Трамп Ирандағы наразылықты қолдады

“Иран еркіндікке ұмтылады, бәлкім, бұрын-соңды болмаған дәрежеде. АҚШ көмектесуге дайын” деп жазды АҚШ президенті Дональд Трамп Truth Social желісінде.

Бұған дейін Америка басшысы Ирандағы жағдайды мұқият бақылап отырғанын айтып, режимнің құлауын да жоққа шығармаған.

Иран билігі наразыларды басып-жаншыса, АҚШ Иран билігін “жазалайды” деп мәлімдеген еді. Трамптың сөзінше, мәселе Иранға әскер кіргізу жөнінде болып отырған жоқ, дегенмен Иран режимінің “осал тұстарына тегеурінді соққы жасалмақ”.

НАСА халықаралық ғарыш станциясындағы экипажды Жерге 15 қаңтарда шұғыл қайтарғысы келеді. Миссия мүшелерінің бірі ауырып қалған.

Crew-11 экипажының құрамында командир Зена Кардман, ұшқыш Майкл Финк, жапон астронавты Кимия Юи және ресейлік ғарышкер Олег Платонов бар.

Нақты кімнің денсаулығы сыр бергенін және нақты немен ауырғаны айтылмайды.

Crew-11 экипажы Жерге оралса, халықаралық ғарыш станциясында "Союз МС-28" экипажынан америкалық Кристофер Уильямс пен ресейліктер Сергей Кудь-Сверчков пен Сергей Микаев қалмақ.

Сурет: Crew-11 экипажының мүшелері. NASA

Өзбекстанда мәдениет министрі тойда өлең айтып, ақша алғаны үшін сынға қалды. Министрлік түсініктеме берді

Министрліктің хабарлауынша, оқиға 2025 жылы 25 қазанда министрлік қызметкерлерінің бірінің тойында болған.

Баспасөз хатшысының айтуынша, тойда әншіге ақша беру "ғасырлар бойы қалыптасып келе жатқан ұлттық дәстүр" және одақ бас тарту "құрметсіздік ретінде қабылдануы мүмкін". Ал желіде шенеуніктің әрекетін қолданушылар қызу талқылады.

⚡Қазақстандық теннисші Александр Бублик Гонконгте өткен ATP-250 санатына енетін турнирде жеңіске жетіп, келесі аптадан бастап ATP рейтингінде 10-орынға көтеріледі. Қазақстан теннисшісі Гонконгтегі турнир алдында рейтингте 11-орында тұрған. Жарыстағы жеңісінің арқасында рейтингідегі ұпайын көбейтті.

Осылайша Бублик ерлер арасында әлемдік рейтингіде үздік ондыққа енетін алғашқы қазақстандық теннисші болмақ. Бұл – Қазақстан спорты үшін тарихи көрсеткіш.

Бублик Гонконгтегі турнирдің финалында италиялық Лоренсо Музеттиді (әлемдік рейтингте 7-орында тұр) екі сетте жеңді – 7:6 (7:2), 6:3.

Әйелдер арасында Елена Рыбакина қазір WTA рейтингінде үздік ондыққа енген. Рыбакина әлемдік рейтингіде бесінші орында тұр.

Рыбакина мен Бублик Ресейде туған, он шақты жыл бұрын Қазақстан азаматтығын алған еді.

Қазақстан теннисшілері енді жылдың алғашқы Grand Slam турнирі Australian Open турниріне қатысады. Бұл жарыс 18 қаңтарда басталады.

⚡АҚШ Ирандағы наразылықты басып-жаншып жатқан билікке қатысты "қатаң шаралар" қабылдауды қарастырып жатыр деп мәлімдеді АҚШ президенті Дональд Трамп.

Air Force One президент ұшағында журналистердің "Иран билігі наразыларды өлтіру арқылы қызыл сызықтан аттады ма?" деген сауалға Трамп "олар [қызыл сызықтан] аттауды бастап кеткен сияқты" деп жауап берді.

"Біз бұған өте қатты мән беріп отырмыз. Әскерилер жағдайды зерттеп жатыр және біз өте қатаң шаралардың бірнеше нұсқасын қарастырып жатырмыз. Шешім қабылдаймыз" деді АҚШ президенті.

Қостанай тұрғыны "Тиктокта қазақтарды қорлағаны үшін" сотталды. Адвокат үкіммен келіспейді

Қостанайдың 44 жастағы тұрғыны Юлия Хон "Тиктоктағы тікелей эфирде қазақтарды қорлағаны үшін" екі жылға сотталды. Қостанайдағы №2 сот тұрғынды "Ұлт араздық қоздыру" бабымен айыпты деп тапқан. Бұл туралы сотқа сілтеп Tengrinews және Tobolinfo сайттары хабарлады.

Соттың хабарламасына қарағанда, Хон 2024 жылы қарашада Тикток желісінде Ресей мен Украина арасындағы соғысты талқылаған тікелей эфирге кіріп, қазақтарды қорлайтын сөз айтқан.

Істі қараған сот Хонның кінәсі тікелей эфирден алынған видеомен, куәгерлердің сөзімен, сараптамамен дәлелденді деп тапқан. Айыпталушы кінәсін ішінара мойындаған. Сот үкіміне сай, ол жазасын қатаңдығы минимальды колонияда өтеуі тиіс.

Айыпталушының адвокаты Валерий Ли Tobolinfo сайтына "тікелей эфирде Хонды да қорлағанын, ал Хон бүкіл ұлтты емес, нақты адамды балағаттағанын" айтқан. Қорғаушы үкімге қарсы шағым түсіретінін де жеткізген.

Соттың хабарлауынша, Хонның көзі көрмейтін ұлы бар екені ескеріліп, жазасы жеңілдетілген.

Қазақстанда әлеуметтік желіде, көшеде қандай да бір ұлтқа, елге қарсы балағат сөз айтқан адамдар Қылмыстық кодекстегі "Ұлтаралық, діни алауыздық қоздыру" бабымен жауапқа тартылады.

Былтыр Threads платформасында қазақтар мен мұсылмандардың намысын қорлайтын пікірлер жариялаған қарағандылық Алика Мұхамадиева осы баппен 3,5 жылға сотталған. Сот Мұхамадиеваның екі жасар баласы барын, айыпталушының сот процесі кезінде кінәсін толық мойындап, өз ісіне шын жүректен өкінгенін ескеріп, оның жаза өтеу шарасын кейінге қалдырған еді.

Бұған қоса, Ресейшіл мазмұндағы бейнероликтер жариялап танылған көкшетаулық блогер Аслан Төлегенов те "ұлтаралық араздық қоздырды" деген айыппен 3 жыл 9 айға сотталған.

Былтыр қарашада Алматы облысында "Қытай туын өртеген" 19 адам "алауыздық қоздыру" айыбымен істі болып жатыр.

Ал Алматыда сот Qaznews24 сатиралық паблигінің авторы Темірлан Еңсебекті "араздық қоздыру" бабы бойынша кінәлі деп тауып, оған бес жыл бас бостандығын шектеу жазасын кескен. Ол пабликте "Йоу, орыстар" әнін қолданғаны үшін жауапқа тартылды.

Қазақстанның бұрынғы президенті Нұрсұлтан Назарбаевтың Үшқоңыр резиденциясы оның жиені Нұрәли Әлиевке қарасты технологиялық компанияға өтті. Бұған дейін ол экс-президентке тиесілі қордың меншігінде болған.