ليش تروح
تدري وحيد انته وهما جيش أنذال
ليش تروح
وظلت بالخيم عندك حرم وعيال
لاهابوك
لارحموك
طعن سيوف
طعن رماح
تانوا كون يمته اطيح
اجوا بخيولهم داسوك
ماصارت گبل مولاي
تسحك خيل عالمذبوح
ليش تروح


علي طعمه البطاط

ارد انام بحضنك واشبع حنان
وين اروح ومالي بالدنيا مكان
يالتارس الدنيا ضوى. بعطرك يشم الهوى
وين اروح ومالي بالدنيا مكان
***********
آنـه يابــويه رقــيه امـعـلمه بـحـضـنـك انام
هسه انام ابضَهر ناگه وتارس عيوني الظلام
اغفه ويگعدني الجرح...
ومات بعيوني الصبح
يابويه وبعيد الدرب
ويبرالي شيّال الرمح
عـنك انـشد ياحـبـيـبي انـته ويـن
عيوني رمده ومااشوفك ياحُسين
امنهد چنت بنينوى. بعطرك يشم الهوى
وين اروح ومالي بالدنيا مكان
*****
عگب حضنك وين انامن بالسبي ماعدنه دار
حجاره اسويها وساده والتراب افراشي صار
عگب حضنك ياگلب
صرت انامن عالترب
بـلا اهـل ثاري يـذل
اليعيش اويه الغرب
شلون ولحادي غِريمه وبيده راي
الذبح عبدالله يـحـدي الناگه هاي
الجرحي ماغيرك دوه... بعطرك يشم الهوى
وين اروح ومالي بالدنيا مكان
***********
چنت احس روحي فَرَاشه وحضنك ازهار لجنان
بمـملـكت حـضـنك اميره يانبي الحب ولحنان
من عگب ذاك الحضن
اغـفـه عـالـهـزله واون
وبيدي مشدود الحبل
ودم يصب مـن الاذن
ليـش طالـت غيبتك بويه تعال
جرحن ايدي تره خشنه الحِبال
آنه وايتامك سوه ... بعطرك يشم الهوى
وين اروح ومالي بالدنيا مكان
**************
چـلـمـت البابه احـبـها بابا بابا اسـمـعـها اريد
مـن تگـلي چنت بيها افرح وچـن عندي عيد
چـلـمـت البـابه بــعـد
خاف ما اسمـعـها ابد
ولا اشـبـگـنه الـصـدر
چان الي حضن ومهد
وين صدرك چنت احسبه عش حمام
اليـحـضـن افـراخه وعـلـيـهـن ماينام
ليش وبلحضه انطوه ... بعطرك يشم الهوى
وين اروح ومالي بالدنيا مكان
************
تَـعـبِـت بـويه خـواتـي بـكـثر ما ابچي عليك
ولامـن اندلن مكانك حته اجيبن مي واجيك
ادري اذاك الـــضــمه
يا عــزيــزَ فـاطـــــمـه
اشفاهك ادري اتفطرت
من لعـطـش صبت دِمه
ودعتني وچان الي اوداع الاخير
ومن مشيت وعينك اعلينه تدير
وبيدك يرف اللوه. ... بعطرك يشم الهوى
وين اروح ومالي بالدنيا مكان
***********
اتصبر اعـليه حميـده وهـيه ابـوها تـوه مات
اللـيل نگـضي بـس بواچي يـمـي ليـليه تبات
تمرني چايمته بحلم
وتمسح بدمعي وتلم
للخرابه يمته نوصل
والتـقـي بـيك واشـم
امتانيه يمته التقي بيك ابسكوت
بالـخـرابه اشـبگ الـراس وامـوت
اقره الحمد والقل هوه.. بعطرك يشم الهوى
وين اروح ومالي بالدنيا مكان
*********
عمار حسن الدراجي/١٧/محرم /١٤٤١

نايم عله جفونچ سهر
يالشايله بعينچ بحر
موسى النبي يمچ حظر
يازينب.
1
يالعقيله من بچيتي غمظة عيون السمه
والسحايب جف دمعها وعانگن شهگت ظمه
وحدچ انتي والليالي وما نشد عنچ حمه
شهل غرابه ها يزينب شلتي بچفوفچ دمه

معذوره لو دمعچ نزل
وحدچ بقيتي ابلا اهل
لا كافل العنچ سال
يازينب
2
شنهو صبرچ والضحايه اتوزعو يمچ وذر
اشكثره دمعچ! ماتغير لون دمهم ظل حمر
من عتبتي وبعتابچ لن طفح ماي النهر
چنه يشعر بالندامه ردتي مايه وعتذر

بعد الندم ما ينفعه
شما ناده محد يسمعه
من عينچ اتصب مشرعه
يازينب
3
شعنده موسى يم خيامچ حيره بعيونه غدت
هذا بحرچ ما يطره والعصه بيده ارجفت
شلتي حزنچ لن طفوفچ حاجز هموم امتلت
انتي زينب انتي دمعه ونتچ ما بطلت

لميتي بعيونچ حزن
يمچ غده موسى يون
والحالتچ اصبح يحن
يازينب
4
ما غفيتي كل حياتچ حلمچ بصحوه انرسم
المثله دمعچ يالغريبه لازم ايطفي الخيم
انتي جمره وبعباتچ مو لهب يسعر الم
انسبيتي ياعجيبه ما حظر راعي العلم

ما ادري ياصبر اليصح
كل خطوه تمشيها بجرح
والوالي راسه اعله الرمح
يازينب
5
ظلمه دنياچ ابحزنها ياوسف مات الضوه
وختنگ صوت الليالي وما تصح شمة هوه
من وگع راعي الكلافه إلدهر ظهره التوه
من وصل يمه عضيده ما لگه ابچفه اللوه

محني وصلله المصرعه
يم كافلچ هل مدمعه
باسه اعله عينه ودعه
يازينب
6
اوگفتي عالتل يالعقيله اوبين اخيال النبي
بي وجه امچ يزينب وشايله قيود السبي
حسينچ انحزت رگبته بصبر ابوچ اتحجبي
ردي لخيامچ يحره لا يجرون العبي

يم الصبر صبرچ حله
آيا فجيعة كربله
تتكفلين ابعايله
يازينب

الشاعر اياد الديراوي

لقاء رقيه (ع) مع الرأس الشرف


نتلاگه گتلي .. وانا شديت الامل بنفاسك
نتلاگه گتلي .. ما دريت الملتقه وي راسك
****
إلتقينه .. وانا كل ظني تظمني ابين اديك
إلتقينه .. وعالطشت آخر نفس خلص عليك
متنه انا اوياك لاچن ظل كلام
هسه ميت لو وكت حرگ الخيام
لو وكت سد الشمس ظِل السهام

نتلاگه گتلي .. بيك ميت كلشي بس احساسك
نتلاگه گتلي .. ما دريت الملتقه وي راسك
****
فاجئتني .. اشگد يغالي اعله الطشت طال النظر
فاجئتني .. بدال ورده بويه جايبلي نحر
ما شفتني اگبالك انا اشگد بچيت
كل مسه اتقبلني بويه اتعوديت
بموتك اتفاجئني ليش وما حچيت

نتلاگه گتلي .. ويبتسم يابويه كل نوماسك
نتلاگه گتلي .. ما دريت الملتقه وي راسك
****
بويه شفتك .. ونته بخدودك طبع عنه أشگول
بويه شفتك .. چنه راسك ما سلم من الخيول
شفتك انا وغيمه صرت امن الدمع
امن الحوافر بويه بخدودك طبع
يعني ما كفّاها تكسرلك ضلع

نتلاگه گتلي .. ما يمر ابالي حافر داسك
نتلاگه گتلي .. ما دريت الملتقه وي راسك
****
اشتكيلك .. وگلت انزع فوگ صدرك كل حزن
اشتكيلك .. چان حظنك دنيه هسه بلا حظن
گلت اشوفك وشتكي درب اليسر
العاطفه وحنيه كل ذاك الصدر
خوفي بس لا فوگه متربع شمر

نتلاگه گتلي .. اتيقنت سيف الشمر ما جاسك
نتلاكه كتلي .. ما دريت الملتقه وي راسك
****
ما دريتك ... انته مو كلك تجيني بهل لقاء
ما دريتك .. چا متت وياك بويه بكربلاء
چا گبل ظهرك انه ظهري التوه
احلى لو موتتنه يالغالي سوه
شمحلى بويه انشم سوه اخر هوه

نتلاگه گتلي .. ونته محروس بزند عباسك
نتلاگه گتلي .. ما دريت الملتقه وي راسك
****

الشاعر اياد الديراوي

#تراث

أدور عليك يبن امي ولا واحد يدليني
عاد أنته بضعيف الصوت يامظلوم حاجيني
ــــــــــــــــــــــــــــــــــــــ
جيتك من قلب مكسور أنه أختك المهضومه
جيت بروح لهفانه أدور عليك بالحومه
جيتك خويه حاجيني عليك أمك المظلومه

وين بيا كتر مطروح
جسمك هم بعد بي روح
يبن أمي صدك مذبوح

وين الي ينظر لحالي ويم جسمك يوديني
ــــــــــــــــــــــــــــــــــــــ
صدك نايم على التربان خويه وعلوجه مقلوب
صدك سحكت عليك الخيل بالميدان من كل صوب
صدك خويه نزف دمك وگلبك بالسهم مصيوب

ولـمـن ياصـبي العين
طلعت السهم يحسين
مـن كلبك طلع ثلثين

وهذا السهم هو الحال ما بينك وما بيني
ــــــــــــــــــــــــــــــــــــــ
حر وعطش وبجسمك ألف وتسعمية صواب
فوك جروحك ودمك گلبك بالسـهم ينصاب
بعد شلون تتمكن تنهضلي وترد جواب

وأدري ياضوه عيناي
لو ما هل المصايب هاي
متقصر يخويه وياي

وحاشاك بمثل هاليوم محتاره تخليني
ــــــــــــــــــــــــــــــــــــــ
حالك هذا وأنته أنوب خويه أسمع بعد حالي
بأيتام وحـرم كـلــــبي تمحن وأنشده بالي
وين أنطي الوجه وانه أخوتي مذبحه أكبالي

وكلسا طفل من عندي
يروح وينفطر جبدي
وأنه بكربله وحدي

صواويني خذتها النار والعيله وصواويني
ــــــــــــــــــــــــــــــــــــــ
هجمت فرد هجمه الخيل خويه وشبت النيران
وهامت عيلتك كلها من النيران للميدان
لجن ياضوه عيوني ضلت بالخيم رضعان

وأنه تمحنت بيها
شلون النار أطب ليها
وأخلصها يواليها

رضعانك بوسط النار وانه العده مسلبيني
ــــــــــــــــــــــــــــــــــــــ
خويه محيره ضليت وأتلفت يمين يسار
أعوف الخيم رضعانك تتحرگ صغار كبار
أطب للنار أخلصها أخاف أنه أحترگ بالنار

والأيتام ملتمه
هاي تصيح ياعمه
وين حسين ابو اليمه

وهاي تصيح يازينب حر العطش ماذيني
ــــــــــــــــــــــــــــــــــــــ
رضعن بوسط نيران وأيتام بحوافر خيل
ماتت بالسحك وعيال مامت والدموع تسيل
وأنه وحيده مظلومه بيه بعد ماضل حيل

وعباس الاجيت وياه
هسه من كمت أنخاه
أضن كلي يزينب أه

عليج شبيدي يعيوني يزينب وين جفيني
ــــــــــــــــــــــــــــــــــــــ
خذاك الدهر من عندي يخويه وأكَطعت بيه
مصايب كربله يحسين مدري أمنين أجت ليه
من الخدر والصيوان تــالــيه لــبـني أميه

هيجي الدهر خلاني
وضيم وهضم راواني
صرت من عكب ولياني

أرد السوط بيساري وأستر وجهي بيميني
ــــــــــــــــــــــــــــــــــــــ
ها شتكول يبن أمي ردلي بصوتك أجوابي
تقبل بعد أشكيلك هضمي وجمرة امصابي
أنته بالسهم مصيوب وانه فراكك أصوابي

أنته بروحك بجسمك
وانه مجرحه بهضمك
يخويه خلي اجي يمك

أداوي جسمك بروحي وانته بشوفتك داويني
ــــــــــــــــــــــــــــــــــــــ
يخويه ان جان ماعندك هـمــه تكوم لعيالك
لاتهتم ياماي الـعين أنه خلافك بدالك
أحمي عـيلتك أنه يخويه واحرس أطفالك

لجن يحسين أخاف أعليك
ضامي ومحد يرويك
خلي أعتني وأگصد ليك

أقدم ألك ماي العين وأشرب يابعد عيني


الشيخ هادي القصاب

#اللهم_عجل_لوليك_الفرج

جدمي حافي اعله الترب
ترضه بنتك تنضرب
سلبو حتى التراجي
وذايب اعليك الكلب
ــــــــــــــــــــــــــــــــــــــ
من جبتني من المدينه ايدي بيدك كل وكت
اربع اسنين العشتهن كلهن ابحضنك بتت
ما يسرك بويه حالي بالسياط اتيسرت
للحوافر صار حضنك واني عالهزل نمت

امشي والمدمع جره
والحبل يحفر تره
سلبو حته التراجي
وذايب اعليك الكلب
ــــــــــــــــــــــــــــــــــــــ
من حده الجمال بينه حيل خوفني الوضع
چتفونه ابحبل واحد شي سحل شي تندفع
راسك اعله الرمح يفتر سوطهم من يرتفع
عيوني ما فاركت عينك شفتك اصب الدمع

والدمع بالخد حفر
من حجيت ويه النحر
سلبو حته التراجي
وذايب اعليك الكلب
ــــــــــــــــــــــــــــــــــــــ
ابضهري جف مطبوع بويه كون اراويك الضهر
عمتي زينب نفس ضهري بالمتن طابع اثر
عمه بس دليني دربي وخل اروحن للكمر
وشتكيله ضيم ضهري ومتن عمتي والنحر

اختك الحره انولت
يابو فاضل ونسبت
سلبو حته التراجي
ذايب اعليك الكلب
ــــــــــــــــــــــــــــــــــــــ
طببونه ابسوك بويه ووكفو ذاك الضعن
من كثر ماشفنه ذله اعله المهالزل دنكن
بويه نسوان الشماته اعله السبايه يهلهلن
ماتطخ حرمه اعله حرمه من المتون الورمن

امتونهن صارن زرگ
ويلي يايوم الطبگ
سلبو حته التراجي
ذايب اعليك الكلب
ــــــــــــــــــــــــــــــــــــــ
بويه ماصعدوني ناگه الحادي مشاني غصب
بويه ماظن اتعرفني غيرت حالي الترب
چنت اامن من احظنك هسه اخاف من الضرب
بويه اليفارگ حبيبه بعد ماظنه يحب

فرگتك موت بحظن
يمك يهيد الحزن
سلبو حته التراجي
ذايب اعليك الكلب


بسام قابل الياسري

ذكرياتچ مُرّه ينرادلها ليـل.....
وآه مال اجروح ما تهده ويَويل..
ابصوب طفچ كلها ياحرة وبصوب
صرختچ "عدنا بالمخـيَّـم عليـل"....

صاح فرّن...والدمع من دم يسيل
وركضن امضيعات ما عدهن سبيل
يـالعبـاتچ خـيمـه صـارت لليتـيـم...
صرتي من ساعتها "ابو اليمه وچفيل"

يا جبل وشلون همچ شـاله تل...
اشعجب ما ظهره انخسف ذاك المحل
البدر لو شـاف التشـوفينه أفل...
وفوگ همچ "ما رأيتي الا جميل"..

ذكرياتچ گصرت منّچ عمر...
الليل هسّه وأمس بالعاشر عصر
ياجبل شاله الجمر..شايل صبر.....
وصبرچ ابقاموسه مامش مستحيل

واگفه وهم واگف اوياچ الزمن.....
ولب دليلچ مثجل اهموم ومحن..
الله اخذ حيدر يبت حيدر لچن
وگفة الديوان جابتله بديل....

روحچ امن الظيم نيران اتغلي
لاچن ابگلبـچ عزم گلب الولي...
عمّـه سمحيلي أگلـچ "يـا عـلـي"..
آني يم ارمـاد خيمتكم دخيـل.....


ذكرياتچ مُرّه ينرادلها ليل....😭🔥

يوسف صوفان

يبو فاضل. يادخيل عيونك
*****
يازود وفعل. ياراعي الفضل
يانبع الكرم. مشيني عدل
روّاي الحرم. حماي الخيم
ياغيرة علي. يالاسمك علم

ياراهب. ياغالب. يامالك الحرب
ياقاهر. ياضاهر. عالكافر رعب
يبو فاضل يادخيل عيونك
*********
ياهيبه وشهم. ياشيخ الزلم
ياليث الحرب. عباس الاسم
لحسينك اخو. نعمين وكفو
يارب الوفـه. سلطان البدو

ياعالِم. يادايم. ماميت ابد
احبابك بترابك. تشفه ياضمد
يبو فاضل. يادخيل عيونك
***********
ياكشخت علي. ياواضح جلي
بالليل الگمر. بنورك ينجلي
ياچنك شمس. تفسيرك نحس
تخافك الخلگ. من جن وإنس

ياواضح. يافاضح. شمر وحرمله
عنوانك. ميدانك. رب المرجله
يبو فاضل. يادخيل عيونك
********
ادخيلك ياسبع. يالچفك نبع
لحسينك ضهر. ولزينب ضلع
حماي الخدر. ياسور وستر
ياچف حيدره. ثگيله بالصطر

ياشامخ يافاضخ. هامات الكفر
ياعابد. يامارد. ولشافك يفر
يبو فاضل. يادخيل عيونك
*************
يالطولك بحر. ولشافه انسحر
جمالك ياكمر. الاول عالبشر
اميري ياملَك. عبدك وسألَك
اريدن اخدمك. اخذ روحي الك

مشيني. وخليني. يم بابك عبد
مسكينك. وبعينك. تنضرلي اود
يبو فاضل. يادخيل عيونك
************
ارزقني ازيارتك. واطوف بحضرتك
تدريني انه. هواي امحبتك
نبضاتي تدگ. عباسي العشگ
حسيني بالدمه. يجري بكل عرگ

معشوگي. بعروگي . ابوكم حيدره
بحساسي. بنفاسي. سبع الگنطره

يبو فاضل. يادخيل عيونك
********
يافارس مضر. ياضي النضر
يكزبر الجلد لواسمك حضر
بالطف من رحت. عالحومه صحت
طاحت الارض. وانته ماطحت

يافارس. ياواهس. ابو اليمه چنت
بطفوفك. معروفك. للخوّه صنت
يبو فاضل. يادخيل عيونك
********
عمار حسن الدراجي/١٨/محرم١٤٤١

ياقاهر مهجتي....بالصوت الگه علتي
حرام امسح دمعتي حرام

**********

انا القاهرني يا مولاي
موبس العطش والماي
القهرني هواي من تحجي؟؟
(ويسكتوك ابذبح مو راي)...!!

ماخلوك...تكمل حجيك اوذبحوك
ماخلوك...ردت ادگلهم.......ومنعوك..؟

الله يحبني ردت اتگول
صاحو جيبو عشر اخيول
ما ترهم ولا معقول
ابن الزهره جوّه الخيل....

حرام...فوگ الغبره جسمك نام
حرام...تضللك بگايه اسهام.....؟

اعله جسمك دامي وكتي .....حرام امسح دمعتي
حرااااااام.....حرام
__________________

انا القاهرني ذاك الصوت
من توك تريد اتموت
(بيوت الضالمين )الصاح
خلو اعليها نار اتفوت

هم ضلموك...وهم ضالم الك سموك...!؟
هم ضلموك.. وماعرفو عدل يحجوك

يعدل الله اعله هاي الكاع
الحرگ بيتك حرگ نعناع
يصيت الله ابعذابك شاع
يذموك وحلاتك خير....

حرام....يترسونك ملامه اوهام...؟!
حرام...يفت گلبك حچيهم گام

وعد ابقالك ابصمتي....وحرام امسح دمعتي
_________________

انا القاهرني صوتك ذاك
من صحت ابجميع احشاك
( الا من ناصرُ يا ناس )؟؟
وبقه صوتك يطيح احذاك..!

ما سمعوك...ولا گامو الك نصروك
ماسمعوك....وخوتك ماتو وخلوك

يصوت الله البچوله احباب
هضمتك ما يضمها اتراب
يحته الصوت بي نشاب..؟
ونزف صوتك بحر خنگه

حرام... يزوّد صوتك الآلام
حرام...يسدون الاذن بأبهام..؟

يما لحگت نصرتي....حرام امسح دمعتي
___________________

انا القاهرني صوتك حين
من صحت ابعگب جفين..؟
(وحق جدي انا عشطان)
و ما راعو حلال الدين

ما رووك...... ولا تشرب عذب خلوك
ما رووك.....ويابس ريجك وهظموك

كلمتك اكلف امن الماي...
والعطش چبدك فزع رماي
وسهمهم صار الك سگاي
و فت حچييك گبل گلبك....

حرام.... وجرحهم ما بعد يلتام
حرام....وسهم گلبك صبح ينسام...!!؟

لجل سهمك غربتي...وحرام امسح دمعتي
_________________

الاخذ كل القهر والشوف
صوت اليدوّي من اسيوف
هذاكه الينسمع بالعين
والشافه يچهبه الخوف....

ما خوفوك...بس اعيالك الخوفوك
ما خوفوك..رغم همه بذبح صلوك

التكبيره صفت طعنه
اوكلبك حاير ابظعنه
تموت وتستمع ضعنه
يوالينه الضياع اجفاك...

حرام...الطعن تكبيرة الاحرام
حرام...وعيالك تبقه عد ضلّام

والتحجي يگلهه سكتي....حرام امسح دمعتي
حرااااام....حرام
____________________

علي قيس الوريد

ياهو غربته غربتي وياهو المثل حالي
فوك الرمح راسي وأنه انضر عله اعيالي
ياهو القدر هاي الحاله
وقدم للسلطان اعياله
ــــــــــــــــــــــــــــــــــــــ
المامهمتم بالطف وعايش موضوعه
لا يحجي اعليه واعله الويلاه واللوعه
ياناس انه الدله الخيل أعله اضلوعه
وبحافرهن خلطن دمه ويه ادموعه

صح طحنن ضلوعي طحن بس ما صحت ياحيف
كامن يدفعن بالسهم والسهم يدفع سيف
وما رحمت بيه الخياله
وقدم للسلطان اعيله
ــــــــــــــــــــــــــــــــــــــ
كطعو راسي اكبال الخيمه وكالو شوف
شلون الحره تطلع تركض من الخوف
وكمت اتناشغ واتباوع لختي وملهوف
شيهيد الكدامه انشاف الما مشيوف

شحال الاخو وشاف الأخت ضربوها كدامه
غص راسي بالدم وشهك والجمت الهامه
وانه الدمي باقي وشاله
وقدم للسلطان اعياله
ــــــــــــــــــــــــــــــــــــــ
اه الشام وضيمه يحير الما يحتار
راسي بنص الناس يردد ياستار
ضربو زينب حيل وراسي اعليها اندار
شاغت روحي وخشبه رمحي اشتعلت نار

يهز راسي شيال الرمح بيده ويفر بيه
وينزله جدام الضعن ويخوف ارقيه
وتخاف وما تترباله
وقدم للسلطان اعياله
ــــــــــــــــــــــــــــــــــــــ
كلبي ارماد أعله الصار ومو بس محروك
ابجي ودمعاتي ودمي يكطرن من فوك
شفت شلون الحره انطكت وسط السوك
وشفت ابنياتي انسحلن من فوك النوك

ياهو اخته كدامه أنولت والتمو اعليها
هذا يطكها أعله الوجه ذاكه يجر بيها
انه الطكو اخته اكباله
وقدم للسلطان اعياله
ــــــــــــــــــــــــــــــــــــــ
ياهو الكال اني المن عايش يامولاي
وحط راسه بصف راسي الدامي ومات وياي
ياناس انتم وياي مقصرين هواي
ياهو الجابالي اميه وكال اشرب ماي

محد اجه اكبالي وصرخ اسف يمذبوحي
حضرت روحي النصرتك يحسين اخذ روحي
انه الما واحد ضحاله
وقدم للسطان اعياله


للعبد عباس الفرطوسي الكربلائي

چوّيها چوّيها اگلوبنه اعله حسينك
واعميها واعميها الماتصب وي عينك
ــــــــــــــــــــ ــــــــــــــــــــ
ياعليل ويااسير وياغريب ابلا اهل
ماكو واحد غير زينب سيدي بكثرك حِمل
شلون بعد الطف محرم من تشوف اهلاله هل
هيج خلي يصير بينه ومايوفّي الماذِبَل

دلَيها دلّيها اسماعنه اعله اونينك
واعميها واعميها الماتصب وي عينك
ــــــــــــــــــــ ــــــــــــــــــــ
جنت من اتشوف ماي بگلبك اتشب الخيم
شيعتك خلّينه مثلك كون نلتذ بالالم
علَم عمك طاح لكن احنه شلنالك علم
وابد ماننسه الحسين ايظل نشيد اهل الشيم

خلّيها خلّيها اسنينّه اويه اسنينك
ــــــــــــــــــــ ــــــــــــــــــــ
وصلت النه اوصيت ابوك وزينب التروي الخبر
اتگول لمن جيت اقبله اسمعت صوت امن النحر
الشيعتي بلغي سلامي وصرختي الكل البشر
اشما شربتو الماي اذكرو جبد ابو اليمه انفطر

نحجيها نحجيها وكون بيها انعينك
ــــــــــــــــــــ ــــــــــــــــــــ
عشت بعد الطف عجيبه شلون يالشابع هظم
الجامعه اشخلت بديك ورگبتك غير العظم
من ينشدونك عله الطف إشتطلّع واشتضم
كل هلك صبحيه وحده ليش منهم تنحرم

اسبيها اسبيها. الروح يالسابينك
ــــــــــــــــــــ ــــــــــــــــــــ
انريد مو بس بمحرم كل وكت مدمع يصب
ومن تشوف الگلب يبرد جمره ذب اعله الگلب
لااخت لاعمه عدنه تگدر بمجلس تطب
مانگول انصير مثلك حالك اصعب من صعب

مُر بيها. مُر بيها العين تنشد وينك
ــــــــــــــــــــ ــــــــــــــــــــ
مايكفّينه بجينه ولا لطمنه ولاطبُر
سيدي امقصرين لو هم ينگضي ولوعه العمر
لجن منتظرين غايب طوّل وماظل صبر
هاك جمرتنه الولينه وهاي الدموع الحمر

وديها وديها وگله منتظرينك



علي محسن الزيادي

يبن اخـــوي شيوجعك سـألتني عمتي
سالـــت ادموعي وگلـــت ياعمــه انتي

طلعتـچ كسرت ظهر كل ال هاشم
امخدرتنه انتي ومشيتي ابين وادم
ــــــــــــــــــــــــــــــــــــــ
أحنــه سادات العوالــم والارض بــينه اندحــت
عمه واحنه اهل الچفافي الخظر والتنگط بخت
بالخـيال اخيـــال حــرمه النــه ابـــد مـــا بينـت
دارت وخـــدر ال هاشــم بيـــن هـلوادم صـفت

عمه كله اتهون لاچن انتي صعبه
ســر علي الكـرار يطلع بين غربه
عمه واليوجعني انتي وكلشي سالم
امخدرتنه انتي ومشيتي ابين وادم
ــــــــــــــــــــــــــــــــــــــ
راح من عدنه الكفيـــل ويبس كــل غصـن الدلال
وعطش چـف شـكو طفله أبدون دورات الحـبـال
وچاااان اسند غصـــن بينـه من وگـع عبـاس مال
هوه ساگي وهوه حارس وهوه الي يرتب الجمال

ذيچ طاحت رايته النحيه أبنظرهه
وراح عمنه وبينت خله أشكبرهه
وع النوگ عليه انضل ننصب مأتم
امخدرتنه انتي ومشيتي ابين وادم
ــــــــــــــــــــــــــــــــــــــ
ابكل رهاوه الذابح اهلي ابصفي چنت انظر يفوت
وعلگد خطوات الطريق الشفته ضل يلفيني موت
خوفي تســمعني اليتـامه أبدربي وناتي ابســكوت
وعمه تشــعل خــيمه بيه الونه اذا ما بــيه صــوت

جاي اباوع وانتي كــل جرحي ونيني
وحبل ايدچ هدلي حيلي ودمع عيني
عليچ بس فيي الگمر ياعمه رااهم
امخدرتنه انتي ومشيتي ابين وادم
ــــــــــــــــــــــــــــــــــــــ
ازغير واچبير ال هاشم عمه حجه ابكـــل زمـان
اورثنه جدنه بكل حروفه وصار وحي الله السان
علــوجود احنه الامان اشــلون نبقى ابلايا امـاان
عمه واحنه اهل المظايف وسفه نبقى ابلا مچان

اهل بيت الله ونبات احنه ابخرابه
والــدلال من التعـب يغفى ابتـرابه
والينام ادموع ع الخد يبقى ساجم
امخدرتنه انتي ومشيتي ابين وادم
ــــــــــــــــــــــــــــــــــــــ
الهوه والارض عمه البــچت وفلاك الســماء
الهوه يبچي أبريح حمره وأعلنت النه العزاء
والارض تبـــچي ابسواد امنهد عاشر كربلاء
وابشماته الناس تظحـك والسمه تمطر دماء

كل وجود الكــون حزنــان الـــحزنه
وهدوم عيد الناس لبسو من وصلنه
اودارت الدنيه وصفينه اگبال ظالم
امخدرتنه انتي ومشيتي ابين وادم
ــــــــــــــــــــــــــــــــــــــ
عمه كل ابكتـر هــاي ودخلــت المجـلس كتـر
وچــان مــعگود ابعبيــده والــنواضر تنــتضر
لا ظهر لا باقي خاطـــر كلشي احسن منكسر
من اشوف اگبال عيني امچتفه ارباات الخدر

جدنه طاهه وحيدر الكـرار ابونه
ومن بلد هســـه البلد لمن سبونه
واحنه اسرار السماء ابكل معالم
امخدرتنه انتي ومشيتي ابين وادم

الخادم
علي الحميداوي الكربلائي

أتعذبينه من أنسبينه
واكبر اجروح الگلب شام الرزيه
الشام اه يلشام .. الشام اه يلشام
ــــــــــــــــــــــــــــــــــــــ
فرحو ابجيتنه اشكثر اوليمت نجي ايتانونه
وابحجر من فوگ السطح جاي انظر ايشمرونه
والشامت ايباوع ظحك والتهظم ايعرفونه
واليسوه والمايسوه ظل وابكيفه مد اعيونه

اتباوع الناس ماكو عباس
اليعمي عينه الينظر البت الزجيه
ــــــــــــــــــــــــــــــــــــــ
حاچيته بلكت يبتعد عن الحرم وخر الراس
نسوانه امكشف هزل اوعلنهر في العباس
حادي الظعن يمهن گرب ماعنده ذره نوماس
بعنادي يمشي اويلحرم وايگول ختشوف الناس

يلفت انظار وانه احتار
هم عليل اوامشي مچتوفات اديه
ــــــــــــــــــــــــــــــــــــــ
راس الشهم فوگ الرمح بعيونه باره اعياله
عمه والهظمتي ابجرح ألموشهم شو شاله
فسره صفنت نظرته علرقيه احسن باله
العاشت عمره امعززه والدللاهه ابجاله

ينظرله اوچن يگله
وينچ. اوين السبي ها يارقيه
ــــــــــــــــــــــــــــــــــــــ
بالشام نسمع بس شتم مانسمع اعلينه انياح
الجرح السبي نسمع طبل وابكل فرع صوت افراح
غيمن روس اعلظعن اومطرن دمع فوگ ارماح
اولمن سمع وني ابدمع يظحك علينه الذباح

اليمشي وياي شمتو اهواي
وانه اگل الرحيه اصبريه ابهل البليه
ــــــــــــــــــــــــــــــــــــــ
اگبال العيون انه اوهلي صعبه ابزجر من انگاد
من ماي گصتي اودمعتي نگعت اهدوم السجاد
والگيد چتف رگبتي ياعمه احس كلش حاد
اوما بدلو گيد السبي من دخلتي اعلبن ازياد

ابگيدي محكموم وامشي ملچوم
ابالي حس مطبوع طف الغاظريه
ــــــــــــــــــــــــــــــــــــــ
والتكتل ايتام اوحرم ابديوانهم مچتوفين
واتشمت ايزيد اوسئل من هلحرم زينب وين
ها وين زينب بت علي خل تطلع اگبال العين
راح اليشوه بالترب وايظيع اثر للرجلين

واخت الحسين بالدواوين
مااجت علبال. تتسمه السبيه

الخادم
علي الحميداوي الكربلائي

ودعتــك مــذبـوح وافراكــك شيبني
طلعت مني الروح وافراكــك شيبني
ماتحضـر دفنتــي وتشـارك محنتـــي
_________________

1
كَطـع نحرك وسط عيني يبويـه وتـدري ماناسي
ألا من ناصر أنت أتصيــح وانه اختنكت انفاسي
عليل وظهري محني عليك يبويه وانهدم ساسي
من صار أعله نحرك سيف هــاي الشيبت راسي
_______________________

أذكـر مـن ذبحــوك والدمعات بعيني
وبكصتك ضربــوك والدمعات بعيني
ماتسمــع ونتــــي وتشــارك محنتـــــي

2
على أفراش الأجـل يحسيـن عليل وصـرت أتذكر
بصباح العاشر بعاشور ظلام أيحيطه سيف الشر
رمــاك الحاقـد بسهمـه وسمعتـه بصـدرك أتكسـر
اجيـت وريتني لاجيـت لكيـت أعلــه الرمـح منحـر

راسـك يحجي ويـاي وعيونه أعله الخدر
مارحمــوني أعـداي وعيونه أعله الخدر
ضليــت بحيـرتي وتشــارك محنتــــــي

3
ليلــة دفنتـــك ونيـــت ووســــط الحفــرة نزلتـــك
جثمانــك جمعتــه وصـــال وبـــــلا رأس وسدتــك
سمعت لو ماسمعت الصوت مـن كتلك سبيه أختك
حسيــت النحــر دم ســال وانــه مـن النحر بستـك

عمتي أتسلـم عليك ضلت يم رضعانك
ماكــــــدرت تلفيـك ضلت يم رضعانك
مصيبتها مصيبتي وتشــارك محنتـــــي

4
حياتـي بـلا حيـاه ياحيـف مـن يـوم النـزف دمـك
البقـة مـن عمـري أتمنـاه يخلـص بس دمـع يمك
ظــل مـن الشمس ما أريـد يلي بـلا غطـه جسمك
وإذا اغفة الوسادة أتراب وأحط همي علـى همـك

أرويــــك بدمعـــات من تعطـش يابويه
وتنـــــوح الآهــات من تعطـش يابوية
من تنظر حالتـي وتشـارك محنتـــي

5
وكت ما أعلمــت بالمــوت تمنيــت أتحضـــر ليه
تغمــض عينــي يابويـــه وتقـرا الفاتحــة عليــه
وقبـــل ماتبــــدأ التغسيــــل دقــق بالنضــر بيــه
تشـوف سيـــاط بمتــوني واثر لحبـــال مطويّــة

كلما أصيح حسيــن بالسـوط يضربوني
كلما تجــري العيـن بالسـوط يضربوني
و دافـــــع عمتـــي وتشــارك محنتـــي

6
متــت مامنكَطــع راســي ولا بصـدري اثــر حافر
ولا منـي انكَطــع خنصــر ولا سهـم بجبــد صـاير
لا عطشــــان لا عريــــان ولا بيــــن العـــدة حاير
متت مـن كَد عذابي عليك ومـن كَد كسـرة الخـاطر

شما اعد بيه أهموم هيهات أوصل همك
اقســــم يامظلـــــوم هيهات أوصل همك
مـن انـزل حفرتي وتشــارك محنتــــي

شطره
امجــــد صــــاحب الشطـــــــري

عمتي والحرم بس آني ويهان
وطحت بيدين ناس اصحاب ويهان
واحد حط عله الخيمات ويهان
او واحد سلب عصاتي امن اديه
ــــــــــــــــــــــــــــــــــــــ
رحت للشام وآنه گيود بيداي
وعله الناگه الهزيله اگطعت بيداي
بغرب ومصاب وآنه النوب بيه داي
واكلف داي عماتي السبيه
ــــــــــــــــــــــــــــــــــــــ
نخيتك بويه كلي ليش ماييت
حزين وبيه احس الكاع ماييت
رحت ويه الظعن مو عدل ماييت
لأن روحي بكت بالغاضريه

سيد غالب الرضوي الكربلائي

اكض الگـاع زينب بيـش وانهــض
الجفن موش برضاتي بيوم غمض
كل لحظه النفس يزغر واحس حيل
المسافه ابيني و الأيتام تعرض
اسمع خيلهم بس السمع ضال
و امِد زنود بلكي الخيل تنكض
بلكي تشوفني و تْگول ما مات
و تْــرد للنهـر و يعيني الحظ
و يموت اليِتِم وتعيش الزغار
وارواح العطش والخوف تُقبض
بس المشكله الما ينحچي الصار
وصلت خيلهم والدوس رضرض
رادت نارهم تحرِگـ سِما وماي
وْعِشرة خيمه وي رضعان تنفض
حتى خيامنه مْن گلوبنه البيض
لذلك عايَـنت دخــانهه ابيَــض
وسمعتچ گلتي وينك وانفتح شوگـ
جفني وْ لاگه سهم الموت وانغض
ما متعــود أخضع حتى للموت
وْ بشفـاف الخدِر عباس يُلفَظ
ولاكن ضاع كلشي ، الخيمه والحيل
وعلى الما عِنده زَلّه البين حَرّض
إركضي ، اسياطهم ما ترحم متون
اركاض ، الطف ، دلال حسين عوّض
وابقى متاني اشوفِـچ عالهِزِل مـاي
خطف لونه العطش وانگاد وانخض


علي گاطع البهادلي

حصّة حسين الذبح حصتي المنابر
إلا أخط من منـبرك خـط الشعاير
ـــــــــــــــ
الله خلاني * أذل عدواني * حسين رباني
ومنبري طفي
إلا اخليكم * واطي عاليكم * احچي ماضيكم
وافضح المخفي
راح اسمع اهل السمه واهل المگابر
إلا أخط من منـبرك خــط الشــعاير
ـــــــــــــــ
خطبتي سيفي * آخذ بحيفي * حربي وبكيفي
ساعة وانهيها
ثار ابوي حسين * عمي والچفين * وصحبته السبعين
أرد اوافيها
آنه حچيي يعادل اجيوش وعساكر
إلا أخط من منـبرك خط الشــعاير
ـــــــــــــــ
عمري وسنيني * فدوه لحسيني * عمتي بيميني
راح نفنيكم
چن حرب نازل * وعمتي ابو فاضل * لليسر ماذل
راح أروايكم
هواي صعدو منبرك باعـو ضــماير
إلا أخط من منـبرك خــط الشــعاير
ـــــــــــــــ
عدنه مسبيه * تهز بني اميه * تعرف ارقيــه
قصرك تهده
تبرز بدمعه * صوتك تگطعه * اختي بس تنعه
العايل ترده
جيش إعـلام الأبو يسـمـّـونه باچر
إلا أخط من منـبرك خط الشــعاير
ـــــــــــــــــ
شجابك ويانه * يبن مرجانه * علي ربانه
وألله حافظنا
كل شجاعتنه * وكل فصاحتنه * من محمدنه
الباري سددنا
الله كلـّــفنه ونطيـــناه المنــاحر
إلا أخط من منـبرك خط الشــعاير
ـــــــــــــــــ




مهدي التقي

لاستشهاد الامام السجاد ع

عمري دمعه وابجيك
يذكرني كلشي بيك
وعيني ابيضت و ذاب الجفن يابويه يحسين
__________
بويه الغالي اشلونك ضلمه الدنيه من دونك
ابكلشي اتخيل اعيونك والوجن
جرحي ابغيبتك يكبر خدي من البجي اتحفر
امن اذكر صدرك اتكسر الوجن

الفاكد مثلك حسين يون صحوه ومنامه
يضمك تالي التراب عله الدنيه السلامه

الله الخله ذكراك * ينساني اذه انساك
تدري ابغيبتك بويه الدمع ماخله كل عين
________________
الهوه ابلياك ماينعش اذكر يوم بيك ايطش
وعله جروحك رمل يفرش وانوحن
الشمس ماريد انه اذكرهه عسه كون الدهر فرهه
بينه شسوت ابحرهه وانوحن

عمتي من الشمس هاي تغير كلشي بيهه
الوجهه لو تجي اتشوف تبجي انت عليهه

من كد ذاك السموم * صارت سوده الرسوم
وكل ذيج العبي صارن حمر تحركهه نارين
________________
خلك للزاد ماليه طشته ايحطه مرض بيه
من اشوفه اذكر ارقيه يبويه
الماي الماضكت منه صرت بعدك اكرهنه
من اشوفه اجذب الونه يبويه

ذكرتك ها يعطشان نحت وانحيبي سمعوه
الكبش من شفته بالسوك كبل ذبحه يرووه

يلي اجروحك اهواي * ماقدمولك الماي
ضامي ومنذبح من العطش يبسن الشفتين
________________
بيتي من اشعر ابفيه العاشر ينلجم بيه
تفز بروحي ضهريه وجمرهه
من انضر بالسمه غيمه خيالي يروح للخيمه
ويوم اركضنه بالهيمه وجمرهه

النفس يخنكني كل يوم واحس بطعمه دخان
اعيش اشلون وارتاح وبس ابداري نسوان

اشلون اجروحي اتنام * وبيتي امترس ايتام
من انظر والتفت انه طفل تهمل دمه العين
___________
من اشوف الخيل يحسيني اعله رجليهه تصد عيني
وصيحن مثله اسحكيني وانازع
ثكيل امبين الحافر نكره اعله الترب حافر
جا من صدرك شكاسر وانازع

بويه من افرش افراش اذكرك فوك التراب
ألمه وتنكع الكاع دمع حته الرمش شاب

اذكر تنزف احساس * واصبع ماكو لا راس
اصرخ بالحزن هالكربله جا جتك منين
_____________
ليلي لو سدل رمشه اذكر ليلة الوحشه
ومشينه اعله الجثث ممشه واطيحن
الكمر لو بزغ وانشوفه اذكر عمي وجفوفه
وسهمه اللي طفه شوفه واطيحن

طفل لو اسمع ايصيح رسم عبدالله بالي
واركض والكه كاروك ولولي ومهده خالي

فراشه بالدمع غاط * وابقه اشتم بالكماط
ابدمعي انشده عن الطفل شوماكو جاوين
__________
ضاع من السبي صوتي ومن ميل الهزل موتي
كبالي صار تابوتي النهايه
بعد طبع الحبل بيدي واثر للجامعه بجيدي
كتب فوك الجلد كيدي النهايه

اموتن آنه يحسين الف موته من اذكرك
وشل عمري هاليوم يبويه افتحلي كبرك

وينك يبو السجاد *** اتلكه زين العباد
من الطف البعد تالي ابحزن لماكم البين


تمت بفضل الله والحسين ع
مهدي عباس الهلالي

مشتاكله وموتي كرب مشتاكله
اوهايه ساعة عازته ومحتاجله
بس ردت اشوفه ابعيني * وين الكه آنه حسيني
اوردت اكله الدنيه بعدك مايله
_______________________
الميت باخر اللحظات يشتاك لهله وناسه
وأنه امفارك عيون حسين حنت روحي لنفاسه
ذكرته وجلدي كزبر شوك جي ادري الفرس داسه
يلم جسمه ويجيني اشلون الشالو عالرمح راسه

كون من افك عيني تجي بعيونه
اليمه ابوه سالم الف خيعونه
الناكع بقه بخضابه * شيكومه من اترابه
بلا خيمته عمري كدر ماحامله
___________________
اشيجيبه ال عالرمل جسمه انطعن بألف وتسعميه
البي صاح العدو فرهود شيوصله بعد ليه
سلبو كلشي من عنده بس ضل عنده حنيه
عله طول السبي مادار راسه يباوع اعليه

عينه اعله جرحي اتعاين ومادارهه
يباوع لديه وينشد اعله اخبارهه
ها بويه تنزف ايدك * اذاني كلش كيدك
طول الدرب شافاهه بالدم هامله
____________________
يحط عينه عله كيدي ويلوج اعله الرمح نحره
ابكل كطرة دمه مني اشوفن راسه ذب حسره
يهم ابحبل اديه اهواي الدارت معركه ابصدره
حسافه ورحمة الله اتروح جوه العاديه العشره

كل جرح الخيول وذبح ماهمه
ميت وراسه ضل ينكط رحمه
من شاف نحري وجرحه * ايذب راسه اجه من رمحه
كوه صبر من شاف تبجي العايله
____________________
عندي هواي ذكره ويا بس اصعبهن المنحر
باهت كلشي بالطف جان بس شيب الحسين احمر
يصد ليه ويناشغ كام وآنه ابسلسله اتعثر
يبجي الدمعه عد الله بعدال العرش واكثر

واكباله عتوني وطحت عالغبره
شفته اختنك راسه وتسيل العبره
اوحيد ونحيله عضامي * وكومة حرم كدامي
وامتوني من الضيم صارت هادله
__________________________
عليل وحالي بجه النوك وبيه الجامعه اشسوت
حسره اعليه ادير الراس اله وبالجلد حفرت
الحبل فاتح نهر بيدي وعله هدومي اشكثر صبت
اميل ويه الضعن لو مال روحي من الهزل طلعت

خاف آنه عايز تكزل اعله جروحي
وصوت اليتامه ايذب عذاب بروحي
حيلي توشل كله * بين الضعن والعله
وجتال ابوي اليوم كله امجابله
____________________
ابد ماجان بحسابي سبايه والنفس مخنوك
وبنات العزه ويه اغراب يمشن والهدم محروك
وآنه من الحبل والنوك ثوبي من الكفه مشكوك
غمض شفته راس حسين من طب الحرم للسوك

عالعنده غيره السوك كلش كلفه
واعلينه تربي اعيون وادم صلفه
بهالذكره اختم عمري *** ارتاح بلكي ابكبري
اختم حياتي بهالدموع السايله


مهدي عباس الهلالي

شسولف والحچي هواي
والطف عايش وياي
رَكضت عمتي من الخيمه للتل
هاي بروحها تريدلها مقتل
...
گالولي الصبر ممدوح واترك دمعتك والآه
اهو الشايف ظهر عاشور يا صبر اليفيد وياه

آنه بدمعتي ما چنت استعرض
والطف سالفه ما تنسّي واتفض
شفت زينب ابين اخيولهم تركض
وعشره من الخيول بصدر ابوي اترض

موقف يهدم الحيل
بزينب تعثر الخيل
اعله مصرع والدي من الگوم تسأل
هاي بروحها تريدلها مقتل
...
احترگت خيمتي فوگاي بذاك الحال شافتني
زينب سحگت اعله النار ومن الخيمه جرتني

علوياتي صاحن ها يبو الشيمه
شنهو الراي ما ظلت بعد خيمه
گلتلهن يعماتي عله الهيمه
يتيمه من الرعب طاحت عله ايتيمه

دريتو بزينب شصار
دنت لثيابها النار

لحظه ولو غيور الها ايتأمل
هاي بروحها تريدلها مقتل
...
اجانه الليل بس يا ليل ليل اهدعش شيبني
إسمعت صوت الرباب اتصيح ودوني لعد إبني

گالت علي يُمه لبني خلنه انروح
دَر اللبن بلچي ألگه برضيعي روح
گلتلها الولد يآم الولد مذبوح
وخفت زينب تموت اعليها من النوح

وقريت بروحها إحساس
تعاتب عمي عباس
تريد اتروح بس اشلون تندل
هاي بروحها تريدلها مقتل
...
صبح يوم اهدعش بيّن وشفنه الضيم بنفاسه
روس وحته عبد الله شفنه اعله الرمح راسه

وزينب شافت النوگ وتناشدني
يعمه منهو عالناگه يصعدني
سجدت وگلت عمه بخدمتچ متني
گالت انته منهو ايصعدّك يبني

اعله زينب مدمعي سال
شمر يجتفها بحبال
بضرب السوط صعدت نوگ هزّل
هاي بروحها تريدلها مقتل
...
مشينه وعمتي زينب مرّوها اعله ابو اليمه
رادت تهوه بس ناديت ارحمي بحالي يا عمه

حده الحادي وضعنه الشامت ايشوفه
اشكثر زينب بچت من طبت الكوفه
الشام الشام جرحي المحد ايروفه
طبت عمتي اعله ايزيد مچتوفه

بيا دستور يا دين
تطب زينب دواوين
بت فاطمه عنها ايزيد يسأل
هاي بروحها تريدلها مقتل
...
خادم الحسين ( عليه السلام)
كرار حسين الكربلائي
( ابو كميل)