#موغانا_جئیران


یئردن آیاغینی قوش کیمی اوزوب،
یای کیمی دارتیلیب اوخ کیمی سوزوب،
یئنه اؤز سورونو نظاملا دوزوب،
باش آلیب گئدیرسن هایانا، جئيران؟
نه گؤزل یاراشیر موغانا جئيران!

ازلدن مئيلينى سالیب چؤللره،
بختینی تاپشیردین بیزیم ائللره،
او قارا گؤزلرين دوشوب دیللره،
دیشلرین اوخشاییر مرجانا، جئيران!
نه گؤزل یاراشیر موغانا جئيران!

اووچو، انصاف ائله، کئچمه بو دوزدن!
او چؤللر قیزینی آییرما بیزدن!
قویما آغری کئچه اوره ییمیزدن
قییما اؤز قانینا بویانا جئيران!
نه گؤزل یاراشیر موغانا جئيران!

بیر مثل قالمیشدیر آتا–بابادان،
اوچاردا توراجدیر، قاچاردا جئيران
بیر من دئییلم کی، حسنونه حئيران،
شهرتین یاییلیب هر یانا، جئيران!
نه گؤزل یاراشیر موغانا جئيران!

سوکوتا غرق اولموش اوره ییمله من
کئچیرم یئنه ده موغان چؤلوندن،
یانیندا بالاسی، یاغیش گولوندن
اییلیب سو ایچیر بیر آنا جئيران،
نه گؤزل یاراشیر موغانا جئيران!

ائله کی، سون باهار مین بوساط قورور،
کوللاری – کوسلاری ییغیب اوچورور،
سیخناشیب بیر یئره، باش – باشا دورور
دوشنده چوغونا، بورانا جئيران
نه گؤزل یاراشیر موغانا جئيران!

اون آددیم کناردا یاتماییر تکه،
گزینیر، اویلاغا باش چکه چکه
گلن قارالتیدیر، یوخسا تهلوکه؟
بیر اؤزونه باخیر، بیر اونا جئيران
نه گؤزل یاراشیر موغانا جئيران!

#صمد_وورغون #موغان #جئیران

https://telegram.me/dusharge