الفنيدك 19

مجاهد يوسف

السكينة مبسوطة من العدة الجديدة الملت بيتها وتضحك لاخر ضرس فرحانة بيها فرح لمن ليها مراد ولا ترصها في الفضية ومن المطبخ ما مرقت اليوم داك علا للنوم ونضفت ليها الفضية نضاف لمن خلتها تلمع والمطبخ صغيروني وقصيروني وبابو مهلهل حق خشب كالون ما فزقو وعاملة ليهو حبل بتربطو بيهو لمن تجي تسدو من الغنم واليوم داك نامت جمبو ولصقت عنقريبها تب علي الباب خايفة عدتها الجديدة دي تنسرق
البناي لمن شافها قعد يضحك وقال ليها البركة في الفنيدك الهرس ليك عدتك
قالت ليهو الفنيدك آ يابا ان شاء الله يدو ما تنشل الفالح الناجح ود الحلال
قال ليها والله غايتو . امس القريبة دي كنتي بتداعي فوقو ممغوسة وابيتي تعفي ليهم . الليلة بقى فالح ؟
قالت هسي اكان ما هو عدة متل دي ولا بحلم بيها علا اشوفها ساكت عند الناس
قال البركة في ابضهير راجل بركة وفوقو الخير

أبضهير اكان تعبان من الحوامة في السوق وختة راسو نام والصافية صنقرت حارسة الفنيدك خايفاهو يمش يضر ناس عتمان ونعسانة تتشهق ساي والفنيدك فكر ليها قعد يتكشم وقال ليها يمة نومي ما تساهري ساي انا ما ماشي ليهم الليلة
_ ماشي ليهم بتين ؟
_ ما عارف
_ عليك النبي آ ولدي اعفى ليهم أموت ليك اكان ما عفيت ليهم
_ ما بعفى ليهم هو داقيني لشنو وانا ولا سعلتو براو هو الاتطبق علي مع اللمين
_ بس المرة دي وحدا وتاني اكان سعلك ولا بقول ليك اعفى ليهو وانا قلت ليك اموت ليك ، بتدورني اموت ؟
_ما بدورك تموتي بس ما بخليو
_ هسي آ ولدي عاين لابوك دا الليلة تعبان كيفن وخليتو يمرق من الدغش عشان يجيب لناس السكينة العدة ، اكان ما كسرت ليها عدتها ولا كان تعب كدا
_ يمة انا داير انوم
_ سمح قول لي عفيت ليهم انا عارفاك ما بتكضب
_ انا داير انوم وما بعفى ليهو علا اتسدا حقي
_ يتسدن اضنيك ديل قول يامين. الله يستر علينا منك آ المضر ، سمح وريني داير تسوي ليهم شنو ؟
_ والله سليمان اخليهو يقعد يكورك
_ قبلك ووحدك دار تسوي ليهو شنو ؟

الفنيدك ولا نضم معاها تاني ورقد نام
الصباح وبعد الشمش طلعت وأي زول مرق يشوف مشاهدو جاء البوليس داخل الحلة ويسعل من بيت امحدعلي لمن طق وصلوهو وساقوا معاهم محمود العريس المركز
والناس قعدوا يسعلو في شنو في شنو وامحدعلي قال ليهم الهادي البهيمة اخو السكينة اشتكاو عشان أمس دقاو

الهادي السوط ورم ضهرو والدقة الدقاها ليهو محمود حرقتو شديد والرقاد في السرير غلبو قام فات المركز واشتكى محمود ووراهم ضهرو وقال للضابط انا مشيت اشوف أختي ومحمود لما فيني دق برا سبب
ولمن محمود وصل الضابط حقق معاهم الاتنين وحبس محمود عشان الهادي نكر انو لقاهو جوة بيت ابضهير وقال ما دخل البيت
ناس الحلة اغلبم فاتوا المركز وكتار الشهدوا وحلفوا وقالوا الهادي كضاب وهم شافوهو لمن جاء جاري مارق من بيت ابضهير
الضابط طلع محمود وقال ليهو ما قصرت تب واريتك دقيتو اكتر من كدا
وزعلتن من الهادي في كضبو ونكرانو دا حاج الزبير قبل يمرقوا من المركز قال ليهو تاني يا الهادي اوعك تجي الحلة واكان جيتها ما تلوم علا روحك .
محمود فالح ونجيض وبعرف الاجراءات قال للضابط مضي لينا الزول دا علي تعهد انو ما يخش الحلة حقتنا تاني واكان خشاها بنكتلو وبنضبحو شخخخ
والضابط اصلا كره الهادي من عرفو كضاب
قال ليهم وقدام الهادي انا ما بمضيهو علي تعهد لكن اكان جاكم اعملوا فوقو الدايرنو كلو
وقال للهادي يخسي عليك راجل كبير كدا بتكضب وتنكر كمان ما بتخجل ؟ والله حقو انا احبسك في كضبك دا لانك ضللت العدالة لكن امش وخلقتك دي ما اشوفها تاني هنا

اصلا الكضب حبلو قصير وما فيهو خير ولا بفيد ليهو زول والهادي بقت عليهو دقة وذلة وحرمان من جية الحلة وكلو بسبب كضبو

الفنيدك بهناك مرق من البيت وفات بيت ناس حاجة قمر طيبة ولقى اللمين وسليمان هناك يلعبوا مع التمتام ولدها في النيمة والتلاتة بكرهوهو وبخافوا منو حتى اللمين اللكان بتحلف عليهو من يوم كتل ليهو جدادو وطعنو بالمسلة بقى يخاف منو لانو عرفو مضر وما بخاف من زول
والتلاتة من شافوهو بطلو اللعب وهو ولا اشتغل بيهم لكن قال لسليمان اصبر لي والله ما أخليك
سليمان زرزر وحنبك وطوالي مرق فات اهلو ووصلتو البيت قعد يبكي وكلم أمو وديك ما انتظرت دقيقة لفحت توبها وجرت للصافية وحاجة اللقية قالت ليهن ولدي هداك داير يموت من البكاء والخوف وانا وهو الفنيدك بقانا زي السقد وعيونا ديل السهر قددن لينا قديد وما باقي لينا علا نرحل من الحلة دي نخليها للفنيدك
الصافية رضتها وقالت ليها الفنيدك ما بجيكن ولا بسعل ولدك سليمان واكان جاكن قولي الصافية كضابة ولا انا ولا ابوهو ما بنخليهو يصلكم

بتول مرقت فاتت لكن مي مرتاحة وديمعاتها في وشها ولاقاها ابضهير في الدرب وبرضو شكت ليهو وبكت ليهو وقالت ليهو ولدي بقى زي المجنون ويومي ببكي والنوم ما بنوم واكان ما قادرين تمسكوا ولدكم دا مننا بنرحل ليكم من الحلة
ابضهير قعد يلولح في راسو وقال ليها بنرحل نحن ديل ودخل بيتو

وسأل الصافية من الفنيدك قالت ليهو مرق فات ناس خالتي قمر
_ وبتول دي مالها الليلة والجابها شنو ؟
_ جات عشان الفنيدك قال لولدها ما بخليك وولدها جاها يبكي
_ هبشو ؟
_ ما هبشو قال ليهو ما بخليك بس
_ ولدها ذاتو خايب ساي امشي جيبي الولد دا اننضمم معاهو
_ داير تدقو ؟
_ ادقو في شنو يا مرة داير انضم معاهو ساي

عتمان لمن عرف بمشية بتول وكلامها مع ابضهير زعل منها وهرج فيها زين وقال ليها ما كان تقولي ليهو كدا هسي لو كلامو القالو دا عملو ورحل
قالت ليهو اريتو يعملو ويرحل اكان نرتاح من ولدو الفقر دا وعيونا دي تضوق النوم

الحلة ما فيها مدرسة واولاد الحلة بمشوا يقروا في ابعجاجة وكتار الما بمشوا والما شغالين بيها ذاتو وفيهم الاهلو ودوهو الخلوة حقت الشيخ حمد ابعجاجة
ابضهير بعد مرتو نادت الفنيدك قال ليهو بكرة الصباح انا بوديك الخلوة في ابعجاجة وبتقنب هناك قبلك وانا كل يومين تلاتة بجيك هناك
الصافية قالت ليهو وديهو المدرسة ما الخلوة
قال ليها لا الخلوة عشان يتأدب فوقها والخلوة احسن ليهو من المدرسة ولملمي ليهو هديماتو من هسي بكرة بسوقو تب اكان الله حيانا
الفنيدك سكت ساي لا قال سمح ولا قال لا
حاجة اللقية قعدت تطنطن ما دايرة فوتة الفنيدك لكن عاجباها الخلوة عشان في مسيد الشيخ وهي بتريد الشيخ وقالت للفنيدك انا طوالي بجيك هناك وبكلم ليك شيخ حمد وبوصيهو عليك
وما تموا ليهم ساعة الحلة كلها قعدت تنضم بالفنيدك المودنو الخلوة وكتار الفرحوا بفوتو ، حاج احمد جاء لابضهير سعلو قال ليهو بصح مودي ولدك الخلوة ؟
_ آي لكن الكلمك منو ؟
_ الحلة كلها تنضم بالكلام دا
_ انا ما وريت بيهو علا امو وحبوبتو
_ مافي حاجة الناس ما بعرفوها علا الواحد ما يفتح خشمو وانا زاتي بودي ولدي معاهو خليهم يتوازروا هناك
_ انا في اللول بدور اوديهو المدرسة لكن تاني قلت الخلوة اخير منها
_ المدرسة سمحة ما كعبة بس الخلوة اخير منها وكلنا قرينا فوقا
واكان حفظو كتاب الله تاني الزيهم منو ؟
_ والله كلنا قرينا فوقا لكن شردنا منها ما قعدنا فوقا لمن نحفظ المصحف وابواتنا الله يرحمن خلونا علي هوانا ساي بس اولادنا ديل اكان ما حفظو المصحف جت ما بنخليهم يمرقوا منها

والفنيدك ودوهو الخلوة
ومن اول يوم لبس دموريتو واستلم اللوح حقو

والخلوة عالم براهو والخلوة براها حكاية

وللفنيدك بقية

يدبع ياخ

الفنيدك 20

مجاهد يوسف

مسيد الشيخ اب عجاجة مسيد واسع وكبير في نصو في البنية والناس بجوهو من وين ووين والخلوة زاتها كبيرة مي صغيرة وملانة طلبة لعينها لامة كل الخلق اشكال وألوان وكلهم شايلاهم وكلهم ماكلين وشاربين ومبسوطين ، والشيخ غير الحيران الكتار عندو كم عريف ، يتوروا الطلبة الدغش بدري قبال صلاة الصبح للدغشية والدغشية دي البتحفظ وأي طالب بقوم علي لوحو ويحفظ الكتبو فوقو وبعد صلاة الصبح كل الطلبة يقعدوا يقروا والشيخ قاعد في نصهم وأي طالب قرايتو براهو وبقرا آيات مختلفة عن التاني وعلى حسب حفظو وهو واقف وين وحكمة الله البغلط في كلمة الشيخ بوقفو وبصلحو والخلوة مي مقسمة زي المدرسة سنة اولى وسنة تانية ،الخلوة اوضة واحدة او فصل واحد وكبير وكل الطلبة فوقو اليادوبو جاء الليلة والقدام الليهم سنين كلهم في فجة واحدة والشيخ كل طالب بقريهو براهو وبساعدوهو الطلبة الشاطرين الاخدو الشرافة كل طالب بديهو مجموعة يقريهم
والبجيهم جديد زي الفنيدك دا اول حاجة بسلموهو اللوح وقلم القصب والدواية حقت الحبر وبسلموهو للعريف والعريف دا البعلمو الكتابة والقراية كل مرة يكتب ليهو حرف في اللوح حقو والطالب يومو داك كلو في الحرف دا لمن يكتبو صاح ويحفظو صاح وبتنوينو . ولمن يبقى بقرا وبكتب بستلمو الشيخ ويقنب مع الطلاب للرمية ، والرمية دي الآيات الدايرنو يحفظها برميها ليهو الشيخ وهو بكتبها ودي وكتها الضحوية بعد الشمش تطلع وبتجر لحدي ساعة القيلولة البرتاحوا فوقها الطلبة وياكلوا فوقها وياخدوا ليهم نومة ويجوا تاني للعصرية والمغربية الاولى البعد صلاة المغرب والمغربية التانية البعد صلاة العشاء وبعدها ياكلوا وينوموا عشان يقوموا بدري للدغشية ويومهم كلو ملان .
ابضهير لمن جاب الفنيدك دخل بيهو للشيخ حمد وداك بعرفو ومن شافو ساكت ضحك وقال لخليل جبت لينا المبروك الليلة ؟ قال ليهو مبروك شنو آ الشيخ دا قول المجنون قول المضر قول الممسوخ والله الولد دا السواها في الحلة مافي زول سواها دا الناس الكبار بقوا بخلوا ليهو الدرب وانا جايبو الليلة ما جايبو زيارة وداير ادخلو الخلوة منها يحفظ القرآن وياهو البنفعو دنيا وآخرة ومنها أريح الناس منو
الشيخ ضحك وقال ليهو كلمتني بعمايلو حاجة اللقية حبوبتو يوم حرق مخزن حاج الزبير لكن مافي عوجة تب ابشر بالخير والشيخ ناغم لواحد من الحيران قال ليهو تعال سوق المبروك دا وديهو للعريف شيخ الطيب ووصيهو عليهو شديد وقول ليهو قال ليك شيخ حمد دا المبروك زي ولدي وواحد ما بوصيك عليهو

ابضهير مرق من الشيخ حمد مبسوط ومتكيف شديد لكن وصلتو البيت الانبساطة طارت بقى ليهو فاضي ومسيخ والقعدة زاتها غلبتو قام مرق فات علي حاج احمد وداك بعد ما كان داير يجيب ولدو ويوديهو الخلوة غير رايو عشان بخيتة مرتو حلفت ولدها ما يباري الفنيدك وقالت ليهو كفاية سليمان ود بتول اختي الجننو جن
ابضهير اخد قعدتو معاهو وشرب معاهو الجبنة ورجع بيتو التاني
وناس الحلة اغلبهم مبسوطين بمرقة الفنيدك دي
بتول قعدت تزغردت لمن عرفت الفنيدك فات من الحلة ومشت جابت ليها تمر وحلاوة من دكان النفيع قسمتن للشفع
شمعون مرق مركوبو نفضو زييين ولبسو وملص السفنجة
عتمان برضو ارتاح وقال البركة الودوهو الخلوة
الزبير اخوهو قال ليهو والله مسخ علينا الحلة
حاج امحدعلي ما رضيان وقال لابضهير ما كان توديهو الخلوة والمدرسة اخير ليهو منها وانت عارف الخلوة كيف وولدك انا العاديني زي ابوهو ما رضى مني الكف والخلوة فوقها الفلك والدق
ابضهير قال ليهو علي الله وانا والله ما بدور فراقو ياهو ولدي الوحيد اكان سمح اكان كعب ما عندي غيرو لكن غلبني البعملو معاهو وما لقيت حل غير دا
شيخ الطيب العريف مسك الفنيدك ووراهو يمسك اللوح كيف ويمسك قلم القصب كيف ويكتب كيف وبدا معاهو ، الفنيدك مبسوط لانو كان زهجان من الحلة وعجبتو الخلوة
ومرت الايام واتعلم القراية والكتابة وبدا في القرآن ووصل لنص جزو عم
ويوم لقى واحد من الحيران بدق ليهو في طالب حدر ليهو بعين حارة وفات والحوار معاينة الفنيدك ليهو ما رضاها ووقفو وقال ليهو بتعاين لي كدا مالك آ جنى
_ انت مالك بتدق في الولد دا كدا ؟
_ مخو تخين ما بحفظ
_ تقوم تدقوا كدا ؟
_ ادقوا كيفن يعني ؟ وان شاء الله تقع في يدي عشان اوريك الدق كيف
_ الما بحفظ بتدقو انت ؟
_ بدقو الشيخ وبدقو أنا واكان وقعت في يدي اوب عليك
_ سمح

الطالب الدقاهو الحوار دا بعد فكوهو الفنيدك فات ليهو قال ليهو عملت شنو انت قال ليهو ما حفظت بس والما بحفظ هنا بندق عشان يحفظ
قام فات للعريف شيخ الطيب
شيخ الطيب زول كبير ما صغير وطيب زي اسمو وبعامل الطلبة الصغار معاملة خاصة ما بدق طالب كلو كلو وبرغبهم في القراية والكتابة وبحببهم في القرآن وفي الخلوة وزول مناسب وفي مكان مناسب والفنيدك متكيف منو عشان طيبتو دي وبرضو بقول للفنيدك المبروك والخلوة كلها بتقول ليهو المبروك وكتار القايلنو اسمو المبروك واللقب دا اتلصق فوقو وبقى ليهو اسم
والفني

دك من قام لحدي ما جاء الخلوة وهو الفنيدك بس ما حصل ولا بغلط زول ناداهو باسمو الحقيقي حتى امو وابوهو وحبوبتو غير بالفنيدك ما بناغموا ليهو وهسي في الخلوة درعوا فوقو اسم جديد ومافي زول كان بقولو ليهو في الحلة غير حاجة قمر طيبة ومبروك عليهو المبروك
والفنيدك بقى المبروك
الفنيدك مشى علي شيخ الطيب ولقى معاهو كم طالب بياكلوا ليهم في عصيدة وشيخ الطيب قال ليهو حباب المبروك ولدي تعال تعال جاي الوليدات ديل الليلة عملوا ليهم عصيدة دكماء قرب مد معاهم ايدك
الفنيدك قال ما داير
ولمن انتهوا من الاكل قال لشيخ الطيب انا داير اقرا في المدرسة ما داير الخلوة
شيخ الطيب سكت مسافة وقال ليهو مالك في شي زعلك وما عجبك هني ؟
_ لا لا بس داير المدرسة وهنا في دق وانا البدقني ما بخليهو
_ المدرسة برضو فوقها دق ما هنا بس وما في زول بدق ليهو زول ساي وبدقوهم عشان يحفظوا ويتعلموا
الفنيدك سكت مسافة وشال لوحو وفات
شيخ الطيب كلم شيخ حمد بكلام المبروك والشيخ عارف عمايل الفنيدك كلها وعارفو ما عملها الا بعد دقوهو قال للحيران مافي واحد منكم يدق المبروك نهائي

والفنيدك صابر وشاطر وبحفظ سريع وراد الخلوة وابوهو كلو يومين تلاتة بجيهو ومرات بجنوا امو وحبوبتو يسلمن عليهو ويتونسن معاهو ويفوتن ومبسوط ويقرا في امان الله لا بسعل زول ولا في زول بسعلو لمن نال الشرافة الاولى والشرافة التانية حقت تبارك
والشرافة بدوها الطالب في الخلوة لمن يحفظ ليهو جزو كامل
الفنيدك لمن اخد الشرافة التانية وقبال يبدا الجزو التالت اليوم داك امو وحبوبتو جن يزورن ودخل معاهن للشيخ وقال للشيخ بدور امشي معاهن الحلة
الشيخ اكان مبسوط منو عشان ذكي وبحفظ سريع قال ليهو امشي معاهن وعدي ليك كم يوم وتعال راجع
الحلة كلها اليوم داك انكسرت فوقو وكلهم مشتاقين ليهو وفرحوا بجيتو أكان بتول وهي الوحيدة الما دارت جيتو
اليوم داك ابضهير عمل ليهو كرامة وعزم الناس كلهم وبقوا يقولوا للفنيدك المبروك وقالوا ليهو اقرا لينا وأبى يقرا ليهم
العصير وبعد الناس اتغدوا في الكرامة وفاتوا منهم الفنيدك فات علي الكتر يفتش ليهو لدابي دايرو لسليمان ود بتول واصلو غير بالدابي قال ما بضرو بشي

يتبع....

📖 اذا انتهيت من القراءه اضغط علي #لايك 👇 واذا حصلنا علي #100# لايك سوف نقوم بتنزيل #بقيه حلقات ا الروايه

الفنيدك 21

مجاهد يوسف

الفنيدك فات علي الكتر وقبالو كاس في الخور الجمب الترب لمن فتر وداك ملان عقارب وهو عارفن كويس علا المرة دي مو دايرلو عقرب وما خاتي في راسو علا دابي بس وفي الخور في شدرة طندب خدددرة لمن مضلمة مشى بحت تحتها لمن زهج ما لقى شي وبعد قنع من الخور فات علي الكتر وشايل ليهو عصاية كل ما يلقالو قش يقعد يخبت بيها فوقو وفي تفتيشو وكواستو ديك يلمحو شمعون والوكت داك الدنيا مغيرب تب وكان يادوبو خاشي علي الحلة اكان في الحواشة هيلتو من الدغش وما سمع بجية الفنيدك دي ولا حضر الكرامة وكان معاهو العبد ود رهمة الله ودا من الحلة وجارو في الحواشة وهو الشاف الفنيدك وكلم بيهو شمعون
_ دحين آ شمعون أخوي داك الفي الكتر مو الفنيدك ود ابضهير
شمعون لمن شافو وعرفو ياهو هو انخلع وقال ليهو ياهو زاتو والله لكن الجابو شنو الجنى دا الليلة من ابعجاجة
_ انت في الجابو وللا بكوس لشنو ؟
_ شن خبرني بيهو ؟
_ ورح عليهو أنسعلو
_ امش عليهو براك اكان ماش انا لا بسعلو ولا شفتو ولا رأيتو
_ ها شمعون ها أفو
_ علي بالطلاق انا من قمت ما بخاف ولا بعرف الخوف وقايل اكان لاقيت لي اسد عديل ما أظن أخاف منو لكن الجنى دا يمين خوفني ، دا آ العبد خلاني قنعت من لبسان المركوب ودرعت لي سفنجة كم شهر لمن كرعي ديل نشفن نشاف واتشققن ، السايب دا ما شديد آ العبد ومضر وقبل كدي قرب يقد لي عيني دي اكان ما الله ستر
_ عاينلو ببحت كيفن السايب ؟ هسي ااجنى دا اكان طقاهو دعت
_ يطقو شنو ؟ هو هسي اتلقي كايسلو لدعت الملعون . ورح ورح ولا دايرنو يشوفنا زاتو
_ انا ماشي اكلم ابوهو اللجي يلحقو مع المغارب دي الجنى دا امكن يكفتو شيطان
_ والله دا البكفت الشيطان وعلي كيفك انا ماشي علي بيتي

العبد مع دخلتهم الحلة مشى علي ابضهير وكلمو وخليل مرق علي الكتر وجاهو جاري جري واكان معاهو امحدعلي والعبد زاتو جا معاهم ولقوا الفنيدك يبحت ساي تحت الشدر وابوهو ناغملو
_ كايس لشنو يا جنى ؟
_ بفتش لي لدابي يا ابوي
_ دايربو شنو الدابي آ السايب ؟
_ دايرو لسليمان ود بتول
_ لا حول ولا قوة الا بالله امرق جاي يمرق جلدك ، انت آ جنى شيطان ؟
_ والله آ يابا انا حالف ما بخليهو كلو كلو وبلقى ليهو دابي
_ دابي الصعيد ال يطقك فد طقة يريحنا منك ورح آ جنى علي البيت مالك بتدور تعمل لينا جريمة في الحلة دي ورح ورح حرم الليلة اكان ارجعك خلوتك وتاني الحلة دي حرمانة عليك
_ والله لو جيت بعد عشرة سنة ما بخليهو هو داقيني لشنو
_ يدقك حجر الصاقعة اللفرطقك تفرطق ورح ورح امرق

ابضهير ساق الفنيدك ومشى بيهو البيت وامحدعلي والعبد محتارين في الجنى اللايوق الما بتوب من المضرة كلو كلو دا
امحدعلي فات بيتو وسكت ساي بالموضوع دا خشمو ما فتحو ومن بيتو ما مرق لكن العبد اللاقاهو كلو وراهو بيهو والحداث بحدث حداث والحلة كلها عرفت بالفنيدك اكان في الكتر يفتشلو لدابي لسليمان ولد عتمان وفي ناس زادوا الكلام وقالوا قبض ليهو دابي كبير لكن ابوهو كتلو وفي القال الفنيدك دسا الدابي من ابوهو
واتنشر الخبر في الحلة ووصل لعند بتول وعتمان
وبتول مسكتها ام هلة هلة وقعدت تبكي وتولول وسليمان زاتو قعد يبكي ويكورك بطول حسو ويتراجف وينخج لمن بخروهو وبرضو ما سكت
بتول قالت تاني الفنيدك بجيب لينا دابي ، يتدبى ويقدل ان شاء الله فوق نار جهنم بركة من صلى وقال يا الله ، المضر المعيق العواليق بعد الله ريحنا منو تاني جانا تجيهو الطاوية حبالها
عتمان والزبير مشوا لابضهير في البيت ما لقوهو والصافية قالت ليهم ساق الفنيدك ورجعو الخلوة
حاج احمد لمن سمع برجيعة ابضهير للفنيدك شدا حمارو وفات لحقو في الدرب وقال ليهو علا ترجعو الحلة
ابضهير ابى وقال ليهو الجنى دا ما بنقدر لي
حاج احمد قال ليهو خليهو علي انا دا وهو بسمع كلامي وانا ما بخليهو يصل ليهو زول
واتحاججوا في الدرب داك قريب ساعة لمن ابضهير حلف حرام انو الليلة الفنيدك ما يبيت علا في الخلوة وقال ليهو انا ما صدقت ارتحنا منو الفترة الفاتت وبعد جاء قلت عقل وساب المضرة وفرحت بجيتو وسويتلو كرامة يجي السايب وقبال اليوم ما يتم داير يعمل ليهو مصيبة جديدة ؟
حاج احمد قال ليهو والله ولدك دا احسن زول وبسمع الكلام وانا عارفو كويس وزيو في الجنوي الفي حلتنا كلو كلو مافي .لكن نقول شنو ؟ ورح انا بصل معاك لحدي الخلوة نوديهو ونرجع
_ أصلا غير الخلوة وتاني ما يعتب الحلة اناما شايف لي حل تاني

والفنيدك ساكت ساي اصلو ما نضم لمن وصلوا الخلوة وطوالي ابضهير دخل بيهو لشيخ حمد ووراهو الحصل كلو وشيخ حمد قال ليهو مافي عوجة وحصل خير باكر بكبر وبعقل والكلام دا كلو بتنسي وخليهو لي في الخلوة دي وامش ما في عوجة تب دا المبروك
ابضهير وحاج احمد فاتوا والفنيدك مشى علي فجة نومو
الحوار الكان بدق في الطالب والحدر ليهو الفنيدك يومداك اسمو سعيد واكان مع الشيخ لمن ديل جوهو وسمع كلام خليل ابو الفنيدك كلو ومحروق من الفنيدك شديد ومكجنو وممغوص من اليوم داك ومرق مشى لل

فنيدك في فجة رقادو داير يهرشو ويخوفو
وقال ليهو انت آ المعولق العفين دا مافي زول مالي عينك وللا شنو ؟ عامل خلقتك القصيرة دي والله من يوم الليلة انا دواك وانا البأدبك
الفنيدك قال ليهو انا ما سعلتك آ سعيد زح مني والله تهبشني ما اخليك
_ دار تعمل لي شنو وهنا لا في امك ولا في ابوك ومصيرك تقع في يدي والله السوط ياكلك أكل وانا بعرف أأدبك كيف ، كمان بتقول سعيد ساااي كدا ولا بتقول لي المقدم ؟ اصبر لي يا كلب
الفنيدك قال ليهو سمح
وسعيد فات منو وزعلان
الفنيدك نام والصباح بدري شال لوحو ومرق مع الطلبة للدغشية

ومرت الايام
شيخ حمد ابعجاجة عندو حواشة كبيرة خلاس وعاملها وقف للخلوة ووكت الدرت بسوقوا ليها الطلبة يقطعوا العيش ويدقوهو ويعبوهو في شوالات ويجيبوهو بالكوار ويدخلوهو مخزن الخلوة لاكل الطلبة وناس ابعجاجة والحلال الجمبها كلهم ما مقصرين في الخلوة والمسيد وبعد الدرت كل مزارع بجيب من حواشو اكان عيش اكان قمح اكان فول وللا عدسي وللا اي محصول زارعو والزارع قطن بعد الصرفة بجيبن قروش ومخزن مسيد الشيخ كلو كلو ما حصل فضى وعدم وعيشو وقمحو بقنب للحول وديمة ملاقي المحصول الجديد

الايام ديك ايام درت والطلبة من الفجر اتوجهوا علي الحواشات للحصاد والفنيديك في نصهم والادوهو سكاب والادوهو مدقاق والادوهو كرنيس
الفنيديك نصت نهار والواطة حارة والطلبة كلهم شغالين اخد ليهو منهم خفسة ومشى قعد في نص الحواشة وفي نص القصب ساي فتر من الشغل وعلق ليهو شوال فاضي في القصب عمل بيهو ضل ورقد
انت يا المقدم سعيد الحوار المحروق من الفيدك وحالف عليهو تأدبو وللتغتس حجرك تعال وراهو
واول ما وصل الفنيدك ولقاهو راقد شاتو شلوت وقال ليهو جايبنك هنا تترقد وللا تشتغل ؟ ولما فوقو تكفت ودق والفنيدك مسردب وداك لمن شافو لا بكى ولا الدق عامل ليهو شي زادو زيادة لمن يدو فترت قام جراهو على ابستة ورماهو جوة الموية ومرقو منها علي الطلبة وقال ليهو اشتغل
الفنيدك فات علي الخلوة وابى يشتغل تاني والحيران كلهم الحاضرين غلطو المقدم سعيد وقالوا ليهو ما صاح تدق المبروك دا كدا وانت عارف الشيخ موصينا كلنا وقال اوعكم تدقوهو
قال ليهم قليل أدب ياخي وانا والله ما بخليهو علا يتأدب ومن يوم الليلة انا ما عندي شغلة غيرو
واحد منهموقال ليهو عمل ليك شنو هو ؟
قال والله مكجنو ساي ومن شفتو ما ردتو ويومداك ابوهو قال مجنن حلتم جن وانا حالف اكان ما أدبتو ما برتاح . جنى مضر خلاس وكريه
المقدم علي ودا من الحيران برضو قال ليهو والله اكان داير الصدق المبروك من يوم جاء الخلوة دي ما قل ادبو علي زول وشاطر وبحفظ سريع واتعلم القراية والكتابة سريع اسعل منو شيخ الطيب العريف متكيف منو وكلنا بنتكيف ليهو

في الآخر الحيران كلهم وعشان الشيخ حمد ما يزعل من دقة سعيد للفنيدك قالوا للطلبة زول منكم يوري الشيخ بالحصل دا مافي ولو المبروك كلمو براهو يا سعيد شيل شيلتك براك ونحن اكان الشيخ سألنا ما بنقدر نكضب عليهو وبنقول الشفناهو
ونهوا الموضوع علي كدا
واليوم كمل والطلبة رجعوا الخلوة مع المغارب
الفنيدك لا كلم الشيخ ولا فتح خشمو ولا الشيخ سأل ليهو منهم زول ولا عرف بدقة سعيد للفنيدك
(وأريتو اكان عرف)
الحيران حمدوا الله انو الشيخ ما عندو خبر وما سأل منهم زول وسكتوا واصلو مافيهم زول تاني جاب طاريها
وبالليل تب والطلبة والحيران من تعب الحصاد كلهم نايمين يشخروا عشان راجياهم صحية بدري
وقام الفنيدك ياخد حقو
غايتو المقدم سعيد جاهو بلاء

يدبع ياخ ...

الفنيدك 22
الحلقة الآخيرة
مجاهد يوسف

الليل هادي والقمرة مضوية بيييضة والمسيد دايما فوقو الناس وما بفضي ومفتوح ليل نهار للماشي وللغاشي والتقابة موقدة ونهائي نارها ما بتموت
الطلبة سكنهم جمب الخلوة في طرف المسيد ومسور بحوش براهو وكتار النايمين في الحوش برة من الاوض
اقرب حاجة لسكن الطلبة وبعد الخلوة مباشرة وما بعيد منها سكن الحيران وجمبهن لصق المخزن الفوقو العيش والقمح والمخزن كبير وبابو مقفول بجنزير طويل ما فيهو طبلة بلفلفوهو فوقو ساي ومن حياة اب عجاجة جد الشيخ حمد ما انقفل بطبلة
اصلا ما في زول بقدر يهبش مخزن الشيخ احتراما ليهو وتاني لانو جوة المسيد وجمب بيت الله والفيهو كلو زاد هيل طلبة قرآن وعلم ، لا حرامي بفكر فوقو وبجيهو يسرق ولا حصل قالوا انسرق
شيخ الطيب العريف راجل بركة وطيب زي اسمو ومن حلة بعيدة جاء لشيخ حمد دا قبال كم حول ومسك الطلبة وعلمهم كلهم القراية والكتابة وكل الناس بريدوهو وبقعد ليهو شهرين تلاتة وبفوت حلتهم لاولادو ويقنب معاهم شهر ومرات يزيد فوق الشهر ويجي راجع . وساكن قبلو في المسيد والشيخ مديهو اوضة براهو ملاصقة المخزن وبتفتح لقدام علي القبلة والمخزن بابو صعيد لكن هو بخت عنقريبو قدام المخزن وبنوم زي الحارسو

الفنيدك ما عندو حاجة يطق بيها المقدم سعيد وعارف المخزن ما عندو قفل وجاهو راسو عديل عشان يشيل ليهو منجل وللا ساطور من الكانوا بقطعوا بيهن الصباح في العيش ولقى شيخ الطيب نايم ما اشتغل بيهو وقعد يجرجر في الجنزير
شيخ الطيب نومو خفيف وصحى بيهو وعاين فوقو مسافة وعرفو تب لكن ما نضم معاهو ولا حسسو بانو صحى بيهو قال يشوفو في اللول داير شنو من المخزن امكن جيعان وقايل المخزن فوقو شيتن ياكلو وقعد يعاين ليهو ساي لمن الفنيدك فتح الباب وفتش وفتش واتناول ليهو منجل كبير وجاء مارق وربط الجنزير في فجتو وفات علي اوض الحيران
وشيخ الطيب قام براحة وفات وراهو ومباريهو من غير ما الفنيدك يعرفو لمن وصل لي عند المقدم سعيد ولقاهو يشخر ومتندل تب ورفع المنجل داير يطقو بيهو طب شيخ الطيب جاهو من وراهو ومسكو
الفنيدك قال ليهو فكني اننجمو آ عمي الطيب
قال ليهو لا
وساقو معاهو لمن وصل عنقريبو وشال منو المنجل وقال ليهو مالك آ ولدي داير تعمل ليك جريمة في المسيد دا جمب بيت الله
_ هو دقاني قبيل في الحواشة برا سبب
_ اكان تكلم الشيخ وللا تجي توريني انا بناخد ليك حقك منو
_ انا ما بخليهو وباخد حقي براي
_ هسي لو ما لحقتك انا ما كان عوقتو وانت زول شاطر وفالح والداير تعملو دا غلط
_ ما غلط وهو البدا الختا وهو الدقاني
_ لو عوقتو والشيخ عرف بزعل منك وبطردك من الخلوة
_ انا زاتي الخلوة دي ولا دايرها وداير امشي المدرسة
_ الخلوة اسمح من المدرسة
_ما اسمح ولا شي وانا داير المدرسة وابوي جابني وقال الخلوة بس
_ والله يا ولدي انت شاطر وفعلا اخير ليك المدرسة بس هسي انت نوم وباكر بننضم انا وياك مع الشيخ ونوريهو بدقة سعيد ليك بس ما تقول ليهو اكنت داير تعوقو بالمنجل وانا ما بقولها ليهو . وموضوع المدرسة دا خليهو علي
_ بتوديني المدرسة ؟
_ بوديك ان شاء الله بس بعد نكلم الشيخ في الاول وهسي نوم

شيخ الطيب عندو عنقريب تاني في الاوضة مرقو والفنيدك رقد نام فوقو وللصباح شيخ الطيب ما نام
والمقدم سعيد الله مرقو منو
الفنيدك اكان طوالي بالنهار بمرق يشوف طلبة المدرسة وهم مارقين منها ومتمني يقرا فيها

الصباح بدري كل طلبة الخلوة قاموا للدغشية وبعد صلاة الصبح جاهم الشيخ وقروا لمن الشمش طلعت وكلهم فاتوا علي الحواشة يتموا الشغل البدوهو امس
الفنيدك ما فات معاهم ومشى مع شيخ الطيب للشيخ حمد وطوالي قال للشيخ انا داير اقرا في المدرسة
الشيخ ضحكوقال ليهو مالك أبيتنا آ المبروك في زول زعلك ؟
قال ليهو لا لا بس انا داير المدرسة وفي الاجازة بجي اقرا هنا
شيخ حمد انبسط منو وقال ليهو عديلة تب آ المبروك نوديك المدرسة وقال لشيخ الطيب سوقو وديهو المدرسة خليهم يسجلوهو ، شيخ الطيب عارف كل شي عن الفنيدك وعارف عمايلو الفي الحلة چت وسمع بيها كلها وبريد الفنيدك ومبسوط منو وعارفو شاطر قام قال لشيخ حمد انا داير استاذن منك والمبروك دا والله انا عاديهو زي ولدي وواحد وداير اسوقو اسجلو في حلتنا يقرا مع اولادي ويسكن معاي في بيتي وهناك عندنا مدرسة سمحة ولمن المدرسة تقفل ويأجزوا انا بجيبو لحدي هنا
الشيخ قال ليهو انا ما عندي مانع لكن الامر دا عند اهلو وكلم ابوهو ان رضى سوقو تب
الفنيدك مبسوط ويتبسم ويتكشم
شيخ الطيب مرق من الشيخ حمد وأبى يوريهو بدقة سعيد للفنيدك وساق الفنيدك ومشى لابضهير في بيتو
ابضهير من شاف الفنيدك جاء قعد يبلع في ريقو وقال الله يستر ما يكون عمل ليهو مصيبة في الخلوة

شيخ الطيب بعد سلم عليهو كلمو طوالي ووراهو انو سايق الفنيدك معاهو حلتهم
ابضهير سكت مسافة وقال ليهو الجنى دا مضر
قال ليهو عارفو وعارف العملو كلو وداير رايك . اسوقو معاي حلتنا وللا لا ؟
_ شيخ حمد رايو شن

و ؟
_ ما عندو مانع وقال الكلام عندك انت
ابضهير ناغم للصافية ووراها بكلام شيخ الطيب وديك اصلا دايرة المدرسة قالت ليهو انا رضيانة واكان علي انا يسوقو طوالي ومن زمان دايراك تدخلو المدرسة لكن انت القلت الخلوة
ابضهير زاتو رضى
وحلف علي شيخ الطيب الا يديهم باقي اليوم دا ويقعدو معاهم والصباح يفوتوا
قال ليهو خير ومنها نتعارف سمح وقعدوا يتونسوا
والفنيدك اصلو ما مرق من البيت لمن الواطة فللت تب
وحمد الله بجيتو دي رقد عمل فيها نايم ولمن اتأكد تب انو ناس ابوهو ناموا قام براحة براحة مشى علي الغنم وشال خرتاية غنماية حبوبتو اللقية الدخل فيها الدابي زمان وشال ليهو حبل ودخلو جواها وفات
مشى لناس عتمان ولقى سليمان نايم في الحوش واهلو كلهم نايمين وجدع فوقو الخرتاية بحبلها وفات اهلو
وسليمان صحى بيها وقام انعرط ويصرخ ويكورك بطول حسو واي الدابي واي الدابي والفريق كلو صحى بيهو
ابوهو عتمان جاهو جاري ولقى الخرتاية الزمان زاتها والحبل جواها وقايلو فعلا دابي ونفضها من عنقريب ولدو رماها تحت في الواطة ووقع فيها خبط بالعكاز لمن العكاز قرب ينكسر حتين وقف وجاب البطارية ولعها ولمن لقاهو حبل
قال لا اله الا الله ولا حول ولا قوة الا بالله ، الله يازاك آ الفنيدك يا مضر نحن الجنى دا البحلنا منو شنو ؟
وبتول اخير ولدها سليمان ما مصدقة دا حبل وتبكي وتداعي
وسليمان بقى مجنون رسمي ويتخازز كلو ويترجف ومطير عيونو
واي زول من الحلة جاهم الساعة ديك داخل ما مصدق انو دا حبل لمن هبشوهو بيديهم
والفنيدك مبسوط دخل بيتهم ونام ولا في زول في بيتهم عرف انو مرق

لمن الواطة صبحت لملم هديماتو وودع امو وابوهو وفات مع شيخ الطيب
ناس عتمان ناموا قريب الصبح وما صحوا علا بعد الشمش بقت فوووق وعتمان جاب الخرتاية والحبل وجاء لابضهير ووراهو بالعملو ولدو كلو
ابضهير قال ليهو الجنى فات من الصباح ووراهو بشيخ الطيب وبالمدرسة وما في اي حاجة بقدر يعملها قال ليهو امسحها لي في وشي دا وان دايرني امش ألحق الفنيدك واجيبو واقو ليك قدامك بمش والبرضيك كلو بسويهو
عتمان لولح راسو ساي وفات علي بيتو
وولدو سليمان جنا من الخوف وبقى يتخلع برا سبب

الفنيدك ما كلم شيخ الطيب بالعملو لسليمان لكن المزعلو المقدم سعيد وحالف ما بخليهو كلو كلو ولازم ينجمو
شيخ الطيب غشى الشيخ حمد وودعو وساق الفنيدك وفات وصلوا حلتهم العصر وفرحان بجية المبروك معاهو دي
ومرت الأيام
والفنيدك دخل المدرسة وشاطر شطارة شديدة وفي المدرسة بنادوهو باسمو الحقيقي (علي خليل علي )
وناس الحلة برة المدرسة بناغموا ليهو المبروك
نظرة شيخ الطيب فوق الفنيدك تب ما وقعت واطة .والفنيدك بريدو وبقول ليهو أبوي الطيب وبقى ليهو زي ولدو وواحد وكل ناس الحلة رادوهو لا حصل غلط علي زول ولا بزعل زول ولا حصل زول غلط عليهو البيت والمدرسة والمذاكرة ما عندو شغلة تاني بشي
وفالح وشاطر وراغب القراية ومن اول سنة والحالة دي اكانوا فايتنوا بكم شهر اجتهد ولحقهم
والسنة التانية جاهم الاول ومشى علي كدا وكل اجازة برجع الخلوة اول اجازة فتش للمقدم سعيد ونهائي ما لقاهو ولمن سأل منو قالوا ليهو فات حلتهم يزرع حواشة ابوهو
وتاني ما اشتغل بيهو
ولفت الأيام وجرت السنين وحاجة اللقية حبوبتو ودعت والناس الكبار كبروا تب لمن صغروا والودع ودع الحي منهم حي والوليدات الصغار كلهم كبروا فيهم الكمل قراية وفيهم العرس عمل ليهو اسرة وبيت والفنيدك زاتو كبر وماسك في الاول لمن دخل الجامعة واصلو ما ساب الخلوة لمن حفظ المصحف كلو
وبعد حفظو ما سابها وطوالي بجيها ومرات بدرس الطلبة مع الشيخ حمد ومنع فيها الدق نهائي

الفنيدك المعيق ومضر بقى الدكتور علي خليل أبضهير
وقبل علي الحلة حقتهم
الحلة الياما شكت وبكت منو بقى اكتر زول نافعها
المرضان كلو بعالجو والمحتاج كلو بساعدو وهو الدخل ليها الكهرباء وعمل ليهو فوقها عيادة والعلاج مجان والادوية من جيبو
ولمن الحلة كبرت واتوسعت مشى جاب ليها التصديق للمدرسة وبنوها وريح الطلبة من الساساق لابعجاجة

واصلو ما نسى شيخ الطيب وجميلو عليهو وعاديهو ابوهو ما بقول ليهو غير ابوي وشايلو وشايل ابوهو خليل ابضهير وامو الصافية فوق لراسو
واكتر زول نافع الحلة

انتهت.

📖 اذا انتهيت من قراءه الروايه اضغط علي #لايك 👇 واذا حصلنا علي #مائه لايك سوف نقوم بتنزيل روايه #جديده

#ليس_ذنبي1
بقلم:أشجان الجعلي

شجن أسمعي الكلام وأدخلي البيت قلت ليهو بس انا عايزه ألعب مع صحباتي 😢 قال لي بحده لااااا قلت أدخلي 😡 قلت ليهو أبييييت 😒 جا ضربني دخلت البيت أبكي أمي قالت لي ليييه بتبكي قلت ليها محمد ضربني ومنعني ألعب مع صحباتي 😢 قالت لي ما تشتغلي بيهو تعالي ساعديني قلت ليها بس ما بعرف 😔 قالت لي خلاص دخلي لي الخيط في الأبره وطبعا اليوم كلو كنت بحاول أدخل الخيط لحدي ما أمي تنتهي من شغلها 😓 وامي اصلا ما عايزه الأبره بس بتقول لي أعمل كده عشان تشغلني أنسى الدقه واقعد جنبها لحدي ما تنتهي ( أمي كانت بتعمل الاشغال اليدويه بـ الخرز وتبيعها ) المغرب جا محمد داخل من الشارع قال لأمي البنت دي تاني ما ألقاها في الشارع انا زاتو ما عارف جبتيها لييييه 😒 ؟؟ أمي قالت ليهو بصوت عالي وحاد محمد ما أسمعك تاني تقول كده دي أختك 😡 صّر لي وشو ومشى وطبعا بسبب محمد أخوي ما عندي صحبات في الحي 😔 الصباح بمشي المدرسه والعصر بلعب براي في البيت ومرات بساعد أمي او بالأصح هي بتشتغل وانا بتفرج فيها " يوم سألتها يا أمي انتي محمد أخوي صح 😊 ؟؟ قالت لي ده سؤال شنو يا بتي اي أخوك 😊 قلت ليها طيب ليييه إسمو محمد عبدالله مش المفروض يكون إسمو محمد صلاح زي إسمي 😓 ؟؟ قالت لي لااا عشان انتي ابوك مختلف انا اول عرست أبو محمد وإتطلقت منو وبعدها عرست أبوك ربنا يرحمو 😔 قلت ليها اهااااا كده فهمت طيب ليييه محمد ما بيحبني ودايما بيشاكلني قالت لي ما تقولي كده أكيد بيحبك بس خايف عليك ✋ طبعا إسمي شجن وعندي أخ واحد إسمو محمد وامي إسمها مريم 😍 وبالرغم من صعوبة الوضع المعيشي بس أمي ما قصرت معانا كانت بتعمل كل ما في وسعها عشان توفر لينا لقمة العيش ومصاريف المدرسه 😔 كانت نموذج للمرأه المكافحه بتعمل الكسره والشطه والدكوه وأعمال الخرز والصباح بتفرشهم تبيعهم في الشارع يوم تلقى قروش كافيه ما بتحرمنا من حاجه 😍 ويوم ما تلقى أرباح بناكل كسره بـ مويه يعني نحن أسره في قمة البساطه ✋ انا بدرس في الصف الثالث إبتدائي ومحمد بيدرس في الصف السادس وكنا متفوقين في الدراسه 😌

في يوم العصر الباب دق وكـ العاده محمد كان بيلعب كوره في الشارع أمي قالت لي شجن أمشي أفتحي الباب ح يكون ده أخوك 😊 وفعلا مشيت أفتحو وانا صّاره وشي وبقلبي بقول يعني هو يلعب في الشارع ويمنعني وهسي افتح ليهو الباب عشان يدخل البيت 😒 والله ما أفتح ان شاء الله ينوم في الشارع 😌 في اللحظه دي الباب دقه للمره التانيه عاينت بـ فتحه صغيره في الباب عشان أعاين لـ محمد بس إتخلعت 😱 ورجعت بسرعه وانا خايفه وبقول يا أووومي اووومي شو شو شوفتي 😢 قالت لي يا بتي براحه في شنو والـ في الباب منو 😳 قلت ليها شو شو شوفتي دا دا الراجل الشرير جا 😢 قالت لي خلاص ادخلي جوا ح أفتح الباب أنا ✋ وأمي ماشه على الباب قلت ليها ما تفتحي عشان ما يشاكلك زي كل مره دا شرير ما تفتحي ليهو 😢 أمي قالت لي أهدي ما بيعمل حاجه وفعلا فتحت الباب ""

يتبــــع ⏪⏪⏪⏪

#ليس_ذنبي2
بقلم:أشجان الجعلي

أمی فتحت الباب وقالت لیهو عايز شنو يا عبدالله 😒 ؟؟ قال ليها تفتكري عايز اطمن عليك مثلا 😏 ح أكون عايز منك شنو غير القروش 😓 !! قالت ليهو الليله كنت تعبانه ما قدرت أمشي الشغل 😔 بدأ يصرخ بأعلى صوت لم ما عندك قروش قاعده ليييه في البيت 😠 قالت ليهو عبدالله ما عايزين فضيحه في الحي والله دي اخر ورقه معاي وسلمتو 50 جنيه قال ليها هسي دي بتعمل شنو 😠 قالت ليهو والله ده كل الـ عندي ✋ بعد طلع قلت ليها يا أمي ليييه الراجل الشرير ده كل مره بيشيل منك قروش 😒 قالت لي عشان محمد يعيش معانا لانو المفروض بعد كبر يمشي مع أبو عبد الله بس انا بدفع ليهو بدل محمد قروش 😊 قلت ليها خلاص ادفعي ليهو القروش حقتنا كلها نحن عايزين محمد ما عايزين القروش ✋ بالرغم من انو محمد كان بيعتبري عدو بالنسبه ليهو بس أنا كنت بحبو شديييد 😍 أمي قالت لي بس أحزرك ما تقولي لـ محمد كده ولا يعرف أبوهو جا هنا تمام ✋ هزيت ليها راسي حاضر قالت لي بتي الفالحه 😍 قلت ليها لو أبوي حي ما كان رفع صوتو عليك زي أبو محمد صاح 😢 قالت لي ربنا يرحمو 😔 المغرب محمد جا داخل من الشارع قال لأمي عايز قروش أمشي إشتري طعميه 😊 قالت ليهو ما عندي قال ليها بس إنتي وعدتيني إنو نتعشى طعميه 😒 قالت ليهو صاح بس القروش وقعت مني لكن والله بكره بعد إشتغل ح إشتريها ليكم ورفعت راسها أدتني نظره إني أسكت وما أحكي الحصل 😒 بس محمد زعل ونام جيعان من غير عشاء وانا أمي عملت لي كسره بـ لبن أكلت ونومت 😓 طبعا عبدالله (أبو محمد) شخص حياتو كلها سكر يشيل من امي القروش عشان يسكر بيها 😓 المهم الصباح بنمشي المدرسه واخر اليوم بنمشي لأمي محل بتبيع وبنرجع البيت مع بعض ✋ عدت السنين وامتحنت شهادة الأساس وكنت الأولى في المدرسه واحرزت 276 من غير دروس خاصه احرزتها بالإجتهاد الشخصي 😍 المدرسه كرمتني بمبلغ مادي بس اتنازلت بالقروش لـ محمد عشان ممتحن الشهاده الثانويه ومحتاج لـ مزكرات مراجعه 😔 وفعلا محمد نجح واحرز 88 وبرضو عن طريق مجهودو الشخصي ✋ كنت بهظر معاهو واقول ليهو ده بفضل قروشي 😌 قال لي ح إشتغل وارجعها ليك أضعاف 😒 وأنا كنت بحاول أقرب المسافه البينا أنا ومحمد مع إنو ما عارفه سبب العداوه شنو ؟؟ وأقل غلط كنت بعملو بعدها بسمع محمد يقول لأمي إنتي غلطانه عشان جبتيها بس ما كنت فاهمه قصدو 😔 وعدت الـ 3 سنين محمد دخل هندسه ميكانيكيه وانا ممتحنه الشهاده السودانيه بس أمي كترة الشغل أهلكتها مره تطلع تشتغل ومره يغلبها فـ بتقعد في البيت 😢 امتحنت التجريبي وأحرزت 96 % وقريب لـ مواعيد إمتحان الشهاده أمي مرضت شديييييد ورقدت مستشفى 😢 فـ إضطريت أغيب إسبوع من المدرسه وقلت ما مشكله ح أعوض الدروس ✋ بس حالة أمي الصحيه كانت متدهوره ومحمد إضطر انو يجمد السنه ويشتغل في ورشه صناعيه عشان نتحصل علي مصاريف البيت 😔 وكل يوم المديره تتصل بي عشان أنزل لأنو معتمدين علي في نجاح المدرسه وانا كل ما أشوف حالة أمي الصحيه كنت برفض أنزل وبزيد في المده ✋ الإسبوع إتحول لـ شهر والشهر بقى شهرين لحدي ما تركت المدرسه خااالص 😔 لأنو أمي ظهر ليها غضروف وما بتقدر تشتغل زي زمان فـ إضريت إشتغل أنا بدلها بس في الحقيقه كنت زعلانه علي وضعي وإني ما ح أكمل دراسي وخاصه كان حلمي أكون دكتوره بس تأتي الرياح بما لا تشتهي السفن وكان ده قدري 😔✋ ومحمد كان بيقول لي انتي فاكره الجامعه حلوه بالعكس الجامعه كلها فساد ومخدرات الحمد لله الـ ما دخلتيها وانا متأكده بقول لي كده عشان يخفف من زعلي 😔 وحتى محمد ترك الجامعه وإشتغل صنايعي في ورشه وأمي بتعوس الكسره وانا بقعد مكانها أبيعها والحمدلله حالنا ماشي 😔 بسبب مرض أمي إتحسن علاقنا أنا ومحمد بسيييط ويوم كـالعاده قاعده بسترزق جا عبد الله (أبو محمد) قال لي عايز قروش قلت ليهو ما عندي قال لي إنتي منو عشان تمنعيني القروش 😠 ؟؟ قلت ليهو بس والله ما عندي لسه ما بعت حاجه يا دوووب فرشت الحاجات 😓 قال لي بـ إنفعال وانتي بوشك المنحوس ده ح تبيعي شنو ؟؟ يعني إنتي ح تكوني أحسن من أمك 😡 قلت ليهو لو سمحت ما تغلط في أمي قال لي إنتي بتتكلمي عن أمك منو ؟؟ بس ما تكوني فاكره انو بالجد مريم امك وقعد يضحك بسخريه 😂 اقول ليك الحقيقه إنتي أمك منو زاتها ما معروفه بس أحسن حاجه عملتها إنو رمتك في دار الأيتام ومريم غلطت لم إتبنتك ✋ طبعا انا بسمع فيهو ومخلوعه وفي خاله قاعده جنبي بتبيع قالت ليهو عبدالله مافي داعي للكلام ده 😠 قال ليها خليها التعرف حقيقتها أنا من زمان ساكت ومستحلها لأنو مريم كانت بتدفع لي قروش عشان ما أكلمها بس هسي إسبوع كامل ما دفعو لي ولأ جنيه 😒 الخاله قالت ليهو برضو ما من حقك تكلمها اولى إنها تعرف من مريم 😒 وأنا بقلبي بقول ده شنو البيحصل ده !! وديل بيتكلمو عن شنو ما فاهمه حاجه 😳 وفي الحظه دي ما شعرت الأ وانا جاريه والدموع نازله ولااازم أمشي لـ أمي أحكي ليها عشان تشرح لي بس خايفه أتصدم ويطلع كلام عبد الله صاح لاااا

إستحاااله 😭

وفي الجانب الآخر :
في واحد سائق العربيه وبيتكلم بالتلفون يا أمي قلت ليك سماح دي انا ما عندي بيها علاقه وأمشي معاها بصفتي شنو 😓 ياااخ صاح هي بنت خالي بس في مليون واحد غيري ممكن يوصلها وبعدين البيخططو ليهو هي وامها ده إستحاله يتحقق ✋امو قالت ليهو سماح زينة البنات لحدهن وما بتلقى أحسن منها 😍 قال ليها يا أمي سماح ما بتنفع معاي أفهموني
طاااااخ يا سااااتر يا ساااااتر ""

يتبــــع ⏪⏪⏪⏪