ملينه ربهم ذبح
و ربنا إبتسامة باب
عالمسطر من الصبح
يوزع خبز وثياب

ربنا إعله گد ضحكته
يستنكر الاحزاب !!
و ربهم لگيته امس
يم مجلس النواب !!

ربهم يبوگ الجفن
ويكفر المكحلة
وربنا اليفز الصبح
ويغني للسنبلة

ربهم ملثم حقد
و ينگط سفالة وچذب
وربنا العشگ والعشگ !!
ما ينتمي لكل حزب


#باسم_الخاقاني
#ثورة_اكتوبر

@alshoara

هذا ابو التك تك وهاي افعاله
بهذا ينهاب الشعب وامثاله
هذا صار اسعافنا بطك الرصاص
والمصَوب حضن جرحه وشاله

هذا ابو الخبزة النظيفة الحاربوه
وما نهب خير الوطن من فرهدوه
هذا اسد بالساحة ابد ماعاف اخوه
هذا من طاح الشعب تجاله

هذا ابو الالفين بس بالاسم شاب
ابن ويلات التجاوز و العذاب
اهل الارتال ومقرات الاحزاب
تروح الف فدوة لَرقم نعاله

#عقيل_العرد
#ثورة_اكتوبر
@alshoara

( شگد موت نگّط عالگلب ) ، والناس صارت غربة

يومية اصادفلي نهر ، مامش ولاية بدربه

ولكم أدورلي وطن ، ما بيه رصاصة بگلبه

عندي حبيبة بلا جنح ملّت طواري التربة

ويّاها اليّه شچم جرح ، عين وتراچي ورگبة

وعدنا نبي ، بس من دمع ، كلما نضيع نشربه

ولكم أريدن لي وطن ما بيه سياسة وأحزاب

ما بيه حبيبة من الصبح تفتح شعرها بسرداب

ولكم اريدن لي وطن ...

بيه غرفة من ماي الضحك ما بيها مفتاح وباب

دلّوني وين ألگى الشعر ، شو كلها تكتب نوّاب

وين الگى شباچ الصبح ، ليل القصايد چذاب



#عبد_الوهاب_الحمداني
#ثورة_اكتوبر
@alshoara