#قصائد_محرم الحرام ع
باجر من يطيح حسين    وين حسين دليني

——————————




بسم الله الرحمن الرحيم




قصيدة #العليلة
عليها السلام



تقرأ بعدة أطوار وألحان تصلح لمجالس #النساء #والرجال


يبنّيه فات العتب بس العتب بطّليه

وإلّي يغيّره الزمن والينسه هم انسيه


خلوني اتانيهم
عافوني اشبيهم

كلهم نسوني/عالفارگوني/گلبي جمر ظل بيه


شان المريضه الهنا والراحه بس إلها
عند الحبايب تظل إيشوفن مشاكلها
هاي التدگ الدوه وهاي التنگطلها

بس آنه ظل حالي
الموت إيتراوالي

أ هلي إشمروني/عالفارگوني /گلبي جمرظل بيه


يايمه گوه الِنفس يرجع على الرِيَّه
ماعندي ذرة عزم وامشي إعله رجليّه
ماگلتي ياهو البگه ايباريها البنيه
واتخلبص احسابي
من شيلة أحبابي
ليش إشمروني/عالفارگوني/گلبي جمر ظل بيه


ليليّه أصب الدمع وابچي اعله جمعتهم
ازحف زحف عالرمل وأذرع ثنيتهم
وبكل ركن بالنزل محفوره ذكرتهم
بيت الگبل زاهر
ظل يكسر الخاطر
عميت عيوني/عالفارگوني/گلبي جمر ظل بيه


المغرب ابلا رحم يلفيني بآلامه
من گد نياحي إوعلي ماشيلن الهامه
موآنه گتله الابو إخذوني خدامه
شال اوگطع بيه
ماچني البنيه
والدللوني/عالفارگوني/گلبي جمر ظل بيه


حسبالي يوم إو يرد ذاك العليه ونّي
احچي ويروحي ابقهر ليش افترگ منّي
هوه وخواتي أبتعد إوعماتي عافنّي


وگالو گمرعدنان
ايجيبچ لرض كوفان

يمته يجوني/عالفارگوني /گلبي جمر ظل بيه

معذورة يافاطمة لولمتي الوالي
ماجالچ إنتي الخبر راسه برمح عالي
حسين بظهر كربله لله انطه كل غالي

والغايب اشحاله
مات إونسه إعياله

صاح إذكروني/عالفارگوني/گلبي جمر ظل بيه

العمل مهداة إلى مقام حضرة صاحب الزمان عج
*أم علي رضا الشريفي الحسيني*

———————-

مؤسسة منبريات للقصائد النسائيه
https://telegram.me/ahmed_alziwar17

كروب 2 👇خاص بنشر وتلحين القصائد
https://tttttt.me/+tVGiZHdfNq81ZGYy