اسمه عباس النزل بالغاضريه
صبغ رمله كربلا بدم ال اميه
سكته جو المشرعه جن كلبها قارعه
اسمه عباس
****************************** وصل دور الكمر والضلمه اعتلت
مرادم الفرسان والحومه انجفت
صال وبصدر العدو بسيفه نحت
و رسم ضلمه كربلا وبي نورت
الشريعه منبره وبيهم خطب
اشهدو العباس طشره الركب
صوته بيهم يعتلي انه ابن حيدر علي
اسمه عباس
******************************
يصول ويجول وعلي بحلك الخطر
ايطيح الفرسان جن طيحه مطر
من الضلام المشرعه ابعازة كمر
نزل يمها وجن نشف ريكه النهر
سالفه خَيِر ترى عنده الحرب
ولو زعل عباس يكلبها كلب
بجفه يردمهم ردم ويدري مابيهم زلم
اسمه عباس
******************************
كام يحصد بيهم بكيفه الفحل
جن بيادر بالجثث سوى الكفل
اليصل يمه ايعيش ما عنده امل
راس اخو زينب تره بغيره اشتعل
صاح كثر جيش ها يبن سعد
خلصوا ذوله شني ما اكو بعد
بكيفه لزمهم سره وجنه يوم لاخره
اسمه عباس
******************************
عالشريعه عاد يوم الكنطره
شو ثواني وجن كلبها مجزره
الروس جوه الخيل جنها امطشره
وخطب بيهم هذا شبل القسوره
خطبة العباس اكضي ارجالهم
شردوا وضلت عجاجه اترابهم
ونزل جنه الزلزله يهنيالج كربلا
اسمه عباس
******************************
وكالوا الكافل وكع عالنهر مات
ما دروا عباس يسحل بالفرات
و شمره كبال الخيم يم البنات
جن شعاع ومن يهد بأربع جهات
اتحزم بخاجيته واشتد القتال
وبقت بس الخيل ما بيها رجال
العده ضلت ترتجف الشرده منعده زحف
اسمه عباس
******************************
خادم الطهر الكرام
مرتضى الشمري

ام البنين ع


وصيتي يبني هايه عالنهر دگ ثايه
ارسمني صوره بمايه يبني عباس
1
يبني لو زينب نختك خلها هاي ابالك
عبد گدام العقيله تگوم كل اوصالك
تنتفظ بيك الرجوله جبل كون اخيالك
كون حدرك تطوي يبني كربله بفعالك

لو نطتك جودك سرفن الها زنودك
اعرف انا بزودك يبني عباس
2
تبتسم يبني اريدك لو رحت صوب النهر
كون اسمعه الجيش يصرخ استعدو للخطر
خلها عدوانك تشوفك ابو فاضل بالنظر
بس لونك درت يبني حيدر يصير الظهر

واللي ميعرفونك خزره من عيونك
كلهم ايهابونك يبني عباس
3
تبختر بكيفك ييمه وخنگ انفاس الهوه
ضلمه سويها الشريعه ونته تتمايل ضوه
بروجه كون الماي يعثر من تدگ فوگه اللوه
خلّه يفهم ما تشربه وياصبر بيك التوه

الماي شيله ابايدك وخل يشوف عضيدك
ما يمر بوريدك يبني عباس
4
جرّد البتار يبني ونگلب كلك زعل
وصيح صيحه هاشميه انا ابن خير العمل
خلي عزرائيل يقبض بالزلم گبل الاجل
وللبطوله الحيدريه يبني صير انته المثل

تفنن انته بكيفك من تجرد سيفك
واخذ منهم حيفك يبني عباس
5
كربله بعينك زغيره إلويها بين چفوفك
الخيل بالطف يمه اريده يعثر امن ايشوفك
سجل التاريخ چلمه وكتب انته حروفك
الكلفه عندك بالشدايد جزء من طفوفك

ياطفوف اتديرك ضايعه بتفسيرك
للشدد ما غيرك يبني عباس
6
سوّي مستقبل وفائك مثل ماضي حيدره
يبني صير الموت بالطف لو اخذت الگنطره
عثّر الگاع بدبچتك والزلم تلزم سره
منظر الطف كون اشوفه مثل يوم الاخره

بغيرتك وحساسك يمه ارفع راسك
ياهلا بنوماسك يبني عباس
****


الشاعر اياد الديراوي

السلام عليكم اخواني خدام الحسين ع
اي(رادود) ما محضر برنامج لحد الان
يراسلني وادزله برنامج جاهز
وانه خادم وممنون

تفضلون علينا وخلونه نخدمكم

هذا معرفي 👇
@hplla

والي عنده قصيده وما عنده لحنها 👇
@moatmed2

شتحمل ياكلب من راحو احبابك
عليل انته وبعد شيلملم صوابك
أبد لا تنتضر كسروك العزاز
حسينك بعد ما يوكف على اعتابك

مو من عوايدكم يهاشم...
تعوفون علوية ومريضة..
أنه العزيزة المالي والي...
ارجعلي ياشيخ الفريضة..
مستوحشة وداري غريبة...
وصعبة الكلب لو شال غيضة..

شكد صحت ٠٠٠ تانوني ما تإنوني
شكد نحت ٠٠٠ من وحدي خلوني
مــو مـرض   ٠٠٠ ذبلني لا مجفاكم
وانـــتــهت   ٠٠٠ ايامي من عفتوني
ـــــــــــــــــــــــــــــــــــــــــــــــ
أصعب لحضة من اهلي يودعوني
وعلى خدودي مطر عيني وشحب لوني
عشت دور اليتيمة بوكفة الباب
بحسرة انضر اتانيهم يصيحوني

أدري ألابو تكسرة بناته...
كل دمعي ما كاسر حنينك..
معتازة بس جلمة تعالي...
سار الضعن جا بوية وينك..
شلون احملت كسرة عليلة...
تمشي وتطيح اكبال عينك..

بابا وين ٠٠٠ ماشي بخواتي ورايح
يالحنين ٠٠٠ زعلان خل نتسامح
كلشي لا ٠٠٠ تعوف المرض ياكلني
يا حسين ٠٠٠ كلبي اعله ضعنك طايح
ـــــــــــــــــــــــــــــــــــــــــــــــ
طفلة وكل اهلهه تعوفهه تسافر
كدامي ضعن كلبي حدة وهاجر
مشت قافلته وانه اصرخ بالدموع
أموتن بوية ما طول انه الباجر

يمشي الضعن وركض وراهم...
واصرخ نسيتو بنية ضلت..
انبح صوتي ما جني اصيحن...
بوية وغلاتك روحي خلصت..
مابيه شي من حمليتو...
عفتوني منهه وروحي مرضت..

بوية ليش ٠٠٠ تخليني اصير ايتيمة
بوية ليش ٠٠٠ نجمة وتسدني الغيمة
والحياة  ٠٠٠ ماتسوة من دون اهلي
شلون اعيش ٠٠٠ والكلب طفح ضيمة
ـــــــــــــــــــــــــــــــــــــــــــــــ
ضعن عماتي يكتلني ترة فراكة
شلون اكضي العمر ليش ابقى مشتاكة
الهدت حيلي منهه وطحت عالكاع
خواتي تعدن وكلمن على ناكة

تعدت رقية اكبال عيني...
وتوميلي بيديهه الحنينة..
عالكاع متوسدة واناشغ...
تمشي وتباوعلي سكينة..
خطوة الابل جم حسرة بيهه...
بجيت عين اهل المدينة..

وألابل ٠٠٠ تمشي وتمرمر روحي
بلا أمل ٠٠٠ أئيست زيد نوحي
ما يرد ٠٠٠ سار الضعن بالراية
مو سهل ٠٠٠ الحسين زاد جروحي
ـــــــــــــــــــــــــــــــــــــــــــــــ
مشى بعيد الضعن غوش على انضاري
أئيست ورجعت بدمعي لدياري
مريضة وخاف اطيح ومحد اوياي
احترك ثوبي عليه من كثر ناري

البيت ما ينطب بعدهم...
كل خطوة بيه جروحي تكبر..
متعودة اشبك بي عضيدي...
ألعود اخوي الاسمه الاكبر..
وكل ليل اهز مهد الغوالي...
واليوم فاهي اليل يقهر..

والحزن ٠٠٠ والخوف تارس كلبي
والزمن ٠٠٠ من هظمي خلاني احبي
كلي أه ٠٠٠ امن اوكع منو يكومني
بلا وطن ٠٠٠ امشي واطيح بدربي
ـــــــــــــــــــــــــــــــــــــــــــــــ
عباس أديب المالكي

أبوذيات العليله،،ع،،


يعــرفه الستر شنهي منعله الباب
الهـــــوه لو ما يعرفه منعله الباب
العليله الهسه تلهج من عله الباب
بگبرهه وتبچي وي كل مغربيه...

الهوه يــاخذ دليلي عتبه عالباب
بكثر مــاخله دمعي عتبه عالباب
وذا ردت أنه أعتب عتبه عالباب
نفس الزهره ناره أتعيش بيه


نار..أفراگ.. مدري شفته عالباب
وكتنه أوحي ربنه شفته عالباب
أبوي أشما أغمض شفته عالباب
وفزن والملاگه أتموت بيه

✍️ خادم أهل البيت،،ع،،
أبوحسين السرگودي...🕊️🕊️🕊️

احسب ساعة ساعة الجيت اظعونك
مااريــد الضعن يلفيني م̷ـــِْن دونــك
•اللّـہ̣̥ ايعين كلبة الفاكد اعزازة
*********
كل اغروب… كلبي ايلوب
اعاين عالدرب هلبت الك ردة
طول الليل… دمعي ايسيل
موكتلي اجي شو طالت المدة
شكد تانيت… باب البيت
مل مِڼـّي ترة ومليت م̷ـــِْن عندة
تبطي اهواي… بس ابهاي
باب اضنوني اسدة وبابي ماسدة

اعــرف ما تجيني وانــتظر جيتك
ودي ويالــهــوة مرسال لــبنــيــتك
عيني الشوفتك كل لحظة تتوازة
**********
صفنة ليل… تعبر جيل
اصحة والكة روحي الشيب ماكلهة
رسمت انسان… عالحيطان
مــرة ايكود بنــتة ومــرة شايلهة
مرلي بيوم… طيف ابنوم
تدري انتة غيابك روحي شاغلهة
اجروحي اتهيج… فكة ريج
دمعة ومن عذابك شوغة اݘملهة

افك ريجي بدمع والزااد ما اظوكة
سبب موت الشجر تلكاه م̷ـــِْن اعروكة
عازة والابو فكدة صدك عازة
********
كلشي انساه… ونسة ال أه
م̷ـــِْن ترجع يبوية سالم الدارك
ݘنت اوياي… نبتة وماي
احس انكطع منهة الماي واخبارك
مابيه نور… ظل مهجور
بيتك جان يضوي ابشعة انوارك
عكبك صار… كوم احجار
رد لية يغالي ولمني بكتارك

بيتك سجن صار اسئل حياطينة
م̷ـــِْن رحتو الهوة ما طب روازينة
عليلة وردت طولك لايدي عكازة
***********
ناعي البين… صاح حسين
مات ابكربلة وظل عاري عالغبرة
عرض ابطول… فوكة اتجول
خيل الاعوجية وهشمت صدرة
وبكل حيل… ذيج الخيل
داست ونطبك صدرة على ضهرة
فوك ارماح… راسك راح
بسورة أم حسبت يرتل ويقرة

م̷ـــِْن صاح الحوافر داست اضلوعة
حتة  المــا يعرفة  طاحت  ادموعة
بهت لوني عكب ماجنت ألمازة
*********
اتأخر ليش… لٱ مااعيش
أتاني ابموتي ياخذ روحي يومية
حيلي ايبيد… لٱ ماريد
اتعذب  بــعد  يالمــا  الك  جــية
بوية حسين... أه يحسين
انعة والطم اعلى الصار ليلية
كل عاشور… دمعي ايفور
اذا زينب اكبالي اجيب طارية

روحي ابكل مسة اتحن الحبايبهة
واني  الذبحو  بــالطف  كرايبهة
المثل حسين ابوية شلون يتجازة
***********
تمت بنظرة مولاتي العيلة
كَلَّمَـےـاتِـ الخادم… حسين حمدان الدلفي

منتظره جيتكم كتلتني فركتكم
حكه دليلي من يشب نار
امضيعتلي نجمه وربع اقمار
***************
ظلمه السمه وماكو شمس من غاب عني اهلالك
اقره دعاء الندبه الك مدري الفلق اقرالك
بحساسك برودة شته وصوره عطاشه ابالك
ويحسين اموت بحسرتي لو ما وصل مرسالك

عنك ييمه اسأل ورده وبديت اذبل
عجل يطير وجيب الاخبار
امضيعتلي نجمه وربع اقمار
****************
ماتت صباح الخير امس من فاركت وجه الخير
بدموعي غصيت وصحت عينك عليهم يا طير
بالدار اشم عطر الاهل اشتمه والروح اتحير
ام البنين بكربله خدامه تتمنه اتصير

ميته اعله شوفتكم يا محله ذكرتكم
وحشه بجفاكم صارت الدار
امضيعتلي نجمه وربع اقمار
******************





يحسين تدري الاربعه امك الك نذرتهم
كل ما احن الهم كمت اتباوع بصورتهم
جم حيل وياهم خذو من هاجرو ديرتهم
عافوني وانه اشكد جنت مستانسه بشوفتهم

ضليت اتانيهم وكل رجعه ما بيهم
سافر حبيبي وفكري محتار
امضيعتلي نجمه وربع اقمار
****************
سافر ضعنهم وبتعد والنوح عذب حالي
وهيه المصيبه صورتك ما تنمسح من بالي
حته الهوه بريتي اختنك من فاركيت الغالي
ويحسين ضل من الدمع ما ينقره مرسالي

ذاك العتب عفته ومرسالي شككته
بدربك بكت مشبوحه الانظار
امضيعتلي نجمه وربع اقمار
*******************









ربيتهم وادري الولد لا ما يضيعون ارباي
وعباس من دك صدره الي معناها هوه الوفاي
يالماشي لدروب الخطر وتريد تكطع وياي
وياك اخذني الكربله وخليني اوزعلك ماي

ما اهتم بولدي وانته المهم عندي
ماريد ابد كلتهم اعذار
امضيعتلي نجمه وربع اقمار
*****************
ايامي انته ولو رحت شلي بعد بيامي
راح اعله كيف بروحتك باجر تموت احلامي
عباس من جاب اخوته وهز العلم كدامي
كلالي يمه اطمني ورتاحي زين ونامي

يايمه وعيونج ولدج يجازونج
وبالدم نضحي لبن الاطهار
امضيعتلي نجمه وربع اقمار
****************
تمت
تحسين الخفاجي

مدد مدد ياام البنين

•••••••••••••••

ياولدي ويازودي وملحي
بفزعتكم يتخيط جرحي
الفلاح يضل يرجف كلبة
من ينجاس كبالة البرحي

فزعتكم ياولدي الموعد گرب
كون اسمع بالحومة مشامر رگب

••••••••••••••••

الكال انتو منين بطبتكم
صيحو البدوية مربيتكم
طيحو اكبال اوليد الزهره
جا المن انه مخلفتكم

هزو الطف والكوفة بدكة رجل
ماريدن اي واحد يرجع عدل

•••••••••••••

ابن الزهره ويطلب عونه
كلشي ولايركب ميمونه
لتخلونه يطلع احجـاية
افتهمو احجاياته امن عيونه

غير انتم يزماطي رب الثگل
غيرتكم ماترضه تميل العگل

••••••••••••••


مخلفة ازلام البيهم هده
واحدهم حيل الله بزندة
اسباع ولو طبو بالعركة
عزرائيل يكزبر جلدة

امعلـمتهم ع الـهيبة وشيـل العـلم
يضم راسة المن ضهره يضربه السهم

••••••••••••••

ماعنــدي اليختل بطلابة
ولاعندي الضم وجهه انكابة
العباس ابني وبس بالكلفة
لو دك صدرة تهب عطابة

اموصيته اعله الخيمه يشمر نهر
ومن عين العلويه يبدي السهر


•••••••••••••••


حلوه الهدة وي الهلهوله
عايلهم همه اليرحوله
اليندك بيهم ولدي اعرفهم
من زرف الابرة يطلعوله

كلفين وخوتهم خوة عشك
وحسين بوكفتهم ماينسحك

•••••••••••••••

فدوه اطيحون اعله الخيمة
خلو الدم يوصل للغيمة
عباس ابني اتذب جفوفك
من تسمع زينب بالهيمة

ذب عينك وجفوك فوك الخدر
خل اسمع من بيتي صوت الطبر

••••••••••••••

عفية اولادي الجنهم مطرة
كشختهم بس فوك المهره
خلوني اتنومس برگبكم
ماريد افشل يم الزهره


يتباهه بوكفتكم رب السمة
سجلوني بغيرتكم يم فاطمة

•••••••••••••

#حيدر_شايع

مولاتي ام البنين ع

من رد الضعن ومكشفه النوگ
ركد حيلي ويبس گلبي من العروگ
من عدهه وعرفت احسين مذبوح
وزينب بالخرايب باقيه اتنوح
ــــــــــــــــــــــــــــــــــــــ
عليه رد ضعن لعزاز لجن اعزازي ماهمه
چنت انطر يرد احسين لچن چابولي بس دمه
گالو من كفاه مذبوح ومنه طايحه العمه
يبعد امك اسم الله عليك من الذبح يايمه

يشيخ الطايفه وملحت عمرنه
كسرت عوود اصوابك كسرنه
يطلابه الفتنا ويا نهيبتنا
حسين العدنا كلشي راح من عدنا
ــــــــــــــــــــــــــــــــــــــ
كلت يرجع واسولفله شعمل بحوالي افراگه
شعل بضلوعي موگد شوگ مايطفه الا بملاگه
اصارع وي روحي اصراع بكثر ما اله مشتاگه
انه امخضر ابروحي الشوگ من اول خطوة للناگه

عطشانه اعله شوفت وجهه الحسين
حيره امنين اجيبن شوفته منين
مابيه يغيب حسين هل گد
انفاسي بغيابه گوه تصعد
ــــــــــــــــــــــــــــــــــــــ
بطل حيلي عله سجاد رجع تارس عباته الدم
ويون كل ونه منهه اتشوغ روحه وحيله يتهدم
ويصرخ ياهو منكم شاف ابوه عالغبره وامثلم
لهسه اسمع كسر ضلعه وصلنا لحد المخيم

حرموني من ابوي وچلمة البويه
وماضال عدي اخو واندهله خويه
كل اعزاز گلبي صارو ابعاد
هذا چان حاله علي السجاد
ــــــــــــــــــــــــــــــــــــــ
ضيعت العرف بم عون الدرب الشام گاضيها
زينب موش زينب ذيج الحزن غير معانيها
شحال الحرمه من تشوف الخيل ادوس واليها
وهوه شلون والي حسين يسوه الدنيا والبيها

وافراگ الگمر گطع چبدها
خله ادموعها اتعيش اعله خدها
الزلمه الزين يكسر لمن ايروح
واليحبه يخلص عمره مجروح
ــــــــــــــــــــــــــــــــــــــ
يمته ما تجيها تنوح وصاير كل حچيهه اونين
وعله طول الوكت تندب (خويه حسين آخ حسين)
يروح اختك افراگك موت گبلك ريت اخذني البين
انه كل ثانيه ابلياك اعيشن وجع مال اسنين

خلصت روحها وتعبت تره اختك
وجافاني الهنا لمن فگدتك
على طول الوكت هذا حجيها
واگابلها انه وابچي البچيها
ــــــــــــــــــــــــــــــــــــــ
اضلم يمه عمري اخلاف وجهك ياصبح عمري
وگمت احسب لموتي احساب بلكي ارتاحن بگبري
باهت كلشي بعدك صار وحسرتي تاكل بصدري
حالت زينب ابلياك هيه الهدمت صبري

الله يعين لمفارگله معشوگ
يضل يطحن ابگلبه مزاحم الشوگ
العيشه المن بعد وحسين مابيها
اناطر يمته روحي الموت يلفيها

امير الساعدي

يمه روحـو بالضعن      صيرو لحسين الوطن
رايـــــده حگ اللبن     يولدي
ــــــــــــــــــــــــــــــــــــــ
هذا حگي      وكلشي الكم طايح
هذا حگي      كون اخوكــم رايح

يلا گبل حسين شــــــــدوها المحامل
وشوفو زينب كون مو هودجهه مايل
يمه عثمان اخذ اخــــــوتك واستعدو
وانته ضل اسمع وصيتي يابو فاضل

لو شمس تطلع اريــــدك كوسر
كون اخوك حسين مايتخوصر

لاتخليه يلتـــــفـت      كلشي گله نفذت
انه المن خلــــــفت       يولدي
ــــــــــــــــــــــــــــــــــــــ
افتخاري       وكل تعب مرضعكم
افتخاري       يكبر مــــن اسمعكم

وجهي بيضتــــــــــوه يولادي النشامه
صيرو حيدر باتو بفــــــــراشه ومنامه
هوه چـــــم حسين بالدنيا احنه عدنه
من يميل اعگالـــــــــه نزعوها العمامه

كون بويـــه بكربله اتسمونه
لحد ايحط عينه بين عيونه

من تحــــط القافله     وماي ماكو ابكربله
اربعتكم عطشو اله     يولدي
ــــــــــــــــــــــــــــــــــــــ
هاي اختكم       لو مشـــــت برحالهه
هاي اختكم       مسحو حته اخيالهه

ماتلوح الگاع كون اجــــــــــدام اختكم
الناگه من تتعب احملو الهــــــودج انتم
مثل ما محد عرف عـــــــــد علي زينب
حاوطوها وگولو هــــاي أمنه النشدكم

الينشد اعله الناگه ياهي الصاعده
ضيعو زينب گـــــولو هاي الوالده

گبّعو الناگه ابعـــــــلم      نصبو بالليل الخيم
صيرو يم زينب خدم      يولدي
ــــــــــــــــــــــــــــــــــــــ
يابو فاضل       ياچبــــير اخوانك
يابو فاضل      اليوم كفهه اردانك

يمي تتشاهد ومــــن هسه انه اگلك
تروح ميت حته خاف ايموت گبلك
حسين يسوه الخوه واتمـــناها يمُه
بعد عندي عشرة ويطلعــــون مثلك

كلهم العباس اســـمي اسمائهم
وين مايمشي الحسين اوياهم

من يصيـح اباي أسم       جاوبو كلهم نعم
العايـــل ايرشونه دم       يولدي
ــــــــــــــــــــــــــــــــــــــ
ذكرياتي       چنت اسولف بيكم
ذكرياتي       وعلي گـال اعليكم

ولدي كلهم زود واربـــات ايدي هايه
منهم الارواح تطلع مــــــــــــو عبايه
بعد عباس اعله زينــــب ما اوصيك
وما اريد اعليهه اگلك شــــدلي رايه

دير بالك زينب ايشــــوفونهه
يبني حته الناگه شد اعيونهه

الخيمه لمن تنّــــــــــصب   خلهه بالناگه تطب
ويمهه خلي الشط يصب    يولدي
===================
راح اتاني      للضعن نطـــــاره
راح اتاني      يمه اريد ابشاره

باچر الله لايگـــــــــــــول ورد ضعنكم
خالي من حســــــــين وانتم ماشفتكم
اهنانه راح اوگف ابطولي وراح اگـولن
احزامي خوش احزام لـــــمن حزمتكم

باچر اتجازوني تعب العـــيشه
ومن ابو فاضـــل اريدن ريشه

هذا نيـــــــشان الگمر      يعني طاح اعله النهر
ذخر ليامــــــي وفخر      يولدي

عبدهم
شاكر الصيمري

ركضت طوعه صاحت والدمع طاح
ثكيله الروس هاي الفوك الرماح
ثكيلات _ عزيزات _ مشبهه عليهن اهواي
///////////////////////////////
يوم من الأيام _ واحله من الأحلام
الليل اجه بسرعه _ مسلم صعب وظعه _ صلاله جم ركعه
كتله الدمع ليش _ كلالي ماعيش
وصاني ياطوعه _ ويدك عله ظلوعه _ سولفلي بدمعه
باجر تسمعين _ طب ظعن الحسين
نسوانه مسبيه _ انطيهم اميه _ وسالي عله ابينه

وصف بنتي حميده ويه الاطفال
زغيره اجفوفهه مو يم الحبال
الزغيرات _ سبيات _ اركضي اعليهن ابماي
///////////////////////////////
صار شكثر صار _ اتنطر اخبار
شصار ابني هاشم _ فهموني ياوادم _ ماكو ظعن قادم
ليلي كظه ادموع _ وبالباب الشموع
بالرايح وراجع _ عن كربله شسامع _ عندي ظعن ظايع
جذبت العيون _ من جيتو تمشون
علويه لا تبجن _ الروس هاي المن _ وعليمن انذبحن

زينب مااصدك انتي هايه
وخيالج ما طلع جوه العبايه
حرامات _ حرامات _ بشمس ماعندج افياي
///////////////////////////////
عيني اعله الرماح _ وما بعد ارتاح
مسلم تذكرته _ ايده اعله خاطرته _ من الكوفه حذرته
الراسه كمر ليل _ ينطي شبه حيل
حيرني بوصافه _ حين النظر شافه _ المفطره اشفافه
شفت الفرق وين _ بس نبلت العين
الفوك الرمح صاعد _ مسلم تره وكاعد _ ثنين الشكل واحد
يصد اعليج اشوفه ودخن الرأس
شبه مسلم عرفته هذا عباس
عيورين _ ميامين _ نفسه الغيره والراي
//////////////////////////////
هذا الوجه شاب _ ومغيره التراب
من الحبل ينجر _ بعينه الزعل يكثر _ هذا ابو الاكبر
انطيني تفصيل _ اشسوت الخيل
شلون أربعين حافر _ سحكنه بالعاشر _ جاصدره اشصاير
نفس الحجي يدور _ هم شفت عاشور
مسلم صعد قصره _ تالي انشمر حسره _هم انهشم صدره
انشمر من القصر مسلم تكسر
وعله كد كربله حسينج تطشر
نفسهه _ شفتهه _ مصيبه صارت وياي
//////////////////////////////
راح الحجي يطول _ يم الدلول
هذا الطفل شسمه _ يم الرمح نسمه _ لو مرت تلجمه
كلب امه محروك _ منتجيه عالنوك
تكله اسمع اونيني _منتظرك احظيني _ عبدالله ياعيني
عدوانج انذال _ يذبحون الاطفال
مسلم عله فكره _ هم نذبح بزره _ الدنيه صدك مره

شنو ذنب الاطفال الجنهم اطيور
جبيره ارماحهم وزغيره النحور
والاحظان _ بالاحزان _ تلولي اعليهه دنياي
//////////////////////////////
اركض من البيت _ لملكاج انه جيت
بالشيب البراسي _دمعي اجه يواسي _وياج الزمن قاسي
اشبك حميده _ هذا الاريده
الوصاني ابحسره _ موعدنه يم كبره _ تضل روحه منتظره
والكوفه شتريد _ من الاجاويد
عالكوفه كل عتبي _ الطبلها تغدر بي _ منذبح لو مسبي

وجهجن وين هسه بهاي الايام
بعد حركت الكوفه لوعت الشام
اسيرات _ كسيرات _ عليجن يصعب الجاي
//////////////////////////////
تمت______ علاء الزيدي

سفير ومهجتك تنزف مسافات
ضعن حسيـــن كله ابالك يبات

ضعن تفكيرك يصير الكوفه الجيتك بير
*************
يأحساس الترافه
مشت بيك المسافه
وصلت ومن شفتهم ما ارتاحيت

ورا الورده الخناجر
گفاك الطــعن باچـر
قائـــد بالمخطط ما توانيـــــــت

حچيهم كله صار الغاز والغاز
ما محتازهم لحسين محتاز
ذكي كلش وقائد حيل ممتاز
چه ال النبي بعيونك اعزاز

وين الناس وانته براسك اهات
ضعن حسين كله ابالك يبــــات
شهيد بلايه تحذير الكوفه لجيتك بير
*************
شلت ايدك عــلامه
وصرت بيهم قيامه
نسو كلمة حشر حتى المصلين
بچيت انته اعله حاله
يشـــگون الرســـاله
راحن بالدرب چلمات الحسين

خيرهم لگيته يچذب اعليك
قاضيهم شريح وما يداويك
عالمهم خوارج من ينــــاديك
وانته ابينهم كل حيل ما بيك

اشلون توصل لضعنك رســالات
ضعن حسين كله ابالك يبـــــات
اعيونك كلش ادير الكوفه لجيتك بير
*************
تفر بيك المنايه
عزيز بلا حمايــــه
اسكت يا درب عــــلا يسمعــــون
ذبت جنح الفراشه
يبو جروح العطاشه
غريب وكلهم ابعاد اليفزعون

ياخذ كل خيالك هبة الهاب
عطشان ودليلك نار لهاب
على يا باب اجيت بگلب مرتاب
صوت الزهره شفته بفتحت الباب

هفتلك وفه بجنح الحمامات
ضعن حسين كله ابالك ايبات
استحيت ويه التعابير الكوفه لجيتك بير
*************
تگلك ياهو انته
عيونك تبچي سكته
انه مسلم غريب الوطن والناس
ناسك واهلك انه
هلا بأهل الامانه
اعرفك وانتــــه ابن عمك العباس

هذا البيت بيتك وانه خطار
اتفضل جاي اشمن بيك كرار
انه طوعه وابد مابيه عالنار
بعيوني بخدمتك مسلم الدار

وفكرك يلغي كل معنه ابتسامات
ضعن حسين كله ابالك يبــــــات
الضعن صورته تصوير الكوفه لجيتك بير
*************
تصلي اعله الموده
عفت نوم المخده
تسولف ويه سيفك عن السيوف
طوعه تگول اجولك
مسلم جيش حولك
چفك بيهه حيدر تثني الچفوف

كل ظنهم علي يالتخسف الگاع
لاچن والمنيه بساع وبساع
من فوگ القصر صليت الوداع
الشراع يطيح لاجن باقي الشراع

على روحك ابد ما تبچي دمعات
ضعن حسين كله ابالك يبــــــات
يالما بيك تقصير الكوفه لجيتك بير



عبد زينب
محمدالابراهيمي

{ليلة مسلم ع}
#ثگيل
(حميده ع) تقول:


يا مسلم بتك تشتاگ
ومبين ناوي اعله فراگ
مرسالك ما مرنه اليوم
وما مر يم عيوني النوم
ومبين ناوي اعله فراگ
ــــــــــــــــــــــــــــــــــــــ
لهسه ارسومك فوگ عيوني // كلما اصفن تطلعلي انته
و انشد بيك ومتحاجيني//و تدري العاشگ موته السكته
گلبي الحبك حيل يريدك // يا مسلم المن ماخذته
خيط اتمرجح بين امذابح// هيج گليبي معلگ عفته

ضل يزغر گلبي امن الخوف
شگد ضميت لوجهك شوف
وجنازه اعللصفنه تحوم
وما مر يم عيوني النوم
ومبين ناوي اعله فراگ
ــــــــــــــــــــــــــــــــــــــ
هذا المغرب يخفگ گلبي // گلي لوجهك ما مش جيه
گمت ارجف سعفه بنص هويه//بايد حيلي ومدري شبيه
و هللا اليستر يا و الدنه // من يرجف گلب العلوية
يا مسلم فهمني احوالك // ترد لو ايس شنهي النية


بكل صفنة تبين مصلوب
وبوية نسولف حچيي گلوب
يعلم يا گلب الملجوم
وما مر يم عيوني النوم
ومبين ناوي اعله فراگ
ــــــــــــــــــــــــــــــــــــــ
اتغير وجه حسين الليله// اتخوصر شفته امبين فاگد
ما جن كاعد بين خوانه // شو جنه بفاتحتك كاعد
يحضن بيه دون اعياله // چنه يگلي راح الوالد
يابو الحضن الدافي الطيب//شو كلشي اخالفك ضل بارد

اال الماي البارد ذاك
ما شفنه من ودعناك
و هيه اهموم اتجيب هموم
وما مر يمي عيوني النوم
ومبين ناوي اعله فراگ
ــــــــــــــــــــــــــــــــــــــ
طفله وكلشي يريدك بيه //كلشي ايصيح بابا الحگلي
مو گتلي انتظرج بالكوفه// طبيت الها وبيدي حبلي
ما ماشيت ابنيه ابگدي // بس السوط الچان ابحلي
امدافع للكوفه يدخلونه//اهالً ماكو و ماكو اتفضلي

وقصر الكوفه ايتعب الروح
يتراولي هنا مذبوح
هب يا نسمه وكافي اسموم
وما مر يم عيوني النوم
ومبين ناوي اعله فراگ
ــــــــــــــــــــــــــــــــــــــ
كل مغرب افرك بجفوفي//واتخيل ايدك تلزمني
واغفه واحلم رايح مني // وأكعد اصرخ ال لتهدني
اخالف اجفوفك خشنه الوادم//واحبال الناگه تگاودني
شكد دورتك بيه وشفتك // ضايع بيه وضايع مني

المتعوده بحضنك ترتاح
يگوموها وتكعد بصياح
حگ هللا ونرضه المقسوم
وما مر يم عيوني النوم
ومبين ناوي اعله فراگ


مصطفى صادق اللامي

المولى مسلم بن عقيل :

____

بس تمّم صلاته او دار عينه..
بگـه مِفـرد ولا واحـد يعـيـنه ..

تلفّت بلِصْـفـوف او دار طَـرفه
لــن ينـظــر ولا واحـد ابـخلـفه
تحسّر ويل گلبي و صفگ چفّه
على العافوه و أمس امچاتبينه ..

طلع و اعيونه بالمدمع غريجه
او بي ضاجت اكوفه اشلون ضيجه
ما واحد يبيـّن له طريجه
ياخذ بيده او يلزم يمينه ..

أظلم ليل مسلم بعد لغــروب
اوعليه اتشابهت بلكـوفـه لدروب
اشما ينظر يـشوف امغلّگه البُوب
غـريب الـدار بين أهـل الضغـينه ..

لچن الهـيَّـجـه او روحه مردها
اشيگِـل لحسين ابن عمّه ابوِردها؟
الكوفه انگلبـت او خانت عهدها
او كل همّه بگه ابجيّـة إحسينه

يوِن اعليه گام او دمعـته اتسيح
اومن نار التوج برويحته ايصيح
يوَصِّل صـوته راد ابهـبّة الريـح
يبـو السجَّاد سـدّر لا تجينه
__
ميرزا عادل أشكناني

يابالفضل إطمئن لا تلتفت عيناك
ما تحترگ هالخيم ما دامه عالي الواك
1
يالكاسر اخيال الشمس خلي النهر بعيونك
اخيالك عله خيامي سمه لساها يمي متونك
يا كافلي لا تلتفت وستقبل اليلفونك
حراس ذيچ العل نهر خلهم علي يشفونك

ترجعلي بيدك نهر هيچ انا راح الگاك
ما تحترگ هالخيم ما دامه عالي الواك
2
هاي الحرب حسبة نفس ما تصعب اعله زنودك
كل فارس انطي حصّته وتبختر انته بزودك
دگ رايتك يم النهر وحط الشريعه بجودك
ومن انا اشوفك مبتسم يعني وفيت اوعودك

موت الحمر نظرتك ياخويه من يدناك
ما تحترگ هالخيم ما دامه عالي الواك
3
طش غيضك بحظن الهوه وزرع درب بي حيره
بنظرة عدوك چالحلم صير وصعب تفسيره
يالصدرك اوسع من حرب سوي الملاحم سيره
مره انا قستك عالارض طلعت عليك ازغيره

زغر فياي النخل والصارم بيمناك
ما تحترگ هالخيم ما دامه عالي الواك
4
ظهر الاخو ما ينكسر ما دامك اترد لينه
شامت لون يضحك غداً منهو اليصكه بعينه
عباس ظل بيك الامل غيرك منو اليروينه
معقوله تقبل يا شهم ينزل دمعها سكينه

رد خويه نشف دمع كل حره تترجاك
ما تحترك هالخيم ما دامه عالي الواك
5
عشنه العمر خويه بنفس يل شاركتها سنيني
والله لو طرك سهم من يمي تنطر عيني
إحسبها لو چفك وگع هم توگع انا ايميني
انا اعله وجهي لو عمد صابك تره يچفيني

گلي اذا ما ترد حتى انا اموت اوياك
ما تحترگ هالخيم ما دامه عالي الواك
****
الشاعر اياد الديراوي

للأنصار ع

ياغايه الغايه ... من نرفع رايه
بيها الشعار المكتوب لا تحزن العلويه
انصارك وعد عيناك غيرتنه عباسيه
؟******************
يمالكنه ويشارينه ويمولانه
وحك الخله حبك يسري بدمانه
نريد الموته دونك سيدي هنانه
توكلنه لنصرتك والله ويانه

ابشر يبو الاكبر .... لو صحنه ياحيدر
بيهم نزلزلها الكاع همتنه حيدريه
انصارك وعد عيناك غيرتنه عباسيه
؟*****************
تنومس سيدي وبخدمتك احنه
عبيد عيونك وحبك تملكنه
يالحسين لنصرتك الله خالقنه
شنكل للزهره امك لو تراجعنه

كل واحد اتهمه ..... انت ابوه وامه
عدنه المهم نوفي وياك ياسيد وبس هيه
انصارك وعد عيناك غيرتنه عباسيه
؟**************
يما يسوه العمر لو نبقه من دونك
الف موته نموت لخاطر عيونك
الكلب صاير يبو عبد الله مجنونك
وحك عباس اخيك ما يمسونك

ياسيدي نكلك ..... فدوه العمر لجلك
وبحبك اتفيض الروح هم راضيه ومرضيه
انصارك وعد عيناك غيرتنه عباسيه
؟****************
علت صرختنه بالحومه بدمه المنحر
فلا عدنه وسيله غير ابو الاكبر
لبسنه اجفانه بيض وصحنه ياحيدر
ومن صرختنه يتراجف بقه العسكر

وبهجمة اعدانه .... حاظر علي ويانه
ولمن فزعنه عله الجيش صولتنه خيبريه
انصارك وعد عيناك غيرتنه عباسيه
؟****************
بسبعينك نريدك سيدي تفرح
لابن مرجانه نسبيهم اذا تسمح
خبر للهاشميه الليله يتوضح
ما نترك حُسين لساعه المذبح

أنصاره وفايه .... للموته شرايه
والينذبح دون حسين اجره على الزجيه
انصارك وعد عيناك غيرتنه عباسيه
؟***************
يضل عالي صدانه و وحده كلمتنه
العقيله الهاشميه تبقه اميرتنه
ويعلمنه الكفلها بهايه خدمتنه
يتكطع زندنه وتعله رايتنه

دروس الوفه كلها .... يعلمنه كافلها
يعلمنه الاخلاص شلون بالخدمه الحسينه
انصارك وعد عيناك غيرتنه عباسيه

منتظر الجنابي

ذب ويه كل واحد ألف * بخير الوكت بعده
وگفة أخـو نطيح وتِضَل * ما توگع إبشدّه
أمّـن ونام * عندك أزلام
ــــــــــــــــــــــــــ
بثنينهن تامر أمــر خوتنــه لو صحبتنه ؟
جبناها عـالگول وفعل منك أمر . بس نِتـْنَه
والفرصه بس مره تجي وطفك بعد فرصتنه
تذب الثگال وتنتـچي والباقـي يم ذمّتـنه

من باب حُبنه وتنحـچي * ما نوصل إجدامك
خــوان شيوصلنـه إلك * غير إحنه خدّامك
إقبلنه خدّام * عندك أزلام
ــــــــــــــــــــــــــ
شد رايه وحچاية زلم ثق ياحسين وجدك
سبعين موته انموت إلك إنساها تبقى لوحدك
شياب بس وكت الصدگ . لا . نرجع إبگد ولدك
غير انته وجه الله وكفو شكبرك ولاكو بگدك

صح الأصابع مو سوه * بس احنه ساوِينه
نيّتنه أسنـان المشـط * أمّن يبـو سكينه
ضل بلخيام * عندك أزلام
ــــــــــــــــــــــــــ
إسواجي الگلوب وحبتك شمسوي حبك بينه
بطين الله من سوّه البشر ربك عزلّك طينه
مخلوق يمكن للعشگ بيك الله خالق دينه
ودين الله لا. ما ينذبح يتخلد امســوّينه

وللطف خلق ربك بشر * غير انتو أيمّتنه
عالمشتهه اليوم الذبح * موصدفه جابتنه
يبن أبو . إلثام * عندك أزلام
ــــــــــــــــــــــــــ
فزّعنه وتشوف الزلم والطف نجيب علومه
بنادم يعيش شگد بعد كلمن يموت بيومه
الوادم هذيچ الـ عالنهر ماعدها هالمعلومه
لو شايفينك من قُرُب الخيّير يشگ هدومه

والعتب موش اعله النظر * أعمه البصر أهون
لو شايفيــنك بالگــلب * خييـرهم إتجنـن
عدهم أصنام * عندك أزلام
ــــــــــــــــــــــــــ
عن كل حرف نقسم قسم سولَفنه والله الشاهد
لو تدري بينه شگد عشگ مو مال جندي وقائد
سبعين واحد يشبهك وبكل گلب چن گاعد
والحُر . إذا بعدين إجه يزيد إبهيامك واحد

والموت يمك هيچ ألَذّ * طعم الشهد طعمه
مستأنسين بهالأجل * مناغه الطفـل لأمه
وسهله لسهام * عندك أزلام
ــــــــــــــــــــــــــ

مهدي التقي

لسان حال الامام الحسين ع يخاطب الانصار

أناديكــم و لا اســــمع
جواب يسَّكت المدمع
بچيتلكم دمع غالــــــــي لفگـــــد غالي
و نَحَّب ميموني مـن هضم و بچه لحالي
يالانصار يالانصار
ـــــــــــــــــــــــــــــــــــــــــــــــــــ
رحتوا و راحـــــت انفاسي
كسرتوا ظهري و احساسي
طيحتكـم مثـــــل طيحت
راعــــــــي الكلفة عباسي

يعــــــز و حيل يجرحني انادي و مــــــا تردون
يمـــــن چنتولي واحـدكــم شايلــــني بالعيون
يفرسان الصَفه اتـــنـــخه و لا چنكم تسمعون
و تسمعون اطلب الناصر عجيبة و ما تفزعون

باساميكــم أون و الهَج
و جثثهم عالارض ترتَج
حِنيت و ضلـــــــــعي مَحني الكــم اگبالي
و نَحَّب ميموني من هضمي و بچه لحالي
يالانصار يالانصار
ـــــــــــــــــــــــــــــــــــــــــــــــــــ
دمعـــــــتي صارت ابطـولي
دريتــــــوا بيـَّه گلـــــــــولي
نحبت اعليكـم لحــــــــدما
سيفي و درعـي ناحـــــولي

حتى العِمَّة البراسي لكســــرتي صَبَّت ادموع
و لا حاسبكم اصحابي چنت حاسبكم اضلوع
لو واحد وگع منكـــــم اركــض لجــله مفزوع
اشوفه يلوع و استشعــر گلــبي بداخلي يلوع

جمر دهـــري ايا ويلي
حِرَّگ بيكم خيم حيلي
قبل لا نارهم تسعـــــــــر عله اعيـــــــــالي
و نَحَّب ميموني من هضمي و بچه لحالي
يالانصار يالانصار
ـــــــــــــــــــــــــــــــــــــــــــــــــــ
مثلكم عنده مِنْ مثلي
ماشيتوني چــــن ظِلي
لبستوا گلوبكم بالطف
فوگ دروعكـــم لجـلي

دوه جروحي و نظر عيني و نعم مــــن عدكم انصار
ابــــوذر بيكـــــم أتفاخر و سلمــــــــــان أويه عمار
بسالة مالـــك الاشتـــر تجــــــــــــري بدمكم الحار
غِيـــرة سيوفكم تلمـــع مثــــــــــــل لمـــعة الفقار

كسرتوني أشـــــد كسرة
و فجعتوا فاطمة الزهرة
بوجهي الحسرة بانْت حــــــــــــتى بخيالي
و نَحَّب ميموني من هضمي و بچه لحالي
يالانصار يالانصار
ـــــــــــــــــــــــــــــــــــــــــــــــــــ
مـــن رحتـــــــــوا ياسبعيني
وِذَر لَمّـــــــيتها ابنيـــــــــني
الاكبر ياهـــــــــو مـن جاسم
بعـد مـــا فَـــــــــرزِنت عيني

ثگيل إبني علي و شفته من كثر السحگ خاف
اشيلن بيدي خاصـــرته يـــــوگع مني الاچتاف
ابساعة زفته القاســـم آجاله المــــــوت زَفَّاف
بعده بأول اسنينه و لَسَه كلــــــشي مــا شـاف

بدمــــع رمــلة تحنيله
و عله الاكبر عمت ليلة
عليهن دمعي مــــــــــاي و دم صفه يلالي
و نحب ميموني من هضمي و بچه لحالي
يالانصار. يالانصار
ـــــــــــــــــــــــــــــــــــــــــــــــــــ
عضيدي الهـــــــــزلي راياته
مــــا رد اعــله خيمـــــــــاته
تِاخَر و الهـــــــــوى العـــالي.
رد اعلـــيَّه ريـــــــــشـــــاتـه

رحت صـوب الشريعة انزف فاگد روح الاحساس
شفتها اعمامـــــــــتي انسلبت لمــن طاح عباس
نعمة شلون تتگطـع كـــون اچفــــــــــوفه تنباس
واحدهن مثل صـــدري عليه بالحـــــــافر انداس

صرت يَمَّه ادگ و انحب
شگللها بعــــــــد زينــب
عَمود الخيمة من عامــــــــوده إجه ابالي
و نَحَّب ميموني من هضمي و بچه لحالي
ـــــــــــــــــــــــــــــــــــــــــــــــــــ
و الاكلـــف عليَّ و اصعب
على اعيالي الخيم تنشب
و انه اعـــــله الرمح راسي
ابنيتي ارقـــــــية تتسلب

الحوافر نامت ابضلعي مــــــن نمتوا يالاصحاب
سلبـوا محـــــبسي منايدي و سلبوا مني الاثياب
لحيتي ابدمي خضـــبوها و رمل ترسوها و تراب
و زينب ركبــت الهَزلة و حِدَّه ناگتها ســــــــلاب

بناتي فزعـــــن بهيمة
عليهن ما بقت خيمة
سنابك خيلـــهم سحگـــــــت عله اطفالي
و نَحَّب ميموني من هضمي و بچه لحالي
ـــــــــــــــــــــــــــــــــــــــــــــــــــ
الحمدلله
علي حسين الكناني

خويه وينك ، ، خويه وينك ، ،
- - خل اسولفلك بعد - -
_____________
خل ترد عينـك حنينه وسالمـــــه
بالي يمــك مـــن امس ما نايمـــه
مو على الماي اعله طولك صايمه
امدوهنـه ويا گاعــده ويا گايمــه

-ورگبتك بيضه وتغير لونهــــه
- بالرمح يا وسفه ويخربونهـــه

-- ماكله ارسومه الشمس وجه الگمر
-- من الصبح لليل نايــم ع النهـــــر
خويه وينك ، ، خويه وينك ، ،
- - خل اسولفلك بعد - -
___________
واگفه بــصـف اليتامـــه الخايفــه
الـرمـح شابـگ راسـك وما عايفـه
بشيلتي امسح على زنودك نازفه
كلهه هينه وسـهـم عينــك سالفـه

- خدودك اشچم شامه چانت بيهه
- هسه دم وتـراب غطـه اعليهـــه

-- الشمر يركض شبخ جسمك من عبر
-- راح للخيمـه ، وجــرح فگــدك كــبر
خويه وينك ، ، خويه وينك ، ،
- - خل اسولفلك بعد - -
___________
خــل اسولــفــلك شصــاير بينــه
الگـاع تچوي وفرهــدت رجلينــه
چــفــك البـي مـحبسك چـا وينه
الچان يمسح فوگ راس سكينــه

- بنيتــك شــمـا تلـبد يلحگـونهــه
- تلتـفت چــي خايفــه يطگونهـه

-- فوگ صـدرك سيفه سولف بالنحــر
-- ومن گلب جسمك جرح صدرك كبر
خويه وينك ، ، خويه وينك ، ،
- - خل اسولفلك بعد - -
__________
الچانت تنام اعله صدرك دافيــه
خويه عگبـك ركضــوها وحافيه
والعبـــايـه ام الستـر ما طافـيـه
الضيم ماخذ چم گمر چم عافيه

- والعليل الحيله يم عوچيتــه
- فوگ متنه سياط مو خاچيته

-- منين ما مــال الرمح نركـض سوه
-- وشـيبـك المهيـوب يلعـب بالهــوه
خويه وينك ، ، خويه وينك ، ،
- - خل اسولفلك بعد - -
_____________
تدوهنـت لـمن لـگيـت امتونــي
هدلت ، ولون العـبـايه بلــونــي
وفـوگ راسـك والرمـح طگوني
اصفن وبالسـوط ويندهـونــي

- شگد سوالف كون ما نحچيهـه
- راح اسولفهــه بدمع وابچيهــه

-- والمصايب ترســن عيـون السمــه
-- دوست ضلوع وحرگ خيمه ودمه
خويه وينك ، ، خويه وينك ، ،
- - خل اسولفلك بعد - -


- علي مهدي المالكي ،

السيدة زينب تخاطب ابا الفضل العباس
(سلام الله عليهم)

راح اسولف وانته وصل السالفه
للما مبلل كبل اخيه شفايفه
ياهوا وسلملي اعلى عينه الطفت
سهرانه كله عيونها وماغفت
عباس كله الليه زينب خايفه
ــــــــــــــــــــــــــــــــــــــ
ويامن احجي تحيرت ميته الحجايه بشفتي
والليله مــاهوه الكبل جــــانت ويــا سالفتي
غمضهن عيونه الجنت بعيونه اخلص وكتي
المن احجي ما تطلع كبل من حلكه بس ها يختي

ياهوا من حجي وياه چني بحلم
لو سولفت مايحچي بس يبتسم
راح وبعد ماشابعه من سوالفه
ــــــــــــــــــــــــــــــــــــــ
نكعد سوه وجان الوكت وياه يمشي بسرعة
مدنك وراسه شما كعد يستحي كبالي يرفعه
مـاباجيـه كبالـه وجذب يقبل ونينــي يسمعه
من جان ابوفاضل عدل جانت عزيزة الدمعة

عباس راح ورخص هسه الدمع
ونسمع صوتي الجان ماينسمع
ومن البواجي العين ابد ماكافه
ــــــــــــــــــــــــــــــــــــــ
هــاي اول أيــام الجفه وماظن وراها ملاكــه
المافاركيته منالزغر بيش اصبر اعلى فراكــه
للفارك عيوني العصر هسه شكثــر مشتــاكـه
وحنيت للجفــوفه الكبل جـانت تعدل الناكـه

صار الغروب وكلب اخيته انخمش
عباس ماهو شيكظي ليل اهدعش
وانه الظلام بلاستر ماوالفه
ــــــــــــــــــــــــــــــــــــــ
لوشفته يم العلكمي من نحره ينزف غيره
عباس كله الليل اجه وزينب عفتها بحيره
لمو خواتك يا كمر كلهن بخيمـــه زغيره
وكله الخدر ذاك انجفه وخلولي حارس غيره

كله وحياتك كمت اغص بالنفس
ياخويه من اسمع بجلمة حرس
وادم غرب خويه بمجانك واجفه
ــــــــــــــــــــــــــــــــــــــ
يم عينه جدم ياهوا وسلم على صبيهـا الذاب
وكلـه الحنينـــه الربتك ودتلك ويــاي كتــاب
ما اريد اعاتب ياهوا وانه ادري مو وكت عتاب
بس كله خويه الليل اجه وموش واكف بالباب

ماشافتك تحرسها عيني وبجت
متعوده يوكف على الباب البخت
والليل هود وانته ضعنك عايفه
ــــــــــــــــــــــــــــــــــــــ
عباس كله الربتك مردت كلبهــــا الفركه
الماشلت راسك يمها ابد بجفاك هسه مدنكه
انطكت يبو فاضل تره التستهضم من الطكه
وذيج المتون الشالتك بالسوط صارت زركه

الماحاطتها ابالي صارت صدك
ونوكلت ذيال العبي منالحرك
نار وزلم زينب كبل ماشايفه
ــــــــــــــــــــــــــــــــــــــ
اتمنه هسه اعلى النهر كون امشي واكعد يمه
بس ليل وانه لوحدي والليل مو للحرمة
اترس جربته منالدمع وماكله بس هالجلمة
يابوالفضل ماكصرت ياخويه مبري الذمة

وفيت حـــد مـاخجليت الوفه
شبيدك وكوه عليك صار الجفه
مامرتوي وميت ارياكك ناشفه


رائد الناشي