САБОҚ

Ҳаётидан яхшилик изламайдиган бир қизга отаси сабоқ бериш учун ошхонага чорлади. Уч хил идишдаги қайнаган сувга картошка, тухум ва қаҳва доналарини солди. Йигирма дақиқадан сўнг барини идишга бўшатиб, қизига юзланди:
— Қандай ўзгариш юз берди?
Қиз картошка юмшаганини, тухум қаттиқлашганини, қаҳва эса хуштаъм шарбатга айланганини айтди.
— Лекин бу билан нима демоқчилигингизни тушунмадим?
— Ҳаёт машаққатдан иборат. Машаққатлар исканжасида картошкадай эзилиб қоласанми, ё қалбинг тухум каби қаттиқлашадими, ё бўлмасам,
қаҳва доначаларидек ғамга бўйин бермай ўзингни комиллаштириб, ҳаётингга айрича таъм ҳадя этасанми?
Қиз ўзининг ношукурлигидан уялиб қолди. Шунда ота қизининг бошини силаб:
— Ҳаёт ҳикмат излаб яшаш учун берилган. Унга кулиб боқсанг, ҳаёт ҳам сенга кулиб боқади, — деди.

Леч Макдональд

👉🏻 Драбллар | қисқа ҳикоялар

УЛҒАЙИШ

— Улғайишни истамайман!
— Нега?
— Чунки... Отам қариб боряпти.

Маъруф МЕНГЛИ

👉🏻 Драбллар | қисқа ҳикоялар

Шукр қилган

Бир синфдошим бор эди. Отаси “катта жой”да ишлар, бадавлат яшашар эди. Маҳаллада биринчи бўлиб телевизор олишган эди. Синфдошим яхши ўқирди. Еттинчи синфни битирган куни мотоциклли бўлди. Мактабни олтин медал билан тугатди.

Йиллар ўтди. Бир куни кўришиб қолдик.
– Ишлар қалай? – десам, зарда билан қўл силтади:
– Расво! Домлам ўлгудек мараз! Номзодлик ишимни чўзиб ётибди.

Йиллар ўтди. Тағин кўришдик.
– Ишлар қалай?
– Расво! Ўғлим кўп ичади. Кеча яп-янги машинанинг пачағини чиқариб келди!

Йиллар ўтди. Яна кўришдик.
– Ишлар қалай?
– Расво! Қизимнинг турмуши нотинч. Қайнонаси ёмон. Судлашмоқчиман.

Йиллар ўтди. Синфдошим бетоб деб эшитдим. Шифохонага борсам, ранги бир ҳолатда ётибди.
– Соғлиқ қалай?

– Расво! Қанд касали деган палакат адойи-тамом қилди. Ўлиб-ўлмайман, тузалиб-тузалмайман!
Тавба, деб гапирай-ку, фаришталар омин деган эканми, узоққа бормади, бечора…

Яна бир синфдошим бор эди. Отаси урушдан яримжон бўлиб қайтган, тўкилиб кетай деб турган кулбада туришарди. Яхши ўқирди. Лекин медалга “илинмади”.
Йиллар ўтди. Бир куни кўришиб қолдик.
– Ишлар қалай?
– Худога шукр, яхши! Мебел фабрикасида ишлаяпман. Кундузи дурадгорлик қиламан. Кечаси уч кунда бир қоровулман. Яқинда велосипед олдим.

Йиллар ўтди. Тағин кўришдик.
– Ишлар қалай?
– Худога шукр, яхши! Ўғлим ўқишни битириб, чет элга ишга кетди.

Йиллар ўтди. Яна кўришдик.
– Ишлар қалай?
– Худога шукр, яхши! Қизим фарзанд кўрди. Неварамга бешик олишга кетяпман!

Йиллар ўтди. Синфдошим бетоб деб эшитдим. Худди ўша, бошқа синфдошим ётган шифохонада экан. Ранги бир ҳолатда.
– Соғлиқ қалай?
– Худога шукр, яхши! Буйрак жиндай шамоллабди. Берган дардига шукр!

Яқинда уни тағин кўрдим.
– Ишлар қалай?
– Худога шукр, яхши! Тўнғич неварамнинг бўйи чўзилиб қолди. Худо хоҳласа, беш-олти йилда невара куёв кўраман. Тўйга келасан-а?!

Ўткир Ҳошимов

👉🏻 Драбллар | қисқа ҳикоялар

Бир жуфт пайпоқ

Ота ўғлига икки мактуб қолдирди: «Бирини вафот этган куним оч, иккинчисини дафн этганингдан кейин», деб васият қилди. Вафот этгач ўғил илк мактубни очди. Хатда: «Ўғлим сендан бир истагим бор: мени пайпоқларим билан кўм».
Имом унинг ялиниб-ёлворишига қарамай, бу талабни қабул қилмади. Марҳумни истар-истамас пайпоқсиз кўмди. Дафн маросими тугагач, ўғил иккинчи хатни очди: «Қара ўғлим, бир жуфт пайпоқни ҳам ўзим билан олиб кетолмадим».

Рашод Нури Гунтегин

👉🏻 Драбллар | қисқа ҳикоялар

​Одамлар нима деркин? 

Қиз талаба бўлди.
«Ўқиб олим бўлармиди», қўл силтади одамлар.

Қизгина унга ошиқ йигитнинг изҳорини қабул қилди.
«Танлаганинг шуми», кулди одамлар.

Келинчак жуфтининг хизматида бўлди, бирор марта юзига тик қарамади.
«Мунча лаллаймасанг», деди одамлар.

Аёл кетма кет фарзандларни дунёга келтирди. 
«Бунча кўп туғасан», ачинди одамлар.

Аёл ишга кирди, рўзғорга қарашди.
«Оилани унутма», ақл ўргатди одамлар.

Аёл ҳасталанди.
«Жони қирқта, ўлмайди», хукм қилди одамлар.

Аёл курашди, гулдек яшнади, кўзёшини бировга кўрсатмади.
«Бир балоси бор», шубҳаланди одамлар.

Кампир кексайди, ҳамманинг ризолигини олиб омонатини топширди.
Одамлар эса ҳамон гапирарди...

Нодирабегим Иброҳимова

Драбллар | қисқа ҳикоялар

Чархпалак

Ўғлидан еган тарсакидан ўзига келган чол юзидаги қонни қўли билан артаркан, уни кузатиб турган 12 ёшлардаги набирасига қараб ўғли учун пичирлади:
— Сенга ҳам оз қолди.

#мухлислар_минбари

Савлатбек

👉🏻 Драбллар | қисқа ҳикоялар

ЭЪЛОН

Синиқ деразанинг сиртига ёзилганди: «Янги оила қурганлар».

Эрнест Хеменгуей

👉🏻 Драбллар | қисқа ҳикоялар

Тарсаки

У худди шу бугунгидек юзига келиб тушган тарсакини 2 йил бурун онасига "шундан бошқасига тегмайман, тамом-вассалом" дегани учун олган эди.
Бугун эса ўша ишонгани унга "...сиздан бундай хиёнатни кутмагандим" дегани учун тарсаки туширди.

Иккаласининг зарби бир хил, алами бир хил... Аммо бири турмушини бошлаб берган бўлса, бири якунлади.

#мухлислар_минбари

Муниса Саломова

👉🏻 Драбллар | қисқа ҳикоялар

Қари кампир оғир сумкани қийналиб кўтариб келётган эди. Ўша ерда ўйнаб юрган бир етим бола кампирни кўриб ёрдам берди. Манзилга етгандан сўнг "Сенга тарбия берган ота-онангдан Аллоҳ рози бўлсин" деб дуо қилди ва йўлида давом этди. Етим боланинг дуога кўтарилган қўли ҳавода муаллақ туриб қолди...

Исломбек Мирзақулов

#мухлислар_минбари

👉🏻 Драбллар | қисқа ҳикоялар

Гап

Куз. Далада ишлар қизғин эди.
Бетоб эди.
Гапирдилар:
Битта касалини баҳона қилиб, уйда ў-ў-ўтиришини қаранглар, товба-а. Ҳаа далага чиқ, чиниқасан! Ишлар қайнаб ётган бўлса. Ўзини баҳонаси бу, мана юрибмизку биз ҳам.
Далага чиқди.
Оғрилашиб қолди. Бир йил ўтмай тупроққа қўйдилар.
Яна гапирдилар:
Ҳаа, касал экансан нима бор эди далада?! Уйингда ўтириб, даволансанг бўлмасмиди, товба-а. Пул азиз бўлмай ўлсинаа, жонингдан!

Куз эди...

Муаттар Йўлдошалиева

👉🏻 Драбллар | обуначилардан

Қўрқув

— Пора олган куним уйга боргунимга қадар юрагим увишади.
— Виждонинг қийналаркан-да...
— Йўқ, уюштирилмаганми деб ҳадиксирайман...

Бобур Нусратов

👉🏻 Драбллар | қисқа ҳикоялар

ОМАД

Бир дайди йўлда кетаётиб, симёғочдаги ғалати эълонга кўзи тушди. Унда шундай ёзилганди: «Уч қаватли иморат сотилади. Нархи —доллар».
— Бемаънилик! — минғирлади дайди. Кўчада оч-наҳор юрган саёқ кўп қаватли уйларнинг деворида осилган эълонга кўзи тушди. Унда ҳам юқоридаги сўзлар битилганди. «Адашиб ёзишган бўлса керак?» дея кўнглидан ўтказди у ва йўлида давом этди. Шоҳкўчага чиққач, ўша сўзлар битилган эълонни кўрди. Саёқ ўйланиб қолди ва бундай эълонни қайси аҳмоқ ёзганлигига қизиқди. Чўнтагидаги бир долларидан бўлак йўқотадиган давлати йўқ эди. Керакли манзилга борганида, чиндан ҳам, маҳобатли иморатни кўрди. Эшик қўнғироғини чалди. Эшикни бир гўзал хоним очди.
— Кечирасиз, эълон бўйича келувдим. Бу ҳазилми?
— Нима деяпсиз? Асло!
— Бу уйнинг нархи чинданам атиги бир долларми? — Нега ажабланасиз? Нима, бир долларга уй харид қилиш мумкин эмасми? Бу ҳаётда иложи йўқ ишнинг ўзи йўқ. Қувончдан терисига сиғмаган саёқ бир долларни дарҳол аёлга тутқазди ва муҳташам уй соҳибига айланди. Бахти кулганига қарамай, у ақли теран аёлнинг бу ажойиб иморатни нега сув текинга сотаётганига ажабланганини яшириб ўтирмади. Аёл эса унга жилмайганича:
— Боғини сўрамай, узумини еявермайсизми! — деди, лекин саёқ икки оёғини бир этикка тиқиб, уни ҳол-жонига қўймаганидан кейин, шундай деди: — Марҳум эрим хотинларга ўч одам эди. Унинг бу қилиғидан қанчалар қийналганимни дастурхон қилиб ўтирмайман, лекин шундай бўлсаям, эримнинг ҳурматини жойига қўярдим. Умр йўлдошим нариги дунёга кетар чоғда ҳам мени куйдириб кетишни унутмаган экан. Марҳумнинг васиятига кўра, бу уйни сотиб, пулини маъшуқасига беришим талаб қилинарди. Бошида жуда куйдим ва куйиндим. Ахийри, эримнинг васиятини ерда қолдирмасликка қарор қилдим. Бу эълон ярим йил осилиб турди. Унга қизиққан ягона одам сизсиз.
Шундай экан, тақдирнинг кутилмаган бахтидан баҳраманд бўлиб яшайверинг! Худо омадингизни берсин! Ажойиб бошпана билан сизни қутлайман!
У калитларни уйнинг янги соҳибига топшириб, чиқиб кетди.

Эль Муэрто

👉🏻 Драбллар | қисқа ҳикоялар

Андиша

— Алдаяпти. Чуқурроқ суриштирсам дарров фош бўлади. Шундай қилсаммикин? Йўқ, ҳижолатга қўймай...

Муҳаммадхон Юсупов

👉🏻 Драбллар | қисқа ҳикоялар

Aқлли ҳимоя

Ёши улғайиб қолган жанг санъати устаси қайтиб майдонга тушмасликка қарор қилди. Бироқ бир куни ёш, манман полвон уни олишувга чорлади. Уста бунга эътибор бермай, жим ўтираверди. Ёш жангчи энди уни масхаралашга, аждодларини ҳақоратлашга тушди. Aммо бу ҳам натижа бермади.
Охир-оқибат ёш полвоннинг ҳафсаласи пир бўлиб, индамай қолди.
Устознинг шогирдлари унинг хатти-ҳаракатидан ҳайрон қолишди, айримлари эса таъна ҳам қилишди:
– Наҳот сизга ўзингизнинг ёки аждодларингизнинг шаъни қадрли бўлмаса?!
Устоз бу саволга савол билан жавоб берди:
– Aгар сизга бирор нарса совға қилишса-ю, уни олмасангиз, ҳадя кимда қолади?
– Эгасининг ўзида қолади-да! – дейишди улар.
– Ҳасад, ғазаб ва нафрат ҳам худди шундай. Aгар биз уни қабул қилмасак, у ўз эгасида қолади.

Ориф Толиб

👉🏻 Драбллар | қисқа ҳикоялар

Шифохонада

Аёл машиналарни ақл бовар қилмас тезлик билан қувиб ўтди. Ё Худо, ишқилиб, кеч қолмаса бўлди!
Бироқ жонлантириш бўлимидан чиқиб келаётган жарроҳнинг авзойидан у ҳаммасини тушунди.
Аёл хўнграб йиғлаб юборди.
— У ўлдими?
— Миссис Аллертон, — мулойимлик билан сўзлади шифокор, — сиз бахтли бўлишингиз керак. Унинг охирги сўзлари: «Сени севаман, Мэри» бўлди.
Шифокорга бирпас тикилиб тургач:
— Раҳмат, — деди совуққонлик билан Жудит.

Барнаби Конрадеше

👉🏻 Драбллар | қисқа ҳикоялар

Эрк
 
– Алло
– Алло, қалайсан? Тўйга чиқасанми? Сенга қараб турибмизку!
– Йўқ, оғайни, уйга меҳмон келиши керак. Мен...
– Эээ, меҳмон сени кўргани келармиди? Бўл, чиқақол!
– Дарсларим ҳам кўп...
– Ярим кунда нимани ҳам қойиллатиб ўрганардинг? Эртага етказиб оларсан?!
– Бошим ҳам оғрияпти...
– Ана, тўйга чиқсанг ёзилиб кетади. Бўл энди! Чиқасанми ўзи йўқми?
– Истамайман!
– Шунақа демайсанми?! Бўпти, гаплашамиз...

Муҳаммадхон Юсупов

👉🏻 Драбллар | қисқа ҳикоялар

– Бор, ўйнаб кел.
– Йўқ, дада!
– Тушунмадим.
– Билиб қолдим: доим ўйнашга сиз чиқар-сангиз, қайтиб келсам ойим йиғлаётган бўла-ди. Чиқмайман!

Муҳаммадхон Юсупов

👉🏻 Драбллар | қисқа ҳикоялар

Тасодифий учрашув

— Сиз аввал доктор эдингиз-а?
— Ҳа...
— Ишдан кетдингизми?
— Шундай бўлиб қолди, шу дамасни миниб тирикчилик қилиб юрибмиз. Биз танишмизми?
— Тўғри қилибсиз! Яхши эплолмаган ишни ташлаган маъқул! Хотиним жон берганда навбатчи эдингиз!
— …
— Қўрқманг, йўл ҳақини олинг!

Расул Жўраев

Драбллар | қисқа ҳикоялар

У учинчи қизининг ҳам контрактга ўқишга кирганини эшитди ва меҳнатда қаварган қўлларига қаради:
— Ўқитаман!!! - деди ўзига ўзи пичирлаб...

Хусан Тангриев

👉🏻 Драбллар | қисқа ҳикоялар

САВОЛ-ЖАВОБ

— Кел ўғлим. Қаршимга ўтир, сендан бир нима сўрамоқчиман.
— Тайёрман, устоз.
— Мавжудотлар нечага бўлинади?
— 4 га бўлинади.
— Менга хатодек туйиляпти, майли сана-чи, бўтам.
— Ўсимликлар, ҳайвонлар, инсонлар ва болалар...
— Болалар инсон эмасми, ўғлим?
— Ҳақсиз, устоз. Адашмасам, мавжудотлар учга бўлинади.
— Яхши, қани бошқатдан сана-чи, ўғлим.
— Ўсимликлар, ҳайвонлар ва гўдакларга.
— Ўғлим инсонларга нима бўлди?
— Қалбини севги билан ёшартириб, яшай олгани болалигича қолади, қолгани эса ҳайвонга айланади, устоз...

Патрисия Эванс

👉🏻 Драбллар | қисқа ҳикоялар