#ذات_عناق(20)
#شهد_عبدالله

من اللحظهه دي انا ابوك واخوك شي ،من اللحظه دي ياااا شهد اعتبريني ابوك وقولي ي ماهر،
فضلتهه ببكي وانا ساكته بعد مساااافهه قلتهه ليهو انا مشتاقهه ليهو،مشتاقهه ليهو شديد كيف في لمح البصر كدة يخليني ويمشي م قادرة انا بجد م قادرة😭💔بقى يقول لي كفى ي شهد الله يرضى عليك كفى،قلته ليهو ماهر انت م حتقدر تفهمني انت م قادر تحس بالأنا حاسهه بيهو والله العظيم تلاتهه انا م قادرة اتنفس حتى😭😭💔بقيت مغطيهه وشي بي يدي وببكي ،نزل لي يدي ومسكهم وشال منديل مسح لي دموعي وقال لي انا هنا عشان قادر احس بيك وفي نفس الوقت خايف عليك نحن فقدنا ابوك ايوة بس كمان م حمل انو افقدك انتي كمان فهمتي؟الله يرضى عليك ي شهد حاولي اتماسكي ولو شويهه بس حنعدي الفترة دي وحندعي ليهو كتير وحنعمل ليهو صدقات جاريهه ،
قلتهه ليهو حنعديها كيف؟م اعتقد انو الفترة دي حتعدي مافي اسوأ من كدة،سكت مساااافهه وضغط على يدي شديد وقال لي انا هنا عشان اعديها معاك ي شهد ،
فضلتهه ساكتهه ،اتحرك بالعربيهه،قلته ليهو ماشي وين؟قال لي حنمشي مشوار قريب وحنجي راجعين،فضلتهه ساكتهه وهو ماشي وقف ونزل وجا راجع وانا ابداً م رفعتهه راسي ولا عاينتهه حوالي،قال لي يلا ي شهد امسكي،
قلته ليهو شنوو؟
قال لي انا على علم انو انتي اليوم من الصباح م اكلتي شي وبدون نقاش او عناد وقوة راس حتاكلي وانا م باخد رايك في الموضوع دة او بخيرك لا انا حأجبرك،
قلته ليهو م عايزة وعاينته بالشباك،لفهه لي راسي على اتجاهو وقال لي حتاكلي ي شهد،
قلتهه ليهو ماهر الله يخليك..
قال لي حتاكلي ي شهههد
قلته ليهو بصوت عالي ياخي م عايزة كان ماسك العصير في يدو لزيتو اتكشح فيهو
سكتت مسااافهه وقال لي م اشكال برضو حتاكلي امسكي ي شهد ولو بسيط،مادي لي السندوتش وانا مربعه يدي،خته العصير جنب وقرب يدو على خشمي لغايه م وصلها شفايفي قال لي يلا ،
عارفه انو لو م اكلت م حيخليني اكلته منها بسيط بطرف اسناني وقلته ليهو خلاص،قال لي لا تاني،لغايه م اكلته جزء معقول منها قال لي العصير،قلته ليه م عايزة وم تجبرني علشان هنزل من العربيهه،
قال لي طيب،اتحرك رجعنا البيت قبل م انزل قال لي تلفونك شغال؟قلته ليه م عارفاه وين،قال لي طيب ي شهد الله يرضى عليك م اوصيك على نفسك عشان خاطر امك تمام؟
فضلته ساكته،قال لي شهد ،قلته ليهو طيب،قال لي اسمعي الكلام وم تخليني اقلق عليك وكل شويهه اتصل على لُجين واكلي ي شهد حاضر؟
هزيت ليهو راسي،قال لي يلا وخلي بالك زي م قلته ليك،نزلته من العربيهه ودخلته ،بيتنا كان لسسسه ملان ناس لسسسه اهلو واهل امو قاعدين علشان يصبرونا وكدة،دخلته غرفتي لقيت لجين ومناسك،مناسك قالت لي مالك اتأخرتي كدة كل دة كان تحنيس علشان تاكلي؟ان شاءالله يكون اقنعك علشان عمل لي هيديك بالمكالمات شهد وين اكلت ،شربت، نامت ،هي كويسه...الخ
مناسك قالت ليها احا من الإهتمام جعلني ايا حاجهه في قلب ماهر محتاجهه النوع دة انا😭👣💔
لُجين قالت ليها بالجد we needed 💔
رقدتهه في سريري وختيت راسي في رجول لجين ونمت،بالفعل الفترة ديك ماما تعبت ورقدت مستشفى فترة بقينا مع مرض ماما وجري مستشفى حرفياً بقينا مُهلكين شعورياً والخوف زاد جوانا م عندنا اي قوة تحمل لخسارة زول مننا تاني،بعد م رجعناها البيت وشويه شويه ضاقت طعم العافيه الناس لسسسه كانت بتجي سواء تشيل الفاتحه او تحمد الله على سلامه امي وهكذا،بعد رقدت ماما في المستشفى بقيت احاول اني اتماسك وابقى قويه على الاقل قدامها،

البوجع اكتر انو ام حسام في بكا ابوي جات وكررت جيتها كذا مرة وكملت البكا فيني وطبعاً مع جوطه البكا والحاله النحن فيها ماف زول ركز معاها ابداً،اخر مرة جات بتزكر كانت بتقول لي اعفي لي ي بتي والشيطان شاطر والبني أدم بغلط وانا اذنبته في حقك وكان مفروض م اعمل كدة وحسام ولدي انا خربته طبعو وكان مفروض م يعمل كدة وخربته ليكم بيتكم وظلمتك ي بتي لكن ي بتي الهادي الله وانتي وحسام ربنا يهدي سركم الدنيا دي زايله ي بتي وما فيها شي امورو البسوي فيها ديك كُلها خلاها و...اليوم داك كانت بتتكلم معي وانا قاعدة في كرسي في طرف حيطه من حيط حوش بيتنا اظنها لمحتني بالصدفه،م لمحت انو مناسك وراها ف كانت بتتكلم معي وانا متنحه فيها م قادرة اقول ليها حرف كنت ماسكه سبحه إلكترونيه ،فجأة سمعته مناسك بتقول ليها ي زوله انتي كبيرة كدة وم عاقله؟حتحترمي نفسك متين انتي ؟م بتخجلي انتي ابداً م عندك ذرة خجل من نفسك؟البت حتى في وفاة ابوها وحالتها الهي فيها جايه تطبلي لي ولدك الني الباطل دة؟
قلته ليها مناسك!؟
قالت لي قفلي ي شهد بالله اسمعي ي خالهه وانا بمناداتي ليك ي خاله اهنت الخالات صراحه المهم انا م عايزة اجوط معاك وم عايزة اغلط فيك لانو دة م وقتو ولا مكانو لو سمحتي اتفضلي اطلعي من البيت دة من سكات عشان م اخليك تفتشي قطع غيار لكرامتك ،
قالت ليها انتي منو؟انا قدر امك
قالت ليها قدر امي وم محترمه نفسك وانا زول م محترم نفسو م برحمو لو

بقى ابوي الله يرضى عليك م تهيجي علي المصران واتخارجي من هنا،
وقفت مسااافه لما شافتني م فتحته خشمي طلعو مشت
مناسك قالت لي تحمد ربها انو الوقت م مناسب والا كان علقتها في السلك الشايك دة لمن راسها سخن...😒😐💔

في اللحظه دي انا ضحكتهه،مناسك دي حرفياً انا لو عملته السبعه وزمتها م بقدر اوفيها حقها ابداً،هي في كل الأحوال وقفت معي وقفهه ب ميهه راجل..

م بقدر اقول انو ماف زول م وقف جمبي في وفاة بابا كلهم سندوني بسسس دايماً في زول كدة بكون ليهو الدور الأعظم ،زول مقدر الحاله والوضع الانت فيهو،زول فارض نفسو عليك بالغصب،كل م تبعد منو بي سكه بطلع ليك بي سكه تانيه،قادر انو يخفف عنك ويضمد جروحك،قادر انو يحتويك ويتحملك بكل اشكال تقلباتك المزاجيهه ،قادر انو يعمل كل شي عشان يحسسك انو معاك ،لا بزهج ولا بمل منك حتى مع استمرار عنادك هو يرجع يحاول معاك من اول وجديد،ماهر كان البني أدم دة رغم كل السؤ الفيهو م بقدر انكر وقفتو معي وملازمتو لي سواء وجودو في المستشفى لمرض امي سواء جيتو لبيتنا كل يوم ،سواء كلامو الدايم معي ومحاولتو لي انو يخفف علي ،وصل لمرحله انو كان بتصل على لجين تجي من بيتهم لبيتنا علشان بس تشوفني مالي م برد عليه او ليه تلفوني مقفول،وبعمل نفس الشي مع مناسك،اول حاجه بعملها الصباح كانت انو يتصل علي يتكلم معي فتتتترة ،والنهار،واخر اليوم بقعد يحكي لي تفاصيل يومو الما منها اي نكهه بس علشان يمسك بي زمن وهكذا...

بعد م اخواني رجعو شغلهم فضلنا انا وماما ومنذر وحبوبه وجدو حتى ماما اهلها مشو بس في ناس بتجينا مرة مرة م دايماً،ف احتماليه اني ارجع اكتئب وارجع لحالتي ديك تاني كانت اكبر علشان كدة ماهر بقى يتقرب مني اكتر ورجلو دي ابداً م وقفت من بيتنا يومي بجينا وبتأكد اذا محتاجين حاجه او لا،عدت 3شهور ،3شهور وماما دي اصلاً دمعتها م وقفت من حزنها على بابا بدل م اواسي نفسي كنت بقعد اواسيها ،
بعد الأيام دي عدت يوم ماهر جا البيت سلم علينا لما قام طالع قال لي عايزك 5دقايق برة ،قلته ليهو طيب،طلعتهه معاه فتح لي باب العربيه،ركبته ،قال لي بعد كدة مش كفانا قُعاد بيت؟
قلته ليهو م فهمت؟
قال لي مش مفروض تنزلي الجامعه بعد كدة؟
سكتته مسافه حتى قلته ليهو لا ابداً م وقتها ي ماهر
قال لي والمعنى؟
قلته ليهو المعنى واضح م حأنزل السنه ويمكن البعدها برضو م انزل ويمكن ابداً م انزل
قال لي لا ي حبيبي م على كيفك ولا بمزاجك علشان تقولي كدة
قلته ليهو لا بمزاجي معليش انت فاكر نفسك منو علشان تفرض علي رايك وتقول لي المفروض اعملو والمفروض لا؟معليش بس حاول تلزم حدودك ي ريت تقدم لي الخدمه دي بس
فضل ساكت مسافه حتى قال لي م علينا المهم حتنزلي متين لأنو الناس دي عبرت في السمستر
قلته ليهو ماهر انت م بتفهم ولا م مستوعب انا بقول في شنو ولا بتتغابى؟
قال لي لأ م بتغابى انا مستوعب الغباء دة الانتي بتقولي فيهو دة وماف حاجه اسمها ما حأنزل جامعه وحأضيع السنه
قلته ليهو انت بتقول كدة بأي حق؟
قال لي حقوق الدنيا كلها ي شهد م تجادلي
قلته ليهو م حأنزل جامعه ي ماهر م حأنزل ابداً انتهى
قال لي لييييهه عشان شنو؟
فكرك انو قعدتك في البيت بين اربعه حيطان حتخليك تتجاوزي شي؟
قلته ليهو انا م عايزة اتجاوز انت عايزني اتجاوز ابوي؟عايزني انسى ابوي واعيش بصورة طبيعيهه؟بأي منطق انت بتقول كدة؟كيف بس كيف؟
ساق العربيه بكل عصبيه وبقى سايق وقف في مكان م بعيد مننا في الزلط قال لي شايفه المظلهه دي؟اقري الاسم المكتوب فيها "مظله المرحوم عبدالله"

تاني اتحرك مشينا مسافه وقف العربيه قال لي شايفه الكولرز دي؟اقري المكتوب عليها،اتحرك مشى مسافهه وقف العربيه قدام مسجد قال لي شايفه المسجد دة اتوزعت فيه 4كولرات واكتر من 500نسخه مصحف والمدرسه الوراه 4كولرات واكتر من 250شجرة ولسسسه كل الحجات دي بإسم ابوك وصدقات جاريه ليهو ،الابو م بتنسي بالصدقات وبالدعوات ي شهد م في انك تحبسي نفسك وتوقفي حياتك ابداً راجعي نفسك حتلقيهو هو نفسو كان عايزك تخلصي دراستك وتتخرجي وتعيشي صح مش انك تقعدي تتحسري وتندمي على فراقو وانت م مقدمه ليه اي شي غير انك بتعذبيه في قبرو،طيب هو كدة حيرضى عليك؟
م اعتقد ي شهد م اعتقد ولسسسه بتقولي لي بأي حق ،الكلام دة قوليهو لنفسك اسألي نفسك السؤال دة بأي حق بتهدمي تعب زول عاش حياتو كلها عشان بس يشوفك الأفضل دايماً؟؟
مش كفايه انو كان نفسو يشوفك دكتورة وم حصل العايزو؟طيب حتى رغبتو في انك تخلصي دراستك عايزة تقوي راسك فيها؟ قعدتهه ابكي كلامو وجعني ،وهو كان بتكلم بي إنفعال شديد لما شافني ببكي غير نبرة صوتو واخد نفس عميق وبقى يقول لي شهد انا م بتكلم معاك عشان تبكي لا ابداً بس انا بتهمني مصلحتك زي بهمني انو تكوني م بخير،هل انا غلطان في كدة؟انا م لفيت بيك اللفه دي كلها عشان اقول ليك شوفي نحن عملنا شنو لا بس عايزك تشوفي الحجات المحتاجها ابوك وممكن تخفف عليهو كتير وتنور قبرو،انتي فاهماني ي شهد صححح؟
هزيت ليهو راسي وانا ب

تنهد
قال لي طيب نرجع لموضوعنا الاساسي اليوم التلات الأحد حتنزلي الجامعه تمام؟
قلته ليهو ماهر انا...
قاطعني قال لي بدون نقاش ي شهد اصلا هم مما نزلو عدو شهر والسمستر كلو فيهو 4شهور او اقل حتتراكم عليك المواد وم حتقدري تتدرسي،
سكتت م رديت، رجعني البيت قبل م انزل قال لي حارسل ليك الجدول في الواتسب،دخلته البيت،اليوم التاني ماما ناقشتني في موضوع الجامعه قبل م انا اناقشها قالت لي اتصلت علي لجين وكلمتني انا واثقه انو ماهر هو الاتكلم معاها ومنذر برضو جا لقاها بتتكلم معي قال لي تنزلي و...الخ

بالفعل يوم الأحد نزلته بس بدون اي رغبه بس اداء واجب م اكتر،وانا في الطريق اتصل علي ماهر،اول م فتحته الخط قال لي وين وين؟قلته ليهو في الطريق،قال لي ايوة في الطريق وين بالظبط؟قلته ليهو قريبه من الجامعه،قال لي طيب تمام لما تصلي اديني خبر،قلته ليهو ماشي،وصلته الجامعه بركنته عربيتي وانا داخله لقيتو واقف مع مدخل الباب،م مستغربه طبعاً لانو بقى ماف شي بستصعب عليه ولا في شي بعيد عليه،قال لي صباح الخير،قلته ليهو صباح النور،كنت لابسه فستان اسود وشبط اسود الطرحه والشنطه بس مختلفات،
طبعاً في اللحظه دي اتزكرته اول يوم لي في الجامعه وجيتو لي على نفس الهيئه بس الاختلاف انو في حجات كتيرة اتغيرت وماف حيرجعها زي م كانت مهما حصل💔
قال لي انتي كويسه؟
سكتته مسافهه بعدها قلته ليهو ماهر شكراً شديد على خدماتك القدمتها من وفلة ابوي لغايه اللحظه دي سعيك مشكور في كل شي قدمتو ي ريت تحاول تخليني في حالي وعلى راحتي بعد كدة وبطل تضغطي علي انا م محتاجه شفقتك علي وفي غنى عنها عايز تكسب فيني خير؟الحمدلله كسبته فيني خير ووقفته معي ووصلتني لغايه هنا انا قادرة اقيف على حيلي واسند نفسي بعد كدة لو في حاجه حتقدر تقدمها لي هي انك تخليني في حالي وتديني مساحتي وبطل تخنقني بالبتعمل فيهو دة ي ريت بس تحاول تتفهمني😊
ملامح وشو اتغيرت 180درجه سكت لحظات كدة بعدها قال لي طيب تمام خلي بالك من نفسك وابقي عافيهه...❤
دخلته الجامعه من غير م اعاين ليهو ،في حاجز كبير بيني وبينو اتبنى مهما عمل م مخلي يلين تجاهو،م قادرة اتعامل معاه فكرة تعاملي معاه بشكل طبيعي براها بترجعني الف خطوة ورا حتى ولو بدون قصد هو سبب في حجات كتيرة سيئه انا عشتها ودي حاجه خصمت منو حقو في قلبي كتير وبقى في خمول في مشاعري من ناحيتي تجاهو دة غير انو بحاول انو يخليني ارجع اتعامل معاه بشكل طبيعي تخيلو بعد كل الانا عشتو والمعاناة ديك حأقدر ارجع اتعامل معاه بشكل طبيعي؟م عارف انو سذاجتي هو سبب في انو انا اتخلص منها احساس انك م كاره زول بس بطنك طامه منو دهه اسوأ من الكراهيهه نفسها...💔

دخلته الجامعه كنت متخيله نفسي هبكي بعد كلامي معاه دة بس ابداً م حصل كدة حتى قلبي م وخزني ،اتلاقيت مع لجين قعدته معاها فترة،طبعاٌ هم في رابع وانا في تانيهه ي دوب الاحساس ده كان حار شديد ومعظم الدفعه جات سلمت علي وكل واحد فيهم بسأل الف سؤال و...

ماهر من يومها م رجع كلمني ابداً بس في يوم وانا في الجامعه مع لجين وطيف قالت لي شهد انتي مالك مع ماهر؟
قلته ليها مالي؟
قالت لي م متواصلين مع بعض صح؟
قلته ليها يعني م شديد
قالت لي م شديد ولا ابداً؟قلته ليها ليييه السؤال؟هو حكى ليك؟
قالت لي ماف شي بس كدة...
قلته ليها بحاول اخلي حدود في تعاملي معاهو علشان الفيني مكفيني بس م اكتر،

...
في يوم طلعته اجيب حجات للبيت بالعربيه نسبه لي انو منذر قال حيتأخر وواقف في صف بنزين،مشيت السوق اشتريت الخضار وجيت راجعه السوبر ماركت اشتريت كل حجاتنا ومع زحمه الشوارع جيت راجعه بعد المغرب والدنيا ضلام،وقفته العربيه وفتحته الكبوت علشان اطلع الحجات فجأة سمعته صوت حسام وهو بق ل لي شهد،اتلفتهه مخلوعه لقيتو واقف على بعد خطوة واحدة مني،
قال لي كيفكك؟
فضلته ساكته وانا م قادرة احرك رجلي من الخوف،قال لي م قادر اتواصل معاك ولا بأي طريقه من الطرق حتى في وفاة ابوك م قدرته اقيف جمبك،قلته ليهو حسام اتحرك من جمبي،قال لي انا مشتاق ليك شديد ،شديد ي شهد
حسيتو م واعي،عايز اتحرك مسكني من يدي وقال لي عايز اتكلم معاك ،بقيت اتقالع معاه علشان افك منو يدي مسكني بكل قوتو وقال لي انتي خايفهه مني لييييه انا بس عايز اتكلم معاك ي شهد عايز نتفاهم ي شهد الحصل بينا داك كلو كان جهل مني وسؤ تفاهم ومفروض نقعد ونحلو ي...عيني وقعت على كيس فينو علبه صلصله شلتها على طول وضربتها بيهو في يدو وجريت على بابنا وبقيت ضاغطهه على الجرس وبضرب في الباب بسرعهه من الخوف ،
فجأة الباب فتح كانت البت الشغاله معانا بتعاين لي وهي زاتها مخلوعه،اتلفتهه وراي م شايفه حسام،
البت قالت لي انت كويس؟
قلته ليها افتحي لي الباب عايزة ادخل العربيه،
دخلته العربيه ماما وحبوبه بقو يسألو فيني مالي والحاصل علي شنو و....م قدرته اقول ليهم حسام اتعرض لي علشان هم لو عرفو ممكن يعملو موال ومنذر ممكن يقوم الدنيا وم يقعدها قلته ليهم مصدعه بس وعايزاكم تفتحو الباب

بسرعه،نزلته الحجات من العربيه دخلناهم المطبخ ودخلته غرفتي وانا الخوف متملكني م مستوعبه انو الحصل حصل وانتهى،اخدته لي غفوه اتخيل لي مسكه حسام ومقاومتي ليهو وانو ضربني و...صحيت مخلوعه بقيت اتلفت في الغرفه ودموعي جاريه شلته تلفوني وعلى طول اتصلته لي ماهر الساعه كانت 11مساء،اول م فتح الخط قال لي شهد؟
فضلته ساكته
قال لي الوووو؟
بقيت ابكي ليهو في الخط ،
بقى يقول لي بي لهفهه انتي كويسه؟حاصل ليك شي؟امك كويسه ي شهد في شنووو؟اجي عليك؟جاي عليكم انا طيب
بعد ربع ساعهه من البكا قلته ليهو لا م تجي ماف شي انا بس متضايقهه وخايفهه وم قادرة انوم صحيت من النوم مخلوعه بس دة كل الحاصل،قال لي خايفه من شنووو؟والمضايقك شنو احكي لي؟
قلته ليهو ماف شي محدد انا متضايقهه من حياتي دي كلها ي ماهر ماف شي م مضايقني فيها😭💔قال لي م تبكي ي شهد وقولي لي في شنو بس؟احكي لي حتى لو م حلينا المشكله اكون قدرته اخفف عليك م توتريني
فضلته ببكي وانا ساكته م بقدر احكي ليهو هو زيو زي منذر حيعمل موال
قلته ليهو خلاص ماف شي قفلته الخط رجع اتصل،فصلته في وشو تاني رجع اتصل رديت ليه قلته ليهو ماهر بجد ماف شي خليني في حالي ،
قال لي اخليك؟لو خليتك وانتي كدة احتمال كبير بكرة يلقوني ميت من الزعل ،
قلته ليهو بس ماف شي يتحكي بجد انا بس متضايقه وصحيت مخلوعه اسفهه اذا ازعجتك،قال لي ي بت ي هبلهه اعترف ليك بحاجه؟
سكتت،قال لي اقولها ولا لأ؟قلته ليهو قول،
قال لي انا اصلاٌ بخلي التلفون فاتح طول الليل عشانك،بكون قلقان عليك ومتردد م بين اتصل وم اتصل حالي كل يوم كدة💔فضلته ساكته ولسسه ببكي،قال لي حأقرأ ليك قرءان افتحي الاسبيكر وختي التلفون جمبك وحاولي نومي طيب ي شهد؟
فضلته ساكته وفاتحه الخط وهو بدأ يقرا سورة يوسف،يعني ي سبحان صوتو في التلاوة حاجه كدة خرافيه وكمان بي تجويد،فضلته فاتحه الخط والتلفون جمب راسي م عارفه بعدها نمت كيف او حصل شنو او بعدها قال شنو المهم كل العارفاه انو جاتني حاله من الهدؤ بصوتو وهو بقرأ ونمت...❤

محاولات حسام في انو يتعرض لي في الطريق اتكررت مرة واتنين وتلاته كأنو كان براقبني اول م يشوفني بطلع في العربيه من البيت بجي وراي ،حكيت لي لُجين قالت لي وانتي ساكته ليييهه؟ي شهد السكوت دة الكان مضيعك وحيضيعكك لسسسهه كلمي منذر خلي يتصرف معاه افتحي فيهو بلاغ كتبيهو تعهد وقفيهو في حدو،قلته ليها م بقدر لو حكيت لي منذر الحيحصل م خير ي لُجين،قالت لي ولو م حكيتي برضو الحيحصل ليك م خير وم بتقدري تضمني الممكن يحصل ليك شنو من الراجل دة ي شهد،قلته ليها م بقدر يعمل شي...

...
بعد يومين من الكلام دة جا منذر لقانا كُلنا قاعدين مع بعض ماما وجدو وحبوبه،قال لي شهد اعملي لي قهوة،عملتها ليهو لما جيت راجعه لقيتو بقول "اصلاً البيت كبير وفاضي انا معظم الوقت حأكون برة البيت وانتو حتكونو براكم عشان كدة لقيت شقه مختصرة في الرياض ومناسبهه وسنتر ،اديتو القهوة وقلته ليهو كيف يعني م فهمت عايز ترحلنا من بيتنا؟
قال لي اي ي شهد
بقيت اعاين ليهو واعاين لي ماما
جدو قال ليهو والله ي ولدي هو من ناحيه قرار سليم لأنو فعلاً البيت كبير شديد امك واختك براهم م بتقعد ليهم
قلته ليهو كيف يعني ي جدو وانتو حتمشو وين تخلونا؟
جدو قال لي ي بتي نحن م عندنا قعدة بعد كدة شهر بالكتير حنرجع
قلته ليهو حترجعوو؟
منذر قال لي عشان كدة حسام قال نرحل
قلته ليهو نرحل ونخلي بيتنا فاضي!؟انتو مجانين؟حسام اكيد م طبيعي،منذر قال ي زولهه مجانين كيف يعني م تقلي ادبك،قلته ليهو ايوة مجانين متين ابوي دخل تحت التراب عشان نفضي البيت ونرحل؟ونرحل نمشي وين ودة بيتنا الكبير القمنا فيهو من اتولدنا ؟قال لي الموضوع منتهي الشقهه اتلقت بالكتير حنرحل الاسبوع الجاي واصلاً م حنشيل حجات كتيرة لانو الشقه م بتحتاج،
قلته ليهو معناها انت م جاي تشاور انتو مقررين سلفاً؟!
قال لي الموضوع م محتاج تشاور
قلته ليهو م على كيفكم كيف يعني م محتاج...
قبل م اتم كلامي ماما قالت لي شهد اسكتي،
قلته ليها بتسكتيني انا ومؤيدة كلام اولادك الهم اساساً غلط اصلاً دة الطبيعي بتاعك ي امي الطبيعي بتاعك وخليتهم ودخلته غرفتي قعدته ابكي جات حبوبه قعدت تحنس فيني وتتكلم معي وتقول لي ي بتي اخوانك الكبار ديل بعد كدة بقو وليانك هم البقيفو في راسك لو حصل اي شي م تعانديهم وم تختلفي معاهم هم اي شي بقولوه لمصلحتك،
اسمعي كلامهم وم تعانديهم الله يرضى عليك ي بتي الله يرضى عليك م تعملي مشاكل مع اخوانك ابوكم مات خلاكم مستورين خليكم كدة وامكم دي م حمل مهاترات وجوطه و...الخ

بالليل طلعته من غرفتي ماشه على غرفه ماما اشوفها سامعه صوت منذر معاها وكان بقول "هي م اتكلمت لكن هو قاعد يضايقها في الشارع يومي ي امي لا مرة لا مرتين حكت لي صحبتها الحلبيهه دي وصحبتها دي اظنها حكت لي ماهر اتصل علي وقال لي عايز اشوفك لما لاقيتو حكى لي الموضوع،وهو نفسو الاقترح علي حكايه الرحول دي اللي هي افضل حل لأنو نحن م ضامنين

الزول دة ممكن يعمل شنو عادي ممكن يتصرف اي تصرف م سليم ويزيد في تعرضو ليها لأنو ضامن انها م حتتكلم وكلامو صحح ي امي م دايماً انا متوفر وم معروف الممكن يحصل شنو الرحول افضل حل مبدئياً حارحلكم من هنا حتى نحن حنقدر نتفاهم معاهو بطريقتنا بعدين،فهمتي انا لييهه مُصر على حكايه الرحول دي؟

رجعته غرفتي وانا شواطين الدنيا بتتنطط في راسي يعني الفكرة اساساً فكرة ماهر حتى في دي حاشر مناخرو،شلته التلفون اتصلته عليه اول م فتح الخط قلته ليهو انت م حتبطل تدخل في حجات م بتخصك ابداً؟ياخي م كفايه الانا عشتو ولسسسهه بعاني منو بسببك؟م كفايه انك كرهتني في حياتي؟انت جاي تعمل فيها بتخاف علي ؟انت ناسي الطريقهه الاتخليت عني بيها؟خوفك علي دة كان وين لما انا كنت بعاني ؟ناسي الجمله بتاعه "يوم متين انا بفرق معي زول؟اسي بقيت بفرق معاك؟ياخي انا بكرهك،بكرهكك وبكره اليوم والأسباب والمواقف الجمعتني ،اطلع من الدور الانت متغمصو دة ي ماهر ياخي انا هنت عليك للدرجه اللي حتى م فكرته تسأل عني فيها ولا بالغلط ،انت م عملته لا حساب للعشرة ولا حساب لي جمله انت اقرب زول لي ي ماهر ياخي بتخاف علي كيف وانا وريتك الحته البتوجعني وانت ضغطتهه علي فيها؟م تخاف علي ابداً لانو انا نفسي بخاف منك خاف علي منك ي ماهر كل تصرف بطلع منك غير بيأذيني م بضيف لي شي عايز شنو انت عايز شنو اكتر من كدة بس كدة فهمني؟حتى بيت ابوي م عايز تخليني فيهو حتكون مرتاح لو شفتني في جهنم؟ياخي ارحمني منك ومن افكارك ومقترحاتك وخليك في حالك الله يرضى عليك،قال لي م هو انا لما بحاول اكون في حالي بلقاك انتي حالي لوميني وقولي العايزاه النتيجهه واحدة م شرط ترجع علاقتنا زي م هي ودي اخر اهتماماتي ،المهم عندي انتي ي شهدي انتي بتهميني والفكرة الراسماها في بالك بتاعه اني بعمل كدة بدافع الشفقه دي حاولي طلعيها من راسك انا امي م بشفق عليها ي شهد...

...
شهد بتتكلم عن جهنم وم شافت جهنم الانا عشتها فترة مشكلتنا مع بعض ولحظه شوفتي ليها وهي في الحاله المذريهه الشوفتها فيها ديكك،عذاب الضمير من لحظتها م فارقني ،اذنبته في حقها شديد لاني م فكرته اسأل منها بعد اليوم داك بس في اسباب كتيرة كانت مانعاني اولها انو البعد دة كان خيارها هي،م عارف كميه الهجوم والكره واللوم الهي رامياهو علي دة سببو شنو والحاجه دي مخلياني كاره نفسي جدا في شنو يعني بالظبط؟ً،انا عرفته انها اتزوجت بعد فترة من زواجها بالصدفه عمي حكا لي انها عرست زعلت شديد لسبب واحد انها م فكرت تكلمني حتى ولو بمسج بغض النظر عن مشكلتنا كنت متوقع انو البينا اكبر من كدة بكتير بعدين قعدتهه وربطتهه المواضيع مع بعض لقيت انو شهد في الفترة الأخيرة علاقتي بيها بقت متوترة شديد وكانت بتزعل من اقل شي وتخلق موضوع دة غير انو في حجات م بتستحق هي كانت بتكبرها كأنها كانت بتتعمد تخلق مشاكل بيني وبينها بعدين لقيت انو احتمال كبير انو الرابط بين الحاجتين ديل هو الزول الاتزوجتو دة يعني حالها حال اي بت لما ترتبط بي واحد عادي يطلب منها تقطع علاقتها مع كل البتعرفهم وعلى وجه التحديد الأولاد وعلى الاساس دة هي عملت كدة لانو المشكله البيني وبينها م كانت بتستحق دة كلو،م كانت بتستحق انها تقول لي شد حيلك وم تبقى باطل قالت لي اللفظ دة وهي اكتر زوله بتعرفني من دون الناس حتى ولو قدرته اتجاوز كل تصرفاتها الساذجه م كنت قادر اتجاوز اللفظين ديل ابداٌ ،في الأخير طلعت انا الهنت عليها م هي،هي فضلتني على غيري،هي الإختارت تبعد وعلى الأساس دة انا اتقبلته الواقع بس دة كلو م بيعني انها م بتهمني لا بالعكس شهد من فترة اكتر من طويله هي الاهتمام الوحيد الفي حياتي وحتفضل كدة حتى لو في بينا حواجز وعتب م بقدر اتخلى عنها حتى ولو هي عايزة كدة م حصل فرضتهه نفسي على زول بس هي الفارضهه مكانتها جواي كل شي عندي قابل للتجاوز الا هي ...💔

#ذات_عناق(21)
#شهد_عبدالله

ماهر قدر انو ياخد حيز كبير في بيتنا او قدر انو يكسب احترام وثقه اهلي فيهو وخلى جواهم تكون في معزة كبيرة خصوصاً انو علاقتو مع منذر كويسه شديد ف دي واحدة من الاسباب اللي خلت منذر م يقبل اي نقاش في موضوع الرحول،
اليوم التاني مشيت الجامعه واتفصمته في لُجين لأني م حكيت لزول غيرها قلته ليها انتي كيف تمشي تحكي لي ماهر؟انا حكيت ليك عشان تمشي تحكي ليهو؟
قالت لي عايزاني اعمل شنو يعني؟اسكت ؟انتي ضامنه الراجل دة؟عارفه الممكن يعملو حتى المستحيل عندك هو ممكن يعملو م كفايه العملو فيكك؟انتي م بتقري جرايد ولا بتابعي الاخبار ولا شايفه القضيه البتشطب الراس البعملوها الرجال المطلقين نسوانهم وغيرو؟خصوصاً انو انتو فاتحين في بعض شايفك في احسن حال طالعه ونازله بعربيتك ابسط شي ممكن يعملو يرش عليك مويه نار فكرك بعيدة عليهو الحاجه دي؟خصوصاً انو هو زول بتعاطى وبسكر ف لو انتي مستهونه بالموضوع انا لا ي شهد ..

بالفعل رحلنا من بيتنا للشقه القال عليها منذر،رحلتنا مناسك ولجين وطيف وجاتنا فاطمه بعد م كذبت على عدناني وقالت ليهو ماشه ابيت مع اهلي خلت اولادها في بيت اهلها وجاتنا ،الشقه مشطبه تشطيب جديد حتى نضيفهه منذر اجر ناس نضفوها نضاف شامل بس كان علينا نفرش الاساس وكدة،كانت كبيرة فيها 4غرف وهول كبير مقسوم على 2 ومطبخ جاهز وحمامات داخليه في الغرف وحمام خارجي وفيها بلكونه مساحتها كبييييرة شديد زي الحوش ،اكيد طبعاً م بتتقارن مع بيتنا ابداً وكلنا بينا وبين نفسنا م راضين بحكايه الرحول دي لا انا لا ماما لا منذر بس بنتنافق مع بعض علشان م تحصل مشكله بالذات ماما انا عارفه يعني شنو نبعدها من بيتها الفيهو ريحه ابوي وكل شي بتعلق بيهو وعاشوهو في البيت داك بالبساطه دي ،احياناً بحس انو انا استنزفته طاقه اهلي شديد ومعظم الاوقات هم بقدمو تنازلات بس علشان يحموني او يرضوني والحاجه دي مخليه جوان يكون في احساس بالذنب سديد💔،فضلنا يوم كامل داخلين ومارقين بنرتب نرفع ونخت ونقترح وضعيات و... ومنذر معانا طبعاً بس ماما وجدو وحبوبه لا ،نهايه اليوم اترمينا مُهلكين،كل واحد بعاين للتاني ،فجأة منذر جاتو مكالمه قال"الووو ؟ي حبيبنا كيفك،تمام الحمدلله،اي قاعدين والله وشبه خلصو شغل لكن حيلهم اتهد،لا ياخي م تتعب نفسك؟قريب يعني؟طيب تعال تعال ،خلاص تمام نازل ليك تمام،شال تلفونو وطلع
مناسك قالت لي جايهو صحبو ولا شنو؟
قلته ليها م عارفهه يمكن
قالت لي انا جعانهه..
لُجين قالت ليها وانا لجين ودي شهد ودي فاطمه اتشرفنا😹😷مناسك قالت ليها واو ظريفهه،قلته ليها منذر يجي نخليهو يمشي يجيب لينا عشاء ويجي انا زاتي جعانه،شويهه كدة منذر جا داخل شايل اكياس في يدو وكرتونه بيتزا،
مناسك قالت ليهو اخخخخخ حسيت بينا يعني الله عليك ي ملك ملوك الأحاسيس😭😭💔
ضحك قال ليها والله لا حسيت بيكم لا شي بس ماهر اتصل علي نزلته لقيتو جايب الحجات دي😂😹💔ختهه لينا الحجات في الصفرة وقال لينا استلمو،كان جايب بيتزا مقاس كبير،وشاورما وبيبسي وكمان اقاشي،
لُجين قالت لي احيييييناا من ود الزيني،
قلته ليها انا م لاقاني بني ادم م عندو كرامه واندل منو يعني بعد الفارغ السمعو داك لسسسهه عايز يبقى لزج💔
قالت لي جايب اقاشي وشاورما وبيبسي ي شهد انتي فاهمه؟دي الحجات الانتي بتحبيها يعني بس نحن لينا الله البنعرفهم كلهم خوازيق ورمم لا فهم لا احاسيس 😐💔

عاينته ليها بي طرف عيني بغيظ وسكته منها،
اليوم التاني منذر مشى جاب ماما وجدو وحبوبه الصباح،لما جا المساء كنا قاعدين في الغرفه انا ولجين بناخد وندي في الكلام فاطمه ومناسك رجعو اهلهم فضلت معي لُجين بس...
فجأة باب الغرفهه دق،حبوبه جات داخله قالت لي شهد تعالي جيبي مويه،قلته ليها انا تعبانه ياخ اجيب مويه لمنو؟!قالت لي في ضيوف برة قومي ي بت،
قمته وانا بطنطن،لجين قالت لي متين رحلتو لمن الجيران لحقو يجو😐💔قلته ليها انا عارفههه يخخخخخخ💔طلعته برة صارة وشي مشيت على المطبخ كان اشوف ماهر في وشي قبل م ابدي اي ردة فعل جدو قال لي وين المويه؟
دخلته المطبخ وانا بتنفض لقيتو ملان اكياس كميه كلها عبارة عن حجات قلته ياخ لما جابو الحجات دي ليه م دخلوها ادراجها دة شنو دة اسي شلته المويه وطلعته مشيت وديتها ليهو مديتها وانا ساكته جدو قال لي م بتسلمي؟ماما بقت تعاين لي وحبوبه كمان،قلته ليهو السلام عليكم،قال لي وعليكم السلام،
مديت ليهو الكبايه شالها وهو بعاين لي وعلى طول طلعته مشيت الغرفه وانا بقول"عارض "
لُجين قالت لي مالك ي بت فايرة؟
قلته ليها م افور كيف والزفت دة في وشي،
قالت لي منوووو؟
قلته ليها حيكون منو يعني ماهر!
قالت لي ماهر قاعد برة؟
قلته ليها ايوة،
قالت لي وانتي المضايقك شنووو؟
قلتهه ليها ماف ي لجين ماف،قالت لي طيب ناوليني قالب المكسرات دة معاك.

شويهه كدة حبوبه جات داخله قالت لينا قومو ي بنات تعالو رتبو حجات المطبخ دي في ادراجها،قلته ليها ي الله ياخ ي حبوبه هو منذر لما جاب الح

جات دي ليييه م رتبها؟
قالت لي منذر وين هو؟الحجات دي جابها الولد الجا دة م جابها منذر قومن رتبنها في ادراجها والعايز يدخلوه التلاجه دخلوهو الله يديه العافيه ولد هدي ورضي قومن،لجين قالت ليها حاضر ي حبوبه وقفت على حيلها وقالت لي يلا ي شهد،مشينا دخلنا المطبخ قالت لي ايييييك نحن نرتب ديل كلهم وين؟قلته ليها م عارفه المهم يلا ،كان جايب حجات كميه مواد تموينيه على غيرو،للفواكه والجبنه والزيتون جابهم ،
لجين قالت لي ماهر دة زوق جداً ي شهد ،قلته ليها بالنسبه ليك،
قالت لي ي شهد ليه الكُره دة كلو يخخخخ؟
قلته ليها لجين اكسري الحنك...💔💔💔

عدت الأيام على كدة م كان في بيني وبينو اي تواصل كدة مباشر بسمع بي سيرتو وسط اهلي بس،وماف جديد يزكر في حياتنا فضلنا انا وامي ومنذر في البيت برانا وبقيت مركزة مع الجامعه وشاغله نفسي بيها،مرة بالليل كدة وانا بقلب من فيس لي تويتر لي انستقرام وواتسب ،فتحته المسنجر شايفه ماهر اونلاين والزمن متأخر م عارفه بس فكرة انو اونلاين لي زمن متأخر كدة اكيد طبعاً م فاضي وفي امورو وحركاتو الخليتو عليها واكيد بتكلم مع بنات مساهر للزمن دة م شي بختلفو فيهو اتنين، و على حسب نفسياتي نزلته صورتي استوري في الواتسب وكتبتهه عليها"
بقيت شخصية" ديكتاتورية " جدآ
كنت زمان بقدر اقعد اتناقش و عندي مرونة اخد و ادي في الكلام بشكل ودي
حالياً بقيت م كدهه ..
بقيت بوفر مجهودي و بسكت أو بطلع بجمله "ربنا يصلح الحال أو اختصرك واقول ليك "إنت صح "..
الما بيعجبني م بقعد معاه .. و المكان الما مرتاحهه فيهو ببعد والبايع م بقيف اعاتبو ..
و الصاحب الندل بالناقص ..
بقيت ديكتاتورية و ماشه بمبدأ أنا صح و لو م صح دي حياتي و ماف زول طلب رأيك فيها💅💔
نزلتها بالليل والصباح لقيت رد من ماهر كاتب لي"الصاحب الندل"؟؟؟؟...💔
فتحته المسج وم رديت عليه وهو م رجع كلمني تاني ابداً...💔

في يوم دخلنا المكتبه وانا ولجين وطيف كانو بشرحو لي في مادة علشان جدول امتحاناتي نزل وعلى وشك وكدة ،فجأة طيف قالت لينا عايني دة بشبه ماهر بتاعك كيف ي شهد،رفعته راسي عاينته لواحد جاي داخل على المكتبه ،لجين قالت ليها بري ماف علاقه دة قليليوني شديد 😐💔قلته ليها وبعدين دي شنو ماهر بتاعك دة ؟؟
عاينت لي ولي لجين قالت لي م تبقي متحسسسهه زيادة عن اللزوم م قصدتهه بيها شي،لجين قالت لي بالمناسبه وين هو؟مختفي ليهو اسبوع م شايفاه لا واتسب لا غيرو ،قلته ليها وانا اعرف من وين ؟قالت لي شهد انتي متنرفزة كدة مالك نحن بنسأل هدي اعصابك م قصدي شي بس هو بجد مختفي م شايفاه في الواتسب ف قلت اسأل بس،
قلته ليهم خلاص
الجو اتكهرب م بينا فترة بسيطه بعدها رجعنا عادي💔 بعد مساافهه لُجين قالت لي ي ربي سافر؟
عاينتهه ليها ،طيف قالت ليها لُجيييييين😒😐💔

عدت فترة اسبوعين من الكلام دة في يوم وانا في المحاضرة فجأة جاتني مكالمه من ماما ،كنصلته المكالمه تاني رجعت اتصلت،كررت المكالمه اكتر من 3مرات،قلقتهه عليها يعني لو م في شي م بتتصل علي كل المكالمات دي،شلته التلفون وطلعته برة رجعته ليها اول م فتحت الخط قالت لي انتي وين؟قلته ليها في الجامعه ليييهه في شنووو؟
قالت لي اطلعي تعالي المستشفى،
قلته ليها مستشفى؟في شنو ي امي انتي كويسه؟
قالت لي انا كويسه لكن ماهر دة مُرقد في المستشفى حالتو صعبه،
لا إرادياً لقيت نفسي بقول ليها بصوت عالي ماهر؟ماهر مالو؟
قالت لي تعالي المستشفى
قلته ليها اي مستشفى؟
قالت لي رويال،قلته ليها عمل حادث ولا مالو؟
قالت لي لا م عمل حادث
قلته ليها طيب ي امي فهميني مالو؟
قالت لي نحن زاتنا م فاهمين تعالي كدي،بدون م احس لقيت نفسي في الشارع المفتاح العربيه الشنطه الشنطه في القاعه ،رجعته جريت دخلته القاعه وانا بلهث كلهم بقو يعاينو لي المحاضر والطلبه م عارفه شلته شنطتي كيف وطلعته م عاينته وراي لغاااايه م وصلته المستشفى وم عارفه نفسي وصلته كيف اساساً ،لما وصلته كان في ماما ومنذر انا ماشه وشبه جاريه قبل م اصلهم حتى قلته ليهم ماهر مالو؟
ملامح وشوشهم م كانت بتبشر بالخير خصوصاً ماما شكلها كانت بتبكي،قلته ليهم بصوت هزيل مالو؟وين اسي هو؟
منذر قال لي في الغرفه،قلته ليهو مالو عندو شنو؟عمل حادث؟هو كويس صح؟
كنت بسأل الأسئله وانا منهارة ودموعي على وشك انها تجي جاريه
منذر اخد نفس وقال لي"م عمل حادث ي شهد الدكاترة قالو احتمال كبير يكون فشل كلوي "_
قلته ليهو كيف يعني؟كيف يعني فشل كلوي؟وين اسي هو؟
ماما قالت لي في الغرفه دي الدكاترة مانعين زول يدخل ليهو،م اتلفته مرتين مشيت على طول فتحته الغرفه ودخلته في دكاترة كانو واقفين في راسو وانا اتجمدتهه من شكل الزول الراقد في السرير،
انتو فاهمين عباره عن حاجه نافخنها نفخ ولونها اصفررررر،كان وارم كلو على بعضو وش رجول يدين حاجه كدة ماليه السرير
رجولي بقت م شايلاني وانا بعاين ليييه بي خلعه لو م عاينته في وشو ودققتهه مرة واتنين وتلاته م كنت حأصدق انو دة،
الدكتور لما شافني قال د

ي منو كمان؟انا م قلته ليكم م تخلو زول يجي داخل الغرفه دي؟طلعوها لي برة؟
الممرضه جات قالت لي لو سمحتي اطلعي برة ،وانا دموعي م عايزة تقيف طلعتني برة بقيت ابكي بصوت ،قلته ليها ماما الجوة دة ماهر؟الفي السرير دة ماهر؟لا مستحيل.ي ماما مستحيل يكون دة ماهر ،جات مسكتني قالت لي م تبكي،قلته ليها ماما شوفيهو متورم كيف،شوفيهو شكلو اتغير كيف 😭💔فجأة الدكتور جا طالع من الغرفه منذر قال ليهو ي دكتور،الدكتور وقف قال ليهو طمني في مستجدات في حالتو؟
الدكتور قال ليهو لا والله ماف بس م تخافو الزول دة كويس او بقى كويس حالتو افضل من قبل الاسبوعين المضت دي بكتير
قلته ليهو كيف يعني احسن من الاسبوعين المضت ؟هو ليييههو كم يوم هنا؟قال لي دة الاسبوع التالت ،قلته ليهو الاسبوع التالت؟كيف يعني الاسبوع التالت؟سكتت مساااافهه وانا ببكي قلته ليهوو هو عندو شنو بالظبط ممكن تفهمني؟
قال لي عندو مشاكل في وظائف الكلى
قلته ليهو يعني فشششل؟
قال لي لا م وصلت مرحله الفشل ، قلتهه ليهو طيب ي دكتور هو حيبقى كويس بحالتو دي😭😭💔قال لي بإذن الله عندو كم جلسه غسيل حتتعمل ليهو وإن شاءالله وضعو بتحسن ادعو ليهو بس❤قلته ليهو طيب م ممكن تخلونا ندخل ليهو ؟قال لي عندو جرعه ماخدة حتنومو اول ن يصحى ادخلو عليهو هو زاتو محتاج ناس تقيف في راسو يعني اسي هو على مدى الاسبوعين دي م كان معاهو اي مرافق حتى نحن احترنا قدر م سألناه من اهلو وكدة م لقينا منو اي تجاوب الا في الأخير ادانا رقم الشاب دة

بعد مشى الدكتور قعدته في المقعد وبقيت ابكي قلبي وجعني شديد من كلام الدكتور كيف يعني اسبوعين براهو؟كيف يعني بس كيف؟وقلبي كان واجعني اكتر من وضعو الهو فيهو لا وكمان عندو اسبوعين بالحاله دي ويمكن اسوأ ونحن أخر من يعلم،وماف زول معاهو ماف زول في المستشفى غيرنا انا وماما ومنذر،ولا زول من اهلو ماف جمبو،،معقوله ماهر دة وحيد وبعيد كل البعد عن الناس كدة؟طيب ونحن او انا ؟؟

فضلنا قاعدين ساعه برة كل شويه بمشي الغرفه بشوفو بلقاه نايم م بقدر اعاين ليه مرتين وبرجع لغايه م المغرب اذن حتى قالو لينا صحى،دخلنا عليه،ماف زول مننا كان قادر يتكلم انا ببكي وماما بتبكي منذر بس اللي سلم عليهو وبقى يقول ليهو م كلمتنا ليييييهه؟لييييييهه م اتصلته علي؟
ماما قالت ليهو انت ولدي زيك زي منذر معقوله تكون بالحاله دي في المستشفى وم تكلمنا!؟
بدأ يتكلم وهو بقطع في الكلام قال ليهم انا كويس الموضوع م كان محتاج حتتعبو معي ساي
في اللحظه دي اتفصمته فيهو قلته ليهو كيف يعني م بحتاج؟انت م شايف الحاله الانت فيها دي؟يعني في تعب اكتر من الوضع الانت فيهو دة؟ومن متين نحن بقينا غرباء عنك للدرجه دي؟بكيت مسافه وطلعته من الغرفه..

فضلنا قاعدين معاه في المستشفى م مشينا ابداً بالليل منذر طلع برة وماما مشت تصلي خلوني انا معاه في الغرفه،هو ساكت وانا ساكته م قادرة اعاين ليه كل م ارفع عيني دمعتي تجري،قال لي شهد"بصوت مبحوح"بعد مسااافه قلته ليهو نعم؟
قال لي سوقي خالتي وامشو البيت انا تمام ومعي منذر،
قلته ليهو اسكت ي ماهر اسكت م تتكلم ابداً،
قال لي لو قعدتو هنا حتتعبو و ...
قاطعتو قلته ليهو نحن شكينا ليك؟ولا وجودنا مضايقك ؟
سكتت مساافه قال لي م كدة
ماما جات داخله مسحته دموعي ،قالت لي امشي صلي،قلته ليها طيب شلته شنطتي وطلعته لقيت مرة كبيرة وقفتني قالت لي ي بتي عليك الله م بلقى لي عندك رصيد؟قلته ليها ايوة ي خالتو عندي،قالت لي عايزاكي تضربي لي للرقم دة ،طلعته تلفوني لقيت مكالمات كتيرة من لجين،اتصلته لي خالتو خليتها تتكلم بعدها قالت لي شكراً ي بتي الله يديك العافيه،شلته التلفون رجعته لي لُجين اول م فتحت الخط قالت لي سجم الرماد وين انتي؟وبعدين طلعتي من الجامعه وم كلمتيني؟قلته ليها لُجين انا في المستشفى،قالت لي المستشفى؟في شنو مالك؟قلته ليها ماهر في المستشفى ي لجين وحالتو صعبه متورم كلو😭😭😭😭😭😭😭💔قالت لي شنووووو؟ليييه مالو؟اي مستشفى؟قلته ليها رويال،قالت لي فيهو شنو مالو؟قلته ليها عندو مشاكل في وظائف الكلى،قالت لي طيب طيب جايه عليكم انا،مشيت صليت وجيت راجعه الغرفه ماما قالت لي اخد ليهو نومه المسكين واجع قلبي وجع💔
فضلته اعاين ليهو وانا نفسي مكتوم حاسه بتأنيب الضمير والذنب شديد م عارفه لييييهه💔جاتنا لجين هي كمان لما شافتو قعدت تبكي،طلعنا برة بقيت راقدة في كتفها وببكي وبحكي ليها انو عندو اسبوعين وزيادة في الحاله دي و....بقت تبكي معي قالت لي اهلو وين؟وليه ماف زول معاه؟قلته ليها م عارفه بس الدكتور حسب كلامو قال انو هو رفض يوصلهم بي اي زول الا بعد ضغطو عليه حتى اداهم رقم منذر💔قالت لي واااااي ي شهد وجع قلبي شديد😭💔

فضلنا 5يوم معاه في المستشفى وانا م رجعته نهائي ماما كانت بتمشي تجيب لينا غيارات وكدة وبترجع طبعاً ادونا غرفه في المستشفى،في يوم منذر ولجين وماما مشو البيت عايزين يطبخو وكدة،فضلته انا معاه في الغرفه اثناء م نحن قاعدين جا الدكتور داخل ومعاهو الممرضات

،قال ليهو ي شاب كيفك؟قال ليهو الحمدلله،الدكتور قال ليهو جاهز لي جلسه الغسيل؟
قلته ليهو غسيل؟
كلهم بقو يعاينو لي
الدكتور قال لي ايوة ،بقيت اعاين لي ماهر،
الدكتور قال للمرضات جهزوهو عشان يدخل طوالي
طلعته من الغرفه على طول بعد مسافه جو طالعين سايقنو بالكرسي المتحرك،مشيت وراهم لما وصلو الأصانصير عايز يقفل دخلته بسرعه،الممرضات بقو يعاينو لي،وصلنا مكان غرفه الغسيل منعوني ادخل قلته ليهم لا انا حأدخل معاهو،قالو لي لا ممنوع،قلته ليهم كيف ممنوع لا حادخل معاهو قلته ليكم،الممرضه قالت لي ي بتنا ممنوع قلنا ليك لو سمحتي،
بقى يعاين لي قال لي شهد خليك برة،قلته ليهو لا ابيت ابيت ابيت😭😭😭💔ضحك قال لي عايني انتي من هنا بتقدري تشوفيني تشوفي الغرفه فيها شنو لو الفضول حيكتلك كدة،قلته ليهو انت فاكر انو دة فضول؟
قال لي اياً كان المهم خليك هنا وراقبيني من هنا..
بالفعل دخلوهو شوفتو وهو بركبو عليهو الأجهزة ،لما بدو ليهو الغسيل الألم كان واضح في وشو حسيتو للحظه حيصرخ وهو بغمض عيونو،اتحركته من مكاني وبقيت ابكي،انا بالجد قلبي واجعني واجعني شديد عليهو اخر شي اتوقعتو انو انا اشوفو بالشكل دة 💔💔💔اتصلت علي لجين قالت لي وين انتو جينا م لقيناكم في الغرفه،قلته ليها دخلوهو الغسيل ي لجين 😭😭😭💔...

عدت الأيام وإتوالت جلسات الغسيل ،بعداك فضلنا في المستشفى شهر،الحاجه البتوجع وتكسر القلب انو فترة الشهر دي ماف زول من اهلو جا او سأل عنو او غيرو💔💔💔بس نحن المعاه وملازمنو ومتناوبين عليهو لغاااايه م اتحسن وبقى تمام وجا اليوم المفروض يطلع فيه من المستشفى،خلاص جهزناهو وقمنا طالعين قال لي منذر حتمشي معي البيت صح؟منذر قال ليهو وين؟ قال ليهو البيت وين وين يعني؟منذر قال ليهو ي زول بيت شنو انت من مكانك دة وعلى بيتنا على طول،قال ليهو لا والله ماف طريقه عايز امشي البيت،قلته ليهو انت متين طلعته من المستشفى؟؟؟انت لسه م بقيت كويس انت فاهم؟
قال لي لا الحمدلله انا بقيت كويس ومشيه البيت بتريحني اكتر
قلته ليهو اهاااا قصدك انو في بيتنا نحن م حتكون مرتاح صح؟
قال لي م كدة ي شهد م تحوري الموضوع
قلته ليهو لا كدة وابشر ي زول منذر انا حأركب ترحال حامشي البيت وانت وصلو بيتو تمام؟

اقرب عربيه عليها علامه تاكسي ركبتها واتحركته خليتهم في مكانهم،رجعته البيت واخلاقي في مناخري ماما قالت لي جيتو؟
قلته ليها جيت ي ماما،قالت لي منذؤ والولد وين؟
قلته ليها حضرة سيادتو قال ماشي بيتو عشان هناك حيكون مرتاح اكتر
قالت لي هي لكن انا هنا جهزته ليهو الغرفه والأكل يمشو بيتو كيفن؟
قلته ليها م عارفه وم تسأليني دخلته غرفتي وقفلته الباب علي،وبالفعل م جو لا هو لا منذر،عدت يومين وانا مقلقه عليهو وقلبي مقبوض وم عايزة اتصل ولا عايزة اسأل ماما منو الا سمعتها وهي بتتكلم بالتلفون وبتقول"الليله اصبحته كيف ي ولدي؟كويس؟اخدته الحبوب ان شاءالله؟انا مكلمه منذر يشغل المنبه وم يفوت عليك مواعيد الدواء لأنو هو نوام انا بعرفو لو نام تاني م بقوم،لا خلاص تمام،نخن زاتنا بعد شويه كدة بنجي عليكم لا مافي تعب والله ي ولدي معقوله انا زاتي زعلانه من عدم جيتك معانا البيت هنا،خلاص تمام الله يديك العافيه...
قفلت الخط وجات قالت لي اجهزي عشان نشيل الاكل والحجات دي نوديها ليهم ،قلته ليها انا م ماشه،فالت لي م ماشه دي شنو؟
قلته ليها م ماشه انا م ماشه واضح كلامي دة!!
قالت لي ليييه؟قلته ليها ماف سبب ساي كدة،
قالت لي انا م بقدر اسوق العربيه وانتي عارفه،والاكل دة محتاج يرتبو في التلاجه هناك عشان انا عامله ليهم اكل كتير والبساعدني منو هناكةو...قلته ليها بطلب ليك ترحال اجهزي ،شاكلتني وجاطت فيني وانا ولا على بالي طلبته ليها ترحال طلعت مشت بي زعل،بعد م مشت اتصلته على لجين وبقيت اتكلم معاها قلته ليها وين انتي اليوم ليه م جيتي!؟قالت لي كنت في الجامعه وطلعته متأخرة وزحمه في الشوارع،قلته ليها اهاااا تمام،قالت لي وين انتو في البيت ولا مشيتو لي ناس ماهر؟
قلته ليها ماما مشت انا لا،
قالت لي لييييهه ياااا شهد؟
قلته ليها كدة بس
قالت لي طيب انا م كنت عايزة اتكلم معاك بس حتكلم شهد ممكن تبطلي تتصرفي بي أنانيه شويه؟قلته ليها انانيه؟انا م انانيه ي لجين يعني هو واضح انو م عايزنا قالها عديل انو حيكون مرتاح في بيتو م راعى لي انو نحن مجهزين نفسنا وبيتنا علشان نستقبلو فيهو،قالت لي م قصه انو م عايزكم بس هو يمكن بالجد حيكون مرتاح في بيتو وم عايز يزعجكم او يقيدكم م دايماً تعايني للمواضيع من منظورك انتي بس ،الولد في فترة صعبه م تقسي على الولد وهو في فترة نقاهه ي شهد،البتعملي فيهو دة انا زاتي م لاقيه مبرر لي تصرفاتك دي انتي بتسمي دة حب؟ياخي م تنسي انو دايماً بنسى الخلافات البينكم وبقيف معاك لما تحتاجيهو،بستحملك رغم تصرفاتك الطفوليه الما ليها لي داعي دي،بتحبيهو؟م اختلفنا بس انتي عملتي حجات كتيرة تحت مسمى الحب دة م ليها اي لازمه طينتي حياتك وحياة الحواليك وجيتي تاني بديت

ي من الصفر وفاكرة انو هو سبب في كل دة لا ي شهد السبب انتي م هو،هو م مُلام ابداً كونو اعتبرك صحبتو وحبه يحافظ على الخانه دي جواهو ليك دة م سبب يخليك تكريه او تحقدي عليه او ترمي كل بلاويك واسباب مشاكلك ومعاناتك في الحياة على رقبتو،الحب دة م بجي بالغصب ي شهد ف كونو م بادلك الشعور دة م معناها تعاديهو او تجوطي حياتك كدة لمجرد انو هو م حباك ياخي سبحان زارع الشعور ياخي والزرع الشعور دة جواك م زرعو جواهو هل فرض عين يحبك لمجرد انك بتحبيهو؟هل انتي عايزة تعيشي علاقه طرفها فيهو مشاعر والطرف التاني مجامله واداء واجب بس؟رضيتي ام ابيتي ي شهد ماف زول غلط في حقك انتي غلطتي في حق نفسك واتصرفتي بي صغر عقل بس م اكتر ولسسه م عايزة تحكمي عقلك ولا عايزة تتعظي ودة البوجع هنا فكري في كلامي دة ي شهد فكري وشوفي انتي عايزة شنو بالظبط ارسي على بر عايزة تخسريهو ولا عايزة تكسبيهو؟بس حركات لا بريدك لا بحمل بلاك دي خليها لأنو كل شي ليهو حد صراحه💔💔كلامها كان حار،حار شديد على قلبي بس صح وصح شديد على قدر م بكتني على قدر م وعتني لحجات كتيرة انا كنت شايفاها من ناحيتي بس واتصرفته على الاساس دة بسذاجهه شديدة😭💔القعدة غلبتني فضلته داخله ومارقه لغايه م ماما جات بعد المغرب،كانت قافله مني طبعاً ،جبته ليها مويه شالتها وهي ساكته،فضلته باكل في ضفوري مسافهه قلته ليها لقيتيهم كيف؟قالت لي كويس بس منذر قال لي شويهه كدة بتعب بالليل بتجيهو زي حمه كدة وفي شويه مضاعفات قال وم بياكل نهائي اصريت عليهو يمشي المستشفى واسي خليتهم ماشين المستشفى،
قلته ليها حمه من شنو؟ومضاعفات كيف يعني؟
قالت لي والله م عارفه لمن يمشو المستشفى يشوفو الحاصل شنو،
فضلته قاعدة وباكل في ضفوري ومقلقه ،فضلته على الحاله دي للساعه11،اتصلته على منذر تلفونو مقفول،تلفونو مقفول معناها في شي اكيد قلقته علينو اكتر على طول اتصلته في رقم ماهر،والغريبه انو رد من اول جرسين،سكتت مسافه وهو بقول الوو ،قلته ليهو ماهر كيفك؟
قال لي تمام الحمدلله،قلته ليهو مشيتو الدكتور؟قال ليكم شنووو والمضاعفات دي من شنووو؟
سكت مسافه حتى قال لي ماف شي مضاعفات عاديه اداني علاجات اضافيه كدة قال لي اخدها،قلته ليهو يعني كويس؟قال لي لا كويس الحمدلله،قلته ليهو متأكد ي ماهر؟
قال لي ايوة ي شهد،قلته ليهو يعني م بتكذب علي؟
قال لي حصل انا كذبته عليك؟
سكتت مسافهه قلته ليهو وبعدين لييييهه م بتاكل؟اديني سبب واحد يخليك م بتاكل؟
قال لي وبعدين عاش من سمع صوتك😷قلته ليهو انا جادة على فكرة؟
قال لي اتطمني انا تمام ،
فضلته ساكتهه مسافه قلته ليهو اممممم ماهر!؟
قال لي ايوة
بعد مسافهه قلته ليهو انا اسفهه،م تقاطعني وخليني اخلص كلامي انا اسفهه بجد على كل تصرف غلط انا اتصرفتو في حقك او تصرف م صح او كذااا،اسفهه على تصرفاتي الساذجه معاك ،
قال لي ليييهه بتقولي كدة؟
قلته ليهو ماف سبب 💔قال لي انتي عارفه انو انا م بزعل منك؟حتى لو غلطتي غلطك عندي ليهو مبرر حتى لو ماف؟وبعدين متين انتي غلطتي في حقي انا م متزكر ابداً والسذاجه الانتي بتتكلمي عنها دي هي سبب في انو نحن بقينا اصحاب،
قلته ليهو اصحاب؟لو اصحاب بالجد ي ماهر م بتقعد اسبوعين في المستشفى وبحالتك ديك وم تفكر تكلمني،انا كنت فاكرة نفسي صحبتك واقرب زول ليك او عامله صحبتك بس طلعته م كدة ابداً ،كنت فاكرة انو زي م انا م لي غيرك حتى م اسوأ حالاتي م بفكر في زول غيرك انت حتكون نفس الشي بس طلع العكس💔سكتت مسافهه وقال لي فعلاً انا م عندي غيرك دي حاجه م بتغالطو فيها اتنين،لو م كنت محتاجك جمبي م كنت اديت الدكاترة رقمك في البدايه بس للاسف م دخل معاهم ف اخدو رقم منذر،
فضلته ساكته وببكي،قال لي في الف شخص كان ممكن اللجأ ليهم يقيفو معي بس انا لقيت انو انتي ملجأي الوحيد حتى فضلتك على امي اللي هي مفروض تكون اقرب زول لي في اللحظات ديك،وبعدين انتي بتبكي مالك؟فاكرة انو انا ممكن ازعل منك او اخد في خاطري منك؟انا قلته ليك قبل انو انتي بتي صح؟حصل لاقاك زول بزعل من بتو؟انا البزعل من نفسي على زعلك والله ي شهد ؟؟!...❤

#إقتباسهه

*حتى تلك اللحظه كان هناك امل بعيد، وراحه ترافق خطواتنا طول الطريق رغم عثرتها، ونور يجبرنا علي اللحاق به ، كنت ولا زلت معقود دائما في صلاتي حتى لا يقفل قلبي عنك💜ادام الله احلامنا وامنياتنا مباهج تغيث قلوبنا فرحآ* 🌸💕

#ذات_عناق(22)
#شهد_عبدالله

حصل لاقاك زول بزعل من بتو؟انا البزعل من نفسي على زعلك والله ي شهد،فضلته ساكتهه وانا ببكي،قال لي شهههد،قلته ليهو طيب وريني م بتاكل لييييهه؟عارف انو صحتك كدة ممكن تتراجع وترجع تاني المستشفى؟قال لي ابداً م حيحصل كدة،
قلته ليهو بتقولها وواثق كدة ؟
قال لي ايوة عارفه لييييهه؟
قلته ليهو م عايزة اعرف
قال لي لا بالجد في سبب مخليني م اخاف ابداً حتى لو رجعته المستشفى
قلته ليهو اها!؟
قال لي عشان جمبي حتكون في خالتي ومنذر سكت مسافه وقال بتنهيدة وانتي ❤
قلته ليهو ماهر الله يخليك خليك جادي شويهه،ضحك وهو اصلاً صوتو فيهو بحهه كدة ف كانت حاجه في منتهى الوبعلي❤
المهم قال لي اكون جادي كيف اكتر من كدة؟
قلته ليهو اتعامل مع المرض بموضوعيهه،
قال لي وانا بتعامل معاه بموضوعيهه،قلته ليهو لا انت مستهتر ولو م مستهتر م وصلته لمرحله انو تدخل المستشفى وتصل للحاله دي انت متخيل نفسك كنت كيف؟
اخد نفس عميق وقال لي عدت على خير
قلته ليهو لا لسسسه احتماليه انك ترجع واردة ف الله يخليك ي ماهر خلي بالك من نفسك ولا اقول ليك انا هخلي بالي منك انت خليك ،
سكت مسافه قال لي والله؟
قلته ليهو قول لي مواعيد الأدويه يلا بسرعه ،قعد يضحك،قلته ليهو انا جادة ع فكرة م بهظر،
قال لي طيب لما نخلص مكالمه حيصلوك واتسب،قلته ليهو وخلي الشبكه فاتحه دايماً علشان كل شويه لو م اتصلاه عليك حأرسل ليك تشرب مويه،قال لي حااااااااااضر طلباتك اوامر❤
قلته ليهو والأكل الأكل ي ماهر لازم تاكل فاهم؟
قال لي ابشري،قلته ليهو لا م اسمها ابشري اسمها حاضر😒ضحك قال لي طيب حاضر ي شهد حاضر❤قال لي طيب قولي لي الجامعه كيف معاك؟
قلته ليهو تمام،قال لي نزلتو امتحانات ولا لسسسه؟
سكتهه مسافه وقلته ليهو ماهر انا لسسسه عتبانه عليك على فكرة وزعلانه منك،
قال لي لييييهه؟قلته ليهو انت كيف بتدخل المستشفى براك بدون مرافق او زول ياخد بالو منك؟ليييهه م كلمته اهلك امك او كذاا؟
سكتت م رد،قلته ليهو ماهر،قال لي م بحب اكون تقيل على زول حتى ولو امي انا كدة ي شهد واتعودتهه على كدة..
كلامو دة وجعني قلته ليهو بس انت م تقيل علي ابداً وطالما انو شايف دة بتسمى تقل لييييهه عودتني على انو اللقاك جمبي دايماً؟لييييهه م بتتجاوزني؟
قال لي في حجات غير قابلهه للتجاوز ابداً انتي مثلاً واحدة من الحجات دي❤❤وممكن نبطل كلام في الموضوع دة خلاص؟
قلته ليهو ماشي وفضلنا نرغي طول الليل في حجات م ليها لازمه المهم بعد فترة طويلهه دي كانت اطول مكالمه لي معاهو ،وكنت في اقصى حالات راحتي وإطمئناني رجعتنا بالشكل دة كانت كانها بمثابهه إعتذار على كل شي مضى،م بقدر اقول غير انو ماهر بلعب دور هرمون الإكسيتوسين في حياتي بجد❤❤❤

...
فضلنا متواصلين مع بعض بشكل يومي بصحيه من النوم علشان ياخد الحبوب،بخليه يصور لي الأكل وهو قدامو واحياناً لما يكون منذر م معاه نايم او كذاا بتكلم معاه مكالمه ڤيديو علشان اتأكد ،والمويه كل شويه اذكرو انو لازم يشرب كميات متوزانه منها،يوم الجمعه صحيت من الصباح بدري دخلته المطبخ علشان هطبخ وحنمشي عليهم،اتصل علي اول م فتحته الخط قلته ليهو الزيني باشا،قال لي صباح الخير ي مزعجهه،قلته ليهو انا المزعجه ولا انت النوام؟قال لي صاحيه بدري كدة مالك؟قلته ليهو اممممممم ماف شي منفسنهه بس،ضحك قال لي الطبيعي بتاعكك😂💔قلته ليهو بغيظ قصدك شنو يعني انت بتأكد لي انو انا منفسنه؟
قال لي ابداً حاشاك النفسنهه،قلته ليهو اخدته الحبوب؟قال لي ايوة،قلته ليهو يلا طيب اقطع وشك م فاضيه ليك انا ،قال لي طيب يلا❤قلته ليهو م نفسك تسأل انا بعمل في شنوووو؟
قال لي اها؟
قلته ليهو م حأوريك💣😎ضحك قال لي ياخ انتي 😂💔
قفلته منو وفضلته شغاله جات ماما ساعدتني في كذا حاجه،جهزنا الأكل لما الضهر اذن صلينا حتى طلعنا،اتصلت علي لجين في الطريق قلته ليها ي ماسورة وين وين انتي؟
قالت لي لسسسه نايمه طلعتو؟
قلته ليها نايمه ي سجم؟
قالت لي مشيتو انتو؟
قلته ليها ايوة يلا قومي علشان نلحق نتغدأ معاهم ونطلع،قالت لي طيب،قلته ليها لُجين م ترجعي تنومي فاهمه؟قالت لي خلاص حأقوم يخخخخ😹💔

طبعاً كانت اول مرة ادخل بيتهم بعد الحصل لي في بيت ناس ماهر من اخوهو مهند داك ودي كانت اخر مرة برصو،علشان كدة كان جواي في خوف غريب+بابا اي مكان مشيناه مع بعض بتقبض على قلبي لمجرد انو جيت مارة بالمكان دهه، لما وصلنا البيت اتصلته على منذر قلته ليهو نحن برة،قال لي طيب طالع عليكم،نزلنا جانا طالع قال لينا م تدخلو على طول مالكم واقفين؟
انا طبعاً احساس الخوف كان متملكني يعني اول مرة دخلته فيها البيت دة م بتزكر طلعته منو كيف+بابا كل تفاصيل اليوم داك عدت علي في اللحظه دي😭😭😭💔نزلنا الحجات الشايلنها جزء شالها منذر وجزء نحن ،كنت ماشه اخر واحدة ورجولي بتضرب في بعض لمن عرقته.ومسافه مدخل البيت بعييييدة لمن غلط،لما وصلنا بقيت ماشه ورا امي لاقانا ماهر مع المدخل سلم علينا عايز يشيل مننا ماما رفضت،لقيناهم م

جهزين لينا ضيافه كمان ماما قالت ليهم ليييه متعبين نفسكم؟منذر قال ليها والله ي امي دة منذر دة من الصباح قام داخل ومارق اتصل على الناس البتنضف جو نضفو م عارف طلع مشى وين جاب حجات وجا راجع انا زاتي صحيت اسي قبل شويه،
قالت ليهو ووووب علي ي ولادة السجم ونحن الخاتنك ترافقو وتحرسو؟
ماهر قعد يضحكك
قالت ليهو قاعد معاك زيادة عدد ساي صح ي ولدي؟كمل ضحكك وقال ليها لا والله م مقصر ابو الشباب ده ههه
منذر قال ليها سامعهه؟م مقصر بس دايماً ظالماني ي حجهه💣👣💔
قالت ليهو كان م بعرفك كنت صدقته لكن عارفه انو بضارو ليك😹💔

اخدنا زمن ونحن بناخد وبندي في الكلام لغااايه م جاتني مكالمه من لجين رديت عليها ،قالت لي ي شهد اها وصفي لي البيت وين بالظبط؟قلته ليها انتي وصلتي؟قالت لي اي قريبه بس اكيد انا م Gpsعلشان احدد الموقع واصلك جوة البيت،قلته ليها خلاص م تتظارفي هاك منذر يوصف ليك ،منذر استلم وصف لي السجم دي او اطلع لاقيها عليك الله،قال لي الحلبيهه ام لسان صح؟قلته ليهو في غيرها؟قال لي باخ البت دي عارض شال التلفون وقال ي سجم وين انتي؟طلع مشى وخلانا نحن ماما فجاة قالت لي شهد شيلي الحجات دي دخليها المطبخ الا ينبهوك انتي ولا شنو؟بقيت اعاين ليها م بقدر اتحرك في البيت براي كدة يخوانا انا قاعدة وقلبي في يدي،قالت لي قومي ي بت،بقيت اعاين ليها لقيت ماهر بعاين لي،قمت شلته جزء من الحجات وانا ماشه قالت لي عارفه المطبخ بي وين؟قلته ليها بحيل هزيل لا،ماهر قال لي امشي بجي على طول واخدي يمينك،بقيت اعاين ليهو ،بعد مسافهه مشيت وانا بتلفت يمين وشمال لغايه م وصلته المطبخ قلته خلاص اطلعهم من الاكياس دي عشان لما اجي اجيب البقيه المكان م يجوط،وانا بطلع فيهم فجاة حسيت بي حركه زول وراي اتلفته بخلعه لقيتو ماهر شايل بقيه الحجات،قلته ليهو بسم الله،
قال لي مالك ي بت مخلوعه ؟
قلته ليهو ماف شي انتي الجابك شنووو كان تخليهم انا بجي بشيلهم،قال لي فجاة اتزكرته انو في زول بستخدم مصطلح ورا جغرافي ومحل الشمس بتموت ف اكيد م حيعرف الوصف😂😀
قلته ليهو انننننننننننننننننننننننننننننننننننننننننن ظريف وم بتضحكك،قعد يضحكك ،شلته منو بقيه الحجات وبديت اطلع فيهم ،قال لي م قلتي لي انك عامله لي مفاجأة وجايا مع خالتي،قلته ليهو قلت مفاجاة في مفاجأة بقولوها؟😒قعد يحك في راسو قال لي صحح😂💔قلته ليهو منتاز يلا،فضل ساكت وانا بفرغ وبتكلم مع نفسو وبقول دة الهناي ودة البتاع ي الله ياخ. دة اتسايل بالجمبات كدة ليه و...،اتلفته وراي لقيتو مربع يديهو ومتنح بعاين لي،قلته ليهو ماهر،قال لي عيوني❤
سكتت للحظه وانا بحاول استوعب كلمه عيوني دي،قلته ليهو التلاجه وضعها كيف؟فتحتها لقيتها نضيفه ومرتبه اكتر م بتتخيلو،قلته ليهو ي سلام انتو منتازين يخخخ تلاجه انضف ومرتبه من تلاجتنا يارب امي م تجي داخله المطبخ ولا تشوفها😂💔قعد يضحك قلته لينو عايزة حجات تفريغ علشان افرغ ليكم جزء من الاكل دة فيهم والبقيه تتغدو بيهو وصف لي مكانهم وين،قال لي م حتعرفي دقيقه،دخل وفتح درج كدة طلع لي طقم تفريغ بالرمادي،قلته ليهو وااااي حبيت دة خسارة تفرغو فيهو ،فجاة نسمع صوت لُجين وهي بتكورك شهد ي سجم الرماد،بعد دقيقتين جات داخله قالت لينا هاااااااياااااااااات انا جيييييييت😍❤ماهر قال ليها اهلين نورتي❤قالت ليهو احم احم اصلاً منورة طبيعي😂😎❤ضحك ،قالت لي شهدددددد انا جعاناااااو جعاااااانااااااو عاملين طقه شنوووو؟
قلته ليها ولا شي😒قالت لي م حنك حناكل ال ولا شي دة😂😎💅💔قعدت فوق تربيزة المطبخ حقت الاكل وهي ماسكه علبه المخلل وقالت ليهو الزيني ي زيني كيفك عساك طيب،بقيت كويس؟هل بقيت كويس؟
منذر جا داخل قال لينا العارض دي عملت لينا هيديك من جات💔💔قالت ليهو في عينكك،شال منها علبه المخلل وبقو يتشاكلو ويجوطو ...

جهزنا الاكل وقعدنا نتغدأ ،منذر قال لينا الاكل دة العملو منووو ؟لجين قالت ليهو اكييييييد م شهد طبعاً😂💔منذر قال ليها اصلاً انا متاكد انو م هي،
قلته ليهم اننننننننننننننننننننننننننن استظرفو استظرفو ي اعداء النجاح😊💅💔 ماما قالت ليهم بري والله انا م عملته شي غير المخلل دة ،منذر قال ليها والله عارف كدة عشان كدة انا م عجبني غير المخلل وم ضقته طعم لي اي شي غيرو،لجين قعدت تضحك قالت ليهو أؤيد ،ماما قالت ليهم والمخلل زاتو انا قطعتو ليها بس هي براها ظبطتو😂سكتو وبقو يعاينو لبعض وماهر ساكت بعاين لينا ،طلعتهه ليهم لساني نظام بكاوي فيهم وكدة،منذر قال كدة خلونا نشوف راي ماهر اها ي ماهر م تتنافق الاكل م ظابط صح اصلاً سكوتك دة م ساي،لجين قالت ليهو لا حيتنافق وحيقول اكسبت 😂💅💔،ماهر قال ليهم بالعكس يخخخ ظريف،
كلمه ظريف دي وقفت لي في حلقي😭💔يعني انا واقفه الوقفه دي كلها علشان يقول ظريف
منذر قال ليهو ظريف دي دلاله على المجامله يلاااا😂😂😂😂💔

اتغظظظت طبعاً اتغظت منهم كلهم بس من ماهر اكتر كانو م كان بهمني رايهم كلهم الا هو وهو بكل برود فال ظريف💔💔💔

اليو

م عدة وبقيت علشان اكسر ليهو حاجز الملل وكدة يوم واليوم التاني بطلع معاهو مكان م كنت بخليهو يسوق بخليهو يطلب ترحال وانا بنتظرو في شارع رئيسي ...

في يوم وانا في سابع نومه الصباح تلفون ضرب،كنصلتو كذا مرة تاني رجع اتصل رفعتو لقيتو ماهر قبل م يقول لي صباح الخير قال لي جاي عليك البيت انزلي تحت ،قلته ليهو في شنو خير كدة قول صباح الخير اول هم بصبحو كدة؟قال لي انزلي بدون نقاش،صوتو م كان ببشر بالخير ابداً،قلته ليهو بسم الله في شنو مالك؟
قال لي لما اجي بنتفاهم وقفل الخط في وشي،نزلته دخلته الحمام غسلته وشي جيت طالعه لقيتو بتصل،فتحته الخط قال لي انزلي،لبسته عبايتي وطرحتي وطلعتهه ،لما نزلته بقيت اتلفت فجاة سمعته صوت بوري بضرب نزل قزاز العربيه وأشر لي،كان مغير عربيتو ،قلته ليهو الخلاك تسوق عربيه شنو انت مش ممنوع؟قال لي اركبي،وشو كان متغير احساس زول غضبان وكدة،خفت بس فتحته الباب وركبت وقلته ليهو وانا بتسائب اصبحنا واصبح المُلك لله،فضل ساكت مسافهه قال لي شهد انتي عايزة تجنيني؟قلته ليهو مالي؟
قال لي وكمان بتسألي؟
بقيت اعاين ليهو،
قال لي عندك علم ي طالبه ي مجتهدة ومهتمه انو امتحانات البدائل الانتي شلتيها فاضل ليها اسبوعين؟
سكتت
قال لي لا السؤال مفروض يكون م امتحنتي امتحان السمستر لييييهه ي شهد وشلتيهم بدائل؟
قلته ليهو لجين حكت ليك صح؟
قال لي سالتك سؤال جاوبي م مهم تعرفي انا عرفته من وين يعني فعلاً انتي م امتحنتي؟
كان بتكلم بي غضب
قلته ليهو احم الامتحانات صادفت رقدتك في ال...
قاطعني قال لي رقدتي في المستشفى م سبب منطقي يخليك م تمتحني ي شهد،الناس في غزة وسط الموت والدمار داك مكمله دراستها وتعليمها انتي جايه تقولي لي رقدتك في المستشفى؟شهد بطلي امور السذاجه والشفع البتعملي فيها دي ممكن مرة واحدة بس تتعاملي بمسؤليهه؟
قلته ليهو ي زيني انا م كنت قاريه ولا جاهزة اكذب على نفسي يعني؟انت اذا شايف الموضوع عادي انا بالنسبه لي م عادي ولا كنت في وضع يخليني امتحن انت مستسهل الموضوع لانو م كنت مكاني💔قال لي لا ي شهد انتي متسيبهه،
قلته ليهو خلاص متسيبهه انت صح اسي الحصل حصل م تكورك ،غضب اكتر وقال لي اسي اسي حنمشي الجامعه حناخد الشيتات سواء عندك او لا حنمشي ناخدها وحتبدي قرايه من اليوم وبدون نقاش،اتحرك بالعربيه قلته ليهو ماشي بي وين وانا بالشكل دة؟انت شايف انا عامله كيف؟قال لي حتمشي كدة ماف زول حيعاين ليك اصلاً،عاينته ليهو بغيظ وقلته ليهو كويس اللقى طريقه دخلني بيها الجامعه طيب بدون بطاقه او اي شي،اتحرك وهو ساكت وانا ساكته لما قربنا نصل اتصل رفع تلفونو بعد مسافه قال"الووو وين انتي في الجامعه صح؟طيب انا قريب من الجامعه حاولي اطلعي علي برة وشوفي لي بطاقه او إيصال عشان الامن الفي الباب دة اتغير،تمام طيب يلا ،
قفل الخط بعد مسافه وقف العربيه وبركن قدام الجامعه فضلته مربعه يدي وبعاين بالقزاز هو نزل خلاني في العربيه شويه كدة باب العربيه فتح واللقى لجين في وشي بترفع لي في حاجبها،بقيت اعاين ليها بغضب،قالت لي هاي😷قلته ليها قفلي مني،قعدت تضحك نزلته لما شافت حالتي قالت لي م بصصصصصدق دة شنو ي ماهر جبته الزوله دي كدة😂😂😂😂💔كان بتكلم بالتلفون وخاتي يدو بين حواجبو اتلفت عاين ليها ورجع اداها ضهرو،بعد مسافهه جا قال لينا منتظرين شنو ؟يلا ادخلو وينا البطاقه ي لجين؟قالت ليهو هاك غايتو هو م بشبهك بس حاول تمدها من جوة الجزلان م بنتبهو،مسكها في يدو وقال ليها م حنك،قالت لي شهد هاك دة إيصال وبطاقه طيف،
مسكتني ليهم لما وصلنا البوابه الحمدلله م كانو مركزين ومررونا عادي،ماهر قال ليها المكتبه بي وين؟قالت ليهو لقدام شويهه،مشينا على المكتبه لقينا فيها زحمه فضلنا واقفين لغاية م دخلنا طلع التلفون وقال لبتاع المكتبه ي حبيب هاك عايز الشيتات دي من كل شيت عايز نسختين،جريت لُجين وقلته ليها كلمتيهو ليه ي وسخهه انتي ليييهه بتعملي كدة ؟قالت لي مش قبل اسبوع كلمتك وقولته ليك جدول امتحانات البدائل نزل وانتي ولا على بالك؟
قلته ليها ودة سبب يخليك تمشي تتزفتي تكلميهو؟
قالت لي اي اصلاً ماف زول بديك على راسك وبمشيك عديل غيرو،م ممكن لكن ي لجين كل شي ماشه تحكي ليهو بيهو اعمل فيك شنو انا اعمل فيك شنو؟قالت لي كل شي كيف؟في حاجه لسسسه متحفظه عليها وم كلمتو بيها"قالت كدة بخباثه وهي بتعاين لضفورها" انا فهمتها طبعاً قلته ليها خلاص طيب امشي احكي ليهو عليك الله امشي قولي ليهو شهد بتحبك علشان دة بس الفضل ليك تحكي بيهو،
قالت لي بكل برود صحححح فعلاً مفروض امشي احكي ليهو بس نوووو ي بطهه نوووو الحاجه دي حيجي يوم وحتمشي تحكيها ليهو براك بذات نفسك😀قلته ليها طيري من وشي ي لجين...
ماهر جا شايل ظرفين قال لي هاك،شلتو منو،لجين قالت ليهو والظرف التاني لمنوو؟قال ليها انا حأحتاج ليهو،

ونحن راجعين لا هو اتكلم معي لا انا اتكلمته معاهو لغايه م وصلني البيت قال لي م حتحتاجي تمشي الجامعه في مكتبه هتا في الرياض جهزي نفسك بك

رة الساعه 8حأجي اسوقك اوديك ليها عشان حتقدري تقري بتركيز اكتر هناك،فضلته ساكته وقال لي والله يرضى عليك ي شافعه بطلي امورك البتسوي فيها دي وي ريت م تطلعي لي بأي عذر،
قلته ليهو خلصتهه؟
قال لي انتي شايفه شنو؟وبعدين ناس البيت م عارفين انو انتي عامله العمله دي صح؟خالتي اكيد م عندها علم؟
نزلته من العربيه قفلته الباب ودخلته العمارة،وصلته البيت ضربته الجرس ماما فتحت لي الباب قالت لي مشيتي وين انتي ي بت من الصباح دة ومخليه تلفونك في البيت ودة شنو الشايلاه دة؟
قلته ليها مشيت الجامعه ،قالت لي جامعه لشنوو وبالشكل دة؟
قلته ليها مشيت اشتري شيتات الامتحانات علشان فضل ليها اسبوعين او بمعنى اصح الاحد البعد الجاي زي م شايفه،قالت لي في زول بشتري شيتات الامتحانات قبل اسبوعين من الامتحانات؟قلته ليها ببرود مُش انا عملته كدة؟يبقى في..
قالت لي لا حول ولا قوة الا بالله ي ربي دي ولادة دي؟

دخلته غرفتي وقفلته علي الباب،بالليل ماهر رسل لي ڤيديو،فتحتو لقيتو مسجل لي شرح بتاع مادة كامله ڤيديو عاملو هو بذات نفسو وقال لي"بكرة حتقري المادة دي جهزي نفسك وشيلي الشيت بتاعها الصباح،وبالفعل جاني الصباح نزلته ليهو قال لي امس فتحتي الڤيديو؟قلته ليهو ايوة،قال لي تمام واحدة من المواد الما صعبه على فكرة بس محتاجه تركيز ،قلته ليهو تمام،وصلنا المكتبه نزلنا اول م وصلنا المدخل طلع بطاقتين للناس الفي الاستقبال،قالو ليهو اتفضل،قال لي يلا ي شهد،المكتبه كانت شبه فاضيه اختار ركن فاضي وقعدني فيهو،طلعته الشيت والتلفون والسماعه ،قام من محلو طلع برة وجا راجع شايل اقلام في يدو وكم محدد في يدو،قبل م افتح خشمي قال لي كنت عارف انو انا جاي مع شافعه عندها لا مبالاة وم مسؤله،قلته ليهو ببرود طيب😊قال لي حأشرح ليك وبعدها حأطلع اخليك تقري لو استعصت عليك حاجه علميها لي
قلته ليهو ماشي❤
تخيلو احساس الزول المهتم وعارف مصلحتك اكتر منك وساعي وراها اكتر منك؟بس دة كان ماهر،ادوني سبب واحد يخليني اقدر اتجاوزو بيهو وهو بعمل كل دة عشاني❤💔
فضلنا على الحال دة بشكل يومي،يومي برسل لي ملخص مادة ڤيديو وبجيني في المكتبه علشان يشرح لي الحجات الصعبه فيس تو فيس وكان بتعامل معي بصرامه وجديهه مبالغ فيها احساس انو زعلان مني وكدة💔 حقيقه يعني م بقدر انكر انو حببني في المواد او بمعنى اصح حببني فيهه اكتر❤💔

في يوم رجعته البيت لقيت حُسام بتكلم مع ماما ڤيديو ،بقيت اتكلم معاه قال لي قالو لي مجتهدة وكدة،قلته ليهو وااااي اسكت م تزكرني😭💔قال لي اها جاهزة ؟قلته ليهو يعني والله😁قال لي طيب اسرعي امتحني وخلينا ننجز معاك ،قلته ليهو تنجز شنووو؟
سكت وقعد يضحك
ماما قالت لي اخوك فجأة شيطان العرس ركب ليهو في راسو😀قلته ليهو عايز تعرس؟😶قال لي سنه الحياة الواحد داير يكمل نص دينو ي جماعه لقد هرمنا وجلحاتنا بقت موازيه خط الاستواء،قلته ليهو العرس هين كلام العروس 😂💣قال لي لا العروس دي موضوعها منتهي،قلته ليهو منتهي؟يعني لحقته تختارها من ورانا؟من ورايا ي ولد بطني؟😯قال لي ولد بطنك في عينك ي شافعه😂💔قلته ليهو اها منو العروس م قلته لينا؟
قال لي لا خليها سبرايز،قلته ليهو نووووو عايزين نعرف صح ي امي؟ع فكرة نحن راينا اهم منك
قال لي عندك شكك في اختيار اخوك؟قلته ليهو برضو عايزين نعرفها ي ولد م ترغي،قال لي لا هي من ناحيه حتعجبكم وحتتبسطو بيها حتعجبكم صدقوني،قلته ليهو م تحاول تقنعني بالكلام دة عاوزين نعرف وعايزين نشوفها ااسي اسي بس،قال لي يخخخ م تبقي لصقهه كل شي في وقتو حلو،قلته ليهو نووووو اسي اسي بس،قال لي طيب برسل ليكم صورتها ،قلته ليهو اسي؟
قال لي ايوة واسمعي تشوفيها وتنطمي بدون تعليق ،قلته ليهو ليييهه؟😶قال لي انا واثق في اختياري علشان كدة رايكم م حيأثر😊💅قلته ليهو وبعلي لحقت كتبتك😂😂😂قال لي ي حيوانهه كتبتك في عينك والله م ارسلها يلا😂💔ضحكته قلته خلاص بهظر بهظر يلا رسلها 😶😂💅قفل مني ماما قالت لي م كان تضغطي عليهو خليهو على راحتو لمن يجي الوقت المناسب بورينا ليها براهو😐قلته ليها راحتو دي منو؟😶فجاة جا اشعار رساله فتحته المسج وسكتت مسااااافه وانا بعاين للتلفون وبعاين لي ماما بعد مسااااافهه قلته ليها بي صرخهه

بقيت اصرخ واقول مناسك ماما حيعرس مناسك شوفي دي مناسك؟
ماما قالت لي شووووووفي الولد وم كلمنا ي يمه اختيار الهنا والسرور عاد عرف يختار دي بت فيها قول كمان؟
رجعته اتصلته عليهو ڤيديو اول م فتح قلته ليهو ي سججم مناسك ي سججم ؟صحبتي ي سجم ومن ورااااااي كمان من وراااااااااي؟
هو كان بضحك قال لي كيف بالله؟فيها راي؟
قلته ليهو حصل كدة متين وانا اخر من يعلم حتى هي م كلمتني الوسخهه اااااه ي رمم ،كمل ضحك وقال لي والله ما كان في شي كدة واضح بينا شديد بس انا اخدته رايها اذا حتوافق ولا لأ وهي قالت موافقه انتي عارفه اخوك م بتاع الحركات دي😁😀
قلته ليهو دة علي انااااااا؟قال لي ياخي اتلهي😂قلته ليهو طيب اها حتنجزو متين حمااااس يخخخ حماا

ااس😍❤قال لي انا جاي في اليومين دي وكلمته جدي وحبوبه ينزلو عشان م امشي اتقدم من غير كبير،وكلمته عمي ابراهيم ،
قلته ليهو يعني انت شبه ظبطتهه امورك ونحن اخر من يعلم؟
قال لي بطلي فتنه انا مكلم امي قبل،عاينته لي امي سكتت،قلته ليهو يعني انا اخر من يعلم؟قال لي انتو ومنذر😂😂😂😂
قفلته منو اتصلته على مناسك كم مكالمه حتى ردت قولته ليها مناسك انتي بتسفهيني؟بتتغلي علي ي مرت اخوي؟
سكتت
قلته ليها اردح ليك اسي ولا لمن نجي نتقدم؟
قعدت تضحك قلته ليها بتحنكي اخوي من وراي ي مناسك؟
قالت لي م انتي لو م حيوانه كان اخترتيني ليهو قبل م احنكو لو صحبتي بجد
قلته ليها وكمان بتقوليها في وشي وبتقوي عينك؟
قعدت تضحكك😂😂😂😂💔قلته ليها رغم العنف اللفظي العايزة اسمعكم ليهو انتوالجوز بس حقيقة يعني اخوي عرف يختار ي وسخهه😂💔قالت لي شهد يخخخخ🙈قلته ليها خلي الخجل دة لمن نصلكم ي وسخهه انا اسي م فاضيهه ليك لمن اخلص امتحانات بجيك و...الخ
قبل الامتحان بيوم قاعدة مع ماهر عازمني وكدة كان،اثناء م بناخد وندي في الكلام جو اتنين حلوين داخلين مع بعض وماسكين يدين بعض ويضحكو بعد تركيز معاهم شفته الحنه في يدين البت قلته ليهو عرسان شكلهم لكن حلوين،عاين ليهم مسافهه،قلته ليهو العروس كيوتهه حبيتها لا اقصد حبيتهم ال2 ضحك وقال لي اي ماشاءالله عليهم❤قلته ليهو بالمناسبه انا كلمتك انو حسام اخوي نازل يخطب؟قال لي لا ياخي متين ماشاءالله مبروك،قلته ليهو تخيل بس حيخطب منو؟قال لي اها؟
قلته ليهو خممممن😶
قال لي اهااااا!؟
قلته ليهو مناااااااسككككك صحبتي تخييييل😍قال لي لا ياااخي وبقى يضحك قال لي ي سلاااااااام ياخي ماشاءالله عليه اختيار موفق جداً😍❤قلته ليهو م بتتخيل فرحني كيف يعني تخيل صحبتك الأنتيم تبقى مرة اخوك بالجد حاجه كدة في منتهى الوبعلي 🙈❤قال لي وعملوها كيف بس فاجأوكم كدة😂💔قلته ليهو والله صدمونا،ضحك ضحكهه حلوة وقال لي كان مجخنن 😂❤قلته ليهو بالجد عامل كتوموتو😐😂💔قال لي لالا تمام ربنا يقدم الفيهو الخير انا زاتي يمكن اللحقو قريب😁😀
هنا كل شي جاط والجو اتكهرب وانا اتصلبتهه في مكاني وحسيت لساني اتشل من التقل وقلبي اتقبض وجسمي كانو صبت فيهو مطرة ،بعد لحظه صمت مسافهه قلته ليهو احم بالجد؟
قال لي اي والله احتمال لسسسه ماف شي مؤكد❤قلته ليهو اممممم والعروس جاهزة يعني وكدة؟
قال لي م قلته ليك ماف شي مؤكد؟
قلته ليهو م هو ماف زول بفكر في العرس قبل م يلقى العروس صح؟
قال لي ي زوله انا يوم متين كنت بفكر زي الناس😂😂😂😂😂قلته ليهو اوبس نسيت م انت دايماً عكس عموماً مالو م كعب انجزو لينا انتو الاتنين محتاجين شي يفرحنا ونتخلص منكم اساساً،قعد يضحك وقال لي ابشري😂❤
فضلنا نرغي ونضحك ونفتح موالات ،ابداً م اخدته كلامو على محمل الجد،نزلته الامتحان وعديت ايامها وحسام اخوي جا وبقينا في موال تجهيزات الخطوبه وكذااا هو اصلاً جاب ليهو معاها شي وشويات من السعوديهه م كان ناقص شي ابداً وحقيقة يعني دة ابسط شي يتقدم لي مناسك❤كنت مبسوطه شديد وكل الوقت داخله ومارقه اجيب افكار سواء للتغليف او لغيرو،وجا اليوم المحدد علشان نمشي نتقدم كان يوم جمعه ،مشينا واستقبلونا اهلها وهي كانت مبسوطه للضرس الاخير السجم غايتو م قصرنا منها انا ولجين وفاطمه وشغلناها ليهم😂❤الصدمه كانت انو حسام قال عايز يعقد فكرة العقد دي م عارفه جاتو من وين المهم ختانا نحن واهل البت امام الامر الواقعةوبالفعل عقدنا،كانت لحظه حارة شديييييد واصعب ما تكون يعني اخوي الكبير عريس وبابا ماف و...المهم بكييييييييييينا بكل احساس الوجع الفي الدنيا وبكينا الناس معانا...💔❤

عدة كم شهر من عقد حُسام والحمدلله نتيجتي طلعت ظابطه طبعاً بفضل اجتهاد ماهر معي كانت منتظر النتيجه بفارق الصبر ومتخوف ومتجرس منها اكتر مني غايتو لو م نجحتهه كان انجلط😂💔 م في يوم كنت واقفه في صف بنزين ،اتصل علي ماهر قال لي ي سجم وبن انتي بتصل عليك وبرسل ليك م بتردي؟قلته ليهو والله واقفه في صف بنزين ومتجرسه منو يخخخخ والجو مسخن والحاله زفتهه😭💔قال لي وين انتي في اي طلمبه؟
قلته ليهو النحله الفي ال60،قال لي اطلعي تعالي طيب،قلته ليهو نووووو واخلي عربيتي لمنووو؟قال لي اطلعي تعالي بي عربيتك،قلته ليهو انت اهبل؟انا م عندي بنزين ي انسان ولو م انتظرته دوري حاتسيك اكيد م حالقى طريقهه تاني😭💔قال لي ياخي عايزك في موضوع ضروري ،قلته ليهو م ينفع غير اليوم؟ قال لي لا م ينفع ابداً ضروري اليوم اليوم،قلته ليهو والبنزين😭😭😭💔قال لي عندي واحد في البيت بديك ليهو،قلته ليهو احلف؟قال لي حصل مرة انا كذبته عليك؟قلته ليهو حصل 😭😭😭💔ضحك قال لي طيب اطلعي تعالي جادي معاك انا والله م ينفع يتاجل اليوم اليوم بس،قلته ليهو طيب حاضر طالعهه والله اللقاهو موضوع م جايب حقو او كذبته علي بتلوم معاك،قال لي يلا استعجلي ي ام لسان،قلته ليهو في عينك والله م اجي،قال لي لا خلاص اسف اسف😐طلعته من الصف ومشيت عليهو قال لي ان

تظريني في لاكچري تمام؟قلته ليهو كمان حأنتظر؟قال لي الشفقهه تطير ياااااشهد😭💣💔مشيت انتظرتو عديت نص ساعهه حتى فجأة حسيت بي زول بضربني في راسي،رفعته راسي قال لي الشفقانه ام لسان وجراني بي طرف اصابعو من مناخري💔قلته ليهو نص ساعه ي سج...فجأة سكتته ،سكتته من الشوفتو،من الوراه ، فضلته ساكته وبنفس وضعيتي ديك قال لي اعرفك ب تولين،جاني تصلب في الشراين وانا م قادرة احرك اي شي ولا حتى ابدي تفاعل ،
قال ليها تولين دي شهد بتي الحكيت ليك عنها ،ضحكت قالت ليهو قصدك الدايماً بتحكي عنها هاي شهد كنت هموت لو م شوفتك قمت على حيلي حضنتني وباستني قالت لي كيفكك؟
اخدته نفس واستعدتهه تركيزي حتى قلته ليها تمام الحمدلله وانتي؟قالت لي نايس تو ميت يو،واتلفتت على ماهر وقالت ليهو"إتز سووو بيوتيفل اند سو كيوت"
بقيت اعاين ليهم"يعني م انا كمان عايزة افهم في شنوووو"..😔😶

م بقدر اوصف شكل البت لأنو حافجر في وصفها والفحور زاتو بسيط عليها م كان واضح عليها انها سودانيه خالصه يعني احساس ميكس وكدة،كانت لابسه بنطلون وقميص كحلي فاتح واسبورت وفاكه شعرها وخاته الطرحه نظام جادعاها وكدة والسماحه،السماحه تهبل ماف شي غلط فيها الا وصفي الما كفايهه دة،ماهر قال لي طبعاً جننتني قالت فرض عين تشوفك بأي طريقه كانت لازم وهي اليوم مسافرة عشان كدة كان لازم اجرك من مكانك واجيبك هنا

من جواي كنت بقول"اي طيب فهمته انها عايزة تشوفني طيب دي منو بالظبط وبالنسبه ليك شنو لمن بتحكي ليها عني كمان؟"

فضلته قاعدة وانا كأني قاعدة في النار ومتنافقه معاهم بضحك وبتبسم وباخد وبدي معاهم في الكلام وهم يضحكو احساس منسجمين وواضح انهم م بعرفو بعض من قريب،يعني ماهر كانت عندو بست في حياتو ابست مني💔

القعدة م طالت جاتها مكالمه بعد م خلصتها قالت لينا لازم امشي بعد كدة رغم اني م حابه بس حبوبه بتقول لي تعالي علشان نجهز على المطار في حين انو نحن طيارتنا الساعه12وهي عايزاناةنمشي من 8،ماهر ضحك قال ليها حال الحبوبات،قالت ليهو لا حبوبتي انا اوووڤر صراحهه م بتتقارن هي واصلهه ليفل عالي شديد💔قعد يضحك قال ليها طيب يلا اوصلك،قالت ليهو لااااا وحتخلي شهد؟عاين لي
بعد مسافه قلته ليها لا انا كمان حأمشي علشان الزمن إتأخر،قالت لي لا بالجد خلصو قعدتكم انا زاتي لو م حبوبه م كنت رجعته اسي بس حتفضل تزن على دماغي لين ارجع،قلته ليها لا معليش معذورة يخخخ علشان موالات السفر دي محتاجه ترتيب من بدري،قالت لي تسلمي حبيبي على تفهمك نايس تو ميت يووووو جداً المرة الجايه ان شاءالله نتلاقى في وقت اوسع وناخد راحتنا في القعدة❤❤❤قلته ليهو اكيد يشرفني انا والله❤حضنتني وباستني ومسافه حتى ماهر قال لي طيب يلا ي شهد علشان تمشي،فضلته بعاين ليه مسافه وقلته ليهو طيب ،
طلعنا مشى معي لغايه م وصلته العربيه قال لي بتصل عليك بعدين،قلته ليهو بصوت مبحوح تمام،
قال لي يلا سلام...
فضلته بعاين ليهو وهو ماشي م اتلفت عاين لي حتى فتح ليها باب العربيه ركبت وهو ركب واتحرك بكل بساطهه كدة💔م قدرته اسوق وقفته مساافه حسيت بدمعتي جات جاريه ،تخيلو حتى م فكر يتذكر انو مطلعني من صف بنزين،وقال لي ي شهد انا عندي ليك بنزين ومشى خلاني كدة،رجعته بيتنا وانا قافله معي لمن غلط وم طايقهه زول حتى ماما بس رديت عليها السلام ودخلته غرفتي،النوم غلبني والقعدة غلبتني،حتى بقيت اتكلم مع نفسي مرة اهديها ومرة اقول ي شهد يمكن زوله صحبتو ساي و...الخ وفضلته فاتحه الفيس ومراقباهو اذا داخل ولا لا والواتسب برضو نفس الشي ،فضلته مساهرة وبعد السهر دة كلو م نمتهه الا الساعهه 3صباحاً وهو لا دخل ولا فكر يتصل حتى😭💔مشيت اليوم التاني الجامعه وحالتي مُذريه وسيئه شديد،معظم المعي في الدفعه بسالوني مالك اليوم؟اتجاوزتهم لغاااايه م جاتني لجين سلم اتفقعته ليها بكى اول م قالت لي مالك؟بعد تحانيس كذبته عليها وقلته ليها مصدعه بس وم نومت امس بس،ماهر م فكر يكلمني الا المساء رسل لي "صاحيهه؟!
ياخي صاحيهه؟انا اصلاً منتظراك انتي اللي تصحى
قلته ليهو ايوهه،
قال لي ينفع اتصل؟
قلته ليهو من متين وانت بتستأذن علشان تتصل؟
على طول اتصل علي قال لي كيفك ي سجم؟
قلته ليهو تمام الحمدلله انت كيفك؟
قال لي الحمدلله ووين من امس؟قلته ليهو انت بتسالني انا السؤال دة؟طيب م تسأل نفسك 😒ضحك قال لي انشغلته بس والله طيب ليه م اتصلتي انتي؟
قلته ليهو م حبيت اشغلك من شغلك الشاغلك😊
قال لي اممممممممممم دة كلام عتاب،قلته ليهو لا ابداً💔قال لي والله ي شهد وصلته تولين بيتهم وبعدها عندي شغل كان مفروض اتمو مع زول مشيت عليه بعدها تولين اصرت علي اجي عليها في المطار وانتظر معاها لغايه م طيارتها تقوم رجعته البيت تعبان ومرهق وم صحيت الا العصر💔
اسم تولين على لسانه مرتين في جملهه واحدة💔
قلته ليهو اممم حلو طيب ان شاءالله تكون وصلت؟قال لي اي وصلت الحمدلله ،قلته ليهو الحمدلله❤
بقت في لحظه صمت كدة بينا،بعد فترة قلته ليهو مالك؟قال لي مالي؟قلته ليهو ساكت؟
قا

ل لي لا م ساكت بس مستغرب انك اليوم هاديهه كدة هههههه،قلته ليهو طقني عين يلاااااا😹💔قال لي امممممممممم رايك شنو فيها؟قلته ليهو في منوووو؟
قال لي تولين يعني منووو؟
سكتت تخيلو بسالني انا عن راي فيها
قلته ليهو لييييهه السؤال؟
قال لي علشان بهمني رايك ❤
قادرين تتخيلو احساسي اللحظه ديك؟
مفروض انا اديهو راي فيها لساني اتجلط حسيتي💔
قلته ليهو سمحهه شديد❤قال لي جد؟
قلته ليهو ايوة❤
قال لي يعني عجبتنك؟
سكتت حسيت انو حلقي اتقفل ،قلته ليهو ايوة
قال لي يعني ابقى عليها؟
قلته ليهو كيف؟
قال لي يعني قبل كدة سألتيني اذا انا باقي على العرس والعروس موجودة وكدة وقلتي لي العروس جاهزة ولا لأ وقلته ليك شبه كدة،شبه.كدة دي كان المقصودة بيها تولين❤

حسيت الدنيا ضلمت في وشي،راسي في الارض ورجولي فوق والارض لافه بي م قادرة استوعب يعني ماهر بحبها وعايزها و...
قال لي بعرفها من بدري بس علاقتنا م كانت على قدر كدة،جمعتني بيها صدفه في المطار بس كنا مسافرين على نفس الطيارة ،
من جواي كنت بقول"اسكت ياخ م عايزة اعرف ولا عايزة اسمع"
كمل وقال لي"هي م سودانيهه خالصه"
قلته ليهو بصوت مبحوح واضح
قال لي امها بريطانيه وابوها سوداني،قلته ليهو ايوااا حلوو طيب ماشاءالله سمحهه،
قال لي اسي هي سافرت تُركيا حتعدي حكايه بتاعه شهر بالكتير بعد تجي راجعه ان شاءالله ناوي امشي اعمل شي رسمي واتقدم...

نزلته التلفون من اضاني وحاولته اتماسك واتمالك اعصابي بعد مسافه قلته ليهو م سامعاك الووو؟قال لي الشبكه كعبه شكلها
قلته ليهو ايوة💔
قال لي المهم انا حاسي انو انا وهي متفاهمين وهي زوله ماشاءالله عليها من كل النواحي متفهمهه،مثقفهه،طيبانه وهكذا يعني
قلته ليهو طيب حلووووو ياخي ❤
قال لي طيب بعد فترة ال15يوم الاولى دي تعدي وندخل على ال15يوم التانيه حأكون محتاج ليك شديد عشان انا م بفهم في الحجات دي ولا عارف انا ك زول ماشي اتقدم او اخطب مفروض اودي شنووو وكذااا ف لازم انتي تكوني معي وتساعديني في الحجات دي عارفه انو انا م عندي غيرك صح❤
قلته ليهو ههه بس كدة؟اااابشر ي سيدي م تشيل هم بظبط ليك المواضيع شغلتي كمان❤
قال لي عارف كدة❤❤❤❤

استعجلتهه قفلتهه منو علشان شويهه وكنت حأتفجر واتفقع بكى في التلفون م ضامنه نفسي ابداً😭💔بكيت بكيت شديد وانا شايفه الحياة دي بتلعب بي كدة يعني انا حاسه نفسي دايرة في حلقه مفرغه يتني لا بحصل الشي الانا حاباهو ولا بحب الشي الحاصل معي طيب لييييهه بس؟لييييهه بس انا يحصل معي كدة؟لييييهه بس انا اعيش في ابعذاب والوجع دة؟
كل م.اقول خلاص حالي حيتعدل والحياة حتمشي معي يحصل شي يقلبها فوقاني تحتاني😭💔احساس اني بنفخ في قربهه مقدودة كل شي بروح مني كدة في لمح البصر وبدون مقدمات حتى😭😭😭😭😭😭💔
نوعاً ما رجعته لمرحله الاكتئاب بس بيني وبين نفسي يعني كنت بظهر اني تمام بس انا من جوة بتأكل بالذات مع ماهر كنت بتنافق مع نفسي شديد علشان بس ابين ليهو انو انا مبسوطه واتعامل معاه بشكل عادي،حتى لما جيت حكيت لي لجين وطيف حكيت ليهم بكل قوة القلب والتماسك الفي الدنيا والغريبه هم عارفين اني بتنافق معاهم بس كنت مدياهم احساس اني متعامله مع الموضوع ببرود،لُجين لما وصلت الحد قالت لي شهد انا عارفاك بتظهري خلاف م تبطني م تحاولي تعملي لي فيها الزوله الكاسرة الحنك والمكنه المركباها دي م جايه معاك عارفه ليييهه؟لأنو جوطه حياتك دي كلهاااااااااا محورها الوحيد ماهر ماهر ي شهد ف قصه انك حتكوني الصحبه الجدعه الحتقيف معاهو دي بطليها لأنها مهلكهه انتي بتحبيهو ي شهد ودي اكتر حاجه مغطسه ولسه حتغطس حجرك
كنا في مطعم طالبين بيتزا،اخدته قطعه البيتزا دخلتها في خشمي بكل برود وشلته البيبسي شربته منو بعدها قلته ليها ي بت انتي هبله؟ياخي قولي بحبو؟اكيد انا م عاملين علي حاجز بيني وبينو بي ليزر علشان يمنعو يشوفني او كذااا،وبعدين م كل مرة بتحبيهو بتحبيهو كنت بحبو اسي لا دة واقع انا بقيت متعايشه معاه اضافه لي كدة يعني انا حياتي حيفضل محورها كلو ماهر ماهر؟لا طبعاً زي م هو شاف حالو انا كمان نفس الشي وبقت عندي اهتمامات اكبر منو ع فكرة ف يعني بليز لو عايزة تساعديني م ترغي معي في الموضوع دة كتير+انتو على فكرة حتساعدوني في موضوع الحجات الحنجيبها للخطوبه ظابط؟
رجعته كملته اكل وانا ساكته،احياناً ربنا في اضعف لحظاتك بديك قوة كدة تقاوم بيها او تبقى ليك مسكن لوقت ما على الاقل،انا كنت حاسه بالحاجه دي،
بالفعل بعد فترة ال15يوم ماهر كان متعامل مع الموضوع بشكل جدي ،في يوم جا وجاب لي شيك قال لي الشيك دة عليهو مبلغ م حأرجع ليك ولا حاسلك من شي اشتري كل الحجات الممكن تتقدم في الخطوبه وجهزيها ولو نقص ليك شي اديني خبر،م قادرة اتجاوز اللهفه واللمعه الفي عيونو وهو متحمس للموضوع كدة💔قلته ليهو كيف يعني م حتسالني؟لا لازم كل شي يكون من اختيارك انت علشان اكيد انت عارف زوقها وكدة،قال لي لا انا مخلي الموضوع في يدك انتي و انا واثق من زوقكك حتى لو م شوفته