#ለምን_እንዳትይኝ

የሚያምር ስብእና
እንደ ውብ አበባ የሚማርክ ገላ
የሰው ውሃ ልኩ
ሁለመናሽ ሙሉ ሌላን የሚያስጠላ
አንቺን ባየሁ ቁጥር
ውስጤ ቢከብደውም ራሴን ተጠይፌ
ስተክዝ ውላለሁ
አይንሽን ለማየት ዘወትር ከደጃፌ
ግና ምንም ያህል
ከራሴ አስበልጬ አንቺን ብወድሽም
ካየሁሽ በቂ ነው
ሺ ዘመን ላፍቅርሽ እኔ አላገባሽም፡፡

ለምን እንዳትይኝ !
ሳላይሽ አልደር
አይምሽብኝ ቀኑ አይንጋ ለሊቱ
እጆችሽን ይዤ
ዶፍ በላዬ ውረድ አትውጣ ጠሃይቱ
አየሽልኝ አይደል
የመውደዴን ልኬት የፍቅሬን መስፈርያ
ሕይወቴ የምልሽ
ያድርግሽ የምለው የሴት መጀመሪያ
እኔ አንቺን ያወቁት
ትላንት ወይም ዛሬ ቀኑን ባልነግርሽም
ስወድሽ ስወድሽ
የድሜ ጀምበር ትጥለቅ አኔ አላገባሽም፡፡

ለምን እንዳትይኝ !
ሳላገኝሽ በፊት
ድምጽሽን ሳልሰማ ሳትሆኝ አጠገቤ
አቅሜን አውቀዋለሁ
ምግብ እያላመጥኩ ይጠናል ረሃቤ
ብቻ እኔ አላውቀውም
ምንሽን እንደሆን የወደደው ነፍሴ
ከአጠገቤ አትራቂ
ያሻሽን አድርጊኝ አልጣሽ ከራሴ
ይሄን ሁሉ ብዬ
እያሞጋገስኩኝ አለሜ ብልሽም
ለፍቅሬ አይመጥንም
ምን አባቴ ላድርግ እኔ አላገባሽም፡፡

ለምን እንዳትይኝ !
ገንዘብ ሃብት ዝና
አለማዊ ነገር ካንቺ ዘንድ ሳይጠፋ
ነፍስሽን የሰጠሽ
ታትረሽ የምትኖሪ በፈጣሪሽ ተስፋ
ማንም ያልተቸረው
እውቀት እና ጥበብ ከአካልሽ ውበት ጋር
ልብሽ ፍቅር ያዘንባል
ጌታ ባረፈበት በመስቀሉ ችንካር
ይሄ ቢሆን እንኳን
በመውደዴ መስፈርት ንግስት ብትሆኚም
ሳከብርሽ ልኑረው
አንቺ ብትወጂኝም እኔ አላገባሽም፡፡

ለምን እንዳትይኝ !
ሰው በዙሪያሽ ሳለ
በሄድሽበት ሚሄድ አጃቢሽ ቢበዛ
ከራሱ አስበልጦ
ስላንቺ ቢለፍፍ ወሬውን ቢነዛ
ፍቅርን የሚያስተምር
ሺ መፅሃፍ ቢገለጥ ቢኖረው ሰባኪ
እኔን አይገባኝም
ቃላት አይገልፅሽም አንቺ ተባለኪ
ጉዳዬ አይደለም
ስጋዬ እና ነፍሴ አንቺን ቢያፈቅሩሽም
ብቻ ከአቅሜ በላይ
ሳፈቅርሽ ልኑረው እኔ አላገባሽም ፡፡
ለምን እንዳትይኝ !

#እንደራሴ

(Kibrom G Mariam)


@getem
@getem
@getem