يا سمحين 🌸
حدثوني عن قيام الليل 💕
تجاربكم معاه..
ومقدار التغيير الحصل فى يومك أو بالأصح فى حياتك بعد ما جربّتو..
أحكو لي قصص عنه وعن شعورکم لحظات الوقوف بين يدّی الملّک ..
عن الدعوات الكانت مستحيلة وإتحققتَ 🌸
حتى لو كان وقفتّوا ليكم فترة أو جربتوه مرة ولا إتنين وتاني كسلّتو..
أحكو لي هنا 😅
@Ryan_adil
ورّح ورّح ..
لعلك تكون السبب في جعل أحدهم قائماً آناء الليل ساجداً له 🌸
#Ryan_adil..

المعنى الحقيقي لأبو السيد لما قال :
ﺃﺻﻠﻰ ﻟﻤـّﻦ ﺃﺩﻭﺭ ﺃﺟﻴﻚ .. ﺑﺠﻴﻚ ﻻ ﺑﺘﻌﺠّﺰﻧﻰ ﺍﻟﻤﺴﺎﻓﺔ،وﻻ ﺑﻘﻴﻒ ﺑﻴﻨﺎﺗﻨﺎ ﻋﺎﺭﺽ..
ﻻ ﺍﻟﻈﺮﻭﻑ ﺗﻤﺴﻚ ﻓﻰ ﺇﻳﺪﻯ ﻭﻻ ﻣﻦ ﺍﻷﻳﺎﻡ ﻣﺨﺎﻓﺔ♥️
#Ryan_adil 🌸

عثمان زول صبور ولوف وحبوب جداً وراضي بقسمتو فى الدنيا دي..
عثمان متزوج وعنده 6 أولاد فى مختلف المراحل العمرية..
عثمان شغال فى وظيفة حكومية وبصرف ألف ونص "بعد ما أضفنا كل البدلات"
عثمان للأسف الشديد "مؤجر" !
لانه هو أصلا من شرق الجزيرة من فريق ناس وراء وأبوه ود زينب بت الحاج الهادي..
"كان حكيم وراجل رأيو مسموع وما ف زول بقدر يزعلو"..
عِلاّ عثمان ده مما قام بِدوّر القراية مو متل أخوانه حارسين الحواشات..
عثمان ده كان نبيه من صغتّرو ..
ابوه وكت فِتّر منو قال أحسن يخليهو يكمل علاّمو..
عثمان سافر البندر وأتعلم وبقا باش محاسب قدر الدنيا وعاد تخلي ليو العنقليزي ده فوق لسانو..
آي..
آي والله زي ما بحدّثك كدىّ..
لسانو أنعوج وبقا كيف كيف 😅
اها عثمان ده ليه قريب 20 سنة فى البندر..
عِلّا ما عندو بيت ملك عشان عثمان ده شايف إنه البيت الملك بكرة ببنوهو العيال وينفضّو الغبار..
عثمان عَلّم اولادو وربّاهم أحسن تربية وأتقي ربنا فيهم ،والسُرّة مرتو زاتها ما هينة "واقفة معاه فى السمحة والشينة"..
وفى زمن الطغيان وحكومة الكيزان..
عثمان جاء راجع من الشغل بعد صلاة العشاء
"ما من عوايدك آ عثمان فوتا وين الليلة "؟!
السرة قنبت فى العنقريب تضرب اخماس فى أسداس..
جات زينب "بتهم الصغيرة وحبة عينهم ،اي اي مسمينها على حبوبتها "
بت فهلوية كده وجنها مشاغلات وحنينة شديد ..
عشان كده عثمان بقول ليها "يُمة"..
خلصت الواجب وجات لأمها تطمنها شوية عرفتها مقلقة..
اها السرة تشيل وتدعي..
ضربت لسيد أحمد ولدها الكبير ..
"سيد أحمد ده قرأ طب وما شاء الله كان بجي الأول على دفعتو،ياادوب نزل امتياز بعد ما قعد سنة ونص ..
أسى شغال في المستشفى بياخد ألف جنيه فى الشهر "
لكن كملانة فى المواصلات والأكل..
اها سيد أحمد كان بايت في المستشفى لكن عارف أزمة المواصلات دي..
"وراها الحاصل وطمنها "
وفعلا جاء عثمان متمسي وتعبان وهلكان وما قادر يقيف من الرجفة "هو لكن بكون على لحم بطنو من فول الصباح وفوق ده كلو عندو السكري"!
جرت زينب "أم أبوها زينب دي ياخ"🌸
جابت ليو باقي العدس بتاع الفطور وعصّرت ليهو رجلينو ورقدت ليو فى صفحتو وتشيل وتتبسم..
قال ليها :
آ الكتراابة!!
آبت جنيتي ولا مالك ؟!
قالت ليو : أنتا عارف آ يابة 💕
أنا بعد أشتغل واتوظف بجيب ليك من أول ماهية مركوب بدل حقك المشرط ده،وديك يا العمة والجلابية..
أمها نطت "بحزن زائف" : وأنا يا زينوبة ..خبّارک ما بتسوي لي شي..
ردت ليها :
يا يمة أنا بدق ليك الدهب من أضنيك بس انتي أصبري لي 😚
اها زينب شالتها نومة بعد ونستها مع عثمان والسرة..
قامت مخلوعة الساعه سبعة !
والجرس بدق 7 ونص !
قالت لأمها الليلة أستاذة سعاد بتدقني يا أمي عشان أتاخرتا ،يمة انا بخاف من الدق،يمة أنا الليلة ما ماشة..
نهرتها السرة وقالت ليها :
أمشي وأنا بجي بوراك أكلم الأستاذة...
أمشي يا بت سريع..
ومشت المدرسة ترجف من الخوف..
لقت أستاذة سعاد البتدق ما في "فرحت فرحة القالولو ولدك عاش بعد موت محقق"..
وخشت الفصل "الحصة إنجليزي وهى بتحب الانجليزي وبتحب عويجة الخشم ما هي عاوزة تبقى وزيرة !! "
أمها فجأة اتذكرت البت زينب..
وقلبها قبضها شدييد..
لفحت توبها ومشت لزينب المدرسة..
مدرسة شنو ؟!
المدرسة وقعت يا السُره وبتك زينب ماتت..
راحت فيها..
ماتت وماتت أحلامها ..
ماتت وماتت ضحكتها..
ماتت وما لبستك الدهب ولا جابت لعثمان المركوب ولا الجلابية ..
"اريتك كان ما مشيتي،اريتك كان غبتي "
#معلون_أبو_الجانا_لابس_عباية_الدين..
والله معلون..
معلون..
1 أغسطس :
انهيار حائط بمدرسة الصديق الأساسية أدى لوفاة ثلاث طالبات وأصابة جرحى
#Ryan_adil..

مساء الخير هنا عرفة..
الرحمن وضيوفه !
دعاهم فإذا بهم من كل حدب ينسلون
نادى عليهم فإذا بهم من كل فج عميق يأتون
فباهى بهم ملائكته :
عبادي أتوني شعثا غبراً
أجل عبادك يا الله
الفقراء إن لم تُغننا
الضعفاء إن لم تُقوّنا
الأذلاء إن لم تعزنا
المتفرقون إن لم تجمعنا
المهزومون إن لم تنصرنا
المكسورون إن لم تجبرنا..

مساء الخير هنا عرفة
هنا سيد الناس يخطب في الناس :
" كلكم لآدم وآدم من تراب "
فلا تتكبروا

هنا الرحمة يقف عند جبل الرحمة :
" إن دماءكم وأعراضكم وأموالكم عليكم حرام إلى يوم القيامة كحرمة يومكم هذا في شهركم هذا في بلدكم هذا "

هنا سيد الرجال يوصي خيراً بالنساء !
ثم يسأل : ألا هل بلّغت

أجل نشهد أ نك قد بلّغت
لم تترك خيراً إلا دللتنا عليه
ولم تترك شراً إلا وحذرتنا منه
لم تنهَ عن شيء إلا وكنتَ أول من ينتهى عنه
ولم تأمر بشيء إلا وكنتَ أول من يفعله
أجل قد بلغت الرسالة وأديتَ الأمانة..

#هذه_عرفة_يا_الله..
فاتنا الوقوف بها هذا العام
ولكن لم يفتنا الوقوف ببابك
جئناك بذنوبنا يا الله
نسألك سؤال من نعلم
هنا عرّفة..
-يسأل الله ملائكته: ماذا يريد هؤلاء ؟!
=يُجيبُ ملائكتهُ:
"أنت أعلم بهم من أنفسهم يا الله سمعوا أن سُوقَ العِتق قد قامَ فجاؤا يبيعونْ ذُنوبهم ويشتُرونَ مغفٌرتكَ..
عرّفوا أن البيّع لك والشراءُ مِنك تجارةٌ رابِحة، فلا تفِض السُوق يا اللّه إلا وقد إشتريتَ الذنّب وبعتَ المغّفرةَ وأتممتَ العتق "..
مساء الخير..
هنا عرّفة !
#لا_تنسونا_من_صالح_الدعاء 🙌
#Ryan_adil..

زَوجـَكُنَّ اللَّه بِرَجـُلٍ لا يَتهـَاون مَعكنَّ فِيما يُغضِب اللَّه 💙"
=آميييين 🌸
#Ryan_adil 👐

#بعد_الغياب 💙
يمكن من أجمل الفترات الممكن تمر بيها خلال حياتك كلها هي الفترة البتكون فيها حاسس بالوحدة القاتلة 😅
غريبة صاح ؟
خلوني أقتبس من شهد -عبارتها البتقولها لي دايماً - أنه الفترة دي فترة تولّي الله لك 💙
آي بمعنى :
احساس الوحدة المليان بيه،اليأس،الأحباط،القنوط،الخذلان من أقرب الناس ليك أو "كنتا فاكرهم الأقرب"..ألخ
تقع..
تزعل..
تتكسر كسرة عُمرك -أو لعلك تظنها كذلك - وتهرع لكل الجهات وما تلقى زول واقف معاك..
ما تلقى زول قادر يفهمك ولا يترجم حالة الجمود اللافي فيها نفسك أو حرّاق الروح القايد جواك ..
وعادي جداً تصل مرحلة الفُرجة من بعيد كأنك فى مسلسل ولا فيلم متعدد الأجزاء ، اللي هو أنك قاعد بتتفرج من "غير ذرّة تشويق " ومنتظر كمية الخوازيق الح تجيك بابتسامه بلهاء وكأنما لسان حالك بعد كل مصيبة يُغرد قائلاً :
Nexxxt !!

أها يا جماعة وعموماً يعنى كل الكآبة الفوق دي وما زاد عنها وأعجز عن وصفه ..
دي كلها ممهدات لحاجة واحدة بسسس ..
{ إنني أنا الله لا إله إلا أَنَا فَاعْبُدْنِي وَأَقِمِ الصَّلَاةَ لِذِكْرِي }..
عشان نكون واضحين..
ما ف بنى آدم ح يستحمل بؤسك وشكاويك الما بتنتهي غيره ..
ما ف زول ح يكون مبسوط وهو بسمع فى شكاويك للمرة الألف بعد المئة غيره..
ما ف زول ح يفهمك صاح ومن غير تبرير ولا تشكيك في النوايا غيره ..
ومااا ف زول ح يسامحك لو غلطتا فى حقه مرتين خليك من آلاف المرات !
برضو غيره :)
أممم تاني شنو ؟
ربك ده رحمن ورحيم ..
محتاجين نذكر روحنا بالحقيقة دي بصورة يومية والله ..
عشان نتملي يقين وتأكد تماماً وبما لا يدع مجالاً للشك أنه ما بخُتنا فى موقف إلا وهو متأكد تماماً أنه هو "فى وسعك" !
ياخ الابتلاء زاتو بكون مفصل قدرك طق طرق ليرى أتصبر وتحتسب أم تجزع ؟!
فا يا بختك إذا كنتا من الصابرين الحامدين فى الضراء والبأساء..
ويااا بختك بعدين بالعَوضّ ولذِة العوض 💙
#فاااا_المهم..
Daily reminder to yourself :
=ربنا بيزيد عليك الضيق عشان أنتا تزيد العـشّم ويكرمك فوق ما تتصور ..
أيوة والله 💙
"فلا تعلم نفس ما أخفى لهم من قرة أعين "🌸

=ما تتجرس لما تلقى روحك براك ومدبرس وبتاع لأنه ربنا عاوز يتولاك وإذا تولاك الله فرّج همّك ولو كان أقسى من الحديد..:)
فاللهم تولّ أمرنا وفرج همنا ويسر لنا ما أستعسر ..
#Ryan_adil..🌸

قررت أن أبوح إليها بحبي فأخجَلني عفافها، كنت أخشى أن تَضيع ، فمثلها لا يمكنك أن تعبره بسلام دون أن يجعلك تتوقف عنده، ماذا أفعل؟!
هل أذهب إليها أخبرها بذلك؟!
ربما ستكره هذه الفعلة، لا ينبغي أن أفعل شيئًا محتمل أن يحرك غضبها الرقيق..
هل أتغاضى عنها وعن عجزي عن الوصول إليها ؟!
وكيف ذلك وأنا أصبحت أحب أن أستيقظ كل يومٍ لأرآها ، أراها فقط وإن لم ترآني، تمر بي لا تُلقي لي بالًا ، وبالي أنا لا يمر به أحد سِواها..
ماذا أفعل؟!
لا أود أن أخبر أحدًا بما في قلبي لها، أشعر أن هناك شيئًا يمنعني، ربما تلك الهالة النورانية حولها، ربما حياءها المُفرط، ربما نقاءها النادر، ربما أشعر أنه ليس من حق الجميع أن يذكرها في حديثه، لابد وأن أنتقي من سأخبرهم عنها بعناية فائقة.. فائقة جدًا..
عرفت من سأحدثه عنها..
ربها .. خالقها ومُبدع چمالها، العليم بمفاتِح الأبواب إليها ، القادر على رزقي بهذه النبتة النادرة، التي أتيقن أنه لن ينالها الا رچل قد رضى الله عنه..
وما لبثت أدعوا حتى تذكرت أنني ربما لا أستحق، ربما أتمسك بِحبالٍ باليَة، فتوقفت عن الدعاء بها، وتحولت للدعاء بأن يرزقني الله توبةً نصوحًا، وعملًا صالحًا خالصًا لوجهه، وأن يصرف قلبي عن تعلقه بما ليس له.. ويرزقني بمن يرضاها لي..
وأنا لا أتصور على الإطلاق أن تكون هي التي سيرضاها الله لي..
ليس لشئ الا أنني أقل، أقل بكثير..
بعد حينٍ ليس بالكثير، رزقني الله الطريق الصحيح إليها، لم أخبرها بحبي الدفين، ولا انبهاري الطويل، بل أخبرت الله فرزقني الطريق الذي لن يضرها أو يزعجها..
وحين نظرت اليها بعد أن رُزِقت بها، كانت أچمل بكثير مما كنت أعهدها..
فلقد كانت تُصيبني عدوى الحياء من شدة حياءها فأستحي أن أطيل النظر ، وأجاهد نفسي ألا ألتفت، ولكن قلبي كان يلتفت..
ربما لو كنت اتخذت طريقًا غير ذلك لكانت الأحداث مختلفة..
ولكن من أراد أن يَهنَأ بِرزقه ، عليه أن يأخذه بطريق يُرضي الله أولاً، وحتمًا سيرضيهِ اللهُ ولو بعد حين.
نقلا عن tota Ali 💙
#Ryan_Adil 🌸

من أجمل البوستات اللاقتني 💜..
يااا رب تحفظ كل ابائنا و تديهم العافيه و الصحه و طول العمر..

💜🌸.. ⬇⬇
طلبوا من الناس انو كل واحد يحكي موقف حلو حصل ليهو مع ابوهو ودي كانت التعليقات:

• كان في فترة ما كنت لاقيه فيها شغل، ابوي كان بيشجعني اشتغل. كان كل يوم الصباح بيفتش لي شغل في الجرايد، ولما مره ماشه مقابلة شغل، المشوار كان بعيد ف ابوي قال لي حأمشي معاكي، اتصل على واحد صاحبو سايق واتفق معاهو يودينا، رفضو يدخلوهو معاي ف قعد مستنيني قريب الساعه او اكتر بره في البوابه مع الامن وفي البرد، لما طلعت لقيتو صاحبهم وعزموهو شاي وقعدوا يتونسوا، رجعنا بالمواصلات و كنت فرحانه شديد انو ابوي معاي وساندني وبيشجع فيني بالرغم انو كان مريض قلب والجو كان بارد شديد💕

• ابوي عندو ساعه لابسها ليو قريب العشرين سنه او اكتر لأنها عمليه وممكن يتوضى بيها وسهل يتعامل معاها. مره قلت ليهو انو ساعتو طالعه موضة، اليوم التاني لقيتو صغرها على مقاس يدي واداني ليها.

• كنت برجع تعبانه شديد من الشغل، وكل ما ادخل البيت بلقى ابوي جايب لي موية دافيه فيها ملح و ليمون عشان اخت فيها رجولي و تخفف علي من الألم وارتاح شوية💕

• سميت ولدي على اسم ابوي. ف مره كنا قاعدين انا و زوجي و ابوي ومعانا ولدي، ف شتمت ولدي و قلت ليهو يا زفت، راجلي قال لي ابوي بتك بتشتم الولد وبتقول ليهو يا زفت، ابوي رد عليهو وقال ليهو : يعني شنو لو قالت ليهو يا زفت، انت ما عارف انو الزفت من مشتقات البترول😂.

• ابوي الله يرحمو قعد يبكي يوم خطوبتي وخلا كل الناس تبكي معاهو ونفس القصه اتكررت تاني يوم عرست ويوم ولادتي لي بتي، وحتى ايام انا حامل كان معاي وبيعمل لي الاكل ويساعدني لانو امي كانت مسافره. مره تعب وعمل فحوصات وقالو لي امي انو الفحوصات بتقول انو احتمال كبير يكون عندو كانسر، امي اتصلت علي وكلمتني واتفقنا اننا ما نكلمو لحدي ما نتأكد. اتصلت عليهو العبره خنقتني وما قدرت وقعدت ابكي في التلفون وهو بيسألني مالك في شنو وقلت ليهو ماف شي بس شكلي اشتقت ليكم شديد لاني ساكنه براي في حته بعيده منكم، ف قال لي ولا تزعلي اسا بجي اسوقك. ☹️💕

• لما امتحنت شهادة ثانوية جبت ٨٠ وابوي كان متوقع اني اجيب حاجه اعلى من كده، بس ما زعل مني ولا شاكلني بالعكس حضني وهداني ومشا جاب لي كل الحاجات الكان نفسي فيها وقال لي: مهما كانت النتيجه انا عارف انك عملتي العليكي وانا فخور بيكي💕.

• كنت بمر بي فترة صعبه وحالتي النفسيه كانت كعبة شديد، ما كنت بنوم بليل وببكي اليوم كلو بدون سبب او بي سبب حاجات تافهه، مره رجعت البيت مستائه ومتضايقه شديد لي درجة اني ما قادرة اتنفس، ابوي جا وجاب معاهو المصحف وختا راسي على رجولو وقعد يقرا لي وهو بيمسح بي يدو على راسي لحدي ما نمت. لما شاف انو الحاجه دي بتريحني بقا كل ما يشوفني متضايقه يجي يقرا لي لحدي ما اهدى.

• ابوي كان لما يلقى جزمتي مقطوعه كان بيشيلها ويخيطها من غير ما اعرف ولا حتى اقول ليهو.

• ابوي عمرو 68 وانا 24 من وانا في المدرسه هو الكان بيصحيني ويخت لي الفطور ولما نكون عاملين غداء ما نفسي فيو او ما بحب اكلو بيمشي يعمل لي حاجه انا بحبها ويجيبها لي ومرات لما اكون ما عايزة اغسل المواعين بيغسلها بدلي. دا كلو والناس مستغربه اني ما عاوزه اعرس ليه، لانو عمري م حالقى زول يدلعني الدلع دا كلو.

" ربنا يحفظ كل ابهاتنا ويديهم الصحه والعافيه ويقدرنا نرد ليهم جمايلهم علينا، ويرحم كل من توفته المنيه وينور قبورهم ويجعل مثواهم الجنه يارب 💕"
#Ryan_Adil

إبن الفارض لخَّص كلام كتير لمّا قال: "إن كانت منزلتى فى الحُب عندكم ما قد رأيت، فقد ضيّعتُ أيامي"..
#Ryan_Adil 🌸

#أحداث_سبتمبر..
أمس كنتا بتصفح وفجأة لقيت كلام عن الشهيد #صلاح_سنهوري..
ومعاه تاق لحسابه الشخصي..
خشيت صفحته :
لن ننساك..
ربنا يرحمك..
فاقدينك..
ما ف حاجة مبهرة !
كلها عبارات الحزن على فقدان شخص عزيز..
لحدي ما لقاني بوست لحظة تلقى وفاته رحمة الله عليه..
عندو صحبه واصف المشهد من بداية طلوعهم فى المظاهرات وصدح أصواتهم بالحق مرورا بلحظات الهلع ولحظات الإنتظار ويا رب تكون رصاصة مطاطية،دخول المستر لإجراء الجراحة لإزالة الرصاص،التجمعات..
الهلع مرة تانية وإقامة الصلوات والابتهالات والدعوات..
ومن ثم..
مات صلاح !
لقيت روحي ببكي بلا رادع..
والله ما بعرفو ولا حصل سمعتا بيهو غير بعد وفاته..
واصلتا تصفح فى حسابه..
كلماته ،بوستاته وتفاعلاته مع أصحابه..
أمانِيه المليان بيها ،حلم الإغتراب الذى كان هاجساً ملحاً لتحقيقها..
تراجيديا الإغتراب والبُعد عن الأهل وحينها تبادر لذهني مقطع من "عافي منك" لعلاء الدين أبو سير البقول فيه :

"وخايفة كان سافرت ترجع تلقى فاضي البيت بلايا
وحينه مابتنفع قروشك ومابتجيبلك أُم سوايا"..

خلونا من ده كله..

متخيلين أنه هو والمعاه تمو خمسة سنة مما فارقونا !!
تموّ خمسة سنة مما وقفوا ضد الظلم،ضد القهر وضد العسكر..
#سبتمبر_المشؤوم..
ما عارفين إنه أرواحهم راحت شمار فى مرقة..
ما عارفين الوضع الوصلنا ليهو..
ما عارفين والله..
ما عارفين أنه آي حاجة حرفياً بقت بالصفوف..
ما عارفين أنه أطفال المناصير ماتوا وهم ماشين المدرسة ونحنا ما عملنا حاجة غير أننا غيرنا البروفايلات وأدنّا وشجبنا وطلعنا مسيرات فايسبوكية حاشدة..
يا ربى عارفين أنه كسلا أصابها وباء وحكومتنا الرشيدة ما قالت بٌغّم !
الآلاف من الأطفال والنساء والشيوخ بموتوا يومياً..
والحكومة رافضة الإعتراف بالاصابات وإعلان حالة الطوارئ..
الدربات الخافضة للحرارة بتتباع فى السوق الأسود ب5 أضعاف سعرها..
يااخ حتى جبل مرّة ما قدر يُصمد وتعب وأنهار فى المواطنين وماتو العشرات وكما العادة #حكومتنا_الرشيدة ..
عاملة أضان الحامل طرشاء..
يا ربى عارفين أنه البلد كِمّلت من خيرها ؟
سمعتو بأخوانكم الفارقو الوطن والأم والأبو عشان يوفروا ليهم حياة كريمة ؟!
عارفين تجاوزات العسكر..
عارفين أساليب القمع والتعذيب النفسي والجسدي لو فتحت خشمك وقلتا الحق ؟
عارفين الفساد الظهر فى البر والبحر ؟
عارفين أنه دمكم راح هباءً منثوراً !!
عارفين أنه بقينا نتلذذ بالكلام فى أعراض الناس وما بنصدق نلقى موضوع ونلوكه لمن نطلع زيتو ونشوف حاجة أكبر نشغل بيها روحنا ؟!

دم الشهيد راح سااي..
#شهداء_سبتمبر..
#بلاد_القهر_أوطاني..
#Ryan_Adil

-‏باللهِ! يا مُفتِي الهوىٰ قُل لِي إذا . . بَلغَ النِّصَابَ الشَّوقُ، كيفَ زكاتُهُ؟!

=الدُعاء الدُعاء ♥️
#Ryan_Adil 🌸

حك ذقنه بتوتر ثم وضع يده على قلبه وردد قائلاً :
"أفمن أسس بنيانه على تقوى من الله ورضوان"..
أشاح بناظريه عن تلك القابعة أمامه..
كانت ملامحها توحي بالانهاك ، رغم ذلك فهي دائمة الإبتسامة مع من هم حولها..
مُشاكسة في بعض الأحيان ،صانعة البهجة إذا ما حلت فى آي مكان ، ساخرة جداً ومنتقدة لكل ما ينافي ذوقها !!
أخبرتها بذلك فى آخر يوم لنا فى ذلك الكورس..
أخبرتها أمام الجميع أن لا شائبة بك عدا أنك إنتقادية جداً ..
لم أكن أريد قول ذلك ..
أقصد أنني لم أكن أريد أخبارها بأن لا شائبة بها !!
لكن لم أستطع مقاومة سحر حدائق البُن خاصةً عندما يبتسم مُحيا صاحبتها..
يا إلهي هل كان يجب أن أصدر حكماً قاسياً أمام الجميع وأصفها بالانتقادية لأُداري بوحي المفضوح !
تقوس فاها بعد عبارتي تلك أخبرني أنه لم يكن على قول ذلك، بئساً لي..
أعلم أنه مضى على ذلك شهر ويومان وعشر ساعاتـٍ -يلقى نظرة على ساعته- أوه إنها الثانية إلا خمس دقائق..
ثم يتمتم مُكملاً ..
وخمس وثلاثون ثانية،لكن لابد أنها غاضبة حتى الآن..
"سأنصرف إلى قاعة الدرس قبل أن تراني "
3:20
طرقات خفيفة على الباب..
يقوم بتجاهلها ظناً منه أنه أحد الملتحقين بصفه..
يتواصل الطَرّق بحدة أعلى من سابقته..
يفكُر فيها..
ماذا لو وقف قليلاً وألقى السلام عليها عل شوق فؤاده يهدأ قليلاً..
نفض الفكرة من رأسه مع علو طرقات الباب وأستغفر ربه على ما راوده من أفكار ومن ثم قام من مجلسه ليفتح لذاك المتسيب القابع خلف الباب المغلق !
توعد فى سره بأشد العقاب له..
أمسك المقبض..
أداره..
وباشر بفتح ملء فمه ليُلقى العقاب ..
فغر فاه بعد اصطدام عينيه بحدائق البُن..
حملق محدقاً بها..
أغمض جفنيه عدة مرات كأنه يتأكد أن ما أمامه ليس حُلماً أو ضرباً من ضروب الخيال..
تراجع للخلف..
أغلق الباب فى وجهها وسط أستغراب المُلتحقين بصفه ومن ثم عاود الجلوس..
حك رأسه وذقنه ..
أحس بنظر طلابه مسلطاً عليه فأدرك أنها لم تكن حُلماً..
كانت بالفعل قابعة هناك ،قُرب الباب..
تلاقت نظراتهم..
أبتسمت له..
فأغلق الباب !!
نهض راكضاً بعد ادراكه لفداحة فعلته..
لم يجد طيف لها حتى..
هبط السلالم بسرعة البرق ..
لمح طيفها يخرج من المبني وهو يلهث..

#يتبع
#Ryan_adil..

= حبوبة-الله يرحمها ويغفر ليها-عاشت بعد جدو -ربنا يرحمه و يغفر ليه- قُرابة ال8 سنوات..
8 سنوات كبرت فيها شكلياً 80 سنة فوق عمرها الحقيقي..
أنا محظوظة جداً إنه أنا كنتا من أقرب أحفادها ليها وأعزهم على الإطلاق ومن مظاهر الحب ده إنه لمن أمشي رفاعة حيث البيت الكبير 💙
كانت بتجيب لي بسكويت ماجد من الدُقش وتختو لي تحت مخدتي وما كانت بتجيب لأولاد عماتي 😂😂
#فااا_المهم..
كانت عندها عادة إدمان القهوة بكافة تفاصيلها بدايةً بقلي البن وإنتهاءً بفنجان ظاابط جداً من يدها..
فاا جدو كان بشاركها احتساء الجبنة وبحضر كافة الطقوس دي مهما كانو مُختلفين ومتشاكلين..
وبنتلما كلنا مهما كانت مشاغلنا نتونس ونشرب جبنة بعد ما نعذبهم ونخليهم يبردوها لينا 😂
بتذكر أنه بوفاته حبوبة حرفياً بقت ما قادرة تعملها وهو ما ف !!
8 سنة لحدي ما ماتت ..
عشان أهم التفاصيل كانت ناقصة ..
القعدة دي كانت بالنسبة ليها جدو أكتر من آي حاجة 💙

=عبد الحميد أتشاكل مع عايدة شكلة كاربة جداً..
لدرجة قرروا ينفصلو بعد أكتر من 20 سنة زواج !!
وعايدة كانت مُصرة على الطلاق عشان كانت شايفة عبد الحميد غلط فيها - الغلطة التى لا تُغتفر - بالرغم من ندمه الشدييد عليها..
وقرروا ينفصلو بعد زواج بتهم الكبيرة ..
فى واحدة من أصدق المشاهد البتعبر عما يُسمى بالحُب ..
جاء وقف جمبها وهى فى المطبخ وأختلق حوار عوير شديد 😂
برضو عايدة ما عبرتو !!
فاا فجأة كده دَعّا على نفسه بالموت..
الface expression بتاعت عايدة كان واضح أنها مستنكرة الحاجة دي شديد لكن آثرت الصمت وسكتت..
#فاااا_المهم..
بعد ما رجعت المية لمجاريها..
أول حاجة عملها "عبد الحميد " أنه عاتب "عايدة" شديد وأتهمها بعدم محبتها ليهو -بكل الزعل الفي الدنيا - بالرغم من أنه ماااااااا حصل عبرت ليهو بصريح العبارة عن حبها تجاهو قبل كده !!
فردت عليه بكل ما أؤتيت من كيد النسا 😂
=إزاي يعنى ؟!
نظام شنو الخلاك تقول كده ؟
قال ليها :
=يا عايدة أنا دعيت على روحي قدامك وما قلتي لي
"بعد الشر عليك يا أبو اكرم " زي كل مرة ..
هنا ضحكت عايدة وبكل ما أؤتيت من سرعة نطق ..
ردت ليه :
"قلتها والله، بس فى سري "🙈
ما عارفة أنا غريبة ولا مالي..
لكن المشهد ده بالنسبة لي بلخص جمال الحُب..
الحب البكون قااعد بعد ما يروح شغف البدايات وأنبهارها ،الما بنقصه الروتين والتعود بل بالعكس !
بزيده قوة ومتانة 💙
البكمن فى التفاصيل البسيطة جداً ، التفاصيل البتخلي الآخر ينظر إليك كأنك معجزة أتحققت بعد طول دعاء ..

فاالناس ما ترتبط عشان مفروض ترتبط !!
عشان شايفة فى موضة قايمة الأيام دي أساسها "المفروض" الفوق ده..
ما عارفة الناس دي بتفكر كيف ؟
الحاجة دي صعبة شديد يخواناا..
لازم الطرفين يكون عندهم استعداد 100%😂 إنه يقابلو خلقة بعض مما تصبح لحدي ما تمسي..
بالله التقول الواحد قادر يستحمل روحو 🌚 !!
ما تعرسوا سااي عشان تجو تندمو بعدين..
خليكم بايرين فرحانين بروحكم لحدي ما يجي الطرف الهدى ،الرضى، التقى ،النقي
ويا حبذا لو كان تقيل ما بتشلب ولا بشلبوه 💃😂

هذا وأقول قولي هذا وأستغفر الله لي ولكم 🚶
#Ryan_adil🌸

في واحدة شفاتية أسمها ستايسي آبرامز..
هي تقريباً أول حاكمة يتم انتخابها "بالإجماع" -ودي حاجة نادرة الحدوث- لواحدة من أكبر الولايات في أمريكا..
Despite being black !
بتذكر قبل فترة كنتا زهجانة ومحبطة جداً فقررتا أفتح برنامج Ted ..
وأثناء تصفحي شدّاني الريفيو عنها "أرجع أقرأ السطرين الفوق "..
لقيت روحي بفتح الفيديو وحالة من الإنصات التام أعترتني..
أتكلمت عن معاناتها ومعاناة أهلها والفقر المدقع العايشة فيه،عن خطورة الحي..ألخ
قالت إنه أبويّها بحبّو العلم وكل مُبدع في حقله بس بسبب الracism المتفشي الوقت داك هم كانو في الحضيض !
ستايسي تشربّت حب العلم من والدينها وأثبتت الحاجة دي بأنها جات الأولى على المقاطعة اللي هي فيها..
ك Tradition دايماً أوائل المقاطعات بيتم تكريمهم وجمعهم في بيت الحاكم !
بتحكي عن فرحتها بأنها ح تقابل الحاكم شخصياً خاصةً أنها منبهرة بالوضع المعيشي البتعيشو الطبقة دي..
جاء اليوم الموعود ولبست هي وأهلها الفخورين بيها للغاية لبيت الحاكم، الحارس شافهم نازلين من المواصلات العامة بينما كل المتفوقين المعاها من باقي المقاطعات جايين راكبين الحديد الما خمج ولونهم أبيض ..
ستايسي وأهلها تم توقيفهم حسب الfeedback بتاعت الحارس أنه ديل بلاك وكمان جايين بمواصلات !
فاا أكيد وإستحالة يدخلهم..
بالرغم من أنه لو كان كلفّ نفسه وعاين للستة الvaledictorian العنده مؤكد ح يلقي أسمها ضمن الضيوف المدعوين !
بس لا !!
رفضَ رفضّ قاطع يدخلهم..
الا بعد تحانيس أبوها إنه على الأقل شوف اللستة القدامك !
بعد شد وجذب شاف اللستة ولقي أسمها موجود ودخلهم..
دخلهم بعد ما هي فقدت شغفها وإنبهارها..
بعد ما فقدت كرامتها ومعاملتها ك إنسان..
بعد ما مسّخ عليها آي شيء !
منها طوالي أخدت عهد على نفسها بأنه نفس الحارس ده ح يفتح ليها البوابة ويحترمها غصباً عنه..
ح تنتزع حقوقها وإحترامها من الكُل ..
وقد كان 🌸✌
ستايسي عندها مقولة جميلة جداً ،أنه :
Be aggressive about what your ambition !
Do not allow setbacks to set YOU back
-stacey abrams
The first black woman to ever become the nominee for governor in the history of the United States of America for a major party.
حالياً يا جماعة الambition بتاعنا هو إنه الحكومة دي #تسقط_بس ✌..
فاا نحنا ما دام هدفنا واضح ما ح نلتفت لأي زول بحبطنا ولا ينقص من أثر ثورتنا ، ما ننتظر محمد وأحمد يطلعو ونحنا متكلين في البيت حارسينهم ح يعملو شنو ؟!
نطلع كلنا..
نطلع من آي حتة..
نحنا الثورة والثوار..
الثورة ما فرض عين إذا أداها البعض سقطت عن الآخرين !
الثورة فرض علينا كلنا..
فرداً فرداً..
وكل مُيسر لما خلق له ..
وعوهم في المواصلات ،في المستشفى ،في الصيدلية، الجمبة ،المطاعم،أملو الشوارع بالجرافيك عن الثورة ،صور الشهداء ،وزعو مناشير بيضاء ان شاء الله ،رسلو في قروبات الواتساب بتاعت العيلة 🌚..
المهم رشو الناس دي بالحاجات الفوق دي لمن تقول بس !
لازم نتوحد..
لانه قوتنا في وحدتنا..
وقوتنا في حبنا للبلد دي ما استطعنا سبيلا 💙
#موكب7نوفمبر..
#موكب6نوفمبر..
#Ryan_adil

أنني ها هنا..
أقف في هذه الأرض المرويّة بدماء الشهداء بعد 20 عاماً..
أصبحنا قبلة لمشارق الأرض و مغاربها..
نحن الآن الدولة الأولى فى تصدير الصمغ العربي ..
مشروع الجزيرة قد درّ على البلاد خيرات طائلة بعد أن أعدنا تفعيله ،لقد أكتفينا ذاتياً من محاصيل كثيرة كانت قد أرهقت اقتصادنا فيما مضى ..
والصناعة يا صديقي !
أصبحت المنتوجات السودانية هى الأفضل من حيث الجودة والأسعار..
لقد أصبحنا دولة عظمى يا صاحبي..
أترى هذا الطريق -يشير إلى شارع المعرض /بُري- وهذه الوفود الآتية من كل حدب وصوب لمعرض الكتاب !
هذا الطريق قد شهّد عظمة الثورة بكل تفاصيلها..
#إنتفاضة_ديسمبر_المجيدة..
هُنا شُيع العم مُعاوية في موكب مهيب بعد إستشهاده على يد مرتزقة النظام الغاشم..
-يتنادي الى مسمعه من البعيد -
أوليس العم مُعاوية هو من آوي الفتيات في منزله وحماهم من بطش العسكر مُضحياً بدمه في سبيل ذلك ؟!
يٌجيب :
نعم يا إبنتى ،إنه هو ..
-وهناك يا عمّ حيث مات الطبيب "بابكر" أليس كذلك ؟
يتنهد ومن ثم يجيب قائلاً :
نعم هناك أستشهد من كان سيصير أعظم جراح قلب على الإطلاق ..
لا زلت أتذكر كيف قُتل وكيف أن حكومة العسكر قد ظنت أن حقه سيضيع هباء منثوراً ..
لم يعلمو أن نهايتهم قد أوشكت !
كانو يعدون الأكاذيب ،يلفقون ويخرجون بها علينا مجبرين إيانا ان نصدق تفاهاتهم ..
حكومة العسكر يا بنتّي قد قتلت الناس وهم عُزل ، انتهكت الدم وأستحلته ، قتلت المعلم والطبيب والمهندس بدم بارد..
أضاعت شباباً كان من الممكن أن يكونوا الأفضل على الإطلاق ..
حكومة العسكر يا بنتّي قد إستباحت العِرّض وانتهكت حٌرمة البيوت..
لا زلت أتذكر كما اللحظة!
قبل "أسبوع فقط" من سقوط حكم العسكر كانو يدخلون البيوت منتهكين لسترها مُعتقلين لخيّرة شبابها..
قد أصيبو بالهلع من كل ما مؤثر للحراك الكائن آنذاك ، لم يوفرو أحداً..
ظنو بذلك أنهم قد أخافو الناس وأخمدو الثورة !!
متناسين أن الثورة فكرة وليست شخصاً بعينه ،والفكرة لا تموت يا بُنيتي..
بل أن الفكرة تحيا وتُنير كل ما هو مُظلم..
في ذلك الخميس الموافق للواحد والعشرون من فبراير خرج الملايين للشوارع..
الملايين..
خرجوا في موكب كان الأعظم على الإطلاق..
خرجوا منددين بنظام العسكر مُرددين لشتي الشعارات الرافضة لحكمهم..
كنا كالجسد الواحد..
رجالاً ونساء وشيوخاً وأطفالاً..
كانت حناجرنا كالجبال في جبروتها تصدح بمختلف السيموفنيات تتخللها اهازيج وزغاريد النساء عند إطلاق الغاز المسيل للدموع..
كان يوماً هو الأطول على الإطلاق..
كان مختلفاً في تفاصيل كثيرة عن سابقاتهِ..
لم ندرِ ما الذي حدث..
كأن الله قد أرسل لنا جنوداً من السماء يشدون من إزرنا
كان يوماً مُهيباً بحق..
لم نتراجع ككل مرة ،واجهنا أتباع النظام عُزل..
واجهناهم بحناجرنا المليئة بالهتاف فقط لا غير ..

كنا نردد من غير كلل وملل..

حرية ، سلام ،عدالة..
الثورة خيار الشعب ✌
وقد إنتصرت إرادة الأمة

#Ryan_adil

بناءً على أنه فى ناس مصابة بداء الإكتئاب ،اليأس ،القنوط والإحباط والحاجة النيجاتف دي ..
مبدئياً كده من حقك تزعل وتُحبط وتعيش حزنك بكامل تفاصيله ما من حق زول يتحشّر فى حزنك ده أو يقلل منه ..
أبداً..
أبداً..
ياخ إن شاء تبكي عشان الكهرباء قطعت 😤
فا المهم يخوانا بعد إستدراكك إنك محبط وقافلة معاك ..
أمشي بعيد عن أي زول..
ناس بيتكم زاتو..
وإستأنس بالله ولا سواه..
الأنس ده ما إلا قيام ليل وتقرأ قرآن سبعطاشر جزء بالمناسبة !
ممكن يكون بأنك تكون راقد فى سريرك ،مُطفي أنوارك ومبحلق فى السماء..
ما يشترط إنك تتكلم زاتو !
ولو أنه الكلام بريحك شديد :))
أشكي ليهو من آي حاجة مزعلاك ، من دعواتك البتدعي بيها سنين عددا وما أُستٌجيبتَ ، من الدنيا المملطشاك محل ما تقبّل ، من الشيتات الما قادر تقراها ، موضوع العرس المكرهنك بيهو ..ألخ
أطلب منه الإعانة ، وألحّ عليه بالدعوات ..
اييييك..
الالحاح ده كمان كوم براهو ..
والكابشر التحت ده أفضل تعريف ليهو حقيقةً يعنى 💙

للتذكير يعني ..
ده كله طبعاً ممكن يحصل وأنتا في رقدتك دي 😅..

قلبك ده خليهو واثق تماماً وبلا شك أنه ربنا أكرم وأحن من أنه يشوف خاطرك مكسور..
خليهو متيقن أنه ربنا ده ح يستجيب ليك وح يجبرك جبر يتعجب له الله السموات والأرض..
وخلونا نتفق على نقطة واحدة واللي هي تنص على أنه :

"لا يشترط أن تكون في حالة طهرانية ملائكية -بمعنى إنه صلاحك ك عبد ما شرط عشان يستجيب ليك- فالله يحب قدومك إليه ولو حبواً "..

هل فى أجمل وأكرم من كده يا جدعان ؟!
ونختم الحاجة دي باليقين فى الدعاء 💙
بمعنى إنك تدعي ومتأكد أنه دعوتك ح تستجاب بغض النظر عن صلاحك ك عبد..

قالت لي :
يوم عرسهم أعترف ليها بأنه يكن لها من الحُب أكتر من 8 سنة بالرغم من أنه لا لمح لا فتح خشمه لا بتاع 😹
"انا هنا اتخلعت خلعة بتاع التاتشر القام جاري في بري داك"
8 سنة وما كشكر ليك سااااي !!
طيب ضمن كيف إنك ح يجي بعد ال 8 سنة دي ويلقاك لسه منتظراه !
-خاصة أنها ذات خلق ودين وكاملة ومكملة اللهم بارك 💙-
إجابته كانت :
"الدعاء " 🌸
كان بدعي بيها 8 سنة لا كلّ لا ملّ ، وزولتي بهناك خلال الفترة دي خُطاب من كل حدب وصوب وهي شغالة ترفض بلا سبب 😹
فاا بس يخوانا أدعو..
وإتذكرو دايماً وأبداً..
اي حاجة بتحصل ليك فهى فى حدود تحملك وإن تجرسنا فى البداية ..
"الله يختبر صبرك فى حدود تحملك ثم يُحدث بعد ذلك أمّراً"
#Ryan_adil

لا زلت أذكر أول لقاءٍ لنا..كانت أُولى أيام الاعتصام ..
اعتصام الشعب أمام القيادة العامة لقوات الشعب المُسلحة !
السادس من أبريل /نيسان
لن أنسى ذلك اليوم ما حييت..
لحظات خوف ممزوجة بلذة الشجاعة والعزم على تحرير بلدنا الحبيب..
دقات قلوب وصلت عنان السماء وهى متوجهة من كل حدب وصوب لتجعل المليونية واقعاً معاشاً..
كنت ورفيقاتي نجلس في المشفي بانتظار ساعة الصفر، نتلو القرآن ،نبتهل لله وندعوه أن يبلغنا النصر ويجعل السادس من أبريل هي سدرة منتهانا !
اقتربت الواحدة بتوقيت الثورة ومع كل ثانيةِ تمر ..
كانت أرواحنا تسمو وترتفع في مناجاة خالصة لله تعالى..
تمازحنا كثيراً بأن من سينجو منا هو من سيطلع أهالينا على ما سيحدث لنا ..
وتوكلنا وخرجنا..
كان عدد الناس كبيراً جداً ، كأنما الشعب كله قد قرر الخروج للشارع لحظتها..
يتقدم الحشد شابين فتيين يحملان علم السودان..
كانوا يرددون الشعار الأعظم على الإطلاق :
"حرية.. سلام.. عدالة والثورة خيار الشعب "
تعرضنا للضرب واستنشقنا الغاز المسيل للدموع وأُعتقل بعضنا..
ظننت أنها النهاية كما كل مرة..
سنتفرق كما في كل المواكب !
ولكن لله شأن آخر..
لا أعرف كيف ومن أين أتّوا !
كان عددهم كبيراً للغاية،كانوا يهتفون بكل القوة التى يملكون..
كيف لا وهم أهالي منطقة بُري العظيمة
اندمجنا معهم وظللنا نهتف في وجه العسكر والطغيان..
يتبع
#Ryan_adil

هااي..
فى واحدة من أسمح الTedtalk فى واحد أسمه Lee Thomas هو مقدم برامج مشهور جداً فا وهو فى أوج نجاحه أُصيب بي مرض مناعي أسمه "vitiligo" ..
المرض ده بسبب فقدان الجلد-على مناطق متفرقة- لجزء كبير جداً من ال pigment..
فا بحكي عن صراعاته الخاضها بعد الإصابة بالمرض وانتشاره ، زي وظيفته البحبها جداً والح يفقدها بسبب مظهره الما عنده فيه دخل..
الناس البعاينو ليهو محل ما يمشي سواء شفقة ،خوف من العدوى أو تقزز من مظهره الما طبيعي ده ..
المهم هو أُصيب بالاكتئاب عديل بسبب إنه شايف ما بستحق يعيش زاتو ، وأنه دي the end of his life
قال كان اجرسف جداً وأنعزل حتى من أقرب الناس ليهو رغماً عن محاولاتهم أنه يقربو منه ويساندوه..
وقال القشة القصمت آي أمل فى أنه يطلع من الدبرشن الضاربه ده هو كان طفلة عمر سنتين حاول يساعدها فا شافته بمظهره ده ف "هلعت" وجرت منه على حد قوله..
التصرف الغير مقصود من الطفلة دي ناحية توماس أورثه ألماً عظيماً ودمر نفسيته تماماً فأعتزل الدنيا بين جدران بيته !
بعدها بفترة كبيرة قرر يمشى السوبر ماركت يشترى..
Guess what!
لقى طفلة برضو حوالي سنتين بتعاين ليه وهى مستغربة جداً "ما خايفة بتاتاً "..
نزلت من أمها ومشت عليه وهى مبتسمة فنزل ليها تحت على ركبتيه ، الشافعة مدت يدها ومررتها على وشه مُبدية أسفها على ما أصابه ..
الموقف ده كان بالنسبة لي توماس هو سبب كافي أنه يحب نفسه من تاني ويحس أنه مرغوب ويواجه العالم من غير رتوشات أو آي ايفكت عشان يخفى تصبغات جلده..

-آوغي في فيلم ذا وندر هو طفل لذيذ جداً و sarcastic وظريف ومضحك جداً بس كان "مُشوه" وقبيح بمعاييرنا بتاعت الجمال دي..
وهو بقا مؤمن دييب إنسايد أنه هو قبيح وما بستحق أنه الناس تحبه ،كان شايف أنه ما بستحق يمشى المدرسة ويعيش حياته زي الأطفال الباقين ، حاصر تواجده فى أهله بس رغماً عن أنهم مُتقبلين شكله وبحبوه !
آوغي حتى فى تواجده معاهم بكون لابس "خوذة" اليوم كله ..
وأصعب قرار بالنسبة ليه أنه كان يمشى المدرسة وسط الأطفال الح يتنمرو عليه ويخافو منه أو على أحسن الفروض يشفقوا عليه ..
آوغي مر بظروف قاسية شديد وأنكسر مرة واتنين وتلاتة عشان حاجة ما ليه يد فيها..
"مظهره"..
زي ليي توماس بالضبط !
الاتنين كانوا داخلين معارك مع روحهم في المقام الأول ..

"عدم إستحقاقية الحب "

وعشان ينجحوا في المعركة دي كان لازم يتصالحو مع حقيقة واحدة ، لخصتها جوليا روبرتس لما آوغي طالع المسرح يستلم جائزة أفضل طالب محبوب وببيلور فى المدرسة ❤
And I quote :
"أنت تستحق أن يُحبك أحدهم بكل قلبه مُتباهياً بك كأنك كُل إنتصاراته ، إن ينظر لك أحدهم كأنك مُعجزة تحققت بعد طول دُعاء "..

العاوزة أقوله أنه نحنا كلنا عندنا تشوه أو نقص في حاجة
"نقص معنوي كان أو ظاهرياً" ، بس ده ما بعني أنه نلطم ونركز مع العيب ده ونخلي التفاصيل الكتيرة شديد السمحة فينا ..
لازم نتصالح مع حقيقة أنه نحنا ما بيرفكت ولا عمرنا ح نكون بيرفكت ..
بس رغماً عن كده نحنا بنستحق أننا نتحب بشخصياتنا المليانة تناقض دي ، بصوتنا العالي لمن نضحك ، والشين شديد لمن نغنى 😂
بنستحق ناس تحبنا بكل تفاصيلنا العويرة من غير ما نجملها وندسها..
بنستحق ناس بتكمل الناقص فينا بحبهم لينا وتعمى عن عيوبنا المليانيين بيها دي ، بنستحق ناس تقدّر قيمتنا وتشوفنا أعظم إنتصاراتها..
ناس نتخلفّ معاهم للأبد ويضحكوا فى نكاتنا العويرة من قلبهم 😂
غير كده الناس ما تستهلك روحها وطاقتها ومشاعرها مع إنسان أو ناس أنت فى آخر لستة أولوياتهم ..
ما عارفين تفاصيلك وما مهتمين يعرفوها زاتو !
ناس بتذكرك بعيوبك الما عندك فيها يد وبتنتقدك باستمرار وتكسر مجاديفك ..
يخوانا أسى أنا زولة ما عندي أخلاق 😂
وحاولت أغير الحاجة دي وفشلتا ، أها أكسر رقبتي يعنى 😏
#فاااا_المهم..
ما تستهلكو روحكم مع ناس رمادية يا بشر..
ناس بعد كل موقف بخلوك محتار هل هم بحبوك ولا لأ !
وما تخاف تخسرهم..
عشان ديل خسرانهم كسب لذاتك 🌹
الحياة قصيرة يا جماعة..

"المجد للشهداء فى عليائهم "
بااي
#Ryan_adil..

فى فئة بشرية محددة بتهتم بالتفاصيل البسيطة شديد يا جماعة !
غصباً عنهم بلقو روحهم مركزين فى حاجات قد تكون تافهة شديد بالنسبة لينا..
لكن it's mean alot for them ، وكلمة "alot" دي معناها شغلت القلب بإتِساعه ..
فا لو صادفتوهم عليكم الله رفقاً بيهم شديد وبقلوبهم الهشة دي ..
قالت :
ما عارفة متين حبيته ؟
هل أنا أساساً حبيته ولا ده استلطاف وتعود ؟!
هو على فكرة نهائي ما فارس أحلامي ولا بشبهو فى حاجة..
هو صحبي بس !
نحنا أصحاب وما ح نكون غير كده..

"عَدّلت من جلستها وباتت تنظر فى اللا شئ وهى تردد عبارتها الأخيرة "
وبحكمة عجوز في السبعين قُلت ونظرة ماكرة تعلو وجهى :
"أيُحبك كما تحبينه، أم أنه -ويا لحسرتي- من طرف واحد "؟!
ثم غمزت بعيني وضحكت حتى بانت جذوعي..
من المستحيل أن أنسى نظرة البلاهة التى ارتسمت على وجهها عندما واجهتها بما تشعر به وتُنكره !
أنه الحُب يا صغيرة ولا شئ غيره..
لقد استطاع أحدهم أخيراً مسح سنينك العُجاف وإبدالها بما يقيم قلبك قبل السقوط ♥️
أنه الحب يا ابنتى ..
أخبريني عن من سرق قلبك وجعلك هائمة به ،حدثيني عنه أرجوكِ كأنك تحدثين حالكِ فأنا بئرك العميق 😉..

=هل أنا أحبه ؟
أهذا هو الحب ؟!
هل هذا يشبه الحب ؟

أخبريني عنه وسأفتي قلبك المسكين يا بنيتي..

= هو..
لا أدري..
هو عادي جداً ،هو ليس فارس أحلامي الذى رسمته فى خيالي وكان يزروني كل ليلة !
لم يكن حنوناً كعملاق شمس الأصيل وليس تقياً كمن تكتب عنه ياسمين وقطعاً ليس ك أسمر سمّر..
هو مختلف تماماً !
مختلف بأنه عادي جداً..
لا أعلم منذ متى أصبح "الشاي بالهبهان " هو مشروبي المفضل !
ومنذ متى كانت أغنية "قطار الشوق " هى مفضلتي أيضاً..

=هل يحبهما ؟
ينعقد حاجبيها فى دهشة ثم تصمت قليلاً وتهرب من الإجابة قائلة :
لكن كلانا يتحين اى فرصة لكي نبدأ شجاراً ، أنه يغيظني على الدوام ، أنه يتفنن في اغاظتي بكل الأساليب الممكنة..
حتى أنه يغنى لي بصوته البشع للغاية أغنية تعبر عن كِبر حجم خدودي !
أنه يعايرني بها..

اوه..صوته بشع للغاية عندما يغنى لو تعلمين ، بالرغم من ذلك يصفني أنا ببشاعة صوتي وعلوّه..
دائماً ما يقول لي :
هذه أول مرة أقابل فيها فتاة بهذا العلو في الصوت!
ما الذى يوجد فى حنجرتك يا هذه !
ألا تصمتين ل لحظة ، يا إلهي أنها كالراديو لا تصمت أبداً ..

أنه أسخف إنسان قابلته فى الحياة بلا شك ، ومن المستحيل أن أقع في حبه !

رفعت رأسها لتجدني أضحك ملء فمي وما هو الحب غير ذلك ؟!
أنه يحبك أيضاً يا ساذجة..

"هزت رأسها رافضةً تصديق ما قلت ثم اعقبت"..
إنه لا يحبني يا جدتي ، أنتي لا تعرفينه.. أنه بارد وصلب كالفولاذ ..
-وكانت نظرات الحسرة تطل من على عينيها اللوزتين الجميلتين - اعقبت :
وأنا أيضاً لا أحبه بالتأكيد !

صمت برهة ثم قُلت :
ماذا فعل ليجعلك حزينة هكذا ؟
أجابت ونفس النظرة مرتسمة على وجهها..
لم يفعل شئ ، لم يفعل شئ يا جدتي !
هو أبتعد
فقط أبتعد..
وأنا لم أفعل شيئاً ليبتعد ، لم يخبرني بشيء ، لم يبال بي لما يزيد عن الأربعة أيام !
لم يتصل بي أو يرسل لي أبداً أي شيء..
ألا استحق ؟

أنتي مغرمة به يا صغيرة!
وأنتي تبكينه شوقاً ..

يتعالى صوت الهاتف معلناً تلقيها اتصالاً سرعان ما خفق قلبها عند رؤية هوية المتصل ..
لم تُجب..
اعقبها صفير آخر لرسالة هرعت لفتحها ..
قرأتها وابتسمت..
وجدت جدتها تربت على كتفها وتقول :
العنى عنادكِ يا بنتي..
إنه الحب..
والحب هو الإيمان ، هو الإيمان فلا تكفري به ♥️..

كان مكتوباً فى الرسالة مقطعها المفضل :
"يا قطار الشوق حبيبنا هناك راجينا ،متين نحضن عويناته ولمتين يسرع يحيينا "..
#Ryan_adil

قبل فتره كنت شغاله ف الصيدليه وحقيقي ضايقه بي الواسعه..
فشغاله من غير نفِس وبي زهج كده ، واليوم حلفّ كان ينتهي !
أها وأنا فى غمره حزني داك جاء داخل بيشن كبيييير ومعاه بتو ..
كانو لطيفين شديد وقعدو يهظرو مع بعض قدامي ف فكيت وشي ونسيت العياء العندي وبقيت منتبهه معاهم 😅.
اشتروا علاجات كتيره للغايه وبعد ما جو مارقين عمو وقف بتو وقال ليها أمك عاوزه شنو كانت ؟
قالت ليهو ما عارفة يا أبوي ورح ورح نجيبه ليها مره تانيه "عشان الصيدليه فجأه اتملت شديد وحست أنها وأبوها أخرّو الباقين"..
فقال ليها لا لا وأصر أنه ما يمشي من غير الحاجه الرسلوه ليها ..

في سري قلتا معناها الزوله دي هارشه عمك ده لمن بهناك 😂..
فأستأذنته أمشي باقي البيشن وارجع ليهو وده الحصل..
شفته شال التلفون واتصل على زوجته كم مرة لحدي ما ردت !
ولمن ردت سألها بمنتهي اللطافه عاوزه شنو ؟
لا كورك فيها لا قال ليها جادعه التلفون ده وين ؟ " كما العاده يعنى فى موقف زي ده "
وانا لسه ما فقتّ من استغرابي ده ، مدّ لي يده بالتلفون وقال لي هاك أتكلمي معاها خليها توريك عاوزه شنو ؟
في العاده أنا ما بنتبه لشاشه التلفون ولت بركز..
بس للأسف الشديد ركزتا ونفسنتا 😂
يخوانا مسميها في تلفونه
"ابتسامه أيامي "♥️
العاوزه اقوله أنه نحنا ك نساء فى تفاصيل بسيطه شديد بتتعمل بتفرق معانا جداً وبتطير بينا السماء السابع ، بتخلينا نفرهد ونفرح
بيها ونتباهي بيها..
وتصرفات بسيطه برضو قادرة تعكرنا وتخرب أيامنا كلها !
وعاوزه أقول برضو..
أنه نحنا بنستحق زول يحبنا بكل تفاصيلنا وإن بلغنا من العمر عتياً ، ولو كان التعبير عن الحب ده أسمي المسجلني بيهو في تلفونك ♥️
#Ryan_adil