#الطور_البحراني (الفائز)

گومي يرمله هلهلي العريس جبناه
جبناه إلچ يم الولد والحنه وياه
چن المنايه زفته وچن حنته دماه
فرحي يرمله للولد بس لا تنوحين
&&&&&&&&&&&&&&&
جبناه مكطوع النحر ومحنه الچفوف
حنّوه من دم منحره وزفوه بسيوف
چن القدر حتّم عليه هالليله مزفوف
وعينچ يرمله تنظره مذبوح نصين
&&&&&&&&&&&&&&&
زينب تگلها هلهلي لبنچ يرمله
هذا الحزن ماظن بعد احنه نبطله
العريس إجالچ للخيم عمه يحمله
وإمدد بنص الخيم جاسم تشوفين
&&&&&&&&&&&&&&&
ويلي عله وليدي غده للطف ضحيه
ولعمه آنه قدمت ابني هديــــــــه
خلينه نتگابل سوه بهاي العزيه
ونعلگله شمعات العرس ونزيد الونين
&&&&&&&&&&&&&&&
تتركني وحدي بهالوضع يبني يجسام
وبگلبي لوعات وحزن وهموم وآلام
عريس اشوفنك ردت والفرح ما دام
عگبك أنه بنار الحزن مستعره كل حين
&&&&&&&&&&&&&&&
أبچي اعله حالك يالولد صبح ومسيه
وأتذكّر أيام المضت وأحنه سويه
وصّاك أبوك ويانعم من الوصيّه
گلك يجاسم لا تگصّر عن الحسين
&&&&&&&&&&&&&&&
#علي_حسن_المنصوري