ЭЪЛОН

«Ёлғон гапиришни ўргатамиз. Тўлови олдиндан…»

Муҳаммадхон Юсупов

Драбллар | қисқа ҳикоялар

Тарбия

Беш ёшли Баҳромжон кўчадан югуриб келиб, онасининг ҳай-ҳайлашига қарамай меҳмонхонага кирди. Ўтирганларга аҳамият бермай дадасининг олд чўнтагига қўлини солди-да:
— Дада пул беринг, - дея ҳали жавоб кутмасданоқ бор пулларни олиб яна кўчага югурди. Бекзод ака ўртоқлари олдида нима деярини билмай бироз хижолатомуз илжайиб, "болада" - деб қўйди.
Мана йигирма беш йилдирки ҳеч нарса ўзгармади фақат бир ҳолатдан ташқари: энди қўллар чўнтакдан ёқага кўчган эди.

Aржумандбегим

Драбллар | қисқа ҳикоялар

ФЕМИНИСТИК ЧАҚИРИҚ

– Шундай яшангки, отангиз туғилганингизда ўғил кўргандагидекқувонмаганига афсуслансин!

Муҳаммадхон Юсупов

Драбллар | қисқа ҳикоялар

ШУМҚАДАМ

Алекснинг пойқадами қуруқлигини кўпчилик билади. У бир емакхонада бир йил фаррош бўлиб ишлади. У ердан оёғини узиши билан ресторан ёниб кетди. Ўша фалокатдан сўнг бу боланинг бир балоси борлигини фаҳмладилар. Алекс ўқиган мактаб у юқори синфни битирганидан олти ой ўтар-ўтмас ёпилди. Амалтақал қилиб, бир газетага ишга жойлашганди, муҳаррир билан келишолмади чоғи тезда бўшади. Кўп ўтмай, ўша газетанинг ҳам фаолияти тўхтатилди. Мана, бугун Алекс мамнуният билан қасамёд қабул қилиб, АҚШ қўшинининг аскарига айланди.

Дэн Филипс

Драбллар | қисқа ҳикоялар

Қанчалик ҳаракат қилмай, сенга ишонолмаяпман. Ишонолмаяпман...
– Балки, рост гапираётганимгадир...

Муҳаммадхон Юсупов

Драбллар | қисқа ҳикоялар

Қориндошлар
(Она ўкинчи)

Оҳ, болагинам...
Мен шундайин ёмон онаман!
Умрим бўйи йиғиб мол-дунё,
Aқл сувин тотмаган онаман...
Давлатим бегонага қолмасин деган,
Сенинг бахтингнимас, давлати ғамини еган,
Оҳ, шунчалар худбин, онаман...
Гуноҳимга синглимни боғлаб,
Қиз дардида юрагин доғлаб
Қудаликдан куйиб ёнаман.
Икки мажруҳ гўдак касрига қолган,
Мен бадбахт онаман, бебахт онаман...

Aржумандбегим

Драбллар | қисқа ҳикоялар

Унутилган ҳислар

Меҳрибонлик уйига келган сураткаш қизалоқнинг кийимларини бироз эпақага келтирди-да, столга ўтқазди.
— Кўзларимга қараб, жилмай.

Aржумандбегим

Драбллар | қисқа ҳикоялар

КУНДА

Опамнинг кўзи кўкарган. Бу гал ҳам эшикка уриб олибди.
Онам:
– Бўлди, у кунда билан ажрашасан.
Опам:
– Йўқ, у эшик – менинг ҳаётим.

Дилобар Аслиддин қизи

Драбллар | қисқа ҳикоялар

Автоҳалокатдан сўнг

— Мени кечир, ўғлим... ўша куни тезликни оширганимдан афсусдаман.
Жажжи қабрдан садо бўлмади.

Нодирабегим Иброҳимова

Драбллар | қисқа ҳикоялар

АВВАЛ ЎЗИНГГА БОҚ...

Турсунбой автобусда катталарга жой беришдан қочиб ўзини ухлаганга соладиганларни ёқтирмайди, уларга нафрат билан бир ўқраяди-ю, бошини ойнага қўйиб уйқусида давом этади.

Хуршид Абдурашид

Драбллар | қисқа ҳикоялар

Ака ухлаб ётган укасининг устига ўз кўрпасини ёпиб қўйиб, ўзи ҳам уйқуга кетди. Уйғонса кўрпа яна ўзининг устида.

Жамшид Чўмич

Драбллар | қисқа ҳикоялар

Бугун якшанба - обуначилар куни. Ҳафта давомида ботимизга келган ҳикояларни кўриб чиқамиз ва маъқулларини каналга жойлаймиз.
Холис баҳо беринг!

Босқин
1875-йил. Марғилон.

Қишлоқнинг диний мезонларини жам қилган бино кираверишига барчани тўплашди. Шунда оломон орасидан ночор овоз янграй бошлади:
— Aхир бу... Aхир бу масж...
— Ўт оч! - бақирди унтер-офицер кўзлари ғазабдан чақчайиб. Даставвал ер оғиргина силкинди ва замбарак оғзидан урчиган порох тутуни атрофни тумандек қоплай бошлади.
Куйган, парча-парча бўлган жасадлар орасидан кимдир аста судралиб чиқа бошлади ва яна ўша таниш, ночор овоздан деди:
— Aхир бу-у... масжид...
Унтер-офицер замбаракни қайта ўқлашни буюрди ва машъум қичқирди:
— Ўт оч!

Аъзамжонов Ҳаётбек

Драбллар | обуначилардан

Чирой

Мумтоза ва Сабрина дарсдан сўнг уйга қараб кетиб боришарди. Бирдан Мумтозанинг хаёлига онасининг қайтаётганингда нон олиб кел деган сўзлари келди.
Шошиб-пишиб курткасининг чўнтакларини қаради.
Пул йўқ.
— Сабрина нон олишим керак эди, пулимни тушириб қўйибман шекилли, кўрмадингми?
— Йўқ, кўрмадим. Aвтобусда туширгандирсан?
— Ҳа...
— Неча пул эди?
— 6000минг
Шу пайт орқадан бир бола югуриб келди:
— Кечирасиз, автобусда пулингизни тушириб қолдингиз. Чақирсам қулоқчинда экансизлар — эшитмадингиз. Ортингиздан югуриб келавердим...
— Воой, раҳмат!
— Хўп майли, - деб бола орқасига қараб юриб кетди.
— Чиройли экан.
— Нима жинни бўлдингми, Мумтоз, юзини кўрмадингми?
— Қалби чиройли экан...

Навруза Олим

Драбллар | обуначилардан

МAДДОҲ

— Лаънати маддоҳларнинг тилини кесиб, ўзига едирш керак, – деди бошлиқ мажлисда.
— Тўппа-тўғри айтасиз, мамлакатимизнинг бўлажак президенти, – деган овоз келди орқадан.

Муродбек ҲAЙДAРОВ
Ўзбекистон журналистика ва оммавий коммуникациялар университети талабаси

Драбллар | обуначилардан

Ўғил қўрслик билан отасининг билагидан тутиб, хонадан ҳовлининг ўртасига судраб чиқарди. Кейин ошхонада куймаланаётган хотинига бақирди:
— Токчадан машинамнинг калитини обер.
— Мана дадаси, ҳа кетяпсизларми?-аёл эрига боқди. Сўнг ҳатто чойни ҳам эплаб ичолмайдиган қайнотасига кулимсираб қўйди.
Ўғил ўз отасини "Қариялар уйига" элтар экан ҳеч ҳам келажагини ўйламади. Ота эса бу масканга қадам қўяр экан, таниш манзарадан лаблари титради:
— Бу ерлар анча ўзгариб кетибди, мен келганимда эскигина бино эди - титроқ ичида ўз отасининг ажин босган юзини эслади-ю, ўғлига ачиниш билан қараб қўйди...

Aиша

Драбллар | обуначилардан

Ошиқ

— Унинг нимасини яхши кўриб қолгансан?
— Яхши кўришни бошлаганимда бунга эътибор бермаган эканман. Ўзим ҳам билмайман.
— У чиройли эмас-ку?
— Кўнгил севса чиройига қараб ўтирмайди. Балки сен айтгандек чиройли эмасдир, лекин мен учун энг чиройли қиз — ўша.
— Қўйсангчи. Ростдан шундай фикрдамисан?
-Aлбатта. Сен унга менинг кўзим билан боқа олганингда қанчалар гўзал эканлигини билардинг. Мен унинг бир боқиши учун жонимни беришга ҳам тайёрман. Унинг овози шу қадар ёқимлики, ҳатто тош ҳам эриб кетади. Кўзларида муҳрланган маъно мени ўзига маҳлиё қилади. Бунақа маъноли кўзни кўрмаганман.
— Тўғри. Севсанг ҳамма нарсаси кўзингга ўзгача кўринади. Гўё у сен учун энг баланд чўққидан ҳам улуғвордек туйилади. Aслида ҳам шундай.
— Ҳа. Мен бу чўққини забт этиш учун бутун умр машаққат чекишга тайёрман. Шу ишонч билан айтаманки, агар эришсам уни ҳеч қачон тарк этмайман. Мендан бахтли инсон бўлмайди.
— Илоҳим ниятингга етгин.
— Рахмат, биродар. Ҳар доим қўлим дуога очилар экан, Аллоҳдан шуни астойдил сўрайман.

Суҳроб Ҳайдаров

Драбллар | обуначилардан

Ҳафта давомида келган ҳикоялар ичида маъқул бўлганлари ҳозирча шулар.
Юборилган ҳикояларнинг кўпига изоҳ ёзишга вақтимиз етмади, бунинг учун узр сўраймиз.
Қадрли ёш ижодкорлар, бизга юборилган ҳикояларнинг фақат сараларини каналга қўйишимизни бизни кузатаётган зиё аҳлининг вақтига бўлган ҳурматимиз деб биласиз ва энг яхшилар қаторида ижод қиласиз деган умиддамиз!

Ибодат

Ўша ёз жуда иссиқ келди. Одамлар қурғоқчилик туфайли кўп азият чекишди. Шу сабабдан черков роҳиби барчани йиғиб, худога илтижо қилишга чорлади. Ибодатга бутун шаҳар аҳли йиғилди. Улар орасида бир бола соябон кўтариб олганди. Одамлар унинг устидан кулишди:
— Аҳмоқ, ёмғирдан сира дарак йўқ-ку, соябон кўтариб юрганингни қара!
Бола ҳайрон бўлиб жавоб берди:
— Мен бугунги илтижоларингиздан сўнг ёмғир ёғишига ишонган эдим…

Нодирабегим таржимаси

Драбллар | қисқа ҳикоялар

Тасодифий учрашув

— Сиз аввал доктор эдингиз-а?
— Ҳа...
— Ишдан кетдингизми?
— Шундай бўлиб қолди, шу дамасни миниб тирикчилик қилиб юрибмиз. Биз танишмизми?
— Тўғри қилибсиз! Яхши эплолмаган ишни ташлаган маъқул! Хотиним жон берганда навбатчи эдингиз!
— …
— Қўрқманг, йўл ҳақини олинг!

Расул Жўраев

Драбллар | қисқа ҳикоялар