Ҳасад

Йигит ногирон эди. Расо қизни севиб қолди. Унга эришиш имконсиз... Аммо мўъжиза содир бўлди. Қаршисида пайдо бўлган Ҳизрни кўриб йигит шошиб қолди.
—Муҳаббатингга етасан, бўтам. Тила тилагингни!
Ҳизр йигитдан «оёқларим юриб кетсин», деган истакни кутганди. Бироқ унинг тилидан:
—Суйганим ҳам юролмай қолсин, – деган сўзлар учди…

Нодирабегим Иброҳимова

👉🏻 Драбллар | қисқа ҳикоялар

Таъзия

— Дадаси, қўшни қишлоқдаги Маматурсун ўтиб қолибди. Тазияга бақириб юришибди.
— Қайси Маматурсун?
— Ўғри Маматурсун бор-ку. Ўн йиллар олдин қўйимизни ўғирлаб кетуди. Ўзиям роса…
— Ўчир овозингни. Бор дўппимни олиб чиқ…

Жамшид Чўмич

👉🏻 Драбллар | қисқа ҳикоялар

КИТОБ

У китобдан турфа усулларда фойдаланди. Тандирни ёқиш учун тутантириқ қилди. Писта сотиш учун ишлатди. Асабига тегаётган пашшаларга қарата қурол ҳам қилди. Ўғилларига «самолёт» ясаб берди. Ҳатто хожатхонада ҳам фойдаланди... Аммо бирор марта ўқиб кўрмади.

Нодирабегим Иброҳимова

👉🏻 Драбллар | қисқа ҳикоялар

САДАҚА

Йигит шошиб келарди. Кўзи йўл четида турган ёш болали тиланчи аёлга тушди. Боласи очликдан тамшаниб йигитга мўлтираб боқди. Йигит тўхтаб қолди. Чўнтагидаги ғижим пулни шундоқ олдида, болачанинг кир қўлларига тутди.
Тағин йўлида давом этди, аммо қаерга боришни билмасди. Бу пул унинг дори олиш учун уйидан олиб чиққан сўнгги пули эди…

Камолиддин Шукур

👉🏻 Драбллар | қисқа ҳикоялар

Қирқ бешинчи гуноҳ

Аёл ойна олдига келди. Ўзига ҳафсала билан оро берди. «Чиройлиман, манаман деганни ақлдан оздираман,» ўйлади ўзича ва қип-қизил лабларини чўччайтириб ўзини ўзи расмга олди. Кейин сап-сариқ сочларига зеб бериб, уларни ҳудди тийиқсиз туйғуларидек елкаси узра ёйиб юборди. Энди бемалол учрашувга борса бўлаверади. У уч жуфт мўлтираб турган нигоҳларга эътибор бермай, уларнинг устидан қулфлади. Эри мусофирликда, узоқ элларда тирикчилик деб юргани ҳам унинг виждонини уйғотолмади. Аёл соллана юриб катта кўчага чиқиб, ноз билан улов тўхтатмоққа чоғланди. Қоп-қора зулукдай машина ёнига чийиллаб тўхтаганида қошини чимириб қўйди. Манзилни айтди. Аммо ярим йўлга борганда, машина умуман бошқа томонга кета бошлади. Аёл: «Мени қаерга олиб кетяпсиз, тўхтатинг машинани,»- деб бақирди. Аммо ҳайдовчи ишшайганча унга бир қараб қўйди-ю, машинани қушдек учирди. Машина йўл четидаги тўсиққа урилганида йўловчи ҳам, ҳайдовчи ҳам жонсиз ётар, қандайдир йўл билан ишлаб кетган радиодан эса:«Қирқ бешинчи гуноҳи кабиралардан бири ўзини кўз-кўз қилиб юрадиган аёллардир,» деган сўзлар эшитилди...

Саида Ибодинова

👉🏻 Драбллар | қисқа ҳикоялар

​​Хиёнат

Қуёш қаёқдан чиқди, билмайди. Томдан тараша тушгандай, эри келдию умр замонида биринчи марта “Юр, сени кинога олиб тушай!” деб қолди.
Кино ҳар галгидай севги-муҳаббат, романтика эди. Иккаласи ҳам экрандан кўз узмай ўтирарди.
– Хотин бўлса, шундай бўлса-да! – ўйлади эр ва хотинига ўғринча қараб, афти буришди. – Мана бунинг юзига қараган одамнинг лабига учуқ чиқади.
– Келишган йигит экан! – деди хотин ва қўпол, хунук, ношуд эрига зимдан қараб, энсаси қотди. Аста хўрсинди. – Эҳ, ёшлик пайтимга қайтиб қолармидим...

Байрам ОҒА

👉🏻 Драбллар | қисқа ҳикоялар

Автовокзалда, ҳозир иссиқда одамларга қурут сотиб юрган кекса онахондан биттаси 5 минг сўмлик қурут сотиб олди. Онахон:
— Омин, тани жонингиз соғ бўлсин, пулингиз кўп бўлсин. Рахмат сизга, болам — деб дуо қиляпти.

Томоғимга бир нарса тиқилди.

Рамуш

Драбллар | қисқа ҳикоялар

#мухлислар_минбари рукнини кутаётганлар борми? 👀

"Иймон"

Номаҳрам қучоғида ётаркан, аста пичирлади:
— Қочиб туринг, мен бомдоднинг қазосини ўқиб келай.

Лолахон ОҒАБОЕВА

#мухлислар_минбари

Драбллар | қисқа ҳикоялар

ДАРД

— Илтимос, ошқозон оғриғига дори беринг.
— Мана, икки маҳал тўқ қоринга ичасиз.
— Бошқачаси йўқми?
— Яхшироғими?
— Оч қоринга ҳам ичса бўладигани…

Элбек Тилавов
Қашқадарё вилояти Касби тумани Пандирон қишлоғи

#мухлислар_минбари

👉🏻 Драбллар | қисқа ҳикоялар

Ўғри
 
— Бекам, биздан нима айб ўтди?! Ҳайдаманг, мендек бир бевага раҳм қилинг, болаларим оч қолади! — деди хизматкор аёл, доимий ёрдамчиси, 16 яшар қизининг елкаларидан қучаркан.
— Мана, қизингизни чўнтагидан чиқди,— беканинг қўлидаги қимматбаҳо соат ярақлаб кетди.— Ўғлимга раҳмат денг, полицияга хабар беришимизни истамади...
Қиз кўз ёшларини яширди. Лабини тишлади...
Йигит эса чўнтагидаги ҳомиладорлик тестини пайпаслаб қўйди...

Мастура Абдураим қизи

#мухлислар_минбари

Драбллар | қисқа ҳикоялар

Меҳнаткаш

Домла дарсда:

— Устоз, ишларимни бир кўринг.
Саволим бор эди…
— Йўқ ,кўрмайман. Вақтимни олма, ҳаммаси хато. Бу жуда мураккаб масала. Сени бунга илминг етмайди. Бир қишлоқи бўсанг...

Домла минбарда:
Менинг бу йигитга кў-ўп меҳнатим сингган. Медални олиш осон бўлмади.
Бу йигитдан ҳали умидим катта. Бизни шогирт-да — деб "қишлоқи" йигитнинг елкасига қоқти .

Йигит эса домлани охирги марта қачон кўргани ҳақида ўйларди.


Динара Ғайипбаева

#мухлислар_минбари

Драбллар | қисқа ҳикоялар

Аросат

Ғижимлаб отиб юборилган қоғозлар...
Нозик бармоқлардан тушган қаламлар...
Столга қўйилган бош...
Ёш оқаётган кўзлар...
Титраётган лаблар...
— Бошқа сен ҳақингда ёзмайман, — юракдан отилиб чиққан оғриқли сўзлар...

Лолахон ОҒАБОЕВА

#мухлислар_минбари

Драбллар | қисқа ҳикоялар

Вафо

Она вафот этди, на чора, бир йилга қолмасдан янги онали бўлишди.

Ота вафот этди, етим қолишди...

Кумуш Абдуллаева

#мухлислар_минбари

👉🏻 Драбллар қисқа ҳикоялар

Урф-одат

Тўй дабдабали ўтди. Келинчак бундай бахтни ҳаёлига ҳам келтирмаганди. Ҳайҳотдек ҳовли жой, кўп қаватли данғиллама уй, қўша-қўша машиналар...
Энди тўйдан кейин охирги урф-одатларни ўтказишаётганди. Қимматбаҳо зеб-зийнатларга бурканган бахтиёр келинчак келин саломни тугатди. Уй хизматчисининг эса жавобини бериб юборишди...

Мастура Абдураим қизи

👉🏻 Драбллар | қисқа ҳикоялар

АЁЛ ҚАЛБИ

Аёл эридан қаттиқ ҳафа бўлиб қовоғини уйиб олди.
— Ўзим олмасам, ҳечам олиб бермайсиз,— деди қўлидаги қимматбаҳо  атирни кўрсатар экан.
Эркак сониялар тараддудланиб қолди. "Эҳҳеэй,буни пулига бошдан-оёқ кийинса бўладику. Қирққа кирибам, бу хотинни ақли кирмади-да. Нима керак экан-а шу... Энди аразлагани ортиқча. Нима десам экан" деб ўйлади-ю, ташига чиқармади. Кейин қувлик билан хотинининг қулоғига шивирлади:
— Ўзингни табиий ифоринг ёқади менга!
Қошларини чимириб ўтирган аёлнинг шу заҳоти юзи ёришиб, кўзлари қувончдан порлади. Эрига меҳр билан термулиб, атирни жойига қўйди.
"Худога шукурей қутулдим!"— ўйлади эркак.
"Билгандим! Ҳали ҳам севади!" — ўйлади аёл.

Мастура Абдураим қизи

Драбллар | қисқа ҳикоялар

Қиз

— Қизим контрактга кирса ҳам ўқитаман. Муҳими ўқисин — эр аёли билан суҳбат бошланса доим шундай дерди.
Кунлар ўтди. Имтиҳон бўлди. Мандат чиқди. Қиз ўқишга кирди. Конткакт. Отасинг дўстлари зиёфатга келишди.
— Қизингни ўқитмоқчимисан? — гап ўқиш ҳақида очилиб кетди.
— Ҳа, насиб қилса — шишадаги ароқни охирини косасига қуйди.
— Қиз болага ўқишнинг нима кераги бор? Нима аҳмоқмисан? Қиз бола боши билан шаҳарга юбормоқчимисан? Ҳар хил одам бор-а? Худо сақласину битта яримтасига илакишиб кетса…
— Тағин контракт, каппанг куяди дўстим.
— Шунча йил пул тўлаб ўқитасан, барибир бошқага бериб юборасан-ку. Ўғил бола бўлса экан, чиққан пулларингга ачинмасдинг. Қиз боладан фойда йўқ сенга.
Бири олиб, бири қўйиб отанинг фикридан қайтаришди. Тун яримлаганда бир қизнинг келажагини, орзу-мақсадларини “ўғирлаган“ дўстлари ўз уйлари томон йўл олишди.

Лолахон ОҒАБОЕВА

👉🏻 Драбллар — қисқа ҳикоялар

Туғилган кун

— Аҳволинг яхшими, ўғлим?
— Яхшиман, тинчликми ишқилиб, бирор гап бўлдими, она? Ўзингиз саломатмисиз?
— Яхшиман, Худога шукр, шунчаки овозингни эшитгим келди.
— Шугина учун ярим кечада қўнғироқ қилдингизми? Ахир соат уч ярим. Эрталаб гаплашишимиз мумкин эди-ку?
— Безовта қилдимми, ўғлим?
— Бўлмасам-чи , она, безовта қилдингиз.
— Ўттиз йил олдин сен ҳам мени мана шу вақтда безовта қилгандинг, болам, туғилган кунинг муборак бўлсин.

Усканбоева Мафтуна

#мухлислар_минбари

Драбллар | қисқа ҳикоялар

"ТУЗОҚ"
 
Аёл қора мушук кесиб ўтган йўлидан ортига қайтди ва чорраҳада ширакайф ҳайдовчи бошқараётган юк машинасига дуч келди...  

Мастура Абдураим қизи

Драбллар | қисқа ҳикоялар