Кайгылы хәбәр. Казанда күренекле галим, гарәп теле белгече, филология фәннәре докторы, профессор Җәмил Зәйнуллин вафат булган. Бу хәбәрне Азатлыкка КФУның матбугат хезмәте раслады. Галимгә 73 яшь иде. https://bit.ly/3dOqOxo

15 май Татарстан Югары мәхкәммәсе ТИҮ активисты Мөдәррис Галимҗановның Казанны яклап шәһит киткәннәргә һәйкәл кую мөрәҗәгатен кире какты.

"Хөкемдар Гафиятуллин карарны бик тиз чыгарды. Минемчә, мондагы хөкемдарларга татарның милли горурлыгы, милли хокуклары турында сүз барган эшләрнең берсен дә эшләмәскә дигән боерык бирелгән һәм алар өстәгеләр ни әйтә, шуны үти. Ә түрәләр Казанны яклаучыларга һәйкәл куелудан курка" диде Азатлыкка мәхкәмә утырышында катнашкан икенче активист Галишан Нуриәхмәт. https://bit.ly/3dHwDwC

Соңгы айларда бөтен дөнья коронавирус пандемиясе турында гына сөйләшә. Матбугат чаралары, социаль челтәрләр, мессенджерларда төп тема шушы. Моңа кадәр актуаль булган күп проблемнар күләгәдә калды. Азатлык шуларның кайбер мөһимнәрен барлады. https://bit.ly/2Z8eeoz

"Улым туйга акча эшләп кайтыр өчен генә киткән иде"

Мәскәүдә коронавирустан вафат булган 28 яшьлек Башкортстан табибы Наил Саматов элегрәк язган идек. Бүген аның әнисе, улын ялгызы гына үстергән, Янгантау шифаханәсендә өлкән шәфкать туташы булып эшләүче 52 яшьлек Рәгидә Нуриева белән сөйләштек. Аның сүзләренчә, табиблар улын коронавирустан түгел, пневмониядән үлде дип язган. https://bit.ly/3bEoiIJ

"Миндә шундый бер сер бар. Үлеп яратам мин аны. Бер күрүдә гашыйк булдым. Инде хәзер елдан артты. Барыбер оныта алмыйм... Серле гыйшкым — Корфу утравы." 😍

"Дөнья тирәли" бүлегендә юлъязмалар шәлкемен дәвам итәбез. Зур круиз лайнерында эшләп сәяхәт иткән Наилә Хисамова сәфәренең иң кызыклы мизгелләрен Азатлык укучылары белән уртаклаша. Аның бүгенге язмасы Грециянең Корфу (Керкира) утравы турында. https://bit.ly/2Lxtxzi

"Юлда халык авырулардан, ачлыктан кырыла башлады"

18 май — Кырымтатар сөргене көне. 76 ел элек бу көнне 200 меңләп кырымтатар Сталин карары белән торган җиреннән сөрелә. Алар арасында Зекие Керимова гаиләсе дә була. Зәкие ханым күргән михнәтләре турында Азатлыкка сөйләде. https://bit.ly/3g0c4xu

Кырымтатарлар туган җирләреннән сөрелүгә бүген 76 ел. Бу уңайдан дөньяның төрле илләрендә матәм чаралары уза.

Нью-Йоркта Украинаның БМОдагы даими вәкиллеге бинасына кырымтатар әләме эленде. Шул рәвешле Ватаныннан сөрелгән халыкның фаҗигасе искә алынды. https://bit.ly/3g9eWs2

❗️Түбән Кама мәхкәмәсе 22 яшьлек Илназ Пиркинны газаплауларда һәм аны үз-үзенә кул салуга җиткерүдә гаепләнгән полиция хезмәткәрләренә хөкем карары чыгарды. Биш полиция хезмәткәренә барлыгы 40 ел төрмә җәзасы бирелде. Бу турыда Илназның әнисе мәнфәгатьләрен яклаучы "Зона права" хокук яклау оешмасы хәбәр итте. https://bit.ly/3cTdU0Y

#коронавирус
Татарстанда COVID-19 вирусы тагын бер кешенең гомерен өзгән. 1941 елгы Түбән Кама районы кешесе 16 майда район үзәк хастаханәсендә үлгән. 1 майда аны йогышлы авырулар бүлегенә салган булганнар, 6 майдан үпкә җилләтү җиһазына тоташтырылган булган.

Бу мәгълүматны Татарстанның коронавируска каршы оператив штабы китерә. Татарстанда коронавирустан үлүчеләр саны сигезгә җитте. Ләкин Русия оператив штабы статистикасында соңгы үлем әлегә күрсәтелми. https://bit.ly/2WIsTp3

❗️Татар язучысы, җәмәгать эшлеклесе Фәүзия Бәйрәмова прокуратурага чакыртылган. Бу турыда ул үзенең Facеbook-битендә хәбәр итте.

"Миңнехановны тәнкыйтьләп язган ике комментар "нәтиҗәсе" күренә башлады — бүген прокуратурага чакыртып шалтыраттылар! Имеш, узган елның Хәтер көнендә мин нидер сөйләгәнмен, быел шуны тикшерә башлаганнар икән! Сүз 12 октябрь көнне Казанда үткән митинг турында бара. Шунда нәрсәдер казынып тапканнар һәм Чаллы прокуратурасына тикшерергә җибәргәннәр" дип яза Бәйрамова.

2019 елның 12 октябрендә Казанда Хәтер көненә багышланган чарада Фәүзия Бәйрамова "XXI гасырда милләтнең хәле 1552 елдан да куркынычрак" дип сөйләде. "Бөтен дөньяда халыклар бәйсезлек алды, коллыктан арынды. Безгә дә деколонизация сорап дөнья җәмәгатьчелегенә мөрәҗәгать итәргә кирәк. Без — оккупациядә, без — басып алынган! Шушы төрмәдән, колониядән чыгу мәсьәләсен дөнья алдына чыгарырга, үз халкыбызга да сөйләргә кирәк" дигән иде ул. https://bit.ly/3fWwXJU

❗️ТИҮ җитәкчесе Фәрит Зәкиев кырымтатарларның ватаннан сөрелүенә 76 ел тулу уңаеннан Казанда ялгыз пикет уздырды.

Зәкиев Азатлыкка, Бөтентатар иҗтимагый үзәгенең Русия хөкүмәтеннән кырымтатарларны, чеченнарны, ингушларны, калмыкларны һәм башка халыкларны депортацияләүне рәсми рәвештә геноцид дип кабул итүне, геноцидка дучар калган кешеләргә мадди ярдәм күрсәтүне оештыруны һәм бар дөнья илләре алдында кырымтатарлардан гафу үтенүне таләп итүен әйтте. https://bit.ly/2LJI5M9

#коронавирус
Саннарга караганда чирнең чигенүе күренми..

😷 Русиядә бер тәүлек эчендә коронавирустан 115 кеше үлгән. Зарарланучыларның гомум саны 300 меңгә якынлашты.

😷 Татарстанда узган тәүлектә COVID-19 тагын 88 кешедә ачыкланган. Вирус йоктыруның барлыгы 2400 очрагы рәсми расланган. Барлыгы 8 кеше үлгән санала иде. Иркутски өлкәсендә вахта белән эшләүче тагын бер татарстанлының коронавирустан үлгәне билгеле булды.

😷 Башкортстанда 92 яңа очрак. Республикада коронавирус йоктыруның барлыгы 2247очрагы расланган, барлыгы 17 кеше үлгән.

😷 Дөньяда вирус йоктыручылар саны 5 миллионга якынлаша, хәзерге вакытта рәсми саннар 4 миллион 805 мең турында әйтә.
https://bit.ly/2AHpxdq

Апрель ахырында кызлар арасында EGMO дип аталган Европа математика олимпиадасы узды. COVID-19 таралу сәбәпле быел чара виртуаль рәвештә оештырылды. Чарада Казан кызлары да катнашты — 131нче лицей укучылары Розалина Миргалимова белән Ралинә Йосыпова алтын һәм көмеш медальләр яуладылар.

Алтын медальгә ия булган Розалинага 16 яшь, быел ул 10нчы сыйныфны тәмамлый. Математика фәне белән бик кызыксына, буш вакытларда фортепианода уйный. Хәзер уку елы тәмамлану мәшәкатьләре булса да, Розалина Азатлык сорауларына җавап бирергә вакыт тапты. https://www.azatliq.org/a/30610494.html

#халык_сүзе
"Баулыда дәүләт даруханәсендә битлек 8 сум 80 тиен тора. Ләкин бер кешегә икене генә саталар. Ә бармакчаклар — 26 сум. Бер кешегә бер генә пар бирелә.

Күпләр көннәр буе бер үк битлек киеп йөри, алыштырмый. Ул чакта аның ни файдасы бар? Штрафка тартмасыннар өчен генәме. Үз-үзебезне алдау, профанация килеп чыга.

Хөкүмәтнең уйланылмаган карарлары халыкта канәгатьсезлек тудыра. Хакимият халыкны саклану чаралары белән тәэмин итәм дип ышандырмакчы була, ә кешеләр – битлек һәм бармакчалар киеп йөргән сыман кылана."

"Халык сүзе" бүлегендә Баулыда яшәүче укучыбыз Азат Зиннуров фикерләре. https://bit.ly/36aW8Eb

Казанның Вахитов районы мәхкәмәсе Татарстанның гадәттән тыш хәлләр министрлыгы ТИҮгә салган 150 мең сумлык штрафны урынлы дип тапкан.

ТИҮ рәисе Фәрит Зәкиев Азатлыкка эйтүенчә, ТИҮгә бу кадәр зур күләмдә җәза бирү хакимият тарафыннан оешманы юкка чыгару максатыннан махсус эшләнә.

Зәкиев ун көннән соң Татарстан Югары мәхкәмәсенә һәм кирәк булса, Самардагы кассация мәхкәмәсенә шикаять итәчәкләрен җиткерде.

"Без бу штрафны түләргә җыенмыйбыз. Чөнки ул кадәр акчабыз юк. Штрафны түләмәсәк, ТИҮне ябачаклар. Шулай да татар дөньясына ярдәм сорап мөрәҗәгать итеп карарбыз. Әмма моңа бик ышанып бетмим. Татарлар бердәм күтәрелеп авыр хәлдә калган үз оешмаларын якларлармы, әйтә алмыйм", диде ул. https://bit.ly/2X7xpfM

Дубай шәһәрендәге иң биек бина Бурҗ Хәлифә Татарстан байрагы төсенә керде. Бу - ТАССРның 100 еллыгына бүләк.

Видео: Tatars in the UAE

"Безгә башта түләнәчәк дип ышандырдылар, әмма аннары "Ник юк?" дип сорагач: "Сез "кызыл зонада" эшләмисез дип җавап кайтардылар"

Путин медицина хезмәткәрләренә вәгъдә иткән өстәмә акчаларны Татарстан белән Башкортстанда да алмаучылар шактый. Табиблар белән сөйләштек. https://bit.ly/3g5RewH

Русия Конституциясенә үзгәрешләр өчен тавыш бирүне һәм Җиңү парадын бер көндә уздырмакчылар. Ул 24 июнь булырга мөмкин дип яза РБК Кремльгә якын чыганакларына таянып.

Җиңү парады карантиннан арыган халыкка "бәйрәм рухы" кертергә мөмкин. Тавыш бирү ял көне ителгәнгә, парадны карау да җиңелрәк булачак диелә.

1945 елда Җиңү парады 24 июнь көнне узган. https://www.azatliq.org/a/30622162.html

#коронавирус
https://bit.ly/2LWaIpT

Хөрмәтле укучылар! Исегезгә төшерәбез:

😷 Дөньяда таралган COVID-19 вирусы турында актуаль хәбәрләр, файдалы киңәшләр, гыйбрәтле хәлләр турында сез безнең махсус сәхифәдә укый, карый аласыз: https://www.azatliq.org/covid-19

😷 Шулай ук, иң соңгы хәбәрләр, вакыйгалар безнең җанлы блогта тупланып бара: https://www.azatliq.org/a/coronavirus/30488043.html

😷 Азатлык авыр чорда да сезнең белән!

Башкортстанда башлангыч мәктәпләр уку елын 22 май, 5-11нче сыйныфлар 29 май тәмамлый. Көллият һәм югары уку йортлары 1 июльгә кадәр укуларын дәвам итә.

Коронавирус пандемиясе сәбәпле, мәктәпләр онлайн укытуга күчкән иде. Азатлык республика мәктәпләрендә татар теле һәм әдәбиятын онлайн укытудагы үзенчәлекләр, авырлыклар турында укытучыларның фикерен белеште. https://bit.ly/3e4vQGs

‼️Русия президенты Владимир Путин Татарстан президенты Рөстәм Миңнехановны өченче мөддәткә республика җитәкчесе вазифасына тәкъдим итүне хуплады.

Путин "президент" сүзен кулланмады, "җитәкчесе" диде. Ихтимал, президент атамасыннан баш тарту шарт итеп куелган..

https://bit.ly/36rPo53