يـاسـلاب تاج حسين قلي وين لباسه
گلها  التاج  شلج بيه هذا اعله الرمح راسه
ــــــــــــــــــــــــــــــــــــــ
من إخيمها ابظهر عاشور طلعت هايمه زينب
وبين مسالب العدوان و إخيام البگت تلهب
شافت تاج أخوها حسين بچفوف العده امسلب

تـعـنـت  والدمع هالي
تصيح بحسرة الوالي
يـسـلاب ارحم ابحالي

وراعي  التاج  لا لتقول قطعوا آخر انفاسه
ــــــــــــــــــــــــــــــــــــــ
ظلت  زينب ابدهشه تناشد عدوا لا ذمه
صدگ هذا الذي بيدك يمكدر تاج ابو اليمه
صدگ هذا الذي فوقه حمَار اخضاب من دمه

اعرفه الدم اخويه حسين 
وهذا التاج اعرفه زين
لــچــن لباسه قلي وين

شمالك ماتجاوبني ارحم قلبي واحساسه
ــــــــــــــــــــــــــــــــــــــ
تگله يا نذير الشوم ابحالي ماترحمونه
گبلك دون خياله عـود النه ميمونه
هسا تاجه شفته اوياك لاجن منخضب لونه

قلها شلج بالهالتاج
اخوج امگطع الاوداج
راسه  اعله  الرمح وهاج

جسمه  اعله الارض مطروح وشجم حافر الداسه
ــــــــــــــــــــــــــــــــــــــ
التفتت للرمح لنها تشوف ابراسه راس حسين
گامت عالوجه تلطم بيديها وتخمش الخدين
اصرخت خل يبعد برمحه شله وي لمت نساوين

وبـراس  الولي المنحور
ليش اعلى الخيام يدور
خل يرحم بـنات اخـدور

مـاظن لو تصد للراس تگدر بعد تتناسه
ــــــــــــــــــــــــــــــــــــــ
ياشيال الرمح صاحت عساها انشلت ايمينك
تراوي الراس للنسوان گلي شبينها وبينك
رجوله لو تحسبها بوجود الگمر وينك

لو يمنه گمر عدنان
ياظالم ابد ماچان
تتمرجل على النسوان

ونحر  حسين مايذبحوه لو اجه يمه عباسه

علي السگاي

#تراث

زيـنـب  يـا غـريـبة الله اشــمـصـيـبـة
وجـهـك  يا زينب وين مـذبـوح  اخوك احسين
و  الـجـثـة سـلـيبة الله اشــمـصـيـبـة
ــــــــــــــــــــــــــــــــــــــ
آه  يا زينب اشصار ابحالك  امن الغاضريه
اشلون  ليلة أمس مرت والنهار و هالمسيه
أمس گضيتي الليل اوداع وي أهل الحميه
ابـسهر عين ابظمه ابخوف ابشبح من وجه المنيه

للعايلة الـمتألمه
الأطفال  تصرخ بالظمه
لـبـن  أمـچ او لمخيمه
ابـيـن تـوديع او وصيه

جـفـن عـايـف منامه لوداع  الـنـشـامـه
و تـسـكـتـين أطفال و تـودعـيـن أبـطال
بـهـا  الـلـيلة الرهيبه الله اشــمـصـيـبـه
ــــــــــــــــــــــــــــــــــــــ
خـلص يازينب الليل البيه توديع الأطايب
والصبح بيّن عليچ او  بـينّت بيه المصايب
ابتدل نور الصبح نار النار صارت بالحرايب
او  غاب  عنچ گمر هاشم وين فوگ النهر غايب

دارت الـحـومه بالخبر
ابـچـف  المنيه  او القدر
او لن الأهل سبعة او عشر
انجوم  عالغبره او كواكب

و تـغـيـب ضـواهـا الـبـدور  ابـدمـاهـا
و بـهـاي الـمـيـادين بـعـيـونـك تشوفين
أبـدان الـشـبـيـبـه الله اشــمـصـيـبـه
ــــــــــــــــــــــــــــــــــــــ
اخوتج نزلت الحومه والـقدر ما گال تسلم
اربعة من ام الـبنين بـها الحرب سبّحهم الدم
قـمـر هاشم اخذ جوده اوگال أرجع للخيم
والقدر گلچ اجفوفه اتـگطعن  اوراسه متهشم

و الـسـهم يا زينب وگع
ابـعينه و أبو اليمه انصدع
ابـرايته  او جوده ما رجع
عـالـنـهر  جسمه تخذم

مـا  ظـلـت الـرايـه طـاحـت بالرمايه
لـمـن راح بـالـجـود قـال  الـقـدر مـيعود
مـا  ظلت كـتـيبه الله اشــمـصـيـبـه
ــــــــــــــــــــــــــــــــــــــ
شفتي من ودّع احسين الاكبر ويذهل المنضر
اوداع ابو الأبنه اوراح الابن للحومه وشمر
او  شفتي من احسين جابه للخيم جسمه موذر
هذا أول جرح صار ابكلبج المفجوع يعسر

و اجـروح عگبه اتكاثرت
من ابدان طيبه توذرت
مـثـل  النجوم اتكورت
عالوطيه شبول حيدر

اوشفتي جسام الشباب تحنه يازينب بدمه
وشفتي عبد الله الرضيع شلون اجه مذبوح لمه
شلون يازينب سكينه تلگته من ايد ابو اليمه
شنو ذنبه جا هذا الطفل والنبله تفطمه

شفتي مثل هذا الطفل
يمج نكتلو بالنبل
اطفال ابن امج جتل
كضو من حركو خيمه

وشفتي المهر بدم من رد للمخيم
لفاچ السرج مگلوب كلتي حسين مصيوب
او  لـن جـثـته خضيبه الله شمصيبه
ــــــــــــــــــــــــــــــــــــــ
ونگضه عليچ النهار اعلى هالحاله يبنت حيدر
لا رجال و لا خيام او  لا خدر بي تظل خّدر
هذا يازينب الليل اوعايله امطشره ابها البر
وانتي مهضومه اوغريبه والتعب عالحال أثّر

او تـرديـن لـم الـعايله
ضـاعـت ابوادي كربله
ويـن الابـو عـقد الوله
ابـمثل  هاي الشده يحضر

صـيـحـي شوف حالي مـا  ظـل  عـندي والي
حـيـدر حـشـمي بيه صـوتـچ  خل يصل ليه
هـالـصـوت الـيجيبه الله اشــمـصـيـبـه
ــــــــــــــــــــــــــــــــــــــ
روحي يا زينب افگدي العايله واطفال لمي
صيحي وين الگه الاطفال طشروها  يا بن امي
يا هو خليتوا لختكم هذا بس وجعان يمي

اشـتلگين  يا  زينب بعد
لا طفل ضل ولا مهد
ابـين  القضه او بين الشرد

ويـن  جـا ام الـرضيع الليلة  قومي دوريها
بـالـمـعـارة يم طفلها رايـده اترضعه بثديها
روحي يا زينب او شوفي الها او سـمعي حجيها

ضـمـت  طفلها للصدر
اتـحاجي  او تبديله العذر
هـسـا  غـده ثدي يدر

هـاي ام الـطفل تحجي اوي الرضيع اعلى هالجمرة
شفتي يا زينب يتيمه اتحاجي ابوها فوگ صدره
گوم  يابوية تگله والأبـو مـقطوع نحره

بويه تگله اتسلبت
جاوين عن عيني غبت
بـويـه اتـگـله اتيتمت
سمعي يازينب وشوفي ولمي اطفال وغرايب

المرحوم الشاعر
عبد الحسين ابو شبع

#اللهم_عجل_لوليك_الفرج

تحرگ حرگ ما تنحمل شمس الضهاري
والناگه عرجة وتكزل أبطرت الصحاري
،،،،،،،،،،،،،
بوية الطريق اشگد صعب اتناغي راسه البل طشت
والناگه ما عدها رحم داست عليه من طحت
راح الضعن ذاك الضعن ابعد عليه او تيهت
صوتي اختنگ من الركض محد سمعني من صحت

بعدت ترى النوگ ،، وگليبي محروگ
وعماتي جدامي مشن مثل الجواري
،،،،،،،،،،
جا وبها راسه المنذبح من صحتي سمعت عمتچ
ليش الچفوف اعله الوجه مختنگة ليش بعبرتچ
مستحية مني ابنيتي ومشتاگه روحي لشوفتچ
يا وردة يم وجه الحلو ما ريد اشوفن دمعتچ

بانت معانيه ،، وترد تغطيه
ازرگ وجها وتستحي ومدمعها جاري
،،،،،،،،
رفعت اديها من الوجه وبان الزراگ البل وجن
بذاك الترف خدها نرسم آثار چف زلمه خشن
حمرة العيون وذابلة وحاجبها هادل عالجفن
ها بوية عاينلي عدل بس لا تعاين عا الإذن

و بخدي آثار .. من لسعت النار
وتكسر الخاطر طفلتك يالبيها داري
............
هذا الجرالي امن السبي من السطر عيني أنعمت
چا انته شنو العطلك مِو كتلي اجيج اتاخرت
من السموم امن العطش اشفافي بوية اتفطرت
مشتهية أبوسن وجنتك دنگت يمها وما بست

خفت اعله مودك .. اجرح خدودك
خدك تروف ايا الولي وتلسعة ناري
........
طفلة وعلى الراس انچفت وبجبهته كامت تشم
اشبگني فدوة لشيبتك و حذر تمس بوية الهدم
بادت تراها مِن الشمس و مشگوگة من عت الزلم
ابلا ادين وما درت بس راس ابوها ابلا جسم

تحضنه وتريدة .. يشبگها بأيدة
ما تدري ابوها بكربلاء ضل جسمه عاري
والناگه عرجة وتكزل بطرت الصحاري

كريم الدراجي

صار الغروب وتيهت والتمت الناس
وين اطي وجهي لياكتر وين الكه عباس
واتعثر بسهم.............ما اندل الخيم
وينك يعباس
.................
لمن طحت طاح الستر وتنادس اعليه الكبر
واتصنت ايصيح الترب يمته تجيني ام الخدر
وصار الضلام بها الوضع وكل ساع اكوم وانهطر
والكمر هد اعله الشمس واليل هد اعله العصر

والتمت اعليه الخلك ياخويه صوبين
ما اعرف الطكني لان طكاني عالعين
يا خويه والاهم ما اندل الخيم
وينك يعباس
................
اتراعش بوصط الغرب ما بيه حيل اعله الحدي
راحو اخوتي وكل هلي ضليت ابشرك وحدي
ياخويه زوركت الحبل ياهو اليجي يضل يعتدي
واحد يطك لمن يمل واحد يشتم والدي

واتشاهك انه من البجي والشمر واكف
طكاني جيفن وحدي وضليت اشاكف
كل جسمي ماسلم ما اندل الخيم
وينك يعباس
.................

عذرك يبو فاضل شنو عفتوني ليش ويه الغرب
ياخويه كلي ابياذنب زهكت امتوني من الضرب
شمسويه كدام الخلك بيه يفرون الحرب
والزهره كاتلني العطش ما عندك امية شرب

والساني صاير جن خشب خويه تراني
من ابلع الريج اختنك ابلع لساني
واقع بلا وهم ما اندل الخيم
وينك يعباس
.............
ياخويه شحجيلك بعد ضاك النفس طاح الضوه واتذكرت كعدت كبل نجتمع بالمكسر سوه
ياخويه ودوني لهلي مشتاكه اشم ذاك الهوه
مشتاكه اشد نذري بعلم يابا الفضل وين اللوه

ضليت ادودي بكربله حسبالي بيتك
طاحت اضلافي من التعب بس مالكيتك
من حقي ابجي دم ما اندل الخيم
وينك يعباس
..........
فركست رجليه وطحت والله جبيره اعله العرض
يا خويه كمت ازحف زحف تدريني مو مالت ركض
والخيل اجتني مسودنه من كل كتر طول وعرض
ياخويه انه كمت وطحت وانرضخ راسي اعله الارض

صاحولي يازينب تره متسحكج اخيول
راحت تدوس اعله الولي بالحافر اتجول
فوك الالم الم ما اندل الخيم
وينك يعباس
..............
انه بحلم مدري صدك ياخويه جا وين الوفه
زينب تطر سبعين الف ذاك الخدر وين اختفه
معقوله طكاني الشمر والصوط بمتوني غفه
وانه بطرك ماكو اضل ياخويه كلشي ما صفه

ما اريدك اتهد عالعده ولا تنفض اكوام
دليني بس اعله الخيم ورد سلهم ونام
اشرلي بالعلم ما اندل الخيم
وينك يعباس

.................
للعبد الحسيني عباس الفرطوسي الكربلائي

لسان حال الحسين ع

موگد صار من العطش يوفاي
وغيرج محد امن انخاه يوفاي
اذا يحصل لخيّج ماي يوفاي
الشمس مردتني گبل اخيول اميه

علي محسن الزيادي

(نعي كامل دفن الاجساد )
السجاد عند دفن الحسين ع
،،،،،،،،،،،،،،،،،،،،،،،،،،،،،،،،،،
يبويه اشلون ادفنك هل مسيه
وجسمك طحنته اخيول ا ل اميه
اشيلك بويه واطيح من اديه
عليل ولابعد ضل حيل بيه
،،،،،،،،،،،،،،،،،،،،،،،،،
عند دفن العباس
امن يبو فاضل أي وبختي
انه بيدي يعمي اجتفت عمتي
شوفتهه دوه زينب العلتي
شحده اليوصل البت الزجيه
،،،،،،،،،،،،،،،،،،،،،،،،،،،،،،،،
السيده زينب ع مع قبر الحسين ع
،،،،،،،،،،،،،،،،،،،،،،،،،،،،،،،،،،

يخويه حسين كلي شلون لموك
مابدوا اميه عليك وارووك
ثلث تيام وسط الشمس خلوك
جروحك يبسن ومامش اميه
،،،،،،،،،،،،،،،
مع قبرالعباس ع
صدك عباس تتركني علئ بختك
بين اجناب اروحن وانه اختك
اعرفك ماترد من ضيمي صحتك
بلكي اتكوم موضربوا رقيه

،،،،،،،،،،،،،،،،،،،،،،،،،،،،،،،،
نعي الدفنه
سكينه ع مع قبر الحسين ع
،،،،،،،،،،،،،،،،،،،،،،،،،،،،،،،
يبويه شلون جوه الترب تنحط
وانه السوط سوه بظهري الف خط
يركظوني واصيح احسين وافحط
لحد ماماتت الصرخات بيه
،،،،،،،
مع قبرالعباس ع
يعمي شلون تدخل هاي بلراس
جوه الكاع تنطم وانت عباس
تره عكبك بقينه ابين الارجاس
وشتموا عمتي وصاحوا سبيه
،،،،،،،،،،،،،،،،،،،،،،،،،،،،،
ليلئ مع قبر الاكبر ع
،،،،،،،،،،،،،،،،،،،،،،،،،،
يبعد امك يماخذ هاي العيون
بلاراسك يلاكبر ليش مدفون
تره امك راح تمشي بذيج الضعون
بين ارجاس واحبال ابئديه
،،،،،،،،،،،،،،،،،،،،،،،،
رمله مع القاسم ع
كبر ابني اعرفه وعندي الجواب
امبين كبر جاسم بي عطر شاب
اكله انهض ييمه بريتي عطاب
دم بجفاك موحنه بديه
،،،،،،،،،،،،،،،،،،،،،،،،
الرباب وقبر الرضيع
دللول الكبر عبد الله ذبحوك
اهزن بلكبر حسبالي كاروك
مامفطوم ليش بسهم فطموك
حليبك در يبعد امك عليه
،،،،،،،،،،،،،،،،،،،،،،،،،
الشاعر بشار السامي

(عگيلي ليلة الدفنه)

دفان اتعنه من الكوفه
********
راح السجاد ايوســدهم
شلون ابياحاله يشاهدم
شاف حسين وجسمه موذر
واخوانه شباقي من عدهم

ضل واگف يمهم واتحير
وادموعه اعليهم مذروفه
دفان اتعنه من الكوفه
********
راح العوده ايصب المدمع
منك يابويه اشراح اجمـع
ابلا راس وفاگدلك خنصر
جـسمك شو هالكله اموزع

اتوسـد يـمـه وضل يحفر
گبره واتصب دم اچفوفه
دفان اتـعنه مـن الكـوفه
******
بچفوفه شايـل عـبد الله
من يعثر صاحاله اسم الله
وبنحره ايـشم ويــتـحـسر
سهمك خويه ابنحرك صلّى

بالخيمه من حرگو مهدك
امك تسعه اعليه واطوفه
دفان اتعنه من الكـوفه
*******
راح الجاسم شافه اموذر
نايم يـمـه الـحـيد الاكـبر
ابگبر حسين ومن وسدهم
راح العمه حامي الـخـدر

اعليك اعيالك ياعم كلهم
گالـو قَبله من اتشوفه
دفان اتعنه من الكوفه
******
محتاجه اعيالك تحميها
ياعباس وتدري اشبيها
اهل الكوفه صاحو زينب
اخت العباس اميسريها

وماي الحار اعلينه صَبّو
وبحبال ايدينه مچتوفه
دفان اتعنه مـن الكوفه
***********
وسّـد كـل هاشـم وحـده
والراد ايعينه اعليهم رده
يابني اسد انتو اعـليـكم
دفن الانصار اعلي شـده

بعد الدفنه اعليهم صلى
قرآن ورتل بـحـروفه
دفان اتعنه من الكوفه
**********
رد للكوفه وهدمه امترب
دافن اهله. وهـم اتغرب
متعوب هواي من لمدفن
وتناشد بي ضلت زَينَب

عن اخـوتـها ودمع اتفجر
چن شاطي ويلطم بجروفه
دفان اتـعـنه مـن الكوفه
********
عمار حسن الدراجي/١٢/محرم/١٤٤١

ليلة الدفن

شلون ادفنك بويه حيره
راح الـمـك بـالحــصـيـره
وذره وذره. وذره وذره
**************
المصرعك بوي اجيتك. عالثره مگطع لگيتك
للدفن جاي اعتنيتك
بويه بويه
الصدري مااگدر اضمك. مجرّح وخافن الچمك
بـعـده هذا اليجري دمك
بويه. بويه
مدري اضمدلك وريدك. لو ادور خنصر ايدك
عبد الله اوسدنه اعله جيدك
بويه. بويه

بويه بويه بلاغسل اعذرني ما أگدراغسلك
بويه بويه من الـترب يابويه المنك واحملك

بويه وجروحك چثيره
راح الـمك بالحـصيـره
وذره وذره......وذره وذره
*******
بويه جثتك معرفتهه. واعـتـذر مـامـيزتهه
مگطعه لمن شـفتـهه
ياهضيمه
بخيلهم داسو عليهه. والضلوع مهشميهه
جثه ليش مسلبيهه
ياهضيمه
بالحد لمن اوسدك. كون احط تربه اعله خدك
وينه راسك ارد احبك
ياهضيمه

ياهضيمه. راح اقبّل نحرك بلوعت جروحي
ياهضيمه. ريت وياك انـدفن ماريـد روحـي

يامحنتي شگد چبيره
راح المك بـالـحـصيره
وذره وذره. وذره. وذره
*******
جثث عالغبره المهه. من الشمس ضايع رسمهه
مامش الروس بجسمهه
صعبه صعبه
وين الاكبر وينه جاسم ذاك عمي گمر هاشم
عالشريعه هناكه نايم
صعبه صعبه
صور متفارگ خيالي. من شفت هاي الغوالي
شلون اوسدهم لحالي
صعبه. صعبه

صعبه صعبه. بالـجـثث اتعـثر و اوگـع عليـهـه
صعبه صعبه. ثلث تيام الشمس شمخليه بيهه

وكل كتر مرمي اعله ديره
راح الـمــك بـالـحـصـيـره
وذره وذره. وذره وذره
****
امشي للكافل واشوفه. واخذ الرايه و چفوفه
عالنهر اصبح خسوفه
عمي. عمي
هذا درعه وهذا جوده. طاحن بطيحت زنوده
عمي مايخلف وعوده
عمي عمي
الـك ياعـمـي تحـيه. لچن مامـدهـن اديـه
تستحي تباوع عليه
عمي عمي

عمي عمي. يلي وافيت الاخوّه الگطع اليدين
عمي عمي يالمبالغ بالنصيحه النصرت الدين

عمي يابدر العشيره
راح المك بالحصيره
وذره وذره. وذره وذره
*********
عمي تدري تسلبينه. بطيحتك هجمو علينه
والدي راح من ادينه
وعذبونه
عمتي زينب يسروهه. اعذرني عمي شتموهه
العيله كلهه روعوهه
وعذبونه
ريت وياك انذبحنه. من اجه الشمر وشتمنه
وين ياعباس صحنه
وعذبونه

عذبونه. راح ادفنك ياگمرنه بدمعت العين
عذونه. نعود الك ياعمـي يـوم الاربعـيـن


نرد نحييهه الشعيره
راح المك بالحصيره
وذره وذره. وذره وذره
***
الشاعر عمار الدراجي---١٢/محرم ١٤٣٩

قصيده ..للدفن

ياعلي طلبه زغيره
لاتشدوها الحصيره
الطفل وسده اعلصدري
يستر اضلوعي الكسيره
+++++++++++
ايعينك الله يالشفت كل المآسي
ياعلي ادري بسوالي هواي قاسي
نيتك اتطم جسمه وحده وينه راسي
انت ماتنسه واگلك خاف ناسي
ياعلي چا راسي وينه
بالطشت لو رافعينه
بعده ينزف دمّه نحري
من يضربون الاميره
++++++++++
لمني قدر المستطاع وهاي امانه
يبني حاول كل عضو اترده المكانه
الراس لف اعمامتي بنحري بمكانه
الزهره من تحضرني خل تعرفني انه
حاول الخنصر تردّه
يبني بگماط ابني شده
ادري يجرح گلبك امري
المنسحگ هاذه مصيره
++++++++++
وابو فاضل عالنهر قصته عجيبه
ادري دمعك عالگمر ياخذ نصيبه
چفّه ليمن عنه مبعد يبني جيبه
فوگه تلگه اثار بوسات الحبيبه
يمّه اثر وگفت خواته
جاياته امحشماته
الكاتب بدمعتها خدري
اعرفها هاي اخته الاميره
++++++++++
لا تأخر دفني يبني استعجل اكثر
صار ثلث ايام فارگ عيني الاكبر
من غيابه مو عطش گلبي تفطر
هسّه تجمعنه الزچيه ويمنه تحضر
والگمر هسّه يجينه
والزچيه اتداوي عينه
ايصيح يمه قبلي عذري
حيرت الچفين حيره
+++++++++++
اعليك زينب تنشغل هاي المسيه
عنها لا تتاخر او اخذ الوصيه
لاتقرب راسي حاول يم رقيه
ابدمعه زينب يبني لاتنظر عليه
راسي من ايضربه عوده
لا تنوح اختي اعله موده
من يجيها السوط ادري
والنظر ليها اديره
++++++++++

ثائر الربيعي

#قصائد_الدفن

للدفن
.
.
.

اشصاير بيكم .. يالمـنظـركم حـيل اذاني
اشصاير بيكم .. شو محد منكم حاچاني
ماتحچون اوياي
متـغـيرين اهواي
اشـصايـر بـيـكم

___

من اجــيت انــه الدفنكم خانگــتني الــعبره
يهلــي عايـنـت الجــثثكــم تــارسات الغــبره
طاحت اعيوني اعله جثه ازغيره لكن حمره
اتقـربـت لــَنه الرضيـع السهم غـافي ابنحره

شلته ابأيدي .. ومن دم عـبد الله بچاني
شلته ابأيدي .. اشگد ناغـيته وماناغاني
جبت ابأيدي الماي
متغـيريــن اهـواي
اشـصايـــر بــيـكم

___

بيمن ابـدي الدفن هـسه فكري حـيل اتحير
ساعه اگوم وسـاعه اطـيح وبالجـثث اتعثر
طيحه من طيحاتي لني فوگ اخويه الاكبر
شفت جسمه شلون شوفه عالتراب امطشر

من لميته .. لميـت اعيوني اويه اوصاله
من لميته .. چيـه شافـن نـص مـن دلاله
براسي ماضل راي
متغــيريـن اهـواي
اشـــصايـر بــيـكم

___

بين اخوتي واگـف انحـب والدمع متلاطم
وچان ذيچ الساعه فكري من جثثهم هايم
شاب من ابعيـد اشوفه حـنـه بيــده ونايم
اتقــربت يمــه ولگيــته ابــن عمــي جاسم

من حاچيته .. مايگدر يحچي امگطعينه
من حاچيته .. غــافي وبالــدم امحــنينه
هملن هاي وهاي
متغـيرين اهواي
اشــصايـر بيـكم

___

اتدوهنت مدري شسوي الفـكر مـدري وينه
لـن بطل عالشاطي اشـوفه امـبــتره چفينه
عمــي ابو فاضل عرفــته لكــن امـگطـعينه
گتــله لـَسـه امتانــياتـك عـَمــتي وســكينه

كلشي اتغير .. هـوه ومـيت يـرجف شـفته
كلشي اتغير .. ابهاي الحاله وعرگت جثـته
شاهدت ابعيناي
متغـيرين اهواي
اشـصايـر بـيـكم

___

الأبـو مـن عـطره عرفتـه وطـحت رأساً يمه
ساعه اشمن صدره ساعه امن النـحر اشتمه
من كثر سحگ الخيول انعـجن لحـمه ابدمه
بلـكي يالوادم حصيـره وبيــها اَلمــن جسمه

جسم الوالد .. اوصاله امن الخـيل ابعيده
جسم الوالد .. لمــيته وضــل خنـصر ايده
اشبيكم يارجواي
متغــيرين اهـواي
اشـصــايـر بيـكم
___
حيدر تركي الكربلائي

اليدفن بيده كَلبه جرّت نفسه صعبه
وانه الدافن اكَلوب. كلها ابلايه ركَبه
ــــــــــــــــــ ــــــــــــــــــ
عليل ولو مگطع جسمي اشوالي
الماعنده گلب بالطف بجه الحالي
ماكفّاهم اهلي وذبحو اخيالي
وذر شفته اعله كبر الگاع دلالي

كلشي بعيني شفته ابوي وماعرفته
تركض فوگه الاخيول. شمسوي اشتطلبه

ــــــــــــــــــ ــــــــــــــــــ
ياهو الشاف هظم الشفته واتصبر
گلبي البالصدر ظل مدمي ومحفر
وعندي اگلوب فوك الغبره بس منحر
ابوي وعمي والعريس والاكبر

وگلبي العمره ستّه. هم گطعو ركَبته
ماصب منحره ادموم. باگي اسنيني صبّه
ــــــــــــــــــ
مروني اعله ابوي وردت اودعنه
غطّيته بدمع عريان اشوفنه
خليت الكَلب يمّه ورحت عنه
ماعشت بنبض عايش عله الونه

بديّه وركَبتي احبال بس عيني اعله الأطفال
اليصرخ بويه بالسوط. جم سوط اليضربه
ــــــــــــــــــ ــــــــــــــــــ
مشن وياي فوك ارماح روس اهلي
ياراس الاصدله عيونه دم تهلي
اعاتب راس ابوي العمّي اشرلي
جر السهم من عينه اشعر ايگلي

اجره شلون يحسين اخاف اوياه اجر عين
خلّه احسن ولاشاف. بزينب تحدي غربه
ــــــــــــــــــ ــــــــــــــــــ
ميّت كون والكوفه ولااطبها
مطر فوگي المصايب ظلت اتصبها
دخلنه المجلس ابن ازياد واصعبها
جر سوطه اعله عمتي ايريد يضربها

بعد مالوّعونه بخرابه ايگعّدونه
ضامي ومثل الحسين جسمي بدم تخضب
ــــــــــــــــــ ــــــــــــــــــ
رجعت ادفن هلي واتگودني الحسره
كلها اشوه امن ابوي اوصاله متطشره
الشافو حالتي گالو دفن عمره
احس انگطع نفسي من بست نحره

يگلي وحالي شَلّه. رضيعي بصدري خلّه
سألني ماجبت ماي. لخوك اشويّه شربه
ــــــــــــــــــ ــــــــــــــــــ
علي محسن الزيادي

عليل منين حيلك ياعلي جبته
ابوك بياگلب لميته وادفنته
ــــــــــــــــــــ
ابوك بطيحته جم حيل اخذ منك
وانه ادري اعله صدره المنكسر ونك
انت المنذبح مو والدك جنك
الشافه حسين والماشافه هم شفته
ــــــــــــــــــــ ــــــــــــــــــــ
گالو يوم من سمعته يصيح ابو الاكبر
هل من ناصر اتوجيت عالخدر
طلعت السيف ماشلته تجر بي جر
بالله شظال بيك السيف ماشلته
ــــــــــــــــــــ ــــــــــــــــــــ
وخلص يوم عاشر وانت ماادري
حي ميت واسمعك جن صحت ظهري
تطيحك زينب امن اتگول ياخدري
متنك لومتنها ياهو ضمدته
ــــــــــــــــــــ ــــــــــــــــــــ
ماهو الگمر ياهو الصعدك عالنوگ
بس لا عمتك جا وام گلب محروك
ياهو الصعداها ومن دخلتو السوگ
جم شامت يشتم حيدر اسمعته
ــــــــــــــــــــ ــــــــــــــــــــ
خليها السوالف اه تحرگ اه
الناس اتگول للطف وحده اشجاباه
وگلبي يگول زينب مااجت وياه
ماحنت لخوها المامودعته
ــــــــــــــــــــ ــــــــــــــــــــ
ابوك شلون بيدك جسمه لميته
الاكبر لو رضيعه بصدره خليته
دفنته ابلايه راس اووين حبيته
والخنصر لگيته الجفه رجعته
ــــــــــــــــــــ ــــــــــــــــــــ
دفنت انصار ابوك اليبسو دمك
وابن عمك القاسم اخذ كل عزمك
الله يعينك شلون ادفنت عمك
ابو فاضل سكت لو نشد عن اخته
ــــــــــــــــــــ ــــــــــــــــــــ

علي محسن الزيادي

مخنوگه مر بيه هوى. والهيمه ظلمه بلاظوى
درب السبي مابي خيم. والحادي مو راعي العلم
ويلاه يادرب السبي. ويلاه يادرب السبي
*
امدلـله عشت العمر. ويني وين الشمر
خلاني ادوسن عالجمر خلاني
كل ساعه اگومن وانهطر
يضرب رقيه شما يمر. كل سوط احسبنه عمر. خلاني

خويه اليسر. سوط وزجر.
والحادي يشتم فاطمه
شتم وضرب. طول الدرب.
والسوط متني ورمه

مذبوحه من كثر الهظم. سوط الشمر طخ العظم
المن اسولف هل الالم والحادي مو راعي العلم
ويلاه يادرب السبي
****
الحگلي موحيلي گضه. بعيوني موضاگ الفضه
اعظامي كلها مرضرضه. اعظامي
وبروحي تسعر الغضه
فگد الاخو شيعوضه من السبي متمرضه.
اعظامي

اركب هزل. بيدي حبل
جابوها عرجه الناگه
صحت ونحت. خويه شوكت
يمته بعد نتلاگه

دلالي ياخويه انفضخ. براسك الاسمر كشخ
الشيبه الكريمه كلها دم. والحادي موراعي العلم
ويلاه يادرب السبي
******
بذيچ الصحاري والعطش. من بعد ليلة اهدعش
دمعي علا خدي لطش. يعيوني
دمك عله الغبره انفرش
ياريت شالوني بنعش. يالبيك دلالي انخمش. يعيوني

سكته البچي. همس الحچي
امرنه مو بدينه
بيد الغرب. تدري صعب
يامر نذل علينه

مسبيه صار اسمي بعد. من اخواني ماضلي احد
يحسين موحيلي انهدم. والحادي مو راعي العلم
ويلاه يادرب السبي
*
راسك يشيلونه بفخر. لمصابك اينوح الصخر
اعله الرمح دم النحر. يتواره
ينزل عله الغبره مطر
راسك وگع لمن عثر الحامله وضهري انكسر. يتواره

فوگ الرمح. دمك يسح
راسك اشوفه گبالي
تصد لضعن. دموعك جرن
طول الدرب تبرالي
چم شوغه يحمل الگلب. بديوان خلونه نطب
بين الزلم واحنه حرم. والحادي موراعي العلم
ويلاه يادرب السبي
****
ايزيد ناداني وشتم. امي الزچيه وبتسم
حسيته صاباني بسهم. حسيته
بالطشت جابوه الخدم. راسك وحس حيلي انهدم
وثغرك من الگصبه انثلم. حسيته

ناس شكثر. بذاك القصر
لن صاح بسمي الطاغي
يابت علي. نضري الي
ايدوور عليه الباغي


وسكينه بت عالي الشرف. خدامه رادوها وسف
شاخو امس چانو خدم. والحادي موراعي العلم
ويلاه يادرب السبي
***
شحچي بعد عن محنتي. بذيچ الخرابه وغربتي
طفوها خويه شمعتي. طفوها
زادت رقيه لوعتي. ماتت وذابت مهجتي
چانت اليه سلوتي. طفوها

بطشت الذهب. حيلي انسلب
ميته شلت رقيه
بشيبك غفت. شمعه وطفت
ناري بگت سريه

واعذرني خافن قصرت. يابعد روحي لو رحت
هاي النهايه بلا شيم. والحادي مو راعي العلم
ويلاه يادرب السبي
**
الشاعر عمار حسن الدراجي. ٤صفر ١٤٤٠

هنـــايســايج ظعنــه ريض ومــر بهلنـــه
عفت اخوتي ظحايه وعالشريعه الكفلنه
ــــــــــــــــــــــــــــــــــــــ
يالتســـوك المهـــازل ريض بهـل مسيـره
عـــدنه والـــي ولزومن نگعد ونستشيره
نمشي وي الاجانب يرضه شيخ العشيره

بيـــن زجـــرالاعادي والسيـاط الـولنــــه
ــــــــــــــــــــــــــــــــــــــ
ميّل علمعـــاره خـــل نــــنـــشـــاد ولينه
لومشينه لوَحَــدنه خــــاف يعتب علينه
هاذي عاده يحادي بالعرب مـاهــي زينه

حرمه تمشي لوحده بالعرب ماهي سنه
ــــــــــــــــــــــــــــــــــــــ
بله نوخ رچابك يمهم وخــــــل نكلهم
يالهواشم خـــولـه راح يحـدي بنزلكم
ركبوها اعله هزله يال هاشم حـرمكم

هاي ماهي بطبعكم يهلي يهل المحنه
ــــــــــــــــــــــــــــــــــــــ
ياســـدور الفراضــه وياكـبـــار الثنيه
ماتصير بسننكم هـاذي يهـــل الحميه
كوه يردوني امشي وللسفر مالي نيه

بلا رفيج منخوتي شلون يرهم سفرنه
ــــــــــــــــــــــــــــــــــــــ
جدم البل يحادي وخلي مشيك بَهيده
مـــر بنـــا علشريعه للكفلـــنــي اريـده
موش متعوده اركب اله يرجبني بيده

كافل اخته ولزومن ناخذ الرخصه منه
ــــــــــــــــــــــــــــــــــــــ
يلي نـــاوي تـــفـــرك بين ظعنـي وكفيله
من كبل لانســافـــر خلنـــي بلّه اشتكيله
حرمه للكوفه تمشي جنها زحمه وثجيله

وي غرب ديره تكَطع تنحمل ماهي ظنه
ــــــــــــــــــــــــــــــــــــــ
خل اراويله متني واشتكي منالهضيمه
بالحبـــال اجتفــونه وسمعونه الشتيمه
ولية الشر ولونه بالعـــرب ماكــو شيمه

شالو اهل الحميه ولا ولي اليفزع النه
ــــــــــــــــــــــــــــــــــــــ
مرني هلبت يحادي ينتهض حامي ضعني
ادري به ميتحـــمـــل كـــون اراويله متني
بس اسمعه النواعـــي ينتهض لوسمعنــي

هلبت يرد جفوفه الطاحن وعطّلنه


خادم الحسين ع
#رائد_الناشي

للسبي
.
.
.

حــادي الـــضعــيــنه صــاح ابــشمـــاتـــه
گــال ابـــــو فــــاضـــل ذنــي خــــــواتــه
خـويه الـحادي مــن گـال
عــثرت حــــته الاجـــمال
تــمــــنـيــتـك يـــكـــفـال
حـــــاظـــــــر ويـه زيـنب

_______________

حــادي النوگ مـشاهــن واحـس سحگاتهــن بیه
مــشن وشـموع فــوگاهــن بـس شمـوع مطفیه
ابـــیا دیـــره الیــمـر بــیــهـا یـلـــم الـوادم اعــلیه
وهــذي زیـنـب یــگلـهـم شـــوفو شلــون مسبیـيه

اشـــــــر عــلـــيه ومــــن مــستحـــاتي
مــــن مســـتحــاتــي عرگــت عـــباتي
مــن شــافــوني الـرجال
عـــثرت حـــته الاجـمال
تــــمـــنـيتـــكـ يــكــفـال
حــاضــر ويـــــه زينب

_________________

الـشمر وي راسـك ايــسولف الچانت بيك تتباها
يگـلك يا ابــو فــاضـل هاي اخـتـك ســبينـاهـــا
الــشديت انـته مــحمـلهه ابلا محمل اخـذناهــا
الـكافـــلـهـا چنـت انته عــگب عیــــنك كفلـناها

خـــويـــه كـــلامـــه اشـــــسوه بــدليــلي
والـــمثــلـــه يــــخســه يــصــبح كفـــيلي
ماچنـــت عـــلــه الــبال
وعثرت حته الاجــمــال
تــــمـــنیـــتـك يـكفــال
حـــاضـر ويه زينب

___________________

علويـات اسـمعــني سمعـت الـبضعن گایـد
گاصد بینه للکـوفـه الــناس تـشوفنه رایـد
خواتي ما اوصیچن ادري بـحیلچن بــايـد
البوشـــیتهــه مسلوبـه تــَنزل راسهه زایـد

وراســـي امـن الـحــادي بـالكوفــــه شـيـب
گال الــهم یـــاهــــو الـــــماشــــایــف زینـب
هالـمربـــوطــه بـــحبـال
وعـثرت حتـــه الاجـمال
تــــمنیــتـــك يـــكـــفـال
حـــاضـر ويـه زيــنـب

___________________

بالــبر يسرع الحــادي چــيـه شمات مابـيها
ولــَمن يوصل الديره يـگـید النـوگ رجـلیها
الچـانت بیك مهـيوبه وانـته اتـصـير واليها
زينب يا اخـو زينب النـــاس احجار ترميها

الحــادي اسمعه ايسـولف ورايه
ايگلــهم اضــربو حـيل الــسبايه
ومـن طاحت بالأطفال
عثــرت حـته الاجــمال
تمنـــيتــــك يـــكـفـــال
حــاضــر ويه زينب

______________________

مشينه وسوط ابن جوشن فوگ اضهورنه یلعب
(خوله) یاخــذه مــنه یخویه امـن الشمر یتعب
یگله العضــبه ناگتــهـه علیهـــه کــثر المــضرب
خــلی ایشوفنه العبــاس من انــعــذب بــزینــب

ومتوني ماتـت ماحس بالمتون
والیضربوني اســمع یضحکون
وچیه ضربوني عذال
عثرت حــته الاجمال
اتمنـــیتك يـــكـــفال
حاضر ويه زينب

_______________________

اعايـن وانحـب الراسـك شالوه برمح عالي
بهـالحاله يبو الغير واحـسك جـاي تبــرالي
اشــعر بالطمأنــينه كــل مــا شوفك اگبالي
بـعدني خويه اتخيـل عـدل ويردلي كفالي

كل ساعه اصرخ وينك يعباس
بعين الشماته تنضرلي هالناس
بـگد ما دمعي همال
عثرت حته الاجمال
تمنــيــتك يـــكــفال
حاضر ويه زينب

لخادمكم حيدر تركي الكربلائی

مولاتي زينب عليها السلام تسولف وي مولاتي الزهراء

......................
من شفت الهوه اتغير_ ووجعني كلبي يا يمه
كلت طاح اليحاميني _ طاح حسين ابو اليمه
لن هجمت علينه الخيل _ وكل فارس بديه مشعل
خيمنه عكب ابو ارقيه _ حركوهن بلا رحمه
.
من هبت الريح . ضاع الخدر من هبت الريح
اكبالنه اطيح . خيمة اعلى خيمة اكبالنه اطيح
.
معروفه العرب لو يحترك دار
يفزعون وركض يطفونها النار
بس ويانه كلبوها التقاليد
وحركو كل حلم بعيون الزغار
..........................
الاخذ حيلي وكسر كلبي _ من رد خالي ميمونه
وما متعوده مهر حسين _ يرد للخيمه من دونه
طحت عالكاع مهضومه _ عرفت حسين فاركنه
نشدته شصار سولفلي _ انهضم واندارت عيونه
.
يا يمه للتل. اركض رحت يا يمه للتل
بالدمه مغسل. شفت الاخو بالدمه مغسل
.
صعدت التل واخوي حسين شفته
مغيرته الحوافر ما عرفته
كتله الحك خيمنه صارن ارماد
وكام وعالترب صارت وكعته
...................................
ما خلاني كلبي اصبر _ رحت اركظله بالحومه
وشيب كلبي من شفته _ الوادم بايكه اهدومه
الامس بيده يشرب الخيل _ بكل لا يرتوي كلبه
خلو تعطش اشفافه _ وصاير عالترب نومه
.
يا يمه ذبلان. من التعب يا يمه ذبلان
وبعيونه دخان . من العطش بعيونه دخان
.
كتله الحك يخويه اعلى الخدر ضاع
كام ورد وكع يا يمه عالكاع
خله ايده اعلى ايدي وكلي يم عون
عشرتنه انتهت هذا اخر اوداع
................................
رديت امشي مثل حسين _ من رد من ابو فاضل
وظهري صار مثل امي _ ظهري امن الوجع مايل
التطيح اكبالها اخوتها _ تبجي الكاع خطوتها
متت مو هسه يا يمه _ متت وي فركة الكافل
.
فاركت الاعزاز. كلشي انتهى وفاركت الاعزاز
للموت تعتاز. الما يمه اخو للموت تعتاز
.
انتهى كلشي وخيمنه الجانت بخير
طاحت من جفو عنها النواطير
ضلينه عطاشه بحسرة الماي
وابونه الجان بيده يشرب الطير
...................................
اطفال اهواي يا يمه _ وجف عباس مو يمي
وسكينه لهسه منتظره _ تكلي ما رجع عمي
عمج وين يا سكنه _ افراك اعيونه عذبنه
العطش يا يمه هم هين _ افراك الغالي كل همي

.
جا وينه عمي. من تنحجي جا وينه عمي
يحترك دمي . واشبع بجي ويحترك دمعي
.
الجان يكلي خويه ادللي ام عون
اخلافه اعلى الترايب تغفه العيون
من كثرة دلاله وجفه الحنين
ما جنت الشمس اعرفها يا لون


#عبدالله_الفريجي

شفت راسك خويه من صب الدمع
چـن يـگلـي زينـب انتـي ابيـاوضـع
******
بياوضع بعدك افك ريجي ابشتم
حـرمـله مـن الـفـجـر بـيـكم يذم
ولهـضـمنـي ايصيح بينه بالاسـم

يصيح باسـماء الـفــواطـم ونفجع
**********
انفـجع كــلسـاع وبـطــول الـدرب
ويـن چانت ليه امشـي وي غـرب
ولو بچه عدنه طفل يشبع ضـرب

وچم طفل من الشمر شابع صگع
*********
ياحسافه شلـون يـحـدينه الشـمر
يـضـرب الاطفال خويه اشما يـمر
بسوطه ويـگلـي انه بيـدي الامــر

آنه حـاديـچـن وله صعبه اسـتمع
***********
آنه ياهـي واسـتمع هذا الحـچي
آنه بت عرش الله بسمه منتچي
حگي لو اگضي العمر كله بچــي

خارجيه ايصـيحـلي وانه الـشـرع
***********
الشـرع والــديـن اصـله ابعـفـتـي
تالي يحديني الشمـر ياهـضـمتي
شما يصيح ابأسمي تبچي ناگتي

انذوب من نسمع حچي مثل لشمع
**********
خويه صوت الحادي يرعبنه الفجر
يابنات الـمـرتضى ايـصـيـح ابـزجر
وبـيـده يـلـزم الـحـبـل بـينـه يـجـر

كـون ايـده مـن يـجـرنه تـنـگـطـع
***********
مـن يـجـرنـه خـويه اديـنه تـنـجرح
وانه كــــل سـاعه احـســن انــذبـح
من اشوفك تبچي ونته اعله الرمح

شـوفـتـك فـوگ الـرمح ماتـنـجـرع
شفت راسك خويه من صب الدمع
***********
عمار حسن الدراجي.. /١٥/محرم/١٤٤١
ملاحضه حول هذا الشطر
آنه بت عرش الله بسمه منتچي
المقصود اسم الامام علي ع مكتوب على ساق العرش والعرش متكء على تلك الساق..... لااجيز حذف معنى الشطر الا عنده سحب القصيده وطباعتها وفقكم الله

يــــمر يوميه اعله ابالي العاشر وذاك الضعن
حكي لـو دم تجري عيني عدنه نسوان انسبن
الضعن من يسبونه
ياهـــــو سد اعيونه
ادور الناس اعله زينب ياهي منهن من مشن
ــــــــــــــــــــــــــــــــــــــ
حيرتي وحيرتها وحـــده التلتفت كل ما مشت
اصـفن ويسرح خيالي وشفت بي زينب بجت
فتشت باهــــــات زينب بالاضعون اشسولفت
يابو فاضل صـــدك نايم وختك الحره انسبت

سياط وعيون الشماته ومـــــدري لاوين الدرب
حرم جتفوها وخذوها امتون زركه من الضرب
يكبر ويـــاي الجرح
حرمه تنطك بالرمح
اللجمه جانت اثر جــــويه ابنار الخيام انجون
ــــــــــــــــــــــــــــــــــــــ
عشت بالطف لحضه لحضه وشفت بعيوني الجره
شفت زينب مـــــــن خذوها ومــرت اعله الكنطره
زاد طــــــكهم عالــشريه ومره اتشاكف عن مره
همــــهم العباس يســـــمع زينب اخـــته ميسره

كون عمي الكمر شاف شلون مچتوفه الجفوف
لاجـــن بياعين ينضر والسهم مـــاخـله شوف
تعمدو يــــــم جثته
بلجي زينب شافته
الجنتي بـــــي محميه نايم بعــــد بيمن تنتخن
ــــــــــــــــــــــــــــــــــــــ
اليمشي ويصب دمع عينه يعني يمشي ابلا كلب
الشامت وفاكد سويه شيكضي حسرات الدرب
ابجي اواتـــــــذكر بجيهن من مشن ويه الغرب
صوت يدوي ابراسي لسه امتونهن من تنضرب

انسبن تربات الـــدلال وسمعن اشكال الحجي
من التعب وحده اعله وحده بالمغافل تنتجي
عمتي من اسروها
بالحبل كيــــــدوها
جان ابــو فاضل وطنها اعله النهر ضل الوطن
ــــــــــــــــــــــــــــــــــــــ
مثــــل دم امتون عـــــــمتي دم تصب اعيوني
عمه ريت ابـــــدال متنج كـــــون زركه امتوني
كـــــون تبقين انتي امـــــيره وعالهزل يسبوني
ريت مـــا سمـــــوج اسيره وانــــــه اليسموني

الشام وعيــــون الشماته وكــــل هـــله فرحانه
اتفــــرجت كلها اعله زينب مــــن تطب ديوانه
التمت اعيون الزم
بالخدر عدهم علم
ابكلشي ذاك اليوم شمتو وزاد شامتهن محن
ــــــــــــــــــــــــــــــــــــــ
موجـره ابكلبي الخرابه وانلجم مــــن كل حبل
لو شفت بعيوني حرمه انهضمت المدمع يهل
اتصير جدامي العقيله الركــــــضو بيها الهزل
والهزل مـابيها تمشي شلون اذا شالت الحمل

النوك مـــكشوفه الخذوه مـــاكو هـــودج بيها
الناس مـــن ابعيت تنضر بت علي مــــجتفيها
سلـــــمت لله الامـــٰـر
يحدي بالناكه الشمر
مـــن يميل الــحمل كـــلفه الحــرم بيش يـجلبن

بسام قابل الياسري

مشينه ومن مشينه بس بالاعيون
أودع إخوانــي ميت حيل إديـــــه
النيه البيهه رحنه تطـوي الادروب
ماتطــــوي الألم مو خوش نيــّـــه
إلتفت وحـن دليلي لذيج الاخيام
ولــو محـروگه بس أهــون عليـــه
ذاري ارمــاد خيمه ولا ظهر نوگ
فَيْ دخــانهه اشمحــلات فيـــّـــه
أمس بالليل اون ابصــوت مبحوح
ياطــف كربلــه اشسويـــــت بيــّه
ومــن شفــت الهــزل حنيــت لليـل
وعلـي صــارت عزيــزه الغاضريه
مشينه وظــل خدرنه امغطه برمال
روحــه أصعب علي مـن ألف جيه
ودلال اسنين عفتــه وعفـــت جفين
ورايــة رب عفافــي اعلـه الوطيـــه
مشينه والــدرب تــوح النظر صار
ورزيـه اتسلــم اضعونــي لرزيـــه
مشينــه والنهــار ايبــوگ بالليـــل
علـــى اعنــاد الستـر مابيه حميه
نشــف دم الفواطـم مــن الاعيون
وكلــت وجـه الشـرف عين آل أميه
ولأن اخيـالــهن ماشـربته الگــاع
يتيــمات الخــدر يشتـكـــن ليــــه
أنا المحد عرفلي أوصاف لاشاف
خيالي وبالسلف جان اسمي هيه
تالي امشي ابجنازة ضعن مگتول
والگتــال يمشــي اويـاه سويـــه
لأن ماله عشيــرة اداعـــي بالثار
انذبــح عطشان أخـوي أبغير ديّه
ومن بيناتنه الصاب أمي يختار
وطاحت ايده فوگ أصغر سبيه
للديوان حسره  وحسره للروس
وألف حسره على امصيبة رقيه
امسمّايه الدموع الفوگ الاخدود
دمـعـه لكـربلـه وللشــام ميــّــــه

احمد الهلباوي

صباح الخير شَـــدّو مَعـــصَم الخير
و أنگـــادت الســـتر فوگ المــهازيل
و بوَضْــح النــهار استـفحَل الشــين
خذوه امچتف بـحبل الســـبي الليل
و شـالو راس عـــالي برمــح الزغير
شـدو راس غِيــره بـرُگـبــة الخـــيل
أهــــل العافــيه ابـلا عافـيه تــروح
أمـس بيها الحــوافر چانـــت اتشيل
مدنگه الراس زينب من المــصـــاب
و نظــرات الشــماته بزينــب اتعــيل
الچانـت بأبو فاضـــل شـايله الراس
مِشت حتـــى رمشــها فاگـــد الحيل
انتعش عمـر الدمع و العِز كهِـل صار
واتـوفَّــه الــدلال بـ مـــعــركة ويــل


الشاعر حاتم صبري الكاظمي