Башҡортостанда балалар баҡсалары һәм мәктәптәр яңыртыла

Быйыл «Ғаилә» милли проекты менән «Ғаиләне яҡлау» төбәк программаһы сиктәрендә Башҡортостанда тәүгеләрҙән булып ике балалар баҡсаһында капиталь ремонт эшләнде. Атап әйткәндә, Әбйәлил районы Асҡар ауылы менән Сибай ҡалаһының мәктәпкәсә учреждениелары төҙөкләндерелде.

Тәтешле районындағы төнгө аварияла 4 кешенең ғүмере өҙөлгән

Дәүләт автоинспекцияһынан хәбәр итеүҙәренсә, Борай- Иҫке Балтас-Көйәҙе юлында «ГАЗель» менән «Лада Гранта» бәрелешкән. Юл-транспорт ваҡиғаһы һөҙөмтәһендә еңел автомобиль водителе һәм уның өс пассажиры-өс ир-ат һәм бер ҡатын табиптар килгәнгә тиклем урында уҡ һәләк була. «ГАЗель» водителе һәм уның пассажиры төрлө ауырлыҡтағы йәрәхәттәр менән яҡындағы дауаханаға алып киләләр.

Өфөлә Ғәли Соҡоройҙың 200 йыллығына бағышланған китап күргәҙмәһе асылды

Башҡортостан милли китапханаһында мәғрифәтсе, шағир Ғәли Соҡоройҙоң тыуыуына 200 йыл тулыу уңайынан күргәҙмә асылды.
Экспозияла әҙиптең тормош юлына һәм бай йөкмәткеле ижадына бағышланған яҙмалар һәм китаптар урын алды. Сығышы менән Тәтешле районынан булған ғалим һәм шағир Ғәли Соҡорой 17 йәшенән әҙәби ижад менән шөғөлләнгән. Фарсы, ғәрәп, төрки телдәрен яҡшы белгән мәғрифәтсе йөҙҙән ашыу әҫәр ижад иткән.

Баймаҡта Йолалы ауылы тарихына арналған яңы китап тәҡдим ителде

Баймаҡ биләмә-ара үҙәк китапханаһында Фәйзулла Сарин менән Сәрүәр Иҙелбаева авторлығында сыҡҡан «Тарих һаҡлай Йолалы» китабының исем туйы үтте.

Өфөлә Юрий Никулин исемендәге Мәскәү циркы сығыш яһай

Тылсымлы байрам. Өфөлә Юрий Никулин исемендәге Мәскәү циркы сығыш яһай. «Мәғжизәле йондоҙ сере» программаһы менән цирк артистары тамашасыларға сағыу шоу тәҡдим итте. Клоундар, йәнлектәр ҡатнашлығында ойошторолған тамаша Яңы йыл мажараһы стилендә үтте. Ҡатмарлы акробатик номерҙар, әкиәти декорациялар балаларҙы ла өлкәндәрҙе лә битараф ҡалдырманы. Юрий Никулин исемендәге Мәскәү циркына Өфөлә 4 ғиуарға тиклем барырға мөмкин.

Боҙҙа мотоуҙыш буйынса Рәсәй чемпионаты финалында Өфөнән биш спортсы ҡатнаша

Был ярыштар 10 ғинуарҙа башлана. Беренселектә Ғабдрахман Ҡадыров исемендәге үҙәктән Никита Богданов, Евгений Шаров, Вячеслав Дроздов, Иван Гаврилов һәм Дмитрий Солянников ҡатнаша. Улар 2025 йылда уҙған ярыштарҙа яҡшы һөҙөмтәләргә иреште.

Әлшәй районында Ҡорһаҡ йылғаһы аша күпер ремонтланды


Иҙрис ауылы янындағы объект "Тормош өсөн инфраструктура" милли проекты буйынса төҙөкләндерелде. - Әлшәй районында 35 мең кеше йәшәй. Был күпер аша район үҙәгенә барып етергә мөмкин, Дәүләкән районына сығырға була, - тип хәбәр итәләр Транспорт һәм юл хужалығы министрлығынан. 2025 йылда милли проект буйынса 10 күперҙе төҙөкләндереү маҡсаты ҡуйылған.

Башҡортостан һәм Ташкент өлкәһе хеҙмәттәшлекте киңәйтә

Башҡортостан башлығы Радий Хәбиров видеоэлемтә режимында Үзбәкстандың Ташкент өлкәһе хакимы Зойир Мирзаев менән хеҙмәттәшлек мәсьәләләре буйынса кәңәшмә үткәрҙе. Көн тәртибендәге төп мәсьәләләрҙең береһе булып Ташкент өлкәһендә «Бекабад» технопаркын булдырыу башланғысы тора. Яҡтар проект мөмкинлектәре, шулай уҡ Башҡортостан предприятиелары ҡатнашлығында уны ғәмәлгә ашырыу буйынса артабанғы аҙымдарҙы тикшерҙе.

Йыл һөҙөмтәләре һәм яңы маҡсаттар: Радий Хәбиров оператив кәңәшмә үткәрҙе

Йыл һөҙөмтәләре һәм киләсәккә маҡсаттар. Радий Хәбиров йылдың һуңғы оператив кәңәшмәһендә башҡарылған эштәргә йомғаҡ яһаны һәм алда торған бурыстарҙы билдәләне. Башҡортостан башлығы белдереүенсә, финанс ҡатмарлыҡтарға ҡарамаҫтан, республика иҡтисади тотороҡлоҡто һаҡлап, социаль йөкләмәләрҙе үтәп килә. 2025 йылда Рәсәйҙә яңы милли проекттар старт алған, Башҡортостанда уларҙы тормошҡа ашырыу уңышлы башланған. Әммә проблемалы, ныҡлы иғтибар талап иткән өлкәләр ҙә бар.

Өфөлә биш йәшлек Солтанморат йәнһүрәт төшөрөү серҙәрен өйрәнде

Радий Хәбировтан башҡортса йәнһүрәттәр сығарыуҙарын һораған биш йәшлек Солтанморат анимация студияһы менән танышты. Яңы йыл алдынан экскурсияны «Муха» студияһы директоры Артур Абдрахманов менән рәссам-карикатурист Камил Буҙыҡаев үткәрҙе.

Лилиә Ғүмәрова Өфө ҡыҙының хыялын тормошҡа ашырҙы

Ауыр тормош хәлендә ҡалған балаларға яңы йыл мөғжизәһе. Федерация Советы комитеты рәйесе Лилиә Ғүмәрова Өфө ҡыҙының хыялын тормошҡа ашырҙы. «Теләктәр шыршыһы» бөтә Рәсәй хәйриә акция сиктәрендә сенаторға 10 йәшлек Виканының шары эләкте.

Өфөлә 75-се маршрут пассажирҙары өсөн яңы йыл акцияһы үтте

Хеҙмәт карьераһы өсөн яңы йыл маршруты. Өфөнөң 75-се маршрут пассажирҙары ғәҙәти булмаған акцияла ҡатнашты. «Рәсәй эше» кадрҙар үҙәге «Башавтотранс» предприятиеһы менән берлектә юл йөрөүселәр өсөн байрам ойошторҙо. Ҡыш бабай менән Ҡарһылыу ҡала халҡын ҡотланы, бүләктәр таратты, йырланы һәм шиғырҙар уҡыны.

Салауат театры «Ҡар королеваһы» әкиәте менән балаларға Яңы йыл тылсымын бүләк итте

Республика район-ҡалаларында социаль шыршылар үтә. Салауат башҡорт дәүләт драма театры кескәй тамашасылар өсөн Кристиан Андерсендың киң билдәле «Ҡар королеваһы» әкиәтен сәхнәләштерҙе. Ижади коллектив 2008 йылдан алып «Театр-инвалид-балаларға» тип исемләнгән хәйриә акцияһында ҡатнаша. Быйыл да салауаттар балаларға Яңы йыл тылсымын бүләк итте.

«Кеше приюты» социаль үҙәгендә ай ярым эсендә ауыр тормош хәлендә ҡалған 35 кешегә ярҙам күрһәтелгән

«Кеше приюты» социаль үҙәгендә ай ярым эсендә ауыр тормош хәлендә ҡалған 35 кешегә ярҙам күрһәтелгән. Бында уларға ваҡытлыса йәшәү урындары бүленгән, кейем, гигиена кәрәк-яраҡтары ла килтерелгән. Бағыусылар ярҙамы менән улар йылы аш менән тәьмин ителгән. Биләмәлә социаль ашхана эшләй.

Өфөлә «Башҡортостан. Махсус хәрби операция геройҙары» китабының исем туйы үтте

Ябай ғына ауыл-ҡала малайҙарынан ысын ил батырҙары... Өфөлә «Башҡортостан. Махсус хәрби операция геройҙары» китабының исем туйы үтте. Баҫмала республиканан сыҡҡан 14 Рәсәй геройының биографияһы, ата-әсәләре, уҡытыусылары, дуҫтарының хәтирәләре, хәрби частары тураһында мәғлүмәт бирелә, яугирҙарҙың ҡаһарманлығы һүрәтләнә.

Өфөлә бер ҡатын 7 миллион һумға алданған

80 йәшлек пенсионер полицияға мөрәжәғәт иткән. Уға шылтыратыусы иҫәпләү приборҙарын тикшереү кәрәклеге тураһында белдергән. СМС менән килгән кодты әйтергә күндергән. Ошонан һуң ҡатындың дәүләт хеҙмәттәре порталындағы шәхси кабинетын асыуҙары тураһында хәбәр иткәндәр. Аҡсаһын һаҡлап ҡалыу өсөн банк иҫәбен алмаштырырға кәрәк, тигәндәр. Ҡатын мутлашыусылар әйткән иҫәпкә 7 миллион һумдан ашыу аҡса күсергән.

Башҡортостанда тәүге боҙ күпере асылды

Бөрө-Таҙтүбә-Һатҡы трассаһында, Ҡариҙел һәм Абыҙ ауылдары араһында Өфө йылғаһы аша боҙҙан хәрәкәт рөхсәт ителде. 3 тоннаға тиклем ауырлыҡтағы машиналарға үтергә ярай. Боҙ юлының оҙонлоғо 280 метр. Ғәҙәттән тыш хәлдәр министрлығының республика идаралығынан хәбәр итеүҙәренсә, бындай урындарҙан үткәндә хәүефһеҙлек талаптары үтәлергә тейеш. Билдәләнгән ауырлыҡты, тиҙлекте арттырырға ярамай.

Башҡортостанда Яңы йыл байрамдарында 200-ҙән ашыу авария бригадаһы дежур итә

Был мәсьәлә республика хөкүмәтендә ҡаралды. Торлаҡ-коммуналь хужалыҡ министры Ирина Голованова белдереүенсә, байрам көндәрендә 1 меңдән ашыу хеҙмәткәр эшләй, 364 машина сығарыла. - Коммуналь хужалыҡ объекттарында авария эҙемтәләрен бөтөрөү, йорт биләмәләрен, ҡыйыҡтарҙы ҡарҙан таҙартыу эштәре тиҙ арала башҡарылырға тейеш, тине премьер-министр Андрей Назаров. Башҡортостан һыу торбалары селтәре оҙонлоғо буйынса Волга буйы төбәктәре араһында икенсе урында.

"Салауат Юлаев" бөгөн "Мишкопад" тигән хәйриә акцияһын уҙғара

"Өфө-Арена"ға килеүселәрҙең йомшаҡ уйынсыҡтары һатып алыу мөмкинлеге бар. Осрашыуҙан һуң уларҙы боҙға ташлайҙар. Уйынсыҡ һатыуҙан алынған аҡса ауыр сирле балаларҙы дауалауға йүнәлтелә, уйынсыҡтар иһә балалар йорттарына һәм мохтаж ғаиләләргә тапшырыла. Бөгөн юлаевсылар КХЛда даими беренселектә 2025 йылғы һуңғы осрашыуын уҙғара. Минскиҙан "Динамо" менән уйын сәғәт 7-лә башлана.

Өфөлә Ҡыш Бабай резиденцияһында махсус хәрби операция яугирҙарына ярҙам туплана

"Өфө Ҡыш Бабайы йылыһы" тигән хәйриә акцияһы бара. Ҡала халҡы йылы кейем-һалым килтерә ала. Октябрь проспектындағы резиденция янында махсус ҡумта ҡуйылған. Ошондай һауыттар шулай уҡ Ҡала мәҙәниәт һарайы, балалар филармонияһы, "Моторҙар төҙөүсе" мәҙәниәт йорто һәм Ҡала мәҙәни-күңел асыу үҙәгендә урынлашҡан. Акция 11 ғинуарға тиклем бара.