در مدح مرد تنهای تاریخ علی(ع)و ماجرای زن عرب و #گریز به مصیبت حضرت رقیه(س)

✍️ زبدة الاشعار ✍️

🆔: @nohe_torki

مرحوم انور اردبیلی

بخش 1️⃣

بزرگ مرد جهان حجت الهی علی
سپهر معدلتون جاودانه ماهی علی

بسیط مصطبه ی لطفینون گداسی ملک
حبیب لم یزلون مرد دل بخواهی علی

بساط حشمتینه رشک ائدن سلیمانلار
ایاقی آلتدا قویان عالم رفاهی علی

عبادت عالمی هر لیلی مثل لیله ی قدر
صفای عشقی سالان حیرته پگاهی علی

مثال آینه دور کارنامه ی عمری
که قویمیوب ائله آئینه ده سیاهی علی

نه زور ائدوب بیرینه مطلقا نه زوری قبول
سریر منزلتون ذوالجلال شاهی علی

روشِ کاری مسلمانلارا گوزل میزان
خداپسند عملی ایلین گواهی علی

ایشیقلی مشعل اولوب سالکان معنایه
نشان وئروب هامی مخلوقه شاهراهی علی

اؤزی فروتنیدی زندگی سی درویشی
ولی ضعیف و ستمدیده تکیه گاهی علی

لقبینی خبر آلسون دییر سنه تاریخ
یتیم لر آتاسی بیوه لر پناهی علی



قسم خدایه علی ذات حقّه مظهریدی
قسم خدایه علی بی نظیر رهبریدی



تَیَمُّناً بو حدیثی به صورت اشعار
وئروم عریضه بو مجلسده اَیُّهاالحُضّار

کچوردی کوفه ده بیر کوچه دن ولی الله
گوروب بیر عورتی معبرده حیدر کرّار

دولی سو مشکین آلوب چیگنینه گئدور ائوینه
ائدوب اؤ عورتی دل خسته یولدا سنگین بار

دیور الهی داخی جاندا طاقتیم یوخدی
بو شهر کوفه ده یوخ من کیمی بلایه دچار

علی منی نه یامان گونلره قویوب یارب
اراده ایله ئوزون انتقامه یا قهّار

ائشیتدی سؤزلرینی عورتین وصیّ رسول
یاخینلاشوب اونا الطافین ایلدی اظهار

دئدی سو مشکوی وئر حمل ائدوم بیر آز دینجل
یورولموسان بیلورم ای عفیفه ی دیندار

منی ده دینی برادر حساب ائله ئوزوه
باجیا قارداشی حامی گرک اولا ناچار

سو مشکینی گوتوروب مقصده یتوردی علی
بویوردی قارداشوی عفو ائت ای وفا کردار

بو بیر سؤالیمون اما جوابین ایستیورم
علی سنه نه ستم ایلیوبدی قیل اقرار



دگل سن اولما ابوطالب اوغلونا خوش بین
ندور دلیلی اونا دلدن ایلوسن نفرین



دئدی اَخَ العرب ای عبد حضرت باری
سو مشکیمی گتوروب ایلدون منه یاری

ولی بو یاخشیلیقا منده بیر عوض یوخدی
جزا گونینده یقین اجروی وئرر تاری

دئدون علی ائلیوبدور سنه نه ظلم و ستم
ائشیت جوابینی ای خسته لر هواداری

شهید ائدوبله منیم دین یولوندا صاحبیمی
قالوبدی دورد اوشاقیم ائوده یوخ پرستاری

وظیفه دور اونا ایتام شهره باش یتوره
صغیر و بیویه یوز وئرمیه گرفتاری

رئیس مملکت مسلمین دور اما
یولونا منتظروک گلمیوب بیزه ساری

بالالاریما دویونجا غذا تاپانمیورام
آدین قویوبدی علی بیوه لر مددکاری

ائشیتدی شیرخدا عورتین بو سوزلرینی
گلوبدی رقّته گوزیاشینی ائدوب جاری

بویوردی حق سنیلندی قصور ائدوبدی علی
باغیشلا جرمین اونون بیلمیوب بو اسراری

طعاموزه سویوزا من ئوزوم کفیل اولّام
یتیم اوشاقلاروی ایلرم نگهداری



علی مثالی سیزه گونده باش یتورّم من
لباسه حاجتوز اولسا آلوب گتورّم من



وئروبدی قول حمایت اؤ بیکسه مولا
اورکده غصه لری جوشه گلدی چون دریا

دیوردی اؤز اؤزینه غفلت ایلیوبسن علی
قصور اولوبدی وظیفونده ائتمیوبسن ادا

آدون خلیفه الونده کلید بیت المال
خبر یوخون نه چکور خانواده ی شهدا

رئیس مملکت اولماق وظیفه دور سنگین
گرک تعهّد ائدن عهدینه ائده ایفا

چالیشدی ائتدی تهیه امیر گردون جاه
بیر آزجا بوغدا اُونی بیر طبق دولی خرما

رُطب طبقده الی اوسته، اُوندا چیگنینده
اؤ بیوه نون ائوینه حمل ائدوبدی شیر خدا

قاپونی وردی کچوبدور اطاقه خجلتیله
یره قویوبدی آپاردیقلارین شه والا

اوشاقلاری آلوب آغوشه یوزلرین ئوپدی
اؤ ائو محبت ائوی اولدی یعنی سر تا پا

بویوردی عورته قسمت ائدک ائوین ایشینی
مواظبت ائله سن بو اوشاقلارا حالا

گتوردوقوم اُونی دا من اؤزوم خمیر ائلیوم
سیزه چورک پیشیروم فوری ای حمیده لقا



علی اؤ بیوه نون القصّه گوگلونی آلدی
خمیری ائتدی مهیّا تنوره اود سالدی



یواش یواش ...


ادامه دارد ⬇️⬇️

#حیدریه_مدح
#حضرت_رقیه
#بزرگ_مرد_جهان_حجت_الهی_علی
#انور_اردبیلی
#صدای_عاشورا_انور
#ترکی

✍️ #زبدةالاشعار ✍️

🆔: @nohe_torki

در مدح مرد تنهای تاریخ علی(ع)و ماجرای زن عرب و #گریز به مصیبت حضرت رقیه(س)

✍️ زبدة الاشعار ✍️

🆔: @nohe_torki

مرحوم انور اردبیلی

بخش 2️⃣

یواش یواش اوجالوبدور شراره ی سوزان
لب تنوریدن ائتدی زبانه سی فَوَران

یوزین دوتوب اوجالان شعلیه بویوردی علی
جهنّمون اودونا یانما سن، بو شعلیه یان

شرار دوزخی یاددان چیخاتما ای نفْسیم
ائله بیر آتشه هانسی بشرده واردی توان

سن استراحت ائدوبسن یتیملر قالوب آج
دؤزر نه نوعیله بو درده صاحب وجدان

قاپی ویریلدی اؤ وقته گلوبدی بیر عورت
علینی گوردی کنار تنوریده حیران

سؤال ائدوب بو سؤزی خانه صاحب عورتدن
قوناقوی تانوسان کیمدی؟آدین ایله بیان

دئدی تانیمیورام ، آدینی خبر آلدیم
منه بویورمادی امّا اؤ نابلد مهمان

فقط دئدی بو سؤزی کوفه ده غریبم من
تنوری داغ ائلیوبدور بیزه پیشیرسون نان

جواب وئردی دایان قوی آدین دیوم کیمدی
علی ولیّ خدادی اؤ رادمرد زمان

علی آدین ائشیدوب قاچدی مطبخه اؤ خانم
دئدی اؤزوم بالالاریم آقا سنه قربان



گناهیمی آقاجان عفو ائله بو گوزیاشیما
جسارت ایلمیشم ساحتونده کول باشیما



جواب وئردی اونا شهریار ملک حجاز
علینی سن تانیدون کشف اولوندی حیف اولا راز

وظیفه دور گرک عذر ایستیه علی سندن
قصور مندن اولوب سنده یوخدی عذره نیاز

تَفضّل اولسا الٰهیدن ایلرم جبران
باغیشلیون بیلورم غفلتیم اولوبدی بیر آز

گلوب بالالاروی بیر بیر آلّام آغوشه
آتا کیمی دؤزرم هر نقدری ائتسه له ناز

قلم سؤزی گینه ده ایستیور گریزه چکه
سوزون گریزی اگر اولماسا گوزل اولماسا

گرک اورک اودونی گوزیاشیم ائده خاموش
دویونجا آغلاماسام قلبیمون اودی سویوماز

محلّی دور ائلیم عرض شحنه ی نجفه
آقا سنی بشریت تانور یتیم نواز

نوه ن رقیه کیمی نازنین بالا یوخودی
خرابه یرده آجیندان ائدوردی سوز و گداز

بنفشه مثلی قرا ساچلاری پراکنده
آز اولدی عمری ولی تار گیسوانی دراز

دوداقینی گوتورنده اؤ قیز دوداق اوستن
چمن غصه ده عیناً اولوردی غنچه ی باز



سولان یوزی ساری گلدن آلوردی صبر و قرار
خمار گوزلری نرگس لری ائدوردی خمار



زمانه ده اونون آیری زمانه سی واریدی
اورکده آتش غمدن زبانه سی واریدی

همیشه توأمیدی شبنمیله گل مثلی
یوزینده گوزدن آخان اشک دانه سی واریدی

گجه لری اویاقیدی گوزی ستاره کیمی
نجوم و ماهیله بزم شبانه سی واریدی

توکوردی هر نقدر گوزیاشی قوتارموردی
اورکده دُرّ سِرشکه خزانه سی واریدی

ترنُّمی ائلیوردی اثر قناری لره
ز بس قفسده یانقلی ترانه سی واریدی

عزا بهارینه بیر بلبلیدی پر بسته
دمیر قفس مَثَلی آشیانه سی واریدی

سیزیلدیاندا خانم زینبین آلیدی جانین
سؤزینده شرح غم عاشقانه سی واریدی

باخوردی حسرت آتا قارداش آختاروردی گؤزی
قیامت ائتمگه هرگون بهانه سی واریدی

دونی قرا ساچی قاره گونوزی بختی قرا
بدنده قمچی یریندن نشانه سی واریدی

یوزینده طُرّه سی آشفته تار فکری کیمی
تِلین داراماقا فکر ائتمه شانه سی واریدی



کچوردی عمری غم بی شماریلن اؤ قیزون
واریدی کشمکشی روزگاریلن اؤ قیزون



دیوردی عمه آتام سروریم هایاندا قالوب
رئیس سلسله ی اطهریم هایاندا قالوب

گلی گرک بجَره باغبانی گلشنده
سارالموشام بی بی گل پروریم هایاندا قالوب

بابام منی ایتوروبدور و یا که من بابامی
بو شهره نابلَدم رهبریم هایاندا قالوب

اگر مسافرت ائتمیش آتام سؤزوم یوخدی
بویور گوروم اؤ نبی بنذریم هایاندا قالوب

خبری یوخدی قرا بخت اولوب گوزل باجیسی
قبیله نون گوزلی اکبریم هایاندا قالوب

دئسم ملکدی علی اکبره خطا دئمیشم
مدینه یوسفی تاج سریم هایاندا قالوب

جانین نه ارزشی واردور ایتورسه جانانین
دیلیمده یوخدی توان دلبریم هایاندا قالوب

کشیده قامت عَموم بوشلیوب بیزی باشینا
علی نشانی علی مظهریم هایاندا قالوب

هاچاندی قاسم آهو نگاهی گورمه میشم
غزال عترت پیغمبریم هایاندا قالوب

ائلون جوانلاری گیرم سفرده دور هاموسی
ربابه سینه گلی اصغریم هایاندا قالوب

نقاب یوخدی یوزومده بی بی آچیخدی باشیم
سه ساله فاطمیم معجریم هایاندا قالوب



خطالی «انورم» الله اورکده وار محنیم
گناهیمی بو عفیفه قیزا باغیشلا منیم



#حیدریه_مدح
#حضرت_رقیه
#انور_اردبیلی
#صدای_عاشورا_انور
#ترکی

✍️ #زبدةالاشعار ✍️

🆔: @nohe_torki

یاهو

جبهه حقده اگر قیمتی جان اولسا،دایان

حقین اوستونده آخیبدی او چوخور یئرده کی قان

اویما اندیشهٔ بی ریشهٔ سنتّ شکنه

#منزوی، #یحوی، #غفاری و #انور دن اوتان

هر نه قازدیقجا،دئییب بو سوزی کهنه کیشی لر

اول آخر اوزونی تک گورجاق چاهی قازان

بوش کوزه یاخجی گورولدار،دولودان سس چیخماز

او که چوخ ولوله ائیلور دولودی بوشدان،اینان

وئرمییب لر بیزه بو پرچمی آلتیندا یاتاخ

یا که ارباب آدینا تئز آچاخ هر یئرده دُکان

قیش گئدیب اوز قَرَلیح بیر کوموروه قالمالیدی

یولونی تاپمییاجاق حق یولی ناحقه آزان

خواب غفلتده یاتانلار؛ گوز آچیب گورمه لیسوز

لَه لَه وار،یوردی یوخ اما،گئچیب ایش هر یاندان

هر اذان دان صورا مسجده گرک پخش اولسون

سوزده سوز وار"اویان ای یار وفا داریم اویان"

بداهه
#هاتف_حضرتی
" #استاد_غفاری
#غفاری_تنها_نیست
#اصالت
#عزاداری

🌺 نویسنده و ویرایش کننده از : جناب آقای حسین میعادیان 🌺

مرحوم #انور ( حاج قدیر جلیل زادگان)

احوالات علی اصغر علیه السلام با مقدمه - میدان

درسِ عشقی اگر عاشقسن ایله ازبر اوخی
عشق منشورینه باخ مطلبی جان پرور اوخی

ایسته سون قلبیوه تابش ایلیه جلوه ی نور
ایده سن روحووی تشجیعو، دولت مغزیوه شور
ایله تاریخچهء زمره ی عشّاقه مرور
سرسری گیچمه ، اولوب رمزینه مستحضر اوخی

عشق بیر قوّه دی انسانه شهامت گتورر
بیر همایون پَر همادور که سعادت گتورر
صفتِ سلم و رضا صدق و صداقت گتورر
عشقی پس زورق انسانیّته لنگر اوخی

گاهی عاشق گوروسن عشق ایلیوب ناره گیدر
گاه طوفانه دوشر گه دم منشاره گیدر
گه کسللر باشینی طشته گهی داره گیدر
عشقه هر عاشقی بیر نوعی نمایشگر اوخی

چوخدی لبیّک دییوب حقّه اولان بنده ی عشق
عاشقِ صادق و خونگرم و برازنده ی عشق
اولدی تکمیل حسین آدینه پرونده ی عشق
سلک ِعشّاقه مبارک آدینی رهبر اوخی

ایستَسوخ عشقیله عشقِ نُجبادن دانیشاق
وصف ِجانبازی مردان خدادن دانیشاق
بیر حسین بیرده گرک کرب و بلادن دانیشاق
من دیوم شرحینی سن سینوه یاز بهتر اوخی

کربلا عاشق و آزاده لرون مسکنیدور
خاتم ُالعشقِ حسین ابن علی مدفنیدور
پیرهنسیز بدنون پوشش و پیراهنی دور
نرم توپراقینی دلدادلره بستر اوخی

عشق گنجینه سیدور شهرت شاهانه سی وار
سینه ده یتمیش ایکی گوهر ِدُردانه سی وار
نیمه ساله صودامر عاشقِ مستانه سی وار
آدی اصغردی ولی رتبه سینی اکبر اوخی

شاهِ دین عشقین ئوزون ایستدیم منّتده قویا
بیر نمایش ویره عالملری حیرتده قویا
عالی بیر فلسفه نسلِ بشریّتده قویا
کیم همان فلسفه نی درک ایده دانشور اوخی

صود امر عاشقی صودسوز آنادان آلدی او شاه
آخینان گوزلره سولموش یوزونه قیلدی نگاه
باشلادی عشق یولون قالدی آنا چشم به راه
بالا گئتسه آنانین همدمین اشک ِتر اوخی

یتیروب مرکز ِمیدانه او دلسیز بالانی
دئدی قربانلاریمین تک بودی یارب قالانی
بیر کیچیک تحفه دی بو من ویره نی سن آلانی
مین اوغولدان منه بیر لطفیوی بالاتر اوخی

قالخیزوب اصغری ویردی سپه ِشامه نشان
درین اظهار ایلدی اولدی قوشون اشک فشان
حق سوزون قویمادیلار ختم ایلسون حق دانیشان
آتدی بیر مردِ قوی پنجه قوی پیکر اوخی

حقّی واریدی ربابون گیجه گوندوز ملیه
اوتورا گون قاباغیندا یوزه اشکین اَلیه
اولمادی کیمسه ده وجدان دیه بیر حرملیه
قوی کمانون یره رد ایلمه ای کافر اوخی

خم قیلوب دیزلریوی چکمه بو قدرتده کمان
آتوسان ساده اوخ آت ، یوخدی حریفونده توان
نیلیور طفل زبان بسته و بی نطق و بیان
تیز پَر ، پَرلری بُرّا ، قلیجا بنذر اوخی

اوخ کماندان قوتاریب قیلدی مسیرینده شتاب
قورخولی یللر اَسوب ، گون یوزینه سالدی نقاب
آچدی اصغر گوزونی خیمه ده دیسگیندی رباب
بالا خندان ، آنانی زار و سیه معجر اوخی


هاتف ِغیبی کاّنه دئدی ای بختی قرا
بیچدی بیر قیرمزی دوشلوک بالاوا دستِ قضا
گوزلرون یومدی گوزوندن سنی آتدی او بالا
صودون اولمادی سنون ، امدی علی اصغر اوخی

نه صولا دوندی او پیکان هدفیندن نه صاقا
بولوسوز نیلدی هیچ دَیجاخ او دلسیز اوشاقا؟
بوغازین پارچالادی اوزدی قولاقدان قولاقا
باورون اولماسا مقتللری سرتاسر اوخی

رشته ی جان قریلوب پاره لنوب شاهرگی
نبضی ساکت ضرباندان دایانوبدور اوره گی
قیرمزی رنگ اولوب آغ دوشلوگی زیبا بلگی
بزه دی صورتین القان ایلدی زیور اوخی

بالاسی الده آتا باخدی اَول دور و بره
صورا بیر باخدی اوخا یاره نی آلدی نظره
دوشدی بو فکره گُله زحمت ایدن خاری دره
یارا زحمتده قالار چکمسه گوردی گر اوخی

نه گوزون یومدی حسین ، ویردی نه ابروسینه خم
نه الی اَسدی نه دیز تیتردی عشق اولدی حَکم
یوز دوتوب درگهِ حقّه دئدی اول میرِ اُمَم
سنون عشقونله الهی چکورم اوچ پر اوخی

من بو گون صبح آچیلاندان چکورم اوخ یارادان
مرحم و نسخه دواسی ابدا" یوخ یارادان
سنی یاد ایلموشم چکموشم اوخ چوخ یارادان
بو اوخا لیک قیاس ایلماق اولماز هر اوخی

(انورا) تزکیهء نفس ایله ، ویر قلبیوه نور
هر یارانمیش ایده جاخ کوی هلاکتدن عبور
کسوتِ کبردن عور اول ، ایلمه کبر و غرور
معرفت اخذ ائت حسینه ئوزووی نوکر اوخی.

التماس دعای فرج