የኡስታዝ አቡ ሀይደር ትምህርቶች ስብስብ

ኢስላም እና ዘረኝነት!

በአቡ ሀይደር

በአላህ ስም እጅግ በጣም ሩኅሩህ በጣም አዛኝ በኾነው

ክብርና ምስጋና የዓለማት ጌታ ለሆነው ለአላህ የተገባ ነው፡፡ የአላህ ውዳሴና ሰላም፡ የሰላም አለቃና መምህር ለሆኑት ለነቢዩ ሙሐመድ (ሶለላሁ ዐለይሂ ወሰለም) ይሁን፡፡ ድልና የበላይነት: ሐቅን ለማንገስና ሀሰትን ለማርከስ፣ በደልን አጥፎቶ ፍትሕን ለማስፈን ዕውቀታቸውን፣ ንብረታቸውን፣ ጉልበታቸውን፣ ጊዜያቸውንና ሕይወታቸውን መስዋእት በማድረግ ለሚታገሉት የአላህ ባሮች ይሁን፡፡

1/ ዘረኝነት ምንድነው?

ዘረኝነት ማለት፡- የራስን ቋንቋ፣ ባህልና ስርአት ማክበር፣ ቀጣይነት እንዲኖረውና እንዳይጠፋ መንከባከብ፣ ማንነትን በዘርና በቋንቋ መግለጽ ማለት አይደለም፡፡ ዘረኝነት፡- የራስን ቋንቋ፣ ባህልና ስርአት፡ ከሌላው ዘርና ቋንቋ፣ ባህልና ስርአት፡ ከፍ አድርጎ መመልከት፣ የሌላውን ማንቋሸሽና አሳንሶ ማየት፣ ዕውቅና አለመስጠትና ዝቅ አድርጎ መመልከት ማለት ነው፡፡

ዘረኝነት ማለት፡- ራስን ከሌላው ለየት አድርጎ መመልከት፣ ለራሱ የሚግገባውን ነገር፡ ለሌሎች የማይግገባ ነገር አድርጎ ማሰብ፣ በሌሎች ላይ ግዳጅ የኾነውን ነገር እኔን አይመለከተኝም ብሎ ማሰብ፣ አብሮነትን በመጠየፍ ለብቻ መመገብና ለብቻ መኖር ይገባኛል ማለት፣ የራሱን ዕልቅናና ክብር፡ በሌሎች ውርደትና ዝቅተኝነት ላይ መገንባትን ማሰብ፣ የራስን ሀብትና ብልጽግና፡ በሌሎች ድህነትና ኋላ-ቀርነት ላይ ለማቆም ማሰብ፣ የራስን ሰላምና መረጋጋትን፡ በሌሎች ረብሻና ወከባ ላይ መመስረትን ማሰብ፣ የራስን ሕይወት በሌሎች ሞትና መስዋእትነት ላይ ማድረግን ማሰብ ነው!!፡፡

2/ ኢስላም ዘረኝነትን እንዴት ነው የተዋጋው?

ሀ/ መበላለጥን አላህን በመፍራት ብቻ መኾኑን በማወጅ!፡-

"እናንተ ሰዎች ሆይ! እኛ ከወንድና ከሴት ፈጠርናችሁ፡፡ እንድትተዋወቁም ጎሳዎችና ነገዶች አደረግናችሁ፡፡ አላህ ዘንድ በላጫችሁ በጣም አላህን ፈሪያችሁ ነው፡፡ አላህ ግልጽን ዐዋቂ ውስጥንም ዐዋቂ ነው፡፡" (ሱረቱል ሑጁራት 49፡13)፡፡

በዚህ አንቀጽ መሠረት፡ ሁላችንም ከወንድና ከሴት (ከአደምና ሐዋእ ግኑኝነት) የተገኘን ፍጡሮች መኾናችንን፣ ጌታ አላህም እንተዋወቅና እንግባባም ዘንድ በጎሳና በነገድ እንደከፋፈለን እንረዳለን፡፡ አያይዞም፡- አላህ ዘንድ በላጭ ለመኾን እና አንዱ ከሌላው መሻልን የፈለገ ሰው፡ አላህን በእጅጉ የሚፈራ አማኝ ባሪያ መኾን እንዳለበት ይመክራል፡፡ አዎ! ክብራችን በዘራችን ወይም በመልካችን ሳይኾን፡ አላህን በሚፈራውና ለትእዛዙ ባደረው ልባችን ሰበብ ነው፡፡ ከዚህ ውጭ፡ የመልካችን መቅላት፣ መጥቆርና መንጻት፡ የአላህን ችሎታ (በፈለገው መልኩ መፍጠር የሚችል ጌታ መኾኑን) ነው የሚገልጸው፡፡ እኛ ነጭ ወይም ጥቁር ኾነን ለመፈጠር ያደረግነው አስተዋጽኦ ስለሌለ፡ በጥቁረታችን ወይም በንጻታችን ሰበብም፡ የምናገኘው ክብርም ኾነ የሚደርስብን ውርደት የለም!፡፡

"ሰማያትንና ምድርንም መፍጠሩ፣ የቋንቋዎቻችሁና የመልኮቻችሁም መለያየት፣ ከአስደናቂ ምልክቶቹ ነው፡፡ በዚህ ውስጥ ለዐዋቂዎች ተዓምራቶች አልሉበት፡፡" (ሱረቱ-ሩም 30፡22)፡፡

ነቢዩ ሙሐመድ (ሶለላሁ ዐለይሂ ወሰለም) በአንድ የጁምዓ ኹጥባቸው (አጠር ያለች ምክር) ላይ እንዲህ አሉ፡- ‹‹እናንተ ሰዎች ሆይ! ጌታችሁ አንድ ነው! አባታችሁም አንድ ነው! አዋጅ! ዐረብ የኾነው ዐረብ ባልኾነው ላይ፣ ዐረብ ያልኾነውም ዐረብ በኾነው ላይ፣ ቀዩ በጥቁሩ ላይ፡ ጥቁሩም በቀዩ ላይ አላህን በመፍራት ካልኾነ በቀር ብልጫ የለውም!፡፡›› (ሙስነድ ኢማሙ አሕመድ 24204)፡፡

በዚህ ነቢያዊ ሐዲሥ መሠረትም፡ ዐረብ የኾነውና ከዐረብ ውጭ ያለው፣ ቀዩና ጥቁሩ የሰው ዘር በመላ፡ አንዱ ከሌላኛው ሊሻልና ሊበልጥ የሚችለው፡ በዘሩ ወይም በመልኩ ሳይኾን፡ የፈጠረውን አምላክ፡ ጌታ አላህን በልቡ በሚፈራውና በሚታዘዘው ልክ መኾኑን ነው፡፡

ለ/ ሁላችንም ከአንድ ምንጭ (ከአፈር) የተገኘን መኾናችን በመግለጽ!

ከአቢ ሁረይራህ (ረዲየላሁ ዐንሁ) እንደተላለፈው፡ የአላህ መልክተኛ (ሶለላሁ ዐለይሂ ወሰለም) እንዲህ አሉ፡- አላህ በአባቶቻችሁ መኩራራትንና የመሃይምነት ዘመንን ኩራትና ትእቢት ከናንተ ላይ አስወግዶታል፡፡ ሰዎች አማኝ አላህን ፈሪዎች ወይም አመጸኛ ዕድለቢሶች ናቸው፡፡ እናንተ የአደም ልጆች ናችሁ፡ አደም ደግሞ ከአፈር ነው›› (አቡ ዳዉድ 5118፣ ቲርሚዚይ 4336፣ ሙስነድ ኢማሙ አሕመድ 8970)፡፡

በዚህ ታላቅ ሐዲሥ መሠረት፡ እኛ ሁላችንም በጠቅላላ፡ የአባታችን የአደም (ዐለይሂ-ሰላም) ዝርያዎች እንደኾንን፣ አደም ደግሞ መሠረቱ ከምድር አፈር እንደኾነ እንረዳለን፡፡ ይህ ማለት፡- የሁሉም ሰው መሠረቱና ግኝቱ አፈር እንደኾነ የታወቀ ነው፡፡ አንዱ ከአፈር ሌላው ከወርቅ ወይም ከአልማዝ አልተፈጠረም፡፡ ስለዚህ አንዱ ከሌላው በሰውነቱ አይበላለጥም ማለት ነው፡፡ የመልኮቻችን መለያየት ምክንያቱ፡ አባታችን አደም የተፈጠረበት የምድር አይነት ነው፡፡ የተለያየ አይነት መልክ ካላቸው የአፈር አይነቶች አባታች አደም እንደተፈጠረ ቀጣዩ ሐዲሥ እንዲህ ያብራራል፡-

አቢ ሙሰል አሽዐሪይ (ረዲየላሁ ዐንሁ) እንዳስተላለፈው፡ የአላህ መልክተኛ (ሶለላሁ ዐለይሂ ወሰለም) እንዲህ አሉ፡- ‹‹አላህ አደምን ከተለያዩ የምድር አፈር አይነቶች በመውሰድ ፈጠረው፡፡ የአደም ዝርያዎችም ከዚህ የተለያየ የምድር አፈር አይነተ ልክ የተለያየ መልክን ያዙ፡፡ ከነሱም ውስጥ ቀይ፣ነጭ፣ ጥቁርና በዚህ መሐል ያለ መልክ ያለውም መጣ›› (አቡ ዳዉድ 4695፣ ቲርሚዚይ 3213፣ ሙስነድ ኢማሙ አሕመድ 20109)፡፡

ሐ/ ተግባራዊ ትምሕርትን በመስጠት፡-

መዕሩር (ረሒመሁላህ) ሲናገር እንዲህ ይላል፡- አባ ዘርን (ረዲየላሁ ዐንሁ) ከአገልጋይ ባሪያው ጋር አገኘሁት፡፡ አባዘርም አገልጋይ ባሪያውም ተመሳሳይ ሽርጥና ኩታ ለብሰው ነበር፡፡ ስለጉዳዩም ጠየቅሁት፡፡ እሱም እንዲህ አለኝ፡- እኔ አንድን ሰው ሰደብኩት፡፡ በእናቱም "አንተ የጥቁር ልጅ!" በማለት አነወርኩት፡፡ እሱም ለአላህ መልክተኛ (ሶለላሁ ዐለይሂ ወሰለም) ሲነግርብኝ፡ እሳቸውም፡- በእናቱ በመስደብ አነወርከውን? አንተ በውስጥህ መሃይምነት ያለብህ ሰው ነህ! በማለት ተቆጡኝ፡፡ ከዛም ቀጠሉና፡- ‹‹እነሱ ወንድሞቻችሁ የኾኑ አገልጋዮቻችሁ ናቸው፡፡ አላህ በናንተ ስር አደረጋቸው፡፡ ወንድሙ በሱ ስር ያለ ሰው፡ እሱ ከሚመገበው ይመግበው፣ ከሚለብሰው ያልብሰው፣ የሚያቅታቸውን ነገር እንዲሰሩ አታስገድዷቸው፣ ካስገደዳችኋቸውም አግዟቸው›› አሉ፡፡ (ቡኻሪይ 30፣ ሙስሊም 4405፣ ሙስነድ ኢማሙ አሕመድ 22045)፡፡

በዚህ ሐዲሥ ላይ፡- ታላቁ ሶሓባ አቢ-ዘር (ረዲየላሁ ዐንሁ) አገልጋዩን እና ባሪያውን እሱ የለበሰውን አይነት ልብስ ማልበሱ፡ ለምን እንደኾነ ከመዕሩር በኩል ለቀረበለት ጥያቄ፡ የሰጠው መልስ፡- ‹‹ከበላችሁት አብሏቸው፣ ከለበሳችሁት አልብሷቸው›› የሚለው የመልክተኛው አስተምህሮ መኾኑን በመግለጽ ነው፡፡ በተጨማሪም አገልጋዩን ዐረብ ባለመኾኑ ሰበብ በንቀት አይን መመልከቱ ‹‹የመሃይማን ሥራ›› ተብሎ ወቀሳ ቀርቦበታል፡፡

በተጨማሪም ለመጀመሪያ ጊዜ በከዕባ አናት ላይ በመውጣት፡ አዛን እንዲያደርግ የተፈቀደለት ጥቁሩና ሐበሻዊው ቢላል መኾኑን መዘንጋት የለብንም፡፡ ቢላል (ረዲላሁ ዐንሁ) ዐረብ አለመኾኑና የጥቁር ዘር መኾኑ፡ የሳቸው ሙአዚን ከመኾን አላገደውም፡፡

👍2👏1

26.5K views18:12