وانا طالعة من الكنيسة كنت واقفة مع اديل برة ، بالصدفة لمحت محمد واقف في مكان رصيد بنزل في كرت ، قلت لي اديل ارح بسرعة قالت لي مالك فجأة !
قلت ليها ارح بس عايزة اوريك حاجة هناك ، اصريت اسوقها ونقطع الظلط سريع ومشينا بسرعة لحدي ماقربنا لمحمد وقفنا جنبه عند زول ببيع منقة بالشطة قلت ليها بصوت يا أديل نجرب الحاجة دي فيها شطة اسبايسي يعني ، هي بتعاين لي مافاهمة انا مالي وحالتي دي شنو ! وليه بعلي في صوتي ..
وللأسف محاولتي فشلت ومحمد ما اتلفت حتى ، لمن خلص من كرتو ناديت ليهو هييي محمد ؟؟ اتلفت علي ولمن شافني كان بحاول يتذكر في اسمي قلت ليهو سيلا ، قال لي معليش وابتسم عاين لي اديل وقال ليها مرحبا و هي سلمت عليهو ، قال لي سودانية؟ قلت ليهو لالا عراقية ، ابتسم ليها برضو .. قال لي بتعمله هنا في شنو في الحر دة قلت ليهو الصلاة ، اتلفت لي ضهرو للكنيسة قال لي اهااا ..
انا ماسألتك انتي تبع اي طائفة؟ قلت ليهو كاثلوكية ، قال لي كويس و كان ظاهر انه زهجان او شايل هم حاجة قلت ليهو خير بس مايكون في مشكلة ! قال لي خير خير مافي مشكلة ، أديل قالت لي اتاخرنا قلت لي اصبري ياخ ، شافنا بنتوشوش قال لينا انتو راجعين بيتكم؟ قلت ليهو ايوة قال لي اذا مافي مانع ممكن اوصلكم عشان الحر شكله مابنفع معاكم !
أديل نطت وقالت ليهو ياريييت لأني سحتااا عدييييل في الشمس دي عربيتك وين قال ليها هدي ، جرت طوالي بدون ماتتفاهم معاي ، قال لي اتفضلي ، مشيت وقلت اديل دي انا بوري ليها في البيت ، ولقيتها ركبت ورا كانه هو بتاع ترحال! انا قعدتا قدام عشان هو مايتحسس ، جا ركب و دور عربيته ، وسألنا من موقع بيتنا وين ووصفنا ليهو بس ماعرف وصفنا قال لي لو عندك لوكيشن رسلي لي احسن قلت ليهو طيب ، قال لي اكتبي الرقم وبعد انتهيت لقيت اديل بتعاين لي بالمراية طوالي حمرتا ليها ، رسلته ليهو في تلفونه واول ماجا يفتح الرسايل قاطعته مكالمة من خطيبته وكان مسجلها نونا ، رد عليها ننويا صباح النور يا نوامة صوتها طالع من التلفون وظاهر انها مدلعة او بتدلع بزيادة لانه حسها كان رقيق شديد ، المهم اني اساسا مابحب طريقة

الكلام دي لكن ماعارفة انا متضايقة عشان هي مدلعة و لا عشان هي خطيبته ..

#سيلا٧
نزلنا البيت وكنت حاسة بي ضيق ، و زادتها عليها اديل بي اسألتها دة منو ؟ واستعجلتينا كدة ليه عشان تسلمي عليهو ؟ و انتي مالك زهجتي لمن رد على تلفونو ؟ قلت ليها اديل ما تتكلمي معاي كتير دة اخو صحبتنا في الجامعه ، ما زهجتا لكن الدنيا كانت حر وزهجتا من الحر بس ..
قالت لي طيب تمام و مشتني على كدة ، لكن انا كنت زهجانة فعلا وتميت يومي زهجانة ، متأكدة اني من هسي شميت نونا قبل ما اشوفها حتى ..
مشيت الجامعه الساعة ١٢ كدة بعد المحاضرة التانية شلت تلفوني ومشيت بعيد من بنات القاعة شوية ، ضربتا لي محمد ما ردا علي ، ضربتا تاني وبرضو ماردا ، رسلت ليهو ( شكلي ازعجتك عموما بس كنت عايزة اقول ليك انه لو بتقدر تجي جنب كليتنا و تقعد معانا شوية لانه استمتعتا بي كلامك عن السودان )
رسلت الرسالة وحسيت اني غبيييية ودة شنو البعمل فيهو دة ، زهجتا من روحي وحسيت انه حيشوفني بت مراهقة عمرها ١٨ سنة ، ندمتا على رسالتي شديد بعد رسلتها فقمتا رسلتا ليهو تاني وحدة ( محمد انا شكلي ازعجتك فأنا أسفة ، و ما تشتغل بي كلامي ) رسلتها وتاني حسيت بي روحي عبيطة وخفيفة و بتراشق لولد الناس .. بعد شوية ضرب لي تلفون عديل ، اتوترتا قبل ما ارد لكن رديت فقال لي مرحبا سيلا ، قلت ليهو اهلا محمد ، قال لي ماشفتا مكالمتك الا بعد رسايلك فأنا بعتذر ، قلت ليهو ما مشكلة أنا شكلي ازعجتك اساسا ، قال لي ماتقولي كدة ياخ انتي ضيفة الايام الأولى دي ضيفة في بلدك وضيفة جامعتك برضو لحدي ما تتدردحي بعد كدة ممكن نفكك عادي ، قلت ليهو محمد معليش بس انا مافاهمة كلامك دة يعني شنو وانت بتتكلم سريع ، بقى بضحك وسألني انتي قاعدة وين ؟
( ما كنت عايزة اقعد معاهو مع فاطمة فقمتا زغتا شوووية منها و مشيت قدام وقلت ليهو واقفة جنب بتاع الذرة حق المرة الفاتت داك ! قال لي طيب عرفت مكانك )
انتظرته لحدي ما وصل و سلم علي وابتسم وقال لي وينها فاطمة ؟ ليه واقفة براك ؟ قلت ليهو هي مع بنات الدفعه وانا زهجتا من الوقفه هناك ، قال لي طيب و صحبتك التانية؟ قلت ليهو كارولين! مابلاقيها كتير في الجامعه مرات بتكون مشغولة بي ناس دفعتها وانا ما بحب ازعجها ، انا لو ازعجتك فانا اسفة ، قال لي انتي بتحبي تتأسفي كتير ؟ ولا حساسة زيادة عن اللزوم ! قلت ليهو لا بس مابحب اتقل على زول ، قال لي انسي هسي و احكي لي عن حياتك هناك شوية و ايرلندا بلد جميلة ؟ و عجبك السودان اكتر ولا هناك ؟
ونحنا بنتمشى في الجامعه قلت ليهو ايرلندا أسمح بلد ممكن تلاقيك في الدول ، لكن السودان فيهو راحة نفسية غريبة ، انا سافرتا مع ماما كتير بس سفرتي للسودان كانت غير كل ديل ، قال لي وانا سافرتا كتير برة السودان و جوة السودان و في حاجة غريبة بحسها لمن اطلع من البلد دي ! بحس انه نفسي اتقطع عديل وانه ما في راحة غير هنا ، مهما الناس يشكو ليك من البلد و من ظروفها انا متاكد انك لمن تطلعي من هنا وتسافري بررة حتشوفي بلدك أحن مكان نفسك ترجعي ليهو ، قلت ليهو بتحب السودان للدرجة دي؟ قال لي البلد دي حبيبتي الأولى والأخيرة .. قلت ليهو والبخليك تعشقها كدة شنو وليه بقيت الشباب مازيك ؟
قال لي انتي لاقيتي اقلية بس من الناس النافريين من البلد ، لكن في شباب زيي و شباب كتااار واحسن مني كمان ، في ناس كتار بقدمو للبلد دي ارواحهم و اموالهم و مجهودتاهم في سبيل انها تتقدم وتتطور وتنافس إيرلندا و عاين لي قمتا ابتسمتا ليهو ، قلت ليهو برضو ما جاوبتني البخليك تعشقها شنو ؟
قال لي اقعدي و قعدنا في مصطبة على الأرض ، قال لي شوفي يا سيلا انتي لو ماشفتي السودان وأرضه وناسه الأصليين ما حتحبيهوو عمرك ، لازم تشوفي النيل وشارعه و تشوفي الولايات الفيهو وتتعرفي على العادات والتقاليد الفيهو و تتعرفي على القبائل واللغات والحضارات الفيهو و تزوري المتحف القومي و تمشي الدندر ، قلت ليهو وانا متحمسة ماعندي مشكلة اني امشي واشوف قال لي بضحكة تمشي مع منو ! قلت ليهو اي زول ما مشكلة و طوالي استعجلتا قلت ليهو انت ، انا عايزة امشي معاك انت لانك بتعرف اي شيء وحتكون دليلي قال لي سيلا اصبري شوية افهمك حاجة ، عندك اصحاب مسلمين غير فطوم؟ قلت ليهو ايوة ، قال لي في الاسلام عندنا حرام تسافري مع راجل ما محرم ، قلت ليهو دة للبنات ! طيب والاولاد ؟ قال لي نفس الشيء نحنا برضو عندنا ممنوع ، قلت ليهو يعني ما حتسافر معاي و سكتا ورجعتا ورا البنش وقلت ليهو عادي ممكن تعتبرني اختك الصغيرة زي فطومة و تسوقني معاك ما محتاج لزول تالت يعني شنو بس ، يعني انا ما اشوف السودان و لا احوم فيهو بسبب اني بنت ، وعندكم حرام تحومو معاي ، قال لي يا بت براحة مالك بتتكلمي سريع بعدين انتي اصبري لي اتم ليك كلامي ، اي صاح انا وانتي ما ممكن نسافر برانا واوريك البلد لكن انا شغال مع منظمة بس ما بطلع معاهم سفريات لكن وعد مني ادخلك مع المنظمة دي لغتك ممتازة و حأخليهم يسوقوك معاهم كل ما يطلعو سفرية و يوروك الاماكن والحضارات والأكل و اي شيء و القبائل و اي

شيء عشان ترجعي بلدك وانتي كوكب معرفة ، قلت ليهو وانت حتطلع معاي؟
عاين لي برفعة و دهشة ، قلت ليهو بس عشان انا بعرفك وبثق فيك من فاطمة اي انا ممكن اسافر براي عندي الحرية دي لكن مرات بخاف من الغرباء ومابتعود على الناس سريع قال لي بس اتعودتي علي ؟
قلت ليهو ما انت بتبقى لفاطمة وفاطمة بت طيبة و عشان كدة انا وثقت فيك ، قال لي طيب ما مشكلة على حسب ظروفي لكن اذا بتسمح لي اسافر فحسافر و اذا ما سمحت فحتسافري معاهم براك اتفقنا؟
لانها فرصة ما بتتعوض بالنسبة ليك تمام ؟
ما حتلقي ناس بلفوا و بسافرو كتير كدة بالساهل الا يكونو منظمة بس ، قلت ليهو موافقة حتكلمهم متين؟ ..

#متابعة

#سيلا٨
قال لي خليني أول أتكلم معاهم وأشوفهم حيطلعوا تاني متين و لي وين ، شال تلفونو وضرب لي واحد من اعضاء المنظمة اسمه جون من اصول افريقية نيجيرية وإتكلم معاهو إنجليزي بطلاااقة ما اتخيلتا محمد ممكن تكون لغته كدة ، والغريبة انه ما بتباهى بيها قدام الناس ولا حصل اتكلم في قعدة كلمة بالانجيلزي عشان يوري الناس لغته ! فإستغربتا لمن شفتو بتكلم بالطلاقة دي كلها و قلت ليهو من متين بتتكلم انجليزي كدة ؟ قال لي من الثانوي قلت ليهو يعني انت قريت مدارس اجنبية ؟ قال لي لا اتعلمته من كورسات و افلام واغاني براي ، اكتسبته براي واللغة البتكتسبيها براك بتعيش معاك للأبد ، قلت ليهو اهااا تمام كويس ..
ابتسم شوية وقال لي على فكرة جون انه نحنا عندنا طلعة قريبة بعد اسبوعين ، لمدة اسبوعين برضو ماعارف انتي جامعتك حتكون كيف معاك؟ قلت ليهو الايام دي مافي محاضرات منتظمة وبقيت المحاضرات الجادة ممكن اخلي فاطمة تدندس لي بالسر ، قعد يضحك وقال لي ياخ انتي بقوك سوداااانية عدييييل كدة ، قلت ليهو ما أنا اصلا كدة ، قال لي بالمناسبة كنت عايز اسالك انتي ليه ما فكرتي تشوفي بلدك واصولك ؟ قلت ليهو لاني مابعرف هم وين ! كل البعرفهو انهم من ديار الشايقية لكن مابعرف مقرهم او اسمائهم او هم هسي حيين او ميتين ، قال لي طيب انا حاخليك تشوفي اهل ابوك لكن ما هسي ، لانه الرحلة دي حتكون لمكان جمييييل جدا اسمه جبل مرة ، قلت ليهو جبل مرة؟ كيف يعني مرة ؟ قال لي ما مُر من مرار ، مرة اسمه كدة مرة .. المهم الخميس الجاي الناس بتقوم ، انتي لازم تجهزي امورك و انا برتب معاهم عشان يحجزو ليك تمام ؟ قلت ليهو شكرا محمد و ابتسمتا ليهو ابتسامة عريييضة كان بيستحقها لأنه اداني من وقته ومجهودو وماله ، ولمن حاولتا اقول ليهو طيب القروش كم ؟ وحنسافر بشنو ؟ وقفني وقال لي يابت نحنا رجال دار جعل قروش شنو البتسألي منها ؟ اللحظة دي حسيت انه ديل السودانيين الكرماء البتكلمه عنهم ابوي ، ممكن واحد غريب يدفع ليك من ماله الخاص بدون ما يهتم لي قروشه اذا نقصت او لا ..
..
رجعتا البيت وكلمتا كارولين واديل ونور اني حاسافر ، شجعوني اكتر للسفر عشان انا الوحيدة الما بعرف السودان وكانوا عارفين قدر شنو انا مهتمة اعرفه واشوفه و اتعرف على حضاراته ..
فقلت ليهم انه الرحلة لجبل مرة ،، قالوا لي انها منطقة جميييلة شدييد و بدوا يعزلوا معاي البنطالين والتشيرتات الممكن البسها و نور ادتني طاقية السعف زي مابسموها ! عشان الشمس ، و قالت لي استعين بالإسبورتات في المشية دي لانها مريحة ومناسبة للحوامة ، جهزتا شنطتي كويس ورتبتها و الخميس لاقيت محمد جنب بيتنا جا ساقني هو و فاطمة ، وصيت فاطمة على المحاضرات المهمة تسجلها لي عشان ما افوتها .. وهي وصتني بالصور والفيديوهات المدعمة ، وقالت لي استمتعي لأنك ماكان حتلقي الفرصة دي لولا محمد ..
قلت ليها محمد ماقصر معاي أبدا ( حماه الرب) ، عاينت لي وابتسمت وسكتت ما قالت لي شيء ، ركبتا معاهو قدام ومشينا للمطار السفرة كانت بالطيارة ، في صالو المغادرة اتعرفت على اعضاء المنظمة ( جون ، كريستين ، عصام ، مهجة ، نادرين ، ذو الفقار ، ابراهيم ) سلمتا عليهم وبدا محمد يعرفني عليهم بطريقة ظريفة ( شباب سيلا دي عايزين نوريها السودان شبر شبر ، لانها جاية ماناقشة شيء وحابة تتعرف على بلدها نساعدها ولا نقول لا ؟
مدا لي ابراهيم يدو وقال لي اتشرفنا سيلا وحبابك الف في بلدك ، قلت ليهو شكرا ليك ، قال لي سيلا من وين اصلا ؟
محمد قال ليهو كيف من وين ؟
ابراهيم انت نايم لسه ولا شنو ؟ اقول ليك عايزين نعرفها على بلدها ، من السودان يا حبيب ..
نطط عيونو كبااار وقال ليهو محمد يعني ابوها هو السوداني؟ قال ليهو ايوة و شايقية كمان !
ابراهيم زي اللسانو اتربط بقى بتمتم ، وانبهرت اكتر منو كريستين قالت لي شمالية ؟
محمد قال لي كريستين من جنوب السودان هسي طبعا بقت هي بتجينا بالطيارة وباعتبارها قاعدة في دولة قايمة بذاتها ، قلت ليها اتشرفتا كريستين ، وعاينتا لي ابراهيم و لكريستين فقلت ليهم ايوة انا سودانية عن اب وامي ايرلندية و ديانتي مسيحية تابعة للطائفة الكاثلوكية ، كريستين قالت لي كاثلوكية ؟ وانبسطت قالت لي نزور الكنيسة سوا يوم الاحد ! قلت ليها طوالي في المكان الاحنا ماشين ليهو ؟ قامت ضحكت وقالت لي لمن نرجع هسي نحنا ماشين لشغل وبعدين حتعرفي المكان دة على اصوله هناك ، قلت ليها كيف ؟
محمد قاطعنا وقال لينا يلا ياشباب ما نتاخر كل زول تذكرته في يدو ؟
وبدا ينده و يدي الناس تذاكرهم ، و بعدها ركبنا الطيارة و وصلنا جبل مرة ..
..
منطقة اسمها نيرتتي ، وصلنا هناك ونزلنا عند أسرة في حي اسمه حي العمدة ..

ادونا غرفة للبنات وغرفة للأولاد ، كنت متخيلة ننزل في فندق بس محمد هو القرر ينزلوا عند الأسرة دي و كانوا مبسوطين جدا بي استقبالنا ،
كنت منبهرة من جمال الطبيعة و الخضرة و الشلالات و نحنا ماريين بالطريق كيف في جمال زي دة في السودان ؟ دي جنة عدييل ؟ كيف في مكان جميل كدة و مافي ناس بزوروهو ؟ وليه المكان دة ما سياحي ولا مُستفاد منه بقدر جماله ؟ كان عندي اسئلة كتيرة في راسي وتقريبا زي محمد قرا كلامي وهو جوووة راسي ، وهم بتكلموا مع اسرة الشيخ النزلنا عندو ، محمد جا قعد جنبي في الكرسي وقال لي حتعرفي اي حاجة بس نتغدا وحاوديك مشوار ..
..
انبسطتا شديد وانتظرتا الغدا بفارق الصبر في مكان النسوان زي ما بسموهو ، بس لمن ختوا الصينية ماقدرت اكل لاني شفتا الاكل غريب و معمول بطريقة غريبة ، رغم انه الشيخ كان ضابح ليهم خروف اكرامية ليهم لكن انا ماقدرت اكل لسه فقلت لزوجة الشيخ معليش انا ما حاقدر اكل ، بعد كلهم قعدوا في الصينية ..
بقت بتقول لي انهم جهزوا الغدا مخصوص لينا .. فكنت بحاول اشرح ليها وهي ما كانت فاهماني و كانت مهجة بتضحك هي وكريستين بي تحت فيني ، عاينتا ليهم فقامت كريستين اتكلمت مع المرة و فهمتها انها تجيب لي عيشة واحدة تفتحها وتخت فيها خضار بس مقطعه تقطيع شرائح ، المرة جابت لي السندوتش اكلتو و شربتا موية صحة زي ما بسموها ..
..
بعد الغداء لاقيت محمد في الشارع ، قلت ليهو مش حتوديني المشوار خلاص؟
قال لي يابت انتي مابتصبري مالك ؟
حاوديك هسي بس اول اتغديتي قلت ليهو ايوة ، قال لي مع النسوان ؟ قلت ليهو لا .. قال لي عرفتك وابتسم ..
وبدينا نتمشى قال لي حتتعودي شوية شوية وحتاكلي تاني براك بدون عزومة ، قمتا جريت قدامه شوية و بديت اظهر على وشي الحقيقي او الطفولي زي ما بقول محمد ..
جريت جرية شافعه فرحاانة برحلة و خليتو وراي ، بقيت اكورك انا جيت السوداااان يابابااا ، يا بابا انا في جبل مُرة ، هو كان واقف بعاين لي وبضحك يابت اسمه مررررة مرررة ، كدي انطقي صاح اول ، وجا وقف جنبي وقال لي .. ( سيلا دارفور الاحنا فيها دي من اكبر اقاليم السودان من مساحة وسكان يعني انتي عارفة مساحتها زي مساحة دولة فرنسا !
قلت ليهو واااااو ، معقول ؟
قال لي شفتي فرنسا ؟
قلت ليهو طبعا .. قال لي بس نفس مساحتها تقريبا ..
والمنطقة النحنا فيها دي جبل مرة ، مناخها بإعتباره مناخ البحر المتوسط ..
قلت ليهو محمد انت متأكد؟
قال لي اذا شكيتي في اي حاجة تاني انا ما حاشرح ليك، قلت ليهو محمد خلاص مابتكلم تاني وعد ..
قال لي نحنا هسي في نيرتتي وهي اكبر مدن الجبل نحنا هسي في الغرب ، غرب الجبل
قات ليهو يعني شنو نيرتتي؟
قال لي كلمة فورية ، ناس الفور بقولوها للقطعة او القماش النظيف المغسول ..
و لانها منطقة نضييييفة وهواها نضيف زي ما شايفاها فبعتبروها بتشبه القطعة النضيفة ..
فيها احياء كتيرة حي العمدة النحنا فيهو وحي الاستراحة وحي رجال بنو ، و حي قارسيلا .. واحياء تانية ..
و في سوق كبير هنا اسمه سوق نيرتتي الكبير ( زمان كان اسمه جبرونا )
قلت ليهو من الجبرهم ؟
محمد بقى بضحك لمن عينو الشمال دمعت ، قال لي انتي عسل والله ..

#سيلا٩
كملنا مشينا أنا ومحمد ، قال لي بتحبي الفواكه صح؟ قلت ليهو ايوة بحبها شديييد ، قال لي واللحوم قلت ليهو يعني ماكتير و برتاح منها لمن يكون في صيام لانه ماما بتحبها و بتقول لي لازم تاكلي معاي وتجامليني ، قال لي شكلو ابوك علمها الشية و ام فتفت ، هزيت بي راسي !
قال لي أم فتفت دي ( أم لاطفال اتقطعوا زمان و اكلوهم الناس لانهم كانوا صغار شديد قطعوهم و اكلوهم فبقت كل ما تكون في لحمة مقطعه صغيرة بقولو ليها ام فتفت ، كنت فاتحة خشمي ومامصدقه البسمعو قلت ليهو محمد جدجد بتتكلم؟ قال لي حتى لو سألتي ابراهيم حيوريك و هو كان جاي علينا ابراهيم ، قلت ليهو ابراهيم صحي ام فتفت دي ام اطفالها اتفتفتو ؟ ابراهيم قال لي نعم و هو بضحك عيدي الجملة تاني؟
قلت ليهو تفتفتو ؟
قال لي أجل هذا صحيح ، إنها أم كانت جعانه فقامت بفتفتت ابنائها الصغار الى فتافيت صغيرة و اكلتهم ..
لقيتهم الاتنين جاديين وهم بتكلموا ، قلت ليهو محمد ؟ قال لي مالك انتي ؟
قلت ليهو خايفة اقول ليك مامصدقاك تقولي لي ارجعي وانا تاني مابفسحك لكن انا مامصدقاك ، ابراهيم قال ليهو والله البت دي عسل و بريئة عديييل .. انتي ليه كريستين دي ما بتشبهك ؟ وكانت جاية علينا كريستين قالت ليهو ابرهيم قول كلامك دة تاني ؟ قال ليها والله بهظر بهظر ، قلت ليهو خفتا منها مالك ، قال لي نان ما شايفة عود الشجرة دة ، قالت ليهو ابراهيم عيد كلامك دة تاني يازول ! قام وقف ورا محمد قال ليهو الحق اخوك ياصحبي ، محمد قال ليها كريستين الزول دة بهظر ياخ ، هسي هو لاقي طولك دة وين؟ ماشايفة قصرو دة؟
كان لقى طولك كان افترا في الناس افترا ، ابراهيم قال ليهو والله كان افتريت في ابتسام الفي جامعة الرباط شايفة روحها علي شوفة ، قال ليهو محمد انت يا ابراهيم منو الماشايفة روحها عليك ! قال ليهو كلهن جت عليهن .. جت عليهن ..
انا بقيت بضحك في طريقة كلام ابراهيم ، قال لي مالك
قلت ليهو كلامك حلو بس ، قام صلح قميصو قال لي عليك النبي ! ماعرفتا ارد ليهو شنو ؟ محمد كان بعاين لي و انا عاينتا ليهو مافاهمة ارد ليهو بشنو هسي؟
.. محمد قال ليهو ( عليه الصلاة و السلام ) قام ابراهيم رد ليهو ( صلى الله عليه وسلم ) ..
انا ضحكتا عشان ابراهيم قال الجملة بطريقة مفرحة ، كنت فاكراهو بتريق لكن هو قالها بطريقة مبسوط بيها ، اما محمد فافتكر اني بستهزاء بالجملة فقام عاين لي بعين قوية كدة وقال لي بنهرة بتضحكي في شنو ؟
من عين محمد انا قربتا ابكي و طريقة نهرتو لي ، لكن مسكتا روحي عشان ما اتحرج وقلت ليهو ما قصدتا شيء ، قام قال لي ابراهيم مشينا! و اتقدمونا انا وكريستين ، ماعارفة محمد زعل مني ليه؟ انا ماقصدتا استهزء بنبيهم و لا ضحكتا عشان قال الجملة حقتو دي ، لكن البفهم محمد كدة شنو؟
حسيت بيهو زعل مني ، قامت كريستين مسكتني من ساعدي وقالت لي يابت دة دين محمد ، محمد مابرضى في دينه ابداً ولا بهظر ، اياك تاني تضحكي اذا قالوا اي شيء بخص ديانتهم سامعه؟
استغربتا من كريستين كيف بتخاف من محمد كدة وهو لطيف ؟ اذن محمد فعلا مابقبل النقاش في دينهم ؟
فعلا هو بشبه نور صحبتي في الحتة دي ، بحترموا الاديان و مابقبلوا برضو
انه زول يهظر معاهم في دينهم او مايحترمه ، اتقدمتا كريستين و مشينا لاتجاهم وفي اول فرسة وقفتا جنب محمد و قلت ليهو بصوت واطي ، محمد انا اسفة ، عاين لي بقعر عينه وسكت ، قلت ليهو انا ماقصدتا استهتر بي كلامكم وكنت قايله ابراهيم كدة و كلامه مضحك !
قال لي كلامه مضحك؟
قلت ليهو لا ما قصدي ( صلى الله عليه وسلم )
عاين لي لمن نطقتها سريع ، قلت ليهو قصدتا ليك هو طريقة كلامه ضحكتني لكن انا ماقصدي اهين ليك دينك او استهزء برسولك ..
قال لي تمام ،
برضو ما عاين لي ، قلت ليهو قبل ما ارجع لكريستين ( انا عارفة يعني شنو محمد و عارفة بيعني ليكم شنو و انكم بتحبوهو قدر شنو فأنا ما ممكن اهين ليك زول بتحبه خصوصا اذا كان محمد )
تلفونو ضرب وانا بتكلم و كانت خطيبته نونا ، عاين لي قال لي صلى الله عليه وسلم ، ومشى خلاني عشان يتكلم مع خطيبته ..
انا خلاص زهجتا هنا ومشيت لكريستين قلت ليها ارح نرجع البيت النزلنا فيهو دة ، رجعتني و لحدي ما نمتا والصباح صحيت برضو زهجانة ..
جاتني مرة الشيخ ، لقتني لابسة بنطلوني زاتو وقاعدة بيهو من الصباح برة في الحوش الكبييير الواسع ، بعاين للشتول المزروعة ، جابت لي الشاي بنفسها وختتو جنبي و قعدت معاي في البنبر الجنب حقي .. قالت لي اشربي الشاي ، قلت ليها مابحب الحليب قالت لي ليه ؟ قلت ليها ما بحب الالبان وكدة ، قالت لي لسة الصيام لكن ؟ قلت ليها لا انا قصدي انا زاتي ما بحب اللحوم ، قالت لي بتشربي شنو الصباح قلت ليها بشرب لاتيه ، عاينت لي باستغراب ؟

قلت ليها او قهوة ، قالت لي طيب ، نادت البت الصغيرة وقالت ليها جيبي الكانون و الفحم وتعالي ولعي نعمل ليها قهوة بمزاااج عشان صداعها يروح ، قلت ليها لا ياخالتو شكرا لكن انا مادايرة حاجة قالت لي اقعدي يابتي قومي يا بت اجري ، قالت لي انتي مصدعة عشان الحمام ؟
قلت ليها قصدك عشان هدومي؟ قالت لي لو عايزة تستحمي من الصباح ندفي ليك الموية ؟ قلت ليها ايوة اذا استحميت حأرتاح شوية قالت لي طيب قولي كدة من الصباح بدل قاعدة في الحوش هنا و خاته يدك في راسك .. قامت جابت حلة كبيرة وختتها في كانون اكبر و سخنت الموية و كبتها في الجردل و قالت لي امشي استحمي ، عاينت للجردل شفتو كبير بس اتحرجتا اقول ليها مابقدر ، قلت ليها طيب بشيلوا ، انا واقفه و هي واقفه منتظراني ، قالت لي تقيل ؟ ضحكتا وقلت ليها مابقدر اشيلو براي ، نادت لي بتها تاني تعالي ياحنان شيلي ما اختك دي ، حنان كانت بت صغيرة لطييفة تقريبا في سنة سادسة اساس ، لكن بنيتها وقوتها الجسمانية احسن مني بكتييير ، الظاهر
انه حنان كانت معجبه بي لانها بتتبسم لي كل شوية ، فوصلتني الحمام ودخلت لي الجردل ولمن جات ماشة قلت ليها شكرا ، خجلت لي ومشت .. الحاجة المستغرباها ليه هم بلبسوا طرح في البيت و بغطوا شعرهم ؟ وحنان صغيرة لكن بتلبس الطرحة برضو؟
..
استحميت وقبل ما اطلع سمعت امها بتقول لي ختيت ليك جلباب برة يا نصرانية ، ضحكت جوة الحمام لمن قالت كدة ذكرتني ايرلندا والمسلمين الهناك ( سيلا النصرانية ) فتحت الباب بسييط وجريت الجلباب دة ولبستو ، كان اطول مني بكتير لمن طلعت بره وهي عاينت لي قالت ( هيي لا البت قصارية )
وكانت حنان بتضحك فيني برضو ، قلت ليها الجلباب دة طويل قالت لي اقيفي هنا النجيب ليك من حنان ، ومشت تجيب لي من حنان ، ناديت حنان براحة وسالتها جلباب دة يعني فستان ؟
قالت لي قميص بيت ، ما فستان وهنا جات امها ، رجعتا غيرتا بي حق حنان و كان اقصر مني بشووية لمن طلعت ليهم تاني قالت لي امها لازمك توب عشان ما تتكشفي قدام الرجال ، رغم انه المرة نست اني ما بتحجب الا انها جابت لي التوب عشان انستر زي ماقالت ، و انا كنت جايبة شنطة ملانة هدوم لكن من لطافة المرة وبتها خليت هدومي ولبستا منهم ، لبستني التوب وختتو لي في راسي و قالت لي جميلة انتي ، الله يحفظك يابتي ..
ابتسمتا ليها وسكتا ، كريستين جات حايمة بكباية االشاي حقتها قالت لي سيلا واااو جميلة جدا ، قلت ليها ثانكس ..
..
ماكنت عارفة امشي كيف بالتوب فبقيت ماشة براحة براااحة زي البحبى ، و المرة شغالة لي الجبنة نسيناها ، كريستين بتضحك في مشيتي البطالة وحنان بتعاين لي باعجاب شديد .. قعدنا المرة دي تحت الشجرة و االبنابر و كانت في بت تانية بتقلي في البن زي مابسموهو ، اول مرة كان اشم فيها ريحة البن و اعرف كيف بقلوهو و بحضرو القهوة بطقوس كيف ، قالت لي دي قلية الصباح لكن القهوة العصرية ما زي دي ، قلت ليها يعني اساسا بتشربوها بعدين ؟
قالت لي ايوة ، قلت ليها طيب كان شربتا معاكم قالت لي بعدين اشربي تاااني مالك ، البت بتقلي في البن والريحة بتطلع رهيييبة و مريحة و فعلا قدرت تغير مزاجي زي مابقولو ، عدالة المزاج و قدرت ترد روحي تاني ، لحدي ما عملت لينا الجبنة وكبت بخور جوالي ، سالتها عن اسمه وقالت لي جاولي ، قلت ليها ريحته حلوة فقالت لي عشان عندك صداع لازمك بخور ..
ما عرفتا العلاقة شنو ، المهم كنت معجبه بي توبي دة واشيل واصلح فيهو فوق راسي و ارتب في شعري و بقيت بشبه السودانيات الكنت بشوف صورهم في الانترنت ، دة غير شبشب البيت اللبسوني ليهو و اصلح في قعدتي كأني مرة مرة ، خالتو بعد ناولتني الفنجان ادتني مسحة من الصندليه قالت لي هي ما للبنات لكن عشان انتي كنتي زهجانة ..
اي حاجة كانت بتعمل فيها الخالة دي حقيقة كانت بتغير في مودي جد جد فماعارفة هل دي خرافات ولا حقايق مرتبطة ببعضها ؟
كريستين قالت لي المنطقة عجبتك؟ قلت ليها حلوة شديييد ، قالت لي على فكرة محمد بتكلم انجيليزي ارهب من حقي ، فهو احسن دليل عشان يشرح ليك وينورك عن المكان قلت ليها محمد انجليزيهو رهيب فعلا وانا انبهرتا لمن اتكلم قدامي ، لاني ماحصل شفتو بتكلم بيهو قدام الناس او يتباهى بيهو فما كنت قايلاهو بالرهابة دي ، قالت لي محمد عندو مواهب كتيرة بس مابتباهى بيها ، قلت ليها فعلا ؟
قالت لي سمعتي صوته في الغنا ؟ قلت ليها ايوة رهيييب فعلا، قالت لي شفتي رسمه؟
قلت ليها هو رسام ؟
قالت لي هو درس هندسة معمار عشان هو رسام ..
بس ماعارفاهو خطب دكتورة ليه، قلت ليها هي دكتورة؟
قالت لي وشاااطرة شطارة كمان ؟ قلت ليها يعني شغالة؟
قالت لي يادوب اتخرجت ، تقريبا فرقهم ٥ سنين او حاجة كدة !

قلت ليها ماكنت عارفة انها دكتورة و سكتنا و بعد شوية سمعتا صفقة على الباب ، قلت لي خالتو دة منو البصفق دة قالت لي اعدلي توبك ديل اولادي ..
فدخلوا علينا تلاتة شبان كبار ، سلموا علينا من بعيد وقالوا لي امهم كلهم صباح الخير ، سلموا عليها في راسها و دخل معاهم محمد سلم عليها وصبح وقال ليها امي كيف حالك ؟ اولاد المرة واضح انهم مهذبين لانهم مارفعوا راسهم عشان يعاينوا لينا و طوالي مشوا بعد سلموا عليها ، و أنا اول ماشفتا محمد ختيت الفنجان واتصلحتا في قعدتي ، لأني أرتبكتا بي شوفتو ، و أول ما هو شافني بالتوب قال لي
( ماشاء الله تبارك الرحمن ) قدامهم كلهم ، كنت عارفة إنه الجملة دي تعبير عن الجمال والإنبهار فخجلت من أعماق روحي خجلتا ..

#متابعة