#قصائد_محرم الحرام ع
باجر من يطيح حسين    وين حسين دليني

——————————



#للعليله..

مرلي ياطــير السعد بحبابي
وللاهــل ويـاك اخــذ اعتابي
حلمي بس اسمع خبرهم
يلهج الســاني ابذكــرهم
        مرلي ياطير
……………………………………

هاك اخذ ملخص كلامي  البيه اسولف حالي
وگل لبوي اتگول بتكم  بيـــتكم ضل خالي
أرحلو يا طـــــير عنــي  غالي يتــــبع غالي
والنضر راصـــــد دربهم  والحـــــزن چتالي

مرلي يا طيــر ابضعن عباسي
وگله شيب من هجركم راسي
عني ماغابت صورهم
يلهج السـاني بذكرهم
        مرلي ياطير
……………………………………

لسكنه ورقيه الرسـايل  بالعــــجل وديهن
ادموع وعتاب وسلام   شكثر يلگن بيهن
شو نسن عدهن عليله   وضــــاله اتانيهن
وآني كل لحظه التمرني  الهــج ابطاريهن

اخبـــاري ياطير السعد وديهن
يم اخوتي اهناك سولف بيهن
ابـد لاتنـــــسه تمرهم
يلهج الساني بذكرهم
        مرلي ياطير
……………………………………

كل مراســــــــيلي اخذها .. وروح يـم عماتي
بلكي مـــن يقرن عذابي .. يجبرن ابحسراتي
راح يلگن بالرســــــــايل .. ترجــــــــمة آهاتي
وفوگ ضرف الشوگ يلگن .. اثر مــن دمعاتي

سـلم اعله النسو حال احبابهم
وگلهم اليوجعني بس اغيابهم
گاعده ابابي انتضرهم
يلهج السـاني بذكرهم
……………………………………

آنه طفله وروحي ترفه .. والبــعد ماذيني
جمرة اغياب الاحـبهم .. بالگلب تجـويني
شحت اعليه الشلونچ .. والمرض سابيني
شوفت اوجه الغوالي .. هيه التــــشافيني

الغيبه صعبه وگمت احن لحبابي
واركض اشــــما هوه يحرك بابي
ناطره اليرجع بثرهم
يلهج الساني ابذكرهم
…………………………………

والله لمن ودعتهم .. هـــدمو كل حيلي
لا رتاحـيت بنهاري .. ولا مغمضه ابليلي
لارساله ولاكو طارش.. يرجع ويحچيلي
عالمشو والفارگوني .. يامــدامع سيلي

حلم ياريـــــته وافز من نومي
ويم ابوي الغالي اخلص يومي
واشفه من علتي واسرهم
يلهج الســــــاني ابذكرهم
………………………………
✍الخادم
كامل السعيدي


———————-

مؤسسة منبريات للقصائد النسائيه
https://telegram.me/ahmed_alziwar17

كروب 2 👇خاص بنشر وتلحين القصائد
https://tttttt.me/+tVGiZHdfNq81ZGYy