قصيده للامام السجاد ص



الله يساعدك من كثر الاصياح
روس اهلك شفتهن فوگ الارماح

ارگضي النار تلهب
صحت ياعمه زينب


عشت عمرك مدامع تارسه العين
شما شفت النهر تبچي اعله الحسين
محدب ضهرك وماتدري لا وين
حزنك والجرح ظل عايش سنين

عاشت نار بيك من المخيم
ايامك يبو الباقر محرم

تگضي الليل تنحب
صحت ياعمه زينب
*--**
عمرك والسياط تعيش وياك
لدروب السبي التفكير وداك
من تسمع خواتك يوم تنخاك
عگب عباس صارن هنه بحماك

وانت اعله الهزل مچتوف مولاي
ضعنكم صار حسره الشربت الماي

گلب گلبك تعذب
صحت ياعمه زينب
*---***
عثره بعثره يخلص سيدي الليل
عيونك لو غفن تتحلم بخيل
يعني العمر خلص ويل ياويل
على ضهور الهزل يادمعتك سيل

وبراسك سوالف سيدي ادور
كل لحضه التمرك چنها عاشور

حتى الرمش شيب
صحت ياعمه زينب
****---*****
علي السجاد دمعك ينزل جروح
كل مره تصيح حسين مذبوح
روحك من عذابك صارت تروح
روحك خلصت وماخلص النوح

كل ذكره التمر صارت تأذيك
ونار الخيمه هم صارت تچويك

ضهر العين حدب
صحت ياعمه زينب
***
ضگت الگيد وسنينك مسافات
تمشي وتوگف سنين السبيات
شما تنضر سكينه تصيح خيمات
وي عبدالله عمرك بالسهم مات

مشتاگ ودمعتك مال محتام
الاكبر صار بيك وبيك جسام

العمر بالطف تترب
صحت ياعمه زينب





عبد زينب
محمد الابراهيمي

السلام على سيد الساجدين
قصيده للامام السجاد ع

تبچيلك اعيون السمه. مولانه لبچاك
عاشت مصيبة كـربله. للمـوت وياك
يالمانسيت اطفوفك. بيقضاتك وبطيوفك
طبع الحبل بچفوفك. ياعلي السجاد
****
مابـدلـت ثــوب الـحــــزن لابــس سـواد اسنينك
كل ماتصـد مـاي الـعــذب. يجري الدمع من عينك
عاشـور كل عـمـرك صـبح تنصب عزه لحسينك
واعله السـبي ونوگ الهزل. مولانه الله يـعـينك

بيـدك بگـه طـبع الحبل. وبراسك الـشام
صورة جمر داسه طفل... من جمر الخيام
متحرگات اخيامك. تركض تشوف ايتامك
واعله الترب عمامك. ياعلي السجاد
*******
يالخـلّصت عـمرك بـچـي. ياســيـد الـبـكائــيـن
گبــالك عشـيره تـنذبح فوگ الذبح متسلبين
ومراكض اعـيال النـبي. فوگ الجمر ملحوگين
وانـته علـيل ومحترگ. گلبك عله اعيال حسين

من المـرض تحبي حبي. من تنهض طيح
وحيلك گضه من السبي. وادفـعك الـريح
هوه اشبقى من حيلك. تگضي بواچي ليلك
ارزقني كون ابچيلك. ياعلي السجاد
****
عاده القـتل عـدكم نعـم. موعاده سَلب اعيالك
شفت الفـواطم تنـسبي. ومـچـتــفـات اگبالك
ومـگيد انـتـه ابسلسله. وسوط الشمر يبرالك
ماينمحي درب اليسـر. ياسيدي مـن بالـك

اثيابك انصـبغن حمــر. يتفايض ادماك
الطوگ برگبتك اشكثر. مـــــــولاي اذاك
الحديد يحز وريدك يصب دمه اعله جيدك
والگيد اكـلـها ايـدك. ياعلي السجاد
******
يـمـكن قـليلـه لـو گـلت. گـد الخـلائـق حـزنـك
عالمغتسل شافوه بـعـد. مطبـوع سوط ابمتنك
لـمـن تـون لـيلك چـنت. اتـنوح النـجـوم الونـك
مـتعاهـد انته ودمعتك. حــد ماگـبر يحضنك

دمعـك گـضـه مـن البـچي. عالماشرب ماي
اعله التراچي شگد حچي. يأذنك اهـواي
خذَت حيلك رقيه. يتيمه وهم سبيه
اشگد شفت اذيه. ياعلي السجاد
*********
اعله الوساده تحتضر. وبده وكـت منـيتـك
بآخـر انفاسـك سيدي وناصـب عـزاء ابيتك
الكربله درت الوجــه. والسَـم يگطع رِيتك
غمضت عينك والدمع يـنــزل على لـحيتك

والباقر بموتك حضر. غـمـضـلك الـعـين
وبكربله بـس الشـمـر. يم راس الحسين
حين الاجو بنينك. سال الدمع من عينك
ميت وتبچي حسينك. ياعلي السجاد
*****
عمار حسن الدراجي/٢٣/محمرم/١٤٤١

كأني بمولاي الامام السجاد ع يخاطب الصحابي الجليل ابي حمزه الثمالي
----------------------------
أنه حاضر المقتل. وعن ياجرح تسأل
هنه الجروح اهواي. واحد منهن الماي
عن ياجرح تسال
***
الحاچـيهن تـره عِشر العِشر منهن
تِمـوت الشـيعه حُزناً لو اسولفهـن
حافـضـهن بعـدني وكلـهن انـدلهن
شلون أنساهِن وبيدي آنه دافنـهن

انه حاضر المدفن. اولا واحد تجفن
رغم ماضلو اجساد. وغطاهم ترب وارماد
واحد واحد اندل. وعن ياجرح تسأل
*******
احتار مـن اسـولف ياجرح شفته
مــو بـس شـايـّفه لا آنه عـشــته
اخوي من العطش متفطره شفته
بـگـمـاطه ذبـيح وبـيدي انه شلته

طفل صابه المُثلث. عطشان وبگه يلهث
الورد يحتاج فلاح. مومالت نبل وارماح
يموت ابوست المنجل. وعن ياجرح تسأل
*******
من اسـولفلك جبل يَــذبُل اهـدمـنه
إلماي لحـسين انـخـلق ونـحـرم منه
عطشان ويـصـيح ابـصـوت اسمعنه
شلون ما ابچي لوّن هالماي اشـربنه


يبس گلبه وتفطر. وسهم صابه وتگنطر
ضامي كونه يرتاح. مويشبع طعن برماح
وعليه اسيوف تِنسَل. وعن ياجرح تسال
*******
ياجرح الاخيطه ويا هــو اعوفنه
اخـوي الاكـبر امـکــطـع اشـوفـنه
أنه مجروح گلـبي وبيـش اروفنه
حزن رمله اعله جاسم مااوصفنه

وحزن عمتنه زَينَب. جمر دمعتها تلهب
صارت ام الاحزان. اميرة آل عدنان
سبيه شلون تقبل. وعن ياجرح تسال
*********
يبو حمزه الثمالي هـواي تدريها
مصـايبنه چثيره وياهي ارويها
ماتـبقى عـدل لـو سـولفت بـيها
الجـبال الراسيه اهـدم رواسـيها

عمي ياوكت احنه. نسوان انسبن عدنه
آياطـبـت السوگ. منه الگلب مخنوگ
اوگفتنه عله الهزّل. وعن ياجرح تسال
*********
عمار حسن الدراجي. /٢٠/محرم/١٤٤١

الشاعر اياد الديراوي
وصية الامام السجاد للباقر ع

يالباقر وصيه اوصيك لون غمضّت هاي العين
طش فوگي يبويه تراب من گبر الغريب حسين
1
عشت والعايش بجرحه دمعته تنومس بعينه
والمثلي يشوف امصاب يدّور عل اجل وينه
انه وعالم طفوفي ذاك عله الونه تخاوينه
بيه كربله شخلت
روحي امن الحزن ملت
منيتي هل مسه حلت
يبويه موتي اتمناه لاوين الصبر لا وين
2
مات الحيل وعيوني تموت اوياي احسنّها
حياتي بلا بچي اعله حسين يبويه ما اريدنها
بقت عندك وصيتي هاي بوفاتي ارد اعيشنها
الگبر حسين بالعبره
تعنه وخاطرك كسره
وجيب اتراب من گبره
كون اتراب بي دمّه وتطشه اعليه كونك زين
3
علامه اعله الگبر خليت يبويه لمن ادفنته
نجيع الدم لون شفته نحره اهنانه وسدته
وتلگه اعله الگبر دمعات تره هذا الدمع لخته
حين امن السبي جينه
اعتنينه الگبر والينه
شكثر دمعات هلينه
اثر دمعات زينب هاي تراها اعله الگبر للحين
4
حين اتگوم عن حسين تعنه الكافل الحره
وحين اتشوف جود اعليه انه حدره ادفنت صدره
حظن جوده بلايه چفوف او ودع عيليته بنظره
بس بعين عاينها
وحده السهم حاظنها
وزينب من سمع ونها
گل حسين خليني بمچاني وغطي هالچفين
5
يبني للمخيم روح ولو ما تلگه بويه اخيام
ولكن عالترب تلگه رماد وفوگه كثره اسهام
وحبال اعله الرمال تشوف بيها اتچتفت ايتام
ما ظنك نسيت الصار
تچتفنه زغار اكبار
ويخطفنه لهيب النار
مشينه بنوگ صوب الشام سبايه ابيا ذنب ماشين
6
بس اخر نفس هذا وبعدها يختفي صوتي
اسم حسين الفظنّه وريدن يعتني موتي
سلام اعله الذبيح اوصيك تكتب فوگ تابوتي
بعد ما غمظت عيني
بتراب حسين غطيني
اريدن هيچي تچفيني
وقره ازيارة المضلوم بعد الغسل والتچفين
****

الشاعر اياد الديراوي

لله الحمـد هذا العام • انحـــب و اون وفقني
الطم صدر وابچي حسين• رب العرش خالقني


ياحبيبي ياحسين • ياحبيبي ياحسين

••••••••••••

قصة عشگ • مانفترگ • اني وجرح بحساسي
اول حلم • اخر حلم • بـ المجلس اگضي انفاسي
مصاحب جرح • عشره وملح • شيب دليلي وراسي


جرح الخيم صاحب حوك • رب العرش منطيني
ويا عشت عاش وياي • تارس دليلي و عيني

ياحبيبي ياحسين • ياحبيبي ياحسين

••••••••••••••••••



عايـش احن • لشهر الحزن •احسب واعد بـ ايامي
اتحزمت • واتحضرت • وثوب العزيه احرامي
ابدمعتي • وابحســـرتي • ناوي من اشد احزامي


مــتوكل اعله الـ عباس • وبم الخـــدر حلفـــته
سالفتي وادري المجنون • شيخلصه من سالفــته
ياحبيبي ياحسين • ياحبيبي ياحسين

••••••••••••••

خيط الضوه • ونسمة هوه • روحي العشگ تتنفس
راسم رسم • صــورة شهم • بيـها الدفو اتحسـ س
انت وگمر• ساحـگ نهر • بگعــــدت عـشـگ تدرس

عليك الذي بسوگ الماي • اجروف النهر ساحگها
خليني اسولف دمعات •و روحـي العشگ حارگها
ياحبيبي ياحسين • ياحبيبي ياحسين


•••€€€•••••€•••€•

جبت العمر • لطمت صدر • ودمـعت حزن بعيوني
ليل اهدعش • وذاك العطش • عاشن عمر بضنوني
من دنيتي • وبـ موتــتي • من المجلس ايشيعوني

بتابوتي والهج مولاي • حل عقده من الساني
خليني اصيحك بالموت • و بالوحشه تتلگاني

ياحبيبي ياحسين • ياحبيبي ياحسين
•••••••••••••••••••



خادم الك • و اتوسلك • ام الشــرف هالخدمه
عشت العمر • كلمة شكر • وگلت ابدمع هالكلمه
من الخدم • نعمه انحسب • وشكرا تحب النعمه


مشكور مـنك مولاي • وما قصرت ممـــنونك
ابروحي الك صورة شوگ • تاااايه عمر بعيونك
ياحبيبي ياحسين • ياحبيبي ياحسين

••••••••••••••
خالد عبد السادة البديري

شور

يا سفرة عشك
يمك احترك
يا شمرة صدك
مو مالت سحك
لا مالت شبك
ثوبك رد بصر
وسفه ينفتك
منو غيرك يلفي اليل يا كمره
لو ابجي صدك جا دمعتي حمره
يلطولك حرز بي مشدود اسم الله
منو سواهه غيرك واطه عبدالله
يواهس كلشي بلدنيا احبك حيل
يلصدرك ونس لرقيه مو للخيل
يلبختك يبات بصحره تالي اليل

يا لذة جرح
عليمن تنذبح
وتنشال برمح
سالفتك مطر
تغبش لصبح
يلمبجي الصخر والكاع حته الماي
اشتره بروحه غلاتي وغالي عندي هواي
من ازوره بصفي احسه يدعي بس وياي
يلشاتل طريجك دمعه اليه متاع
مخضر جرحك وصفنت حته الكاع
يلبيك السوالف حلوه مو مره
احتار من اوصفك ما الي القدره
من اسمك قصيده وخالده وعبره

يبو عيون الحمر
احضر بلكبر
يا بعد العمر
اني اتنفسك
يا ريح الفجر
من اضحك انلجم واتذكر احزانك
شمقدملك اني وتنسبي نسوانك
وفاركت العليله واحرمتهه احضانك
يرايج تنحوي انت منين ما جان
من احط يمك كمر احس ضواه تعبان
بروح ارقيه احلفك خل اصير انسان

يا اخر حزن
خليني اون
بفيك مستجن
عكبك دنيتي
احسبهه سجن
يالشابع سهام واني شابع نوم
يلمخلي عيالك بلصحاري تحوم
يلطولك سما انت والجروح انجوم
يا خلك النهر روحك
علزينب لسه احس نوحك
يا اول عطش ربحان ما نادم
كبل خادم فرد لا هسه الف خادم

الحبك ارتوه
من اسمك هوه
وسفه ياضوه
راسك والجسد
ما يمشن سوه
يسالوفة صدك وتنكط ملوحه
يخيط وابره للينفتكن جروحه
الماضاكك يكول العنب ما لوحه
عيشني جرح واحد يماي العين
اريدن معرفة حائك لحد السين
من ضي انخلق وبنادم من الطين




كرار فاهم الخفاجي

باگو عافيتكم يالعوافي
وادم روسهه بطرگ الچفافي
ومطــشره العـمايم
ماي بهيمه نايم
وادم روسهه بطركَ الجفافي
ــــــــــــــــــــــــــــــــــــــ
داس الخيــل صـدرك ياابو الاحساس
اول تـالـــي نايــم جــفــي بــلا راس
ياهـو الكَـطع وركَه من ايدك الياس
أنــه ام الفــدالــك روحـــه عــبـاس

يابعد الســوالف
ياشيــخ المظايف
متغطي بتراب وموش دافي
باكَــو عافيــتكم يالعوافــي
ــــــــــــــــــــــــــــــــــــــ
مامش خيـمه عــدك ويـن ترتــاح
ابعيــد المــاي عنــك صـعـبه يلاح
ومامش روس ضلت كَصهه ذباح
عبـدالله طــفل وكـــبـار الارمــاح

كَد النــسمه راسه
المــوت بسهم باسه
وامه اتلولي ومحسبته غافي
باكَو عافيــتكم يالعوافــي
ــــــــــــــــــــــــــــــــــــــ
جســمك خاوي كلــش وشل الحـيل
من الطعـــنات صاير جـنه غربــيل
ماتــنــشــال يــمه كــلي شـنــشـيل
اشما اشيــلن كــتر اكتارك اتمــيل

مــاتـلــزم يـاريح
كل اكتــارك اطيح
بس اتراب طولك يمه صافي
باكَو عافيـتـكم يالعــوافــي
ــــــــــــــــــــــــــــــــــــــ
عنــدك نـقص اصــبع فاركَ ايديـك
وجسمك جنه خيــمه وزينب البـيك
مـــدري شيوجعـــك وين اليــئذيك
زينـب توجعـــك لمــن تــصد لـيك

لمن زينــب اتـــنوح
اتجـمل جرحك جروح
بس ظحكتهه لجروحك تشافي
باكَو عافيتــكم يالعــوافي
ــــــــــــــــــــــــــــــــــــــ
مـن بعـــــد التعـــب والــهم اجيــتك
ومثــــل بالــي المطــشر شو لكَيــتك
أمنـيـــتي اشتــمن الهيــل بـلحيــتك
أمنيتي انذبحــت ابساعــت منيــتك

بعيوني الحزن شاخ
بيه بكـــل كتر أأخ
بعد مابــيهن ايحملن جتـافي
باكَو عافيتكم يالعــوافــي
ــــــــــــــــــــــــــــــــــــــ
جم جرح بجرح وسط الضلع شاط
مو بس خيمه حركَو حته الكَماط
وادم مو لسن من تحـجي بسياط
ابزينب جم جرح صوط الشتم حـاط

صاحــت ياأهلــــنه
ماظلــــت محـــــنه
محد صاح للظــلام كافي
باكَــو عافيتكم يالعـــوافي

حيدرالعماري

ميمر.. استشهاد الامام السجاد ع

يادنيتي ،اشفت وياج
بس الهظم والدمعه
ــــــــــــــــــــــــــــــــــــــ
كاس الهضم يادنيه جرعتيني
انه بحصيره جمعت جسسم حسيني
بحرك الخيم جم جويه جويتيني

خيل ونار ،،وين اندار
سياط وعده ،،وخوف ازغار
وشكد متت ،يم الخيم
من عمتي رادت فزعه
ــــــــــــــــــــــــــــــــــــــ
شفت الاطفال من الرماد اختنكت
من جنت بلخيمه وعليه احتركت
جم طفله مابين الخيول انسحكت

انهض ردت ،،كمت وطحت
حسين انسلب ،وسفه صحت
شفت العطش ،شوف العين ،واكف الماي يمنعه
ــــــــــــــــــــــــــــــــــــــ
لهسه الحبل بجفوفي هاي اثاره
وليل الخرابه بعيني ضل تذكاره
ودم ركبتي بكيد الضلم يتجاره

شامت وكف ،،يمنه وهتف
بلا ابو الفضل ،زينب اسف
من اشروا ،زينب هاي ،،ضاكت بعيني الوسعه
ــــــــــــــــــــــــــــــــــــــ
لوميت انه ولاعيوني اتشاهد
بصدر الحسين الشمر بلطف كاعد
ردت انهض وجان الجسم ميساعد

عليه انفرض ،،ذاك المرض
وجفن السبي ،،لاماغمض
لميت انه ،جسم حسين ،،قطعه اجمعتهه بقطعه
ــــــــــــــــــــــــــــــــــــــ
مايسوه عمري ابلايه ابوي الغالي
ودرب اليسر مالحظه فارك بالي
راح انه اروح الرحمة الله العالي

لله ارتحل ،،بدمعي اليهل
وبركبتي ،،جرح الحبل

لجدي النبي ،،اشكي الصار ،واشكي الحصل للبضعه

الشاعر بشار السامي

#تراث

سجادك يداحي الباب گوم اوعاين الحاله
من عگب اليسر سموه والسم مرد دلاله
ــــــــــــــــــــــــــــــــــــــ
ظل من عگب ابوه حسين ونه ايجر بثر ونه
ابعينه الماي لو شافه يهل دمعه اويصد عنه
يگول اشلون اضوگ الماي وحسين انحرم منه

مارحموه عدوانه
واهل بيته اورضعانه
كلها انفنت عطشانه

ظلو جثث بالحومه اوداستهم الخياله
ــــــــــــــــــــــــــــــــــــــ
كلما يذكر المظلوم تسحب دمعة اعيونه
ليل انهار مايهجع اومن حزنه انخطف لونه
گامت تعتني الشيعه اوعلى حزنه يلومونه

يگلوله ارحم احوالك
حزنك مرد دلالك
ياهو اليظل لعيالك

وانته السلف تاليه اوبدر الدين وهلاله
ــــــــــــــــــــــــــــــــــــــ
ابحسره ظعن عن دنياه امن امته جدك الهادي
اوجدك حيدر الكرار راح ابسيف المرادي
اومك گضت مظلومه اومن اضلوعها اتنادي

اوعمك غيث وفاده
السم مرد افاده
الچتل الكم صبح عاده

وبهاالشرف باري الكون خص المصطفه او آله
ــــــــــــــــــــــــــــــــــــــ
لمن سمع ناداهم اونار الحزن وگاده
يگلهم مثل متگولون صار النه الچتل عاده
لاچن ياهو من عدكم گبل سامع امن اجداده

منه اتسلبت نسوان
اوطافو بيهن البلدان
اومن عدها احترگ صيوان

اوشافن راس واليهن عدوه اعلى الرمح شاله
ــــــــــــــــــــــــــــــــــــــ
عيني ماتصد ليهن واشوفن زينب اگبالي
الا اذكر هضيمتها واذكر لوعة اطفالي
يهل الوادم تلوموني امن اتلف بالحزن حالي

شفت الشام بعيوني
والسلسله اعلى امتوني
واهاليها يشتموني

اورحنه ومجلس الطاغي اوخواتي وگفن گباله
ــــــــــــــــــــــــــــــــــــــ
يتمايل طرب شفته ومن الفرح يتثنه
ويعاين لعد زينب اوزينب تجذب الونه
يمه راس ابوي احسين وبناته يشوفنه

ابعود ايجلب اشفافه
اوباري الكون ماخافه
يهتف فرح بسلافه

والباري نكر وحيه وبالميعاد ما باله
ــــــــــــــــــــــــــــــــــــــ
يحيدر تم عليه هل حال يتكاثر عليه همه
حسره ايجر بثر حسره ويون اعلى ابو اليمه
حتى احرب عدوه اعليه ياحامي الحمه اوسم

خلا يلوج او چبدته ممروده
اوحصل عدوه ابچتلته مگصوده
يتم الباقر ياعلي من عوده
خلاه تجري دمعته اعله اخدوده
ــــــــــــــــــــــــــــــــــــــ
گام اوغسله الباقر واشاف الاثر بمتونه
حن گلبه اوصفگ بيده اوسالت دمعة اعيونه
يگله ياذنب عامل اوحالك مايرحمونه

لسا يبويه امخزنات اجروحك
فوگ النوايب والهظيمه اونوحك
الله يساعد عالمصايب روحك
ــــــــــــــــــــــــــــــــــــــ
وشاله ونزله بگبره اودمع العين يتجاره
اوتمت تنحب الفركاه عياله اوتصرخ ابداره
مامست مسيته اعليه الا ابگبره يتواره

وحسين ظل ابكربلا اثلث تيام
تلعب عليه اخيول ذيج الظلام
ماحصل واحد من جميع الاسلام

يحفرله گبره ابيده او يسكن روعة اطفاله


السيد المرحوم
عبد الحسين الشرع

#اللهم_عجل_لوليك_الفرج

محمد تنشد على حسين ... راح حسيـن يامحمد
شـــال على الرمـح راسه ... وجسمه بكربلا إمدد

ـ*******

يامحمد يابن حيدر
شلون أگدر اخبرنك
وإنت بالمرض مصيوب
وصوبني سهم ونك
يامحمد أخاف عليك
سهامي لا يصـوبنك
خواتك للوطن ردن
لاچـــن بالهضم جنك

هاك أخبار بيه اشصار ... ريتك حاضر وتشهد

-----

يامحمد عماني البين
من رد المهر خـــالي
طارت روحي للميدان
تحــــوم تدور الوالي
شفته على الأرض مطروح
وحدره إفرشت دلالي
وصار يحرك شفافه
ويطلب والطلب غالي

هاك اخبار بيه شصار ... ريتك حاضر وتشهد

-----

يامحمد أخوك حسين
متوسد على التـــربان
ومن كثر الجروح البيه
ومن نار العطش ثگـــلان
وينادي بضعيف الصوت
وجدي المصطفى عطشان
بس آنه احضرت يمه
وعليــه دايـــره الــعــدوان

هاك أخبار بيه شصار .. ريتك حاضر وتشهد

-----

محمد خويه واحتاريت
من صـــار الشمر يمه
جسمي رميته فوگ حسين
أفدي برگبتي جسمه
صوته الشمر گومني
وصار الوالدي يشتمه
وحكم بالنحر سيفه
وگـصـه وخضبه بدمه

هاك أخبار بيه شصار ... ريتك حاضر وتشهد


-----

يمحمد وجت الخيل
تركض وسحگت صدره
وماظل عظم سالم بيه
وتكـــســـرت خـــرز ظهره
خويه وسلبوه الگوم
الله شــصـــعــــب أمـــــره
وظل عاري ثلثة ايام
موســـد عالرمل نــــحــــره

هاك أخبار بيه شصار ... ريتك حاضر وتشهد

-----

ذبحوه وإكتفوا منه
راسه على الرمح شالوه
من الكوفه للشامات
وبطشت الذهب خــلــوه
محمد وبمجلس يزيد
وما بين العـــدى نصبــوه
عيني بالعمى ولاشوف
راسه بالعصى يضــــربــوه

هاك أخبار بيه شصار.. ريتك حاضر وتشهد

-----

يمحمد نشدني يزيد
واليــچ يازينب وين
وراسچ بيمن تشيلين
راح وما يعود حسين
وفوگ العلگوم العباس
نام مگطع الچفـــيــن
خويه وانه محتاره
وعالغربه أدير العين


الشاعر الاديب
الشيخ سامر الخفاجي الكربلائي

#اللهم_عجل_لوليك_الفرج

وحـــق الـبالحـــبـل خــويه تلون
آلي اليتلون بالمحصحف تلو ون
الــسوط ابلــون دم مــتني تلون
مــن گــد الظـــرب يابــو رقـــيه
حيدر تركي الكربلائي

يا أول جدم*
فرفح ابدرب الشام*
ويا اترف جرح سهران*
واعيون القصور اتنام*
لمي اسوالفچ عمه*
يبنيتي الخرابه اعيون*
باگت منه كوم احلام*
يالمتنچ نهر ثالم اچتافه السوط*
وياعمه الخرابه اتريد شد احزام*
لا تبچين ... واتهادي اعله جفن الليل*
راحت عمه ذيچ الخيل*
خلصت والعمر وياچ حسبه ايام*
اه يالشام... يا طاري الجروح التعشگ اللچمات*
ويا شوغة يتيمه اعله التراب اتبات*
والمحروگ بالله اشلون جفنه اينام*
اه يالشام*
عمه الليل عنده اعيون* واحنه اجروح ملتمات*
وحتى الريح يهوى الصوت*
كلهم نار واحنه سويلفات اخيام*
شبگي العَبره يبنيه*
مثل عبدالله لمن راح رد وشابگاته اسهام*
..........................
يا لچمة جرح*
يشرب وجعها الليل*
ويا اول عشگ مصلوب*
يشهگ من يشوف الخيل*
عمه الطف زغير وگلبچ انتي چبير*
عمرچ توه ثلث اسنين*
بس من ذاك طفنه الهسه جرحه ايسيل*
انتي اول نفس مفطوم*
يتشلبه اعله عطاب الخيم وايگوم*
وانتي اول متن تارس اعيون السوط*
ترفه اچتافچ وراسم عليهه اخطوط*
صعدي يم الله سوالف بيهه الماي*
اي عمه عله ذاك الماي*
العطّش كل حلمنه وتالي باگ الحيل*
هنيالچ رقيه الموت كلش زين*
وادري هناك*
تتبدين مني بسچة الشمات*
واتمطرين روحچ يم شفاف حسين*
عمة الموت كلش زين*
.....................
يا خيمه التجي*
فزاعه يم الشوف*
عين الشام وكحه اهواي*
واعله جروح گلبي اتحوف*
وين الگه اعله گد باب الخرابه اچفوف*
وين الگه اخو فزاع* بجروح اليتامه ايروف*
معذور اليكتله الشوگ*
روحي ابراحتچ واحچيله عالدخان*
بس بالچ يشوف ابمتنچ النيشان*
واتبدي نده اعله اشفايف العطشان*
واحچيله اعله درب الشام*
اوين انام*
يا فراشة ضلت عالنحور اتطوف*
احچيله قصص عالكان ياما كان*
عن ذاك الخدر والخيل والاحزان*
روحي ابراحتچ عمه*
ومسحي ابشيلتچ دمه*
بعد الطف خظر*
وگلبه اشتهه القربان*
بعده ايريد منّه اجروح*
بارد گلبه من عاين اجروح الذان*
ياهو يفك خدر مچتوف*
اعله الخوّه بقى ملهوف*
اه يالشام.. اه يالشام*


علاء المياحي
الفاتحه لروح والدي

راحت الهيبة بحرگ صيواني
طحت بس ما طاح اسم اخواني

،،،،،،،،،،،،
راح وكت اللمه ذيج الدافية
راح اخوي واخذ مني العافية
جانت وياك السوالف شافية
وما اضن يحسين هم تنساني
،،،،،،،،،،،،،،
راح اشوف الخيمة منكم خالية
وراح اشوف العالية اعله العالية
صعد طول اخت الجفيل الغالية
ونكتب فوگ الهزل عنواني
،،،،،،،،،،،،،،،
راح وكت البيه جنت مرتاحة
هسه بس ليل او حزن ونياحة
وچن شلع گلبي وذبل سباحة
اطلع وجمر الخيم چواني
،،،،،،،،،،،،،
ها خوية احچي وكلي شنهي السالفة
چم ديرة باچر راح امر جم طايفة
ليش من باچر حزينة وخايفه
باجر الطولي يصد الداني
،،،،،،،،،،،
شفت چن ضايع ضعن بالهيمة
وكت هذا الما تصح بيه خيمة
اخ يالشام وعذابة او ضيمة
واخ يادرب السبي الأذاني
،،،،،،،،،،،،،،،
اخ من كل عثرة من كل ميلة
بيوم عاشر ضاع عمري وليله
راس الحسين ابدمع اشكيله
وينحني حتى الجبل لحزاني
،،،،،،،،،،،.
كريم الدراجي

#درب_العشاگه

رايتنه رفت بسم الزجيه : و ٲم الخدر
جابانه عشگك يابو رقيه : موش الاجر

ممنون الك مولاي
متعني الك مشاي
...

جيـت وحنـينك يوميلي
من اتعب انت تشد حيلي
شكرا الك يا ابو الاكبر
وممنونك بصبحي وليلي

بدمع اعتذاري جيت الرضائك : عبدك واريد
رافعلك ايدي واعرف عطائك : مارجع ايـد

الله خلقني الهاي
متعني الك مشاي

...

من كل سنه اتنطر بيهه
بدموعي اضل متانيهه
لمن تجيني المــشايه
انسه حياتي وتالـيهه

كلشي اعوفه واتعنه گاصــد : من لاوعي
درب المحنه وبدموعي رايد : اگضي نعي

عفت العقل والراي
متعني الك مشاي

...

بدربــك اعـيشن ايــامي
مخلوقه الك تمشي اجدامي
حيل ابو فاضل من اتعب
هوه يشد بـيده حـزامي

عين الزجيه تنظر علينه : وتنطينه حيل
جف كله رحمه لازم ادينه : جف الكفيل

فضلك علينه هواي
متعني الك مشاي

..

المشايه درب العشاگه
اگلوب التحبك مشتاگه
كون المشي مو عل رجلين
مگيد واجيلك علـناگه

حته احس بلــوعة سبيه : امجتف اجيك
نادم اجيت و حبلي بدية : مدلي اديك

واگضي الدرب بضماي
متعني الك مشاي

..

نـتلگه ضعنك بالحسره
گلوب وخواطر منكسره
ردت عقيله بني هاشم
من المصايب متغيره


ردت وحيده وماكو رقيه .. ويه الضعون
لهاي المصيبه لازم عليه .. اعمي العيون

تمشي دمعتي وياي
متعني الك مشاي


ابو حميده الشويلي

الخميس ٢٠١٩/٩/٢٦
محرم الحرام ١٤٤١

.
گُومو لينه اليوم اجينه
نشفوا مدامعنه التهل نزلونه من ظهر الهزل
ــــــــــــــــــــــــــــــــــــــ
يـاريـحـــة أمـنـه والابـو .. الشوفتكم اشتاگينه
خلصت مسافــات السفر .. وامـن اليـسـر ردينه
سومر دمعنه امن البچي .. وأتـورمــت رجـلينه
هـاي الـربـاب وام عـلـي .. ورمله اجت واسكينه

بس رقيه أشگد خطيه
سافرت من هذا الشمل نزلونه من ظهر الهزل
ــــــــــــــــــــــــــــــــــــــ
جيناكم ابجـرح اليسر .. وانصيح أمِت يامنصور
وشفنه مگابركم ضوه .. وجــابــر لگــيناه ايـزور
واحنه عله ظهور الهزل .. نــقــره زيارة عاشـــور
نقره السلامُ اعله الگمر .. واعلى الإمـام المنحور

السلامو عالخيامو
انحلفكم ابدم الطفل نزلونه من ظهر الهزل
ــــــــــــــــــــــــــــــــــــــ
هاذي حرمكم عودن .. وگلب المفارگ محروگ
شافنكم ابهيمه وبگن .. يتساگطـن من الــنـوگ
بس ماكو شيله مايله .. ولاثوب منهن مشگوگ
كـضـن الرايه العالنهر .. وضلن يسونهه أعلـوگ

يالنحبكم وابدربكم
ظلينه بس سوط وحبل نزلونه من ظهر الهزل
ــــــــــــــــــــــــــــــــــــــ
اهنا يالفـواطم بالسره .. يم الحـسـيـن امشنه
للجنه كل مؤمن يطب .. واحسين هوه الجنه
خنسوي مجلـس للطم .. يمه ونكـثــر الـونــه
ويالـهـاشمـيـات النعي .. وصوت البچي علنه

اليبچي يمه ايفرح امه
يالمطرت اعليكم نبل نزلونه من ظهر الهزل
ــــــــــــــــــــــــــــــــــــــ
وانروح يـم الــمـشـرعـه .. عدنه اخــو نمشيله
وانصف عبينه امن الشمس .. يستاهل انفييله
وانگع أچــفــوفـه ابدمع .. والفــاتــحـه نهديله
ويم گبره كل احنه سوه .. خل نگعد ونشكيله

خل نگله الفرگه ذله
بس الهواشم ماتذل نزلونه من ظهر الهزل
ــــــــــــــــــــــــــــــــــــــ
ويم جاسم انوج الشمع .. وللاكبر انسوي فياي
وعبـد الله ناخــذله لبن .. وانبلل اشفافه ابماي
السجــــاد هـــو اليعُتبر .. اول الــوادم مـــشاي
وانتن وراه بالقـافـلـه .. والمهدي هم باچر جاي

وبظهوره ايلالي نوره
وانصاره لمن تكتمل نزلونه من ظهر الهزل


#العبدالحسيني_محمدالجماسي

يل ما ترد علّيه ، ما هزّك الحنين !!
لو آنا مو رُقيّة ، لو إنته مو حسين
ــــــــــــــــــــــــــــــــــــــ
بالحلم...چنهه مو أيام يسري وآنا گربك
بالحلم...ضامني الصدرك وأحس نبضات گلبك
بالحلم...بويه يا محلى حنانك محلى حبك
بالحلم...لنـّك !! وفزّيت من نومي أطلبك

نفس الخرابه هيّه ، والغالي مدري وين؟
لو آنا مو رُقيّة ، لو إنته مو حسين
ــــــــــــــــــــــــــــــــــــــ
رددت...من لگيت الروح عن حضنك بعيدة
رددت...ياجفن اغفه وهذاك الطيف عيده
رددت...وآنا أصد لچفوفي ما مشبوكه بأيده
رددت...والدمع سايل:يعمّه احسين اريده

مديت الك أديّه ، لن خالية الأدين !!
لو آنا مو رُقيّة ، لو إنته مو حسين
ــــــــــــــــــــــــــــــــــــــ
ونّتي...صحّت النام اعلى ظلمك من منامه
ونّتي...ونّه چانت تختلف عن اليتامه
ونّتي...ونّة ردتك بيهه ترجع بالسلامة
ونّتي...هذي ونّة هايم ويفضح هيامه

جابو طشت إليّه ، عن هذا تسألين ؟!!!
لو آنا مو رُقيّة ، لو إنته مو حسين
ــــــــــــــــــــــــــــــــــــــ
ناظرت...وآنا بأفكاري هذاك حسين أرسمك
ناظرت...هذا بس راسك حضر چاوين جسمك؟؟
ناظرت...وآنا أردد "لا لا" و "أسم الله على اسمك"
ناظرت...ردت أبوسك ، يابس اعلى الوجنة دمّك!!

بس حسرة تدري بيّه ، وببالي كلمتين:
لو آنا مو رُقيّة ، لو إنته مو حسين
ــــــــــــــــــــــــــــــــــــــ
وأعرفت...ياجمر چان بگلب عمتنه يسري
وأعرفت...ليش كل ما أطلبك مدمعهه يجري
وأعرفت...ماكو داعي بغيبتك ينعاش دهري
وأعرفت...من على الراس انتهت ساعات عمري

يم راسك المنيه ، لو ما غدت تحين
لو آنا مو رُقيّة ، لو إنته مو حسين
ــــــــــــــــــــــــــــــــــــــ
لا تظن...وانته بيّه اتعيش ذاتك هيّه ذاتي
لا تظن...وانته راحل بعدك اتهنّه بحياتي
لا تظن...ما أجت وآنا أعلى راسك ذكرياتي
لا تظن... ما أريد الموت ، يا محلى مماتي

تدريني الك وفيّه ، وتگلي ما تجين؟!!
لو آنا مو رُقيّة ، لو إنته مو حسين

مازن الزبيدي

تساءل الكثيرون في طريق السبي عن طفلةٍ صغيرة اختلط على وجهها وثيابها الدم والدمع والرماد
#إبْنَتُ_مَن؟؟
حتى سئِمَت تلك الأسئلة
وقالت:

-
-
آنا بِـت ذيــچ الرمــاح التجــري دم
آنا جمـره مخضره من گاع الخيم

آنا مو طفله صرت طف له ومصاب
وْصِـرت دنيا وچــان عالَمكُـم عَـدَم

تسأل اعله چفوفي هذا الدم يسيل
منين ؟ من جريت من صدره السهم

ما خِفت من صدره رغم ابلايه راس
شال اديه من شافني ونحـره ابتسم

مـو بگــد چفوفي تعْبَتــني السهـام
اشما أجر ياخذ شكو بروحي الألم
آنا بتمن ؟
راح اگلك ، بت ابوي❤️
لا يغــرّك لـون وجــهي الما سَلَـم

مالي حيل وبالدرب حيـلي انهدم
من سِبونه الصعبه نقبلهم خدَم
من نزل فوگـ الصدگـ صوط الوهم
امشي مشية راي مو مشية ندم

ذابله من الشوگـ تارسني الوضوح
يذوب جِفنه البَس بالمْــلاگه حِلَم

اليعرف العباس يعرف بالدليــل
هيچ يذبل لونهه الما عدهه عَم💔

هيچ تمشي محدبه المفارگهه طول
يطيح كلشي بطيحته العاشِگـ عَلَم

زغيره صح بس الكبر مو بالسنين
اشكبره جاري الماي ويعبره البلم

الما عرف شمس الله ما يعرفني زين
العني يسأل شاف موت وما فهم😞


علي گاطع البهادلي

(يارقيه ياعزيزة ابيها الحسين ع)

عمه ابوي حسين وينه..
ليـش مايـسـمـع بچينه
مااضن ياعمه يدري. من اذاني دمي يجري
وين.ابويه وين ابويه
******
چني بالطفله رقيه تحچي ويه ام الخدر
من عله الناگه ودمعها ينزل آهات وجمر
شماتناشد عن ابوها يجي يضربها الشمر
زغيره ماتحمل سياطه شمايطگها تنهطر

دگله چف ايدك ثجيله.
وانه هم طفله وهزيله.
من الضرب شگيت ضهري. من اذاني دمي يجري
وين ابويه. وين ابويه
*
وين ابوي حسين عمه ليش طالت غيبته
ما اضن ياعـمـه يــدري سـلـبوها عيــلـته
عمه شو چني اشمّن هسه اجتني ريحته
ثاري واحد فات شايل للحُـسين اعمامته

رقيه طاحت من بچيها.
الناگه چا داسـت علـيها.
تصيح ارحموني اعله زغري. من اذاني دمي يجري
وين ابويه. وين ابويه
****
الـعـل رمح ذاكه يمعه چنه شـو يگرب الي
بعيد عني بس اشمّـن منه بـي ريحت هلي
راس مَن هذا الاشوفه عالرمح ضل معتلي
ليش كل ماآنه اصدله دموعه من عينه تهلي

بعيد. بس ينضر عليه.
وبچه مـن شَـدّو اديه.
نار احس ياعمه تسري. من اذاني دمي يجري
وين ابويه. وين ابويه
********
ليـش ياعـمـه تأخـر ارد انام بحضنه واغفه
هيچ ياعمه ويردلي واعله راسي يخلي چفه
الحبل گطع اديه خشن وانه اچفوفي ترفه
تنسبي العلوليه صعبه ونسبينه والله وسفه

وينه ابوفاضل يعمه
ارد اشوفنه واكلمه
ارد اسولفله اعله يسري. من اذاني دمي يجري
وينه ابويه. وينه ابويه
*
وصـلو الـشــام الـمـصـيـبه آه ياشـام الـبله
زيـنب اوياها الـيـتـامه تنـضـر اعليها المله
بالحجار وبالشـتايم وكـلـها زينـب تـحـمله
وطبت السوگ چانت اشد من طف كـربله

هناكه ماعدهن عشيره
والله حـيـرتهـن چـبيره
رقيه تصرخ آيدهري من اذاني دمي يجري
وينه ابويه. وينه ابويه
**
طـبّن الـديـوان امـيه بالـقـصـر وگفن سره
بالحبال مشدديـهن مــره تــتـبـعـهـا مــره
نوموهن بالـخـرابه رقـيه نامـت بــس تره
الوساده حجاره چانت افراشها تراب الثره

فزّت وصـاحـت رقيـه
حسين كضاني من اديه
مااريدن هذا عمري. من اذاني دمي يجري
وينه ابويه. وينه ابويه
*****
خادم بني فاطمه
الشاعر عمار حسن الدراجي ٣٠ محرم ١٤٤٠

الشاعر اياد الديراوي

لقاء رقيه (ع) مع الرأس الشرف


نتلاگه گتلي .. وانا شديت الامل بنفاسك
نتلاگه گتلي .. ما دريت الملتقه وي راسك
****
إلتقينه .. وانا كل ظني تظمني ابين اديك
إلتقينه .. وعالطشت آخر نفس خلص عليك
متنه انا اوياك لاچن ظل كلام
هسه ميت لو وكت حرگ الخيام
لو وكت سد الشمس ظِل السهام

نتلاگه گتلي .. بيك ميت كلشي بس احساسك
نتلاگه گتلي .. ما دريت الملتقه وي راسك
****
فاجئتني .. اشگد يغالي اعله الطشت طال النظر
فاجئتني .. بدال ورده بويه جايبلي نحر
ما شفتني اگبالك انا اشگد بچيت
كل مسه اتقبلني بويه اتعوديت
بموتك اتفاجئني ليش وما حچيت

نتلاگه گتلي .. ويبتسم يابويه كل نوماسك
نتلاگه گتلي .. ما دريت الملتقه وي راسك
****
بويه شفتك .. ونته بخدودك طبع عنه أشگول
بويه شفتك .. چنه راسك ما سلم من الخيول
شفتك انا وغيمه صرت امن الدمع
امن الحوافر بويه بخدودك طبع
يعني ما كفّاها تكسرلك ضلع

نتلاگه گتلي .. ما يمر ابالي حافر داسك
نتلاگه گتلي .. ما دريت الملتقه وي راسك
****
اشتكيلك .. وگلت انزع فوگ صدرك كل حزن
اشتكيلك .. چان حظنك دنيه هسه بلا حظن
گلت اشوفك وشتكي درب اليسر
العاطفه وحنيه كل ذاك الصدر
خوفي بس لا فوگه متربع شمر

نتلاگه گتلي .. اتيقنت سيف الشمر ما جاسك
نتلاكه كتلي .. ما دريت الملتقه وي راسك
****
ما دريتك ... انته مو كلك تجيني بهل لقاء
ما دريتك .. چا متت وياك بويه بكربلاء
چا گبل ظهرك انه ظهري التوه
احلى لو موتتنه يالغالي سوه
شمحلى بويه انشم سوه اخر هوه

نتلاگه گتلي .. ونته محروس بزند عباسك
نتلاگه گتلي .. ما دريت الملتقه وي راسك
****

الشاعر اياد الديراوي

#تراث

ايام ايام هاي الدنيا ايام
يوم الاهل يحمونه
يوم العده يسلبونه
هاي الدنيا ايام
ــــــــــــــــــــــــــــــــــــــ
گوم ياحيدر بناتك شوفهه بالطف يحيدر
چانت ابمنظر خدرهه ليوم اصبح غير منضر
جانت باوطان صارت بالخيام وتسكن البر
حته الخيام باهلها محصنه وميمسهه كل شر

لن الاهل فوك الثره
كلهه جثث متوذره
ولن الاخيام اموجره
ولنهه متسلبهه الخدر

بخيام بخيام يوم الحرم بخيام
يوم اخيامهه اعليها
تتلاهب مسلبيها
هاي الدنيا ايام
ــــــــــــــــــــــــــــــــــــــ
زينب تحاجيك من الطف وانت ياكرار تسمع
تصيح يابويه الزمان شلون بينا گام يصنع
بويه تذكر من اروح لگبر جدي شلون اطلع
اطلع بوكت الضلام ولمن الاصوات تهجع


انته يبويه بصحبتي
والي تباريني اخوتي
واركض ليوم بغربتي
صرت من مصرع لمصرع

أجسام أجسام عيني تشاهد الاجسام
جانو امس كدامي
ليوم النار بخيامي
هاي الدنيا ايام
ــــــــــــــــــــــــــــــــــــــ
امس يابويه اخوتي كبال عيني وصد ليهه
خيمتي من اربع جوانب اخوتي حاطت عليهه
يروح اخو عنهه يحامي الجار اخو ثاني يجيهه
وابنك العباس يمهه بالحراسه التزم بيهه

وناشر عليهه رايته
وبخميتي ايوصي اخوته
بخوته الخيمه وهيبته
حارسيهه محصنيهه

ضلام ضلام لن ليوم ضلام
للخيمه يحرگوها
ولزينب يسلبوها
هاي الدنيا ايام
ــــــــــــــــــــــــــــــــــــــ
امس يابويه اخوتي بخيميتي يتفكدوني
شاريده كولي يزينب كل الاخوه يسالوني
ليوم لن شفت السياط يكسروها عله متوني
ليوم لن من خدري اطلع خايفه ويسلبوني

هم هاي جانت تنحسب
متون العقيله تنضرب
بعزت خدرهه تنسلب
وين الاخوه فاركون

اكرام اكرام يوم ابين ل اكرام
ويوم ابين سلابه
وخدر الحرم متهابه
هاي الدنيا ايام
ــــــــــــــــــــــــــــــــــــــ
امس عالعايله بين الاهل همه اليحرسوهه
وحده تلكاهه وي ابنهه وحده تلكاهه واخوهه
وحده تلكاهه وي عمهه وحده تلكاهه وي ابوهه
العايله الشافت اليوم تشوف ناس يلسبوها

تشوف الاهل متطشره
تشوف الضلوع مكسره
عالنهر سبع الگنطره
حسين جثته يسحگوهه

جسام جسام ثوب العرس جسام
جفوفه بدمه حنوهه
شموع العرس طفوهه
هاي الدنيا ايام
ــــــــــــــــــــــــــــــــــــــ
امس يابويه اشوف كبال عيني علي الاكبر
شوكت ما اندهه باسمه بخيمتي بالحال يحضر
ليوم لنه كبال عيني جسمه ياحيدر موذر
ذاك وجهه ليذكرني بالرسول اصبح امعفر

كل اخوتي بهذا الوضع
كل جسم راسه منگطع
بصدر الاخو لا ضل ضلع
سحكته الخيل وتكسر

مانام مانام جفن احسين مانام
يرعه جان امس حالي
ليوم اموذر اكبالي
هاي الدنيا ايام
ــــــــــــــــــــــــــــــــــــــ
وين ايامي يبويه ابين ولياني عشتهه
راحت الوليان عني فارگتني وفاركتهه
الخدر راح الاهل راحت شفت ناس الماشفتهه
اصبحت حرمه وغريبه وهيبتي ذيج افگدتهه

هاي الاطفال الي ربت
ابعزت اهلها اتسيبت
مثل يبويه اتسلبت
السلبتني سلبتها

ايتام ايتام لنهه ليوم ايتام
امس والدهه يشبگهه
اليوم الخيل تسحگهه
هاي الدنيا ايام
ــــــــــــــــــــــــــــــــــــــ
امس غير النسم ميمر ابد يابويه عليه
ليوم لن اركض ابين الخيل وآلآم بيه
والسياط اتربعتني وانه اشگفهه بديه
لا هذاك العز اشوفه ولا الذل بالغاضريه

يابويه اصير بيا فكر
اذكر اخوتي والخدر
ابن امي حز راسه الشمر
واجه براس احسين ليه

آلآم آلآم شتريد احچي آلام
بن امي الماكو امثاله
صار الشمر چتاله
هاي الدنيا ايام
ــــــــــــــــــــــــــــــــــــــ
ما اجاك الخبر عني صرت يابويه بهضيمه
الخيم وجوها علينا ولا بگت للحرم خيمه
وانه ساعه اركض واجيب ايتيم والحگلي يتيمه

ساعه العليل ابخيمته
اسمع يبويه صيحته
مهدد بگطعت رگبته
كضيت يابويه النهار عله هل حاله بهذا همي


الشاعر المرحوم
عبد الحسين ابو شبع
#اللهم_عجل_لوليك_الفرج