✔️ ورود به کربلا

صحرای عشقه قویدی قدم پادشاه عشق
خلوتسرای یاره تاپوب شاهراه عشق

شه مرکبی قدم قدمیندن گوتورمدی
مبهوت اولوب او حاله سراسر سپاه عشق

قوندی غبار غم رخ شمس امامته
دوشدی خفایه تیره لنوب مهر و ماه عشق

امر ایلدی کجاوه لری یندرون تمام
بو دشت غم فزاده وُرون بارگاه عشق

بو حالی گوردی زینب علیا مکرّمه
چکدی درون دلدن او مظلومه آه عشق

عرض ایلدی بو یرده نزول ایلمه حسین
غرق ایلر اهل عشقی بو یرده میاه عشق

قان قان دیور بو دشت و بیابان پر خطر
قورخوم بودور بو یرده اولا محو جاه عشق

لرزاندی برگ بید تک اطفال مه لقا
وحشتده دور حرملرون ای دادخواه عشق

بو یرده سن شهید اولوسان منده دستگیر
حتمی بیر امردور بونا یوخ اشتباه عشق

پوزقون گورنده زینبنون حالنی امام
توکدی عذاره گوز یاشنی پادشاه عشق

فرمایش ایتدی ایتمه باجی زینب اضطراب
صحرای کربلادی بو یر جلوه گاه عشق

جدّیم خبر ویروب بو یرون ماجراسنی
بیر بیر بیان ایدوبدی رسول الاه عشق

پرگارمی پوزالّا بو صحراده ظلملن
بیرحم عدوی سنگدل و دین تباه عشق

لب تشنه قانینه بو یانار نوجوانلاریم
فانی ایدر وجودلرین بیر نگاه عشق

دوغرالّا اکبرین دل لیلادن اوج ایدر
طاق سپهر اخضره آه سیاه عشق

عبّاسمون ایدّله ایکی قولّارین قلم
عدلین اولور قولوندان آخام قان گواه عشق

پیکان دمینده اللریم اوستونده جان ویرر
اصغر او طفل ماه وش و بی گناه عشق

ناحق کسلّه باشمی اثبات حقّ ایدر
بو خاکدن نُموّ ایلین گل گیاه عشق

مندن صورا حرم تالانار خیمه لر یانار
بو بی پناه عیالیمه سنسن پناه عشق

فخر ایلر اهل عالمه ای شاه کربلا
«صحّافه» یتسه مرحمت گاه گاه عشق


#ورود_کربلا


✍️ مرحوم صحّاف تبریزی

_________________

ورود به کربلا

✍️ زبدة الاشعار ✍️

🆔: @nohe_torki

مرحوم حسینی سعدی زمان

قارداش سارالان رنگوه قربان بو نه یِردی
یاندورما منی ایلمه فغان بو نه یِردی


تیجک بو بلالی چوله توکدون یوزه قان یاش
رنگون سارالوب سولدی اُلِیدی باجون ای کاش
قربان اولوم آغلار گوزیوه آغلاما قارداش
حالون نیه پوزقوندی حسین جان بو نه یِردی


بو صرصر محنت ته ائیدی غم یولین آچدی
قوندی یوزیوه تیر مصیبت دله ساچدی
قربان سارالان رنگیوه، رنگون نیه قاچدی
آثار خزان اولدی نمایان بو نه یِردی


قویجان قدمون بو یره، پژمرده دل اولدون
نولدی سنه قارداش که ساری گُل کیمی سولدون
گورسندی یوزومده اُلوم آثاری پوزولدون
ای عزّت گلزار و گلستان بو نه یِردی


آز آه چکوب ایله نوا ای شه دوران
گوز یاشوی توکمه او گوزل گوزلره قربان
پوزما اوزون ای قلب تمام عالم امکان
سنلن پوزولور عالم امکان بو نه یِردی


ای آفت کونِینه آدی حرز مجرّب
هرگز گوره بیلمز گوزی یاشلی سنی زینب
هر چند منه سن دیمیش کشفیدی مطلب
امّا اوزون ایت مطلبی اعلان بو نه یِردی


اوّل دولانوب یاور و انصاریوه باخدون
دولدی گوزون عبّاس علمداریوه باخدون
بیر زینبه بیر خورداجا قیزلاریوه باخدون
اولدون نیه چوخ حالی پریشان بو نه یِردی


سن آغلوسان آئینه ی طاهایه باخاندا
حالیم پوزولور من رخ لیلایه باخاندا
عبّاس کیمی سرو دل آرایه باخاندا
اشکونله اولور صبر ایوی ویران بو نه یِردی


قربانون اولوم قیل منی بو سرّیدن آگاه
علّت ندی سرلشکره امر ایلدون ای شاه
قورسونلا چوخور یرده بیزه خیمه و خرگاه
سرّین بو سوزین ایلمه کتمان بو نه یِردی


بو یِر گَتورور قلبیمی درده آنام اوغلی
وردور ما سرا پرده بو یرده آنام اوغلی
توکمه دُرِ اشکون رخ زرده آنام اوغلی
ایتمه منی دل خسته و گریان بو نه یِردی


یوخسا بو همان مرکز ایفای وفادی
بو دشتیده لیلانون ایشی وا ولدادی
واضح دی گوروم یوخسا بو یِر کرب و بلادی
اکبر اولاجاق قانیله غلطان بو نه یِردی


اَل ساخلا #حسینی گوروسن یازموری خامه
ایسته صله شاه شهدادن بو کلامه
زینب دلیجه یاز بو سوزی بیرده امامه
قارداش سارالان رنگیوه قربان بو نه یِردی



#سبک_ای_شمر_دنی_قیزلاری_معجرسیز_آپارما
#سبک_ای_باد_صبا_کرببلایه_گذر_ایله
#سبک_وقتیکه_دگوب_فرق_علی_اکبره
#سبک_افلاکه_چخوب_همهمه و ...




#ورود_کربلا
#سعدی_زمان
#قارداش_سارالان_رنگوه_قربان_بو_نه_یردی
#لمعات_حسینی ص 148
#ترکی

✍️ #زبدةالاشعار ✍️

🆔: @nohe_torki