#ሕይወት_ያለው_መንገድ

እዚያ ቦታ ቀኑ መሽቶ እዚህ ቦታ ቀኑ ሳይመሽ
የልብሽን እያወራሽኝ የነፍሴን ደግሞ እያሳየሁሽ
“እስካሁን ድረስ እስካሁን
የት ነበርክ?” ብለሽ እየጠየቅሽ
እስካሁን ድረስ እስካሁን
“አንቺስ የት ነበርሽ?” እያልኩሽ
በእጆችሽ ልታቅፊኝ ስትይ
ከእነ እጆችሽ እያቀፍኩሽ
“ፍቅር እንዲህ ነው?” እያልሽኝ
“ፍቅር አንች ነሽ” እያልኩሽ
“ተበድያለሁ” ስትይኝ
በበደሉሽ እየተቆጣሁ
ከቀረበው መጠጥ በላይ
ውብ ሳቅሽን እየጠጣሁ
የነበርኩበትን ትቼ
ወዳለሽበት እየመጣሁ
ከተደበቅሽበት ሳገኝሽ
አንችም ወጣሽ እኔም ወጣሁ
የበረደው ልብሽን
ለፍቅር ፀሐይ አሰጣሁ
ዘለላ የዕድሜዬን ክር
ስሩን ፈልጌ በጣሁ
እኔንም አንቺንም ሆኜ
ብቸኝነትን ቀጣሁ
ፍቅር በላሽ ፍቅር ጠጣሁ።

🔘ሰለሞን ሳህለ🔘