فزاعية للأربعين ( يتلگه الضعن بيهه )


اجت من اليسر زينب لهاليهه
تعبانه وهزيله وحيل مابيهه
سبع الگنطره بيمن يلاگيهه
ازنوده امگطعه وهامته امطبريهه

       ( النزلة )

ماعنده الكفيل ازنود
يتلگه الضعن بيهه


بيش ينزل سكينه
ومگطوعات چفينه
وماخله السهم عينه
ومحتار شيحاچيهه


ضل محتار شيگلهه
ومايگدر ينزلهه
واخته اتريد كافلهه
ايگوم وينشد اعليهه


اتريد الجابهه ايردهه
ايباصرهه ويناشدهه
واعتاب وهضم عدهه
وتعاتب بهاليهه


وتعاتب بولياها
شو محد تلگاها
اشلون حسين ينساها
مايدري شسده اعليهه


بيهه شصار مايدري
ردت والدمع يجري
واتصيح انكسر ضهري
محتامه اعله واليهه


للمظلوم محتامه
طگهه البين عالهامه
اتگول الليل مانامه
افراگ حسين گاضيهه


افراگ حسين دولبهه
ماشاف الشمر سبهه
بالشام الدهر ذبهه
ومحترگات رجليهه


✍شاعرة اهل البيت
الملة ام هجران العمارچيه
غير مبري الذمه من يحذف اسم الشاعرة او ينسب الرثاء لشخص اخر

https://tttttt.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك