جل الظلام وطفـــت   نيران الاخيام
ولو طر علينه الصبح   ممشانه للشام
الليله بدمعنه انبات   ما عدنه بس ساعات
وممشانا للشام
................
هنانه الحسرة بس والنوح ما مسموح
هنانه الروح عافت عالترايب روح
يهالناس الاخوها أعلى الترب مذبوح
لو عن البجي يمنعوها وين تروح

حيرة بيتامى اخوتي  وحيرة بهالمصاب
وباجر ضعنه الصبح   تحديه الاجناب
نسهر على الآهات    ما هيه بس ساعات
وممشانا للشام
.........
سواد الليل من هوّد ادورك جيت
خويه اشكد عليك بكربله افتريت
على عطر أمنه جيت اتخطى واندليت
گطعت انياط گلبي اعليك من ناديت

أمنين الزمك يمن     كل جسمك جروح
لو بيدي يمك اضل    يبن امي ما اروح
گلبي أعلى فگدك مات    ما هنه بس ساعات
وممشانا للشام
.............
ادور عالنهر واتنشگ الهم موت
اجه بروحي هظم ضل بالگلب مكبوت
اعليك بكل شبر خليت دمعة وصوت
يعباس الاخوها يموت كون تموت

الدنيه ظلمه وحرت    وين امشي والكاك
اعثر واطيحن كمت    ذاك النهر ذاك
كلتني هالخطوات     ما هن بس ساعات
وممشانا للشام
.............
خوف وليل جل واعلى الحرم غَشّه
وصراخ ايتام اخوتي تسكته الدهشه
لا تردون حالي بليلة الوحشة
بس هالليلة يمكم والصبح ممشه

شما طولت تنتهي   ما هيه ليلة
صارت صدگ يخوتي   جابوا هزيله
يخواني مسبيات   ما عدنه بس ساعات
وممشانا للشام
............
على كبر الدهر وامعاگب اسنينه
محد غيري ضاگت دنيته بعينه
بأول خطوة للناگة شسدى اعلينه
نمشي وعينه اعليكم يهالينه

ودعتك أعلى الهزل    من مرن اعليك
ما ندري خويه نرد      لو ما نرد ليك
يمكم ضعنكم فات      ما هنه بس ساعات
وممشانا للشام
...............

كرار المحمداوي

هود الجيش اوطفت نار المخيم
اوكلشي ساكت والضلام امسه يعم
اهنانه زينب عازت الخوان گمره
غرّبت اوحايره ابياهي تلم
سكنه ضاعت طفله تبجي ذاك عمي
تمشي المن حايره اخت الزلم
ابها يعمه اتموت زينب الف موته
زلمه صار امشجل احزامه اليتم
گمر طايح شمس مطفيه ضواهه
ع الارض مطروح يمهم جم نجم
ها يصبرج جم نبي مذبوح نحره
ياجبل يحمل مصابج ينهدم
شبجت اجفوف العقيله ابلايه راي
كلهه عطشانه اوتون وتريد ماي
راحت اتسكت رقيه من جرحهه
صوت من النحر يندهه تعاي
حيره بالسجاد حارت يامصيبه
الرباب اتصيح يوجعني گفاي
اخ ياحجيج صفه وين الجفونه
كلشي رايح مامش المسموع جاي
هاي حريت زينب ابيوم الطفوف
كلشي ميت بيهه من طاحت جفوف
جلمت المهيوبه زينب فارگتهه
ابيوم صار اعله النهر ذاك الخسوف
-----------------------
علي سليم الحسناوي

حادي النوگ يشتمني ويلمجان
ابگلبي اثر طگاته يلمجان
الشمر بالصوط من يضرب يلمجان
اويطشر ابرجعته اسكينه ورقيه





الليالي وياك ماضن بعد يردان
اهواي اسيوف من النحر يرادن)(شربن)
فوگ الضيم وضرب الصوط يردان
توج تحرگ جفوف الهاشميه

علي سليم الحسناوي

گضت بنهار عاشر طعنت السيف
وامرامه السهام اعله اليرضعون

واجتنه مرحلة طعنات الاحساس
اشد من جرح خنصر بي يگطعون

جراحات الستر ماتنزف ادموم
يتگاطر خـدرنه مـن ينـظـرون

چان اول براز بحرگ الاخيام
اوّل طعنه من عين اليحرگون

نزلت مني دمعه بطول عباس
ابمعركة الخـدر ويه اليشوفون

خسرنه هواي أول هدّة للگوم
اذن طفله وتراچـي امن اليسلبون

وامراكض حـرم كلـفها عثرات
واصوات انولينه ماليه الكون

ولحگتنه البچينه دموع رايـات
معركة السياط وحيل الامتون

حرمه وهمّه كثره وركضت ايتام
اجمع چم طفل عشره اليطشرون

وانطينه خساير جـوه الاخـيول
اشبقينه وبالبـقى ضلـوا يعذبون

قاومنه وخسرنه اصواتنه اب لااا
بمعركة الچفوف اويه اليچتفون

واجتني ليلة الوحشه ومعانات
ومئآسي خلصتها مادري شلـون

الغربه والحراسه وخوف والليل
ويا حيرة اطـفال الـما يسكتون

گضت والفجر گعدونه بالاسياط
شَمر اطفـال عالهـزّل يصَـعَدون

مشينه وروس اخوتي كاسره فياي
عـلى اوجـوه اليتامه الـما ينامـون

مشينه اليوم. باچر مادري الوين؟
واليا مجلس بزيـنب يدخـلـون

هذا اول طريجي الجايني هواي
واكتب ذكرياتي جوه الاجفون

اردلچ كربله واحچي التفاصيل
عله گبور اخوِتي تسولفها لعيون

گضت ظهريه العاشر/ مراكض
وجدمي قبل هالساعه/مراكض
بثوبي النار وبصاية/مره كض
اطفّي بثوبها واتطفي بيه

ثائر الربيعي

الأميرة نامت وصبحت اسيرة..
يا زمن دار اعله اخت شيخ العشيرة..
هيه وبلحضه جزت عزهه وخدرهه..
وع السفر مابيهه الحرمة الجبيرة..

سار...
والضعن من سار..
والكلب محتار...
لا علم يحميه..
والله يدري شصار..

اليل...
من يجلجل ليل..
تفر عليهه الخيل...
حرملة والاصياط..
صوطه ياخذ حيل...

كسرو علم غربو ضعن
بم الخدر دار الزمن
اليل اليمر ابلا كمر
يجوي العلاوي لو بجن
ــــــــــــــــــــ ــــــــــــــــــــ ــــــــــــــــــــ
يسرو عفة علي وعمت الهواشم..
اولا سئل كافلهه ضل عالغبرة نايم..
والدمع من ينزل ايعطش متنهه..
وتروة من صوط السبي سمعو يعالم

ليش...
الا هيه ليش...
زينب بنص جيش..
الخدر والشام..
العفه لا متعيش...

نوك..
حرمة فوك النوك...
والستر محروك...
الما تعرف الباب...
طبت ابنص سوك..

بسوك العدة طب الخدر
وزينب تلوج اعله الكمر
شبعت شماته بت علي
الماعدهه اخو تشبع قهر..
ــــــــــــــــــــ ــــــــــــــــــــ ــــــــــــــــــــ
مانست كل الدرب تنطر اهلهه
كل دقيقة اتضن كمرهه يفزع الهه
خدر ال الله كطع درب الصحاري
هيه حيرة وزينب الحيرة شيحلهه

نار...
بيهه شبت نار..
والكلب محتار..
بالدرب يا ناس..
ضاعو الهه زغار..

صوت...
الهه مامش صوت..
والسبي تابوت..
والعطش والحر...
بالعقيلة موت..

حر الشمس  فت الكلب.
وعالهزله اشطوله الدرب..
مايكضي درب البي صياط..
ما ينحمل درب الغرب...
ــــــــــــــــــــ ــــــــــــــــــــ ــــــــــــــــــــ
والدمع يلجم اديهه من تهمله
من الحبل مجروحه وبخاطرهه عله
الما عرف عباس طول اخته الاميرة
بت علي اتماشي زلم ماهيه سهله

ضيم...
ام ستر وحجاب..
كبعاهه اتراب..
بيا وكت ياناس..
بت علي اويجناب..

خوف...
هزلة اه وخوف...
خلفتهه اطفوف..
من القهر زينب...
ما اضنهه تشوف..

موت وقهر  اه والم
يكسرهه ليل ابلا علم
اتنــــوم اليـــل  وتضل
سهرانه اخت راعي الشيم
ــــــــــــــــــــ ــــــــــــــــــــ ــــــــــــــــــــ
تعبت وتعب المشي ايورم جدمهه
تسولف المن تحجي ويهزله المهه
حته ناكتهه بجت من وگفوهه
اه يباب الساعة مو شيب هدمهه

شيب...
گباعهه الشيب...
والدمع مي غيب...
والشماته اهواي...
الشام مابي عيب...

لون...
خاطفلهه الون...
ويلي يا ام عون..
من القصر جن صوت..
زينب ايصيحون..

گل السلام اعله المشت
بديرت شماته اتغربت
وراس الكفلهه اعله الرمح
كلفه الاميرة لو بجت.
ــــــــــــــــــــ ــــــــــــــــــــ ــــــــــــــــــــ
عباس أديب المالكي...

قصائد محرم

عطشانات… ويصدن عالماي بحسرة
عطشانات… العطشان أيدور عالگطرة
عطشانات… ويركضن بشموس الصحرة
 ــــــــــــ ــــــــــــ
سراب الطف يأذيهن
سباية وحيل مابيهن
أنذبح عطشان واليهن
             ملهوفات أيدورن ماي

رقية وسكنة عطشانة
صفية تصيح تعبانة
العليل أمخشب ألسانة
               ويصبر بيهن بهداي

مــحــد ينكسر گلبة علينة
على أمر الله ياخوية شبدينة
الحادي أيبشر اعوانة بسبينة

مسبيات… ماظل أفياي ولا خيمة
مسبيات… نسوان وفرن بالهيمة
عطشانات… واليعطش بالطف شيصبرة
ــــــــــــ ــــــــــــ ــــــــــــ
نحيلات وعلى الناگة
وشمس ظهرية حراگة
الضعن صوب الغرب ساگة
                 علويات وغربة الناس

بعجل مشاهن الحادي
يطر وادي بعد وادي
يفر بسوطة وينادي
                 ماكو حسين ولا عباس

الحادي بلا رحم يضرب رقية
ويسمي زينب أمشي خارجية
ويسمع بيهة ويڰلهة ال سبية

تعبانات… مانامن صار شجم ليلة
تعبانات... اليمشي بگدهن يوگع حيلة
عطشانات… وگلوب الأيتام أمجمرة
ــــــــــــ ــــــــــــ ــــــــــــ
عطاشى والشمس تلهب
السبية بالمشي تتعب
خولة تشتكي ال زينب
              وتگلهة الماي أترجاݘ

تصبر بيهة عمتهة
انطتهة دمعة شربتهة
تلوب بحسرة شافتهة
           زينب هم عطشانة اوياݘ

زينب صبرتهة بكل وسيلة
وتگلهة عمة رحلتنة طويلة
علينة منعو الماي وسبيلة

ملهوفات… وعطشانة تواسي بعطشانة
ملهوفات… والحادي شبيه شد أويانة
عطشانات… وحسين أشفافة المتفطرة
ــــــــــــ ــــــــــــ ــــــــــــ
يبدي الماي گدامي
زغيرة وكبرت احلامي
غربة والضعن ضامي
              وبروح العطشانة النار

يشربون الفرس گبلي
اموتن والله أحسلي
الحادي بظحكتة يصدلي
                    وتشب ابدلالي النار

ليش امن الغرب محد رعانة
ينكرون النسب لْـۆ مستوانة
ولا جنهم عرب كلهم خيانة

علويات… طبينة بنص سوگ الكوفة
علويات… ومݘتوفة أتزاحم مݘتوفة
عطشانات… أعيال حسين وبنت الزهرة
ــــــــــــ ــــــــــــ ــــــــــــ
نسولف ياحزن ياهم
زينب صعبة تتشتم
الحبل حزنة ونگع بالدم
              شنسولف والضيم اشكال

على ذاك القصر فتنة
عيون الصلفة شافتنة
محد يرعة حرمتنة
             جنة بحال وهسة بحال

بخرابة بلا سگف من گعدونة
مثل حال الخوارج عاملونة
أهظمونة وشتمونة وروعونة

مرعوبات… والوادم بيهن تتشمت
مرعوبات… ماتت طفلة ابگد ماعطشت
عطشانات… ويزيد ايوگفنة بقصرة
ــــــــــــ ــــــــــــ ــــــــــــ
تمت
الْحٍمَدٍ للـّہ
خادمكم الأقل… حسين حمدان الدلفي

حبست ادموع عيني اعليك للشام
خوف اتشوفني اعيون الشماته

وأخنگ عبرتي وأدفن بالالام
حرام انچان ساعه الليل أباته

عله اظهور الهزل دارتنه الأيام
ومشونه بدرب ما ماشياته

يتفرج علينه الخاص والعام
واحنه إخيالنه ما شايفاته

تدگ اطبولها ويضرب الدمام
وسمعّونه الحچی الما سامعاته

و مرامي اعيونهم امضه من السهام
وأصبح خارجي حسين وخواته

تفز جروح بينه لو جرح نام
كل ليل الخرابه امساهراته

من بلد البلد والروس جدام
وراسك عمه اعيون امدللاته

كل خطوه بجرح ماشيت الأجناب
وكل نظرة ابسهم ترميني العيون

وكل يوم اليسر عديته بمصاب
و ما بيه جرح بمصيبتي ايهون

ريت بدال راسك راسي ينصاب
گد ما بالحجر جانوا يرامون

هلاهلهم طرب واطبول نشاب
علينه وأستحي اشجانوا يگولون

گد ما خوفنه جان اعله لحجاب
ردنه الگوم بينه بليل يمشون

دولبنه الزمان اشلون دولاب
وضعنه بالخلگ مثل اليضيعون

طلعت من الوطن وياك عاين لي اشصفه بحالي
نوب أطلع اويه الگوم من هيبتي اشيصفالي
آنا أم الخدر زينب المحد شاهد اخيالي
أطب بمجلس ابن ازياد وعين الغرب تبرالي
ركبّت الحرم كلها وعيني اعليك يالوالي
منهو اليركبني الناگة ارجابها عالي
حرمه وگطع بيه الحيل وأرد الحيل يبقالي
يا خويه الطريق ابعيد گلي اشلون بالتالي  

عزيز الفيصلي

شوط كربلائي للدفن

هاليله علي السجاد حضر يدفن ابوه حسين
يدور خنصره المكطوع ويدور عل نهر جفين
...................................
حضر للطف ابو الباقر وحده ودمعته بعينه
جسمه من المرض مهدود نحيل والله اليعينه
الله يساعد اكليبه ونايم عل ثره حسينه

اجه وشافه وذر صاير
وبصدره اثر حافر
وكف يمه وبقه حاير

وكف حاير نحل جسمه اليدفنه وياي اجيبه منين
...............................
حفر حفره لبو السجاد بحصيره وشاله من الكاع
وبقت عينه تدور الكاع يدور خنصره الي ضاع
ينادي وسفه يالتربان ادفن بيج راح اسباع

ادفن والدي وعمي
وبيج اندفن ابن امي
ما ابطل بعد همي

هليله دفن الاعزاز عليهم عيني دم تبجين
...............................
بلحد خله العزيز حسين وعلى كبره وكف صله
ويكله يا والدي وين اخوي العود واوصله
طفل بعده وعليش يموت صحت وينك يعبد الله

طفل بكماطه اثر دمه
عفته تون علي امه
دفنته بصف ابو اليمه

واهل بيدي بقيت اتراب يريت انشلت الايدين
.......................................
يا ليلى ويرمله اليوم ادفنهم بدي شبان
الاكبر ادفن وجسام هلت فوكاهم التربان
انكسر ظهري مثل الحسين صرتلهم وسف دفان

دفنت بايدي خواني
المثلهم ما يصح ثاني
زماني لوحدي خلاني

بقيت لوحدي واتمنى يلفيني يكون البين
................................................
درت صوبي على العباس وكلتله يا بطل يحنين
عليك اتسلم الحوراء يل كلك وفه يا زين
يالغالي اجيت ادفن لجن ماكو شفت جفين

جفوفك راح ادورهن
اشيلنهن واحبنهن
يعز اعليه ادفنهن

الكمر ما يندفن بالكاع كون تضوي بالكونين
.................................................
اودعكم وارد يعزاز واهل وي وينب المدمع
واوعدنك يبو الاكبر لكل ظالم ولا نركع
نردلكم لجن يحسين ابنيه ويانه ما ترجع

رقيه بيا ذنب ماتت
بخرابه تريدك وصاحت
بس راسك تره شافت

اجينه باربعينك راح تصير ازيارتك صوبين

خادمكم حسين ابو عباس الكعبي

دفن الاجساد

صعبه ادفنك ابهـاي چفيـني
وايعيني الله وشافتك عيني
ــــــــــــــــــــــــــــــــــــــــــــــ
المصيبه اتريد عمري يخلص ابنوحي
اجيت اجروح بويه اتگود بجروحي
انــــه مــتعني ادفـننك يمذبـوحي
وجمالك شفـته رايــح يابعد روحي

ريت يمك خلصت اسنيني
ــــــــــــــــــــــــــــــــــــــــــــــ
بخت كل ال هاشم نايم وعطشان
ويااا. حچايينه المطــروح علتربان
علي الســجاد يفزع ريــت يلذبلان
مااي الشفتك مــو فـزعت الدفان

من سمعتك صحت ارويني
ــــــــــــــــــــــــــــــــــــــــــــــ
مصايـــب كربلا ابگــلبي بــويه اثگال
وتنعاش المــصيبه الــبيك مــا تنـگال
ما صـــارت ولا خطـرت ابــد علـــبال
ابو الساادة ابحصيره ابگبره من ينشال

ليك ثگلت. لوعت اونيني
ــــــــــــــــــــــــــــــــــــــــــــــ
انچووه گلبـك ابخيـمه لمـن اديـره
وگبل حر الشمــس چاويتك الغيره
من ضلت ام عــون ابدونك ابحيره
والعزيزه تنهضــم والتهضم اچبيره

والمواقف. ابگلبي تاذيني
ــــــــــــــــــــــــــــــــــــــــــــــ
يبعد ابنك اشـوف امــغسلك دمك
لو مو عمتي بالكوفه أندفن يمك
الغيره الجسد روحك كلهن اتلچمك
ولا ريــدن ابحــچي ايزييد ابهمك

ريت يمك. ال يوراييني
ــــــــــــــــــــــــــــــــــــــــــــــ
ابحكمه الله الاكبر ظـل تحت عنك
ورضيعك عوضه چي ما شبع منك
هنــياله اخيي ابــگبر وابحـــضنك
ولا احمل افـــراگك وانـه اعـوفنك

اذوب روحي. ابفـرگه تدريني


علي الحميداوي الكربلائي

بالتراب ادفن الموته اجيت
بس ابويّ اتلمست صدره وبچيت
ــــــــــــــــــــــــــــــــــــــــــــــ
آه ياكسر الابو المحّد يجبره
گبره موبالگاع كون ابگلبي احفره
امن الحوافر صدره مطبوگ اعله ظهره
والرمل حار واخاف ايأذّي نحره

للجميع اگبور بالهيمه بنيت
بس ابويّ اتلمست صدره وبچيت
ــــــــــــــــــــــــــــــــــــــــــــــ
گلبي ماينطيني اهل فوگه الترايب
چنت شاب ودفنته سوّتني شايب
ابكثر ما مشتاگ اذّتني المصايب
الله يرحم كلمن امفارگ حبايب

موعليل اتمرّضت من فارگيت
بس ابويّ اتلمست صدره وبچيت
ــــــــــــــــــــــــــــــــــــــــــــــ
ياسهم يا نبله اطلعهن بديّه
شرد اجاوبهه اذا تسأل رقيّه
والطفل فاتح اگماطه اشگد خطيّه
موّتوني وصلّت الدمعه عليّه

عالخيام اتوجهت واشگد نعيت
بس ابويّ اتلمست صدره وبچيت
ــــــــــــــــــــــــــــــــــــــــــــــ
ابو الروح الترفه والرقّه الچبيره
تالي ماتالي يشيلونه ابحصيره
لا اهل لا فزعو الدفنه عشيره
عله زينب لو عله العباس اديره

استقبلت قبلة الخيمه ونويت
بس ابويّ اتلمست صدره وبچيت
ــــــــــــــــــــــــــــــــــــــــــــــ
شلته للحفره واحس اكوان شايل
وانه جســمي امن المرض ياناس ناحل
موجسد تاريخ ابوي امن المراجل
راس ماعنده وسهم يم ظهره واصل

وعالرضيع حنية الزهره انحنيت
بس ابويّ اتلمست صدره وبچيت
ــــــــــــــــــــــــــــــــــــــــــــــ
امن التراب اموذّر ابچفي واجمعه
هذا چبده وذاك يم الخوذه اصبعه
گمت اسولف والنحر يشهگ اسمعه
گمت اسولفله اعله زينب دمعه دمعه

اشگد جروح ابكربله تنزف لگيت
بس ابويّ اتلمست صدره وبچيت


محمد الجماسي

(عگيلي ليلة الدفنه)

دفان اتعنه من الكوفه
****
راح السجاد ايوســدهم
شلون ابياحاله يشاهدم
شاف حسين وجسمه موذر
واخوانه شباقي من عدهم

ضل واگف يمهم واتحير
وادموعه اعليهم مذروفه
دفان اتعنه من الكوفه
****
راح العوده ايصب المدمع
منك يابويه اشراح اجمـع
ابلا راس وفاگدلك خنصر
جـسمك شو هالكله اموزع

اتوسـد يـمـه وضل يحفر
گبره واتصب دم اچفوفه
دفان اتـعنه مـن الكـوفه
**
بچفوفه شايـل عـبد الله
من يعثر صاحاله اسم الله
وبنحره ايـشم ويــتـحـسر
سهمك خويه ابنحرك صلّى

بالخيمه من حرگو مهدك
امك تسعه اعليه واطوفه
دفان اتعنه من الكـوفه
***
راح الجاسم شافه اموذر
نايم يـمـه الـحـيد الاكـبر
ابگبر حسين ومن وسدهم
راح العمه حامي الـخـدر

اعليك اعيالك ياعم كلهم
گالـو قَبله من اتشوفه
دفان اتعنه من الكوفه
**
محتاجه اعيالك تحميها
ياعباس وتدري اشبيها
اهل الكوفه صاحو زينب
اخت العباس اميسريها

وماي الحار اعلينه صَبّو
وبحبال ايدينه مچتوفه
دفان اتعنه مـن الكوفه
*******
وسّـد كـل هاشـم وحـده
والراد ايعينه اعليهم رده
يابني اسد انتو اعـليـكم
دفن الانصار اعلي شـده

بعد الدفنه اعليهم صلى
قرآن ورتل بـحـروفه
دفان اتعنه من الكوفه
******
رد للكوفه وهدمه امترب
دافن اهله. وهـم اتغرب
متعوب هواي من لمدفن
وتناشد بي ضلت زَينَب

عن اخـوتـها ودمع اتفجر
چن شاطي ويلطم بجروفه
دفان اتـعـنه مـن الكوفه
****
عمار حسن الدراجي

مقدمه
صاحب الزمان ع ينعى جده الحسين ع

السلام على تلك النساء البارزات
السلام على تلك الوجوه اللطمات
السلام عليك ياحبيبي ياحسين
----------------------------------------
ياجدي يوميه اختنك وبدمعي اكسر خاطر
الناس تتنطر شهر يوميه بيه العاشر
عايش صور طحن الجسد موتني ذاك الحافر
اشلون داس اعله الصرح انضر محمد حاير


السلام على كل گطره سالت من دماك
السلام على من ضحه بجفوفه وحماك
السلام عليك بالحنين وبالأنين
------------------------------------------------------
بالناحيه عشتك جرح ونضر ابعيني آلامك
اشلون من طحت وشفت وادم غرب بخيامك
اشلون عمتي امن اسمعت ذاك الصدى البعضامك
من ركتك خيل العده وعالنهر طاح احزامك


السلام على الشيبات النصبغت دمه
السلام على إلبجه كل اهل السمه
السلام عليك وعلى ذاك الجبين
-------------------------------------------------
الناس تبجي من دمع وانه الدمع دم ينزل
انضر اعيالك من تطّش بذيج الصحاري التكتل
اهواي ياجدي شفت ياگلبك اشگد يحمل
مرفوع راسك ع الرمح بالكهف انت اترتل


السلام على كل طفله ضاعت بالفله
السلام على هضمك وهضم العايله
السلام عليك وعلى صبرك حسين
----------------------------------------------------
الموت عاده النه نعم وحبينه هاي العاده
بس عاده ماعدنه گبل مجتوفه عمْت الساده
السوگ ذابحني ذبح كل حيلي مني اتراده
بت خير عمتي اوبت شرف ع السبي مامعتاده


السلام على المجتوفه بحبال الزجر
السلام على المسببه من بعد الخدر
السلام على الشافت اهلهه امذبحين
-----------------------------------------------------
ابنحرك اتوسل خالقي ايعجل ضهور اعليه
وشفي إلصدور الي انجوت العاشت هضم ليليه
وبثار عبد الله الطفل. وبثار كل علويه
وحگنه ارده ابصارمي وگطع اجذور اميه


السلام عليك من گلب عاش القهر
السلام عليك مني ياشوف النضر
السلام عليك ياذبيح الودجين
---------------------------------------------
علي سليم الحسناوي

يحاجينه يدلينه يربينه العشك
بس انته لتستاهل لبابك ادك
حبيبي حبيبي
*************************
يبو صالح هاي دنيا ذبت اعليه الحمل
فرت الناعور تفتر وابد ما ترخي الحبل
دنيا ما تحنيني كلها وابد ما اطيح واذل
بس طحت لمن سمعت الحره صعدت ع الهزل

صح يدخل لريتي الهوى بس بنعش
و اوكع نده فوك النحر ليل هدعش


يالتارس كون الله شيلم الضوى
تراب اني ولبابك ياخذني الهوى
حبيبي حبيبي
******************************
عشرنه صرنه وي المكابر وابد ما تنسانه
سفن صرنه ابحر هايج والحزن مرسانه
ولمن طحنه ما لكينه ااالينكسر ويانه
واحنه جي ما حبنه واحد انته اضن تهوانه

نأذيك بس انته تحن لينه اشكثر
معشوك بس ما تحضن جنك عطر

لو نارك تجويني ما اعوفك افه
والسوط اعله اجروحي يالمهدي غفه
حبيبي جبيبي
*****************************
من لكينه بخارطتنه الشامت بسيفه يشك
من الكلب نغزل خيوط لخاطر نخيط الفتك
وطن مثل حسين طاح وعاش مرتين السحك
مره بحلوك السياسه و مره هدام اليطك

يناغيني منحر بي عطش واشرغ ضمه
يلجمني كوكب ع الرمح وازه السمه

بالشبكه وبالملكه يلتم الجرح
بس اني معشوكي مرفوع برمح
حبيبي حبيبي
*****************************
انه ذاك الربعه كثره و جان كلها تهابه
وتالي من طاح بمصيبه ما وفوله اصحابه
يبو صالح وانه كلبي من يضمد اصوابه
والمن يعيش بحياته الدفن بيده احبابه

اليتلثم بجرحه الملح مصيبه
فز الضوه بعينه ولكه حبيبه

خلوني بجنوني وبعيونه ارسمه
معشوكي يستاهل افديله الدمه
حبيبي حبيبي
****************************
كحلت عين المصايب انه منطي شجم حبيب
وانه كل اجروحي منهم والاهم همه الطبيب
راح اسافر بلكت انسه الجرح من يعتك يطيب
وين اسافر و انه بيه زينب و منحر شخيب

تخنكني سالوفه نحر بي تربان
الما يختنك ليل هدعش مو انسان

من تسافر وتهاجر تاذيك الصور
الامك يلتمن يم طاري السهر
******************************
عبد رقيه
مرتضى الشمري

تـفـاركـيـنه -- باليل الغاضريه
والتـــقــينه -- مذبوح وسبيه
عـيونك أعليه شلتها --
بأول شلـــونـــك كلتها
------------- والتــقــينه ----------------------
لا مكـانك رمح أنته ولا مــــكانـي أنه السبي
والمهم مـن ألتقــــينه وكـتــلي خـويه تكربي
عين صوب موتني صدت عين صدت معصبي
من الشمس شاهدة عينك خويه متغيره العبي

ردت أخبرك -- أفلان الحـركاها
ناده نحـرك -- روحي لـوعاها
وأنه هالجلمه أعرفتها
بأول شلونك كلتها
ــــــــــــــــــــــــــــــــــــــــــــــ
كتلي ها زينب شربتن مــــاي لوماكو شرب
كلت لا خويه بعـدنه وأشـــرتلك عـــــالكلب
صحت خلوجن ضمايه خويه وأطويل الدرب
كلت أي خويه وبناتك شبعن سياط وضرب

ناشدتـــني -- عالصايـر بديه
أشرتـــلي -- تسال عن رقيه
كـتـلك ويانه جبتها
بأول شلونــــك كلتها
ــــــــــــــــــــــــــــــــــــــــــــــ
ركزت حيل بمتوني تحسب وشنهي أحسبت
وأفهمت قصدك وكـــتلك والله حيل أتعـذبت
عالرمح هزيت راسك مـــــــن علي أتكربت
وباوعت من وره حجابي كلـــت زينب شيبت

ردت أشمك -- والحادي منعـــني
لـــنه دمك -- يتجاره سمعـــني
روحي عد نحرك خذتها
بأول شلونك كلـتها
ــــــــــــــــــــــــــــــــــــــــــــــ
مـن أجيـتـيني يزينب للــذبـح شفــــتج أنه
خويه لا موهيج عمرج هسه عمرج جم سنه
كتلك أيي يحسين ضهري لمـن ذبوحك أنحنه
حكي من بعد الكفاله يكـــودني شمر الخنه

أيكـلي وينه -- مايفـزع كفـيلج
أمكطعـــينه -- سكتي ما يجيلج
عيوني دمعتها عمتها
بأول شلونـك كلتها
ــــــــــــــــــــــــــــــــــــــــــــــ
نمشي بس أندار راسك عالضعن يـتـفـكده
صحت يازينب عليلي ليش يمشي بوحده
ذبحته هموم الليالي والحديــده أمكيده
بالقصر بالج يزينب لا يــذبحونه العده

ماكو غـيره -- يحميها الضعينه
والله حيره -- تكابلــنه وبجينه
عينك بعيني شفتها --
بأول شلـونك كلتها
ــــــــــــــــــــــــــــــــــــــــــــــ
صدرك شأخـــــباره كـــلي كــال خيل وداسته
والحوافر حــــيل تــــــوجع أخذ كلمن حصته
عالخيم رد وسألــــني كـتــــله كلبي حركته
وين صاح يبات ضعـني وحمره طاحت دمعته

وأنته غايب -- ياليل النـــنامه
والنوايـــب -- مابـيهن سلامه
أختك تون ودعتها
بأول شلونـك كلتها


الخادم عبد الجليل المالكي