Башҡортостанда етемдәрҙе торлаҡ менән тәьмин итеү мәсьәләһе контролдә

Башҡортостанда 7 меңдән ашыу етемде торлаҡ менән тәьмин итеү бурысы тора. Был турала бөгөн Хөкүмәт кәңәшмәһендә белдерелде. Радий Хәбиров муниципаль берәмек етәкселәренә проблеманы даими контролдә тоторға, етемдәрҙе йәберләмәҫкә ҡушты. Оператив кәңәшмәлә шулай уҡ «Башҡортостан» телерадиокомпанияһы эшмәкәрлеге, «Айыҡ ауыл» проекты тураһында һүҙ барҙы. Аҙнаның төп темалары тураһында репортаж.

Радий Хәбиров Өфөнөң 2-се поликлиникаһында капиталь ремонт һөҙөмтәләрен ҡараны

Башҡортостан башлығы Радий Хәбиров Өфөнөң ашығыс медицина ярҙамы клиник дауаханаһының 2-се поликлиникаһы эшмәкәрлеге менән танышты. Медицина учреждениеһына төбәк программаһы буйынса капиталь ремонт уҙғарылып, яңы мебель һәм медицина ҡорамалдары, шул иҫәптән һанлы маммограф һатып алынған. Дөйөм сығымдар-яҡынса 149 млн һум тәшкил иткән.

Башҡортостанда пилотһыҙ осоу аппараттары ғәскәрҙәренә ҡабул итеү дауам итә

Көн һайын тиҫтәләгән кеше «Черемушки» шифаханаһы базаһындағы «Защитник» үҙәгенә килә. Бында Рәсәйҙең пилотһыҙ осоу ғәскәрҙәренә хеҙмәткә ҡабул итеү ойошторола. Пилотһыҙ осоу аппараттары подразделениеһында хеҙмәт итеүҙең төп өҫтөнлөктәре: хеҙмәт дистанцион рәүештә, хәрби хәрәкәттәр һыҙығынан алыҫта башҡарыла, хәүефһеҙлек кимәле бик юғары, хәрбиҙең һаулығына һәм ғүмеренә ҡурҡыныс янамай. Унда башлыса машиналар эшләү, айти технологиялар өлкәләрендә эшләгән, компьютерҙы программа менән тәьмин итеү ысулдарын белгән тәжрибәле ир-егеттәр алына.

Башҡортостанда ҡотороу сире таралыуға бәйле бер нисә районда карантин иғлан ителгән

Дауаханаларҙа әле 3 пациент дауалана, күрһәткестең тағы ла артыуы ихтимал. Табиптар йорт хайуандарына иғтибарлы булырға саҡыра. Төлкөнән тешләнгән эт- бесәйҙәр ҡотороу сирле булыуы ихтимал. Белгестәр әйтеүенсә, республикала быйыл төлкөләр ишәйеүе күҙәтелә. Улар йорт хайуандарына, кешеләргә ташланып ҡотороу сирен тарата.

Бүздәк районы Ҡаран ауылында «Айыҡ ауыл» конкурсы сиктәрендә «Ҡоймаҡ» байрамы үтте

«Айыҡ ауыл» республика конкурсының муниципаль этабы дауам итә. Ҡатнашыусылар төбәктәрҙә халыҡты берләштереүсе саралар ойоштора, үҙенсәлекле проекттарҙы тормошҡа ашырып, финалға сынығыу ала. Бүздәк районының Ҡаран ауылында уҙған Ҡоймаҡ милли аш-һыу фольклор байрамынан репортаж.

Көйөргәҙе районының Ермолаев ауылында 25 метрлыҡ бассейн асылды

Бассейн «100 спорт объекты» проекты сиктәрендә төҙөлгән. Бындай объекттар муниципалитеттарҙа республика етәксеһе башланғысы менән барлыҡҡа килә. Учреждениела күнекмәләр планы төҙөлә, йөҙөү ваҡыты билдәләнә. Сменаһына 40 кеше шөғөлләнә ала.

1 авгусҡа республикала 53 белем биреү учреждениеһында капиталь ремонт эштәре тамамланырға тейеш

1 авгусҡа республикала 53 белем биреү учреждениеһында капиталь ремонт эштәре тамамланырға тейеш. Республикала быйыл бөтәһе 41 мәктәп, 6 колледж һәм 6 балалар баҡсаһы төҙөкләндерелә. Тулыраҡ киләһе яҙмала.

Тәфтиш комитеты Өфөнөң 16-сы гимназияһында теркәлгән ғәҙәттән тыш хәл буйынса енәйәт эше ҡуҙғатты

Тәфтиш комитеты Өфөнөң 16-сы гимназияһында теркәлгән ғәҙәттән тыш хәл буйынса енәйәт эше ҡуҙғатты. Бөгөн иртәнге сәғәт 11-ҙәр тирәһендә 9-сы класс уҡыусыларының береһе атыш ойошторған. Урынға шунда уҡ бөтә ашығыс хеҙмәттәр килә. Бәхеткә күрә, зыян күреүселәр юҡ. Үҫмер ҡулға алынған. Ваҡиға контролдә тотола тип яҙған социаль селтәрҙә Башҡортостан башлығы.

Нуриман районындағы Павловка һыуһаҡлағысында «Ҡаргиҙәр» операцияһы үтте

Тикшереү барышында ҡотҡарыусылар ҡышҡы транспорт сараһына идара итеп, хәүефһеҙлек ҡағиҙәләрен иңҡар итеүселәр менән профилактик әңгәмә ойошторҙо. Ҡаргиҙәр менән идара итеү өсөн мотлаҡ рәүештә транспорттың техник паспорты һәм махсус А1 категорияһына водитель таныҡлыҡ булырға тейеш.

Өфө предприятиеһында һаҡсыл производствоға күсеп, электр мейестәр сығарыу арттырыла

Өфөләге предприятиела һаҡсыл производствоға күсеп, электр мейестәр сығарыу күләмен арттырыу планлаштырыла. Әлегә завод белгестәре хеҙмәт етештереүсәнлеген, продукция сифатын арттырыу, ваҡыт һәм ресурстарҙы экономиялау буйынса саралар күрә. Эш урындары камиллаштырылып, тәртипкә килтерелә.

Башҡортостан Хөкүмәте Премьер-министры урынбаҫары Ирек Сәғитов «Балерина»ны ҡараны

Башҡортостан Хөкүмәте Премьер-министры урынбаҫары Ирек Сәғитов «Балерина»ны ҡараны. Сергей Зорин исемендәге танк батальоны яугирҙары яуҙа иң яҡшы һөҙөмтә күрһәткән танкты шулай тип атай. Хәрби машинаға ҡушаматты улар Санкт-Петербургтың Мариин театры солисткаһы Дарья Захаренкова хөрмәтенә ҡушҡан.

Башҡортостанда баҡсасылар өсөн сәсеү миҙгеле башланды

Үҫентеләрҙе ҡырҡып ултыртыу-баҡсасылар өсөн тынғыһыҙ хеҙмәт осоро. Ҡайһы бер баҡсасылар хатта яңы йылға аяҡ баҫыуҙан алда уҡ сәскә ултырта башлаған. Әлеге мәлдә баҡса йәнлеләр һәр төрлө йәшеллек төрҙәрен тәҙрә төбөндә үҫтерә, һуңынан ергә күсерә.

Хәйбулла районында «Сибирский левша» күсмә күргәҙмәһе асылды

Тарих микроминиатюраларын туплаған экспозицияла 50-нән ашыу уникаль экспонат ҡуйылған. Бик бәләкәй экспонаттар менән тамашасылар микроскоп йәки лупа аша таныша. Үҙенсәлекле эштәрҙең авторы рәссам Анатолий Коненко. Уның микроминиатюралары сит ил күргәҙмәләрендә лә күрһәтелә.

Башҡортостан дәүләт оркестры «Саҡырылған дирижерҙар» концерт программаһы менән сығыш яһаны

Моң һәм музыка көсө. Башҡортостан дәүләт оркестры «Саҡырылған дирижерҙар» концерт программаһы менән сығыш яһаны. Бөйөк композитор Дмитрий Шостаковичтың мәҙәни мираҫына һәм иҫтәлегенә бағышланған концерт Рәсәйҙең халыҡ артисы, дирижер Валерий Полянский етәкселегендә үтте. Дәүләт концерт залында «Болт» балеты сюитаһы һәм башҡа билдәле әҫәрҙәр яңғыраны.

Белорет районы Абҙаҡ ауылында хоккей турниры үтте

Ул махсус хәрби операцияла һәләк булған яҡташтарҙың яҡты иҫтәлегенә арналды. Ярышта боҙ хужаларынан тыш, Сермән һәм Әбйәлил районы Яңы Балапан ауылы командалары ҡатнашты. Турнирҙы асыу тантанаһына яуҙа башын һалған хәрбиҙәрҙең яҡындары саҡырылды.

Радий Хәбиров граждандар йәмғиәте институттары вәкилдәре менән осрашты

Башҡортостан башлығы Радий Хәбиров республикала гражданлыҡ йәмғиәте институтын үҫтереү ойошмалары ағзалары менән осрашты. Сарала Башҡортостан Йәмәғәт палатаһы, Халыҡ фронты хәрәкәте, Кеше хоҡуҡтары һәм гражданлыҡ йәмғиәте институттарын үҫтереү Советы эшмәкәрлеге һөҙөмтәләре барланды, киләсәккә бурыстар билдәләнеде.

Өфө мәктәптәренең өлкән синыф уҡыусылары «Патриот» паркында хәрби әҙерлек үтә

Өфө мәктәптәренең өлкән синыф уҡыусылары «Патриот» паркында 5 көнлөк хәрби әҙерлек үтә. Программа теоретик һәм практик курстарҙы үҙ эсенә ала. Үҫмерҙәр тигеҙ сафта йөрөүҙән тыш, ҡорал менән эш итергә, тәүге медицина ярҙамы күрһәтергә, радиация, химия, биология һөжүменән һаҡланырға, парашют менән һикерергә, пилотыһыҙ осоу аппараттары менән идара итергә өйрәнә. Бөгөн уҡыусылар Башҡортостан башлығы Радий Хәбиров менән дә осрашты.

Өфөнөң 16-се гимназияһындағы хәл Башҡортостан башлығы контролендә

Бөгөн унда туғыҙынсы класс уҡыусыһы уҡытыусыларға һәм уҡыусыларға һөжүм итте. Ваҡиға тураһында хәбәр иртәнге сәғәт 11-ҙәр тирәһендә килә. Уҡыу йортона Росгвардияның ведомствонан тыш һаҡ экипаждары сыға. Улар атыш ойойшторған үҫмерҙе ҡулға ала һәм хоҡуҡ һаҡлау органдарына тапшыра. Әлеге осраҡ буйынса Прокуратура тикшереү ойошторған. Ғәҙәттән тыш хәл тураһында ишеткәс тә республика башлығы эш сәфәрен өҙөп ваҡиға урынына килде. Радий Хәбиров әйтеүенсә, әгәр мәктәптә үҫмерҙе йәберләү, буллинг кеүек күренештәр асыҡланһа, мәктәп етәкселеге менән әңгәмәнең үтә лә ҡаты буласағын иҫкрәтте. Ләкин эмоцияларға юл ҡуйырға ярамай, ваҡиғаға аныҡ баһа бирергә һәм системала етешеһеҙлектәр бар икән, уны тулыһынса юҡҡа сығарырға кәрәклеген белдерҙе.

Башҡортостан юлдарында ваҡытлыса сикләүҙәр

Башҡортостанда һауа торошо боҙолдо. Юл хәрәкәте хәүефһеҙлеген тәьмин итеү маҡсатында бөгөн республиканың ҡайһы бер юл участкаларында йөк һәм пассажирҙар транспорты өсөн хәрәкәт ваҡытлыса сикләнде. Исемлеккә М-5 «Урал» һәм М-7 «Волга» федераль трассалары, Өфө-Бөрө-Яңауыл, Дүртөйлө-Нефтекама, Бәләбәй-Николаевка-Туймазы-Баҡалы, Бөрө-Таҙтүбә- Һатҡы, Дүртөйлө-Борай арауыҡтарындағы юл участкалары ингән. Дәүләт автоинспекцияһының матбуғат хеҙмәтенән хәбәр итеүҙәренсә, сикләүҙәр иртәгә иртәнге сәғәт 9-ға тиклем ғәмәлдә ҡала. Синоптиктар алдағы төндә лә айырым райондарҙа көслө ҡар яуыуын фаразлай. Шулай уҡ киләһе тәүлектәрҙә һауа температураһы аяҙайтҡанда 33 градус тиклем түбәнәйеүе көтөлә.

Республика стоматология поликлиникаһында теш имплантацияһы өсөн һанлы производство асылды

Республика стоматология поликлиникаһында имплант ҡуйыуҙа ҡулланылған хирургия шаблондары етештерелә башланы. Теш техник лабораторияһында ортопедия ҡулайламаларын 3д-моделләштереү һәм әҙерләү буйынса тулы производство циклы ойошторолған, шулай уҡ бында цирконий коронкалары сығарыла.

Ҡырағай хайуандарҙы реабилитациялау үҙәге машиналы булды

Ҡырағай хайуандарҙы реабилитациялау үҙәге машиналы булды. Өфө районындағы «Пин һәм Пуф» ойошмаһы 7 йыл элек барлыҡҡа килә. Ошо ваҡыт эсендә йөҙәрләгән хайуандарға һәм ҡоштарға ярҙам күрһәтелә. Техникаһыҙ ҡалған үҙәккә бағыусы «Лада Калина» машинаһын бүләк итте.