#ринг

Насиба

Тонг отди.
Навбатдаги тонгни ҳам тўшакка михланган ҳолда кутиб олди. Шифокорлар нари борса 4-5 соат умри қолган деб уйга жавоб берганларига бугун 48 кун бўлди.

Фазлиддин Тураев

https://tttttt.me/drabllar

#ринг

"Меҳрибон" эр

Тонг отди...
Аёл кечаги калтак зарбида бошидан тушиб кетган рўмолини қайта ўраб, онаси айтганидек "меҳрибон" эри ишга кетиши учун нонушта тайёрлашга киришди...

Гавҳар Рустамбек қизи

https://tttttt.me/drabllar

#ринг

Қариси бор уй

Тонг отди.
Аёл келинини, қўшни хонада ухлаётган набираларини бирма-бир исмини айтиб чақирди. Ҳеч қандай жавоб бўлмагач, бемажол қўллари билан деразани итарди: "Ассалому алайкум, Аллоҳнинг фаришталари, не қилайки, дарвозани бориб очишга мадорим етмаяпти, ризқимизни деразанинг тирқишидан бўлса ҳам ҳалолидан етказинглар..."

Марям Турғун қизи

https://tttttt.me/drabllar

#ринг

Сўнгги чинқириқ

Тонг отди. Келин қайнонасининг хонаси томон йўл олди
— Ҳа, кампир, кечаси билан уйқу бермай бақирдингиз, туринг энди.
Кампирнинг кўзлари эшикка қараб қотиб қолган, ўзи эса қимир этмай ётарди.

Алибоева Зиёда

https://tttttt.me/drabllar

#ринг

Ҳаёт давом этади

Тонг отди.
Кўзлари яна уйқудан очилган Анвар юзини чимдилаб кўрди. Кеча қабрга қўйиб келган онасидан кейин ортиқ яшай олмасам керак деб ўйлаганди...

Элбек Отабек ўғли

https://tttttt.me/drabllar

#ринг

Оқибат...

Тонг отди.
Эркак бош оғриғига чидолмай уйғонди.
Унинг чап ёнида синган ароқ шишаси, ўнг ёнида эса шишадош улфатининг совиган жасади ётарди.
У кечагина "Энди бошқа ҳеч қачон ичмайман" деб оиласига сўз берган эди...

Довуд Хўжақулов

https://tttttt.me/drabllar

#ринг

Илинж

Тонг отди.
Наргиза кечаси ювиб печка ёнига илган болаларининг иссиқ кийимларини хавотир билан бирма-бир ушлаб кўрди:
— Хайрият, қурибди…

Аржумандбегим

https://tttttt.me/drabllar

#ринг

Икки йўл

Эшик қўнғироғи чалинди. Эрталабдан буён қўл машинасида буюртмаларни мижозларга етказиб берай деб вақтини қизғониб тикиш тикаётган аёл базўр қўлтиқтаёқларига суяниб эшикни очди. Ўзи тенгги хотин садақа сўраб келган экан. Вақти тиғиз бўлса ҳам савоб учун пул олиб чиқмоққа шайланди.

Маҳбуба Баҳодир қизи

https://tttttt.me/drabllar

#ринг

Қўшнининг ҳаққи

Эшик қўнғироғи чалинди.
— Здястуйте, Таня хола. Ойим ош бейвойдилай.
— .…

Расул Жураев

https://tttttt.me/drabllar

#ринг

Она қалби

Эшик қўнғироғи чалинди.
Онанинг юраги бир тўхтаб урди. “Балки, ўғлимдир” дегандек келинига қаради. Қанийди онаизор урушга кетган ўғлининг энди қайтиб келмаслигига ҳамма ишонган каби, "оналик қалби”ни ишонтиролса эди...

Гавҳар Рустамбек қизи

https://tttttt.me/drabllar

#ринг

Айрилиқ

Эшик қўнғироғи чалинди. Дадам ишдан келдилар деб эшикка югурди энди тили чиққан болакай. Эридан эрта ажралган Нодира деворда осиғлиқ турган эрининг суратига қараб йиғлаб юборди...

Элбек Отабек ўғли

https://tttttt.me/drabllar

#ринг

Кечиккан туйғу

Эшик қўнғироғи чалинди.  Меҳмондўст, одампараст қайнонасининг ўлимидан сўнг ҳувиллаб қолган хонадонда яшаётган келиннинг юраги ҳапқириб кетди.  "Меҳмон келган бўлса-я?" У шу топда қайнонасининг бири кетидан бири келадиган меҳмонларини чиндан соғинганини ҳис қилди. У ўзини йўқлаб келадиган меҳмон учун борини беришга тайёр алпозда эди. Аёл зўр умид билан дарвозани очди,  ташқарида эса тиланчи турарди...

Марям Турғун қизи

https://tttttt.me/drabllar

#ринг

Ота

Ёмғир тинди.
Девор ёнида бошяланг турганча пастликдаги ғира-шира кўриниб турган ўғлининг омонатгина кулбасига термулиб туриб секин кампирига шивирлади.
— Тинди, онаси... Хайрият!

Жасур Махаммадиев

https://tttttt.me/drabllar

#ринг

Ота

Ёмғир тинди.
Талаба шаҳарга отланаркан кеча олиб берилган янги этигига фахрланиб қараб турди.
Шу пайт кўзи отасининг эски ва пошнаси эзилган туфлисига тушди.
Ютиниб қўйди.
"Қарздорман… Бир умрга…"

Ғайипбаева Динара

https://tttttt.me/drabllar

#ринг

Хурсандчилик

Ёмғир тинди.
Ота бозордан 2 сумка бозорлик билан қайтди. Болалари ўзида йўқ хурсанд. Осмонга ўзини отиб роса "байрам қилди". "Менга нима опкелдиз, дада?” деб дарров сумкага ёпишишди. Ота ҳам шоша-пиша болалари учун харид қилган қанд, "кукуруз"ларни олиб, бўлиб берди. Сўнг оёқ кийимидан сув ўтганини сезиб, пайпоғини алиштиришга шошилди...

Суҳроб Азимий

https://tttttt.me/drabllar

#ринг

“Таниш”

— Маҳалламиздаги Тоҳир аканинг қизини узатишибди, танирмидинг ?
— Ҳа, — деб бошланган овоз, —танирдим, — деган эшитилар-эшитилмас жавоб билан якунланди.


Жасурбек

https://tttttt.me/drabllar

#ринг

Ўгай

Мактабга кетиш вақти уйдан чиқди. Эти жунжикди.
Йўлакни ёпиб қолган катта кўлмак олдида тўхтади. Оёғидаги янги, арзон туфличасига қаради. Озгина иккиланиб турдию, сўнг тезлик билан чўнтагидан қора пакет чиқарди. Туфлиги ва пайпоқларини шартта ечиб кўлмакдан ялангоёқ ўта бошлади. Кўзларини юмганча,лабчалари титраб шивирлади: “Аяжон... Аяжоним...”

Иккинчи қават деразасидан, парда тирқишидан қизчани кузатиб турган олифтагина жувон мийиғида, истеҳзоли кулиб қўйди...


Жасур Махаммадиев

https://tttttt.me/drabllar