بين الصادق وكربلاء

أبالي طاري السبي والدمع زينبي يازماني
احسيني اتنفسه وحيل احب مجلسه الصادق آني
ــــــــــــــــــــــــــــــــــــــ
يباچين عله احسين والادموع جريّه
بهالايـام يخـــدام لتبچون عليه
الطمو واندبـو ذبيـــح الزچيه
تفرحون تضمدون راحات رقيه

طيّبـو مسمعـي وخلو صوت النعي ايشگ اذاني
وخامس أهل الكسه حيل احب مجلسه الصادق آني
ــــــــــــــــــــــــــــــــــــــ
احن دوم ولا يوم يمر ما اذكره
جسد طاح والارماح تطوف أعله نحره
حسيناه وويلاه كســر گلبي امره
والاخيول عـرض طول يدوسنه عشره

ابچو يا شيعتي مو عله امصيبتـي عالعماني
والسبوله النسه حيل احب مجلسه الصادق آني
ــــــــــــــــــــــــــــــــــــــ
إذا بان بالأحزان هلال المجالس
خميسين عله احسين أسـدّ المدارس
عزائات سوادات اغير الـملابس
واون حيل واحس خيل إعله صدري ترافس

دوم أسد حوزتي وأشمر اعمامتي من حنـاني
عالفُگد عابسه حيل احب مجلسه الصادق آني
ــــــــــــــــــــــــــــــــــــــ
عله الدار اجت نار مجــرّد شراره
وصدگ ظال يشوّال أتــاني الزياره
يجي اليوم والانجوم تشع بالـــمناره
ولقد حان بالأذان تگـــــول العباره

والصده يعتلي اشهدُ انَ علي علّه شاني
اتصدق ابمحبسه حيل احب مجلسه الصادق آني
ــــــــــــــــــــــــــــــــــــــ
بالاطفوف بقه ايطوف حنين اشتياقي
أمن الاحساس الف كاس اريدن يساقي
ينـاعين عله احسين النعي بگلبي بــاقي
احب حيل تراتيل العزاء العـــــــراقي

گبري صح انهدم قربتاً للخيـم هالـمعاني
بروحي متأسسه حيل احب مجلسه الصادق آني
ــــــــــــــــــــــــــــــــــــــ
مته يعود والاچبـود يداويـهه سيفه
الهالاگبور يجي يزور ويمر بينه طيفه
أمن الاغياب يفك باب ويصير الخليفه
اوي خدام الاحسين يعيــش ابصريفه

المهدي هو الامل والدعاء بالعجل ايهز كياني
ويــن ابن نرجسه حيل احب مجلسه الصادق آني


محمد الجماسي

ياسيد الحب والجرح ٠٠٠ ياعافيـــة خدامك
شفناك اغله امن الهوة ٠٠٠ شنهي الهوة كدامك
تكبيرة أذان المحب ٠٠٠ حي اعله حب اخيامك
لخاطر حلمنه يبقى حي ٠٠٠ تنذبح اغلا احلامك

لو دقيقة ٠٠٠ ما اذكرك٠٠٠
هالدقيقة معنى ما بيهه
كل وجودي ٠٠ بفضل دمعة٠٠
اطيح لجلك وانته راعيهه

يل كل عمري ٠٠ عاش بخيرك
أنته التسوة ٠٠ لا مو غيرك
كل لحضاتي ٠٠ من تدبيرك
٠٠٠٠٠٠٠٠٠٠٠٠٠٠٠٠٠٠٠٠
أنذنب وردلك بالعفو ٠٠٠ وتقبلني ابتقصيري
كلهه تمل وما تمل ٠٠٠ يمته اخجل امن جبيري
من جرحك وذاك الألم ٠٠٠ ياسيدي كل خيري
يحسين اضيعن انه لو ٠٠٠ تستبدل انته بغيري

يعني أتيهن ٠٠٠ بالشوارع٠٠
من عزائك لون تحرمني
لمني فدوة ٠٠٠ امن المتاهات٠٠
وبمتاهت دمعي ضيعني

جندوب اغلط ٠٠٠ وتسامحني
وزلف ووكع ٠٠٠ وتكومني
ثق لو غيرك ٠٠٠ ما يرحمني
٠٠٠٠٠٠٠٠٠٠٠٠٠٠٠٠٠٠٠٠٠٠٠
يالغلطت الشاطر بالف ٠٠٠ وجم الف أمطيحلي
يمته اصحه من نوم الدهر٠٠٠ وكعد وسامر خلي
سكنتني دنيه من التعب ٠٠٠ ورتاح بس يم اهلي
انته اهلي ياحب الزغر ٠٠٠ بدونك اموت احسلي

حال خادم ٠٠٠ يعترفلك ٠٠
ياحبيبي فدوة سامحني
عدل امشي ٠٠٠ بكيف امرك٠٠
كلشي بأمرك انته علمني

بيدك عٰدل ٠٠٠ كل تربيتي
أمشي بكيفك ٠٠ هاي امنيتي
دمعة وخدمة ٠٠ كل عافيتي
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
من نعمتك يـــا سيدي ٠٠٠ اغفلت شكثر بيامي
ما حسبت هيجي انه ٠٠٠٠ تتبـــدة هم كــدامي
من افعالي هذا البي انه ٠٠٠ وطشرت احلامي
ارد ارجع ابجي وانهظم ٠٠ وصرخ حبيبي الضامي

نعمة طارت ٠٠٠ من اديه ٠٠
بعدتني الدنيه من عدهه
بروح امك ٠٠٠ يا حسيني ٠٠
ابوابك انته بوجهي لتسدهه

لاشيء انه ٠٠٠ والشيء انته
كلبي بهجرك٠٠٠ ما علمته
عمري بخدمة ٠٠٠ انه عرفته
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
غلطان انه وذنبي كبر ٠٠٠ رجعني لحسينيتك
رجعني اخدم من صدك ٠٠٠ ورد دمعي لبتعزيتك
تعوضني كل يوم المضى ٠٠٠ الما باجي بي ياريتك
ابجي ندم مرة وبعد ٠٠٠ ابجي اعله حركت بيتك

أبجي عيني ٠٠٠ ندم ومصاب٠٠
كون اعوض هجري لمصابك
بيش اجازي ٠٠٠ العطش والظيم٠٠
خلني كون احترك لطنابك

يــالمالكني ٠٠٠ يــالشاريني
احركني بخيمة ٠٠٠انته وجويني
اعطش دمعت ٠٠٠ حب خليني
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
عباس أديب المالكي

الخاطري   يارمح نزّل حبيبـــي
الخاطري   ماكسر گلبك نحيبي
ماچنهن آيـــــام
فارگته چن عام
سولفلي هم نام
حسين ابوي
ــــــــــــــــــــــــــــــــــــــ
عذبتني
روحي متعلگه اويه طولك
وين ماتبـــــعد وراك
ضيعتني
من شلت راس اليحـــبني
گلبي جافاني بجفاك
حيرتني
يارمح والشــــــيب نازل
هذا ياشيب الـغـزاك
ماشفتني
شما طحت بويه اگــولن
مايحن گلبك شجاك

شمالهه     ماسمعته ايگول عني
شمالهه     فزت الناگـه اعله وني
من تمشي بهداي
تعبته وهــــــواي
ماشــــارب الماي
حسين ابوي
ــــــــــــــــــــــــــــــــــــــ
ياهضيمه
شايل الينگــــــــــط محنه
يارمح خل يســتراح
واليتيمه
اتموت لو دفنو ابــــــــوها
وانه ابوي اعله الرماح
دنيا هيمه
والشمس حرگت جــدامي
وگـــلبي مابطل نياح
ماكو خيمه
مايصح افيـــــــــــاي بالبر
واگعد امسح بالجراح

احبالهه     ياهو عن ايدي يحـــلهه
احبالهه     ومسح ادموعي الأهلهه
وكت الصلاه حان
ماتســــــــمع اذان
نـــــــــــزّل القران
حسين ابوي
ــــــــــــــــــــــــــــــــــــــ
كلشي صاير
يغث بيه ومــــــــــــالي حيله
وابچي من عثرت جدم
اليوم باچر
گمت اگـــــــــــولن بلكي افزن
والگـــــــه مبنيه الخيم
گلبي ناطر
يگعد حسين اعله طـــــــــوله
وياخذ ايدي امن الزلم
والگه حافر
يكسر الصــــــــــــفنه ومنامي
وتطلع امنيتي حلم

شلونك       ياعذب والدنـــيا غبره
شلونك       كسرك بگلي اشيجبره
متعوّده اعليــــــك
مو مـــال اجافيك
حاچيني احاچيك
حسين ابوي
ــــــــــــــــــــــــــــــــــــــ
هسه نايم
لو يباوعــــــــــــــــلي بمشيتي
دنگ وخلينـــي اشوف
ربي عالم
بس اشوف عــــــــيونه لحضه
مايضل بعيوني شوف
وين هايم
هــــــــــــــــــم يفكر بيه بعده
لو خذت گلبه السيوف
ردلي سالم
بويه وارجــــــــــــــعلك رقيه
وبيدك اتحل الچفوف

شگايل       هـــــــم الك رجعه وتردلي
شگايل       وماتضل حيره اعله شكلي
هم نرجـــــع اردود
وخيامنه اتعــــــود
وماتنچـوي اخدود
حسين ابوي
ــــــــــــــــــــــــــــــــــــــ
راح اموتن
وانته ماهــــــــــــــــزك كلامي
ولا نفع بيــــــك العتب
وين اروحن
يارمح علگـــــــــــــــــــني يمه
گمت احس راسه تعب
بروحي الومن
كون ماعطشــــــــــــــانه گتله
چا بـــــرد گلبه وشرب
گوه اگومن
طفله خمس اســـــــنين عمري
وكلشي من عندي انسلب

شبيهه       تبچي وياي الخرابه
شبيهه       مـــن اگولن بابا بابا
من يگــــرب الليل
ايعيــشني بالويل
عالسحگته الخيل
حسين ابوي

عبدهم
شاكر الصيمري

(ذكرى شهادة مولاي الصادق روحي فداه)


يالصادق النار ألكم سجيه
ورثتو النار من باب الزجيه

ومن خيام الحسين نارك صفت نارين
__________________
نارك من تشب وعيونك تشوف
ادري تذكريت خيام الطفوف
نعادت كربله يم بابك وخوف
بس عباس ماكو وماكو الجفوف

صرت بهيئة حسين وغربته
محنتك ياولي تشبه محنته

منك تدمع العين نارك صفت نارين
__________________
يبو سبعين عام وحيل مهدوم
عمرك خلصيته وماشفت نوم
ماكو هلال صار العمر بس صوم
على طف المدامع صرت مهدوم

تذكر من برز بالحسره جسام
وعله حايط الذكره ترسم خيام

يومك ابد ناسين نارك صفت نارين
____________________
يا روحك وحزنك تارس الروح
كل ساعه وتشوف حسين مذبوح
وجن عباس ادري تشوفه مطروح
نص اليل هاجت حيل الجروح

صاحت منك جروحك والعيون
يامولاي كلشي البيك مدفون

تذكر لوعةّ البين نارك صفت نارين
_____________________
يالابرض البقيع الگبر چا وين
مهدوم وعليك تهدم الدين
الك عيني تصب وانوب لثنين
يل چنك علي يل چنك حسين

النواصب هدمو گبرك يمولاي
بس انت بحر شتسوي بالماي

عطش وياك ماشين نارك صفت نارين
______________________
شگد مرت ايام ومرت اعوام
ماتنسى السبي من صار بالشام
ثوب الحزن صار لطولك ولام
يالجرحك بطول دموع الايتام

بجرحك جن اشوفن حيدر يصيح
يم حزن العقيله يگوم ويطيح

ويم حزن الدواوين نارك صفت نارين
______________________
عبد زينب
محمد الابراهيمي

#استشهاد_مولاي_الصادق_ع

تعال… يا موت ارحم بعيوني
تعال… والطف مديور ابلوني
آنه الصادق ياموت
آنه الصادق يا موت
_
عشت عالخيمة والصايح…… ابد لا تنشد اشلوني
تعال لروحي خل تموت… لا يخلص حچي اعيوني
تظل تتبدة يمي اهواي…… مواقف تشرب ابلوني
مداليل الله اذكرهن…… اطيح وتنچفي امتوني

خيام…… عايشهن كل ظهرية
خيام…… يدوَن فوگ العلوية
انه الصادق ياموت
انه الصادق ياموت
____
يفز بيه الوجع كترين…واظل ابچي اعله عبد الله
مثل ماي المطر من طاح… المطر لو طاح شينگلة
عوافي اينگط الزردوم…… مو دم تارس الرملة
السهم بالرگبة واگف طول… ورباب اتصيّح اسم الله
زغير… موش اگماط الدم لابس
زغير… ذبحوك وريجك يابس
آنه الصادق ياموت
آنه الصادق ياموت
____
ابصينية عرس جاسم… شمعة العافية انعلگت
ما عدها عرف بالنوم…. عيني ابدمعتي اتروت
اغمض تعرض بعيني….. زغيرة بحافر انسحگت
يموت الغاثتني هواي…. عِلاوينة ابجمر ركضت

حرام…… مانمشي بهاي العادة
حرام…… ماتطلع بت السادة
آنه الصادق ياموت
آنه الصادق ياموت
__
يموت الطف ندس شيبي… وگلبي ابعملتة اتوجر
مدري شمالة طف الموت… ماخذ وين المعتبر
مو يتطرز ابنبلات……….. للشم سوو المنحر
موش مراية صدر حسين…… ليش،بخيل يتكسر

خيول… ضايگ لچمتها ابگلبي
خيول… تعرض من امشي بدربي
آنه الصادق ياموت
آنه الصادق ياموت
__
كون اتچفن ابراية…… وعمود البيرغ اجنازة
أنه الشاربني حلگ الموت… آنه الذبحوا اعزازة
الخذوا عماتة مسبيات…… الدمع بخدودة يتوازة
الفاگد يرجع امبلل…… من عينة لطرف چازة

دموع… تسگي اولايات الغربة
دموع… للفاگد حلوة الثغبة
آنه الصادق ياموت
آنه الصادق يا موت
______
علي هادي الخزعلي

گلبي امن الصبه اتعلم يصادق
الحزن فرگاك مايرضه يصادق (يصدگ)
المذهب كله ينحبلك يصادق
الشيعه اتيتمت يبن الزجيه

✍️علي سليم الحسناوي

وَفَدَيْنَاهُ بِذِبْحٍ عَظِيمٍ
بسم رب الزهراء (ع)
بتوفيق من الله ومولاي ابا عبد الله
تم افتتاح هذه القناة التي سوف تختص بنشر :

1.عظمة سيد الشهداء عليه السلام
2. مواقف من مصاب وجروح واقعة الطف
3.قصص ومعاجز
4.امور تخص الشعائر والخدمة

ونسأل من الله التسديد والقبول
https://tttttt.me/hhklpii

يربان المراكب والملاليح
جبل يل ماتهزك سيدي الريح
مدد للخدمه منك والعزائات
يل ويانه تلطم بأسمك نصيح

ابو صالح .....
يمالي الروح طرواك
عهد مولاي وياك
حرام الدنيا تنساك .... ابو صالح

ابو صالح ....
حرام المابچه عليك
وهضيمه المايواسيك
يمن بالروح طاريك .... ابو صالح

عهد يبقه العهد
ابو صالح مدد
يبونه الأولي
يحضار الشدد ..... ابو صالح

*

يريعان الموده ومنبع الشوگ
يا مهدي الأمم ياعالي ليفوگ
أشوفنك حنين بكل الاشكال
اليحبك يختنگ چه انته مخنوگ

ابو صالح .....
يحاضر بالعزائات
وتبث لحسين دمعات
يبو كل السموات .... ابو صالح

ابو صالح .....
يعنوان المقاييس
يا مولاي قديس
الينكرك عاون أبليس .... ابو صالح

الينكرك مادرى
سليل الحيدرى
وسليل الفاطمه
هذيچ أم القرى ...... ابو صالح

*

المثل هذا الامر بالكلفه موجود
ياحيد المواقف وأبن الحيوّد
قليله دموعنه ومامش عزائات
ومگطوع الدرب چن گطعت الجود

أبو صالح .....
تعال ألحگ ولونه
ومنكم غربونه
ضعنه وضيعونه .... ابو صالح

ابو صالح .....
تعال وكافي غربه
تعال الدنيا صعبه
اليحبك عينه تربه ..... ابو صالح

يمالك للگلب
أنگطع بينه الدرب
غرب يبن الحسن
وحگك بالغرب ..... ابو صالح

****

يانغمةّ محبه وكلمةّ الروح
خافن باچر يمنعونه النوح
خايف وبمحرم مانواسيك
ولا مجلس بعد للبعده مذبوح

ابو صالح .....
اذا مانلطم أنموت
وتصير الدنيا تابوت
يونس والجرح حوت .... ابو صالح

ابو صالح .....
أذا ماننحب هواي
ومواكب وآنه مشاي
يعني نموت بهداي ...... ابو صالح

نتاني فزعتك
وتعلگ رايتك
بعد كافي الصبر
عليك بعمتك ....... ابو صالح

**

يعنوان الرجوله بالمياديين
ماندري الزمن بذنوبه ليوين
خاف أنطيح من غربيلك شلون
شيفيد العذر يامهجةّ العين

ابو صالح .....
وجوب العاشگ يتوب
ويطهر من الذنوب
لان المهدي محبوب ..... ابو صالح

ابو صالح .....
احبك بالگلب كون
وأبذر ماي العيون
يالبالغربه مسجون ..... ابو صالح

يباچر والأمس
يلي بدمعي تحس
الوحيد بدنيتي
عشگ ماينهجس ...... ابو صالح





عبد زينب
محمد الابراهيمي

نحسب ايام المحرم نتضر هالخدمه
بنعمه جنه اومادرينه نفتگد هالنعمه
والخدم كلهه المصابك سيدي متحزمه
------------------------------------------------------
انمشي عليك ام الخدر امن الخدمه لاتحرمنه
اشصار يحسين اوبدر من عدنه وتعاقبنه
سلوتنه تدري خدمتك اوترك المجالس هَدنه
لو مامش امحرم اضن كلمن يموت ابحزنه


اشلون ترهم بالبدايه امصابك احنه انودعه
وحنه ماعدنه وسيله بس دعى والدمعه
الخدمه منك رايديهه اعليك ضلع البضعه
-----------------------------------------------------
يحسين تييهنه الدرب وبعيد درب اعتابك
جاوين ننطيهه الوجهه لو يوم ينسد بابك
ابضعن اليتامه انحلفك اتبرد اگلوب احبابك
تنطينه خدمتنه السنه اونبجي اونون لمصابك


دنيا مابيهه محرم كل طعم مابيهه
ولله يحسين اوغلاتك اسمك امحليهه
الخدمه لو بثمان صارت بالنحر نشريهه
-------------------------------------------------------
يل عودتنه الخدمتك وهل اللطم سمونه
شمات عدنه سيدي وشگد حجي سمعونه
الما عاش جرحك عالرمح سوده نوايه اضنونه
والما بجت عينه دمع شله ابنهار اعيونه


شنهو يعني دنيا تصبح لالطم لا مأتم
من صبانه اتعودينه الخدمتك نتحزم
وهاي ياعيشه النحبهه الماكو بيهه امحرم
----------------------------------------------------
الدنيا شنهي ابلا ا جرح ومابيهه لوعه وعبره
الماعنده مثلك سيدي مسكين عايش عمره
نتنطر اهلال الدمع اوفرض الحزن ننتضره
فرحتنه نبجي ابمجلسك اوننعاك يبن الزهره


ندري بيهه الزهره تحضر بالعزه اتشاركنه
ويه ناعي حسين تبجي اتشركه نوحه وحزنه
لو تركناهه المجالس كلشي ماضل عدنه
--------------------------------------------------------
يحسين جنه اعله الارض وهل السمه ايزورونك
بس الخِدَم يعرف شنو عابس صبح مجنونك
تنشاف انته بالگلب يالماكو لون ابلونك
خسران كل عمره وعلي العاش يوم ابدونك


بالكساء الخدمه جائت والخدم مذكوره
للقايمه النوح باقي والمهج مجموره
دمعه وحده اليبجي يمك دمعته مأجوره
-----------------------------------------------------
علي سلبم الحسناوي

العشگ مرات لمن تهوى انسان
من دمعك تحني هواي حيطان
اذا مسك غرام الماشرب ماي
تذم الماي وانته تعيش عطشان

غديت من الهوى أتراب
مطرود وعله الباب
وأتاني چفوف الحسين
حنين ويرضا بالتاب

ماگلك اريد أدموع ومصيبة زينب بخلگي
مشيني مثل متريد وأحب أوصلك بعشگي

واويلاه .... حسينا

**

أريد أوصل بعشگي كون مشغول
عقلي وكل حواسي أصيح الخيول
وأفز من نومتي فزت مجانين
مذهول وأخلص النوم مذهول

أخلص النوم مخنوگ
الطيف براسي محروگ
حبل وزغيره والسوط
وهذا وعثرةّ النوگ

الهزله تفزز الميتين الخدر مايرهم بعثره
ارسم صورةّ المچتوف بهزله وبالك إيفسره

واويلاه .... حسينا

****

أدبّ بالك و مو تمشي وتروح
ولتزيد الذبح بالتوه مذبوح
سبيه وكافي وعوف التفاصيل
وشعندك دمع ضل للصبح نوح

نوح وبالعشگ ذوب
طبر .. شگگ الثوب
الدمعتك سلم الليل
حتى أتصير محبوب

سولف وي نحر بهداي فرآشه وعله الورده
هذا حسين ياهل الناس تشمه فاطمه بخده

واويلاه ..... حسينا

*******

تشمه الزهره بس تصيح ياخيل
بصدره الهيل ليش مطَشر الهيل
المثلك ينسلب والخنصر يروح
حرام أعله النهار الماصبح ليل

حرام أعله الهوى يصير
حرام الطير ويطير
وخد حسين بتراب
بكل الكون تقصير

والمثلث يشچ الروح اثنعش طگه يطگونه
المهر يتوسل ويبچي يگلهم لا تذبحونه

واويلاه ..... حسينا

******

المهر هام أعله وجه وسرجه مگلوب
يازينب يصيح حسين منهوب
خذو ثوبه العليّ ياويلي عريان
ماعندچ (أميه) گلبه مشبوب

يزينب طاح مالوم
عليچ إيطيح ويگوم
من كل صفحه يرمون
بحر الگاع ملچوم

يابس دَمهَ بعروگه عطشان وغده يرافس
من گد العطش ويلاه دمه اعله النحر يابس

واويلاه .... حسينا




عبد زينب
محمد الابراهيمي

ديار العز صفت وحشه وخليه
وأجي والدمعه تحرگ باب أديه
ما صارت ولا دارت يالحسين
ترجع كربله بحبل الرزيه

ترد هيمه .... ونار أتعاشر الخيمه
ترد هيمه .... ويتيمه تردم يتيمه

الشمر مو بالشكل بس بصفاته
وهذاك أبن النُمير من الشماته
العقيده انمردت وأحنه سباته
وگمنه نصدگ (بخولي) وصلاته

توَهمنه الشياطين
خطر بزيارةّ حسين

*

ديار العامره بدلال الاجواد
وأهل القربى صارو كلهم ابعاد
النجف مسدوده مابيها اليزورون
ولا يمه المرض دكتور بغداد

يبو الشيمه .... يموسى گلبك بضيمه
يبو الشيمه .... سواد الغربه بالغيمه

يبن جعفر دمعنه بلايه جدوه
عفناك بهجر والحب تلَوه
اذا رادو نموت الموته تسوه
لو ننطي الچفوف وهاي حلوه

توهمنه الشياطين
خطر بزيارة حسين

*

وسامره بعدهي أدير العيون
شبدر من عدنه شو ماكو اليزورون
ولا مجلس عزاء الأم الحسين
ضلمه والمدامع عمه يمّ عون

اعله ترنيمه ... اليحب شلون توهيمه
اعله ترنيمه ... الأمر جار بتعاليمه

الهادي بلا جرح بس دمه سايل
يعني يودي للشيعه الرسايل
أمس عدلنه حمله الگال مايل
نسانه ونارنه نار القبايل

توهمنه الشياطين
خطر بزيارة حسين

**

شجاها و كربله هم ردت النار
رد ذاك الزمن وعيون الاخبار
زوار الاجو چنهم يخافون
الدوانيقي رجع وچفوف زوار

مثل غيمه ... يمطر گلبي تنغيمه
مثل غيمه ... اليحبك صار تغشيمه

اليزورك ينحجر خوف وملامه
اليجيلك مايرد لهله بسلامه
شعجب ما تنگلب يوم القيامه
اليمرضنه منو (أنته) اليتامه

توهمنه الشياطين
خطر بزيارة حسين

*
يالمبيوگ من ذولي التفاهات
ويم المنحر وكفرو بالايات
الحقيقه واضحه بس احنه عميان
ذنبنه الكبراهم عالمزارات

بتسليمه .... اليجي منعوت تذميمه
بتسليمه .... يطهررونك يبو الشيمه

يطهرون بضريحك شنهي هايه
غشمه الناس ذولي بلا درايه
مو (الله) بكتابه گال آيه
الرجس مايوصل وهمه الحمايه

توهمنه الشياطين
خطر بزيارة حسين




عبد زينب
محمد الابراهيمي

حبيت شكثر وادم
وبجيت اعلى شكثر وادم
بعدني اذكرهم وناسيك لاتايب ولانادم
ـــــــــــــــــــــــــــــــــــــ
من گتلك احبك هاي جذبه وماهي جلمة حگ
احبك بيش وانه انسان گلبي بغيرك معلگ
عتك حبك وانا بكل يوم لازم من جديد اعشگ
بس وياك صارت هاي ماشفنه العشگ يعتگ

سكن گلبي لعشگ غيرك
ولاحن لتصاويرك
ييوسف حته لو الگاك ما دليهم ابيرك
ـــــــــــــــــــــــــــــــــــــ
للوادم سهرت هواي ولا سهران الك ليلة
عدا صوتك ولاظل ناي يعزف ما مغنيله
بارد حجيي بس وياك وغيرك حار احجيله
غير العاشگ المفروض ما تبرد مواويله

مواعيد العشگ كلها
لغيرك صرت اسجلها
ماعندي اللقائك يوم جيتك هسه أجلها
ـــــــــــــــــــــــــــــــــــــ
وكت ما عندي لملاگاك وي هوايه متواعد
ما سهران ساعة وياك وياهم للفجر گاعد
تمد گلبك لگلبي بشوگ وانه وي الوهم شارد
انت اكثر بشر بالكون عاشگ من طرف واحد

تحبنه واحنه مو يمك
عرفنه وياك بس اسمك
تسمعنا الحجي المملوح وتسمع بس اليلجمك
ـــــــــــــــــــــــــــــــــــــ
لو غابو علي ساعات اذوب وينخطف لوني
وانت مفارگك جم عام ولا بين على عيوني
اصفن لو اجو ع البال ولا ارد ع اليحاجوني
وانت تمر مرور الغيم اذا مريت بضنوني

وحياتك لو صدگ غالي
جا بيك انشغل بالي
ما صاحبتك بصفنات ومجانك بالگلب الخالي
ـــــــــــــــــــــــــــــــــــــ
اريد احجي الصدگ وياك بلكت ينحسب توبه
تره احنا ولا نفكر بيك كلمن عنده محبوبه
مابين اليكول اشتاگ وهو الشوگ مو ثوبه
وبين اللي يسولف بيك وهو تأخرك ذنوبه

جذب عشرتنه مفضوحه
كلمن ملتهي بروحه
اعلى فگدك لاتظن مولاي تلگه گلوب مجروحه
ـــــــــــــــــــــــــــــــــــــ
هذا العندي وماريد اسولفلك بعد اكثر
ولا املك عذر مولاي خاطر يمك اتعذر
ولا املك گلب وياك يوگف وگفت الاشتر
واذا تطلب بروحي افديك اگول اعذرني مااگدر

اذا تسألني هذا اني
العجل بس على لساني
انه متاني غيرك ناس واگول لجيتك متاني
ـــــــــــــــــــــــــــــــــــــ
بس ظلت بعد بالروح جلمة احجيها واسمعني
مطلب عندي بأسم حسين اذا تقبل تفرحني
اذا باچي اعلى جدك يوم بحنانك سيدي اشملني
نقص بيه شكثر محتاج منك نظرة تصلحني

لخاطر مجلس حسينك
اشملني بنظرة من عينك
بلكي اگدر ولو جم يوم اوفي شويه من دينك

رائد الناشي

الثلاثاء 6/8/2019
الساعة الثالثة والنصف صباحا

عگدنه بيرغك بچفوفنه ونسأل
محرم يا بو فاضل جاي شنهو الحل

محرم جاينه ومكسور واهسنه
يبن الرد شمس رجع مجالسنه
ابابك مو شِعر بدموع هوسنه
يكافل زينب انت بهاي تتكفل
...
محروگ الگلب لو عاتبك معذور
كلفه يا بو فاضل من بعيد انزور
كلشي ايهون بس اشلون اجه عاشور
سكته يمر محرم ؟ انت ما تقبل
...
عليك بداعة الخيمه الخذتها النار
إفزع للخدم والحچي مزامط صار
نسمع من اهلنه واحنه چنه ازغار
اليدگ باب ابو فاضل عمره ما ينذل
...
وصيّة امنه لو ضيم الزمان ايهيج
نعگد بيرغ العباس وكت الضيج
ترضه السنه ماكو ركضة طويريج
چبيره السالفه ونريد تتدخل
...
يتچاية حملنه لون راد ايميل
الشعائر ورث اهلنه وجيل يتبع جيل
تدري امتونّه تذبل بلا زنجيل
خدمتكم نهر والعافها يذبل
...
يالبچفك درينه الما يصير يصير
ديره هموم بينه نسولف ليا بير
معقوله السنه ما يطلع التطبير
ضعنه وغير بابك كلشي ما نندل
...
أفه يالربتك بدويه وفايه
صعب بچفوف زاير ما ترف رايه
صدگ ماكو اربعين وماكو مشايه
إِزعل إلك حگ بهاي من تزعل
...
هواي الگالو من اللطم شمحصلين
هذا الحال عند البعض گرة عين
لتشمتهم بخدام اخوك حسين
عليك بوگفة ام الخدر فوگ التل
..
خادم الحسين ( عليه السلام)
كرار حسين الكربلائي

ياعيني ابچي وبالدمعه زودي
فراگ المجالس نار الجحودي
اصل المنيه ماكو عزيه
بغيره صلاتي باطل سجودي

ماكو محرم لارايه
ماكو مواكب مشايه
ياربي خذني بهالساعه
هيمه الحياة أبلا قرايه

حتى بجرحي اموت ماريد الدِنيه
حتى بناري اصيح ياحسين المنيه
يمك ارد اروح ياحنين المدامع
بكبري وارد انوح وارد اصيح ياسبيه

فراگك ما اريد ..... ياحسين ياحسينا
_________________
بريح وخفيفه اهتزت ضماير
اختلفت عقائد بهجر المنابر
الرادو زياره صارو حياره
ذنبه اليجيلك أكبر كباير

فتنه وهضيمه ازغيرونه
صار اليجيك يعيرونه
وين المواكب والخدمه
وزاد وطريق يحسبونه

وين الخدمه ذيچ والمواكب جبيره
وين الدمعه ذيچ ياسبيه الاميره
ابلا مجلس عزاء ياهضيمه التمرنه
وزينب بالحبال عالهزيله اسيره
____________________
فراگك خنوعي مملكتي دمعي
أحضر مجالس يادنيا اسمعي
خلوني انوحن انه الاموتن
خليني ابجي روح انته ادعي

أبعد طريقك لتمرني
وچفك امنعه يصافحني
انه علاجي من الطم
لطم المجالس طيبني

وينك ياحبيب هدموها المجالس
تتمنه وتريد ياحبيب بيها جالس
طبع الهم جروح مانهيد بجرحنه
وينك ياحبيب وينه جون وين عابس
___________________
عشنه بتفاها وادم مخيفه
وين الطبيبه تنسه شريفه
ذيج العضيمه تنسه هضيمه
ام المواقف بعلتك حليفه

باب الحوائج والوالي
اكبر حرام يضل خالي
خلصت مصالحنه وعفنه
كلمن عزير وكل غالي

موت اعله الوداد لاتعوف الغرامي
ولاتجفي الامان والرئوف المحامي
الدمعه من تطيح للحسين هيه رحمه
واكصد كربلاء هناك صيح بالاسامي
_________________
الخيمه التلمنه روح الفريضه
بكل دمعه حكمه وعنبر تفضيه
المجلس امانه وأصل السلامه
الگايل يمرض روحه مريضه

هاي المجالس مكفوله
بيها الزجيه گلوله
والمهدي يلطم ويانه
يعني برحمته مشموله

باقي بهل العزاء للمات وبجواره
ومابدل حسين والأ اروح للزياره
شباقي بهل الحياة ومانزور الكفلنه
هيه الدنيا وين واحنه وين من قراره
____________________


عبد زينب
محمد الابراهيمي

انسه ناساك...
وعوفها الدنيه اشتريد ولاتكظيها ابندامه
عيش روحك...
العاش بس حسين هذا عايش ابلب الكرامه
وعيش واقع...
وكَله خليني ابخيامك اعطش اشلون اليتامه
الرزق دمعه
الرزق لطمه... الرزق مجلس
كون تنحر روح روحك حتى تتحسس خيامه
الحجي مده...
واقرا بجروح المخيم اخر اوداع ابسلامه
ياسلامه...
الراحت ابساعة الطاحت ال هاشم والعمامه
وجرح خضر على الجنه والخريف انحسبه شامت
لو يمر والشجر واكَف توكَع الورقه ابملامه

وشجره ابن الزهرة مراها الخريف
وماي شح ماكو الغصنها أتريد ماي
الربيع ايريد يوصل لجن امجلبله ريف
المايجي اباله مخيم خل يراجع بال نفسه
الماعطش بالحر دليله لايكَول الدنيه صيف
وخل يحط ابكَلبه جمره وكون هيمه
يركض ابحر الضهاري ايدور الينغر شريف
ليش وجه الله الكريم ايصير مغرب
ماكو هاي الكَاع هيمه موش ديوان الحسن
هاي كَاع أتريد تشرب بس دمه وتترك محن
والسبب بالناس صارت ماكو اليعزبله ضيف
كَاع ماضيفت واحد هو ضيفها ابمرامه
كَاع خلت حاشيتها حسين يتلكَه سهامه
وياسهامه...
الراحن ابطور الحدي والستر لله
وفوكَهن روس العشيرة وبسملن يالنوك هالله
هالله هالله...
بالجن بالدنيا توكَع هاي دنيتنه الحبيبه
صح تسمي الناس كلشي
والعظيمه مو غريبه...
مو غريبه...
لاتذكرونه بعد وياها اخوها...
التدخل بديرة غريبة
وياها أهلها ايطببوها...
وكلشي بالدنيا خساره
الرابح العنده إخوته... مايفكر بالجنازه شلون بيها
وهو الماعنده اخو مايهم موته...
واخر احجايه بقت بلساني دوم
المايعرفه مايثمنه وهو وجه الله العظيم
واني ثمني ورزقنه ومجلسه أكبر علامه
الرايد ايعيش ابغربته ودوم غربه
كون من ينام ضعنه يمر بعيونه ومنامه...
يمر بعيونه ومنامه......

حسين الكرعاوي

محرم نفسه باقي وموش بالكيف
الشعاير يمته عَگده وصعبه حلها

مو بيـدك وبيــدي وداعت حسين
يم الله والمهــدي الشغـــله كلـها

ولا محلــوله لجــل إعيونّه السود
لخاطــر ذيچــه إلـ تغيـير شكلها

زينــب والمجــالس مثــل إلجبال
أول تـــــالي إلـ قـــــرايه نِذِلهـا

وشنو الزهره تجي ماتلگه عاشـور
هـوّه الله خـــلق كــون إلـ أجـلها

السَنَه چلمة محرم. بيها حرفين
كــاف و نــون الله إيحــط قبلـها

إطمئنوا وحضّروا النيّـات والنــوح
شعايرنه اعلــه ماهيّــه ومثـــلها

دام الزهـــره يم البـــاب ترتــاح
البـــوب امفتحــــه إلهــا ولـهلها

#باچر_إترد_عامْره

مهدي التقي

ما بين جراح الحجة عج وقرب محرم وكثرة الوباء


يا بوصالح دخيلك يا مولاي
يا بوصالح دخيلك يامولاي
================
الهّيج جرح گلبك نبلة النشاب؟
لو من شفت محبس لابسة السلاب
ياهو الشيباك وانت بعدك شاب
حبل ام الخدر لو حبل داحي الباب

يابوصالح دخيلك يامولاي
يا بوصالح دخيلك يامولاي
=================
بالك بي مخيم خانگة الدخان
وبي نبلة تنزز رگبة الرضعان
صدگ گالو تخوصر وايدة عالحيطان
شني من الذبح من الحرگ فحطان؟؟

يا بوصالح دخيلك يامولاي
يا بوصالح دخيلك يامولاي
================
دمعاتك تظل بس گلبك ايوشل
وحيد وياهو يم جرحك گعد وايشل
غميجة اجروحك وبذنوبنه انفشل
تعال اورد خدركم من ظهور البل

يا بوصالح دخيلك يا مولاي
يا بوصالح دخيلك يامولاي
================
رقية بموتها وتوجعها رجليها
ازغيرة والمصايب تردف اعليها
اشوكت يالمهدي تبچي لموت راعيها
يمعزوز ومته اتذل المبچيها

يا بوصالح دخيلك يامولاي
يا بوصالح دخيلك يامولاي
==================
اسولفلك جرح فطّر لهات اجبال
جرح بچّة سوة المكتول والكتال
طيحة جدك ورجله بثگل تنشال
لمن شاف زينب چاتفتها احبال

يا بوصالح دخيلك يامولاي
يابوصالح دخيلك يامولاي
=================
محرم جاي يالمهدي الحزم شدهن
وشبابيچ البلاوي ابدعوتك سدهن
المصايب كثرن وگمنة نعددهن
اليعطلن مجلسك مولاي بعدّهن

يا بوصالح دخيلك يامولاي
يابو صالح دخيلك يامولاي
===============
اجه شهر الحزن والمرض يمشي اوياه
الامر بيد ابو صالح هو يتبنّاه
شدة وكلشي يرجع رايح المجراه
تفرج عن گرب بس گولوا يا الله

يا بوصالح دخيلك يامولاي
يابو صالح دخيلك يامولاي
===============
علي هادي الخزعلي

اعله گد اِلحاف شعري أمد رجل البيت
عليّه الشطر الاول و انت اللي اتكمّل ..

او بعد ما أدري تقبل هالقصيده اشلون
أهُـو إنته الرضا بس آنا مو دِعبل ..!

اشويعر جيتك ابطرْگ الشعر مولاي
ابقصيده اململمه او ابياتها اتفشّل ..

رغم ماهي ابمقامك لاچن ادري ابهاي
الكريم اشما تگول ابمدحه يستقبل ..

أنا لْوجه الله كاتب و انته وجه الله
لا ريد الجزاء او لاني متأمِّـل ..

بس عيني اعله ثوبك منّه رايد خيط
علگ بزنودي اشدّه او للحشر ميْـفِـل ..

و أقنّع بيه منكر من يريد اجواب
أو أمان ايصير ليّه ابگبري من أنزِل ..

او جواب المنهو ربّك من نبيّك چان
أخلي الخيط يحچي ابدالي مسترسِل ..

ما أمدح صفاتك لا بعدني ابهاي
أنا ابهيبة ردائك عقلي متعطِّل ..

من اخيوط الشمس لو ريش جبرائيل
من ياهو اللي بيهن ثوبك اتفصّل .. ؟!

تنفُض جُبِّتك , منها ثواب ايطيح
ابسِـدِّ اِعبايتك , يمكِن مَـلَك يختِل ..

دخيل اعمامتك صارت صلاة الليل
إذا تجبِل عليها النافله اتهلهِل ..

خلق الاملاك ربنه للرزق , للريح
او خلق مجموعه بس ابُّردِتَـك تِغزِل ..

( يسلطان الوجود ) .. الكِل إلك يحتاج
يناموس السمه المستغني عن الكِل ..

إذا بيك احچي آيات او سوَر شيْـزيـد ؟
و إذا ما جيب طاري ابمدحتك شيْـقِـل .. ؟

مثل طير الإجه او منگاره شايل ماي
او يگطّر عالبحر متگلي شيبلل .. ؟!

إجيتك عيني صحره او إنته وجهك غيث
يغيمة مَـي ورِد و اعله البشر تهطِل ..

او صحت لله يا مُحسن و أدگ الباب
اعله مدّة إيدك اشما تنطي متفضّل ..

و إذا ترسل قليلك هم أحسبه اِهواي
لأن قيمة الشيء ابقيمة الـمُرسِل ..

او يحسدوني البشر قالوا عِدِل كل بيت
بيت ابجنّة الله ابشعرك اتحصِّل ..

و أنا القانع ابمُلحق حتى لو إيجار
ابشرط بالجنّه يم أم الحسن أنزِل .. !
--
قصيدة : "سلطان الوجود"
الميرزا عادل أشكناني / مشهد المقدّسة

قصيدة لمولاي صاحب الزمان… عج
بعنوان ( كهف الحزن )

من گد ما ألك مشتاگ
دمعة تحاݘي بالدمعة
ياكهف الحزن والنوح
غايب صار ݘم جمعة
،،،،،،،،،،،،،،،
بحلم  خليني   اشوفك قادم
ألاهي ارحمني   بظهور القائم
ردت  يقبلني    عبد لْـۆ خادم
تركت اذنوبي   وأجيتك نادم

جدك قابل( الحر ) وانتة متقصر
اقبلني ولــو خــدام عــند الحر

هوة المثلي يامولاي
حاشا المثلك ايرجعة
ياكهف الحزن والنوح
غايب صار ݘم جمعة
،،،،،،،،،،،،،،
تريد اعيوني    تشوف اعيونك
يامالك روحي   صرت مجنونك
الوجود اخلافك  عدم من دونك
شكبر حض روحة.  الكلة بماعونك

غريب ومن كثر ما ثڰلت جروحك
خيالك شيب ابگد ماسمع نوحك

ظلت عازتك للحين
يمتة تصير الك طلعة
ياكهف الحزن والنوح
غايب صار ݘم جمعة
،،،،،،،،،،،،،
السفر مايگظي   وترد لديارك
منو يخبرني    ويجيب اخبارك
يهلبت باجر     تشع أنوارك
وفك احضاني  وألاڰي انصارك

سامحني وأڰلك طالت الغيبة
طلعت بالگلب يالمهدي جم شيبة

انتة تعاني واحنة بخير
وننطر منــك الفزعة
ياكهف الحزن والنوح
غايب صار ݘم جمعة
،،،،،،،،،،،،،،،
تنوح الجدك    وتحن يومية
يويلي وعمتك  مشت مسبية
يــعم السادة    لكــم علوية
تطب للمجلس  وتطيح ارقية

بديوان الرجس صارت ترا ضجة
حرم هاشم يوادم للغرب فرجة

اعلة عماتك تصد الناس
غرب وعيونهة امشرعة
ياكهف الحزن والنوح
غايب صار جم جمعة
،،،،،،،،،،،،،
بكثر ما باݘي   عيونك حمرة
دمعتك تنزل   ولاكن جمرة
بدعاء الندبة   جروحك كثرة
قريت أهاتك  حزن عالفطرة

بكثر ما باجي يم اعتاب سردابك
علكت النواظر شوك يم بابك

فصلت الحزن تفصال
جرحك ليمت اتودعة
ياكهف الحزن والنوح
غايب صار جم جمعة
،،،،،،،،،،،،،،،،،،،،،
تمت
الْحٍمَدٍ للـّہ
كلمات  الخادم… حسين حمدان الدلفي
رزق مولاي صاحب الزمان… عج

بعون الله وسادتي ال محمد صلوات الله عليهم
سوف نقوم بنشر قصائد محرم 1442 هـ
ونسالكم الدعاء للتوفيق لنا ولكم ولدفع البلاء عنا