Агәахәара ду урҭоит ажәытәра бзиа иазхьаԥшуа аҿар! Ирацәаҩымзаргьы, ус иҟоу рҿы ҳаиқәырхоуп.

Сандро Аӡынбеи Алмас Адлеибеи аԥсуа ӡахәажәлақәа рааӡоит, ргәы-рыԥсы зегь адкыланы, дырралеи ԥышәалеи рҽеибыҭаны зус иаҿу иреиуоуп. Аҩы цқьа ҭарҭәоит, рбызшәагьы аӡеиԥш ицқьоуп. Рқәаҵақәа еикәаҭәы Анцәа идирбалааит!

Арԥарацәа рцәажәара аԥсуа иҭхаџьра ацәа хаа ҳзыннажьит, шәазыӡырҩырц шәылшоит абра>>

🧡 Ахьыуардын шәақәтәа

🟠 "Уахьцо уаалеит!"

Абас иарҳәоит акыраамҭа дынханы, харантә иааз ауаҩы. Хыԥхьаӡара рацәала иҳамоу аԥсшәеибыҳәашьатә формақәа ируакуп, изхылҿиаазгьы ашьхарыуаа ҳаибашьратә культуроуп. Уахьцо уаалеит ҳәа аханатә изарҳәоз аибашьҩы – ахаҵа иакәын хьыӡрацарантә лыԥхала, деибга-дызҩыда, аҷан имангьы даныхынҳәуаз.

🟠 "Уара умсит", "Ухаҵкы сцеит", "Уххь згеит"

Ахаҵкы акамыршәра аазырԥшуа арҭ афразақәа зҿоу даара даԥсышәоуп, даамысҭашәоуп, уамакала дарԥшӡоит. Аԥхьанатә дара аԥызҵазгьы заԥсуара иаҵаҽырбоз аамсҭацәа ракәын, аха лассы жәлары зегьы ишьҭыркааит. Аԥсуара аныҟәгараҿы анхацәагьы акала иаҵахомызт аҟынтә.

Ахыҵхырҭа: Шьалуа Инал-Иԥа "Очерки об абхазском этикете"

🧡 Ахьыуардын шәақәтәа

Абнатә баллада

– Абна сныҵалт шарԥазыказ,
Ашәарахқәа цәырҟьацәырас
Иԥхеибаҵон, шәарҭак рыҵас.
Мап, акгьы ыҟам исшәарыцаз,
Сахьнеилак избон акака,
Избон ассир, аршанхага.

– Ажәеиԥшьаа рҭыԥҳа дубама?
Уи лымаӡа узеилыргама?
– Ҽацә ҳәарақәак еибархәмаруан,
Арҩаш иаван, арҩаш иааруан.
Ран шьны ишьҭан арҩаш нырцәан,
Аԥсырҭаҵәҟьа хыла икылҵәан.
Насыԥдақәа, ицәаз џьыршьон,
Тәҩала инасыр иҵҟьоз џьыршьон.

– Абна ду уеимдо уахьылаз,
Иарбан сахьоу убла ихгылаз?
– Џь дуӡӡак гылан, ахан еиԥшын,
Си ԥшатлакәи зегь ззеиԥшыз.
Хҩык ахацәа аџь ду ԥырҟон,
Аха амахәқәа еибаргәырӷьон.
Аихаԥсыхә бжьы башаз џьыршьон,
Аҵларкәыкә нас-насуаз џьыршьон.

– Нас, исаҳәишь, аҵла шхырхәоз,
Абна шыцәоз, абна шҿыхоз.
– Аҵла сышьҭаԥшуан слаԥшықәҵан,
Руапа еиқәаҵәақәа наршәырҵан,
Иааилагылан еицыгәрымуан.
Ирзымҵәахуаз гәалак рыман,
Аӡын хьшәашәа рзаазгаз џьыршьон,
Рылабжышқәа рҩашны ихыҽҽон...

– Баша уцозма укыдыгәгәала,
Еилмыргакәа абна агәала?
– Санырԥырҵуаз ԥшацәгьак асуан,
Аҵла хырхәон, саара ишьҭасуан.
Рыбӷьы кыдҳауан зымҩакны,
Аҵла исышьҭарҳәон еицҿакны:
«Анаатә ҳажәуҵеит, ҳабахәо?
Наҟ уаҳԥырҵ, уаҳԥырҵ ушзахәо!»

– Ргәала рҳәазар ус имӡакәа,
Гәыжьжьагагьы рамҳәаӡакәа!..
– Усгьы сҳәеит, сырзеилыргазар:
«Иҵегь сыԥхарын сымразар,
Иҵегь скаҷҷарын сымзазар,
Шәхызжәартә сасрымызт сыԥшазар,
Сыблақәа хьчаҩыс ишәымаз,
Шәыԥсы сымажәда, саԥшәымаз!»

Баграт Шьынқәба, 1981

🧡 Ахьыуардын шәақәтәа

Зымч иақәгәыӷуа дмақарӡом.

Аԥсуа жәаԥҟа

Абри аҽны 15 шықәса раԥхьа ақырҭуа ир аҵымҳәҳәаррақәа ҿааҳәыра рымамкәа Кәыдры аиҩхаа иҭцан. Аԥсны ауразоуроу ҩаԥхьа аԥсуа мчра шьақәыргылан. Аԥсҭазаара зны иуардынуп, зны ифырҭынуп шырҳәо еиԥш, мышқәак ирылагӡаны қәҿиарала имҩаԥгаз арратә операциан.

Ахҭысқәа реишьҭагылашьа еиҭаҳгәалаҳаршәеит абра >>

🧡 Ахьыуардын шәақәтәа

🏹 Ахаҵара Нарҭаа ирхылҵит, Нарҭаа дуқәа ирцырҟьоуп рҳәоит аԥсуаа.

Ари ажәаԥҟа ихарҭәаау авариантгьы ыҟазаап. Аҩбатәи ахәҭа ацны иаҳԥылеит Хәыхәыт Бӷажәба истатиа "Ашьаҭамырӡга" аҟны (1994).

🟠 Ахаҵара Нарҭаа ирхылҵит, ашәаргәындара – ҩысҭаа цырҟьоуп.

(Мужество идет от Нартов, трусость – от дьявола).

Афырхаҵареи агәымшәареи ирызку иҵегь аԥсуа жәаԥҟақәа еидкылоуп абраҟа >> Шәаргьы ижәдыруа анышәҵа.

#иацу_ыҟоуп

🧡 Ахьыуардын шәақәтәа

Ҳабдуцәа рабдуцәа злацәажәоз аԥсышәала "нарҭ" иаанагон "афырхаҵа". Абри аҩыза алкаа дазааит раԥхьаӡатәи аԥсуа профессионалтә фольклорҭҵааҩ, академик Шоҭа Салаҟаиа:

«Иџьоушьартә иҟоуп нарҭаа репос аҿы ажәа "ахаҵа", "афырхаҵа" иналаршә-ааларшәны акәымзар, еснагьтәи епитетк аҳасабала ахархәара ахьамоуз. Арахь уахәаԥшуазар, аепос ахы
инаркны аҵыхәанӡа афырхаҵара аидеиа леитмотивны иагәылгоуп. Ари зызҳәоу, ҳгәаныла, нарҭаа репос иалоу аперсонажцәа зегьы (аӷацәа аалхны) фырхацәа ҳасабла иахьрыхәаԥшуа ауп. Ажәа "нарҭ" анырҳәа, уи азхон изызку ауаҩы дышфырхаҵоу аарԥшразы. Убри азакәхап афырхацәа хадақәа рыхьӡ иацрымшәо изацу ажәа "нарҭ" (Нарҭ Сасрыҟәа, Нарҭ Сиҭ, Нарҭ Кәын, Нарҭ Цәыцә убас егьырҭгьы)».

Абри ҳанаԥхьа, даҽа жәаԥҟа бзиакгьы ҳгәалашәеит "Афырхаҵа ишьҭа ихылаз афырхаҵа игәы иоуеит". Аԥсуаа ҳзы Нарҭаа рхылҵшьҭрақәа ҳәа ирҳәо баша ажәа ԥшӡам, ршьамхы зшьамху, ргәаҵәа згәаҵәоу ахацәа ҳаман, иҳамоуп, иҳагхарым аринахысгьы.

🧡 Ахьыуардын шәақәтәа

"Ҳаӷацәа еснагь ҳҭоурых иачычан. Иачычан, избанзар иара ҳаман. Дара иҳамамзар рҭахын, усҟан акыр ирзымариахон рнапахьы ҳаагара". Алықьса Гогәуа

Еибашьра бзиа ҟамлаӡацт ари адунеи аҿы, ауаҩи ауаҩи рықәибахра еснагь ирыцҳароуп. Аха уара иануқәло атәы хазуп, уара иануқәла – ухы ухьчароуп, иқәылаз дуаӷоуп, иқәнага дақәыршәатәуп.

Нанҳәа 14, 1992 шықәсазы ақырҭуа бџьаршьҭыхла Аԥсны даналала, аԥсуаа рмилаҭ-хақәиҭратә қәԥара иреиҳаӡоу аҩаӡарахь аҽышьҭнахит – иалагеит аџьынџьтәылатә еибашьра. Шәнеибац зҳәашаз Аԥыза дҳаман. Нхыҵ-аахыҵ ҳашьцәагьы рыжәҩа ҳамардеит.

Ахеиқәырхаразы ианҭахатәыз аамҭа – 413 мшы… Жәларык ҳԥеиԥш ӡбахон усҟан. Рыԥсқәа ҳмырԥхашьааит, ргәалашәара ҳмырхәашьааит Аԥсуа ҳәынҭқарра ҩаԥхьа ахсаалақәа ирныларц зықьҩыла зхы иамеигӡаз аҵеицәа. Ҳара иаҳуалуп шьала иааргаз амырӡра, хшыҩлеи дырралеи еихаҳауа ԥхьаҟа агара.

Асахьа: афотоальбом "Аиааира" аҟынтә

🧡 Ахьыуардын шәақәтәа

«Сҽыжәны саахуеит, сҽы цыркьыхуеит. "Ашьапы чаԥаӡами?" – дсазҵаахуеит аӡәы. "Ашьапы чаԥоуп, аха амаҭ ацҳаит", – аҭак исҭахуеит уи».

Зԥазаҵә дҭахаз Аԥсны Жәлар рпоет Витали Амаршьан аибашьраантәи иԥхыӡ.

Аԥсны жәлар рџьынџьтәылатә еибашьра адәаҿы иҭахеит 1716-ҩык ҳаԥсадгьыл ахьчацәа, Аиааира ашьҭахь аҳәааҿы иаҳцәыршьит даҽа 407-ҩык аҵеицәа. Аибашьра иахәхаз абџьар иаҵагылази аҭынч уааԥсыреи рхыԥхьаӡара ааидкыланы ԥшь-нызқьҩык рҟынӡа инаӡоит… Хабарда ибжьаӡыз аламҵакәа…

Аԥсны иаиуз аекономикатә ааха 11 миллиард доллар рҟынӡа артәеит. Аҭҵаарадырреи, акультуреи, аҭоурыхи ирыҭаз аԥхасҭа шәашьагьы амам.

Ахақәиҭра аҳауа цқьа лбааҳдарц абри аҩыза ахә шәан.

🧡 Ахьыуардын шәақәтәа

Иуцгәырӷьо духашҭуеит, иуцҵәыуа духашҭӡом.

Нанҳәамза аиҩшамҭа, 1992 шықәса. Аибашьра, ашьа, аиашьа… Шьагәыҭк змоу арҭ ах-ажәак ирымчу адунеи иабеит, шықәсык инацны Аԥсны агәы иҭаҵәыуо, ахлымӡаах ианалаԥшуаз аамҭазы.

Аибашьра аналага аҽныҵәҟьа зыԥшрак ҟамҵакәа арахь еихеит шәҩыла зшьа зыԥхьоз ҳашьцәа. Аиҳараҩӡак кавказаа ракәын, иара убас аҳәаанырцәтәи аԥсуа диаспора ахаҭарнакцәа. Аха иҳашьамызгьы, иара ус аҿыхақәа "иҟоу ҳбоит, ҳазлашәҩызам ҳәа егьыҟам" аанарго, иҳавагылақәаз ҟалеит. Агәаԥхара роуит, аҭаххара. Адунеи аҿы аибакапанра зыла иааиуа аиаша азықәԥаҩцәа.

Зегь ааидкыланы 2600-ҩык инареиҳан хатәгәаԥхарала еибашьра иааз. Рхыԥхьаӡара аасҭагьы ргәамч еиҳан. Аус ду аҿы иуцхраауа даныҟала, еиҳагьы угәы уҵасуеит, иулымшашагьы улнаршоит. Ақырҭуа дазыԥшӡамызт Кавказ ашьхарыуаа абас ҭаҷкәымкны еилаҵәап ҳәа... Дара ирыдгылоз, ижьышуаз-ишьашуаз аҟарлышқәа иреиԥшын. Ҳара иҳадгылоз фырхацәа иашақәан. Ауаҩра зцым афырхаҵара фырхаҵароуп ҳәа ирыԥхьаӡаӡомызт аԥсуаа наџьнатә аахысгьы, аҩбагь еицызар акәын ианынаӡаз, ианаԥсыуараз. Иагьеицын.

Хашҭра рықәымзааит Аԥсны зхы ақәызҵаз аибашьцәа, ҳтәыла ԥшӡа даргьы ирыԥсадгьылхеит иаԥсыуаамкәа иҭахаз. Агәабзиара рымазааит иҟоу, ргәымшәара ҿырԥшыгоуп, иааӡагоуп, имҩақәҵагоуп!

Аиааира аагараҿы хатәгәаԥхарауаа рлагала иазкуп абри аматериал>>

🧡 Ахьыуардын шәақәтәа

Аиаша ҳәатәыми, хатәгәаԥхарала еибашьра иааз рҟынтә ижьышуаз-ишьашуаз уаҩ дыҟамызт – Аԥсни аԥсуааи рыхьчара акәын ахықәкы хада, ахықәкы заҵә. Уи арахь иаанагон ақәыԥшӡақәа реиԥш, зуаҩыбжара иҭагылаз ахацәагьы. (Ақырҭқәа ирыдгылоз украинаа ракәымзар, урҭ ргыгшәыграқәа аҭоурых иадыруеит).

Аиҳараӡакгьы аҟабардақәа, адыгаа рхатәы трагедиак еиԥш ирыдыркылеит аԥсуаа ҳзыниаз азалымдара. Аибашьраан мызқәак Нальчик иԥхьаркыз Аԥсны Жәлар рпоет Баграт Шьынқәба иҩуан:

"Арантәи инаргоз иҭахаз афырхацәа анышә иахьарҭоз снеиуан, срыдашшылон. Уаӷеимшхара, зԥа дышьны заԥхьа дықәыз анацәеи абацәеи! Алаӷырӡ зхыҵәалоз рыблақәа џьарамзар џьара ихысымбаалеит гәынҷыхьа хьшәшәарак, уи аҭыԥан урҭ исарҳәон: "Аиашьа дыҟазароуп аиашьа изыҳәа!"

Шәаԥхьарц ишәыдаагалоит Аԥсны инхо, ҳабзиа-ҳацәгьа иалахәу Ҟабардатәи ахатәгәаԥхарауаҩ, аҭоурыхҭҵааҩ Асланбек Марзеи иҿцәажәара, хшыҩзышьҭра зуҭаша ииҳәаз рацәоуп. Аԥсны Афырхаҵа иҿахәы илырҳәеит ажурналист Елеонора Коӷониаԥҳа. Иҭоуп абра>>

Афото ©️ Саида Ҳаџьым

🧡 Ахьыуардын шәақәтәа

"Дунеи ду иахшәырҵәа хьырҵәаҵәа дгьыл шшәымоу;
Ажәытәӡа ҳшаԥшәымац, уажәыгьы ҳшаԥшәымоу.
Ҳабацәа рабацәа рхаҵара шшәылоу,
Ҳамцахәқәа мыцәарц, ахымцагь шәшаԥыло.

Харада икнарҳаз – зегьы-зегь рзынгьы,
Ҳанацәа ирхыргаз – зегьы-зегь рзынгьы.
А́хара ихырҵаз – зегьы-зегь рзынгьы,
Ҳиааирақәа ирхьымӡаз – зегьы-зегь рзынгьы..."
Рушьбеи Смыр

🧡 Ахьыуардын шәақәтәа

🌬 Ҳажәаҳәа ҳарҭбаап:

Аԥшарны́ҟәага – ветродвигатель;
Аԥша́даас – порывистый ветер;
Аԥшаӷьы́ – резкий ветер;
Аԥшахьы́ – холодный ветер;
Аԥша́рхь – бриз;
Аԥша́ргьгьа – смерч;
Аԥша́тлакә, аԥше́илаҩынт – вихрь;
Аԥшаҩа́ – суховей;
Аԥша́быжьҟьа, аԥше́иҿас, аԥше́иужь – сквозняк;
Аԥшашәа́га – ветромер
Аԥша́какан – зрелый орех, падающий от ветра;
Ԥша́мза – Март.

🔸 Аԥша дақәтәоуп – он несерьезный, ветреный человек;
🔸 Аԥша икәадыруеит – он очень скор, проворен, расторопен;
🌪 Аԥша лоуҵар афырҭын ааурыхуеит. (Посеешь ветер – пожнешь бурю).

Ахыҵхырҭа: Владимир Касланӡиа "Аԥсуа-аурыс жәар"

🧡 Ахьыуардын шәақәтәа

🧩 Ажәахырҿиаара

🥅 А́мба (ворота в спорте)

Аԥсуаа рмилаҭ хәмаррақәа ирхылҿиааз жәытә ажәоуп. Аханатә "амба" ҳәа иашьҭан ахәмарҩы илақәа хҩаны лабала иқәиҟьараны иҟаз аҵәышьаҟа: а-м-ба (иумбо), букв.: невидимое.

Ус ишааиуаз, ампыл асрақәа раан иадырсуаз ашьаҟақәа амба / амбашьаҟа ҳәа рзырҳәо иалагеит, ҩ-шьаҟак рыбжьарагьы амба ахьӡхеит. Забить в ворота – амба аҭаршәра ⚽️

🔸 Аламала убла иҵамшәо ауаҩы изы ирҳәоит аԥшӡы́ даҩызоуп // амба даҩызоуп ҳәа.

Ахыҵхырҭа: Валери Кәарҷиа иусумҭақәа реизга I атом, 346.

#ажәахырҿиаара

🧡 Ахьыуардын шәақәтәа

🌙 Иаха амзаҿа гылеит, аха ишаԥу еиԥш, иаразнак иаҳбарҭахаӡом. Ахшьырԥ асахьа аманы хьы-рахәыцшәа икыдлаанӡа, амзадара аныҟоу абарҭ ҩаха аԥсшәаҿы "ажәы́мбара" ҳәа ирышьҭоуп (безлуние). 🌚

🌾 Ари ажәа даҽа ҵакыкгьы шьҭнахуеит. Аҽаҩра ҿыц еилазазо амхы иҭагылоуп, аха аҿыхра макьана изаауп, арахь аҽаҩра жәытә нҵәарц егьагым – абри аамҭагьы ажәымбара ахьӡуп.

Зынӡа еицәыхароу еилкаарақәоуп уҳәап, аха еицырзеиԥшу ҵакуп а́мбара.

Хәмаршақә, ҳахьтәоу амза ацлара-агхара "хьыӡраҳтәит":

🌙 Аххьа-магана (золотой серп)
🌒 Ахыц (дугообразный лук)
🌓 Ашьынка-са (долька дыни)
🌕 Абла-заҵә (одинокий глаз)

Шәаргьы шәвариантқәа анышәҵа. 🌝

🧡 Ахьыуардын шәақәтәа

"Исгәаԥхоит уҟазшьа,
Алым уеиԥшуп уанықәԥо,
Уара уҩыза аҩыза
Сара еснагь дысҭахын..."

Апоет, ашәаԥҵаҩ, аибашьҩы Аркади Кархалаа иахьа дҳалагылазҭгьы 60 шықәса ихыҵуазаарын.

Анцәа абаҩхатәра анишоз Гәыԥаа рҵеи изы дамеигӡеит, ихышхыҵәо илан. Ашкол дышҭаз ажәеинраалакәа иҩуа далагеит, ажурналқәа "Алашареи" "Амцабзи" дыркьыԥхьуан.

Арра-мшынтә флот аҟны имаҵура ихганы данаа Очамчыра араион акультура аханқәа рҿы музыкантс аус иуан. Аибашьра алагаанӡа Аԥсуа гвардиа далалеит. Аӷа данқәыла иԥсадгьыл ахьчара дазгылеит. Ажәалагьы абџьарлагьы дхысуан. Абжьы цқьа ихан, иашәақәа рыла аруаа ргәы шьҭихуан, ирӷәӷәон, иҟажон.

Аибашьра ашьҭахьгьы иабџьар шьҭеимҵеит, аҳәаахьчара ицоз дреиуан. Дҭахоит 2002 шықәса цәыббра 25 рзы Егры аӡиас аԥшаҳәаҿы иуалԥшьа шынаигӡоз, 40 ихымҵыцызт...

Иара уи ашықәсан иҭыҵит Аркади Кархалаа иажәеинраалақәа реизга "Аԥра шкәакәа", аԥхьажәа ссир азиҩит аибашьра амшала згәаҵәа былхьаз Аԥсны Жәлар рпоет Витали Амаршьан.

Аркади Кархалаа аибашьра иалиааз еицырдыруа иашәақәа иреиуоуп "Ақьаса", "Алаӷырӡқәа", "Егры ахықәан", "Ауаҩы дысшьит" уҳәа егьырҭ.

Асахьа: аҭаацәа рархив аҟынтә

🧡 Ахьыуардын шәақәтәа

Апоетҵәҟьа ицәаҳәак алагьы дудыруеит. Шәахәаԥш, шаҟа икәеикәеиуа Аркади Кархалаа илирика, "Хьыбла" захьӡу, ақәыԥшра ацәа хаа зхоу иаԥҵамҭаҿы. Иааҳгоит 2014 шықәсазы иҭыҵыз абзиабаратә жәеинраалақәа реизга "Бызбоит, бызбоит, бзиа бызбоит" аҟынтә.

Сара сцасҳәа акыркыр быччоит,
Бара бтәала са сыбжьо џьыбшьоит.
Хычча-хәмарра шьҭа иазхоит, баҟәыҵ,
Са издыруеит сшалоу ба быԥхыӡ.

Цасҳәа сбымбаӡоушәа ҟабымҵан,
Аха мап, ибысҭаӡом гәыбӷан.
Усҭахӡам ҳәа бҳәаргьы быгәра згом,
Ба ибызӡаргьы былақәа ируӡом.

Хьыбла, сышәҭ еинаала, иалоу са сразҟы,
Қәыԥшроуп сгәаҵа иҭала, бааи, бнапы сыркы.

Хьыбла, бсахьа еинаала сҿаԥхьа еикәаԥхоит,
Схьаҵуам ус мариала, зегь акоуп быстәхоит.

🧡 Ахьыуардын шәақәтәа

📌 Ажәа бзиоуп

Аԥсы́быб – аԥша ишьҭнаԥаауа аӡы ацыԥхь ссақәа (водяная пыль)

Асахьаҿы: Аԥсны иреиҳаӡоу аӡхыҽҽа Адауы (Хәаџьал), Тҟәарчал араион, шә-метрак иахьаҳраку ихшәаны илеиуеит.

#ажәа_бзиоуп

🧡 Ахьыуардын шәақәтәа

Ҳаԥхьаҩ ихаҵкы, Хәаџьал ихыҽҽаны илеиуа абри аӡы ахьӡ ҳаҵаиҳәеит: Ахәыӡга. Аҵакы иахьалацәажәо акгьы ҳзымԥшаацт, аха ашьаҭаҿы иҳамоу "ахәыӡ" (просо) акәзар, даара аинтерес аҵоуп. Избанзар Дәрыԥшь, Ебырныха аҳаблан иҟоуп убасҵәҟьа хьӡы ссирк зху аӡыхь: Ашырӡы́хь (Арқәа иҵыҵуеит, Дахәара иалалоит).

Ари аӡыхь ахьӡ шаиуз ҳәа еиҭарҳәо ажәабжь аниҵахьан абызшәадырҩы Валери Кәарҷиа, иаагоуп "Аԥсны атопонимика" захьӡу ишәҟәаҿы.

"Арӡынаа ашәуак дӷьычны аҩныҟа дааргеит. Ауха, аӡы агьама аниба – ари Нхыҵынтәи иаауеит, ҳӡыхь ауп иҳәеит. Доурышьҭын Нхыҵ данца ашырӡи ахәыӡи ҭеиԥсан ара икылангеит. Убри иныркны Ашырӡы́хь ҳәа иашьҭалт".

Иарбанзаалак аӡыхь ахатә гьама амоуп, ҳәарада, узышьцылаз аламалагьы иухашҭӡом. "Шәӡы шԥахаау, ажәра шԥабзиоу" рҳәоит. Аанда зыбжьоу агәылацәа рҵеиџьқәа ирҭутаз аӡгьы гьамала зынӡа ианеиԥшым ыҟоуп. Аӡыхь – адгьыл акыкахш, Шьалодиа Аџьынџьал иажәақәа рыла иуҳәозар.

🧡 Ахьыуардын шәақәтәа

Уажәы алахтыра ду ҟалеит, дад. Аҳаҭыреиқәҵашьа, гәшаҭарала аицәажәашьа рҵоит ауаа шәҟәыла-быӷьшәыла. Ажәытәан ажәабжьҳәара акәын хшыҩырҵагас иҟаз.

Мҩасҩык дышцоз, данынаԥш, зықәрахь инеихьаз хаҵак имацара заҵәык амхырҭа дҭагыланы дшырашәоз дибеит. Ицәымыӷхеит, дагьрыцҳаишьеит. Иаахтны иеиҳәар, игәаҟра изымхошәа, саргьы иацсҵоит игәахәын, днахыкәшаны, ус ҿааиҭит:
– Бзиа ууит!
– Бзиара убааит! – иҳәеит зымацара ирашәоз.
– Шьыжьы узымгылазаап, – иҳәеит амҩасҩы.
– Шьыжьы сгылеит, аха сеиқәымшәеит, – иҳәеит ирашәоз.
– Уҩба шԥаҟоу? – ихәеит амҩасҩы.
– Сыҩба хԥахеит, – иҳәеит ирашәоз.
– Ухара шԥаҟоу? – ҳәа днаҵааит имҩасуаз.
– Сыхара ааигәахеит, – иҳәеит ирашәоз.
– Угәӡара зеиԥшроузеи? – иҳәеит амҩасҩы.
– Сыгәӡара џьаџьахеит, – иҳәеит ирашәоз.
– Умаӡа зеиԥшроузеи?
– Сымаӡа аргамахеит, – иҳәеит зымацара ирашәоз.

Еилукаама, дад, урҭ реицәажәара?

◽️ Шьыжьы узымгылазаап ҳәа зиҳәаз, имацара амхырҭа дҭамзи, иануаамҭаз, уаныҷкәыназ ԥҳәыс дааугазҭгьы, иуцхандеиуаз аҷкәын дувамгылози ҳәоуп. Ирашәозгьы, иаармаананы, иансааз, саныҷкәыназ ԥҳәыс даазгагәышьеит, аха сеиқәымшәеит, хшара дысмоуит иҳәеит.

◽️ Уҩба шԥаҟоу ҳәа дызиазҵааз, иҩшьапык рзыҳәаноуп. Сыҩба хԥахеит иҳәеит егьигьы. Ҩ-шьапык сымоуп, аха сшьамхқәа кәадахеит, алабашьа сымкыр ауам ныҟәара санцо ҳәоуп иаанаго.

◽️ Ухара шԥаҟоу зиҳәазеи? Уҩблак ихараны ирбома ҳәоуп. Ихараны исызбом, иааигәахеит сылаԥш иҳәеит егьигьы.

◽️ Угәӡара зеиԥшроузеи зиҳәаз, ухаԥыцқәа еибгоума, ибзианы иҟаҟаны акрузыфома ҳәа диазҵааит. Егьигьы аҭак шыҟаиҵаз умбои, сыгәӡара џьаџьахеит иҳәеит. Иџьаџьаны акәгәышьоуп ишысфо иҳәеит.

◽️ Умаӡа зеиԥшроузеи зиҳәазеи? Ауаҩы ибжьы рхәыҷны иуеиҳәар иуаҳауама, улымҳақәа ирыгхахьоума ҳәа диазҵааит. Ауаҩы ибжьы рдуны исеимҳәакәа исаҳауам, сымаӡа аргамахеит иҳәеит егьигьы.

Абас, дад, гәшаҭарала, маанала аицәажәара рдыруан ажәытәан. Уазхәыцыр, ихшыҩрҵагоуп.

Џьума Аҳәба иҩымҭоуп

🧡 Ахьыуардын шәақәтәа