شور

((حيرةّ الحسين بمصرع ابي الفضل) )



وي كل حسره شيبه تصير
لحــد مــارمشــي شـيـبـته
صُوَرك عالشريعه هواي
اباوع والدمع سكته
هيه المشكله ياناس
من أرجع شكل لخته

مشه الغالي... مشه الوالي.... مشه البس هوهَ يبرالي
شنو احچيله... ويرد حيله.... ماترهم واتچيله

گطيعه چفوفه ياخويه گطيعه
غده مَطَشر ابصف الشريعه
وأخر چلمه من عرفاني حسين
بچه وبهداي گلالي الوديعه

خل تعذرني اختنه المنيه حاوطتنه
_________
أدور بالگمر مذهول
ردت بس بوسه ابوسنه
دم وترب والطعنات
وسهام العده حَنه
أردن للمخيم بيّ
اشگ صدري واضمنه

أنه بحيره... بتصويره....وعَليه ضلمت الديره
دمع هامل... يبو فاضل..... گوم وياي يلكافل

گوم وياي وبغيرك ولوني
گوم وياي خويه مو أجوني
وحيد ومالي بالعربان نخوه
يخَوي استوحدوني وحاصروني

عگب طولك لفتنه المنيه حاوطتنه
__________
بنص درب الخيم ونيت
وَنَت حاير وفاگد
أردن للخيم وشلون
أگلهم ضل بلا ساعد
أگلهم مارجع خجلان
وهوه شلون متواعد

أضل انعه.... مثل شمعه... وأزيد النار بالدمعه
شگللها... على خلها...... بعد خطوات واوصلها

لاگتني ودمعتي تسولفلها
عله العباس گامت تشرحلها
فهمت دمعتي من مسرعه اطيح
يعني الچان ضلها راح ضلها

الدنيا وضيعتنه........ المنيه حاوطتنه
__________
تلاگينه مثل جرحين
جرح ويباصر الثاني
صده دمعتها من اطيح
چنها تگول ماجاني
تعاتب چنها ملك الموت
تعال الحگني شمتاني

تعال الحگ... يموت الحَگ... گبل لاخيلهم تسحگ
على صدره... وعلى نحره... مابياش عالنضره

بعدني اسمع سوالفها الأليمه
وبعدهي جروحها تصرخ هضيمه
وبعدها تسولف وياي اعله حالي
دمعها يطيح خيمه ونار خيمه

السكته شيبتنه المنيه حاوطيتنه
_________
بس گلتلها زينب وين
درعي ولامةّ متوني
گلتلي اروح وياك
وخليهم يذبحوني
شسوي بعمري وبلياك
والمن تنضر عيوني

انه اتصور..... أضل منحر.... شگلها وتدري بالمنضر
الضهر حدب...الگلب شيب... أحفضي العيله يازينب

بجينه ثنينه وشبگت عليه
تشم بنحري وتبوس بإديه
وتگلي بغيرك الهزله عزائي
وراح تشوفني امشي سبيه

الغربه طشرتنه المنيه حاوطتنه
__________



عبد زينب
محمد الابراهيمي

فزاعيه

شلون مصيبه العباس يازينب حملتيها
ــــــــــــــــــــــــــــــــــــــ
من رحتيله صوب الماي ... يازينب حملتيها
ماكتيله كوم وياي ... يازينب حملتيها
زينب تاه منها الراي ... يازينب حملتيها
اخيتك گوم حاجيها
شلون مصيبه العباس يازينب حملتيها
ــــــــــــــــــــــــــــــــــــــ
جيتك واعثر بهمي ... يازينب حملتيها
النار مچلبه بردني ... يازينب حملتيها
ماتكعد يخال ابني ... يازينب حملتيها
خيمنه هجمو اعليها
شلون مصيبه العباس يازينب حملتيها
ــــــــــــــــــــــــــــــــــــــ
ياعصابتي اعله الراس ... يازينب حملتيها
جيتك باخر الانفاس ... يازينب حملتيها
حسين بخيلهم ينداس ... يازينب حملتيها
عباتي كوم طفيها
شلون مصيبه العباس يازينب حملتيها
ــــــــــــــــــــــــــــــــــــــ
صعبه شيلت الوليان ... يازينب حملتيها
مو واحد خمس خوان ... يازينب حملتيها
جيتك ياكمر عدنان ... يازينب حملتيها
درب الشام ماذيها
شلون مصيبه العباس يازينب حملتيها

سيد عباس العقابي

خطاب زينب للعباس ع


قريت بوجهك احزانك وجع مكتوب
دمك تارس التاريخ موش الثوب ،
وتصح مره متاع الاخ للمتعوب ، ،
نتلاگه بتعب يسوه ورفيف گلوب ، 

-- يحزني الحده مو يمك ، ، ،
-- الدمع متبدي فوگ اسمك ، 
-- وحلمي يسولف بحلمك ، ،

على متون الهوه == رسمتك يا ضوه ،
خذاني شچم حزن == يا شيخ اللوه ، ،
_____________
يرب السالفه التنگط حچي ورباط
حويت الغيره والناس الهه بس نگاط
رمش عينك أمان اعله الخيم وگماط
شحلاتك يابو فاظل من يصير ازماط

يروحي العايشه بضلك
اسولف بيــــك ما ملك
چــذب ماواحد بحلك

على عيونك رسم == أثر جربه وخـيم
صفنت اشگد عليك == ولا مرهن سهم
_____________
يبس عرگ الخيم والنار شدت حيل
وطلع وجه الغروب وبده يبان الليل ،
الخيل استفحلت داست بصدر الهيل ، ،
ورسمت خارطة جرحي بركضها الخيل

-- السهم صحوة ضمير الدم
-- شرب لونك ورد يحلم ، ،
-- يمذبوح وفلا تسلم ، ،

على المامش صحت == ترد خويه ردت
گبالك ردت اموت == وعلى جسمك طحت
_____________
نسيم انفاسك اشگد بي امان اشتم
نضرتك چــــانت اتعادل الف زمزم
هضمت العطش وفراگك فلا يهضم
تعال الليل يشلع گـــلبي لو خيّم

مطر فرگـاك تفسيره
طحت وتبللت حيره
تشح اخلافك الغيره

اذا نيتك سفر == وراك اطش نهر
ولاتغفالي عين== اذا ماكو گمر
_____________

#مشتركة
- شاكر الصيمري ✍
- علي مهدي المالكي ✍

انه زينب بالله طول يا فجر
والله زحمه بلا كفل يمشي الخدر
باجر اهات وهجر
ومن بعدها الضيم دكالي الصدر
******************************

يا فجر بالله انتضر رايده أشتم هل العطر
جنه عطر الزهره بثياب الحسين
الخيم باجر تحترك وابدي منعدها اختنك
صعبه أشوف النار تحرك بالصواوين
ما بقه عن الصبح حسين باجر ينذبح
وابقه انا الوحدي والعده بصوبين
جروح باجر تنولد اول جرح لمن اصد
علشريعه جفوف هايه و سهم بالعين

يا فجر علقاع اخويه ينشمر
والمصيبه اعله الصدر كاعد شمر
وخنصره هم ينبتر
ومن بعده الضيم دكالي الصدر
******************************
ثاني جرح جرح الولد هذا الألم اصعب واشد
ألله يعينج ليله باجر عله المصاب
يا ليله ابنج من طلع الكلب من هرشه انشلع
واني ادري الورد ما يحمل عتاب
تحزم حزام الحزن يوذر الاكبر اضن
شمالها الدنيا نوت بس عاشباب
الاكبر ضماد الخاطري لوراح افكد ناضري
والترافه شلون ضماها التراب

خايفه الاكبر يرد باجر وذر
ويجوز ما اعرفة لان ما بي نحر
وامه يرجع تنتضر
ومن بعده الضيم دكالي الصدر
******************************
ثالث جرح واصعب جرح العريس باجر ينذبح
واحلام رمله اعله الارض كلها تبده
شلون لو باجر اجه مخضب ومنه ارتجه
يمه كطرة ماي رايد والله شده
سكينه باجر من تشوفه تضمده وتقبل جفوفه
والله موقف ورده كعدت تنعه ورده
يا حسافه ويا حسافه سكينه فكدته الترافه
من الترافه الورده عيشتها النده


خل اكلك يا فجر عن الضهر
الورده يطلع بيه جناز العطر
وكسر الورد ما ينجبر
ومن بعده الضيم دكالي الصدر
******************************
رابع جرح ما ينوصف حتى الحجي فاكد حرف
و المهد خالي يا فجر كام يتراوالي
كام يتراوالي الطفل باجر يذبحوه بنبل
الما يندفن بل القاع ادفنه ابالي
علمه صعب كلش تره وهذا السفر مو للمره
عادا يسيلها الطفل من تذكرالغالي
بالمهد جانت من تطر انه اسمع اذان الفجر
الدمعه والونه سوى عالخد تلالي

الجان روحي وجان بعيوني كمر
شنهو ذنبه يطيح عالكاع المطر
وسفه ضماه الكبر
ومن بعدها الضيم دكالي الصدر
******************************
بخامس جرح اي يا فجر جن راح من عندي العمر
جفوف اليحبها حيدره باجر يكطعوها
وعيون شيال العلم باجر يسدوها بسهم
يا ريت باجر عيني لو طفوها
شكد حلو جا ماي النهر ما ضاكه شو جنه عبر
تارس جربته وجاي بس بدوها
الرايه حالف ما تكع كطعو يمينه وما نفع
بالغيره شال الرايه ميوكعوها

باجر حسين اعله اخيه ينكسر
ومن يطيح الكفل ما يبقه خدر
وكافلي يسلم الامر
ومن بعدهاالضيم دكالي الصدر
******************************
لو احجي عن سادس جرح ميضل كلب ما ينجرح
باجر اخوي احسين ينحز نحره
الرسوم بعيونه علي باجر يذبحونه الي
وعله الخيم باجر يصد ويسلم امره
ويكعد عله صدره النذل يضربه اثنعش ضربه عدل
ياريت عميه ولا شفت هالطبره
وخيول عشره بكل حقد تمردله اضلوعه مرد
وثيابه توصل يافجر للخيم حمره

ها يكلبي اشلون تحمل ها لامر
من يضل حسين عاري بلا ستر
وعالصدر كاعد شمر
ومن بعدها الضيم دكالي الصدر
******************************
يا فجر كل هالمصايب الموت وفراك الحبايب
كلها سهله والصعب زينب سبيه
ايدي مجتوفه بحبل ويحدي للناكه النذل
وانهضم كل ما اشاهدها لرقيه
ويلي وبديره غرب لمجلس ايزيد من اطب
يضحك بصوته ويكلي خارجيه
واصعب وأشد الالام ويلي طبت الشام
حيلي يخلص يافجر وشيبقه بيه

الوادم اعلينه تباوع يا فجر
وشنهي ذنب الروس ضلت تنتضر
من الشمس صارن سمر
ومن بعدها الضيم دكالي الصدر
...........................
خادم الحسين
مرتضى الشمري

جرح .... جيتك وعثره الدرب
جرح ...... فشله والوادم غرب
من يردني تحيرت
وانه بالكوه وصلت
جرح .... جرح
.................................................
خويه اذا تسمعني كلي انته وينك
جفوف المن هاي شو جنها ادينك ؟؟
كبل جفك جانت التشبكني عينك
منين اجه وطب السهم بيني وبينك

عتب ..... حشمت محد فزع
عتب ..... حسين بس كام وكع
عمت عيني صيحت
وانه بالكوه وصلت
جرح ... جرح
..................................................
جيتك ونار الكلب تشبه خيامي
منين اجيبن للخدر مثلك محامي
حاره ولمن طحت بردن عضامي
وكبل ما امشي ردت ابعث سلامي

الم ...... بكل كتر انضر نحر
الم .... طايح حبيبي اعله النهر
ترجف عضامي وطحت
و انه باالكوه وصلت
جرح .. جرح
................................................
نارك و نار الخيم حركت سنيني
الخيم هفتت لجن ما يهفت ونيني
و انه ما بين الخيم ردتك تجيني
شوفتك زمزم واجيتك اروي عيني

حرت .... جلبت سكنه بأدي
حرت ... وين اردها وما اكو في
بهل الطلابه تعذبت
وانه با الكوه وصلت
جرح ... جرح
..................................................
ها يدواس الليالي عبروا حدهم
بلا اذن للخيمه شو طبو وحدهم
و شامت يكلي اخوتج ما شفتهم
مو وكتها نومتك د اكعد وردهم

هضم ...... للخيم من دخلووا
هضم ...... طاح اخيج هوسوا
لختك الحك عاتبت
وانه بالكوه وصلت
جرح .... جرح
....................................................
يا هضيمه انطفي خيمتنه بادينه
وشامت لشامت تره اتنادسوا علينه
و شأرد اكولن لل حرم طايح ولينه
ومدري االمك مدري المن باالضعينه

صعب ..... ما يرهم لجرحي دوه
صعب ...... يسلبون بثياب الضوه
لهاي ابد ما حسبت
وانه بالكوه وصلت
جرح ..... جرح
.......................................................
و الله مشتاقتلك وداعت غلاتك
خويه كلي الذبح هم خرب حلاتك
و انته طايح ووكفت كل ذكرياتك
جنت تزعل لو هوى يمر بخواتك

وداع ...... رايحه امشي يالكلف
وداع...... اشوف وادم مو عرف
وداعة الله ما كلت
وانه بالكوه وصلت
جرح .... جرح
..............................
خادمهم الاقل
مرتضى الشمري

يحماي الضعينه عمي عباس
ولونه الحك علينه عمي عباس
ــــــــــــــــــــ ــــــــــــــــــــ
دريت ابذبح ابونه
اجونه وروعونه
اضربونه وسلبونه
دريت الصار بينه
ــــــــــــــــــــ ــــــــــــــــــــ
اشكثر ناديت بسمك
صحتلك وين جسمك
اجي تمنيت يمك
واگلك ياولينه
ــــــــــــــــــــ ــــــــــــــــــــ
صحت والنار بيه
تعال الحك عليه
تعال احمي رقيه
وعله زينب بجينه
ــــــــــــــــــــ ــــــــــــــــــــ
السياط اعليه تمطر
واهي للنهر تنظـــــر
بعبايتها تأشــــــــــر
عليها اتجمعينه
ــــــــــــــــــــ ــــــــــــــــــــ
يضربوني امن اندبك
طويل اعليه دربك
عدل مامات گلبك
عليه اسمع ونينه
ــــــــــــــــــــ ــــــــــــــــــــ
الخيم كلها احرگوها
وحرمكم سلبـــــوها
والاطفال اضربوها
الوعد ناديت وينه
ــــــــــــــــــــ ــــــــــــــــــــ
اذا ماتفزع النه
بعد معناها ضعنه
شماته وسب سمعنه
دخيلك گوم لينه
ــــــــــــــــــــ ــــــــــــــــــــ
بدمع عيني احلفك
غيور ادري واكلفك
اذا مو انت جفك
ولو رايه تجينه
ــــــــــــــــــــ ــــــــــــــــــــ
گلت للشمر صحته
ضحك گلي ذبحته
صحت مذبوح انته
ولاتسمع بجينه
ــــــــــــــــــــ ــــــــــــــــــــ
تعال وخل اگله
رجع مو جفه كله
مثل ماذلني ذله
واخذ طگة سكينه
ــــــــــــــــــــ ــــــــــــــــــــ

علي محسن الزيادي

باجر ادري فركَه وليدي وخل اشبكَه
شاب وجان حلمه بعرسه تصير صفكه
________________________
بحضني عشت عمرك كَبل باجر بحضن النايبه
ولو طر صبح باجر تره يبدي الوداع مصايبه
واخر موادع واشبكك وبسمتك باجر غايبه
والدهر ما يسوه العتب خاطر نرد و نعاتبه

منذور يبني لهليوم كطع شمل هذا الكوم
يالجاسم وباجر اخ لو رحت يكطعني اللوم
________________________
حضرت بيدي شمعتك وحضرت ورد وحنه
ثياب العرس تلبس ردت وعريس جنت اتمنه
و باجر نزفك باالدمه و ابدال الهلاهل ونه
وانه ادري باجر لو رحت موذر يجيبوك النه

يهد حيلك ادري الوداع خليني اشبكك وبساع
لو طر صبح مني ترووح حالي سفينه بله اشراع
________________________
يوليدي لو عني رحت عكبك اضل بحيره
و امشي واباوع ليورى مثل المفارك ديره
و قرأن عرسك ياالولد محد فهم تفسيره
وعفيه ولد ما تنوصف بدمك تصول الغيره


جسام يا نور العين انطي الوجه عكبك وين
وشموع تطفي بهداي و لوحده يبقه حسين
________________________
و حنيه ما مش بالترب ما عدها مثل امك حضن
و توك تعلمت الفرح و ما تعرف بدرس الطعن
ولا كالها الله لو متت يتوسد بكلبي الحزن
وداع الشباب شكد كلف والصعبه اذا جان الابن

وادريك رايح ما ترد وياهوا لمجانك يسد
باجر تضل امك ترى تحسب ايام وتعد
________________________
و خليني اوصيك استمع باجر تضحي بدمك
و باجر اريدك ترتجز و باالحومه تنصر عمك
جسام يا شبل الحسن يا نشمي يا فخر امك
طشر جموع بيمنتك وبالحومه يعله اسمك

للحومه طب واتبختر وسوي السواه الاكبر
قاتل وشمرها اعداك ويوليدي ادب العسكر
_______________________
مرتضى الشمري

ليلة الحادي عشر


شفتك بالطيف. شايل جودك بين اجفوفك
فزيت ابليل. شفت الحداي اوماشوفك

منتضره الفزعة خوه
ياليل الحادي اشسوه
شفتك بالطيف
------------------------
غفيت ابليلة الوحشه اوطيفك مَر على اجفوني
لگيتك واگف اگبالي اوبيدك تمسح امتوني
اسألتني منهو طگ متنج مسحت ارماد بعيوني
گتلك من مشيت انته إلتخافك خويه آذوني

بس صوت الخوف. ولي ايخافك يزمخ بينه
الجلمت كفال. ياخويه اهواي اشتاگينه

يالبسمك جنت اتگوه
ياليل الحادي اشسوى
شفتك بالطيف
-----------------------------------------------------
رد حيل الصبه عباس خويه ابحلمي من شفتك
وبگد العطش بالطف هيجي روحي عاطشتك
ردتك ابهجوم الخيل بس ابلحضه ماردتك
تضهمك لو تشوف اشلون الحاقد من صطر اختك

ماريد الماي. بس كونك ترجع يالهيبه
رتك موجود. ثار العلويات اتجيبه

محتاره ابهاي النسوه
ياليل الحادي اشسوه
شفتك بالطيف
----------------
سولفنه ابهضم عباس اجوز امن العتب وتعب
وگل العيني كفي النوح نضر شبعي امن المرتب
اسألتني عن زراگ الجف شهنو التعبج زينب
گتلك من طحت ع الماي بيه صار الي ايعجب

من طاح الواك. خيل اوگوم الفزعه اعليه
وشگد ناديت. عباس إلحك للعلويه

ماجالك صوت النخوه
ياليل الحادي اشسوه
شفتك بالطيف
--------------------------------
طوارش من گلب محروك الك صوب النهر وديت
العجيبه استغربت منهه اصيحك ونته مارديت
انه ادري ع النهر مطروح اوفگدتك ياعمود البيت
لجن متعوده انه انخاك لذالك كافلي ناديت

اشگد اتمنيت. من ناديتك تفزع ليه
بعدك عباس. اختك سموهه المسبيه

ناديت اومامش رجوه
ياليل الحادي اشسوه
شفتك بالطيف
---------------------------------------------------------
اشد وصعب امر مرني اوجرح گلبي وترسني اهموم
اجيتك للنهر انخاك ابعمد راسك شفت مكسوم
ندهتك يلا رد اختك بحزن روحي وگلب مالوم
وگتلك يلا كض الواك وحمي اختك ولتهه الگوم

مامنك صوت. رديت ابأمري محتاره
يابو الكلفات. انهض سوي لختك جاره

وبنار احزاني اتجوه
ياليل الحادي اشسوه
شفتك بالطيف
-----------------------------------------------------
تمنيته حلمنه ايطول وسولفلك قصص بالصار
وگلك من ركضت اشلون اومن لهبت عباتي ابنار
التخاف اعليهه.من ضلهه صارت مگصد الانضار
مامحسوبه بالحسبان الوكت هيجي علينه اندار

ياماي العين. للتتركني صعبه الغربه
لشام انروح. حرمه اوحدي يصعب دربه

صارت دمعاتي السلوه
ياليل الحادي اشسوه
شفتك بالطيف
-----------------------------------------------------
علي سليم الحسناوي



#لك_الفداء_سيدي_اباعبدالله
#خدر_الفواطم_لنشر_القصائد_الحسينيه



_______________

#قصيدة_شور
#لشجاعة_القاسم_ابن الحسن ع


- يا سلام الله على الحنه البديك
_____________________________
دايخه الخياله من صوت الرعيد
القاسم وهوس بشوباش العرس
حاط الحنه اعله سيفه ومن بعيد
گطع صيت الهوه وضحكات الضرس

- هلا بالعاف المخيم وانتفض
- هلا الگل العمه ظل مالك غرض
- راح اعاند بيهم اعناد المرض ،

يا هله بعريسهه == الدنيا صيف يجيسهه
ترس چفه وظلت = الحرب فارغ چيسهه
- يا سلام الله على الحنه البديه
_____________________________
هلا بريحانة الطف ابن الچريم ،
صال وانفتحت شهيته اعله الحرب
شال جيش الطف حطب لجدور ابوه
يولن السهلات اجه الزلمه الصعب ،

- هلا برس الغيره ضهضاب السمه
- هلا بريحة فاطمه وبت فاطمه ،
- هلا يا شداد راس الموزمه ، ،

يا مصوگر بيهه = روسهه ورجليهه ،
هلا بصيت القاسم = بكيفه شاخ اعليهه
- يا سلام الله على الحنه البديك
_____________________________
ما ايثني حچاية الحد مثل ابوه
اجه بمبدء انما النصرُ قريب ، ،
الضربه لازم لو تصيب ولو تخيب
ورمي القاسم لو يصيب ولو يصيب

- هلا بحطاط الحروف اعله النقط
- هلا الفحط جيشهه ورد ما فحط
- راح واعله ازلامهه بكيفه انشرط ،

يا امتون النيبه = شاب هيبة شيبه
هلا بعرس الحومه = بصغره وبترتيبه
- يا سلام الله على الحنه البديك
_____________________________
يعوفهه الما تارسه عيونه اكيد
ابن شيخ وحصته الصيد الكلف
وين ابو الراس الچبير اليبدي بي
حاسبلهه وما امتيه بالعرف ، ،

- ادخيل صولاته ليطيحن كالمطر
- سافر بروس الزلم ذاك السفر ، ، ،
- راح چمل ماي لعيون النهر

- الحرب شدت حيلهه = تتعب يتچيلهه
كطع نسل حروفهه = تسكت ويحچيلهه ،
- يا سلام الله على الحنه البديك


- علي مهدي المالكي

جسام يالوجهك شمس وامكحله اعيونك
هندامك وثوب العرس لايگ على امتونك
مالحگت چفك تضوگ الحنه
ــــــــــــــــــــــــــــــــــــــ
امنيتي اشوفك بالعرس متهندم ابين الربع
وافرشلك العتبه ورد والدار اديرنهه شمع
وبالخير وامبارك نده تنزل على اورود السمع
ماحسبت باچر بچي والحنه ادفونهه ابدمع

عرسك صبح نوح وبچي وصار العزه ابدارك
وشيعنه ( عالخير ) ابدمع واحچاية امبارك
كل ضني بايام العرس نتهنه
مالحگت چفك تضوگ الحنه ...
ــــــــــــــــــــــــــــــــــــــ
آنه السهرت وكبرت واسنيني طشن عالمهد
واشفافي تعبت من كثر (يمه ) و( دللول) للولد
يوليدي من اتفز چنت لوگالو اوليدچ گعد
اركضلك بلهفة شبگ لهفة نده لشبگ الورد

چانت دللولي گبل حرزك وكت نومك
ومن تبچي تسكت يالولد بس اشتم اهدومك
چانت ضحكتك بلسم لكل ونه
مالحگت چفك تضوگ الحنه
ــــــــــــــــــــــــــــــــــــــ
من زغرك امعزب چنت صاحب هلا ودگ اگهوه
يالباب گلبك والمضيف من تگعد ايشرعن سوه
والگهوه وي هيلك تفوح ويگعدن بخشم الهوه
وادلالك امناوب تعيش من الضوه لحد الضوه

تسيوره وامسامر حچي والوادم اتضيفك
وبنومك اتفرفح هلا وتعزب ابطيفك
يايمه وادلالك بعد ماهنه
ومالحگت چفك تضوگ الحنه
ــــــــــــــــــــــــــــــــــــــ
بيضت وجهي من الخجل يم الزجيه فاطمه
ماشايله بگلبي عتب عاذرتك ورب السمه
يالماخذ اطباع الحسن عطشان بس رغم الضمه
عزبت دمك من شفت دين الله عطشانه لدمه

ذاخرتك لهذا الوكت واحسبلك ايامك
چنت انتظر عمك يجي ويشدلك احزامك
احسبلك اسنين العمر واتمنه
مالحگت چفك تضوگ الحنه



#واثق التميمي

اطلعت ليلى تون
ويماشيها الحزن
مشى وين الابن
تنادي يحسين
_____________
شاط الگلب منتظر بالخيمة ايعود
ام الولد والولد بالحر ممدود
صاحت يبو الاكبر الاكبر موجود؟
شو جاي احس من الگلب شي مفگود

انگطع نيط الگلب
ودمه اعيوني تصب
شنو اخبار الحرب؟
شو اسمع اونين
______________
طلعت وفگد اوليدها شاغلها
ودمعة الام لوليدها اشيحملها
وين ابني تندب و الگمر ناحلها
واحتار ابو الاكبر شريد ايكلها

گمر ليلى اختفة
وشمع طفها انطفة
على الدنيا العفا
ايصيح الاحنين
_______________
المتنوسه عالضعن عدها الاكبر
وفجأة ويروح الهوى ويكتلها الحر
وحسين بين الام وابنها اتحير
تصيح خلص اوليدي من العسكر

كظت روحة الولد
يبو اولادي اشبعد
تطشر والجسد
شابع نياشين
________________
راح الحسين وهي منتظرة ايرد
شافت حسين اعلة الولد متمدد
راحن يموت احسين جا ما تكعد
ومن تسمع اونين امك بهيمه تهد

يجمرات الجبد
اشعلامك ما ترد
اذا انطگ تهد؟
جاوبني الحين
______________
جابه الحسين ويا علي من جابه
اباب خيمه ليلى صار امصابه
متجمعة وتلطم عليه احبابه
وام الولد كاعدة تشد اصوابه

احترك كلشي بهلة
ونحيب الطف عله
وچوتها كربله
وعمته للعين
______________
يا ظنوتي الشديت بيك احزامي
ويا سيف خليتك بوجه ايامي
ما حاسبه ذبحك يگصر احلامي
طولك بعد طولي انكسر جدامي

بهذني حاجته
ودمعها بدته
گظتها امصيبته
وهمها صفه البين
*******************


حسين حيدر الموسوي

شفت الگمـر شــايل گمـر بدينه
ابطيحت علي طاحت سمه علينه
منها وحِسَبْت إحساب
كل ساعه نفگد شـاب
ــــــــــــــــــــــ
هيچ الگمـر حاضن گمر كفّـالي و إبن أخـيّي
من شفت ابوه غارگ دمع گلت الله يرحم فيّي

علي چان شحلاته ويا حلو رسمه
وبياضه بكلشـي مالايگ عليه دمّه
على إلسانه بخدمتج أمْري ياعمّه

راح اعله طوله و راجع امشيعينه
نسخــة محمـّـد كلّش إمـوذرينه
الموت إلنه فاتح باب
كل ساعه نفگد شاب
ــــــــــــــــــــــ
بالطف طلع وين الصـدگ والبايعتنـه إتچذّب
وحسين ابو طول الحلو كل ساعه ظهره ايحدّب

مِن إمصيبه إلمصيبه كربله إتذبنه
إلطفّ من الظهــر للـ الليل شيّبـنه
أعرفه حسين نص روحه بعلي إبنه

حسين و أعرفه إيحب محمد جده
من يختنـگ يشــتم هَواه مـن وِلْده
الـ بايَع طلـع چـذّاب
كل ساعه نفگد شاب
ــــــــــــــــــــــ
من خلصت انصار الأخو حسين انلچم حسّيته
مـا لحّگ إيطيـب أنفجع بأول شــهيد إبيــته

إجالي وچان ابو فاضل يتچّـيـله
حسين الحِيد ما گادر علي يشيله
الله إيصبّر حسـين وگلــب ليله

شتســوّي ليلى من تشــوف أوصاله
حسين العظيم وهيچي صار إبحاله
گلبه اشكُبُر بس ذاب
كل ساعه نفگد شاب
ــــــــــــــــــــــ
كلش قريبه المعـركه بس طـوّل ابمشيتـه
ماكو البياض إبلحيته راجعلي حمْره إلْحِيته

فزعله إركاض رَد . ينگل جِدَم گوه
اضن شـالوه مـن أوليـده علــي توّه
سمعته يصيح دنيا بلا علي إشتسوه

مو الأولـــي رد للخيــم مالومـه
رد كلّــه دم ومتــرّبات اهدومـه
بالگـوّه ردلـي إجواب
كل ساعه نفگد شاب
ــــــــــــــــــــــ
جايب علي لو چم نبي ماضيّعيته من الدم
وياكم علــي يا بوعلي بس وصْلَه للمُخَيـّم

عسه السيف اللي وذّر هالوجه گصنه
تَعِبْتَك بس تِحِط جثّة علي إبنصنه
بعد شنسـوّي هاي التعزيه اتخصنه

إبنص المخيّم حط محمد جدنه
أول عــزه و أول شهــيد العدنـه
والفرگه عالـ أعتـاب
كل ساعه نفگد شاب
ــــــــــــــــــــــ

مهدي التقي

عاشرت السهر يحسين
غربه اخلافـــك الديره
مابيهم غــــــيور ايغار
وادم نزعــــــت الغيره
مشوني بطــريج ابعيد
يبن امي الدرب حـيره
مالمتني ليــــله اوياك. گلبي شطاوعه وجافاك
خلصت الدرب عثرات. خلف الله اعله البنيات


شالو روحي من شالوك
ياخويه الرمـــــح عالي
من تبچــي رقيه شلون
شيوصـــــــــــلها للغالي
كلشي ولا يجيني الليل
ميته اوياكــــم اشوالي
ماعاتب بشر مـذبوح. بس اعذرنه وين انروح
چي ماباوعت ليفوگ. عثرت بالعـــبايه النوگ


سومرلي الجفن فرگاك
ماتعرفني مـــــن تگعد
من ذاك الصـبح لليوم
نار الــــــــــبيه ماتبرد
بس امصيبــة العباس
خويه بالگـــــلب تمرد
شحمل والجروح اهواي. مدري اشسوه بينه الماي
ماخله علــــــــيه اخوان. رديت ابـــــطرگ نسوان


عفتك بالشمس مطروح
بس لا غيــــــــرت لونك
ماسوو عليــــــك افياي
گلي ابغيــــبتي اشلونك
ماحن الفـــــرات اعليك
من رادو يغـــــــسلونك
ادري اضلوعك اتلچـــمك.كون ابهيده وي جسمك
يالمثل الگـــــــــمر طفوك. تزحف للخــــيم خلوك


مايجمعني بـيك الطيف
وحچيلك شكــو بگلبي
شينومني وحـــلم بيك
غمض عينــــــي ياربي
امشي والتــفت ولگاك
عينك عالـــــرمح تربي
ليش عيونك الحــلوات. تغفه اعله الرمح وتبات
من طبع الحــنين ايغار. كلما انشــــــــــتم تندار


كل ضهريه گلــبي ايشيط
من اتذكر العــــــــــــــاشر
اتبوس النعمه كون الناس
مو تسحگـــــــهه بالحافر
يحســــــين الله لا ينطيه
المنك چــــــم ضلع كاسر
رادت تنچــــــــفي بيهم. وانته اتلاحگت ليهم
ياهو اليرفـــــس النعمه. رفسوك وتذب رحمه

*شاكر الصيمري*

محرم1442
---------------------------

كوم وافزع يا جبير الطايفة
هدت الخيل وحرمكم خايفة
*********************************
هدت الخيل وزلم تتبع زلم
بالمشاعل والرجس شدت حزم
زينب اجندوب بأيتامك تلم
مو وكتهه تنام ضعنك عايفة
*********************************
هدت الخيل وعساجر دايره
صارت المن كبل ما ضن صايرة
زينب بيا وكت تركض حايره
انشاف هسه الكبل محد شايفة
*********************************
يا بعد خدري لخدر زينب دنت
وانت شيخ الطايفة ويمك بقت
عالخيام بنار وبخيل اهمجت
وهاي وادم عالمخيم حالفة
*********************************
ضجت صارت خيل وازلام وصياح
يا عمود الخيمة وسط الحومة طاح
الحك على الخدر يا ابو الخدر راح
وخدر زينب ترضة صاير سالفة
*********************************
ما محسبتهه وعلي وما حسبت
اتروح مني وبالسياط اتعذبت
حركو اخيامك يبو اليمة وصحت
جبت عمري وي الحزن متوالفة
*********************************
لخيمة من خيمة ركضنه وسوطه لاح
ماكو مهلة نجر نفسنه ونستراح
اتجمعت بخيول وبنار ورماح
ولبساني الوكت ثوبه الرايفة
*********************************
الخادم احمد داود

#تراث

زينب هالمسية اتصيح وين المرتضه وينه
عدنه مابگت وليان ماتنهض تحامينه
ــــــــــــــــــــــــــــــــــــــ
انته البلضنك مندوب وانته التحضر الشدات
وانته اتأمن الخايف امن الودام يبو الحملات
ماتسمعت عتب زينب تصيح اوتسچب العبرات

وينك ياعلي وينك
انهض واطلب ابدينك
ذبحوا ياعلي احسينك

اوسلبوا حلل نسوانه اوحرگو كل صواوينه
ــــــــــــــــــــــــــــــــــــــ
گبرك ياعلي يلمك وعيونك الليله اتنام
وابناتك صايره ابشده واعليهن دايره الظلام
من چلچل عليها الليل زينب لمت الايتام

فگدت من يتامه احسين
طفله اوجرت منها العين
طلعت تصفچ الچفين

واتدور على الطفله بالوادي اوميادينه
ــــــــــــــــــــــــــــــــــــــ
شافت من بعد فارس لعد صوب الخيم يجبل
گامت زينب اتنشده اومنها الگلب متوجل
يفارس ماشفت طفله اومنها الدمع گام ايهل

كاللها سمعت اونين
يزينب بالمعاره الحين
روحي الجسم اخوچ حسين

اظن اهناك تلگيها والفارس جرت عينه
ــــــــــــــــــــــــــــــــــــــ
من سمعت حچي الخيال زينب راحت ابهمه
تصيح ابصوت وين انتي يبعد الروح ياعمه
سمعت من بعد ونه اووحده اتحاچي ابو اليمه

تگله بعدت اخيمي
اولحد من هلي يمي
اريد اسدر لعد امي

ماتنهض توديني لعد امي يبو اسكينه
ــــــــــــــــــــــــــــــــــــــ
يبويه اظلم عليه الليل اومن خوفي انخطف لوني
واهلي صارو بعيدين ماضن بعد يلفوني
ركضت زينب اوصاحت لتخافين يعيوني

گامت شبگت اعليها
اوتلوذ من الوجل بيها
اوعمتها تحاجيها

يعمه اشوصلج لهنا واندور تخلينه
ــــــــــــــــــــــــــــــــــــــ
تگلها الخيل من هجمت (اوعودي) حرگو اخيمه
اعلى وجهي من الخيم فريت من الخوف ياعمه
اجيت الگيت ابوي حسين نايم وگعدت يمه

يعمه وجن عليه الليل
وانشبني الوجل والويل
من اسمع صهيل الخيل

ألوذ ابكتر ابوي حسين واتوسد على ايمينه
ــــــــــــــــــــــــــــــــــــــــــــــ
يويلي زينب ابيا حال صارت حين سمعتها
لزمت ايدها ابچفها او لعند الخيم جابتها
گامت تصرخ العيله عليها حين شافتها

غدن يتزودن منها
او يحبنها ويشمنها
بطل حيلي او ينشدنها

عنه اليا كتر رحتي اونبچي اعليچ ضلينه

المرحوم السيد
عبد الحسين الشرع


#اللهم_عجل_لوليك_الفرج

تنويه ✿

العلامة الاميني (قدس سره)
كان من عادته أن في ليلتي التاسع والعاشر من شهر محرم الحرام يخرج صدقة باسم صاحب الزمان (عجل الله فرجه) وكان يقول أن في هذه الليالي يكون قلب الحجة معتصرا بالألم والحزن ... إرسل هذه الرسالة إن استطعت لتكثر الصدقات في سلامة قلب صاحب الزمان روحي فداه

لحن حرب العشاگ


هذا انه ابوك وبيدي فايض دمك
ضل يجري حدما وانته بيدي وطمك
زاودني سهمك عالنحر واشتماك
جنت آنه اظن نحرك اليه ولأمك

اشوف .. يبست ارياگك
صغير .. يامحله اشواكك
عذاب .. سهمك من ضاگك

°°°°°°°°°°°°°°°°°°
غـطـيتك بغيمة جفـوفي وثـوبي
وامشي بثگل خافن تفز محبوبي
اگبال المخيم امشي وارجع محتار
ويا بويه والنظرات كلهه الصوبي

شگول .. لأمك وأيتامي
ذبيـح .. رديتك ضامي
تموت .. مو من أحلامي
°°°°°°°°°°°°°°°°°°
نـايـم عله عيونـك حــلـم واتبـده
هاضمني جرحك وأنته موش بگده
ياتـرف سهمـك منكسر من ظماك 
ومن فيّ رگبتك الله سوه الورده

اشيل .. دمك بجفوفي
يطيح .. يابويه وخوفي
حرام .. ميت ياشوفي
°°°°°°°°°°°°°°°°°°
حاچيت زينب وبدموعي او ؤني
عبدالله مات وجفه ضل لازمني
راح أمشي يم كاروكه زينب وانعاه
كلش ثكيل امصابه ويلي اعله بني

ينام .. وسفه اعله ترابه
صغير .. ويا كُبر مصابه
تسيل .. عيني الشجابه
°°°°°°°°°°°°°°°°°°
الله اليعين أمك وگلبي وروحي
يبني ودللوه تصرخ آنه اجروحي
ست اشهر العشره ويفرهدها الموت
نوحـك يسكته ومـا يسكت نوحي

خيام .. وحشه المن دونك
عذاب .. عايش وعيونك
يفيض .. من سهمك لونك
°°°°°°°°°°°°°°°°°°
- خيري الصفراني

((آهات الرباب مع ولدها) )



بعدنه بأول المشوار
توه اعله الجفن خضر سهر ليلي
بعدنه وشو صرت تذكار
ألوليلك دمع بس انته لوليلي

يما تدري العشگ ذابح نياط أمك
على احبالي يعبدالله كتبت اسمك
يالمطَشرّ بروحي السهم لمك
يبو ثوب الزغير وبَللا دمك

يامن على الدنيا هجر
يالماخذ سنين العمر
يا أترف واجمل عشگ
مختنگه وعذيبي تمر

أخذني وياك ياروحي
يعبدالله يمذبوحي ..... يعبدالله
*
ما گاداك ابوك حسين
ولا شافك مشيت ولا گلت بابا
يمزيون الجفن والعين
ابوك بحيرته ضل ينعى لمصابا

يالمدلل ذكرتك وآنه عالناگه
وحگ گماطك المحروگ مشتاگه
نار الدمعه من فرگاك حراگه
يمته بطولك المزيون أتلاگه

بس گلي يمته يالولد
يمشيب عيون المهد
من الحلم ياريت أفز
واسمع يگلولي گعد

وأطيب ويستچن نوحي
يعبدالله يمذبوحي .....،يعبدالله
**
شما جابولي يبني الماي
اركض والمدامع تركض بخدي
أگلهم توه چان وياي
ليش تعوفني ياسلوتي وحدي

حلم ياوسفه ذاك أطلوگي وآلامي
تطَشر بزري وآنه مجمعه احلامي
گدامي أنذبح ياناس گدامي
وآنه أصرخ يضامي والسهم حامي

من شفته سديت النضر
وسنيني أنون للسفر
ياوسفه ياحد العمر
حد العمر يبني أنعبر

وطاحن كلهن صروحي
يعبدالله يمذبوحي .... يعبدالله
*
حلم غافي اعله سطح البال
چبير وأحسب العرسك يالمدلل
وأفزن والگه بيدي احبال
وهلهولت دمعتي صرخه تتحول

ويتبده السهر من عيني وأشكيلك
وأشكيلك يواحد نوبه ألوليلك
وسياط المتن ضليت أوديلك
يمارد گلبي يبني بهيده ودخيلك

ماتسوه أطيح من الضرب
عبدالله بخدوده ترب
هوه الغرب لمن رحت
متعوده يبني بغرب

يروحي للغرب روحي
يعبدالله يمذبوحي .... يعبدالله
*
يبو نحر الترف مشيول
وبرآس الرمح وتماشي خلانك
چبير ويا حلاةْ الطول
چنك والدك هم يابس لسانك

ترفع حاجب لو شمرو حجاره
وآنه بكلي أباوع يبني محتاره
شسوي والگلب ماتنخمد ناره
وكل لحضه عليك أتوجه زياره

أمك يمر بيها الذبح
عايفني وأماشي الرمح
والضلمه طافت بالنفس
وينك يبو وجه الصبح

ابد لا مابطل نوحي
يعبدالله يمذبوحي .....،يعبدالله






عبد زينب
محمد الابراهيمي

يا مذبوح .. من دونك .. بضعونك.. حرت حيره
راح انروح .. يا خدري .. ما ادري .. أعلى يا ديرة
يا ضامي وعليك اضماي    خويه بغير اخو منواي
ما ادري  أعلى يا ديرة
..........
يخويه ضعنك المهيوب   من دونك گطع دربه
كل هيبه بعد ما بيه     وراح برفجة الغربة
وي شامت يروح ادروب  المدلل عليه صعبه
الجلمة العايزة أعلى الحر   يخويه تمرد بگلبه

ضعنك راح .. شد رحله  .. من اهله   لضياعاته
وكلبي الصاح .. يا ضعني .. المتعني .. بغريباته
وبفگدك بجينه اهواي .. خويه بغير اخو منواي
ما أدري      أعلى يا ديرة
................
منك من رحت عالنوگ   ألك حزنانه مشتاگه
قدرنا بهالزمان افراگ   وصار احلام الملاگه
يبن أمي  الظهر كتال    گوه انخلصه عالناگه
يبدي من الصبح حره   عدو لايتامي مشراگه

عندي أطفال  تتحسر   من الحر    بلايه ارسوم
هذا الحال   من نومك   وليومك   نسينه النوم
هيه التكفي لو بس هاي .. خويه بغير اخو منواي
ما ادري        أعلى يا ديرة
...............
ضعني الجان اله كفّال   صار وي الغرب ضعني
بحمى اخواني جنت زينب   وزينب هسه ما جني
لو تدري يخويه اعليك   يا آه اطلعت منّي
حط عالناگه حتى الطير   بفگدك من سمع وني

ها يحسين   بآلامي   يا ضامي   انگطع گلبي
بعدك وين    حاجيني   ايوديني   لغرب دربي
بلا شور المشي ولا راي    خويه بغير اخو منواي
ما ادري     أعلى يا ديرة
..............
تعبنه من المشي والليل   جل وامساهره الايتام
نامت من تعبها النوگ     بس خويه الحرس ما نام
ننام اشلون وبصفنه     غربه وماكو عدنه اخيام
گلي منين اجيبن حيل    ويمشيني درب الشام

ما ضل حيل    يبن أمي   وبهظمي   المشي گوه
انهار وليل   بس ابجي وما احجي   الا بالخوه
يا عازتكم بممشاي ... خويه بغير اخو منواي
ما ادري      أعلى يا ديرة
................
يا جرحي الشعبلي الروح   مثلك ياجرح مخفي
اكضي الليل دمعه اعليك   وبساع الصبح يلفي
شلون أگطع بجي وانه  اشوف ايتامك بصفي
يخويه من الرمل خليت   حدر اخدودهم جفي

هاي ايتام    لخواني   وعدواني   اليمشوهم
بدرب الشام   من وكعوا   ما رجعوا  يشيلوهم
عالنوگ وبجينه اهواي  ..  خويه بغير اخو منواي
ما ادري أعلى يا ديرة
.......
#كرار المحمداوي

#تراث

أدور عليك يبن امي ولا واحد يدليني
عاد أنته بضعيف الصوت يامظلوم حاجيني
ــــــــــــــــــــــــــــــــــــــ
جيتك من قلب مكسور أنه أختك المهضومه
جيت بروح لهفانه أدور عليك بالحومه
جيتك خويه حاجيني عليك أمك المظلومه

وين بيا كتر مطروح
جسمك هم بعد بي روح
يبن أمي صدك مذبوح

وين الي ينظر لحالي ويم جسمك يوديني
ــــــــــــــــــــــــــــــــــــــ
صدك نايم على التربان خويه وعلوجه مقلوب
صدك سحكت عليك الخيل بالميدان من كل صوب
صدك خويه نزف دمك وگلبك بالسهم مصيوب

ولـمـن ياصـبي العين
طلعت السهم يحسين
مـن كلبك طلع ثلثين

وهذا السهم هو الحال ما بينك وما بيني
ــــــــــــــــــــــــــــــــــــــ
حر وعطش وبجسمك ألف وتسعمية صواب
فوك جروحك ودمك گلبك بالسـهم ينصاب
بعد شلون تتمكن تنهضلي وترد جواب

وأدري ياضوه عيناي
لو ما هل المصايب هاي
متقصر يخويه وياي

وحاشاك بمثل هاليوم محتاره تخليني
ــــــــــــــــــــــــــــــــــــــ
حالك هذا وأنته أنوب خويه أسمع بعد حالي
بأيتام وحـرم كـلــــبي تمحن وأنشده بالي
وين أنطي الوجه وانه أخوتي مذبحه أكبالي

وكلسا طفل من عندي
يروح وينفطر جبدي
وأنه بكربله وحدي

صواويني خذتها النار والعيله وصواويني
ــــــــــــــــــــــــــــــــــــــ
هجمت فرد هجمه الخيل خويه وشبت النيران
وهامت عيلتك كلها من النيران للميدان
لجن ياضوه عيوني ضلت بالخيم رضعان

وأنه تمحنت بيها
شلون النار أطب ليها
وأخلصها يواليها

رضعانك بوسط النار وانه العده مسلبيني
ــــــــــــــــــــــــــــــــــــــ
خويه محيره ضليت وأتلفت يمين يسار
أعوف الخيم رضعانك تتحرگ صغار كبار
أطب للنار أخلصها أخاف أنه أحترگ بالنار

والأيتام ملتمه
هاي تصيح ياعمه
وين حسين ابو اليمه

وهاي تصيح يازينب حر العطش ماذيني
ــــــــــــــــــــــــــــــــــــــ
رضعن بوسط نيران وأيتام بحوافر خيل
ماتت بالسحك وعيال مامت والدموع تسيل
وأنه وحيده مظلومه بيه بعد ماضل حيل

وعباس الاجيت وياه
هسه من كمت أنخاه
أضن كلي يزينب أه

عليج شبيدي يعيوني يزينب وين جفيني
ــــــــــــــــــــــــــــــــــــــ
خذاك الدهر من عندي يخويه وأكَطعت بيه
مصايب كربله يحسين مدري أمنين أجت ليه
من الخدر والصيوان تــالــيه لــبـني أميه

هيجي الدهر خلاني
وضيم وهضم راواني
صرت من عكب ولياني

أرد السوط بيساري وأستر وجهي بيميني
ــــــــــــــــــــــــــــــــــــــ
ها شتكول يبن أمي ردلي بصوتك أجوابي
تقبل بعد أشكيلك هضمي وجمرة امصابي
أنته بالسهم مصيوب وانه فراكك أصوابي

أنته بروحك بجسمك
وانه مجرحه بهضمك
يخويه خلي اجي يمك

أداوي جسمك بروحي وانته بشوفتك داويني
ــــــــــــــــــــــــــــــــــــــ
يخويه ان جان ماعندك هـمــه تكوم لعيالك
لاتهتم ياماي الـعين أنه خلافك بدالك
أحمي عـيلتك أنه يخويه واحرس أطفالك

لجن يحسين أخاف أعليك
ضامي ومحد يرويك
خلي أعتني وأگصد ليك

أقدم ألك ماي العين وأشرب يابعد عيني


الشيخ هادي القصاب

#اللهم_عجل_لوليك_الفرج